LEKSIYON 08
Puwede Kang Mahimong Higala ni Jehova
Gusto ni Jehova nga mas mailhan nimo siya. Ngano? Naghunahuna siya nga kon mas daghan kag mahibaloan bahin sa iyang personalidad, iyang pamaagi, ug iyang katuyoan, mas maganahan ka nga mahimo siyang higala. Posible kaha nga mahimo kang higala sa Diyos? (Basaha ang Salmo 25:14.) Unsay imong himoon aron mahimo ka niyang higala? Gitubag sa Bibliya ang maong mga pangutana ug gipakita niini kon nganong ang pagpakighigala kang Jehova mao ang pinakaimportanteng panaghigalaay nga imong mabatonan.
1. Unsay gusto ni Jehova nga imong himoon?
‘Duol sa Diyos, ug siya moduol kanimo.’ (Santiago 4:8) Unsay gipasabot niini? Gusto ni Jehova nga mahimo ka niyang higala. Ang uban dili makatuo nga mahimo silang higala sa Diyos kay dili nila siya makita. Pero diha sa iyang Pulong, ang Bibliya, gisulti ni Jehova ang tanan nga kinahanglan natong mahibaloan bahin sa iyang personalidad aron masuod ta kaniya. Dihang basahon nato sa Bibliya ang iyang mensahe kanato, mas masuod ta niya bisag dili nato siya makita.
2. Nganong si Jehova ang kinamaayohang Higala?
Walay makalabaw sa gugma ni Jehova kanimo. Gusto niya nga magmalipayon ka ug moduol ka niya dihang manginahanglan kag tabang. Puwede nimong ‘itugyan kaniya ang tanan nimong kabalaka, kay gimahal ka niya.’ (1 Pedro 5:7) Si Jehova andam kanunay nga motabang, mohupay, ug maminaw sa iyang mga higala.—Basaha ang Salmo 94:18, 19.
3. Unsay gidahom ni Jehova sa iyang mga higala?
Si Jehova nahigugma sa tanang tawo, “apan makigsuod [lang] Siya sa matul-id.” (Proverbio 3:32) Gidahom ni Jehova nga ang iyang mga higala maningkamot sa paghimo sa mga butang nga giisip niyang maayo ug sa paglikay sa mga butang nga giisip niyang daotan. Ang uban mobati tingali nga dili gyod nila maabot ang mga sukdanan ni Jehova sa kon unsay maayo ug daotan. Pero si Jehova maluluy-on. Iyang dawaton si bisan kinsa nga nahigugma gyod Niya ug naghimo sa tanan niyang maarangan aron mapalipay Siya.—Salmo 147:11; Buhat 10:34, 35.
TUN-IG DUGANG
Tun-ig dugang kon sa unsang paagi mahimo kang higala ni Jehova, ug sayra kon nganong siya ang kinamaayohang Higala.
4. Si Abraham higala ni Jehova
Ang estorya sa Bibliya bahin kang Abraham (nga gitawag sab ug Abram) motabang nga masabtan nato kon unsay gikinahanglan ug kon unsay mga panalangin sa pagkahimong higala sa Diyos. Basaha ang bahin kang Abraham sa Genesis 12:1-4. Dayon hisgoti kini nga mga pangutana:
Unsay gihangyo ni Jehova kang Abraham?
Unsay gisaad ni Jehova kaniya?
Unsay gihimo ni Abraham?
5. Kon unsay gihangyo ni Jehova sa iyang mga higala
Sagad naa tay gidahom gikan sa atong mga higala.
Unsa ang mga butang nga gusto nimong himoon sa imong mga higala para kanimo?
Basaha ang 1 Juan 5:3, ug dayon hisgoti kini nga pangutana:
Unsay gidahom ni Jehova sa iyang mga higala?
Aron masunod si Jehova, kinahanglan tingali tang mohimog kausaban sa atong panggawi o personalidad. Basaha ang Isaias 48:17, 18, ug dayon hisgoti kini nga pangutana:
Nganong gusto ni Jehova nga mohimog kausaban ang iyang mga higala?
Ang maayong higala magpahinumdom nato sa mga butang nga makahatag natog proteksiyon ug kaayohan. Kana poy himoon ni Jehova sa iyang mga higala
6. Kon unsay himoon ni Jehova para sa iyang mga higala
Tabangan ni Jehova ang iyang mga higala sa pag-atubang sa mga problema. I-play ang VIDEO, ug dayon hisgoti ang mosunod nga pangutana:
Giunsa pagtabang ni Jehova ang babaye sa video aron maatubang niya ang iyang negatibong hunahuna ug emosyon?
Basaha ang Isaias 41:10, 13, ug dayon hisgoti kini nga mga pangutana:
Unsay gisaad ni Jehova nga iyang himoon para sa tanan niyang higala?
Para nimo, maayo bang Higala si Jehova? Ngano?
Ang suod nga higala motabang nimo dihang manginahanglan kag tabang. Si Jehova motabang pod nimo
7. Nagkinahanglag komunikasyon ang pagpakighigala kang Jehova
Ang komunikasyon mas makapasuod sa managhigala. Basaha ang Salmo 86:6, 11, ug dayon hisgoti kini nga mga pangutana:
Unsaon nato pagpakig-estorya kang Jehova?
Unsaon pagpakig-estorya ni Jehova kanato?
Makig-estorya ta kang Jehova pinaagi sa pag-ampo; makig-estorya siya nato pinaagi sa Bibliya
ANG UBAN MOINGON: “Imposible nga masuod sa Diyos.”
Unsa nga teksto ang imong gamiton aron ipakita nga puwede tang mahimong higala ni Jehova?
SUMARYO
Gusto ni Jehova nga mahimo nimo siyang Higala, ug iya kang tabangan nga masuod kaniya.
Review
Sa unsang paagi tabangan ni Jehova ang iyang mga higala?
Nganong sultihan ni Jehova ang iyang mga higala nga maghimog kausaban?
Para nimo, sobra ra ba ang gidahom ni Jehova gikan sa iyang mga higala? Nganong kanay imong tubag?
SUSIHA
Sa unsang paagi ang pagpakighigala sa Diyos makahatag ug kaayohan sa imong kinabuhi?
“Si Jehova—Usa ka Diyos nga Angay Natong Mailhan” (Ang Bantayanang Torre, Pebrero 15, 2003)
Sayra kon sa unsang paagi mahimong higala sa Diyos.
Sayra kon nganong ang usa ka babaye mibati nga ang iyang pagpakighigala kang Jehova nakaluwas niya.
“Dili Ko Gustong Mamatay!” (Ang Bantayanang Torre Num. 1 2017)
Paminawa kon unsay giingon sa mga teenager bahin sa ilang gibati kang Jehova.