PINUGOS NGA PAG-ALAGAD

Ang Hebreohanong pulong alang sa “pinugos nga pag-alagad” maoy seʹvel, nga nagtumong sa literal o sa mahulagwayong luwan, palas-anon nga gisangon sa pinugos nga paagi, o sa mabug-at nga trabaho. Kini mahimong ipadapat sa gitawag nga corvée, nga mao, dili-binayran o dili-bug-os binayran nga trabaho nga gipatuman sa awtoridad nganha sa pipila ka tawo, sama sa mga pumoluyo sa usa ka dapit.

Ang salmista, sa pagpalandong sa kaluwasan sa Israel gikan sa pagkaulipon sa Ehipto, naglarawan kang Jehova nga nag-ingon: “Gilikay ko ang iyang abaga gikan sa palas-anon [o, pinugos nga pag-alagad].” (Sal 81:6; Ex 1:11) Si Haring Solomon nagpaapil ug mga tawo alang sa pinugos nga trabaho para sa lainlaing mga proyekto sa pagpanukod ug nagbutang ug mga kapatas sa pagdumala kanila. (1Ha 5:13; 9:​15, 23) Sa dihang nakita ni Solomon nga kugihan ang batan-ong lalaki nga si Jeroboam, “iyang gihimo siyang magtatan-aw ibabaw sa tanang pinugos nga pag-alagad sa balay ni Jose,” nga mao, ibabaw sa mga tawo nga girekluta gikan sa mga tribo ni Epraim ug Manases.​—1Ha 11:26-28.

Susama sa Hebreohanong pulong nga seʹvel mao ang sab·balʹ, nga nagkahulogang “tigpas-an.” Human sa pagsenso sa mga tawo nga langyawng pumoluyo sa Israel, si Solomon nagbutang kanila sa pag-alagad, ug 70,000 kanila ang nahimong mga tigpas-an. (2Cr 2:​2, 17, 18) Daghang katuigan sa ulahi, giayo ni Haring Josias ang templo, ug ang “mga tigpas-an” maoy lakip niadtong nakigbahin sa buluhaton.​—2Cr 34:​12, 13.

Ang Hebreohanong pulong nga tsa·vaʼʹ, nga sagad nagtumong sa serbisyo militar o sa pag-alagad panahon sa gubat, nagpasabot usab ug “pinugos nga trabaho,” nga mao, sa pagbayad sa utang o sala. Busa ang Jerusalem gisultihan nga ang iyang “serbisyo militar” nabug-os na ug ang iyang kasaypanan nabayran na. (Isa 40:​1, 2, ftn sa Rbi8) Sa dihang nailalom sa pagsulay, ang nagmagul-anon ug sinakit nga si Job nagpakasama sa kinabuhi sa malisod, makapaluya nga pag-alagad o “pinugos nga trabaho,” nga nangutana: “Wala bay pinugos nga trabaho alang sa may-kamatayong tawo sa ibabaw sa yuta, ug dili ba ang iyang mga adlaw sama sa mga adlaw sa usa ka sinuholang mamumuo?” (Job 7:1) Uban sa samang pagbati, siya sa ulahi miingon ngadto sa Diyos: “Imong padakoon ang imong kasuko batok kanako; ang sunodsunod nga kalisdanan ania kanako,” o “ang sunodsunod nga pinugos nga trabaho ania kanako.” (Job 10:​17, ftn sa Rbi8) Dayag nga si Job mibati nga ang Diyos nagdugang sa iyang kasakit pinaagi sa pagdalag sunodsunod nga mga kalisod ngadto kaniya. Ang panahon nga gugolon sa mga patay diha sa Sheol gipakasama usab ni Job sa pinugos nga trabaho, usa ka palas-anon nga gisangon sa pinugos nga paagi; apan siya nagpahayag ug paglaom sa pagkabanhaw.​—Job 14:14.