Gipakita ni Jehova Kanato Kon Unsaon Pag-ihap ang Atong mga Adlaw
“Ipakita kanamo kon unsaon pag-ihap ang among mga adlaw sa paagi nga makabaton kami ug kasingkasing nga manggialamon.”—SALMO 90:12.
1. Nganong haom ang paghangyo kang Jehova nga ipakita kanato kon unsaon ‘pag-ihap ang atong mga adlaw’?
SI Jehova nga Diyos mao ang atong Maglalalang ug Maghahatag-Kinabuhi. (Salmo 36:9; Pinadayag 4:11) Busa wala nay lain pang anaa sa mas maayong posisyon sa pagpakita kanato kon unsaon paggamit ang atong mga tuig sa kinabuhi sa maalamong paagi. Nan, haom nga nangaliyupo ang salmista sa Diyos: “Ipakita kanamo kon unsaon pag-ihap ang among mga adlaw sa paagi nga makabaton kami ug kasingkasing nga manggialamon.” (Salmo 90:12) Ang ika-90 nga Salmo, diin makita nato ang maong pangamuyo, takos gayod natong pamalandongon pag-ayo. Apan, mohimo una kitag mubong sumaryo niining awit nga dinasig sa Diyos.
2. (a) Kinsa ang ginganlan nga tigkomposo sa Salmo 90, ug lagmit kanus-a kini nasulat? (b) Sa unsang paagi ang ika-90 nga Salmo mag-apektar sa atong panglantaw sa kinabuhi?
2 Ang superskripsiyon sa Salmo 90 nagtawag niana nga “usa ka pag-ampo ni Moises, ang tawo sa matuod nga Diyos.” Tungod kay kining maong salmo nagpasiugda sa pagkaumalagi sa kinabuhi sa tawo, lagmit gikomposo kini human mapagawas ang mga Israelinhon sa pagkaulipon sa Ehipto ug panahon sa ilang 40-ka-tuig nga panaw sa kamingawan, sa dihang ang libolibong kamatayon nagtapos sa dili-matinuohong kaliwatan. (Numeros 32:9-13) Bisan unsa pay kahimtang, ang Salmo 90 nagpakita nga mubo ra ang kinabuhi sa dili-hingpit nga mga tawo. Nan, tin-aw nga angay natong gamiton ang atong bililhong mga adlaw sa maalamong paagi.
3. Unsa ang sukaranang mga kaundan sa Salmo 90?
3 Sa Salmo 90, ang mga bersikulo 1 hangtod sa 6 nagpaila kang Jehova ingong atong dumalayong puloy-anan. Ang mga bersikulo 7 hangtod sa 12 nagpakita kon unsay atong gikinahanglan aron magamit ang atong lumalabay nga mga tuig sa kinabuhi sa paagi nga dalawaton niya. Ug sumala sa gipahayag diha sa mga bersikulo 13 hangtod sa 17, kita kinasingkasing nga nagtinguha nga makadawat sa mahigugmaong-kalulot ug panalangin ni Jehova. Siyempre, kining maong salmo dili direktang mapadapat sa atong personal nga mga eksperyensiya ingong mga alagad ni Jehova. Bisan pa niana, angay natong sundogon ang tinamdan nga gipahayag niining salmoha sa dagway sa pag-ampo. Busa susihon nato pag-ayo ang Salmo 90 sa panglantaw niadtong dedikado sa Diyos.
Si Jehova—Ang Atong “Tinuod nga Puloy-anan”
4-6. Sa unsang paagi si Jehova maoy “usa ka tinuod nga puloy-anan” alang kanato?
4 Ang salmista misugod pinaagi sa mga pulong: “Oh Jehova, ikaw maoy usa ka tinuod nga puloy-anan alang kanamo sulod sa sunodsunod nga mga kaliwatan. Sa wala pa ipatungha ang kabukiran, o ipahimugso nimo ang yuta ug ang mabungahong yuta nga samag uban sa kasakit sa pagbati, bisan gikan sa panahong walay tino hangtod sa panahong walay tino ikaw mao ang Diyos [o, ang Balaang Usa].”—Salmo 90:1, 2, potnot sa Ingles.
5 Alang kanato ang “walay kataposang Diyos,” si Jehova, maoy “usa ka tinuod nga puloy-anan”—usa ka espirituwal nga dalangpanan. (Roma 16:26) Mobati kitang luwas, kay andam siya kanunay sa pagtabang kanato ingong “Tigpatalinghog sa pag-ampo.” (Salmo 65:2) Tungod kay atong gitugyan ang atong mga kabalaka ngadto sa atong langitnong Amahan pinaagi sa iyang hinigugmang Anak, ‘ang kalinaw sa Diyos nga labaw sa tanang panghunahuna magbantay sa atong mga kasingkasing ug sa atong mga gahom sa pangisip.’—Filipos 4:6, 7; Mateo 6:9; Juan 14:6, 14.
6 Natagamtam nato ang espirituwal nga kasegurohan tungod kay, sa mahulagwayong pagkasulti, si Jehova maoy “usa ka tinuod nga puloy-anan” alang kanato. Nagtagana usab siya ug “sulod nga mga lawak”—lagmit nalambigit pag-ayo sa mga kongregasyon sa iyang katawhan—ingong espirituwal nga mga dalangpanan, diin ang mahigugmaong mga magbalantay nakatampo ug dako sa atong kasegurohan. (Isaias 26:20; 32:1, 2; Buhat 20:28, 29) Dugang pa, ang uban kanato maoy sakop sa mga pamilya nga adunay taas nga kasaysayan sa pag-alagad sa Diyos ug nakaplagan siya mismo nga ‘usa ka tinuod nga puloy-anan sulod sa sunodsunod nga mga kaliwatan.’
7.Sa unsang diwa nga ang kabukiran ‘gipatungha’ ug ang yuta gipahimugso nga samag uban sa “kasakit sa pagbati”?
7 Si Jehova naglungtad na sa wala pa “ipatungha” ang kabukiran o ipahimugso ang yuta uban sa “kasakit sa pagbati.” Sa panglantaw sa tawo, ang pagpatungha niining yutaa uban sa tanang bahin, kemistriya, ug komplikadong mga mekanismo niini nagkinahanglag dako kaayong buluhaton. Ug pinaagi sa pag-ingon nga ang kabukiran ‘gipatungha’ ug ang yuta gipahimugso nga samag uban sa “kasakit sa pagbati,” ang salmista nagpakitag dakong pagtahod sa gidak-on sa buluhaton nga nalangkit sa dihang gilalang ni Jehova kining mga butanga. Dili ba angay usab nga batonan nato ang susamang pagtahod ug pagkamapasalamaton sa binuhat sa Maglalalang?
Si Jehova Kanunayng Andam nga Motabang Kanato
8. Unsay kahulogan sa mga pulong nga si Jehova maoy Diyos “gikan sa panahong walay tino hangtod sa panahong walay tino”?
8 “Bisan gikan sa panahong walay tino hangtod sa panahong walay tino ikaw mao ang Diyos,” miawit ang salmista. Ang “panahong walay tino” mahimong magtumong sa mga butang nga adunay kataposan apan wala tinoa ang gidugayon. (Exodo 31:16, 17; Hebreohanon 9:15) Apan, sa Salmo 90:2 ug sa ubang mga teksto diha sa Hebreohanong Kasulatan, ang “panahong walay tino” nagkahulogan nga “dumalayon.” (Ecclesiastes 1:4) Dili nato masabtan kon sa unsang paagi nahimong posible nga ang Diyos kanunayng naglungtad. Bisan pa niana, si Jehova walay sinugdanan ug walay kataposan. (Habacuc 1:12) Siya kanunayng buhi ug andam nga motabang kanato.
9. Sa unsa gitandi sa salmista ang usa ka libo ka tuig sa paglungtad sa tawo?
9 Ang salmista gidasig nga ipakasama ang usa ka libo ka tuig nga paglungtad sa tawo sa mubo ra kaayong panahon diha sa kasinatian sa dumalayong Maglalalang. Nagtumong sa Diyos, siya misulat: ‘Ginapabalik mo ang may-kamatayong tawo sa dinugmok nga butang, ug ikaw magaingon: “Balik kamo, kamong mga anak sa mga tawo.” Kay sa imong mga mata ang usa ka libo ka tuig ingon lamang sa kagahapon sa dihang kini molabay na, ug ingon sa usa ka yugto sa pagbantay panahon sa kagabhion.’—Salmo 90:3, 4.
10. Sa unsang paagi ‘gipabalik sa Diyos ang tawo sa dinugmok nga butang’?
10 Ang tawo may kamatayon, ug ‘gipabalik siya sa Diyos sa dinugmok nga butang.’ Sa ato pa, ang tawo mobalik “sa abog,” ingong dinugmok, o pinulbos, nga yuta. Sa pagkatinuod, si Jehova nag-ingon: ‘Balik sa abog sa yuta nga gikan niini ikaw gihimo.’ (Genesis 2:7; 3:19) Mapadapat kini sa tanan—lig-on o huyang, dato o pobre—kay walay dili-hingpit nga tawo ang ‘sa bisan unsang paagi makatubos bisan sa usa ka igsoon, ni makahatag sa Diyos ug usa ka lukat alang kaniya, aron mabuhi pa siya gihapon hangtod sa kahangtoran.’ (Salmo 49:6-9) Apan pagkamapasalamaton nato nga ‘gihatag sa Diyos ang iyang bugtong Anak, aron nga ang tanan nga magpasundayag ug pagtuo kaniya makabaton ug kinabuhing walay kataposan’!—Juan 3:16; Roma 6:23.
11. Nganong makaingon kita nga ang taas nga panahon alang kanato mubo ra kaayo alang sa Diyos?
11 Gikan sa panglantaw ni Jehova, bisan ang kinabuhi sa 969-anyos nga si Metusela wala makaabot ug usa ka adlaw. (Genesis 5:27) Alang sa Diyos ang usa ka libo ka tuig daw kagahapon lamang—usa ka yugto nga 24 oras—iniglabay na niini. Ang salmista naghisgot usab nga alang sa Diyos ang usa ka libo ka tuig susama sa upat-ka-oras nga pagbantay sa guwardiya diha sa kampo panahon sa kagabhion. (Maghuhukom 7:19) Nan, tin-aw nga ang taas nga panahon alang kanato mubo ra kaayo alang sa dumalayong Diyos, si Jehova.
12. Sa unsang paagi ang mga tawo ‘gibanlas’ sa Diyos?
12 Kasukwahi sa dumalayong paglungtad sa Diyos, ang kinabuhi sa tawo karon mubo gayod. Nag-ingon ang salmista: ‘Gibanlas mo sila; sila mahimong usa na lamang ka pagkatulog; sa pagkabuntag sila sama lamang sa lunhawng balili nga magakausab. Sa mabuntag kini mamulak ug mausab gayod; sa magabii kini malawos ug tinong malaya.’ (Salmo 90:5, 6) Nakita ni Moises ang libolibong Israelinhon nga nangamatay diha sa kamingawan, nga ‘gibanlas’ sa Diyos samag pinaagi sa baha. Kining bahina sa salmo gihubad nga: “Gibanlas mo ang mga tawo diha sa pagkatulog sa kamatayon.” (New International Version) Sa laing bahin, ang gitas-on sa kinabuhi sa dili-hingpit nga mga tawo maoy ‘usa lamang ka pagkatulog’ nga mubo kaayo—ikatandi sa usa lang ka gabiing pagkatulog.
13. Sa unsang paagi kita “sama lamang sa lunhawng balili,” ug sa unsang paagi mag-apektar kini sa atong panghunahuna?
13 Kita ‘sama lamang sa lunhawng balili nga mamulak sa buntag’ apan pagkagabii malawos ilalom sa hilabihang kainit sa adlaw. Oo, ang atong kinabuhi sama ka umalagi sa balili nga malawos sa usa lang ka adlaw. Busa, dili nato usikan kining bililhong bahandi. Hinunoa, kinahanglang pangitaon nato ang giya sa Diyos kon sa unsang paagi angay natong gamiton ang nahibiling mga tuig niining sistemaha sa mga butang.
Si Jehova Motabang Kanato sa ‘Pag-ihap sa Atong mga Adlaw’
14, 15. Adunay unsang katumanan ang Salmo 90:7-9 diha sa mga Israelinhon?
14 Samang nakigsulti sa Diyos, ang salmista midugang: “Natibawas kami tungod sa imong kasuko, ug sa imong kaaligutgot kami nagubot. Gibutang mo ang among kasaypanan sa imong atubangan, ang among mga butang nga tinago atubangan sa imong masanag nga nawong. Kay ang tanan namong mga adlaw mius-os tungod sa imong mabangis nga kasuko; natapos namo ang among katuigan sama sa usa ka hagawhaw.”—Salmo 90:7-9.
15 Ang walay-pagtuo nga mga Israelinhon ‘natibawas tungod sa kasuko sa Diyos.’ Sila ‘nagubot tungod sa iyang kaaligutgot,’ o ‘nalisang tungod sa iyang kapungot.’ (New International Version) Ang uban “gipamukan . . . sa kamingawan” ingong resulta sa mga paghukom sa Diyos. (1 Corinto 10:5) ‘Gibutang ni Jehova ang ilang kasaypanan sa iyang atubangan.’ Gipaninglan niya sila tungod sa ilang daotang buhat nga gihimo sa dayag, apan bisan ang ilang “mga butang nga tinago,” o tinagong mga sala, anaa sa ‘atubangan sa iyang masanag nga nawong.’ (Proverbio 15:3) Kay maoy puntirya sa mabangis nga kasuko sa Diyos, ‘gitapos sa dili-mahinulsolong mga Israelinhon ang ilang mga tuig sama sa usa ka hagawhaw.’ Tungod niana, ang atong mubo nga kinabuhi sama sa gininhawa nga moagi sa atong mga ngabil ingong hagawhaw lamang.
16. Kon ang pipila padayong nagpakasala sa tago, unsay angay nilang buhaton?
16 Kon adunay si bisan kinsa kanato nga padayong nagpakasala sa tago, tingali matago nato ang maong panggawi gikan sa mga isigkatawo sulod sa usa ka yugto. Apan ang atong tinagong buhat nga daotan maanaa sa ‘atubangan sa masanag nga nawong ni Jehova,’ ug ang atong mga lihok makadaot sa atong relasyon uban kaniya. Aron mahibalik ang kasuod kang Jehova, kinahanglang mag-ampo kita alang sa iyang kapasayloan, talikdan ang atong mga kalapasan, ug mapasalamatong dawaton ang espirituwal nga tabang sa Kristohanong mga ansiyano. (Proverbio 28:13; Santiago 5:14, 15) Pagkalabing maayo pa niana kay sa posibilidad nga ‘taposon nato ang atong mga tuig sama sa usa ka hagawhaw,’ nga mameligro ang atong paglaom sa kinabuhing walay kataposan!
17. Unsang gitas-on sa kinabuhi ang kasagaran sa mga tawo sa katibuk-an, ug ang atong katuigan natugob sa unsa?
17 Bahin sa gitas-on sa kinabuhi sa dili-hingpit nga mga tawo, ang salmista nag-ingon: “Ang mga adlaw sa among panuigon maoy kapitoan ka tuig; ug kon tungod sa talagsaong kabaskog kini maoy kawaloan ka tuig, bisan pa niana ang ilang pagpanlimbasog mosangpot lamang sa kasamok ug sa mga butang makapadaot; kay kini molabay sa madali, ug kami mahanaw.” (Salmo 90:10) Ang gitas-on sa kinabuhi nga 70 ka tuig maoy kasagarang edad sa mga tawo sa katibuk-an, ug sa edad nga 85, gihisgotan ni Caleb ang iyang talagsaong kusog. Dihay mga eksepsiyon, sama kang Aaron (123), Moises (120), ug Josue (110). (Numeros 33:39; Deuteronomio 34:7; Josue 14:6, 10, 11; 24:29) Apan sa dili-matinuohon nga kaliwatan nga migula sa Ehipto, ang narehistro gikan sa edad nga 20 pataas nangamatay sulod sa 40 ka tuig. (Numeros 14:29-34) Karon, diha sa daghang nasod ang kasagarang gitas-on sa kinabuhi sa tawo nasulod gihapon sa gitas-on nga gihatag sa salmista. Ang atong katuigan natugob “sa kasamok ug sa mga butang makapadaot.” Kini molabay sa madali, ‘ug kita mahanaw.’—Job 14:1, 2.
18, 19. (a) Unsay kahulogan sa ‘pag-ihap sa atong mga adlaw sa paagi nga makabaton kita ug kasingkasing nga manggialamon’? (b) Ang atong pagpasundayag ug kaalam magtukmod kanato sa pagbuhat sa unsa?
18 Sunod miawit ang salmista: “Kinsa ba ang nahibalo sa kusog sa imong kasuko ug sa imong mabangis nga kasuko sumala sa pagkahadlok kanimo? Ipakita kanamo kon unsaon pag-ihap ang among mga adlaw sa paagi nga makabaton kami ug kasingkasing nga manggialamon.” (Salmo 90:11, 12) Walay usa kanato ang bug-os nga nahibalo sa kagrabehon sa kasuko sa Diyos o sa gilapdon sa iyang mabangis nga kasuko, ug kini angayng magpasamot sa atong matahaong kahadlok kang Jehova. Sa pagkatinuod, kini angayng mopalihok kanato sa paghangyo kaniya ‘kon unsaon nato pag-ihap ang atong mga adlaw sa paagi nga makabaton kita ug kasingkasing nga manggialamon.’
19 Ang mga pulong sa salmista maoy pag-ampo nga tudloan ni Jehova ang iyang katawhan kon unsaon pagpasundayag ug kaalam diha sa pagpabili ug paggamit sa ilang nahibiling mga adlaw sa paagi nga giuyonan sa Diyos. Sa gitas-on sa kinabuhi nga 70 ka tuig makalaom kita ug mga 25,500 ka adlaw. Apan, bisan unsay atong edad, ‘wala kita masayod kon unsay dangatan sa atong kinabuhi ugma, kay kita sama sa gabon nga magpakita sa makadiyot ug unya mahanaw.’ (Santiago 4:13-15) Tungod kay ‘ang panahon ug wala damhang panghitabo modangat kanatong tanan,’ wala kita mahibalo kon unsa pa ka dugay nga kita mabuhi. Busa mag-ampo kita alang sa kaalam sa pagsagubang sa mga pagsulay, sa pagtratar sa uban sa hustong paagi, ug sa pagbuhat sa atong maarangan diha sa pag-alagad kang Jehova karon mismo—karong adlawa! (Ecclesiastes 9:11; Santiago 1:5-8) Si Jehova naggiya kanato pinaagi sa iyang Pulong, iyang espiritu, ug iyang organisasyon. (Mateo 24:45-47; 1 Corinto 2:10; 2 Timoteo 3:16, 17) Ang pagpasundayag ug kaalam magpalihok kanato sa ‘pagpangita pag-una sa Gingharian sa Diyos’ ug sa paggamit sa atong mga adlaw sa paagi nga maghimaya kang Jehova ug maglipay sa iyang kasingkasing. (Mateo 6:25-33; Proverbio 27:11) Siyempre, ang pagsimba kaniya nga tibuok kasingkasing dili magwagtang sa tanan natong mga problema, apan tinong moresulta kini sa dakong kalipay.
Ang Panalangin ni Jehova Maghatag Kanatog Kalipay
20. (a) Sa unsang paagi ang Diyos “magbasol”? (b) Sa unsang paagi makiglabot si Jehova kanato kon kita makahimo ug grabeng sala apan nagpasundayag ug tinuod nga paghinulsol?
20 Pagkaanindot kon mahimo kitang magmaya sa tibuok natong kinabuhi! Bahin niini, si Moises mihangyo: “Balik, Oh Jehova! Hangtod kanus-a pa? Ug ikaw magbasol mahitungod sa imong mga alagad. Sa buntag tagbawa kami sa imong mahigugmaong-kalulot [o, “maunongong gugma”], aron makahugyaw kami sa kalipay ug magmaya sa tanan namong mga adlaw.” (Salmo 90:13, 14; potnot sa Ingles) Ang Diyos dili masayop. Bisan pa niana, siya “magbasol” ug ‘mobiya’ sa iyang kasuko ug sa pagpahamtang sa silot sa dihang ang iyang pasidaan bahin sa paghimo nianang buhata magpatunghag kausaban sa tinamdan ug panggawi sa bahin sa mahinulsolong mga mamumuhat ug daotan. (Deuteronomio 13:17) Busa bisan pag kita makahimo ug grabeng sala apan nagpasundayag ug tinuod nga paghinulsol, ‘kita tagbawon ni Jehova sa iyang mahigugmaong-kalulot,’ ug kita may katarongan nga ‘makahugyaw sa kalipay.’ (Salmo 32:1-5) Ug pinaagi sa pagsunod sa matarong nga dalan, bation nato ang maunongong gugma sa Diyos alang kanato ug makahimo kita sa ‘pagmaya sa tanan natong mga adlaw’—oo, sa tibuok natong kinabuhi.
21. Sa mga pulong nga narekord sa Salmo 90:15, 16, lagmit unsay gihangyo ni Moises?
21 Ang salmista kinasingkasing nga nag-ampo: “Lipaya kami sumala sa mga adlaw nga ikaw nagsakit kanamo, sa katuigan nga kami nakakita ug katalagman. Makita unta sa imong mga alagad ang imong kalihokan ug sa ilang mga anak ang imong kahalangdon.” (Salmo 90:15, 16) Lagmit gihangyo ni Moises ang Diyos nga panalanginan ang Israel ug pagmaya nga katumbas, o samag gitas-on, sa ilang mga adlaw sa kasakit ug sa katuigan nga niana sila nag-antos sa kalamidad. Siya mihangyo nga ang “kalihokan” sa Diyos sa pagpanalangin sa mga Israelinhon madayag sa Iyang mga alagad ug nga ang Iyang katahom mapakita diha sa ilang mga anak, o kaliwat. Kita haom nga makaampo nga ang mga panalangin igabubo ibabaw sa masinugtanong katawhan diha sa gisaad sa Diyos nga bag-ong kalibotan.—2 Pedro 3:13.
22. Sumala sa Salmo 90:17, sa unsa kita haom nga makaampo?
22 Ang Salmo 90 mihinapos niini nga hangyo: “Ang kahimuot ni Jehova nga among Diyos magpaibabaw unta kanamo, ug ang buhat sa among mga kamot lig-onon mo diha kanamo. Oo, ang buhat sa among mga kamot, lig-onon mo kini.” (Salmo 90:17) Kining mga pulonga nagpakita nga kita haom nga makaampo nga panalanginan sa Diyos ang atong mga paningkamot diha sa pag-alagad kaniya. Ingong dinihogang mga Kristohanon o ilang mga kauban, ang “ubang mga karnero,” kita nagmaya nga “ang kahimuot ni Jehova” magpaibabaw kanato. (Juan 10:16) Pagkamalipayon nato nga ang Diyos ‘nagalig-on sa buhat sa atong mga kamot’ ingong mga magmamantala sa Gingharian ug sa ubang mga paagi!
Magpadayon Kita sa Pag-ihap sa Atong mga Adlaw
23, 24. Sa unsang paagi kita makabenepisyo gikan sa pagpamalandong sa ika-90 nga Salmo?
23 Ang pagpamalandong sa ika-90 nga Salmo angayng magpauswag sa atong pagsalig kang Jehova, ang atong “tinuod nga puloy-anan.” Pinaagi sa pagpamalandong sa mga pulong niini bahin sa kamubo sa kinabuhi, angay kitang mahimong mas magmabinantayon sa panginahanglan sa giya sa Diyos sa pag-ihap sa atong mga adlaw. Ug kon molahutay kita sa pagpangita ug pagpasundayag sa diyosnong kaalam, makaseguro kita nga makadawat sa mahigugmaong-kalulot ug panalangin ni Jehova.
24 Si Jehova magpadayon sa pagpakita kanato kon unsaon pag-ihap ang atong mga adlaw. Ug kon mopasignunot kita sa iyang instruksiyon, makapadayon kita sa pag-ihap sa atong mga adlaw hangtod sa kahangtoran. (Juan 17:3) Apan, kon buot gayod nato ang walay-kataposang kinabuhi, kinahanglang himoon nato si Jehova nga atong dalangpanan. (Judas 20, 21) Sa makita nato sa mosunod nga artikulo, kining puntoha gitin-aw pag-ayo diha sa makapadasig nga mga pulong sa ika-91 nga Salmo.
Unsaon Nimo Pagtubag?
• Sa unsang paagi si Jehova “usa ka tinuod nga puloy-anan” alang kanato?
• Nganong makaingon kita nga si Jehova kanunayng andam nga motabang kanato?
• Sa unsang paagi si Jehova motabang kanato sa ‘pag-ihap sa atong mga adlaw’?
• Unsay makapaarang kanato sa ‘pagmaya sa tanan natong mga adlaw’?
[Hulagway sa panid 11]
Si Jehova maoy Diyos “sa wala pa ipatungha ang kabukiran”
[Hulagway sa panid 12]
Gikan sa panglantaw ni Jehova, ang kinabuhi sa 969-anyos nga si Metusela wala makaabot ug usa ka adlaw
[Mga hulagway sa panid 14]
Si Jehova ‘nagalig-on sa buhat sa atong mga kamot’