“Bug-osa ang Akong Kasingkasing Aron Mahadlok Ko sa Imong Ngalan”

 1. Unsa ang pagkahadlok sa Diyos, ug nganong angay nga mabatonan kini niadtong nahigugma kang Jehova?

ANG mga Kristohanon nahigugma sa Diyos, ug nahadlok sab sila kaniya. Para sa uban, dili puwede nga higugmaon nimo ang Diyos ug kahadlokan sab siya. Pero ang kahadlok nga atong gitumong dinhi dili kanang mangurog ka sa kahadlok. Dunay lahi nga klase sa kahadlok. Ang mga tawo nga nakabaton nianang klaseha sa kahadlok nagtahod pag-ayo sa Diyos. Dili nila gustong masuko kanila ang ilang langitnong Amahan kay dili nila gustong madaot ang ilang relasyon kaniya.​—Sal. 111:10; Prov. 8:13.

 2. Base sa giingon ni David sa Salmo 86:11, unsang duha ka butang ang atong hisgotan?

² Basaha ang Salmo 86:11. Kon imong pamalandongon kanang tekstoha, makaingon ka nga ang matinumanong hari nga si David nakasabot kon unsa ka importante ang pagkahadlok sa Diyos. Atong konsiderahon kon unsaon nato pagpadapat ang giingon ni David sa iyang pag-ampo. Una, atong hisgotan ang pipila ka rason kon nganong angay natong tahoron pag-ayo ang ngalan sa Diyos. Ikaduha, atong hisgotan kon unsaon nato pagpakita sa adlaw-adlaw nga atong gitahod pag-ayo ang ngalan sa Diyos.

 3. Unsay naeksperyensiyahan ni Moises nga posibleng nakatabang niya sa pagtahod pag-ayo sa ngalan sa Diyos?

³ Imadyina kon unsay gibati ni Moises dihang nagtago siya sa lungag sa usa ka dakong bato ug nakita niya ang panan-awon sa himaya ni Jehova nga miagi. Ang Pagtugkad sa Kasulatan nag-ingon nga posible nga kini ang “labing makahahadlok [o, makapahingangha] nga kasinatian ni bisan kinsang tawo sa wala pa moabot si Jesu-Kristo.” Nadungog ni Moises ang mga pulong nga dayag nga gisulti sa usa ka anghel: “Si Jehova, si Jehova, Diyos nga maluluy-on ug mabination, dili daling masuko ug dagaya sa maunongong gugma ug kamatuoran, nagapakitag maunongong gugma sa linibo ka henerasyon, nagapasaylo sa kasaypanan ug kalapasan ug kasal-anan.” (Ex. 33:17-23; 34:5-7) Posibleng mahinumdom si Moises sa maong hitabo dihang iyang gamiton ang ngalang Jehova. Dili ikatingala nga sa ulahi, gipasidan-an ni Moises ang katawhan sa Diyos, ang Israel, nga “kahadlokan ang mahimayaong ngalan.”​—Deut. 28:58.

 4. Unsang mga hiyas ni Jehova ang atong pamalandongon aron molawom pa ang atong pagtahod kaniya?

⁴ Dihang maghunahuna ta sa ngalan ni Jehova, angay sab natong pamalandongon kon unsang klaseha siya sa persona. Angay natong hinumdoman ang iyang mga hiyas, sama sa gahom, kaalam, hustisya, ug gugma. Ang pagpamalandong niana ug sa uban pa niyang mga hiyas makatabang nga molawom pa ang atong pagtahod kaniya.​—Sal. 77:11-15.

5-6. (a) Unsay kahulogan sa ngalan sa Diyos? (b) Sumala sa Exodo 3:13, 14 ug Isaias 64:8, unsay ginahimo ni Jehova aron matuman ang iyang katuyoan?

⁵ Unsay atong nahibaloan bahin sa kahulogan sa ngalan sa Diyos? Daghang eksperto sa Bibliya ang mouyon nga ang ngalang Jehova posibleng nagkahulogan nga “Iyang Ipahinabo nga Mahimong.” Kana nagpahinumdom kanato nga walay makapugong kang Jehova sa paghimo kon unsay gusto niyang himoon. Mapalampos niya ang iyang katuyoan. Sa unsang paagi?

⁶ Si Jehova mahimong bisan unsa nga gikinahanglan aron matuman niya ang iyang katuyoan. (Basaha ang Exodo 3:13, 14.) Kanunay tang dasigon sa atong mga publikasyon nga pamalandongon kanang makapahinganghang bahin sa personalidad sa Diyos. Ipahinabo sab ni Jehova nga ang iyang dili perpektong mga alagad sa yuta mahimong bisan unsa nga gikinahanglan aron sila makaalagad kaniya ug makatuman sa iyang katuyoan. (Basaha ang Isaias 64:8.) Niining mga paagiha, ipahinabo ni Jehova nga matuman ang iyang kabubut-on. Walay makapugong niya sa pagpalampos sa iyang katuyoan.​—Isa. 46:10, 11.

 7. Sa unsang paagi mapalawom nato ang atong apresasyon sa atong langitnong Amahan?

⁷ Mapalawom nato ang atong apresasyon sa atong langitnong Amahan pinaagi sa pagpamalandong sa iyang mga gihimo ug sa iyang gipahinabo nga atong mahimo. Pananglitan, kon atong hunahunaon ang tanang butang nga iyang gilalang, mahingangha kaayo ta. (Sal. 8:3, 4) Ug kon atong pamalandongon kon giunsa ta pagtabang ni Jehova sa pagbuhat sa iyang kabubut-on, mas molawom ang atong pagtahod kaniya. Ang ngalang Jehova kahibulongan gyod kaayo! Nalakip niini ang tanang butang bahin sa atong Amahan, ang tanan niyang gihimo, ug ang tanan niyang himoon.​—Sal. 89:7, 8.

 8. Sumala sa Deuteronomio 32:2, 3, unsay gusto ni Jehova nga himoon sa iyang mga alagad sa iyang ngalan?

⁸ Sa hapit nang mosulod ang mga Israelinhon sa Yutang Saad, gitudloan ni Jehova si Moises sa liriko sa usa ka awit. (Deut. 31:19) Ug kinahanglang itudlo kana ni Moises sa mga tawo. (Basaha ang Deuteronomio 32:2, 3.) Kon atong pamalandongon ang bersikulo 2 ug 3, klaro nga dili gusto ni Jehova nga itago ang iyang ngalan o isipong sagrado kaayo aron litokon. Gusto niya nga ang iyang ngalan mahibaloan sa tanan. Pagkadakong pribilehiyo sa mga Israelinhon nga matudloan ni Moises bahin kang Jehova ug sa Iyang mahimayaong ngalan! Ang gitudlo ni Moises nakapalagsik ug nakaparepresko kanila, samag ulan nganha sa mga tanom. Unsaon nato pagseguro nga ingon niana ang atong paagi sa pagtudlo?

 9. Sa unsang paagi makatabang ta sa pagbalaan sa ngalan ni Jehova?

⁹ Dihang mamalaybalay ta o mag-public witnessing, magamit nato ang Bibliya aron ipakita sa mga tawo ang ngalan sa Diyos nga Jehova. Puwede nato silang tanyagan ug nindot nga mga literatura, video, ug materyal sa atong website nga nagpaila kang Jehova. Sa trabahoan, eskuwelahan, o samtang nagbiyahe, tingali makakita tag kahigayonan sa pagpakig-estorya bahin sa Diyos nga atong gihigugma ug kon unsa siyang klaseha sa Diyos. Puwede nato silang sultihan bahin sa nindot nga katuyoan ni Jehova para sa mga tawo ug sa yuta. Dihang madungog nila kini, tingali makahunahuna sila sa unang higayon nga gimahal kaayo ta ni Jehova. Kon sultihan nato ang uban sa kamatuoran bahin sa atong mahigugmaong Amahan, makatabang ta sa pagbalaan sa ngalan sa Diyos. Makatabang ta nga masabtan sa mga tawo nga natudloan silag daghang bakak bahin kaniya. Ang atong ginatudlo sa mga tawo gikan sa Bibliya mao ang labing makapalagsik ug makaparepresko nga butang nga ilang makat-onan.​—Isa. 65:13, 14.

10. Dihang magdumala tag Bible study, nganong dili igo nga basta itudlo lang nato ang mga sugo ug sukdanan sa Diyos?

¹⁰ Dihang magdumala tag Bible study, gusto natong tabangan ang atong mga estudyante nga mahibalo ug mogamit sa ngalan ni Jehova. Gusto sab natong tabangan sila nga mailhan pag-ayo si Jehova. Mahimo ba nato kana kon basta lang natong itudlo ang iyang mga instruksiyon, sukdanan, ug lagda sa panggawi? Ang maayong estudyante makakat-on tingali sa mga balaod sa Diyos ug makaapresyar pa gani niana. Pero motuman kaha siya kang Jehova tungod sa iyang gugma Kaniya? Hinumdomi, si Eva nahibalo sa balaod sa Diyos, pero wala gyod siya mahigugma kaniya; mao pod si Adan. (Gen. 3:1-6) Busa dili lang nato basta itudlo sa uban ang matarong nga mga sugo ug sukdanan sa Diyos.

11. Dihang magtudlo bahin sa mga balaod ug sukdanan sa Diyos, sa unsang paagi matabangan nato ang atong mga Bible study sa paghigugma kaniya?

¹¹ Ang mga sugo ug sukdanan ni Jehova kanunayng makaayo kanato. (Sal. 119:97, 111, 112) Pero basig dili makahunahuna niana ang atong mga Bible study, gawas kon ilang makita nga gihatag ni Jehova ang maong mga sugo tungod kay gihigugma ta niya. Busa mahimo nato silang pangutan-on: “Para nimo, ngano kahang gisugo sa Diyos ang iyang mga alagad sa paghimo niini o sa paglikay niini? Unsay atong makat-onan niini bahin kaniya?” Kon atong tabangan ang atong mga Bible study sa paghunahuna bahin kang Jehova ug sa pag-ugmad ug tinuod nga gugma para sa iyang mahimayaong ngalan, mas dakog purohan nga matandog ang ilang kasingkasing. Ilang higugmaon dili lang ang mga balaod kondili si Jehova sab. (Sal. 119:68) Molig-on ang ilang pagtuo ug matabangan sila nga makalahutay sa lisod unya nga mga pagsulay.​—1 Cor. 3:12-15.

12. Nganong dihay higayon nga wala mamentinar ni David ang bug-os nga kasingkasing, ug unsay resulta?

¹² Sa Salmo 86:11, dunay importanteng mga pulong nga nag-ingon: “Bug-osa ang akong kasingkasing.” Si Haring David gigiyahan sa Diyos sa pagsulat niana. Sa iyang kinabuhi, nakita niya nga dali rang mabahin ang kasingkasing. Sa usa ka higayon, didto siya sa atop, ug nakakita siyag minyong babaye nga naligo. Nianang panahona, ang kasingkasing ba ni David bug-os o nabahin? Nahibalo siya sa sugo ni Jehova: ‘Ayawg tinguhaa ang asawa sa imong isigkatawo.’ (Ex. 20:17) Pero klaro nga nagpadayon siyag tan-aw. Ang iyang kasingkasing nabahin; kini nagtinguha kang Bat-seba ug nagtinguha sa pagpahimuot kang Jehova. Bisag si David dugay nang nahigugma ug nahadlok kang Jehova, siya nagpadaog sa iyang hakog nga tinguha. Tungod niana, nakahimo siyag daotan kaayo nga mga butang. Iyang gipasipalahan ang ngalan ni Jehova. Nagpahinabo sab si David ug grabeng kadaot sa inosenteng mga tawo, apil sa iyang kaugalingong pamilya.​—2 Sam. 11:1-5, 14-17; 12:7-12.

13. Giunsa nato pagkahibalo nga ang kasingkasing ni David nabug-os pag-usab?

¹³ Gidisiplina ni Jehova si David, ug nahibalik ang iyang maayong relasyon Kaniya. (2 Sam. 12:13; Sal. 51:2-4, 17) Si David nahinumdom sa mga problema ug kagul-anan nga miresulta dihang gitugotan niya nga mabahin ang iyang kasingkasing. Ang iyang mga pulong diha sa Salmo 86:11 mahimo pong hubaron niining paagiha: “Hatagi kog kasingkasing nga wala mabahin.” Gitabangan ba ni Jehova si David nga makabaton ug kasingkasing nga bug-os, o wala mabahin? Oo, kay sa ulahi, ang Pulong ni Jehova nag-ingon nga ang kasingkasing ni David “bug-os kang Jehova nga iyang Diyos.”​—1 Hari 11:4; 15:3.

14. Unsay kinahanglan natong ipangutana sa kaugalingon, ug ngano?

¹⁴ Ang nahitabo kang David makapadasig ug makapahunahuna kanato. Ang iyang paghimog sala nagsilbing pasidaan sa mga alagad sa Diyos karon. Bag-ohan man ta o dugay nang nag-alagad kang Jehova, kinahanglang pangutan-on nato ang atong kaugalingon, ‘Ginasuklan ba nako ang mga paningkamot ni Satanas sa pagbahin sa akong kasingkasing?’

15. Sa unsang paagi ang pagkahadlok sa Diyos manalipod nato dihang makakita tag mga hulagway nga makapukaw ug imoral nga hunahuna?

¹⁵ Pananglitan, kon naa kay makita diha sa TV o Internet nga makapukaw ug imoral nga hunahuna, unsay imong himoon? Basin mangatarongan ka nga ang imong nakita dili pa man pornograpiya. Pero dili kaha nâ paagi ni Satanas nga mabahin ang imong kasingkasing? (2 Cor. 2:11) Kana nga hulagway samag atsa nga gamiton sa usa ka tawo sa pagsiak ug dakong kahoy. Iyang ipataop diha sa kahoy ang nipis ug hait nga parte sa atsa. Ug samtang magkalawom ang dulot niini, masiak ang kahoy. Dili ba ang mga hulagway nga makapukaw ug imoral nga hunahuna ikakomparar sa hait nga parte sa atsa? Ang pagtan-aw niining mga butanga morag dili ra makadaot, pero sa ngadtongadto, makabahin ni sa kasingkasing sa usa ug makaaghat niya sa paghimog sala. Busa ayaw gyod pasudla sa imong kasingkasing ang bisan unsa nga dili maayo! Padayong bug-osa ang imong kasingkasing aron mahadlok kini sa ngalan ni Jehova.

16. Dihang tentalon, unsay ipangutana nato sa kaugalingon?

¹⁶ Gawas sa hulagway, si Satanas daghan pag ginagamit sa pagtental kanato. Unsay atong himoon? Sayon rang mangatarongan. Pananglitan, maghunahuna tingali ta: ‘Aw, dili ra ko ma-disfellow ani, maong dili ra ni seryoso.’ Kana nga pangatarongan sayop kaayo. Mas maayong pangutan-on nato ang kaugalingon ug sama niini nga mga pangutana: ‘Dili kaha ni gamiton ni Satanas aron mabahin ang akong kasingkasing? Kon magpadaog ko sa tentasyon, dili kaha mapasipalahan ang ngalan ni Jehova? Kon ako ning himoon, mas masuod kaha ko sa Diyos, o mapalayo ko niya?’ Pamalandonga kanang mga pangutanaha. Pag-ampo nga hatagan kag kaalam aron matubag nimo kana nga matinud-anon. (Sant. 1:5) Kon imo nang himoon, mapanalipdan gyod ka. Kana makatabang nimo nga mahimong determinado sa pagsukol sa tentasyon, sama sa gihimo ni Jesus dihang siya miingon: “Pahawa, Satanas!”​—Mat. 4:10.

17. Nganong dili gyod maayo kon mabahin ang kasingkasing? Iilustrar.

¹⁷ Dili gyod maayo kon mabahin ang kasingkasing. Imadyina ang usa ka sports team nga ang mga membro wala magkasinabot. Ang pipila nila gusto nga sila ray mosikat, ang uban dili gustong mosunod sa regulasyon sa dula, ug naa poy uban nga walay tahod sa coach. Sa imong hunahuna, makadaog kaha nâ nga team? Pero ang team nga nagkahiusa mas dakog purohan nga molampos. Ang imong kasingkasing mahisama nianang malamposon nga team kon ang imong hunahuna, tinguha, ug emosyon nagkahiusa sa pag-alagad kang Jehova. Hinumdomi, gusto gyod ni Satanas nga mabahin ang imong kasingkasing. Gusto niya nga ang imong hunahuna, tinguha, ug emosyon dili magkahiusa ug mosupak sa mga sukdanan ni Jehova. Pero kinahanglang bug-os ang imong kasingkasing aron makaalagad ka kang Jehova. (Mat. 22:36-38) Ayaw gyod tugoti si Satanas sa pagbahin sa imong kasingkasing!

18. Base sa giingon sa Miqueas 4:5, unsay imong determinasyon?

¹⁸ Sama kang David, pag-ampo kang Jehova: “Bug-osa ang akong kasingkasing aron mahadlok ko sa imong ngalan.” Paningkamot pag-ayo nga ipadapat nâ sa imong kinabuhi. Kada adlaw, magmadeterminado nga sa imong mga desisyon, gamay man o dako, ikapakita nimo nga gitahod nimo pag-ayo ang balaang ngalan ni Jehova. Pinaagi niana, ingong usa sa mga Saksi ni Jehova, makatabang ka nga mabalaan ang iyang ngalan. (Prov. 27:11) Ug sama kang propetang Miqueas, kitang tanan makaingon: “Kita maglakaw sa ngalan ni Jehova nga atong Diyos hangtod sa kahangtoran.”​—Miq. 4:5.