Himoang Malamposon ang Imong Kinabuhi!

“Malipayon ang tawo nga wala maglakaw sa tambag sa mga daotan . . . Ang tanan nga iyang buhaton magmalamposon.”​—SALMO 1:1, 3.

 1. (a) Unsay panglantaw sa daghang batan-on sa kalibotan bahin sa kalamposan? (b) Giunsa paghubit sa Bibliya ang usa ka malamposong tawo?

KALAMPOSAN​—unsay kahulogan nianang pulonga kanimo? “Ang akong labing hinungdanong tumong mao ang pagkahimong malamposon sa negosyo,” matod sa usa ka batan-ong lalaki. Usa ka batan-ong babaye nag-ingon: “Ang akong dakong pangandoy mao ang pagbatog malipayong pamilya.” Apan matod pa sa laing batan-ong babaye: “Ang akong pangandoy mao lamang ang pagbatog nindot nga condo, nindot nga kotse . . . Interesado ko sa akong kaugalingon.” Ang problema mao nga dili salapi, ni pamilya, ni bisan dakog-kita nga karera ang sukdanan sa tinuod nga kalamposan. Sa Salmo 1:1-3, atong mabasa: “Malipayon ang tawo nga wala maglakaw sa tambag sa mga daotan . . . Ang iyang kalipay anaa sa balaod ni Jehova . . . Ang tanan nga iyang buhaton magmalamposon.”

 2. Asa makaplagan ang tinuod nga kalamposan, ug unsa ang bugtong paagi nga maangkon kini?

² Niini ang Bibliya nagsaad ug usa ka butang nga dili ikatanyag ni bisan kinsang tawo​—tinuod nga kalamposan! Apan wala kini maghisgot bahin sa pinansiyal nga ganansiya. Ang Bibliya mismo nagpasidaan: “Ang gugma sa salapi maoy usa ka gamot sa tanang matang sa makadaot nga mga butang.” (1 Timoteo 6:10) Ang tinuod nga kalamposan makaplagan diha sa pagpahimuot sa Diyos​—lakip sa pagsunod sa balaod ni Jehova. Kini lamang ang makahatag ug tinuod nga katagbawan ug tiunay nga kalipay! Malagmit ang ideya nga mailalom sa balaod ni Jehova ug sultihan kon unsay himoon dili maayong paminawon. Bisan pa, si Jesus nag-ingon: “Malipayon kadtong mahunahunaon sa ilang espirituwal nga panginahanglan.” (Mateo 5:3) Nakaamgo ka man o wala, gilalang ka nga may espirituwal nga mga panginahanglan​—lakip ang usa ka dulot nga panginahanglan nga mahibalo bahin sa Diyos ug makasabot sa iyang katuyoan. Busa, makasinati ka lamang ug tinuod nga kalipay kon imong tagan-an ang maong mga panginahanglan ug sundon ang “balaod ni Jehova.”

Kon Nganong Atong Gikinahanglan ang mga Balaod sa Diyos

 3. Nganong angay kitang malipay sa pagtugot kang Jehova sa ‘pagtultol sa atong lakang’?

³ Ang manalagnang si Jeremias nagsulat: “Ako nahibalo pag-ayo, Oh Jehova, nga dili iya sa tawo ang iyang dalan. Dili iya sa tawo nga nagalakaw bisan ang pagtultol sa iyang lakang.” (Jeremias 10:23) Tinuod kini sa tanang tawo, batan-on ug tigulang. Dili lamang kita kulang sa kaalam, kasinatian, ug kahibalo sa pagtultol sa atong kaugalingong mga lakang; kita wala gayoy katungod nga molakaw nga walay pagtultol. Sa Pinadayag 4:11, ang Bibliya nag-ingon: “Takos ikaw, Jehova, nga mismo among Diyos, nga modawat sa himaya ug sa dungog ug sa gahom, tungod kay imong gilalang ang tanang butang, ug tungod sa imong kabubut-on sila milungtad ug nalalang.” Ingong atong Maglalalang, si Jehova mao “ang tuboran sa kinabuhi.” (Salmo 36:9) Isip Maglalalang, mas nasayod siya kay kang bisan kinsa kon sa unsang paagi nato angayng gamiton ang atong mga kinabuhi. Busa naghimo siyag mga balaod, dili aron hikawan kita ug kalipay, kondili aron tabangan kita nga makabatog kaayohan. (Isaias 48:17) Ayawg panumbalinga ang balaod sa Diyos, ug ikaw seguradong mapakyas.

 4. Nganong gidaot sa daghan kaayong batan-on ang ilang mga kinabuhi?

⁴ Pananglitan, nahibulong ka ba sukad kon nganong gidaot sa daghan kaayong batan-on ang ilang mga kinabuhi pinaagi sa droga, pagkamahilayon, ug ubang mga bisyo? Ang Salmo 36:1, 2 nagpatin-aw: “Ang pulong sa kalapasan sa tawong daotan anaa sa kinahiladman sa iyang kasingkasing; walay kahadlok sa Diyos sa atubangan sa iyang mga mata. Kay siya hapsay kaayo sa iyang kaugalingon diha sa iyang mga mata aron masayran ang iyang sayop sa pagdumot niini.” Tungod kay sila walay maayong “kahadlok sa Diyos,” gipatuo sa daghang batan-on ang ilang kaugalingon nga walay mga sangpotanan ang peligrosong mga panggawi. Apan, sa ngadtongadto kinahanglan nilang atubangon kining dili-mausab nga prinsipyo: “Bisan unsay ginapugas sa usa ka tawo, kini usab iyang anihon; tungod kay siya kinsa nagapugas alang sa iyang unod moani ug pagkadunot gikan sa iyang unod, apan siya kinsa nagapugas alang sa espiritu moani ug kinabuhing walay-kataposan gikan sa espiritu.”​—Galacia 6:7, 8.

‘Pag-ihap sa mga Adlaw’

5, 6. (a) Nganong ang mga batan-on angayng ‘mag-ihap sa ilang mga adlaw,’ ug unsay buot ipasabot sa paghimo niana? (b) Unsay buot ipasabot sa ‘paghinumdom sa atong Dakong Maglalalang’?

⁵ Sa unsang paagi nimo himoong malamposon ang imong kinabuhi ug “moani ug kinabuhing walay-kataposan”? Si Moises nagsulat: “Ang mga adlaw sa atong katuigan maoy kapitoan ka tuig; ug kon tungod sa linaing kabaskog kini maoy kawaloan ka tuig . . . Kini sa madali molabay, ug kita manglupad.” (Salmo 90:10) Tingali ikaw talagsa ra, o kaha dili gayod, maghunahuna bahin sa kamatayon. Sa pagkatinuod, daghang batan-on ang nagagawi nga maorag dili sila madaot. Apan gipaatubang kanato ni Moises ang masakit nga kamatuoran nga mubo ra ang kinabuhi. Wala ganiy garantiya nga mabuhi kita taman sa edad nga 70 o 80. “Ang panahon ug ang wala damhang panghitabo” makakalas sa kinabuhi bisan niadtong batan-on ug himsog. (Ecclesiastes 9:11) Nan, sa unsang paagi nimo gamiton ang bililhong kinabuhi nga ginatagamtam nimo karon? Si Moises nag-ampo: “Ipakita kanamo kon unsaon pag-ihap sa among mga adlaw aron kami makabaton ug kasingkasing nga maalamon.”​—Salmo 90:12.

⁶ Unsay buot ipasabot sa pag-ihap sa imong mga adlaw? Kini wala magpasabot nga kinahanglan kang magsigeg hunahuna kon unsa ka taas nga mabuhi ka. Si Moises nag-ampo nga tudloan ni Jehova ang Iyang katawhan kon unsaon paggamit sa nabiling bahin sa ilang mga adlaw sa paagi nga magpasidungog Kaniya. Nag-ihap ka ba sa mga adlaw sa imong kinabuhi​—nga naglantaw sa matag adlaw ingong usa ka bililhong kahinguhaan nga magamit sa pagdayeg sa Diyos? Ang Bibliya nagahatag sa mga batan-on niini nga pagdasig: “Kuhaa ang kagul-anan gikan sa imong kasingkasing, ug ipahilayo ang katalagman gikan sa imong unod; kay ang pagkabatan-on ug ang kinahupngan nga yugto sa kinabuhi kakawangan. Hinumdomi, karon, ang imong Dakong Maglalalang sa mga adlaw sa imong pagkabatan-on.” (Ecclesiastes 11:10–12:1) Ang paghinumdom sa atong Maglalalang nagpasabot ug labaw pa kay sa dili lamang pagkalimot nga siya naglungtad. Sa dihang nangaliyupo ang kriminal kang Jesus, “Hinumdomi ako sa dihang mahiadto ka na sa imong gingharian,” buot niya nga labaw pa ang himoon ni Jesus kay sa paghinumdom sa iyang ngalan. Buot niya nga molihok si Jesus, nga banhawon siya! (Lucas 23:42; itandi ang Genesis 40:14, 23; Job 14:13.) Sa susamang paagi, ang paghinumdom kang Jehova naglangkit ug paglihok, paghimo sa kon unsay makapahimuot kaniya. Ikaingon kaha nga ikaw nagahinumdom kang Jehova?

Likayi nga Masina sa mga Mamumuhat ug Daotan

 7. Nganong ang ubang batan-on mipili sa pagkalimot sa ilang Maglalalang? Paghatag ug pananglitan.

⁷ Daghang batan-on ang mipili sa pagkalimot kang Jehova tungod kay ilang gibati nga sobra ra ka mapig-oton ang pagkahimong usa ka Saksi. Usa ka igsoong lalaki sa Espanya ang nahinumdom kon unsay iyang gibati isip usa ka tin-edyer: “Nadani ako sa kalibotan tungod kay ang kamatuoran maorag lisod ug estrikto. Nagkahulogan kinig paglingkod, pagtuon, pagtambong sa mga tigom, pagkorbata, ug dili ako ganahang mohimo niadtong mga butanga.” Mobati ka ba usahay nga may kulang kanimo tungod kay nag-alagad ka sa Diyos? Tingali makurat ka sa pagkahibalo nga nabati sa usa sa mga magsusulat sa Bibliya kana mismong mga pagbatia. Palihog ablihi ang imong Bibliya ug basaha ang Salmo 73.

 8. Nganong si Asap “nasina sa mga andakan”?

⁸ Atong susihon kini nga salmo diha sa pipila ka detalye. Ang mga Sal 73 bersikulo 2 ug 3 nag-ingon: “Alang kanako, ang akong mga tiil hapit gayong madalin-as, ang akong mga lakang diriyot nga madakin-as. Kay ako nasina sa mga andakan, sa dihang makita ko ang kalinaw sa mga tawong daotan.” Sumala sa superskripsiyon, kini nga salmo gisulat ni Asap. Siya usa ka Levihanon nga musikero ug katalirongan ni Haring David. (1 Cronicas 25:1, 2; 2 Cronicas 29:30) Bisan pag duna siyay maayong pribilehiyo sa pag-alagad diha sa templo sa Diyos, siya “nasina” sa mga lalaki nga nangandak sa ilang pagkadaotan. Morag maayo ang ilang kahimtang; sila daw may kalinaw ug kasegurohan. Sa pagkatinuod, ang ilang daw mga kalamposan ‘milabaw pa sa gipanghanduraw sa ilang mga kasingkasing.’ (Sal 73 Bersikulo 5, 7) Maghisgot sila bahin sa ilang gipangbuhat “sa mapahitas-ong paagi,” sa ato pa, sa mapasigarbohong paagi. (Sal 73 Bersikulo 8) ‘Ilang gibutang ang ilang baba sa kalangitan ug ang ilang dila nagsuroysuroy sa yuta,’ nga walay pagtamod kang bisan kinsa—sa langit man o sa yuta.​—Sal 73 Bersikulo 9.

 9. Sa unsang paagi kaha ang pipila ka Kristohanong mga batan-on karon mobatig sama kang Asap?

⁹ Malagmit susama ang ikasulti bahin sa imong mga katalirongan sa eskuylahan. Imo tingali silang madungog nga walay kokaulaw nga magpasiatab sa ilang seksuwal nga mga binuang, ilang mapatuyangong mga parti, ug sa ilang pagpatuyang sa alkoholikong ilimnon ug mga droga. Kon ang ilang gitawag nga kinabuhi sa kalipay imong itandi sa hiktin nga dalan nga kinahanglan nimong pagalaktan isip usa ka Kristohanon, basin mobati ka usahay nga “nasina sa mga andakan.” (Mateo 7:13, 14) Si Asap mismo miabot sa punto nga siya mipatugbaw: “Kawang lamang gayod nga gihinloan ko ang akong kasingkasing ug nga gihunawan ko ang akong kamot sa pagkainosente. Ug gihampak ako sa tibuok nga adlaw.” (Sal 73 Bersikulo 13, 14) Oo, misugod siya sa pagkuwestiyon sa bili sa pag-alagad sa Diyos ug pagkinabuhing minatarong.

10, 11. (a) Unsay nakapausab sa tinamdan ni Asap? (b) Sa unsang paagi nga ang mga mamumuhat ug daotan anaa “sa dapit nga madanlog”? Paghatag ug pananglitan.

¹⁰ Maayo na lang, wala magdugay kining magul-anong kahimtang ni Asap. Naamgohan dayon niya nga ang daw kalinaw sa mga daotan maoy usa lamang ka ilusyon​—ug temporaryo lamang! Siya mipatugbaw: “Sa pagkatinuod gibutang mo sila sa dapit nga madanlog. Gipahulog mo sila ngadto sa pagkalaglag. Oh pagkadali nga sila nahimong usa ka butang nga kahibudngan! Pagkamakalilisang sa ilang kataposan, nangaut-ot sila tungod sa kalit nga kalisang!” (Sal 73 Bersikulo 18, 19) Daghan sa imong mga katalirongan anaa usab “sa dapit nga madanlog.” Sa madugay o sa madali maapsan sila sa ilang dili-diyosnon nga panggawi, nga tingali mosangpot sa wala-kinahanglana nga pagmabdos, sakit nga mapasa sa sekso, bisan pagkabilanggo o kamatayon! Mas grabe pa, ilang maagoman ang pagkanahilayo sa Diyos.​—Santiago 4:4.

¹¹ Usa ka batan-ong Saksi sa Espanya ang nakaagom mismo niining kamatuorana. Sa batan-on pa, siya may dobleng kinabuhi, nga nalangkit pag-ayo sa usa ka grupo sa dili-diyosnong mga batan-on. Wala magdugay, nahigugma siya sa usa kanila​—usa ka giyanon sa droga. Bisan tuod naglikay siya mismo sa paggamit ug mga droga, mopalit siyag mga droga para kaniya. “Ako pa gani siyang tabangan sa pagtuslok sa ineksiyon,” siya miangkon. Maayo gani, kining maong sister nakaamgo ug naulian sa espirituwal nga kahimsog. Apan pagkadako sa iyang kakurat sa pagkasayod wala madugay sa ulahi nga ang iyang tiggamit-ug-droga nga trato namatay sa AIDS. Oo, sama sa giingon sa salmista, ang mga tawong dili-diyosnon anaa “sa dapit nga madanlog.” Tingali ang pipila mamatay ug kalit tungod sa ilang mapatuyangong estilo sa kinabuhi. Kon mahitungod sa uban pa, kon dili nila usbon ang ilang mga dalan, sa dili madugay ilang atubangon ‘ang pagpadayag sa Ginoong Jesus gikan sa langit uban sa iyang gamhanang mga anghel sa nagadilaab nga kalayo, sa dihang siya magapanimalos kanilang wala makaila sa Diyos ug kanilang wala mosunod sa maayong balita bahin sa atong Ginoong Jesus.’​—2 Tesalonica 1:7, 8.

12. Sa unsang paagi nasabtan sa ulahi sa usa ka batan-on sa Hapon ang kabuangan sa pagkasina sa mga mamumuhat ug daotan?

¹² Nan, pagkabinuang gayod nga masina “kanilang wala makaila sa Diyos”! Sa pagkatinuod, kadtong nahibalo kang Jehova ug may paglaom nga mabuhi sa walay kataposan mao ang angayng kasinahan. Usa ka batan-ong igsoong lalaki sa Hapon nakaamgo niana. Sa batan-on pa, siya usab “gustog dugang kagawasan.” Siya nagsaysay: “Abi nakog may kulang kanako. Dayon akong naamgohan kon unsa unta ang akong kinabuhi kon wala ang kamatuoran. Akong gipanan-aw ang akong kaugalingon nga nagkinabuhig 70 o 80 ka tuig ug dayon mamatay. Apan si Jehova nagtanyag sa paglaom nga walay-kataposang kinabuhi! Ang pagkaamgo niini nagtabang kanako sa pagpabili sa kon unsa gayod ang akong nabatonan.” Bisan pa niana, dili sayon ang pagpabiling matinumanon kon alirongan sa mga tawong wala magsunod sa mga balaod sa Diyos. Unsa ang pipila ka butang nga imong mahimo sa pagsukol niana nga mga pagpit-os?

Bantayi ang Imong Panag-uban!

13, 14. Nganong hinungdanon nga magmapilion kon maylabot sa panag-uban?

¹³ Atong tan-awon pag-usab ang kahubitan sa tawong malamposon, nga gitala sa Salmo 1:1-3: “Malipayon ang tawo nga wala maglakaw sa tambag sa mga daotan, ug wala magtindog sa dalan sa mga makasasala, ug wala maglingkod sa lingkoranan sa mga mabiaybiayon. Hinunoa ang iyang kalipay anaa sa balaod ni Jehova, ug sa hinayng tingog siya nagabasa sa iyang balaod sa adlaw ug gabii. Ug siya mahisama gayod sa usa ka kahoy nga natanom daplin sa kasapaan sa tubig, nga nagahatag sa bunga niini sa panahon niini ug ang dahon niini dili malaya, ug ang tanan nga iyang buhaton magmalamposon.”

¹⁴ Una sa tanan matikdi nga ang imong panag-uban dunay dakong bahin. Ang Proverbio 13:20 nag-ingon: “Siya nga nagalakaw uban sa mga tawong maalamon mahimong maalamon, apan siya nga may pakiglabot sa mga buangbuang mosangpot sa kadaotan.” Kini wala magpasabot nga dili magmabination, dili-mahigalaon, o magbinastos ngadto sa mga batan-on nga dili mga Saksi ni Jehova. Ang Bibliya nag-awhag kanato sa paghigugma sa atong mga silingan ug “magmadaiton sa tanang tawo.” (Roma 12:18; Mateo 22:39) Hinunoa, makaplagan tingali nimo ang imong kaugalingon nga ‘naglakaw diha sa tambag’ niadtong wala magsunod sa mga sukdanan sa Bibliya kon suod ka kaayong makig-uban kanila.

Ang mga Kaayohan sa Pagbasag Bibliya

15. Sa unsang paagi maugmad sa mga batan-on ang kaikag sa pagbasag Bibliya?

¹⁵ Ang salmista nag-ingon usab nga ang malamposong tawo malipay sa pagbasa sa balaod sa Diyos ‘sa hinayng tingog sa adlaw ug gabii.’ (Salmo 1:1, 2) Tinuod, ang Bibliya dili sayon basahon, ug dinha niana mao ang “pipila ka butang nga lisod sabton.” (2 Pedro 3:16) Apan ang pagbasag Bibliya dili kinahanglang makalaay. Posibleng ‘ugmaron ang kaikag alang sa walay-sambog nga gatas’ sa Pulong sa Diyos. (1 Pedro 2:2) Sulayi ang pagbasag ginagmay lang kada adlaw. Kon dunay mga punto nga dili nimo masabtan, pagpanukiduki. Pagkahuman, palandonga ang imong nabasa. (Salmo 77:11, 12) Kon maglisod kang isentro ang hunahuna, sulayi ang paglitok sa imong ginabasa “sa hinayng tingog.” Sa ngadtongadto, ang imong gugma sa pagbasa sa Bibliya seguradong motubo. Usa ka batan-ong sister sa Brazil nahinumdom: “Si Jehova kanunayng morag layo kanako. Apan sa pipila ka bulan na karon, akong gipauswag ang akong personal nga pagtuon ug pagbasa sa Bibliya. Karon akong gibati nga mas lig-on ang akong relasyon kang Jehova. Siya nahimong mas tinuod alang kanako.”

16. Sa unsang paagi kita makakuhag dugang benepisyo sa mga tigom sa kongregasyon?

¹⁶ Ang pagtambong sa mga tigom sa kongregasyon hinungdanon usab sa imong espirituwal nga pagtubo. Kon ikaw ‘maghatag ug pagtagad kon giunsa nimo pagpamati,’ ikaw makadawat ug dakong pagdasig. (Lucas 8:18) Bation ba nimo usahay nga ang mga tigom dili kaayo makaiikag? Buweno, pangutan-a ang imong kaugalingon, ‘Unsay akong ginahimo aron mahimong makaiikag ang mga tigom? Maminaw ba ako? Mangandam ba ako? Mokomento ba ako?’ Kon buot sabton, gisultihan kita sa Bibliya nga “tagdon nato ang usag usa aron sa pagpasibot sa paghigugma ug sa maayong mga buhat, . . . magdinasigay sa usag usa.” (Hebreohanon 10:24, 25) Aron mahimo kini kinahanglan kang makigbahin! Siyempre, aron makapakigbahin kinahanglan kang magtuon daan. Usa ka batan-ong sister miangkon: “Mas sayon gayod nga makigbahin sa mga tigom kon makapangandam ka.”

Pagsunod sa Dalan sa Diyos Motultol sa Kalamposan

17. Sa unsang paagi ang kugihang magbabasa sa Bibliya ‘sama gayod sa usa ka kahoy nga natanom daplin sa kasapaan sa tubig’?

¹⁷ Ang salmista dugang nga naghubit sa malamposong tawo ingong ‘sama gayod sa usa ka kahoy nga natanom daplin sa kasapaan sa tubig.’ Ang kasapaan sa tubig nagtumong tingali sa mga kanal sa irigasyon nga gigamit sa pagpatubig sa mga kahoy sa prutasan. (Isaias 44:4) Ang adlaw-adlawng pagbasa sa Bibliya nahisamag natapot sa usa ka dili-mahurot nga tinubdan sa sustento ug kalagsik. (Jeremias 17:8) Adlaw-adlaw kang makadawat sa kusog nga imong gikinahanglan aron makasagubang sa mga pagsulay ug mga kalisdanan. Kay nakakat-on na sa panghunahuna ni Jehova, ikaw aduna nay kaalam nga imong gikinahanglan sa paghimog maalamong mga desisyon.

18. Unsay makapaneguro sa kalamposan sa usa ka batan-on diha sa pag-alagad kang Jehova?

¹⁸ Usahay, ang pag-alagad kang Jehova daw malisod. Apan ayaw gayod batia nga kini lisod kaayong atubangon. (Deuteronomio 30:11) Ang Bibliya nagsaad kanimo nga ‘ang tanan nimong buhaton magmalamposon’ sa kadugayan, basta ang imong pangunang tumong mao ang pagpahimuot kang Jehova ug paglipay sa iyang kasingkasing! (Proverbio 27:11) Ug hinumdomi, dili nimo kinahanglang himoon kini nga mag-inusara. Ikaw adunay pagpaluyo ni Jehova ug Jesu-Kristo. (Mateo 28:20; Hebreohanon 13:5) Sila nahibalo sa mga pagpit-os nga imong ginaatubang, ug dili ka gayod nila talikdan. (Salmo 55:22) May pagpaluyo ka usab “sa tibuok kapunongan sa mga igsoon” ug sa imong mga ginikanan kon sila mahinadlokon sa Diyos. (1 Pedro 2:17) Tungod sa maong pagpaluyo, duyog sa imong determinasyon ug paningkamot, ikaw makatagamtam ug malamposong kinabuhi dili lamang karon apan sa walay kataposan!

Mga Pangutana Alang sa Pagrepaso

◻ Unsa ang tinuod nga kalamposan?

◻ Nganong gikinahanglan nato si Jehova sa pagtultol sa atong mga lakang?

◻ Sa unsang paagi ang mga batan-on ‘mag-ihap sa ilang mga adlaw’?

◻ Nganong kabuangan ang pagkasina sa mga mamumuhat ug daotan?

◻ Sa unsang paagi ang adlaw-adlaw nga pagbasa sa Bibliya ug regular nga pagtambong sa tigom makatabang sa mga batan-on sa pagtagamtam ug malamposong kinabuhi?

[Hulagway sa panid 20]

Tungod kay sila walay maayong “kahadlok sa Diyos,” daghang batan-on ang nalangkit sa makadaot nga kalihokan

[Hulagway sa panid 22]

Sagad nga malimtan sa mga batan-on nga ang ilang mga lihok adunay mga sangpotanan

[Hulagway sa panid 23]

Ugmara ang gugma sa pagbasag Bibliya

[Hulagway sa panid 23]

Mas malipay ka sa mga tigom kon makigbahin ka