Paglakaw Uban ang Bug-os nga Kasingkasing

“Tudloi ako, Oh Jehova . . . Bug-osa ang akong kasingkasing sa pagkahadlok sa imong ngalan.”​—SALMO 86:11.

 1. Sa unsang paagi si Jehova nagaganti sa iyang mga maunongon?

‘OH Jehova, ikaw ang Diyos, ikaw lamang.’ (Salmo 86:8, 10) Gidayeg ni David ang Diyos gikan sa usa ka kasingkasing nga tugob sa apresasyon. Bisan sa wala pa mahimong hari si David sa tibuok Israel, giluwas siya ni Jehova gikan kang Saul ug sa mga Pilistihanon. Busa, siya nakaawit: “Si Jehova mao ang akong bato ug ang akong kuta ug akong Manluluwas. Ngadto sa maunongon ikaw nagalihok nga maunongon.” (2 Samuel 22:2, 26) Gipanalipdan ni Jehova ang iyang maunongong alagad sa daghang mga pagsulay. Si David may pagsalig ug kompiyansa sa iyang maunongong Diyos, apan siya nagkinahanglag padayong paggiya. Karon si David mihangyo sa Diyos: “Tudloi ako, Oh Jehova, sa imong dalan.”​—Salmo 86:11.

 2. Sa unsang paagi si Jehova nagahatag ug tagana aron kita iyang tudloan?

² Bug-os nga gilikayan ni David ang mga ideya ug pilosopiya sa kalibotan. Siya buot nga “tudloan ni Jehova,” sumala sa gipahayag sa ulahi sa propeta sa Diyos. (Isaias 54:13) Hayan gipalandong lamang ni David ang siyam ka basahon sa Bibliya nga mabatonan sa iyang adlaw. Bisan pa, ang maong instruksiyon gikan kang Jehova hamili kaniya! Sa pagkahimong tinudloan, karon kita buhong nga makaambit sa tanang 66 ka basahon sa Bibliya, ug sa dagayang literatura sa Gingharian nga gitagana pinaagi sa “matinumanon ug maalamong ulipon.” (Mateo 24:45) Sama kang David, atong sangpiton si Jehova, aron tabangan kita sa iyang espiritu sa pagtuki sa “mga butang nga gitagana sa Diyos sa mga nahigugma kaniya, . . . bisan ang halalom nga mga butang sa Diyos.”​—1 Corinto 2:9, 10.

 3. Sa unsang mga paagi ang mga pagtudlo sa Bibliya makahatag kanatog kaayohan?

³ Ang Bibliya may tubag sa tanang pangutana ug problema nga motungha sa atong mga kinabuhi. “Kay ang tanang butang nga gisulat kaniadto gisulat alang sa pagtudlo kanato, aron pinaagi sa atong paglahutay ug sa paglipay sa Kasulatan makabaton unta kita ug paglaom.” (Roma 15:4) Ang pagdawat sa instruksiyon ni Jehova molig-on kanato sa paglahutay sa mga kalisod, molipay kanato sa panahon sa kaguol, ug maghimo sa paglaom sa Gingharian nga buhi kaayo diha sa atong mga kasingkasing. Hinaot nga malipay kita sa pagbasa sa Pulong sa Diyos ug sa pagpamalandong niana sa “adlaw ug gabii,” kay ang pinasukad-sa-Bibliya nga kaalam mahimong “usa ka kahoy sa kinabuhi sa mga mohawid niana, ug pagatawgong malipayon ang kadtong mokupot niana.”​—Salmo 1:1-3; Proverbio 3:13-18; tan-awa usab ang Juan 17:3.

 4. Bahin sa atong paggawi, unsang pananglitan ang gihatag ni Jesus alang kanato?

⁴ Ang Anak sa Diyos, si Jesus, gitawag usab nga “Anak ni David,” kanunay nga nagatan-aw kang Jehova alang sa pagtudlo. (Mateo 9:27)a Siya miingon: “Ang Anak dili makabuhat ug bisag unsa sa iyang kaugalingong pagbulot-an, gawas lamang sa iyang makita nga ginabuhat sa Amahan. Kay bisan unsay ginabuhat Niya, kini ginabuhat usab sa Anak.” “Wala akoy gibuhat sa kaugalingon kong pagbulot-an; kondili ginapamulong ko kining mga butanga sumala sa gitudlo kanako sa Amahan.” (Juan 5:19; 8:28) Si Jesus nagbilin ug usa ka sulondan aron atong “suod nga pagasundon ang iyang mga tunob.” (1 Pedro 2:21) Handurawa lamang! Kon kita magtuon sama sa gihimo ni Jesus, diha sa bisan unsang kahimtang kita makalihok sama sa ipalihok ni Jehova kanato. Ang dalan ni Jehova mao kanunay ang hustong dalan.

 5. Unsa ang “kamatuoran”?

⁵ Sunod si David mipahayag: “Ako magalakaw sa imong kamatuoran.” (Salmo 86:11) Sa milabay ang usa ka libo ka tuig, si Pilato, nga nakigsulti sa Anak ni David, nga si Jesus, nangutana: “Unsa ang kamatuoran?” Apan mao pay pagtubag ni Jesus nianang pangutanaha, gisultihan si Pilato: “Ang akong gingharian dili bahin niining kalibotana,” nga midugang: “Sumala sa giingon mo nga ako hari. Alang niini ako natawo, ug alang niini ako mianhi sa kalibotan, aron magapanghimatuod ako sa kamatuoran.” (Juan 18:33-38) Sa ingon gipaila ni Jesus nga nagasentro ang kamatuoran sa Mesiyanikong Gingharian. Sa pagkamatuod, ang tibuok tema sa Bibliya mao ang pagbalaan sa ngalan ni Jehova pinaagi sa maong Gingharian.​—Ezekiel 38:23; Mateo 6:9, 10; Pinadayag 11:15.

 6. Sa paglakaw diha sa kamatuoran, bahin sa unsa nga kita magbantay?

⁶ Unsay kahulogan sa paglakaw diha sa kamatuoran? Kini nagkahulogan sa paghimo sa paglaom sa Gingharian nga maoy atong pangunang butang sa kinabuhi. Kinahanglang magkinabuhi kita sa kamatuoran sa Gingharian, madasigon sa atong mga higayon sa pagdala sa kamatuoran sa Gingharian, sumala sa panig-ingnan ni Jesus. (Mateo 6:33; Juan 18:37) Dili mahimo nga dili bug-os ang atong paglakaw diha sa kamatuoran, nga mohatag lamang ug pahapyaw nga pag-alagad ug dayon pahimut-an ang atong kaugalingon pinaagi sa pagliko sa dalan aron magpatuyang sa sobrang kalingawan o sa pagsulod ug makahurot-sa-panahon nga karera o “magpaulipon . . . sa Bahandi.” (Mateo 6:24) Mahimong masaag kita sa usa sa mga eskina, nga dili na makatultol ug balik sa ‘masigpit nga dalan padulong sa kinabuhi.’ Dili gayod kita magpalayo gikan nianang dalana! (Mateo 7:13, 14) Ang atong Dakong Magtutudlo, si Jehova, pinaagi sa iyang Pulong ug organisasyon, nagadan-ag sa dalan, nga nag-ingon: “‘Kini mao ang dalan. Lumakaw kamo diha niana,’ kon ugaling kamo moliko sa tuo o kon kamo moliko sa wala.”​—Isaias 30:21.

Nahiangay nga Kahadlok

 7. Sa unsang paagi ‘mabug-os’ ta ang atong kasingkasing?

⁷ Ang pag-ampo ni David nagpadayon sa bersikulo 11: “Bug-osa ang akong kasingkasing sa pagkahadlok sa imong ngalan.” Sama kang David, maoy atong tinguha nga ang atong mga kasingkasing dili-mabahin, bug-os, sa pagtuman sa kabubut-on sa Diyos. Kini nahiuyon sa tambag ni Moises: “Ug karon, Oh Israel, unsa ang gikinahanglan ni Jehova nga imong Diyos kanimo kondili ang pagkahadlok kang Jehova nga imong Diyos, sa paglakaw sa tanan niyang mga dalan ug sa paghigugma kaniya ug sa pag-alagad kang Jehova nga imong Diyos sa bug-os mong kasingkasing ug sa bug-os mong kalag; sa pagbantay sa mga sugo ni Jehova ug sa iyang kabalaoran nga akong gisugo kanimo niining adlawa, alang sa imong kaayohan?” (Deuteronomio 10:12, 13) Tinuod, alang sa atong kaayohan nga atong ibubo ang atong kasingkasing ug kalag sa pag-alagad kang Jehova. Sa ingon atong ginapasundayag ang nahiangay nga kahadlok sa iyang mahimayaong ngalan. Ang ngalan ni Jehova sa literal nagkahulogan “Siya ang Nagapahinabo,” ilabina may labot sa pagtapos sa iyang dagkong mga katuyoan. Kini nagkahulogan usab sa iyang supremo nga awtoridad sa tibuok uniberso. Nagaalagad uban ang dakong kataha sa pagkahalangdon sa Diyos, kita dili magpadala sa kahadlok sa tawo nga mamatay. Ang atong mga kasingkasing dili mabahin. Hinunoa, mahadlok kita nga mobuhat ug bisan unsa nga makapasuko kang Jehova, ang Supremong Maghuhukom ug Soberanong Ginoo, nga maoy nagahawid sa ato mismong mga kinabuhi.​—Isaias 12:2; 33:22.

 8, 9. (a) Unsay kahulogan sa pagkahimong “dili bahin sa kalibotan”? (b) Unsang mga lakang ang atong himoon sanglit mga “talan-awon man kita”?

⁸ Bisan sa atubangan sa pagbiaybiay ug paglutos, atong sundon ang walay-kahadlok nga panig-ingnan ni Jesus sa pagkahimong dili bahin sa daotang kalibotan sa atong palibot. (Juan 15:17-21) Kini wala magkahulogan nga ang tinun-an ni Jesus kinahanglang magkinabuhi ingong mga ermitanyo o motago diha sa monasteryo. Si Jesus miingon diha sa pag-ampo ngadto sa iyang Amahan: “Ako nangamuyo kanimo, dili sa pagkuha kanila gikan sa kalibotan, kondili bantayan mo sila gikan sa usa nga daotan. Sila dili bahin sa kalibotan, maingon nga ako dili bahin sa kalibotan. Balaana sila pinaagi sa kamatuoran; ang imong pulong mao ang kamatuoran. Maingon nga gipadala mo ako sa kalibotan, sa ingon gipadala ko sila sa kalibotan.” (Juan 17:15-18) Sama kang Jesus, kita gipadala sa pagsangyaw sa kamatuoran sa Gingharian. Si Jesus dali nga maduolan. Ang mga tawo nahupayan sa paagi sa iyang pagpanudlo. (Itandi ang Mateo 7:28, 29; 11:28, 29; Juan 7:46.) Angay nga ingon usab kita niana.

⁹ Ang atong pagkamahigalaon, maligdong nga pamostura ug panagway, maluloton ug mahinlong kolokabildo, angay mohimo kanato ug sa atong mensahe nga kahimut-anan sa mga tawong matarong ug kasingkasing. Kinahanglang likayan nato ang pagkamapinasagdanon, dili-maligdong nga pamesti, ug ang kaubanan nga motultol sa pagkalangkit sa kalibotan, ug ang haluag, walay-prinsipyong paagi sa kinabuhi nga atong makita sa kalibotan sa atong palibot. Kay “nahimong talan-awon sa kalibotan, ug sa mga manulonda, ug sa mga tawo,” nagabuhat kita sa atong buluhaton 24 oras kada adlaw sa pag-alagad ug sa pagkinabuhi ingong sulondang mga Kristohanon. (1 Corinto 4:9; Efeso 5:1-4; Filipos 4:8, 9; Colosas 4:5, 6) Ang atong kasingkasing kinahanglang bug-os alang niana nga katuyoan.

10. Sa unsang paagi hinumdoman ni Jehova kadtong nagabug-os sa ilang mga kasingkasing diha sa balaang pag-alagad?

¹⁰ Kita nga nagabug-os sa atong mga kasingkasing diha sa pagkahadlok sa ngalan ni Jehova, nagapamalandong sa iyang dakong mga katuyoan ug nagapatugob sa atong mga kinabuhi sa balaang pag-alagad, pagahinumdoman ni Jehova. “Bahin kang Jehova, ang iyang mga mata nagalantaw sa tibuok yuta sa pagpakita sa iyang kusog alang kanila nga may kasingkasing nga hingpit alang kaniya.” (2 Cronicas 16:9) Matagnaong naghisgot sa atong adlaw, ang Malakias 3:16 mabasa: “Niadtong panahona ang may kahadlok kang Jehova nanagsulti sa usa ug usa, ang matag usa sa iyang kauban, ug si Jehova namati ug nagpatalinghog. Ug ang basahon sa handumanan gisugdan sa pagsulat sa iyang atubangan alang kanila nga may kahadlok kang Jehova ug alang kanila nga nagpalandong sa iyang ngalan.” Hinaot ang atong mga kasingkasing magmabug-os diha sa nahiangay nga kahadlok kang Jehova!

Ang Mahigugmaong-Kalulot ni Jehova

11. Sa unsang paagi ginapasundayag ang mahigugmaong-kalulot ni Jehova sa mga maunongon?

¹¹ Pagkatim-os sa pag-ampo ni David! Siya mipadayon: “Pagadayegon ko ikaw, Oh Jehova nga akong Diyos, uban sa bug-os ko nga kasingkasing, ug pagahimayaon ko ang imong ngalan sa walay kataposan, kay dako ang imong mahigugmaong kalulot nganhi kanako, ug giluwas mo ang akong kalag gikan sa Sheol, gikan sa kinailadman nga dapit niini.” (Salmo 86:12, 13) Sa ikaduhang higayon niini nga salmo, gidayeg ni David si Jehova tungod sa Iyang mahigugmaong-kalulot​—sa Iyang maunongong gugma. Dako kaayo kini nga gugma nga kini makaluwas sa daw imposible nga mga kahimtang. Sa dihang gipangita siya ni Saul sa kamingawan, si David mibati nga daw nagkamang sa usa ka suok aron mamatay. Kadto nahisama nga nakig-atubang sa kinailadmang Sheol​—ang kahiladman sa lubnganan. Apan giluwas siya ni Jehova! Sa samang paagi, si Jehova masubsob nga nagahatag ug kahupayan sa iyang modernong-adlaw nga mga alagad sa katingalahang mga paagi, ug siya nakapalig-on usab sa mga maghuhupot sa integridad nga matinumanong nag-antos bisan hangtod sa kamatayon. Ang tanang mga maunongon makabaton unya sa ilang ganti, bisan pinaagi sa pagkabanhaw kon gikinahanglan.​—Itandi ang Job 1:6-12; 2:1-6, 9, 10; 27:5; 42:10; Proverbio 27:11; Mateo 24:9, 13; Pinadayag 2:10.b

12. Sa unsang paagi mapangahason ug mapintas ang mga klero, ug unsay ilang balos?

¹² Mahitungod sa mga maglulutos si David mituaw: “Oh Diyos, ang mga mapangahason mitindog batok kanako; ug usa ka pundok sa malupigon nagpangita sa akong kalag, ug ikaw wala nila ibutang sa ilang atubangan.” (Salmo 86:14) Karong adlawa, ang mga maglulutos nagalakip sa mga klero sa Kakristiyanohan. Sila nangangkon nga nagasimba sa Diyos apan giilisan ang iyang balaang ngalan sa titulong “Ginoo” ug gipresentar siya nga usa ka misteryosong Trinidad nga sa pagkatinuod wala gayod hisgoti sa Bibliya. Pagkamapangahason! Dugang pa niini, sila naningkamot sa paghulhog sa politikal nga kagamhanan sa pagdili ug sa pagpabilanggo sa mga Saksi ni Jehova, sama sa ginahimo gihapon sa pagkakatingalahan sa dakong bahin sa mga nasod sa tibuok yuta. Kining nagsul-ob ug sutana nga mga mapasipalahon sa ngalan sa Diyos magaani ra sa ilang balos, uban sa tanang samag-bigaon nga mga bahin sa Babilonyang Bantogan.​—Pinadayag 17:1, 2, 15-18; 19:1-3.

13. Unsang mga hiyas ang gipakita ni Jehova sa pagpaila sa iyang pagkamaayo?

¹³ Sa makalilipay nga katugbang ang pag-ampo ni David nagpadayon: “Apan ikaw, Oh Jehova, mao ang Diyos nga maluloy-on ug mapuanguron, mahinay sa kasuko ug dagaya sa mahigugmaong-kalulot ug sa kamatuoran.” (Salmo 86:15) Superlatibo, sa pagkatinuod, ang maong mga hiyas sa atong Diyos. Kining mga pulonga mopabalik kanato ngadto sa Bukid sa Sinai sa dihang mihangyo si Moises nga makakita sa himaya ni Jehova. Si Jehova mitubag: “Palabyon ko ang tanan kong kaayo sa imong atubangan, ug igamantala ko ang ngalan ni Jehova sa atubangan mo.” Apan iyang gipasidan-an si Moises: “Ikaw dili mahimong makakita sa akong nawong, kay walay bisan kinsa nga makakita sa akong nawong ug unya mabuhi pa.” Human niadto, nanaog si Jehova diha sa panganod, nga nag-ingon: “Jehova, Jehova, Diyos nga maluloy-on ug mapuanguron, mahinay sa kasuko ug dagaya sa mahigugmaong-kalulot ug sa kamatuoran.” (Exodo 33:18-20; 34:5, 6) Gikutlo ni David kining mga pulonga diha sa iyang pag-ampo. Ang maong mga hiyas ni Jehova mas bililhon kanato kay sa bisan unsa pang pisikal nga panagway! Gikan sa atong kaugalingong kasinatian, dili ba gipabilhan nato ang pagkamaayo ni Jehova sumala sa gihulagway niining maayong mga hiyas?

“Timaan sa Pagkamaayo”

14, 15. Sa unsang paagi nagapakita si Jehova sa iyang mga alagad ug “timaan sa pagkamaayo”?

¹⁴ Si David nangaliyopo na usab sa panalangin ni Jehova, nga nag-ingon: “Lingia ako ug kaloy-i ako. Ihatag ang imong kalig-on sa imong alagad, ug luwasa ang anak sa imong ulipon nga babaye. Hatagi ako ug usa ka timaan sa pagkamaayo, aron ang mga nanagdumot kanako makakita niini ug maulawan. Tungod kay ikaw, Oh Jehova, mitabang kanako ug milipay kanako.” (Salmo 86:16, 17) Si David midawat nga ingong ‘anak sa ulipon ni Jehova nga babaye,’ siya usab kinahanglang iya ni Jehova. Sama usab kini kanatong tanan karong adlawa nga nagapahinungod sa atong mga kinabuhi kang Jehova ug nga nagapangabudlay diha sa iyang pag-alagad. Gikinahanglan nato ang nagaluwas nga kusog ni Jehova pinaagi sa iyang balaang espiritu. Busa, kita nagahangyo sa atong Diyos nga pakitaan kita ug “timaan sa pagkamaayo.” Ang pagkamaayo ni Jehova nagalakip sa maayong mga kinaiya nga mao pay atong paghisgot. Pinasukad niini, unsa nga timaan, o ilhanan, ang atong malaoman nga ihatag ni Jehova kanato?

¹⁵ Si Jehova mao ang Maghahatag sa “tanang maayong gasa ug hingpit nga regalo” ug mahinatagon, sumala sa gipasalig ni Jesus kanato, sa paghatag sa “balaang espiritu sa mga nagapangayo kaniya.” (Santiago 1:17; Lucas 11:13) Ang balaang espiritu​—pagkabililhong gasa nga gikan kang Jehova! Pinaagi sa balaang espiritu, si Jehova nagahatag ug kalipay sa kasingkasing, bisan sa panahon sa paglutos. Busa, ang mga apostol ni Jesus, sa dihang gisulayan sa ilang mga kinabuhi, malipayong nagpahayag nga ang Diyos naghatag ug balaang espiritu sa mga tawong nagasunod kaniya ingong magmamando. (Buhat 5:27-32) Ang kalipay sa balaang espiritu padayong ginapakita kanila ingong “timaan sa pagkamaayo.”​—Roma 14:17, 18.

16, 17. (a) Unsang timaan sa pagkamaayo ang gihatag ni Jehova kang Pablo ug Bernabe? (b) Unsang timaan ang gihatag sa gilutos nga mga taga-Tesalonica?

¹⁶ Samtang mipanaw ingong misyonero sa Asia Minor, si Pablo ug Bernabe nakasugat ug mga kalisod, bisan grabe nga paglutos. Sa nagwali sila sa Antioquia sa Pisidia, wala modawat ang mga Hudiyo sa ilang mensahe. Busa, sila miliso ngadto sa mga tawo sa kanasoran. Unsay miresulta? “Sa pagkadungog niini sa mga nasod, sila nangalipay ug gidayeg ang pulong ni Jehova, ug kadtong may hilig sa pagkamatarong alang sa kinabuhing walay kataposan nahimong mga magtutuo.” Apan ang mga Hudiyo naghimog kagubot, busa kini nga mga misyonaryo gipagawas sa nasod. Apan nawad-an ba sila ug ang bag-ong mga magtutuo ug paglaom bahin niini? Wala gayod! Hinunoa, “ang mga tinun-an napuno sa kalipay ug sa balaang espiritu.” (Buhat 13:48, 52) Gihagatan sila ni Jehova ug timaan sa iyang pagkamaayo.

¹⁷ Sa ulahi, ang bag-ong kongregasyon sa Tesalonica gilutos. Kini ang nagtukmod kang apostol Pablo sa pagsulat ug sulat sa paglipay, gidayeg ang ilang pag-antos ilalom sa kasakitan. Ilang “gidawat ang pulong ubos sa dakong kasakit uban sa kalipay sa balaang espiritu.” (1 Tesalonica 1:6) Ang “kalipay sa balaang espiritu” nagpadayon sa paglig-on kanila ingong dayag nga ilhanan gikan sa Diyos nga maluloy-on ug mapuanguron, mahinay sa kasuko, ug dagaya sa mahigugmaong-kalulot ug sa kamatuoran.

18. Sa unsang paagi ang atong mga igsoon sa Sidlakang Uropa nagapakita sa pagpabili sa pagkamaayo ni Jehova?

¹⁸ Karong bag-o, gipasundayag ni Jehova ang iyang pagkamaayo ngadto sa atong matinumanong mga igsoon sa Sidlakang Uropa, gipakaulawan kadtong nagadumot kanila​—ang ilang mga maglulutos kanhi. Bisan tuod nga dili pa dugay nga sila nahupayan gikan sa mga dekada sa pagdaogdaog, kining minahal nga mga igsoon padayon gihapong mag-antos, kay daghan ang nagaatubang ug grabe nga kapit-os sa pangabuhi. Apan, ang ilang “kalipay sa balaang espiritu” naglipay kanila. Unsa pay molabaw sa ilang kalipay kay sa paggamit sa ilang bag-ong napalgang mga kagawasan sa pagpalambo sa pagpamatuod? Daghang tawo ang nagapatalinghog kanila, sumala sa gipadayag sa mga taho sa mga kombensiyon ug sa mga bawtismo.​—Itandi ang Buhat 9:31.

19. Sa unsang paagi mahimo nato ang mga pulong sa Salmo 86:11 nga atong kaugalingon?

¹⁹ Ang tanang gihisgotan dinhi ug sa nag-unang artikulo nagpalanog sa tim-os nga pag-ampo ni David kang Jehova: “Tudloi ako, Oh Jehova . . . Bug-osa ang akong kasingkasing sa pagkahadlok sa imong ngalan.” (Salmo 86:11) Himoon nato ang mga pulong sa atong 1993 nga teksto sa tuig nga ato gayod nga kaugalingon samtang nagabuhat kita sa bug-os nga kasingkasing sa pagpaluyo sa mga intereses sa Gingharian ug sa pagpabili sa dili-mahurot nga pagkamaayo sa atong usa ka Diyos, ang Soberano Ginoong Jehova.

[Mga footnote]

Unsaon Nimo Pagtubag?

◻ Unsay atong gipakita pinaagi sa pag-ampo, “Tudloi ako, Oh Jehova”?

◻ Unsay kahulogan sa pagbug-os sa atong kasingkasing sa pagkahadlok sa ngalan ni Jehova?

◻ Sa unsang paagi ipasundayag ni Jehova ang iyang mahigugmaong-kalulot ngadto sa tanang mga maunongon?

◻ Sa unsang paagi gipakita ni Jehova kanato ang “timaan sa pagkamaayo?”

[Kahon sa panid 16]

Ang teksto sa tuig alang sa 1993: “Tudloi ako, Oh Jehova . . . Bug-osa ang akong kasingkasing sa pagkahadlok sa imong ngalan.”​—Salmo 86:11.

[Hulagway sa panid 15]

Si Jehova mao ang bato ug kuta niadtong tul-id nga nagalakaw sa kamatuoran

[Hulagway sa panid 18]

Diha sa “Mga Tigdala sa Kahayag” Internasyonal nga Kombensiyon sa mga Saksi ni Jehova sa St. Petersburg, Russia, sa Hunyo, 46,214 ang mitambong ug 3,256 ang gibawtismohan. Pagkakatingalahan nga ilang gipahimuslan ang pagkamaayo ni Jehova, uban sa “kalipay sa balaang espiritu”!