Si Jehova Mao ang Atong Dalangpanan

“Tungod kay ikaw miingon: ‘Si Jehova mao ang akong dalangpanan,’ . . . dili modangat kanimo ang katalagman.”—SALMO 91:9, 10.

 1. Nganong makaingon kita nga si Jehova mao ang atong dalangpanan?

SI Jehova maoy matuod nga dalangpanan sa iyang katawhan. Kon kita bug-os debotado kaniya, kita mahimong ‘ginapiit sa tanang paagi, apan dili napiotan nga dili na makalihok; nangalibog, apan dili bug-os nga walay kalingkawasan; ginalutos, apan wala biyai sa bug-os; nangatumba, apan wala malaglag.’ Ngano? Kay si Jehova mohatag kanatog “gahom nga labaw sa kasarangan.” (2 Corinto 4:7-9) Oo, ang atong langitnong Amahan motabang kanato sa pagkinabuhi ug diyosnong kinabuhi, ug sa pagtuo nga kinasingkasing sa mga pulong sa salmista: “Tungod kay ikaw miingon: ‘Si Jehova mao ang akong dalangpanan,’ imong gihimo ang Labing Hataas nga imong puloy-anan; dili modangat kanimo ang katalagman.”—Salmo 91:9, 10.

 2. Unsay ikaingon bahin sa Salmo 91 ug unsay gisaad niini?

² Ang mga pulong sa Salmo 91 mahimong gisulat ni Moises. Ang superskripsiyon nagngalan kaniya ingong tigkomposo sa ika-90 nga Salmo, ug ang Salmo 91 nagsunod niana nga walay gisal-ot nga mga pulong nga naghingalan ug laing magsusulat. Tingali ang Salmo 91 giawit sa estilong antiphonic; nga mao, usa ka tawo tingali maoy nag-una sa pag-awit (91:1, 2), nga gitubag sa usa ka koro (91:3-8). Posible nga nadunggan sunod ang usa ka tingog (91:9a) ug gitubag sa usa ka grupo (91:9b-13). Dayon mahimong giawit sa usa ka mag-aawit ang ulahing mga pulong (91:14-16). Bisan kon unsa man ang paagi, gisaad sa ika-91 nga Salmo ang espirituwal nga kasegurohan alang sa dinihogang mga Kristohanon ingon nga usa ka matang ug ang susamang pasalig gihatag sa ilang dedikadong mga kauban ingong usa ka grupo.a Atong susihon ang maong salmo sa panglantaw nianang tanang alagad ni Jehova.

May Kasegurohan Diha sa ‘Natago nga Dapit sa Diyos’

 3. (a) Unsa ang “natago nga dapit sa Labing Hataas”? (b) Unsay atong masinati tungod sa ‘pagpuyo ilalom sa landong mismo sa Usa nga Labing Gamhanan’?

³ Ang salmista miawit: “Si bisan kinsa nga nagapuyo sa natago nga dapit sa Labing Hataas makabaton ug kapahulayan ilalom sa landong sa Usa nga Labing Gamhanan. Magaingon ako kang Jehova: ‘Ikaw mao ang akong dalangpanan ug akong salipdanan, akong Diyos, kang kinsa mosalig ako.’” (Salmo 91:1, 2) Ang “natago nga dapit sa Labing Hataas” maoy usa ka masambingayong dapit sa panalipod alang kanato, ug ilabina alang sa mga dinihogan, kinsa maoy espesyal nga mga puntirya sa Yawa. (Pinadayag 12:15-17) Siya maglaglag kanatong tanan kon dili pa tungod sa panalipod nga atong gipahimuslan sama nianang mga nagapuyo uban sa Diyos ingon nga espirituwal nga mga dinapit. Pinaagi sa ‘pagpuyo ilalom sa landong mismo sa Usa nga Labing Gamhanan,’ atong masinati ang mapanalipdanong landong, o anino, sa Diyos. (Salmo 15:1, 2; 121:5) Walay mas luwas nga dalangpanan o mas dili-maduol nga salipdanan kay sa atong Soberanong Ginoo, si Jehova.—Proverbio 18:10.

 4. Unsang mga kasangkapan ang gigamit sa “tiglit-ag ug langgam,” si Satanas, ug sa unsang paagi kita makalingkawas?

⁴ Ang salmista midugang: “Siya [Jehova] magaluwas kanimo gikan sa bitik sa tiglit-ag ug langgam, gikan sa kamatay nga nagapahinabog kagul-anan.” (Salmo 91:3) Ang usa ka tiglit-ag ug langgam sa karaang Israel kasagarang makadakop ug mga langgam pinaagi sa paggamit ug mga lit-ag o mga bitik. Nahiapil sa mga lit-ag sa “tiglit-ag ug langgam,” si Satanas, mao ang iyang daotang organisasyon ug “mga malipatlipatong kaugdahan.” (Efeso 6:11) Ang natagong mga bitik gibutang sa atong agianan aron madani kita sa pagkadaotan ug makapahinabo sa atong espirituwal nga kagun-oban. (Salmo 142:3) Ugaling, tungod kay ato nang gisalikway ang pagkadili-matarong, ‘ang atong kalag sama sa usa ka langgam nga nakalingkawas gikan sa bitik.’ (Salmo 124:7, 8) Mapasalamaton gayod kita nga si Jehova magaluwas kanato gikan sa daotang “tiglit-ag ug langgam”!—Mateo 6:13.

5, 6. Unsang “kamatay” ang nagpahinabog “kagul-anan,” apan nganong ang katawhan ni Jehova dili magpadaog niana?

⁵ Ang salmista naghisgot sa “kamatay nga nagapahinabog kagul-anan.” Samag makatakod nga sakit nga nahimong epidemya, adunay nakapahinabog “kagul-anan” alang sa tawhanong pamilya ug sa mga manlalaban sa pagkasoberano ni Jehova. Niining bahina, ang historyanong si Arnold Toynbee misulat: “Sukad sa kataposan sa Gubat sa Kalibotan II midoble ang gidaghanon sa independenteng mga pagmando tungod sa nasyonalismo . . . Ang tinamdan karon sa katawhan sa mausbawon maoy makapabahinbahin.”

⁶ Latas sa kasiglohan, ang pipila ka magmamando nakapasamot sa makapabahin nga panagbangi sa kanasoran. Gimando usab nila nga ang pagsimba ihatag kanila o sa nagkalainlaing mga larawan o mga simbolo. Apan si Jehova wala gayod magtugot nga ang iyang matinumanong katawhan magpadaog sa maong “kamatay.” (Daniel 3:1, 2, 20-27; 6:7-10, 16-22) Ingon nga may-gugmang internasyonal nga kapunongan, atong ihatag kang Jehova ang bug-os nga debosyon, huptan ang Kasulatanhong pagkaneyutral, ug sa kawalay-pinalabi pagailhon nga “sa matag nasod ang tawo nga mahadlok [sa Diyos] ug magabuhat sa pagkamatarong dalawaton kaniya.” (Buhat 10:34, 35; Exodo 20:4-6; Juan 13:34, 35; 17:16; 1 Pedro 5:8, 9) Bisan pag nag-antos kitag “kagul-anan” sama sa paglutos ingong mga Kristohanon, kita malipayon ug may-kasegurohan sa espirituwal “diha sa natago nga dapit sa Labing Hataas.”

 7. Sa unsang paagi salipdan kita ni Jehova “pinaagi sa iyang mga dagang”?

⁷ Kay si Jehova mao ang atong dalangpanan, kita makabaton ug kalipay gikan sa mga pulong: “Pinaagi sa iyang mga dagang alihan niya ang agianan sa pagduol kanimo, ug mopasilong ka sa ilalom sa iyang mga pako. Ang iyang kamatinud-anon mahimong dakong taming ug kuta.” (Salmo 91:4) Ang Diyos manalipod kanato, maingon nga ang usa ka inayang langgam maglupadlupad nga mapanalipdanon ibabaw sa mga kuyabog niini. (Isaias 31:5) ‘Pinaagi sa iyang mga dagang alihan niya ang agianan sa pagduol kanato.’ Kasagaran, ang “mga dagang” sa usa ka langgam mao ang mga pako niini. Pinaagi niana tabonan sa usa ka langgam ang iyang mga kuyabog, nga salipdan sila gikan sa mga manunukob. Samag mga kuyabog, kita may kasegurohan ilalom sa masambingayong mga dagang ni Jehova kay kita midangop sa iyang matuod nga Kristohanong organisasyon.—Ruth 2:12; Salmo 5:1, 11.

 8. Sa unsang paagi ang ‘pagkamatinud-anon’ ni Jehova usa ka dakong taming ug kuta?

⁸ Kita may pagsalig sa ‘pagkamatinud-anon,’ o pagkamatinumanon. Sama kinig dakong taming sa karaang kapanahonan, nga sagad ang porma sama sa pultahan ug igo ang gidak-on sa pagsalipod sa enterong lawas sa usa ka tawo. (Salmo 5:12) Ang pagsalig sa maong panalipod mohatag kanatog kagawasan sa kahadlok. (Genesis 15:1; Salmo 84:11) Sama sa atong pagtuo, ang pagkamatinud-anon sa Diyos maoy dakong makasalipod nga taming nga mosagang sa nagsilaob nga mga udyong ni Satanas ug mobabag sa mga hapak sa kaaway. (Efeso 6:16) Kini usab usa ka kuta, nga lig-ong makadepensa nga bungdo nga luyo niana kita lig-ong mobarog.

‘Dili Kita Mahadlok’

 9. Nganong ang gabii mahimong usa ka makahahadlok nga panahon, apan nganong dili man kita mahadlok?

⁹ Tungod sa panalipod sa Diyos, ang salmista nag-ingon: “Ikaw dili mahadlok sa bisan unsa nga makalilisang sa magabii, ni sa udyong nga nagalupad sa maadlaw, ni sa kamatay nga nagalakaw sa kangiob, ni sa kalaglagan nga nagalaglag panahon sa kaudtohon.” (Salmo 91:5, 6) Sanglit ang daotang mga buhat ginabuhat man sa salipod sa kangitngitan, ang gabii mahimong makahahadlok nga panahon. Taliwala sa espirituwal nga kangitngit nga nagbukot karon sa yuta, ang atong mga kaaway sagad mogamit ug malinglahong mga buhat sa paningkamot nga gun-obon ang atong espirituwalidad ug pahunongon ang atong buluhaton sa pagwali. Apan ‘kita dili mahadlok sa bisan unsa nga makalilisang sa magabii’ tungod kay si Jehova magabantay kanato.—Salmo 64:1, 2; 121:4; Isaias 60:2.

10. (a) Unsay maorag ipasabot sa “udyong nga nagalupad sa maadlaw,” ug unsay atong sanong niana? (b) Unsay kinaiyahan sa “kamatay nga nagalakaw sa kangiob,” ug nganong dili kita mahadlok niana?

¹⁰ Ang “udyong nga nagalupad sa maadlaw” maorag nagpasabot sa binaba nga pag-atake. (Salmo 64:3-5; 94:20) Samtang magpadayon kita sa pagpahayag sa matinud-anong impormasyon, mahimong kawang ang maong dayag nga pagsupak sa atong sagradong pag-alagad. Dugang pa, dili kita mahadlok sa “kamatay nga nagalakaw sa kangiob.” Kini maoy masambingayong kamatay nga mitungha taliwala sa kangiob niining kalibotan nga masakiton sa moral ug relihiyosong paagi nga nailalom sa gahom ni Satanas. (1 Juan 5:19) Kini magpatunghag makapatay nga kahimtang sa hunahuna ug sa kasingkasing, nga maghupot sa katawhan nga walay alamag bahin kang Jehova, sa iyang mga katuyoan, ug sa iyang mahigugmaong mga kahikayan. (1 Timoteo 6:4) Taliwala niining kangitngitan, dili kita mahadlok, sanglit gitagamtam nato ang dakong espirituwal nga kahayag.—Salmo 43:3.

11. Unsay mahitabo niadtong “nagalaglag panahon sa kaudtohon”?

¹¹ Ang “kalaglagan nga nagalaglag panahon sa kaudtohon” dili usab makapahadlok kanato. Ang “panahon sa kaudtohon” mahimong magpasabot sa gitawag ug nalamdagan nga kalibotan. Kadtong gidaog sa materyalistikanhong panghunahuna niini makasinatig espirituwal nga kalaglagan. (1 Timoteo 6:20, 21) Samtang kita maisogong magpahayag sa mensahe sa Gingharian, kita dili mahadlok sa atong mga kaaway, kay si Jehova mao ang atong Tigpanalipod.—Salmo 64:1; Proverbio 3:25, 26.

12. Sa kang kansang kiliran “mapukan” ang libolibo, ug sa unsang paagi?

¹² Ang salmista nagpadayon: “Usa ka libo mapukan sa imong kiliran ug napulo ka libo sa imong tuong kamot; kanimo kini dili makaabot. Pinaagi lamang sa imong mga mata ikaw magatan-aw ug makakita sa balos sa mga daotan.” (Salmo 91:7, 8) Kay napakyas sa paghimo kang Jehova nga ilang dalangpanan, daghan ang “mapukan” diha sa espirituwal nga kamatayon diha sa atong “kiliran.” Sa pagkamatuod, “napulo ka libo” ang napukan sa “tuong kamot” sa espirituwal nga mga Israelinhon karong adlawa. (Galacia 6:16) Apan kon kita maoy dinihogang mga Kristohanon o ilang dedikadong mga kauban, kita may kasegurohan diha sa “natago nga dapit” sa Diyos. Kita ‘magatan-aw lamang ug makakita sa balos sa daotan,’ nga nagaani sa kagubot sa komersiyal, relihiyoso, ug ubang mga paagi.—Galacia 6:7.

‘Dili Modangat Kanato ang Katalagman’

13. Unsang mga katalagman ang dili modangat kanato, ug ngano?

¹³ Bisan pag nagakahugno ang kasegurohan niining kalibotana, kita nag-una sa Diyos ug nagmaisogon gumikan sa mga pulong sa salmista: “Tungod kay ikaw miingon: ‘Si Jehova mao ang akong dalangpanan,’ imong gihimo ang Labing Hataas nga imong puloy-anan; dili modangat kanimo ang katalagman, ug bisan ang usa ka hampak dili mopaduol sa imong tolda.” (Salmo 91:9, 10) Oo, si Jehova mao ang atong dalangpanan. Bisan pa niana, kita naghimo usab sa Labing Hataas nga Diyos nga ‘atong puloy-anan,’ diin kita makakaplag ug kaluwasan. Kita nagdayeg kang Jehova ingong Soberano sa Uniberso, ‘nagpuyo’ diha kaniya ingong atong Tuboran sa kasegurohan, ug nagpahayag sa maayong balita sa iyang Gingharian. (Mateo 24:14) Busa, ‘dili modangat kanato ang katalagman’—walay usa sa mga katalagman nga unaunang gibatbat niining salmoha. Bisan pag duyog sa uban makasinati kitag mga katalagman sama sa mga linog, mga urakan, mga baha, mga gutom, ug mga pagpangdaot sa gubat, kini wala maglaglag sa atong pagtuo o sa atong espirituwal nga kasegurohan.

14. Ingong mga alagad ni Jehova, nganong kita wala matakdi sa makapatay nga mga hampak?

¹⁴ Ang dinihogang mga Kristohanon samag langyawng mga molupyo nga nagpuyo sa mga tolda nga nahimulag niining sistema sa mga butang. (1 Pedro 2:11) ‘Bisan usa ka hampak dili mopaduol sa ilang tolda.’ Bisan kon ang atong paglaom langitnon o yutan-on, kita dili bahin sa kalibotan, ug kita wala matakdi sa makapatay-sa-espirituwal nga mga hampak sama sa imoralidad, materyalismo, bakak nga relihiyon, ug pagsimba sa “mapintas nga mananap” ug sa “larawan” niini, ang Hiniusang Kanasoran.—Pinadayag 9:20, 21; 13:1-18; Juan 17:16.

15. Sa unsang mga bahin nga kita nagpahimulos sa tabang sa manulonda?

¹⁵ Mahitungod sa panalipod nga atong natagamtam, ang salmista nagdugang: “Sugoon niya [Jehova] ang iyang mga manulonda maylabot kanimo, sa pagbantay kanimo sa tanan mong mga dalan. Sa ilang mga kamot ikaw ilang pagasapnayon, aron ang imong tiil dili mapandol sa bato.” (Salmo 91:11, 12) Ang mga manulonda gihatagan ug gahom sa pagpanalipod kanato. (2 Hari 6:17; Salmo 34:7-9; 104:4; Mateo 26:53; Lucas 1:19) Sila magabantay kanato ‘sa tanan natong dalan.’ (Mateo 18:10) Kita nagpahimulos sa paggiya ug pagbantay sa manulonda ingong mga magmamantala sa Gingharian ug dili mapandol sa espirituwal nga paagi. (Pinadayag 14:6, 7) Bisan ang ‘mga bato’ sama sa mga pagdili batok sa atong buluhaton wala makapahinabo nga kita mapandol ug mawad-an sa pag-uyon sa Diyos.

16. Unsay kalainan sa mga pag-atake nga ginahimo sa usa ka “nating leyon” ug sa usa ka “kobra,” ug unsay atong sanong niana?

¹⁶ Ang salmista nagpadayon: “Pagatumban mo ang nating leyon ug ang kobra; pagayatakan mo ang may-lambungay nga nating leyon ug ang dakong bitin.” (Salmo 91:13) Ingon nga ang nating leyon moatake sa dayag, nga inatubangay, ang pipila sa atong mga kaaway magpakita sa ilang pagsupak sa dayag pinaagi sa pagpasakag mga balaod nga gilaraw aron pugngan ang atong buluhaton sa pagwali. Apan ang wa-damhang mga pag-atake nga sama nianang gikan sa usa ka kobra nga moatake gikan sa natagong dapit gihimo usab kanato. Nga nagpahipi, ang klero usahay moatake kanato pinaagi sa mga tiggamag-balaod, mga maghuhukom, ug uban pa. Apan sa pagpaluyo ni Jehova, kita magtinguhag kasulbaran sa suliran sa malinawong paagi diha sa mga hukmanan, sa ingon ‘nagadepensa ug nagatukod sa legal nga paagi sa maayong balita.’—Filipos 1:7; Salmo 94:14, 20-22.

17. Sa unsang paagi pagatumban nato ang “may-lambungay nga nating leyon”?

¹⁷ Ang salmista naghisgot sa pagtunob sa ‘may-lambungay nga nating leyon ug sa dakong bitin.’ Ang may-lambungay nga nating leyon mahimong isog kaayo, ug ang dakong bitin mahimong dako kaayong halas. (Isaias 31:4) Hinuon, bisag unsa ka isog tingali ang may-lambungay nga nating leyon sa dihang moatake kini, masambingayon natong tumban kini pinaagi sa pagsugot sa Diyos inay sa samag-leyon nga mga tawo o mga organisasyon. (Buhat 5:29) Busa ang peligrosong “leyon” dili makapahinabog espirituwal nga kadaot kanato.

18. “Ang dakong bitin” makapahinumdom kanato kang kinsa, ug unsay kinahanglang buhaton nato kon kita atakehon?

¹⁸ Sa Gregong Septuagint, “ang dakong bitin” gitawag ug “dragon.” Kini makapahinumdom gayod kanato sa “dakong dragon, ang orihinal nga halas, ang usa nga gitawag Yawa ug Satanas.” (Pinadayag 12:7-9; Genesis 3:15) Siya samag dako kaayong halas nga arang makadugmok ug makalamoy sa tukbonon niini. (Jeremias 51:34) Sa dihang si Satanas mosulay sa pagbilikis kanato, pagdugmok kanato pinaagi sa mga kapit-osan niining kalibotana, ug paglamoy kanato, angay kitang molingkawas sa pagpaulipon kaniya ug tumban nato kining “dakong bitin.” (1 Pedro 5:8) Ang dinihogang nahibilin kinahanglang maghimo niini aron sila makaambit sa katumanan sa Roma 16:20.

Si Jehova—Atong Tuboran sa Kaluwasan

19. Nganong midangop man kita kang Jehova?

¹⁹ Mahitungod sa matuod nga magsisimba, ang salmista naghawas sa Diyos nga nag-ingon: “Tungod kay iyang gipakita kanako ang iyang pagmahal, igatagana ko usab kaniya ang kaikyasan. Panalipdan ko siya tungod kay nakaila siya sa akong ngalan.” (Salmo 91:14) Ang mga pulong “panalipdan ko siya” sa literal maoy “ibutang ko siya sa taas,” nga mao, dili maabot. Kita midangop kang Jehova ingong iyang mga magsisimba ilabina tungod kay ‘atong gipakita kaniya ang atong pagmahal.’ (Marcos 12:29, 30; 1 Juan 4:19) Sa baylo, ang Diyos ‘nagtagana kanato ug kaikyasan’ gikan sa atong mga kaaway. Kita dili gayod malaglag gikan sa yuta. Sa kasukwahi, kita maluwas tungod kay kita nakaila sa ngalan sa Diyos ug nagtawag niana diha sa pagtuo. (Roma 10:11-13) Ug kita determinado nga ‘magalakaw diha sa ngalan ni Jehova sa walay kataposan.’—Miqueas 4:5; Isaias 43:10-12.

20. Sa pagtapos sa Salmo 91, unsay gisaad ni Jehova sa iyang matinumanong alagad?

²⁰ Sa pagtapos sa Salmo 91, si Jehova nag-ingon bahin sa iyang matinumanong alagad: “Magatuaw siya kanako, ug tubagon ko siya. Diha sa kasakit ako magauban kaniya. Ako magaluwas kaniya ug magahimaya kaniya. Pagatagbawon ko siya sa daghang mga adlaw, ug pakit-on ko siya sa akong pagluwas.” (Salmo 91:15, 16) Sa dihang kita motawag sa Diyos diha sa pag-ampo sumala sa iyang kabubut-on, siya motubag kanato. (1 Juan 5:13-15) Nakaagi na kitag hilabihang kasakitan tungod sa pagkamabatokon nga gisibahan ni Satanas. Apan ang mga pulong “diha sa kasakit ako magauban kaniya” mag-andam kanato alang sa umaabot nga mga pagsulay ug magpasalig kanato nga ang Diyos magpalig-on kanato sa dihang pagalaglagon kining daotang sistema.

21. Sa unsang paagi nahimaya na ang mga dinihogan?

²¹ Bisan pa sa mapintasong pagsupak ni Satanas, ang bug-os nga gidaghanon sa mga dinihogang anaa sa atong taliwala pagahimayaon sa langit sa gitakdang panahon ni Jehova—human “sa daghang mga adlaw” dinhi sa yuta. Bisan pa niana, ang talagsaong mga pagluwas sa Diyos nakahatag nag espirituwal nga himaya alang sa mga dinihogan. Ug pagkapinasidunggan nila nga sila nanguna ingong mga Saksi ni Jehova sa yuta niining kataposang mga adlaw! (Isaias 43:10-12) Ang kinadak-ang pagluwas ni Jehova sa iyang katawhan mahitabo panahon sa iyang dakong gubat sa Armagedon sa dihang iyang pagabayawon ang iyang pagkasoberano ug pagabalaanon ang iyang balaang ngalan.—Salmo 83:18; Ezequiel 38:23; Pinadayag 16:14, 16.

22. Kinsa ang ‘makakita sa pagluwas ni Jehova’?

²² Kon kita maoy dinihogang mga Kristohanon o ilang dedikadong mga kauban, kita mosalig sa Diyos alang sa kaluwasan. Panahon sa “dako ug makalilisang nga adlaw ni Jehova,” kadtong maunongong nagaalagad sa Diyos pagaluwason. (Joel 2:30-32) Kadtong si kinsa maglangkob sa “dakong panon” sa mga makalabang-buhi ngadto sa bag-ong kalibotan sa Diyos ug magpabiling matinumanon panahon sa kataposang pagsulay ‘tagbawon niya sa daghang mga adlaw’—ang kinabuhing dili matapos. Iyang banhawon usab ang mga panon sa katawhan. (Pinadayag 7:9; 20:7-15) Si Jehova magkalipay gayod ‘sa pagpahinabo nga kita makakita sa pagluwas’ pinaagi ni Jesu-Kristo. (Salmo 3:8) Tungod sa maong talagsaong mga palaaboton sa atong unahan, magpadayon kita sa pagsalig sa Diyos alang sa tabang sa pag-ihap sa atong mga adlaw alang sa iyang kahimayaan. Pinaagi sa atong mga pulong ug mga buhat, hinaot kita magpadayon sa pagpamatuod nga si Jehova mao ang atong dalangpanan.

[Footnote]

Unsaon Nimo Pagtubag?

• Unsa ang “natago nga dapit sa Labing Hataas”?

• Nganong dili man kita mahadlok?

• Sa unsang paagi nga ‘ang katalagman dili modangat kanato’?

• Nganong makaingon kita nga si Jehova mao ang atong tuboran sa kaluwasan?

[Hulagway sa panid 17]

Nahibalo ka ba kon sa unsang paagi ang pagkamatinud-anon ni Jehova maoy usa ka dakong taming alang kanato?

[Mga hulagway sa panid 18]

Si Jehova motabang sa iyang mga alagad sa pagtuman sa ilang ministeryo bisan pa sa wa-damhang mga pag-atake ug sa dayag nga pagsupak

[Credit Line]

Kobra: A. N. Jagannatha Rao, Trustee, Madras Snake Park Trust