Magmatinumanon!

 1. Sa unsang paagi nagmaunongon kang Jehova ang tulo ka Saksi?

HUNAHUNAA kining esena sa tulo ka Saksi ni Jehova. (1) Usa ka adlaw niana diha sa eskuwelahan sa batang sister, giingnan sa maestra ang tanang estudyante sa iyang klase nga moapil sa usa ka selebrasyon. Nahibalo ang sister nga dili nâ makapalipay sa Diyos, maong matinahoron siyang nananghid nga dili moapil. (2) Usa ka maulawon nga batan-ong brader ang namalaybalay. Iyang nahibal-an nga eskolmet niya ang nagpuyo sa sunod nga balay, nga sa miagi nagyagayaga sa mga Saksi ni Jehova. Pero, giadto gihapon niya kini. (3) Usa ka brader ang nagkugi aron suportahan ang iyang pamilya. Usa ka adlaw niana, gisugo siya sa iyang amo nga manglimbong o mohimog butang nga supak sa balaod. Bisag mameligrong mawad-ag trabaho, nangatarongan siya nga kinahanglan siyang magmatinud-anon ug mosunod sa balaod kay mao nay gisugo sa Diyos sa Iyang mga alagad.​—Roma 13:1-4; Heb. 13:18.

 2. Unsang mga pangutana ang atong konsiderahon, ug ngano?

² Unsang hiyasa ang inyong nakita nilang tulo? Seguro nakakita mog pipila, sama sa kaisog ug pagkamatinud-anon. Pero ang importanteng hiyas nga ilabinang gipakita nila mao ang pagkamatinumanon. Matag usa nila nagmaunongon kang Jehova. Wala sila mokompromiso tungod sa ilang pagkamatinumanon. Seguradong gipasigarbo sila ni Jehova tungod sa ilang gihimo. Gusto pod natong ipasigarbo ta sa atong langitnong Amahan. Busa hisgotan nato kining mga pangutanaha: Unsa ang pagkamatinumanon? Nganong angay tang magmatinumanon? Ug unsaon nato pagpabiling matinumanon niining lisod nga panahon?

 3. (a) Unsaon pagpakita sa mga alagad sa Diyos ang pagkamatinumanon? (b) Unsang mga pananglitan ang makatabang nato nga masabtan ang kahulogan sa pagkamatinumanon?

³ Unsaon pagpakita sa mga alagad sa Diyos ang pagkamatinumanon? Pinaagi sa tibuok kasingkasing ug way paglubad nga gugma kang Jehova ug, tungod niana, sila kanunayng mobuhat sa makapalipay niya. Konsideraha kining mga impormasyona. Sa Bibliya, ang Hebreohanong pulong nga gihubad ug matinumanon (o, integridad), nagkahulogang kompleto, walay depekto, o tibuok. Pananglitan, ang mga Israelinhon naghalad kang Jehova ug mga hayop, ug ang Balaod nag-ingon nga ang mga hayop kinahanglang walay depekto.b (Lev. 22:21, 22) Ang katawhan sa Diyos dili puwedeng mohalad ug hayop nga kulang ug tiil, dalunggan, o mata. Dili pod puwede ang masakiton. Para kang Jehova, ang hayop kinahanglang kompleto, walay depekto, o tibuok. (Mal. 1:6-9) Atong masabtan kon ngano. Kon mopalit ta, tingali usa ka prutas, libro, o gamit, dili gyod nato pilion kadtong dagkog lungag o kulang ug parte. Pilion nato kadtong kompleto, walay depekto, o tibuok. Mao pod nay bation ni Jehova sa atong gugma ug pagkamaunongon kaniya. Kini kinahanglang kompleto, walay depekto, o tibuok.

 4. (a) Nganong posibleng magmatinumanon ang tawong dili hingpit? (b) Sumala sa Salmo 103:12-14, unsay gidahom ni Jehova kanato?

⁴ Angay ba tang maghunahuna nga kinahanglang hingpit ta aron magmatinumanon? Kon buot hunahunaon, mobati tang depektoso, kay masayop ta pirme. Konsideraha ning duha ka rason kon nganong dili ta angayng mahadlok. Una, si Jehova wala magpokus sa atong mga sayop. Ang iyang Pulong nag-ingon: “Kon mga kasaypanan mao pa ang imong gibantayan, Oh Jah, Oh Jehova, kinsa ba ang makabarog?” (Sal. 130:3) Nasayod siya nga kita dili hingpit ug makasasala, ug kanunay siyang nagpasaylo nato. (Sal. 86:5) Ikaduha, nahibalo si Jehova sa atong mga limitasyon, ug dili siya magdahom ug labaw sa atong makaya. (Basaha ang Salmo 103:12-14.) Busa sa unsang paagi ta mahimong kompleto, walay depekto, o tibuok sa iyang panan-aw?

 5. Para sa mga alagad ni Jehova, nganong gugma ang sekreto sa pagkamatinumanon?

⁵ Para sa mga alagad ni Jehova, ang sekreto sa pagkamatinumanon mao ang gugma. Ang atong gugma ug maunongong debosyon sa atong langitnong Amahan kinahanglang kompleto, walay depekto, o tibuok. Kon ang atong gugma dili molubad bisag gisulayan ta, kita nagmatinumanon. (1 Cron. 28:9; Mat. 22:37) Konsideraha pag-usab ang tulo ka Saksi nga atong gihisgotan sa sinugdan. Nganong nahimo to nila? Ang batang sister ba dili ganahang maglingawlingaw sa eskuwelahan, o ang batan-ong brader ba ganahang maulawan, o ang pamilyadong brader ba gustong mawad-ag trabaho? Siyempre dili. Hinunoa, nahibalo sila nga si Jehova dunay matarong nga sukdanan, ug ang ilang hunahuna napokus sa kon unsay makapalipay sa ilang langitnong Amahan. Kay gihigugma nila si Jehova, kanunay silang maghunahuna kaniya sa dili pa modesisyon. Niining paagiha, gipamatud-an nilang matinumanon sila.

 6. (a) Nganong angay kang magmatinumanon? (b) Sa unsang paagi si Adan ug Eva wala magmatinumanon?

⁶ Nganong kinahanglan tang magmatinumanon? Tungod kay gikuwestiyon ni Satanas si Jehova, ug gikuwestiyon sab ka niya. Ang maong rebelyosong anghel naghimo sa iyang kaugalingon nga Satanas, o “Magsusukol,” didto sa tanaman sa Eden. Gisulayan niyag daot ang reputasyon ni Jehova pinaagi sa pag-ingong ang Diyos daotan, kaugalingon ray gihunahuna, ug dili matinud-anong Magmamando. Ikasubo, si Adan ug Eva midapig kang Satanas ug mirebelde kang Jehova. (Gen. 3:1-6) Ang kinabuhi sa Eden naghatag nilag daghang kahigayonan sa pagpalig-on sa ilang gugma kang Jehova. Pero sa panahon nga gisulayan sila ni Satanas, ang ila diayng gugma depektoso, dili kompleto, o dili tibuok. Sa ulahi, mitungha ang laing pangutana: Duna bay mga tawo nga magmaunongon kang Jehova tungod sa gugma? Sa laing pagkasulti, kaya ba sa mga tawo nga magmatinumanon? Mitungha ang maong pangutana sa panahon ni Job.

 7. Sumala sa Job 1:8-11, unsay pagbati ni Jehova ug ni Satanas sa pagkamatinumanon ni Job?

⁷ Si Job nabuhi dihang didto pa sa Ehipto ang mga Israelinhon. Walay tawo nga parehas niya ka matinumanon. Sama nato, dili siya hingpit. Nasayop sab siya. Pero, gimahal siya ni Jehova tungod sa iyang pagkamatinumanon. Lagmit gikuwestiyon na ni Satanas si Jehova kon magmatinumanon ba gyod ang mga tawo. Maong gisultihan ni Jehova si Satanas bahin kang Job. Ang kinabuhi nianang tawhana nagpakita nga bakakon si Satanas! Maong giingnan ni Satanas si Jehova nga iyang sulayan ang pagkamatinumanon ni Job. May pagsalig si Jehova sa iyang higalang si Job, ug gitugotan niya si Satanas nga sulayan kini.​—Basaha ang Job 1:8-11.

 8. Giunsa pagsulay ni Satanas si Job?

⁸ Si Satanas way kaluoy ug mamumuno. Giwagtang ni Satanas ang tanang gipanag-iya ni Job, gipatay ang iyang mga ulipon, ug gidaot ang iyang reputasyon. Sunod, gipatay niya ang 10 ka pinanggang anak ni Job. Dayon gihatagan niya si Job ug grabeng hubag gikan sa ulo hangtod sa tiil. Naguol pag-ayo ang asawa ni Job maong iya ning giingnan nga tunglohon ang Diyos ug magpakamatay. Gusto pod ni Job nga mamatay, pero nagmatinumanon gihapon siya. Dayon misulay si Satanas ug laing paagi. Gigamit niya ang tulo ka amigo ni Job. Pipila ka adlaw silang nakig-uban kang Job, pero wala nila siya hupaya. Ila hinuong gikasab-an siya. Sila miingon nga ang Diyos maoy hinungdan sa iyang pag-antos ug wala pabilhi sa Diyos ang iyang pagkamatinumanon. Miingon pa gani sila nga daotan si Job ug angay lang mag-antos!​—Job 1:13-22; 2:7-11; 15:4, 5; 22:3-6; 25:4-6.

 9. Bisan pa sa mga kalisdanan, unsay wala buhata ni Job?

⁹ Giunsa pag-atubang ni Job ang maong kalisdanan? Dili siya hingpit. Nasuko siya ug iyang gibadlong ang nagpakaaron-ingnong mga maghuhupay, ug nakasulti siya sa mga pulong nga sa ulahi giangkon niyang pinasagad lang. Mas gidepensahan niya ang iyang pagkamatarong imbes ang pagkamatarong sa Diyos. (Job 6:3; 13:4, 5; 32:2; 34:5) Pero bisan pa sa mga kalisdanan, wala gyod motalikod si Job kang Jehova nga Diyos. Wala siya motuo sa bakak nga gipanulti sa iyang nagpakaaron-ingnong mga higala. Siya miingon: “Halayo ra alang kanako nga ipahayag kamo nga matarong! Hangtod nga ako mamatay dili ko wad-on ang akong integridad gikan kanako!” (Job 27:5) Nagpakita ni nga matinumanon gyod si Job, ug masundog nato siya.

10. Nganong naapil ka dihang gikuwestiyon ni Satanas si Job?

¹⁰ Nganong naapil ka dihang gikuwestiyon ni Satanas si Job? Sama rag miingon siya nga wala gyod ka mahigugma kang Jehova nga Diyos, nga moundang kag alagad aron dili mamatay, ug nga dili tininuod ang imong pagkamatinumanon! (Job 2:4, 5; Pin. 12:10) Unsay imong pagbati ana? Sakit kaayo, dili ba? Pero hunahunaa ni: Si Jehova nagtugot kang Satanas nga sulayan ang imong pagkamatinumanon. May pagsalig si Jehova nimo, maong iya kang gihatagag kahigayonan nga ipakita ang imong pagkamatinumanon ug motabang sa pagpamatuod nga bakakon si Satanas. Ug nagsaad Siyang tabangan ka. (Heb. 13:6) Pribilehiyo gyod nga ang Magmamando sa uniberso may pagsalig nimo! Imo bang nakita kon nganong importante ang pagkamatinumanon? Pinaagi niini, atong mapamatud-ang bakakon si Satanas, mabayaw ang ngalan sa atong Amahan, ug masuportahan ang Iyang pagmando. Unsay atong buhaton aron magmatinumanon?

11. Unsay atong makat-onan kang Job?

¹¹ Nagkagrabe ang pag-atake ni Satanas niining “kataposang mga adlaw.” (2 Tim. 3:1) Niining lisod nga panahon, unsaon nato pagpabiling matinumanon? Daghan tag makat-onan kang Job. Sa wala pa siya mag-antos, nagmatinumanon na si Job kang Jehova sa taas nga panahon. Konsideraha ang tulo ka leksiyon nga atong makat-onan niya.

12. (a) Sumala sa Job 26:7, 8, 14, giunsa pag-ugmad ni Job ang kahingangha ug pagtahod kang Jehova? (b) Sa unsang paagi mahingangha sab ta sa Diyos?

¹² Milalom ang gugma ni Job sa Diyos kay naugmad niya ang kahingangha kang Jehova. Migahin si Job ug panahon sa pagpamalandong sa kalalangan ni Jehova. (Basaha ang Job 26:7, 8, 14.) Nahingangha siya dihang iyang gihunahuna ang yuta, langit, panganod, ug dalugdog, ug naamgohan niya nga gamay ra siyag nahibaloan sa kalalangan ni Jehova. Gipabilhan sab niya ang pulong ni Jehova. Miingon si Job: “Akong gitipigan ang mga pulong sa iyang baba.” (Job 23:12) Si Job nahingangha ug nagtahod kang Jehova. Nahigugma siya sa iyang Amahan ug gusto niyang lipayon siya. Ingong resulta, mas determinado si Job nga magmatinumanon. Kinahanglan natong sundogon si Job. Karon, mas daghan tag nahibaloan bahin sa kalalangan. Ug naa tay kompletong Bibliya nga motabang nato nga mas mailhan si Jehova. Ang tanan natong makat-onan makapahingangha nato. Sa baylo, ang atong kahingangha ug pagtahod kang Jehova magpalihok nato nga higugmaon ug sundon siya ug mas maningkamot ta nga magmatinumanon.​—Job 28:28.

13-14. (a) Base sa Job 31:1, giunsa pagpakita ni Job ang iyang pagkamasinugtanon? (b) Unsaon nato pagsundog si Job?

¹³ Si Job nakapabiling matinumanon pinaagi sa pagkamasinugtanon. Nahibalo si Job nga aron magmatinumanon, gikinahanglan ang pagkamasinugtanon. Gani, matag higayon nga magmasinugtanon ta, mas determinado tang magmatinumanon. Naningkamot si Job sa pagsunod kang Jehova kada adlaw. Pananglitan, nag-amping siya sa iyang pagpakiglabot sa mga babaye. (Basaha ang Job 31:1.) Ingong minyo, nahibalo siya nga sayop ang paghatag ug romantikong interes kang bisan kinsang babaye gawas sa iyang asawa. Karon, nagkinabuhi ta sa kalibotang daghag maninental. Sama kang Job, likayan ba nato nga makahatag ug dili angayng pagtagad kang bisan kinsa nga dili nato kapikas? Likayan ba sab nato ang pagtan-awg bastos o pornograpikong mga letrato, bisan asa man ni makita? (Mat. 5:28) Kon maningkamot tang pugngan ang kaugalingon kada adlaw, mas determinado tang magmatinumanon.

¹⁴ Masinugtanon sab si Job kang Jehova kon bahin sa iyang panglantaw sa materyal nga mga butang. Nasabtan niya nga kon mosalig siya sa iyang kabtangan, siya makasala ug angayng silotan. (Job 31:24, 25, 28) Karon, nagkinabuhi ta sa kalibotan nga materyalistiko kaayo. Kon maugmad nato ang hustong panglantaw sa kuwarta ug kabtangan, nga maoy gitambag sa Bibliya, mas determinado tang magmatinumanon.​—Prov. 30:8, 9; Mat. 6:19-21.

15. (a) Unsang paglaom ang nakatabang kang Job nga magmatinumanon? (b) Nganong makatabang nato ang kanunayng paghunahuna sa paglaom nga gitanyag ni Jehova?

¹⁵ Si Job nakapabiling matinumanon pinaagi sa paghunahuna nga panalanginan siya sa Diyos. Masaligon siya nga importante sa Diyos ang iyang pagkamatinumanon. (Job 31:6) Bisan sa mga pagsulay, masaligon si Job nga panalanginan ra siya ni Jehova. Ang maong pagsalig nakatabang gyod niya nga magmatinumanon. Nalipay kaayo si Jehova sa pagkamatinumanon ni Job maong dagaya Niyang gipanalanginan siya bisag dili hingpit! (Job 42:12-17; Sant. 5:11) Sa umaabot, makadawat si Job ug mas nindot nga mga panalangin. Masaligon ba ka nga panalanginan ni Jehova ang imong pagkamatinumanon? Ang atong Diyos wala mausab. (Mal. 3:6) Kon atong hinumdoman nga importante niya ang atong pagkamatinumanon, magpabiling buhi sa atong kasingkasing ang atong paglaom sa usa ka nindot nga kaugmaon.​—1 Tes. 5:8, 9.

16. Unsay determinado natong buhaton?

¹⁶ Busa, magmadeterminado sa pagpabiling matinumanon! Usahay, bation seguro nimo nga ikaw ray nagmatinumanon, pero wala gyod ka mag-inusara. Kauban nimo ang milyonmilyong matinumanon sa tibuok kalibotan. Maapil sab ka sa grupo sa mga lalaki ug babaye nga nagmatinumanon kaniadto, bisag nag-atubang sa kamatayon. (Heb. 11:36-38; 12:1) Hinaot kitang tanan magmadeterminado nga magmatinumanon sama kang Job, kinsa miingon: “Dili ko wad-on ang akong integridad gikan kanako!” Ug hinaot ang atong pagkamatinumanon maghimaya kang Jehova hangtod sa hangtod!