ASAP

[Siya [Diyos] Nagtigom].

1. Anak nga lalaki ni Levi kang Gersom. (1Cr 6:​39, 43) Sa panahon sa paghari ni Haring David (1077-1038 W.K.P.) si Asap gitudlo sa mga Levihanon ingong pangulong mag-aawit ug manunugtog sa mga piyangpiyang nga miuban sa Arka samtang gidala kini gikan sa balay ni Obed-edom ngadto “sa Siyudad ni David.” (1Cr 15:​17, 19, 25-29) Human niadto si Asap, uban kang Heman ug Etan, nag-alagad sa tabernakulo sa pagdumala sa musika ug sa pag-awit. (1Cr 6:31-44) Sama kang Heman ug Jedutun (dayag nga mao ra si Etan), si Asap gitawag nga “bisyonaryo,” kinsa “nagapanagna uban sa mga alpa.”​—1Cr 25:1-6; 2Cr 29:30; 35:15.

Ang mga anak nga lalaki ni Asap nagpadayon sa pagpormag usa ka espesyal nga grupo sa mga kahikayan sa orkestra ug koro, nga maoy gisaligan sa panahon sa inagurasyon sa templo ug sa pagdala sa Arka gikan sa Zion ngadto sa dapit sa templo (2Cr 5:12); sa panahon sa mga reporma ni Haring Ezequias (2Cr 29:13-15); ug sa panahon sa dakong pagsaulog sa Paskuwa sa paghari ni Haring Josias. (2Cr 35:​15, 16) Ang pipila sa iyang mga kaliwat maoy lakip usab sa unang grupo nga namalik sa Jerusalem gikan sa pagkadestiyero sa Babilonya.​—Esd 2:​1, 41; Neh 7:44.

Ang mga superskripsiyon sa Salmo 50 ug 73 hangtod sa 83 nagpasidungog niining mga awita kang Asap. Ugaling, ang ngalan nga gigamit didto morag nagtumong sa panimalay diin siya ang pangulo sa amahan, sanglit ang pipila sa mga salmo (Sal 79, 80) dayag nga naghubit sa mga hitabo human sa mga adlaw ni Asap.

2. Usa ka kaliwat ni Kohat nga anak nga lalaki ni Levi. Ang iyang mga kaliwat nag-alagad ingong mga magbalantay-sa-ganghaan sa tabernakulo sa panahon ni Haring David.​—1Cr 26:1; Num 16:1.

3. Lakip sa gihisgotang mga opisyal ni Haring Ezequias (745-717 W.K.P.) mao “si Joa nga anak nga lalaki ni Asap nga tigtala.” (2Ha 18:​18, 37; Isa 36:​3, 22) Bisag ang pulong “tigtala” gitumong kang Asap diha sa Cyclopædia of Biblical Literature ni John Kitto (1880, Tomo I, p. 233), giisip kini sa daghang eskolar nga nagtumong kang Joa (sa ingon, si Joah ben Asaph nga tigtala). Sanglit ang terminong “anak nga lalaki” sagad gigamit sa diwa nga “kaliwat,” ang pipila naghunahuna nga kini nga Asap mao ra ang Num. 1.

4. Ang “magbalantay sa parke” ni Haring Artajerjes sa panahong mibalik si Nehemias sa Jerusalem (455 W.K.P.). (Neh 2:8) Ang parke punog kakahoyan, tingali sa Lebanon, nga ubos usab sa pagkontrolar sa Persia. Ang Hebreohanong ngalan sa magbalantay sa parke hayan nagpaila nga siya usa ka Hudiyo nga nakabaton niining opisyal nga katungdanan, sama kang Nehemias nga nag-alagad sa hinungdanong katungdanan ingong magtitiing sa hari.​—Neh 1:11.