Sa Unsang Paagi Mahimo Natong Mapuslanon ang Atong mga Adlaw Atubangan Kang Jehova?

“Gahapon, tali sa pagsubang ug sa pagsalop sa adlaw, duha ka bulawanong oras ang nawala, nga matag usa may kan-uman ka bililhong mga minuto. Walay ganti nga gitanyag, tungod kay nahanaw na kini hangtod sa hangtod!”—Lydia H. Sigourney, Amerikanang awtor (1791-1865).

ANG mga adlaw sa atong kinabuhi hamubo ug lumalabay lamang. Ang salmistang si David namalandong sa kamubo sa kinabuhi ug natukmod sa pag-ampo: “Oh Jehova, pahibaloa ako sa akong kataposan, ug sa sukod sa akong mga adlaw—kon unsa kini, aron mahibalo ako kon unsa ka umalagi ako. Tan-awa! Gihimo mo nga diyutay ang akong mga adlaw; ug ang gidugayon sa akong kinabuhi ingon sa walay kapuslanan lamang sa imong atubangan.” Ang gikabalak-an ni David mao ang pagkinabuhi sa paagi nga makapahimuot sa Diyos, sa iyang sinultihan ug mga buhat. Nga nagpatugbaw sa iyang pagsalig sa Diyos, siya miingon: “Kanimo ako nagapaabot.” (Salmo 39:4, 5, 7) Namati si Jehova. Iya gayong gisukod ang mga kalihokan ni David ug gigantihan siya sumala niana.

Dali rang malinga matag minuto kada adlaw ug maanod dayon sa paspas ug punog-kalihokan nga pagkinabuhi. Makapabalaka kini kanato, ilabina tungod kay daghan kaayong butang nga buhaton ug sination ug diyutay lang kaayo ang panahon sa paghimo niana. Ang ato bang gikabalak-an sama nianang kang David—nga magkinabuhi aron maangkon ang pag-uyon sa Diyos? Walay duhaduha nga si Jehova nagabantay ug mainampingong nagsusi sa matag usa kanato. Mga 3,600 ka tuig kanhi, si Job, usa ka tawo nga mahinadlokon sa Diyos, miangkon nga nakita ni Jehova ang iyang mga dalan ug nagsusi sa tanan niyang mga kalihokan. Si Job nangutana: “Sa dihang siya makighusay, unsay akong ikatubag kaniya?” (Job 31:4-6, 14) Posible natong mahimo ang atong mga adlaw nga mapuslanon atubangan sa Diyos pinaagi sa pagtukod ug espirituwal nga mga prioridad, sa pagtuman sa iyang mga sugo, ug sa paggamit sa atong panahon sa maalamong paagi. Tukion nato pag-ayo kining mga butanga.

Himoa ang Espirituwal nga mga Butang nga Maoy Panguna Natong Gikabalak-an

Ang inspiradong Kasulatan tukmang nag-awhag kanato sa paghimog espirituwal nga mga prioridad sa dihang kini nag-ingon: ‘Tinoa ang mas hinungdanong mga butang.’ Unsa man kining hinungdanong mga butang? Ang tubag nalangkit sa “tukmang kahibalo ug bug-os nga katakos sa pag-ila.” (Filipos 1:9, 10) Ang pagbaton ug kahibalo bahin sa mga katuyoan ni Jehova nagkinahanglan ug maalamong paggamit sa atong panahon. Hinunoa, ang paghimo sa espirituwal nga mga butang nga maoy atong pangunang gikabalak-an seguradong makahatag kanatog usa ka kinabuhi nga magantihon ug matagbawon.

Si apostol Pablo nagpahinumdom kanato nga “magpadayon sa pagtino kon unsa ang dalawaton sa Ginoo.” Ang atong pagtino kinahanglang maglakip sa pagsusi sa atong mga motibo ug mga tinguha sa kasingkasing. Ang apostol mipadayon: “Padayong sabta kon unsa ang kabubut-on ni Jehova.” (Efeso 5:10, 17) Busa, unsa man ang giisip ni Jehova nga dalawaton? Ang usa ka proverbio sa Bibliya nagtubag: “Ang kaalam mao ang pangunang butang. Batoni ang kaalam; ug uban sa tanan nga imong pagabatonan, batoni ang pagsabot. Pabilhi kini pag-ayo, ug kini magabayaw kanimo.” (Proverbio 4:7, 8) Si Jehova malipay sa usa ka tawo nga magabaton ug magapasundayag ug diyosnong kaalam. (Proverbio 23:15) Ang katahom sa maong kaalam mao nga dili kini makuha o malaglag. Gani, kini magabantay ug manalipod ‘batok sa daotang dalan ug sa tawo nga nagasulti ug hiwi nga mga butang.’—Proverbio 2:10-15.

Busa, pagkamaalamon gayod nga suklan ang tanang kiling nga pakamenoson ang espirituwal nga mga butang! Kinahanglang ugmaron nato ang usa ka mapabilhong tinamdan sa mga pulong ni Jehova ug ang maayong matang sa pagkahadlok kaniya. (Proverbio 23:17, 18) Bisan tuod ang maong panghunahuna mabatonan sa tanang panahon sa kinabuhi, labing maayo nga ugmaron kining hustong sumbanan ug itisok ang mga prinsipyo sa Bibliya nganha sa atong personalidad samtang batan-on pa. “Hinumdomi, karon, ang imong Dakong Maglalalang sa mga adlaw sa imong pagkabatan-on,” nag-ingon ang maalamong Haring Solomon.—Ecclesiastes 12:1.

Ang labing maayong paagi sa pag-ugmad sa pagpabili kang Jehova maoy pinaagi sa personal nga pag-ampo kaniya matag adlaw. Giila ni David ang kahinungdanon sa pagsalig kang Jehova, kay siya mihangyo: “Oh Jehova, dungga ang akong pag-ampo, ug patalinghogi ang akong pagtuaw alang sa tabang. Ayaw pagpakahilom tungod sa akong mga luha.” (Salmo 39:12) Ang ato bang suod nga relasyon uban sa Diyos magtandog usahay sa atong mga pagbati nga moabot sa punto nga kita mohilak? Sa pagkatinuod, kon kanunay kitang makigsulti kang Jehova bahin sa personal nga mga butang ug mamalandong sa iyang Pulong, mas pa siyang masuod kanato.—Santiago 4:8.

Kat-oni ang Pagkamasinugtanon

Si Moises maoy lain pang tawo sa pagtuo nga nailhan tungod sa iyang pagsalig sa Diyos. Sama kang David, si Moises nahibalo nga ang kinabuhi puno sa kasamok. Busa, gihangyo niya ang Diyos nga ipakita kaniya ‘kon unsaon pag-ihap ang iyang mga adlaw sa paagi nga mabatonan ang kasingkasing nga manggialamon.’ (Salmo 90:10-12) Ang usa ka kasingkasing nga manggialamon maangkon lamang pinaagi sa pagkat-on ug pagkinabuhi uyon sa mga balaod ug mga prinsipyo ni Jehova. Nahibalo si Moses niana ug sa ulahi naningkamot siya sa pagsilsil sa maong hinungdanong kamatuoran ngadto sa nasod sa Israel pinaagi sa pagpahayag pag-usab sa mga balaod ug mga regulasyon sa Diyos ngadto kanila sa wala pa nila panag-iyaha ang Yutang Saad. Si bisan kinsang tawhanong hari nga pilion ni Jehova sa ulahi aron momando sa Israel kinahanglang magsulat alang sa iyang kaugalingon ug kopya sa Balaod ug basahon kana sa tanang adlaw sa iyang kinabuhi. Ngano man? Aron iyang makat-onan ang pagkahadlok sa Diyos. Usa kini ka pagsulay sa pagkamasinugtanon sa hari. Manalipod kini kaniya batok sa pagbayaw sa iyang kasingkasing ibabaw sa iyang mga igsoon ug malugwayan usab ang iyang mga adlaw diha sa iyang gingharian. (Deuteronomio 17:18-20) Gisubli kining maong saad sa dihang miingon si Jehova ngadto sa anak ni David nga si Solomon: “Kon ikaw molakaw diha sa akong mga dalan pinaagi sa pagtuman sa akong mga regulasyon ug sa akong mga sugo, ingon sa paglakaw ni David nga imong amahan, pagalugwayan ko usab ang imong mga adlaw.”—1 Hari 3:10-14.

Ang pagkamasinugtanon maoy seryosong butang para sa Diyos. Kon atong pakamenoson ang pipila ka bahin sa mga kinahanglanon ug mga sugo ni Jehova nga morag dili kini hinungdanon, mamatikdan gayod niya ang maong tinamdan. (Proverbio 15:3) Ang pagkahibalo niini angayng magtukmod kanato nga huptan ang hataas nga pagtamod sa tanang sugo ni Jehova, bisan pag ang pagbuhat niana dili kanunayng sayon. Buhaton ni Satanas ang tanan niyang maarangan aron ‘maalihan ang atong alagianan’ samtang naningkamot kita sa pagtuman sa mga balaod ug mga sugo sa Diyos.—1 Tesalonica 2:18.

Ilabinang hinungdanon ang pagsunod sa Kasulatanhong tambag nga makigtigom alang sa pagsimba ug panag-ubanay. (Deuteronomio 31:12, 13; Hebreohanon 10:24, 25) Busa maayong pangutan-on nato ang atong kaugalingon: ‘Aduna ba akoy determinasyon ug pagkamalahutayon nga gikinahanglan aron mabuhat kon unsa gayod ang maayo?’ Ang pagpasagad sa atong panag-ubanay ug instruksiyon diha sa Kristohanong mga tigom tungod sa atong pagpaningkamot nga mapaneguro ang pinansiyal nga kasegurohan magpahuyang sa atong relasyon uban kang Jehova. Si apostol Pablo misulat: “Himoa ang inyong paagi sa pagkinabuhi nga mahigawas sa gugma sa salapi, samtang kamo magmakontento sa presenteng mga butang. Kay [si Jehova] nag-ingon: ‘Dili ko gayod ikaw pagabiyaan ni sa bisan unsang paagi pagatalikdan.’” (Hebreohanon 13:5) Ang kinabubut-ong pagkamasinugtanon sa mga sugo ni Jehova nagpakita nga kita dunay bug-os nga pagsalig nga siya moatiman kanato.

Si Jesus nakakat-on sa pagkamasinugtanon ug nakabenepisyo niana. Mao man usab kita. (Hebreohanon 5:8) Kon mas pa natong ugmaron ang pagkamasinugtanon, mas dali kitang mahimong masinugtanon, bisan sa gagmayng mga butang. Matuod nga tungod sa atong integridad, kinahanglan natong sagubangon ang dili-maayo ug mapig-oton pa gani nga pagtratar sa ubang mga tawo. Tinuod gayod kini diha sa trabahoan, eskuylahan, o diha sa panimalay nga nabahin tungod sa relihiyon. Bisan pa niana, makakaplag kita ug kahupayan diha sa gipahayag ngadto sa mga Israelinhon nga kon ilang ‘higugmaon si Jehova pinaagi sa pagpamati sa iyang tingog ug sa pag-unong kaniya, siya mahimong ilang kinabuhi ug gitas-on sa ilang mga adlaw.’ (Deuteronomio 30:20) Gisaaran kita ug sama niana.

Maalamong Gamita ang Panahon

Ang maalamong paggamit sa atong panahon motabang usab kanato sa paghimo sa atong mga adlaw nga mapuslanon atubangan kang Jehova. Dili sama sa salapi nga mahimong tipigan, ang panahon kinahanglang gamiton, kay kon dili mahanaw lamang kini. Ang matag oras nga molabay dili na mobalik. Tungod kay kanunayng mas daghan ang buhatonon kay sa maarangan, gigamit ba nato ang atong panahon sa paagi nga makab-ot ang atong mga tumong sa kinabuhi? Ang usa ka pangunang tumong sa tanang Kristohanon mao ang regular nga pagpakig-ambit sa buluhatong pagsangyaw sa Gingharian ug paghimog tinun-an.—Mateo 24:14; 28:19, 20.

Magamit natong maalamon ang atong panahon human lamang nato masabtan pag-ayo ang kahinungdanon niini. Sa kahaom, ang Efeso 5:16 nag-awhag kanato sa ‘pagpalit sa nahiangay nga panahon alang sa atong kaugalingon,’ nga sayloan na lang ang dili-kaayo hinungdanong mga butang. Nagkahulogan kana nga menosan ang mga kalihokan nga mag-usik ug panahon. Ang sobrang pagtan-aw ug telebisyon o pagsuhid sa Internet, pagbasag way-pulos nga sekular nga mga basahon, o sobrang paglingawlingaw makapaluya kanato. Dugang pa, ang sobrang pagtigom ug materyal nga mga kabtangan makapupos sa panahon nga gikinahanglan sa pagbaton ug usa ka kasingkasing nga manggialamon.

Ang mga tawo nga maampingong nag-eskedyul sa ilang panahon nag-ingon: “Imposible nga magamit pag-ayo ang imong panahon kon walay tin-aw ug espesipiko nga mga tumong.” Ilang gisugyot ang lima ka sukdanan sa paghimog mga tumong: espesipiko, masukod, makab-ot, realistiko, ug may tagal.

Ang usa ka maayong tumong mao ang pagpauswag sa atong pagbasa sa Bibliya. Ang unang lakang mao ang paghimo sa atong tumong nga espesipiko—ang pagbasa sa tibuok Bibliya. Ang sunod mao ang paghimo sa atong mga tumong nga masukod. Sa paghimo niini, atong masubay ang atong pag-uswag. Ang mga tumong angayng magdasig kanato nga maningkamot ug mouswag. Kinahanglan usab kining makab-ot ug realistiko. Kinahanglang tagdon ang personal nga mga katakos, kahanas, ug ang magamit nga panahon. Alang sa uban, mas daghang panahon ang gikinahanglan aron mapalampos ang tumong. Sa kataposan, ang atong mga tumong kinahanglang may tagal. Ang pagtakda ug petsa alang sa pagpalampos sa usa ka butang mahimong magpauswag sa atong panukmod nga humanon kana.

Ang tanang membro sa pamilyang Bethel sa tibuok yuta, nga nag-alagad diha sa tibuok-kalibotang hedkuwarter sa mga Saksi ni Jehova o diha sa usa sa mga sangang buhatan niini, adunay espesipikong tumong sa pagbasa sa tibuok Bibliya sulod sa ilang unang tuig sa Bethel. Ilang naamgohan nga ang mapuslanong pagbasa sa Bibliya makatabang sa ilang espirituwal nga pag-uswag ug sa pagkahimong mas suod kang Jehova, kinsa nagtudlo kanila aron makabaton ug kaayohan. (Isaias 48:17) Mahimo ba usab natong tumong ang regular nga pagbasa sa Bibliya?

Mga Benepisyo sa Paghimo sa Atong mga Adlaw nga Mapuslanon

Ang paghatag ug pangunang pagtagad sa espirituwal nga mga butang moresultag dagayang mga panalangin. Sa usa ka bahin, motabang kini nga mabatonan ang mas dakong pagbati sa kalamposan ug katuyoan sa kinabuhi. Ang regular nga pagpakigsulti kang Jehova diha sa kinasingkasing nga pag-ampo mas makapasuod kanato ngadto kaniya. Ang pag-ampo mismo nagpakita nga kita may pagsalig kaniya. Ang adlaw-adlaw nga pagbasa sa Bibliya ug sa binase-sa-Bibliya nga mga publikasyon nga gitagana sa “matinumanon ug maalamong ulipon” nagpasundayag sa atong kaandam sa pagpatalinghog sa Diyos sa dihang makigsulti siya kanato. (Mateo 24:45-47) Motabang kini kanato nga mabatonan ang kasingkasing nga manggialamon aron makahimog hustong mga desisyon ug mga pagpili sa kinabuhi.—Salmo 1:1-3.

Dako ang atong kalipay sa pagsugot sa mga sugo ni Jehova, tungod kay ang pagbuhat sa ingon dili mabug-at. (1 Juan 5:3) Samtang himoon natong mapuslanon ang matag adlaw atubangan kang Jehova, gipalig-on nato ang atong relasyon uban kaniya. Mahimo usab kitang tinuod nga espirituwal nga tabang sa atong mga isigka-Kristohanon. Ang maong mga buhat makapalipay kang Jehova nga Diyos. (Proverbio 27:11) Ug walay mas labawng ganti kay sa pagtagamtam sa pag-uyon ni Jehova karon ug sa walay kataposan!

[Hulagway sa panid 21]

Seryosong gilantaw sa mga Kristohanon ang espirituwal nga mga butang

[Mga hulagway sa panid 22]

Gigamit mo ba ang imong panahon sa maalamong paagi?

[Hulagway sa panid 23]

Gipalig-on nato ang atong relasyon uban kang Jehova samtang gihimo nato ang matag adlaw nga mapuslanon uban kaniya