Ang Kauswagan Makasulay sa Imong Pagtuo

ANG kauswagan makasulay sa pagtuo sa usa ka tawong matarong. Ang pagpangamas aron mouswag sa materyal mosangpot ug pagkawala sa pagtuo. (1 Timoteo 6:9, 10) Apan ang kauswagan makasulay usab sa pagtuo sa laing paagi. Kon makita sa tawong matarong nga daghang tawong daotan ang nagmauswagon sa materyal samtang siya nagaantos, tingali siya matental sa pagtinguha sa dili-diyosnong dalan. Aw, kini miagak gani sa ubang mga alagad ni Jehova sa pagduhaduha sa bili sa pagsubay sa usa ka matarong nga kinabuhi!

Kini nahitabo sa musikerong Levihanon nga si Asap sa panahon sa pagmando sa haring si David sa Israel. Nagkomposo si Asap ug mga salmo nga gigamit sa publikong pagsimba. Uban kang Heman ug Jeduthun, siya usab nanagna, nagadayeg ug nagapasalamat kang kang Jehova nga Diyos nga dinuyogan sa musika. (1 Cronicas 25:1; 2 Cronicas 29:30) Bisag pribilehiyado si Asap, ang Salmo 73 nagpakita nga ang materyal nga kauswagan sa mga tawong daotan nahimong dakong pagsulay sa iyang pagtuo.

Peligrosong Tinamdan ni Asap

“Ang Diyos maayo kaayo sa Israel, kanila nga putli ug kasingkasing. Apan alang kanako, ang akong mga tiil hapit nang madakin-as, hapit nang mahiligas ang akong mga lakang.” (Salmo 73:1, 2) Niining mga pulonga, gidawat ni Asap nga si Jehova maayo sa nasod sa Israel. Ilabina gayod kanilang “putli ug kasingkasing,” tungod kay maoy ilang tinguha ang paghatag sa Diyos ug eksklusibong debosyon ug pag-amot alang sa kadayeganan sa iyang balaang ngalan. Kon kita adunay ingon niana nga tinamdan, atong dayegon si Jehova pinaagi sa pagsulti ug maayo bahin kaniya bisan kon kita grabe nga ginasulayan tungod sa kauswagan sa mga daotan o sa ubang kahimtang.​—Salmo 145:1, 2.

Bisan tuod nasayod si Asap sa pagkamaayo ni Jehova, ang iyang mga tiil hapit mahiligas gikan sa matarong nga dalan. Daw sila nahadakin-as sa nagyelo nga yuta sa panahon sa makapakapoy nga lumba sa paglakaw. Nganong ang iyang pagtuo naluya pag-ayo? Siya miingon: “Kay nasina ako sa mga mapasiatabon, sa dihang nakita ko ang kalinaw sa mga tawong daotan. Kay walay kahapdos ang ilang kamatayon; ug busdik ang ilang tungol. Sila walay kasamok nga iya sa tawo, ug sila wala hampaka sama sa ubang mga tawo.”​—Salmo 73:3-5.

Nasina si Asap sa materyal nga kauswagan sa mga tawong daotan. Daw nagatagamtan sila ug malinawon nga kinabuhi, bisag nagatigom sila ug bahandi sa malimbongong mga paagi. (Itandi ang Salmo 37:1.) Bisan pa sa ilang daotang mga buhat, sa panagway sa gawas sila may kasegurohan. Ngani, ang ilang kinabuhi daw matapos nga walay grabeng mga kahapdos sa kamatayon! Sila usahay nangamatay nga malinawon ug masaligon sa kaugalingon, nga walay pagpakabana sa espirituwal nga panginahanglan. (Mateo 5:3) Sa laing bahin, ang ubang mga alagad sa Diyos nagaantos ug masakit nga balatian ug kamatayon, apan siya nagapalig-on kanila, ug sila adunay kahibulongang paglaom sa pagkabanhaw.​—Salmo 43:1-3; Juan 5:28, 29.

Daghang tawong daotan walay mga suliran sa panglawas nga magpugong kanila sa pagpahimulos sa ilang dagayang pundo sa pagkaon. “Busdik ang ilang tungol,” dagko ang ilang mga tiyan. Dugang pa, sila walay “kasamok nga iya sa tawo,” kay dili sama sa kadaghanang tawo, sila dili na kinahanglang mangamas pa sa pagbatog mga kinahanglanon sa kinabuhi. Si Asap mihinapos nga ang mga daotan “wala hampaka sama sa ubang mga tawo.” Sila ilabinang nakaikyas sa mga pagsulay nga maagoman sa mga tawong diyosnon tungod sa pagsunod sa ulahi nga mga sukdanan ni Jehova sa daotang kalibotan ni Satanas.​—1 Juan 5:19.

Tungod kay nagmauswagon ang daotan, si Asap nagpadayon sa pag-ingon bahin kanila: “Busa ang ilang pagkamapahitas-on maoy ilang kulentas; ang kapintasan nasul-ob kanila ingon sa usa ka bisti. Ang ilang mata nabudlat tungod sa katambok; nanglabaw pa sila sa mga pangandoy sa kasingkasing. Nangyubit sila ug nagsultig daotan; bahin sa pagpanglimbong mapagawalon silang manulti. Gipatunong nila ang ilang mga baba ngadto sa kalangitan, ug ang ilang mga dila mismo nagasuroysuroy sa yuta.”​—Salmo 73:6-9.

Isul-ob sa mamumuhat ug daotan ang garbo ingong “kulentas,” ug daghan kaayo ang ilang mapintas nga mga buhat nga sila ‘naputos niini sama sa usa ka bisti.’ Determinado nga matuman ang ilang gusto, daogdaogon nila ang uban. Ang mga mata sa mga daotan wala mamiyahok tungod sa kakulang ug pagkaon kondili ‘nabudlat tungod sa katambok,’ namurot tungod sa katambok nga resulta sa pagkabusawan. (Proverbio 23:20) Malamposon kaayo ang ilang mga laraw nga sila ‘manobra pa sa mga pangandoy sa ilang mga kasingkasing.’ Ilang ipangandak ang ilang panglimbong sa mapahitas-on, ‘mapagawalong paagi.’ Gani, “gipatunong nila ang ilang mga baba ngadto sa kalangitan, ug ang ilang mga dila nagasuroysuroy sa yuta”! Kulang ug pagtahod kang bisan kinsa sa langit o sa yuta, ilang ginapasipalahan ang Diyos ug gipanamastamasan ang mga tawo.

Dayag, dili lamang si Asap ang naapektohan kaayo sa iyang nakita. Siya miingon: “Busa iyang [Diyos] gidala pagbalik ang iyang katawhan, ug gititi nila ang mga tubig nga puno. Ug sila miingon: ‘Unsaon sa pagkahibalo sa Diyos? Ug duna bay kahibalo ang Labing Hataas?’” (Salmo 73:10, 11) Mao tingali kanay gipasabot sa Hebreohanong teksto tungod kay daw nagmauswagon man ang daotan, sagopon sa pipila sa katawhan sa Diyos ang sayop nga panghunahuna ug maagak sa samang kahimtang sa mga malinapason, nga nagaingon: ‘Ang Diyos wala masayod kon unsa ang nagakahitabo ug dili molihok batok sa pagkadaotan.’ Sa laing bahin, ang pagkakita sa mga tawong daotan nga nagabuhat sa daotan nga daw wala siloti nahisama sa pag-inom ug mapait nga hilo, nga mopukaw sa matarong sa pagpangutana: ‘Nganong makatugot ang Diyos niining mga butanga? Wala ba siya makakita sa nagakahitabo?’

Gitandi ang iyang mga sirkumstansiya uban sa mga daotan, si Asap miingon: “Tan-awa! Kini ang mga daotan, nga anaa kanunay sa kasayon. Nagdugang ang ilang bahandi. Sa pagkatinuod kawang lang ang paghinlo ko sa akong kasingkasing ug sa paghunaw ko sa akong mga kamot sa pagkainosente. Ug gihampak ako sa tibuok adlaw, ug ang akong pagbadlong matag buntag.” (Salmo 73:12-14) Gibati ni Asap nga walay-kapuslanan ang pagkinabuhi sa matarong nga kinabuhi. Ang mga tawong daotan nagmauswagon, lagmit ‘nagdugang sa ilang bahandi’ pinaagi sa panglimbong. Sila daw nakalikay sa silot sa grabeng kalapasan, apan si Asap gihampak “sa tibuok adlaw”​—gikan sa iyang pagmata hangtod sa iyang pagpahulay sa gabii. Gibati niya nga gibadlong siya ni Jehova matag buntag. Sanglit kay kini daw dili makataronganon, nasulayan niini ang pagtuo ni Asap.

Usa ka Pagpasibo sa Panghunahuna

Kay nakaamgo sa kataposan nga sayop ang iyang panghunahuna, si Asap miingon: “Kon nag-ingon pa unta ako: ‘Mosulti ako ug sama niana,’ tan-awa! ako nagmabudhion sa kaliwatan sa imong mga anak. Ug ako namalandong kanunay aron mahibalo niini; kasamok kini sa akong mga mata, hangtod nakadangat ako sa dakong sangtuwaryo sa Diyos. Buot kong mahibalo sa dangatan nila. Sa pagkatinuod gibutang mo sila diha sa dapit nga madanlog. Gitugyan mo sila sa pagkalaglag. O pagkadali nga sila nahimong usa ka butang nga kahibudnganan! Pagkamakalilisang sa ilang kataposan, nangaut-ot sila sa kalit nga kalisang! Ingon sa usa ka damgo inigkamata, Oh Jehova, sa dihang ikaw mahigmata pagatamayon mo ang ilang larawan.”​—Salmo 73:15-20.

Maayo nga si Asap wala magbagulbol, dayag nga moingon nga kawang ang pag-alagad kang Jehova nga makawala sa kadasig sa mga membro sa iyang pamilya sa mga magsisimba o tingali makapaluya sa ilang pagtuo. Pagkamaayo nga magpakahilom ug sundon ang gibuhat ni Asap! Sa pagkakita kon nganong ang mga daotan daw wala makaagom ug silot bisan pa sa buhat nga daotan samtang ang mga matarong nagaantos, siya miadto sa sangtuwaryo sa Diyos. Ang maong kahimtang malinawong nakapalandong kang Asap taliwala sa mga magsisimba ni Jehova, ug napasibo ang iyang panghunahuna. Busa karon, kon kita maglibog sa atong makita, atong pangitaon usab ang mga tubag sa atong mga pangutana pinaagi sa pagpakig-uban sa katawhan sa Diyos inay ilain ang atong kaugalingon.​—Proverbio 18:1.

Nakaamgo si Asap nga gibutang sa Diyos ang mga daotan “diha sa dapit nga madanlog.” Tungod kay ang ilang mga kinabuhi nahasentro sa materyal nga mga butang, sila nameligro nga makasinatig kalit nga pagkapukan. Sa kinaulahian, moagpas kanila ang kamatayon inigkatigulang, ug ang ilang bahandi nga nakuha-sa-daotang paagi dili mohatag ug hataas nga kinabuhi alang kanila. (Salmo 49:6-12) Ang ilang kauswagan sama sa damgo nga daling molabay. Agpason ra sila sa hustisya sa dili pa sila matigulang samtang ilang anihon ang ilang ginapugas. (Galacia 6:7) Sanglit ilang gitalikdan ang bugtong Usa nga makatabang kanila, sila gipasagdan, nga walay paglaom. Sa dihang si Jehova molihok batok kanila, iyang lantawon ang ilang “larawan”​—sa ilang pagpagawal ug posisyon—​nga matamayon.

Bantayi ang Imong Reaksiyon

Kay dili maayo ang iyang reaksiyon sa iyang nakita, si Asap miadmiter: “Kay gisakit ang akong kasingkasing ug mibati ug kangutngot ang akong mga bato, ug ako walay-salabotan ug walay hibangkaagan; nahimo akong sama sa mga hayop sa imong panglantaw. Apan nagauban ako kanunay kanimo; gikuptan mo ang akong tuo nga kamot. Pinaagi sa imong tambag giagak mo ako, ug sa ulahi pagadalhon mo ako ngadto sa himaya.”​—Salmo 73:21-24.

Nagapalandong sa materyal nga kauswagan sa mga daotan ug sa pag-antos sa mga matarong makasakit sa kasingkasing sa usa ka tawo o magpasuko kaniya. Sa kinailadman​—diha sa iyang mga bato—​ang kasamok ni Asap tungod sa iyang kahimtang nakahatag kaniyag dakong kasakit. Gikan sa panglantaw ni Jehova, siya nahimong sama sa usa ka walay-salabotang hayop nga misanong tungod lamang kay nakurat. Bisan pa, si Asap ‘kanunayng nagauban sa Diyos, nga nagkupot sa iyang tuo nga kamot.’ Kon kita masayop sa atong panghunahuna apan nangitag tambag ni Jehova sama kang Asap, kuptan kita sa Diyos, sa pagpaluyo ug sa pag-agak kanato. (Itandi ang Jeremias 10:23.) Pinaagi lamang sa pagpadapat sa iyang tambag nga matultolan kita ngadto sa usa ka malipayong umaabot. Kita tingali mag-antos ug pagtamay sa usa ka panahon, apan balihon ni Jehova ang kahimtang, ‘magdala kanato ngadto sa himaya,’ o kadungganan.

Nagapabili sa panginahanglan sa pagsalig kang Jehova, si Asap midugang: “Kinsa may akoa didto sa mga langit? Ug gawas kanimo wala akoy laing gikalipayan sa yuta. Ang akong unod ug ang akong kasingkasing nangaluya. Ang Diyos mao ang kalig-on sa akong kasingkasing ug akong bahin sa panahong walay kataposan. Kay, tan-awa! sila nga nagpalayo kanimo mangahanaw. Imong pagalaglagon gayod ang matag usa nga sa pagkadaotan mibulag kanimo. Apan alang kanako, maayo ang pagpakigsuod sa Diyos. Diha sa Soberano Ginoong Jehova gihimo ko ang akong dalangpanan, aron imantala ko ang tanan mong mga buhat.”​—Salmo 73:25-28.

Sama kang Asap, gawas kang Jehova wala kitay kasaligan alang sa matuod nga kasegurohan ug kalipay. (2 Corinto 1:3, 4) Busa imbes kaibgan ang yutan-ong mga bahandi sa ubang tawo, atong alagaron ang Diyos ug magtigom ug bahandi sa langit. (Mateo 6:19, 20) Ang pagbatog inuyonang baroganan uban kang Jehova angayng mao ang atong labing dakong kalipay. Bisan kon ang atong unod ug kasingkasing maluya, siya molig-on kanato ug mohatag kalinaw sa atong kasingkasing aron dili kita mawad-ag paglaom ug kadasig diha sa mga kalisod. Ang pagpakigsuod kang Jehova maoy usa ka hamiling kabtangan. Ang pagbulag niana mosangpot ug katalagman kanato uban sa tanan nga mobiya kaniya. Busa, sama kang Asap, magpakigsuod kita sa Diyos ug atong itugyan ang tanan natong mga kabalaka diha kaniya. (1 Pedro 5:6, 7) Kini mopalambo sa atong espirituwal nga kaayohan ug mopalihok kanato sa pagsulti sa uban mahitungod sa kahibulongang mga buhat ni Jehova.

Magmaunongon Kang Jehova

Si Asap natugaw tungod kay iyang nakita ang mamumuhat ug daotan nga nagmauswagon sa Israel, ang iyang yutang natawhan. Taliwala sa maunongong mga alagad ni Jehova, dihay “daotang mga tawo” nga sad-an sa pagpanghambog, pagkamapahitas-on, kapintasan, pagkamayubiton, ug panglimbong, ug nga nagalimod nga ang Diyos nasayod sa ilang gibuhat. (Salmo 73:1-11) Pagkaugdang nga pasidaan! Aron mapahimut-an si Jehova nga Diyos, kinahanglang magpugong gayod kita sa pagpasundayag sa mga kinaiya sama sa garbo, kapintasan, pagkamayubiton, ug pagkadili-matinud-anon. Sama kang Asap, pasagding ang tanang mga alagad ni Jehova ‘moadto sa dakong sangtuwaryo sa Diyos’ pinaagi sa pagpakigtigom kanunay uban sa Iyang maunongong mga magsisimba. Sa pagkatinuod, pasagding ang tanang nahigugma kang Jehova ‘moduol sa Diyos,’ mosalig kaniya sa paglig-on kanila bisan pa sa mga pag-antos, bisag unsa pay isulti o buhaton sa uban.​—Salmo 73:12-28; 3 Juan 1-10.

Matuod, ang materyal nga kauswagan sa mga mamumuhat ug daotan magasulay sa atong pagtuo, sama nga nasulayan si Asap. Bisan pa, kita makalahutay niini nga pagsulay kon isentro nato ang atong kinabuhi diha sa pag-alagad kang Jehova. Kita pagagantihan sa pagbuhat niini tungod kay ang ‘Diyos dili hiwi nga makalimot sa atong buhat ug sa gugma nga atong gipadayag alang sa iyang ngalan.’ (Hebreohanon 6:10) Ang atong mga pagsulay “lumalabay lang ug magaan” kon itandi sa atong ganti. (2 Corinto 4:17) Bisan ang 70 o 80 ka tuig nga pag-antos nahisama lang ug usa ka panghupaw kon itandi sa walay kataposang kinabuhi nga gisaad ni Jehova sa iyang maunongong mga alagad.​—Salmo 90:9, 10.

Hinaot nga dili nato tugotang ang materyal nga kauswagan sa mga mamumuhat ug daotan sa pagtandi sa atong mga pag-antos alang sa pagkamatarong mopugong kanato sa pagpakitag pagtuo nga maoy usa ka bunga sa balaang espiritu sa Diyos. (Galacia 5:22, 23; 1 Pedro 3:13, 14) Si Satanas malipay kon atong sundogon ang daotan, nga sagad mouswag tungod sa ilang pagkalimbongan. Hinunoa, atong pasidunggan ang ngalan ni Jehova pinaagi sa pagsukol sa mga tentasyon sa pagsalikway sa iyang matarong nga mga sukdanan. (Sofonias 2:3) Dili kita angay mabalaka sa kalamposan sa mga mamumuhat ug daotan, kay, sa labing dako, makab-ot lamang nila ang materyal nga kauswagan. Ug unsay bili niana? Kana dili gani ikatandi sa espirituwal nga kauswagan nga ginatagamtam niadtong nagapakitag pagtuo sa Soberano Ginoong Jehova.