Paraisong Napasig-uli Nagahimaya sa Diyos

“Himayaon ko ang dapit sa akong mga tiil.”—ISAIAS 60:13.

1, 2. (a) Pinaagi sa iyang manalagnang Isaias, unsay gitagna sa Diyos mahitungod sa yuta? (b) Magatan-aw sa usa ka libo ka tuig sa umaabot, unsay atong makita?

GILALANG ni Jehova nga Diyos ang yuta ingong planeta ilalom sa iyang tiil, ingong iyang mahulagwayong tumbanan. Pinaagi sa iyang manalagnang Isaias, ang Diyos mitagna nga iyang ‘himayaon ang dapit sa iyang mga tiil.’ (Isaias 60:13) Pinaagi sa tabang sa dinasig nga Bibliya, kita makatan-aw, ingon sa usa ka gamhanang teleskopyo, sa usa ka libo ka tuig sa umaabot sa katawhan. Pagkamahimayaon nga talan-awon ang mosugat sa atong mga mata! Ang tibuok yuta modan-ag sa hingpit nga katahom nga ipatungha sa labing dakong Hardinero sa tibuok uniberso. Ang paraiso mapasig-uli na unya sa tibuok yuta diha sa katawhan!

² Oo, anaa sa hunahuna sa balaan Supremong Persona nga maoy nagpasugod sa paglungtad sa tawo diha sa usa ka tanaman nga paraiso ang labing dakong ikalipay sa tawo. Pagkamahigugmaong Maglalalang ang nabatonan sa katawhan, nga alang kaniya dili pasulabi ang pagsulti, “ang Diyos gugma”! (1 Juan 4:8, 16) Diha sa napasig-uling Paraiso, ang hamtong nga mga lalaki ug mga babaye diha sa mabaskog tawhanong kahingpitan mag-uban sa pagpuyo ingong mahigugmaon nga mga igsoong lalaki ug mga igsoong babaye. (Isaias 9:6) Napalihok sa gugma, sila hingpit nga nagapasakop sa mahimayaong Maglalalang sa langit ug yuta, si Jehova nga Diyos.

3, 4. (a) Sa unsang paagi ang langit ug yuta motumbas sa usa ug usa? (b) Unsay pagsanong sa mga manulonda sa dihang mapasig-uli ang Paraiso sa yuta?

³ Libolibong katuigan kanhi, diha sa balaang pagkadasig nga kahubitan sa iyang gingharian, ang Diyos mipahayag niining makapukaw nga mga pulong sa iyang piniling katawhan: “Ang mga langit mao ang akong trono, ug ang yuta mao ang akong tumbanan.” (Isaias 66:1) Ang tuman nga himaya sa iyang “tumbanan,” ang Paraiso nga yuta, angay motumbas sa himaya sa iyang trono diha sa dili-makita nga kahitas-an.

⁴ Sa panahon sa paglalang sa yuta, kadtong presente diha sa trono sa Diyos sa langitnong gingharian nagtan-aw sa talan-awon sa yuta sa ubos. Pagkadako tingali sa ilang gibating kalipay sa nagtan-aw ang ilang mga mata niining mahimayaong kamasilakon! Sa unsang paagi makapugong sila gikan sa dungan nga pag-awit? (Itandi ang Sofonias 3:17, Revised Standard Version; Salmo 100:2, The Jerusalem Bible.) Ang nahimuot ug malipayon nga Maglalalang nagdasig sa iyang yutan-ong eskriba sa paghulagway ug usa ka tukmang pagbatbat sa talan-awon sa langit, nga nagaingon: “Ang mga bitoon sa kabuntagon nagdungan sa pag-awit, ug ang tanang mga anak sa Diyos nagduyog sa pagsinggit sa kalipay.” (Job 38:7) Ilabinang mosinggit sa kalipay ang manulondaong mga anak sa Diyos, sa kahimayaan sa Diyos, sa dihang ang Paraiso ipasig-uli!

5. Unsay atong bation bahin sa katumanan sa orihinal nga katuyoan maylabot sa yuta?

⁵ Makapainit gayod sa kasingkasing alang kanato nga mapasaligan sa dinasig nga Balaang Kasulatan nga ang dakong katumanan sa usa ka paraiso sa yuta mao ang katuyoan nga gitumong ni Jehova nga Diyos sukad pa sa sinugdan. Kining makapadasig-ug-kalipay, makapapukaw-ug-pagdayeg nga kataposan sa katuyoan sa Diyos alang niining yutaa mao ang hustong butang nga malaoman sa usa ka Diyos kinsa nagapadayon gikan sa himaya ug himaya nga wala mapakyas sa pagpasundayag sa iyang kahalangdon. Tanan nga pagdayeg alang kaniya!​—Salmo 150:1, 2; Isaias 45:18; Pinadayag 21:3-5.

Ang mga Binanhaw Motabang sa Pagpasig-uli sa Paraiso

6. Human sa Armageddon, sa unsang paagi mapuno sa molupyo ang yuta?

⁶ Bisan pa nga diyutay lamang ang makalabang-buhi sa Armageddon, dili tungod sa ilang pagpanganak nga ang yuta bug-os nga mapuno sa molupyo. Si Jehova usab ‘magahimaya sa dapit sa iyang mga tiil’ pinaagi sa pagbalik sa kinabuhi niadtong kinsa anaa sa handomanang mga lubnganan ug kinsa nailalom sa mga kaayohan sa halad-lukat ni Kristo. Kini sila, sa baylo, dunay pribilehiyo sa pakig-ambit sa makalipay nga buluhaton sa paghimo sa atong yutan-ong globo ngadto sa usa ka matahom kaayo nga paraiso.​—Buhat 24:15.

7. Unsang mga pulong ni Jesus ang ibutang sa hunahuna sa mga makalabang-buhi sa Armageddon?

⁷ Hinumdoman sa mga makalabang-buhi sa Armageddon ang makatandog sa kalag nga mga pulong ni Ginoong Jesu-Kristo sa panahon sa dihang siya napukaw sa pag-ingon: “Ayaw kamo kahibulong niini, kay ang takna nagasingabot na nga ang tanan nga anaa sa handomanang mga lubnganan managpakabati sa iyang tingog ug managpanggula.” (Juan 5:28, 29) Pagkamahimayaong takna unya kana sa dihang ang mga tawong patay nga anaa sa ilang handomanang mga lubnganan mosugod sa pagkabati sa tingog sa Anak sa Diyos nga nagapahayag sa samang pulong ngadto kang Lazaro, kansang patay nga lawas gilubong diha sa Betania: “Lazaro, gumula ka!”​—Juan 11:43.

8, 9. Kinsa ang may kalagmitan nga unang pagabanhawon sa bag-ong kinabuhi dinhi sa yuta, nga mohatag unsang kalipay sa mga makalabang-buhi sa Armageddon?

⁸ Kinsa ang may kalagmitan nga unang banhawon sa bag-ong kinabuhi sa yuta ilalom sa Usa ka Libo ka Tuig nga Pagmando ni Jesu-Kristo ug sa pagsanong sa iyang sugo? Sa pagkamakataronganon ang “ubang mga karnero” nga nangamatay sa panahon sa kataposang mga adlaw una pa sa kataposan niining sistema sa mga butang. Sila ang makaeksperyensiya sa unang pagkabanhaw. (Juan 10:16) Sila dili-kaayo malisdan sa pagpaangay sa ilang kaugalingon diha sa usa ka bag-ong kalibotan.​—Itandi ang Mateo 25:34; Juan 6:53, 54.

⁹ Pagkamalipayon unya alang sa mga makalabang-buhi sa Armageddon sa dihang ilang makita nga mabanhaw ang “ubang mga karnero” kinsa nangamatay sa panahon sa kaliwatan sa wala pa ang “dakong kasakitan”! (Mateo 24:21) Pinaagi sa klarong mga gahom sa pag-ila, ang mga makalabang-buhi sa Armageddon makaila kanila, moabiabi kanila, ug uban nila mopadayon sa pagpasig-uli sa ilang nahiusang pag-alagad sa Labing Hataas nga Diyos!

10. Pinaagi sa pagkaluwas sa Armageddon, unsay imong malagmit makita?

¹⁰ Pinaagi sa pagkahimong usa sa mga makalabang-buhi sa Armageddon, mahimong makita nimo ang pagkabanhaw sa unang usa sa imong kaugalingong mga paryenti sa yuta. Unsa pay imong bation niini kondili ang sama niadtong gibati sa mga ginikanan kinsa nakakita kang Ginoong Jesus nga nagpabalik sa kinabuhi sa ilang 12-anyos nga anak nga babaye ngadto sa ilang mapangandoyon nga mga kamot? “Dihadiha sila gibayaw sa kalipay.” (Marcos 5:42) Ah, sa pagkamatuod, maimo ang dili-matukib nga kalipay sa pagbanhaw sa mga patay gikan sa Hades ug sa dagat. (Pinadayag 20:13) Oh, pagkamahimayaong palabuton unya kana, usa ka palaabuton nga sa dili madugay moabot unya dinhi!

“Mga Prinsipe sa Tibuok Yuta”

11, 12. (a) Unsay gipasiugda sa Salmo 45:16? (b) Taliwala kang kinsa nga ang Hari, si Jesu-Kristo, magtudlo ug “mga prinsipe sa tibuok yuta”?

¹¹ Pinaagi sa paggamit sa iyang gahom sa pagbanhaw sa mga tawong patay nga alang kanila iyang gitanyag ang iyang hingpit tawhanong kinabuhi ingong usa ka halad-lukat, si Jesus makahimo sa pagpatungha sa katumanan sa Salmo 45:16. Kining salmoha matagnaong gipahayag ngadto kang Jesu-Kristo ingon nga naentronong Hari: “Puli sa imong [yutan-ong] mga amahan mao ang imong mga anak, nga buhaton mong mga prinsipe sa tibuok yuta.” Kining salmoha nagpasiugda nga si Jesu-Kristo mahimong langitnong amahan sa mga anak dinhi sa yuta ug nga siya magtudlo ug mga anak gikan sa ilang taliwala ingong “mga prinsipe sa tibuok yuta.” Ingong “anak ni David” ug ingong kamagulangang anak sa dalagang ulay nga taga Judea nga si Maria, si Jesus dunay yutan-on tawhanong mga amahan balik pa sa unang amahan, si Adan.​—Lucas 3:23-38.

¹² Ang Salmo 45:16 ba nag-ingon nga kadtong kinaiyanhong mga amahan ni Jesus niadto mahimong iyang mga anak pinaagi sa pagbanhaw kanila gikan sa mga patay? Oo. Ang Salmo 45:16 nag-ingon ba usab nga agig pagtahod sa iyang kaliwat nga gikan nila, pakitaan sila ni Jesus ug linain harianong pabor ug itudlo sila nga “mga prinsipe sa tibuok yuta” diha sa Paraiso nga kahimtang? Dili. Ang katumanan sa tagna niining paagiha nagatugot lamang ug limitadong gidaghanon sa “mga prinsipe” sa tibuok yuta. Gawas pa niana nga kamatuoran, dili tanan sa iyang mga kagikan talagsaon nga takos sa linain nga pagkainila sa yuta sa panahon sa iyang Milenyal nga Pagmando. Ang Hari, si Jesu-Kristo, dunay dili-maisip pa kay sa iyang yutan-ong mga kagikan nga itudlo ingong “mga prinsipe”​—ang mga kuwalipikado niadtong makalabang-buhi sa Armageddon, sa binanhaw nga “ubang mga karnero,” apil ang una-Kristohanong mga tawo sa pagtuo. Gikan sa ilang taliwala, siya magatudlo ug mga kuwalipikado nga takos sa pagbaton ug katungdanan sa pagkaprinsipe ingon nga iyang mga hawas sa yuta.

13, 14. Kinsa sa mga binanhaw nga makapribilehiyo ang mga makalabang-buhi sa Armageddon sa pagkakita sa ilang kaugalingong mga mata?

¹³ Palandonga kini sila nga nahilinya sa pagkabanhaw ilalom sa Mesiyanikong Gingharian. Tan-awa! Makatuo ba kita sa atong mga mata? Atua si Abel, ang unang tawo nga martir, ug si Enoch, kinsa nagpadayon sa paglakaw uban sa matuod nga Diyos. Atua, usab, si Noe, ang magtutukod sa arka. Atua si Abraham, si Isaac ug Jacob, ang mga amahan sa nasod sa Israel. Atua si Moises (sa saserdotehanong tribo ni Levi) ug David nga kaniya ang walay kataposang pakigsaad sa Gingharian gihatag. Ug atua, si Isaias, Jeremias, Ezekiel, Daniel, ug ang tanan pang ubang Hebreohanong magsusulat sa Bibliya nga mga propeta hangtod sa kataposan kanila, si Malaquias, ug siyempre, si Juan Bawtista ug si Jose usab, ang ama-ama ni Jesus.

¹⁴ Diha sa usa ka okasyon si Jesus miingon sa mga Hudiyo nga sila “makakita kang Abraham ug kang Isaac ug kang Jacob ug sa tanang mga propeta sa gingharian sa Diyos, apan [sila mismo] pagaabugon sa gawas.” (Lucas 13:28) Ang “dakong panon” sa mga makalabang-buhi sa yuta sa “gubat sa dakong adlaw sa Diyos nga Labing Makagagahom” hatagan ug pribilehiyo sa literal nga pagkakita sa binanhaw nga “Abraham ug Isaac ug Jacob ug sa tanang mga propeta” balik dinhi sa Paraiso sa yuta ug sa harianong pag-alagad ilalom sa Gingharian sa Diyos pinaagi sa “Walay Kataposang Amahan,” si Jesu-Kristo.​—Pinadayag 7:9, 14; Isaias 9:6.

15. Unsang dili ikatandi nga mga pribilehiyo ang naghulat niadtong makalabang-buhi sa Armageddon?

¹⁵ Pagkamakapadasig sa kalag alang kanimo nga makalabang-buhi sa kataposan niining presente daotang kalibotan nga makapakigsulti kang Noe ug sa iyang suod nga pamilya, “walo ka kalag,” kinsa naluwas sa kataposan sa unang kalibotan sa tibuok-yuta nga Baha sa 2370 W.K.P.! Walay si bisan kinsa sa walay kataposan ang makabaton ug eksperyensiya nga sama kanimo ug busa makaalagad ingon nga usa ka Saksi ni Jehova nga Diyos niining tagsaon, dili-masobli nga bahin.​—1 Pedro 3:20; Marcos 13:19; 2 Pedro 3:5-7.

Ang Maloluy-on nga Mamumuhat ug Daotan Mahinumdoman

16, 17. (a) Sa dihang mahinumdoman ni Jesus ang maluloy-on nga mamumuhat ug daotan, unsang pribilehiyo ang mabatonan sa mga makalabang-buhi sa Armageddon ug ang ubang buhi unya nianang panahona? (b) Unsang paglaom ang abiabihon sa binanhaw nga makasasala?

¹⁶ Sa walay duhaduha, nianang panahona ang pagpasig-uli sa Paraiso sa yuta nakasugod na. Ang mamumuhat ug daotan nga gilansang sa Kalbaryo tapad ni Jesus ug kinsa misulti sa pag-ila sa sulat diha sa Iyang ulohan, “Jesus, hinumdomi ako inig-abot mo sa imong gingharian,” pagabanhawon sa yutan-ong kinabuhi sa napasig-uling Paraiso. (Lucas 23:42) Maoy pribilehiyo sa mga makalabang-buhi sa Armageddon ug sa uban nga mabuhi unya sa pag-abiabi ug balik kaniya gikan sa patay. Ilang tudloan siya sa bug-os bahin sa nagamando na karon nga Hari, si Jesu-Kristo, nga kaniya siya nagpakita ug dulot nga kaluoy sa Nisan 14 sa tuig 33 K.P.

¹⁷ Ang Ginoong Jesu-Kristo dili mapakyas sa paghinumdom kaniya sa panahon sa Iyang pagmando sa usa ka libo ka tuig. Sa walay duhaduha kanang maluloy-on, mabanhaw nga mamumuhat ug daotan magpakita sa iyang apresasyon sa nagamandong Hari, si Jesu-Kristo, nga kaniya siya nakautang sa iyang pagkabanhaw, pinaagi sa pagpamatuod sa iyang pagkamatinumanon sa Unibersal nga Soberano, si Jehova nga Diyos. Niana siya pagaisipon nga takos sa pagtagamtam sa pagpuyo diha sa Paraiso sa bag-ong kalibotan sa walay kataposan uban sa nanghibilin sa napasig-uli, masinundanong katawhan.

Kinabuhi sa Tibuok-Yuta, Napasig-uli nga Tanaman sa Eden

18. Sama sa unsa unya ang kinabuhi diha sa napasig-uling Paraiso?

¹⁸ Diha sa napasig-uling Paraiso, ang tanan maoy higala sa tanan. Ang bugkos sa tibuok-kalibotan nga relasyon sa pamilya mabati sa kinailadman sa matag usa nga kalag. Ang tanan magkasinabot sa usa ug usa. Sila nagasulti ug usa ka komun nga pinulongan sa kalibotan. Hayan kini ang orihinal nga pinulongan sa katawhan, nga maoy pinulongan sa tanan sa unang 1,800 ka tuig sa paglungtad sa tawo​—gikan sa paglalang kang Adan sa 4026 W.K.P. hangtod sa adlaw ni Peleg (2269 ngadto sa 2030 W.K.P.), kay “sa iyang mga adlaw ang yuta [sa ato pa, ang populasyon sa yuta] nabahin.” (Genesis 10:25; 11:1) Tagamtamon sa tanan ang pribilehiyo sa pagkinabuhi, ug ang matag bag-ong adlaw sugaton nila uban ang pasalamat tungod sa nadugang nga adlaw sa kinabuhi. Ang pagkaluya sa lawas dili mosamot sa molabay ang panahon. Ang puwersa sa lawas makakalig-on, ug ang mga lawas dili magakaluya.​—Itandi ang Job 33:25.

19. Unsay makita unya maylabot sa mga baldado niadto?

¹⁹ Ug tan-awa! Ang tawo nga piang niadto nakalakaw, oo, nagluksolukso sa kalipay. Ang pungkol nga mga kamot ug tiil sa milagroso nabalik. Ang buta niadto nakakita, ang bungol nakadungog, ug amang nakasulti ug nagaawit sa tuman nga kalipay. (Itandi ang Isaias 35:5, 6.) Ang daot nga porma ug dagway sa lawas sa tawo mawala. Ang tawhanong pagkalalaki sa pagkatahom timbangan sa tawhanong pagkababaye. (Genesis 2:18) Ang tawhanong kahingpitan magahimaya kang Jehova nga Diyos, ang Maglalalang sa hingpit tawhanong lawas.

20. Unsay makita unya bahin sa mga gahom sa kinaiyahan, mga abiyo sa pagkaon, sa kalalangan sa mananap, ug sa unsang paagi gamiton ang yuta?

²⁰ Ang tibuok yuta mahimong usa ka globonhong lugar sa katahom. Walay bahin gikan sa yuta nga dunay taho sa hulaw o makadaot nga pagbunok sa mga ulan o malaglagong mga urakan, unos, bagyo, ug alimpulos. (Itandi ang Marcos 4:37-41.) Ang tanang mga gahom sa kinaiyahan dalhon ngadto sa hingpit nga pagkatimbang aron sa paghimo sa tibuok yuta nga usa ka matahom nga dapit nga pagapuy-an. Walay kakulangan sa pagkaon bisan asa, kay ang yuta magahatag ug abundang ani. (Salmo 72:16) Ang kalinaw ug kasegurohan mabatonan sa tibuok-yuta sa tawo ug sa mananap, sama sa gipamulong ni Jehova: “Dili nila pagadaoton ni pagagub-on ang tibuok ko nga bukid nga balaan.” (Isaias 11:9; tan-awa usab ang mga bersikulo 6-8.) Niining paagiha ang yuta mahimong matahom nga dapit nga pagapuy-an ug magapadayon sa pagsimba ug sa pag-alagad kang Jehova nga Diyos, ang Maglalalang ug Tag-iya sa yuta. Sanglit kini maoy iyang kabtangan tungod sa katungod sa paglalang, kini takos nga gamiton sa usa ka paagi nga makapahimuot niya ug nga magahimaya niya.​—Itandi ang Isaias 35:1, 2, 6, 7.

21. Unsay paglantaw sa nalukat nga katawhan diha sa tanang butang sa yuta, ug unsang musika ang madunggan?

²¹ Makapapresko nga kabag-ohan​—mao unya kanay kahimtang sa tanang butang sa yuta alang sa nalukat nga katawhan nga wala gayod makasulod sa Paraiso sa tanaman sa Eden nga diin dinha gisugdan ang tawhanong kinabuhi sa matahom nga kahingpitan! (Pinadayag 21:5) Pagkamakalilipay nga musika, instrumental ug bokal, madungog unya​—ang tanan nagadayeg kang Jehova!​—1 Cronicas 23:4, 5; Salmo 150:3-6.

22. Unsa kahay bation sa pagkinabuhi diha sa bag-ong kalibotan nga Paraiso?

²² Pagkakatingalahan unya nga mabuhi sa usa ka yuta diin ang tawhanong kinabuhi buhong kaayo ug diin ang tanang mga ang-ang sa pagkamamatay tungod sa orihinal nga sala ni Adan mahanaw na! (Itandi ang Juan 10:10.) Oo, usa unya kini ka yuta diin ang tanang inuyonang tawhanong kalalangan modan-ag sa larawan ug dagway ni Jehova nga Diyos nga niini ang unang tawo si Adan gilalang! (Genesis 1:26, 27) Ang yuta unya nianang panahona dili na masakit sa mata alang sa mga serapin, sa mga kerubin, ug sa masilakon nga mga manulonda sa langit. Inigtan-aw nila sa hiligugmaong mga dagway sa yuta, molantaw sa ubos niini nga gidayandayanan sa paraisonhong katahom, pagdayeg ug pasalamat lamang ang ilang ikapahayag sa Usa kansang panagway nga sila dunay pribilehiyo sa pagtan-aw sa direkta​—si Jehova, ang Soberano sa Uniberso.​—Mateo 18:10.

Usa ka Malipayon, Walay Kataposang Umaabot

23. Unsay posibleng mahitabo maylabot sa dinihogang mga Kristohanon, ug uban sa unsang resulta sa mga molupyo sa yutan-ong Paraiso?

²³ Dunay posibilidad ug kalagmitan nga, may adlaw unya sa umaabot, nga ang mga ngalan niadtong tanan nga dinihogang mga Kristohanon kinsa nagtino sa ilang “pagkatinawag ug pagkapinili” ngadto sa langitnong Gingharian ug kinsa gipanalanginan pinaagi niining langitnong pagkabanhaw bug-os nga ipatik alang sa impormasyon sa tawhanong pamilya diha sa ilang yutan-ong Paraiso. (2 Pedro 1:10; Salmo 87:5, 6) Busa, ang pagkawala sa 144,000 ka inanak-sa-espiritu dinihogan nga mga disipulo ni Jesu-Kristo gikan sa yutan-ong Paraiso bug-os nga masabtan sa katagbawan sa tanan ug uban sa bug-os kasingkasing nga pagkalipay maylabot nila ug duyog nila.

24. (a) Unsay nahimo ni Jehova bahin sa iyang “tumbanan”? (b) Sa unsang paagi kita masayod nga dili na gayod matapos ang bag-ong kalibotan, ug unsang matagnaong alawiton ang matuman?

²⁴ Ang kalipay mao ang walay kataposang umaabot alang sa tanan nga magpabilin sa dili-mabugto nga debosyon kang Jehova, ang mithianong Soberano sa tibuok uniberso. Ang haruhay nga pagkapunong Paraiso nga yuta maoy usa ka takos nga dapit, usa ka dungganong dapit, ingong “tumbanan” nga kapahulayan sa mahulagwayong tiil sa Diyos. Oo, sa walay kataposan mahimaya ni Jehova ‘ang dapit sa iyang mga tiil,’ ug ang tanang katawhan matinumanong magpasakop kaniya! (Mateo 5:34, 35; Buhat 7:49) Ang bag-ong kalibotan maoy usa ka kalibotan nga walay pagkatapos tungod kay ang “kadagaya sa harianong pagmando ug ang kalinaw walay kataposan.” (Isaias 9:7) Unya, ang matagnaong awit sa mga manulonda sa langit sa pagkatawo ni Jesus sa Bethlehem sa Judea sa 2 W.K.P. matuman: “Himaya sa Diyos sa kalangitan, ug sa yuta panagdait sa mga tawo nga maayo ug kabubut-on.”​—Lucas 2:13, 14.

25. (a) Unsay gipabilhan karon niadtong sakop sa “dakong panon” sa “ubang mga karnero”? (b) Unsa ang atong kinasingkasing nga tinguha?

²⁵ Kadtong sakop sa “dakong panon” sa Maayong Magbalantay sa “ubang mga karnero” nagapabili sa makapadasig-sa-kalag nga mga pulong sa saad nga Paraiso nga napasig-uli. Maoy ilang pribilehiyo nga makauban sa organisasyon sa Diyos karon ug madasigon sa pakigbahin sa buluhaton nga gitagna ni Ginoong Jesu-Kristo, ang pagwali sa maayong balita sa Gingharian sa tibuok pinuy-anang yuta alang sa kataposan nga pagpamatuod. (Mateo 24:14; Marcos 13:10) Ang atong tim-os, kinasingkasing nga tinguha ingong mga Saksi ni Jehova mao ang paghupot sa atong integridad nga maputli sa walay kataposan, alang sa walay kataposang kahimayaan ug kadayeganan sa Unibersal nga Soberano, si Jehova nga Diyos, ug ilalom sa harianong pagmando sa iyang bugtong Anak, si Jesu-Kristo. “Hallelujah!”​—Pinadayag 19:1, 3, 4, 6, RVS, New International Version; Proverbio 10:9.

Unsaon Nimo sa Pagtubag?

◻ Unsang saad ang gihimo ni Jehova bahin sa iyang mahulagwayong tumbanan, ang yuta?

◻ Kinsay motabang sa pagpasig-uli sa Paraiso?

◻ Gikan kang kinsa ang Hari, si Jesu-Kristo, magtudlo ug “mga prinsipe sa tibuok yuta”?

◻ Unsang makapadasig-sa-kalag nga eksperyensiya ang imong mabatonan sa dihang mosugod na ang pagkabanhaw?

◻ Unsang palaabuton ang nagahulat niadtong magapabilin sa malig-ong debosyon kang Jehova?