Unsay Mawala Kon Moabot na ang Gingharian?

1, 2. (a) Sa unsang paagi kining sistemaha sa mga butang ikakomparar sa kriminal nga gisentensiyahag kamatayon? (Tan-awa ang hulagway sa sinugdan sa artikulo.) (b) Unsay mahimong reaksiyon dihang mawala kining daotang sistema?

“PATAY NA NING TAWHANA!” Isinggit kana dihang ang usa ka peligrosong kriminal ipagawas sa selda. Nganong makasulti man niana ang mga guwardiya? Ang maong tawo himsog tan-awon ug walay sakit nga makamatay. Pero dad-on siya sa lugar diin siya patyon. Busa, ang maong kriminal samag patay na gyod.a

² Sa diwa, ang sistema sa mga butang karon pareho nianang tawong gisentensiyahag kamatayon. Kining daotang kalibotan dugay nang gihukman ug hapit nang taposon. Ang Bibliya nag-ingon: “Ang kalibotan nagakahanaw.” (1 Juan 2:17) Segurado ang kataposan niining sistemaha. Pero, dunay kalainan sa kataposan sa kalibotan ug nianang sa tawo nga gisentensiyahag kamatayon. Sa maong tawo, may pipila tingali nga moprotesta sa iyang sentensiya, nga mokuwestiyon sa hukom o mohangyo nga dili idayon ang pagpatay. Pero sa kaso niining kalibotana, ang sentensiya naggikan sa hingpit nga maghuhukom ug Magmamando sa uniberso. (Deut. 32:4) Ang pagpahamtang dili malangan, ug ang sentensiya dili kadudahan. Human sa silot, ang tanang intelihenteng linalang sa uniberso kombinsido nga napahamtang ang hustisya. Pagkadakong kahupayan!

 3. Unsang upat ka bahin niining kalibotana ang mawala kon moabot na ang Gingharian sa Diyos?

³ Apan, unsay nalakip sa “kalibotan” nga “nagakahanaw”? Nalakip niana ang daghang bahin sa kalibotan karon nga gihunahuna sa mga tawo ingong permanente. Kanang tanan mahanaw. Makapaguol ba nâ nga balita? Dili gayod! Gani, importanteng bahin kana sa “maayong balita sa gingharian.” (Mat. 24:14) Busa, atong hisgotan kon unsay mawala kon moabot na ang Gingharian. Atong konsiderahon ang upat ka bahin: Mga daotan, korap nga mga organisasyon, daotang mga buhat, ug makaluluoyng kahimtang. Sa matag kahimtang, atong susihon (1) kon sa unsang paagi kana nga bahin sa kalibotan nakaapektar nato, (2) kon unsay buhaton ni Jehova niana, ug (3) kon sa unsang paagi iya kanang pulihan ug maayong kahimtang.

 4. Sa unsang paagi ang mga daotan nakaapektar nato?

⁴ Sa unsang paagi nakaapektar nato ang mga daotan? Human sa pagtagna nga kita karon anaa sa “makuyaw nga mga panahong lisod sagubangon,” si apostol Pablo giinspirar sa pagsulat: “Ang mga tawong daotan ug mga impostor mosamot pa kangil-ad.” (2 Tim. 3:1-5, 13) Nakita ba nimo nga nagakatuman ang maong tagna? Daghan kanato ang biktima sa mga daotan, sama sa madaogdaogong mga tawo, madumtanong mga panatiko, ug mapintas nga mga kriminal. Ang pipila klarong daotan; ang uban impostor, nga kunohay buotan. Bisag wala ta mabiktima nila, nakaapektar gihapon kanato ang mga daotan. Maguol ta dihang makabalita ta bahin sa ilang ngilngig nga mga binuhatan, sama sa pag-abuso sa mga bata, tigulang, ug sa uban pa nga dili makadepensa sa kaugalingon. Ang daotang mga tawo nagpakitag kinaiya nga sama nianang sa mga hayop o demonyo pa gani. (Sant. 3:15) Ikalipay nga ang Pulong ni Jehova dunay maayong balita nga kapuli nianang daotang balita.

 5. (a) Unsang kahigayonan ang gihatag ngadto sa mga daotan? (b) Unsay mahitabo sa mga daotan nga dili magbag-o?

⁵ Unsay buhaton ni Jehova? Karon, gihatagan ni Jehova ang mga daotan ug kahigayonan nga magbag-o. (Isa. 55:7) Ingong indibiduwal, wala pa ipahamtang kanila ang kataposang paghukom. Kining sistemaha ang gihukman. Pero unsay mahitabo niadtong dili magbag-o ug padayong mosuportar niining sistemaha hangtod sa pagsugod sa dakong kasakitan? Si Jehova nagsaad nga mawala ang daotan dinhi sa yuta hangtod sa hangtod. (Basaha ang Salmo 37:10.) Basin maghunahuna ang mga daotan nga dili sila maapil sa maong paghukom. Gitago sa daghan ang ilang daotang buhat, ug sa kalibotan karon, morag makaikyas sila sa hustisya ug silot. (Job 21:7, 9) Bisan pa niana, ang Bibliya nagpahinumdom kanato: ‘Ang mga mata [sa Diyos] anaa sa mga dalan sa tawo, ug iyang makita ang tanan niyang mga lakang. Walay kangitngit ni mabagang kangiob diin makatago sa ilang kaugalingon ang mga nagabuhat sa makadaot.’ (Job 34:21, 22) Walay matago kang Jehova nga Diyos. Dili siya malimbongan sa mga impostor; walay kangitngit nga makasalipod sa iyang gamhanang mga mata ug makita niya kon unsa gyoy tinuod nga nahitabo. Busa human sa Armagedon, wala na tay makitang daotan bisan pag susihon nato ang ilang dapit. Mawala na sila hangtod sa hangtod!​—Sal. 37:12-15.

 6. Kinsay magpabilin dihang mawala na ang mga daotan, ug nganong maayong balita kana?

⁶ Kinsay magpabilin dihang mawala ang mga daotan? Si Jehova nagsaad: “Ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.” Dayon ang maong salmo nag-ingon: “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.” (Sal. 37:11, 29) Kinsa ang mga “maaghop” ug “matarong”? Ang maaghop mao kadtong mapainubsanong midawat sa pagtudlo ug paggiya ni Jehova; ang matarong mao kadtong gustong mobuhat sa husto sa panan-aw ni Jehova. Karon, mas daghan ang daotan kay sa matarong. Pero sa bag-ong kalibotan, ang mga maaghop ug matarong dili na mao ang kinagamyan o kinadaghanan; sila na lang ang magpabiling buhi. Oo, himoon sa maong katawhan ang yuta nga usa ka paraiso!

 7. Sa unsang paagi nakaapektar nato ang korap nga mga organisasyon?

⁷ Sa unsang paagi nakaapektar nato ang korap nga mga organisasyon? Sagad, ang hinungdan sa grabeng pagkadaotan karon dili ang mga indibiduwal kondili ang mga organisasyon. Pananglitan, hunahunaa ang relihiyosong mga organisasyon nga naglimbong sa minilyong tawo bahin sa kinaiyahan sa Diyos, sa pagkakasaligan sa Bibliya, sa kaugmaon sa yuta ug tawo​—ug daghan pang topiko. O unsay imong hunahuna sa mga gobyerno nga nagsuportar sa gubat ug panag-away sa rasa, nagdaogdaog sa mga pobre ug sa dili makadepensa sa kaugalingon, ug nagpadato pinaagig panghiphip ug paboritismo? Unsay imong ikaingon sa hakog nga mga korporasyon nga naghugaw sa palibot, sobrang nagdaot sa kahinguhaan sa yuta (natural resources), ug nagpahimulos sa pagkadaling motuo sa mga mamalitay aron madato ang pipila samtang ang minilyon nag-antos sa kapobre? Walay duhaduha, ang korap nga mga organisasyon maoy sagad nga hinungdan sa grabeng pag-antos karon.

 8. Sumala sa Bibliya, unsay mahitabo sa mga organisasyon nga morag lig-ong tan-awon karon?

⁸ Unsay buhaton ni Jehova? Ang dakong kasakitan magsugod dihang ang politikal nga elemento moatake sa tanang bakak nga relihiyon, nga girepresentahan sa bigaon nga gitawag ug Dakong Babilonya. (Pin. 17:1, 2, 16; 18:1-4) Ang maong relihiyosong mga organisasyon bug-os nga malaglag. Pero, unsay mahitabo sa ubang korap nga organisasyon? Sa Bibliya, gipakasama sa mga bukid ug isla ang mga organisasyon ug institusyon nga morag lig-ong tan-awon karon. (Basaha ang Pinadayag 6:14.) Ang Pulong sa Diyos nagtagna nga pagalumpagon ang mga gobyerno ug ang tanang organisasyon nga nagdepende niini. Sa kataposang bahin sa dakong kasakitan, laglagon ang tanang gobyerno niining daang kalibotan ug ang tanang organisasyon nga wala modapig sa Gingharian sa Diyos. (Jer. 25:31-33) Human niana, wala na gyoy korap nga mga organisasyon!

 9. Nganong makaseguro ta nga organisado ang bag-ong yuta?

⁹ Unsay mopuli sa korap nga mga organisasyon? Human sa Armagedon, may magpabilin pa bang organisasyon sa yuta? Ang Bibliya nag-ingon: “Adunay bag-ong mga langit ug usa ka bag-ong yuta nga atong ginapaabot sumala sa iyang saad, ug niini magpuyo ang pagkamatarong.” (2 Ped. 3:13) Wala na ang daang mga langit ug yuta​—ang korap nga mga gobyerno ug ang katilingban ilalom niini. Unsay mopuli? Ang ekspresyong “bag-ong mga langit ug usa ka bag-ong yuta” nagpasabot nga dunay bag-ong gobyerno nga magmando sa usa ka bag-ong katilingban. Ang Gingharian ubos sa pagmando ni Jesu-Kristo hingpit nga magbanaag sa personalidad ni Jehova nga Diyos, kinsa Diyos sa kahapsay. (1 Cor. 14:33) Busa, mahimong organisado ang “bag-ong yuta.” Maayong mga tawo ang magadumala niini. (Sal. 45:16) Sila giyahan ni Kristo ug sa iyang 144,000 nga kaubang magmamando. Hunahunaa ang panahon dihang ang tanang korap nga mga organisasyon pulihag usa ka nahiusa ug dili korap nga organisasyon!

10. Unsang daotang mga buhat ang komon sa inyong lugar, ug sa unsang paagi naapektohan ka ug ang imong pamilya?

¹⁰ Sa unsang paagi nakaapektar nato ang daotang mga buhat? Daghan kaayog daotang buhat sa kalibotan karon. Kini nga sistema puno sa imoral, dili matinud-anon, ug bayolenteng mga buhat. Ang mga ginikanan naglisod pag-ayo sa pagpanalipod sa ilang mga anak batok niana. Ang media morag nag-anam ka hanas sa paghimo sa tanang daotang buhat nga makapadani samtang nagtamay sa mga sukdanan ni Jehova sa maayo ug daotan. (Isa. 5:20) Ang matuod nga mga Kristohanon naningkamot nga suklan kana aron dili sila maimpluwensiyahan sa kalibotan nga walay pagtahod sa mga sukdanan ni Jehova.

11. Unsay atong makat-onan sa paghukom ni Jehova sa Sodoma ug Gomora?

¹¹ Unsay himoon ni Jehova niining daotang mga buhat? Konsideraha ang iyang gihimo sa pagkadaotan nga kaylap kaayo sa Sodoma ug Gomora. (Basaha ang 2 Pedro 2:6-8.) Ang matarong nga si Lot nag-antos sa pagkadaotan nga naglibot niya ug sa iyang pamilya. Dihang gilaglag ni Jehova ang maong dapit, mihimo siyag labaw pa kay sa pagtapos sa pagkadaotan didto. Siya “naghatag ug sumbanan alang sa mga tawong dili-diyosnon labot sa mga butang nga moabot.” Sama nga gitapos ni Jehova ang tanang imoral nga mga buhat kaniadto, taposon sab niya ang tanang pagkadaotan karon dihang ipahamtang na niya ang paghukom niining presenteng sistema.

12. Unsay gusto nimong buhaton dihang mawala na ang daang sistema sa mga butang?

¹² Unsay mopuli sa daotang mga buhat? Ang Paraisong yuta mapuno sa makapalipayng mga buhat. Hunahunaa ang makapalipayng buluhaton sa paghimo sa yuta nga paraiso o sa pagtukod ug mga balay para nato ug sa atong mga minahal. Hunahunaa ang kalipay sa pag-abiabi sa minilyong nangamatay nga mabuhi pag-usab ug ang kalipay sa pagtudlo kanila sa mga sugo ni Jehova ug sa mga pakiglabot niya sa iyang katawhan latas sa kasaysayan. (Isa. 65:21, 22; Buh. 24:15) Daghan na kaayo tag buluhaton nga makapalipay nato ug makadayeg kang Jehova!

13. Unsang makaluluoyng kahimtang karon ang resulta sa pagrebelde ni Satanas, Adan, ug Eva?

¹³ Sa unsang paagi nakaapektar nato ang makaluluoyng kahimtang? Ang mga daotan, korap nga mga organisasyon, ug ang daotang mga buhat mao ang hinungdan sa makaluluoyng kahimtang sa kalibotan. Kinsa kanato ang wala maapektahi sa gubat, kapobrehon, ug diskriminasyon sa rasa, o kaha sa sakit ug kamatayon? Apektado tang tanan niana. Resulta kana sa pagrebelde kang Jehova sa tulo ka daotang indibiduwal​—si Satanas, Adan, ug Eva. Walay usa kanato ang makaikyas sa kagubot nga resulta sa ilang pagrebelde.

14. Unsay buhaton ni Jehova sa makaluluoyng kahimtang? Paghatag ug pananglitan.

¹⁴ Unsay buhaton ni Jehova sa makaluluoyng kahimtang? Hunahunaa ang gubat. Si Jehova nagsaad nga taposon kana hangtod sa hangtod. (Basaha ang Salmo 46:8, 9.) Unsay mahitabo sa sakit? Wad-on na niya kini. (Isa. 33:24) Unya, ang kamatayon? Wagtangon kini ni Jehova hangtod sa kahangtoran! (Isa. 25:8) Taposon niya ang kapobrehon. (Sal. 72:12-16) Mao pod nay iyang buhaton sa tanang makaluluoyng kahimtang nga nakapalisod sa kinabuhi karon. Wagtangon gani niya ang daotang “hangin” niining sistemaha sa kalibotan, kay mawala na gyod ang daotang impluwensiya ni Satanas ug sa iyang mga demonyo nga kaylap kaayo karon.​—Efe. 2:2.

15. Human sa Armagedon, unsa ang pipila ka butang nga mawala hangtod sa kahangtoran?

¹⁵ Mahanduraw ba nimo ang kalibotan nga wala nay gubat, sakit, o kamatayon? Hunahunaa ra​—wala nay army, navy, o air force! Wala nay armas o monumento sa gubat. Wala nay ospital, doktor, nars, ug health insurance; o kaha morge, punerarya, embalsamador, o menteryo! Kay wala nay krimen, dili na kinahanglan ang security agency, alarm system, o polis; wala na pod tingaliy kandado o yawi! Hunahunaa, wala na tay kagul-an ug kabalak-an.

16, 17. (a) Unsay bation sa mga maluwas sa Armagedon? Iilustrar. (b) Unsaon nato pagsegurong magpabilin ta dihang mawala na ang daang kalibotan?

¹⁶ Sama sa unsa unya ang kinabuhi dihang mawala na ang makaluluoyng kahimtang? Lisod nang hunahunaon. Dugay na tang nagpuyo niining daang kalibotan, ug tingali wala na ta makamatikod sa grabeng stress nga nahatag niini kanato. Pananglitan, ang mga tawong nagpuyo duol sa estasyon sa tren basin dili na makamatikod sa kabanha sa tren, ug ang nagpuyo duol sa basurahan basin dili na makamatikod sa kabaho sa basura. Pero hunahunaa kon wala na ang dili maayong kahimtang​—pagkamakapahupay!

¹⁷ Unsay mopuli sa stress nga atong gibati karon? Ang Salmo 37:11 nag-ingon: “Sila makakaplag gayod sa ilang tumang kalipay sa kadagaya sa pakigdait.” Makapatandog kaayo kana, dili ba? Mao gyod nay gusto ni Jehova para nimo. Busa, buhata ang tanan aron makapabiling suod kang Jehova ug sa iyang organisasyon niining malisod nga kataposang mga adlaw! Pabilhi ang imong paglaom, pamalandonga kini, himoa kining buhi sa imong hunahuna ug kasingkasing​—ug kanunay kining isulti sa uban! (1 Tim. 4:15, 16; 1 Ped. 3:15) Pinaagi niana, makaseguro ka nga dili ka maapil dihang mawala na ang daang kalibotan. Hinunoa, magpabilin ka​—buhi ug malipayon—​hangtod sa kahangtoran!