Ang Pulong ni Jehova Buhi
Mga Haylayt Gikan sa Ikatulo ug Ikaupat nga Basahon sa mga Salmo
SA USA ka pag-ampo ngadto sa Diyos, ang salmista nangutana: “Igapahayag ba ang imong mahigugmaong-kalulot didto sa lubnganan, ang imong pagkamatinumanon diha sa dapit sa kalaglagan?” (Salmo 88:11) Siyempre, ang tubag dili. Kon walay kinabuhi, kita dili makadayeg kang Jehova. Ang pagdayeg kang Jehova maoy igong katarongan nga kita magpadayong buhi, ug ang pagkamay-kinabuhi angayng magdasig kanato sa pagdayeg kaniya.
Ang Ikatulo ug Ikaupat nga Basahon sa Mga Salmo, nga gilangkoban sa Salmo 73 hangtod sa 106, mohatag kanatog daghang katarongan sa pagdayeg sa Maglalalang ug pagdayeg sa iyang ngalan. Ang pagpamalandong niining mga salmoha angayng magpalalom sa atong pagpabili sa “pulong sa Diyos” ug magdasig kanato sa pagpadaghan ug pagpauswag sa atong mga ekspresyon sa pagdayeg kaniya. (Hebreohanon 4:12) Uban ang dakong interes, hisgotan natog una ang Ikatulong Basahon sa Mga Salmo.
“ANG PAGDUOL SA DIYOS MAAYO ALANG KANAKO”
Ang unang 11 ka salmo sa ikatulong kahugpongan maoy mga komposisyon ni Asap o sa mga membro sa panimalay ni Asap. Ang unang awit nagpatin-aw kon unsay nakaluwas kang Asap gikan sa pagkahisalaag tungod sa sayop nga panghunahuna. Iyang nakab-ot ang hustong konklusyon. “Bahin kanako,” siya miawit, “ang pagduol sa Diyos maayo alang kanako.” (Salmo 73:28) Ang pagpahayag ug kasubo tungod sa kalaglagan sa Jerusalem mao ang sunod diha sa Salmo 74. Ang Salmo 75, 76, ug 77 naghulagway kang Jehova ingong matarong nga Maghuhukom, ang Manluluwas sa mga maaghop, ug ang Tigpatalinghog sa pag-ampo. Ang Salmo 78 naghisgot pag-usab sa kagahapon sa Israel sukad sa panahon ni Moises hangtod sa kang David. Ang ika-79 nga Salmo nagpahayag sa kasubo tungod sa kalaglagan sa templo. Ang sunod nga salmo maoy pag-ampo alang sa kapasig-ulian sa katawhan sa Diyos. Ang Salmo 81 maoy pag-awhag nga magmasinugtanon kang Jehova. Ang Salmo 82 ug 83 maoy mga pag-ampo nga ipatuman na ang paghukom sa Diyos diha sa daotang mga maghuhukom ug sa mga kaaway sa Diyos.
“Ang akong kalag gihidlaw ug gikapoy sa pagpangandoy sa mga sawang ni Jehova,” nag-ingon ang usa ka honi sa mga anak ni Kore. (Salmo 84:2) Ang Salmo 85 maoy usa ka hangyo nga panalanginan unta sa Diyos ang mga namalik gikan sa pagkadestiyero. Kining salmoha nagpasiugda nga ang espirituwal nga mga panalangin labi pang bililhon kay sa pisikal nga mga panalangin. Sa Salmo 86, si David mihangyo sa Diyos nga bantayan ug tudloan siya. Sa Salmo 87, ang usa ka honi bahin sa Zion ug sa mga natawo didto gisundan sa usa ka pag-ampo kang Jehova diha sa Salmo 88. Ang mahigugmaong-kalulot ni Jehova ingon nga gipahayag diha sa Davidikong pakigsaad gipasiugda diha sa Salmo 89, nga gikomposo ni Etan, tingali usa sa upat ka makinaadmanong mga tawo sa panahon ni Solomon.—1 Hari 4:31.
Tubag sa mga Pangutana Bahin sa Kasulatan:
73:9—Sa unsang paagi ang mga daotan ‘nagbutang sa ilang baba sa kalangitan, ug ang ilang dila nagsuroysuroy sa yuta’? Sanglit ang mga daotan walay pagtahod kang bisan kinsa sa langit o sa yuta, sila dili magpanuko sa pagpasipala sa Diyos pinaagi sa ilang baba. Butangbutangan usab nila ang mga tawo pinaagi sa ilang dila.
74:13, 14—Kanus-a ‘gidugmok [ni Jehova] ang mga ulo sa dagkong mga linalang sa dagat diha sa katubigan ug gidugmok ang mga ulo sa Leviatan’? Si “Paraon, hari sa Ehipto,” ginganlag “ang dako kaayong linalang sa dagat nga naghigda taliwala sa iyang kasapaan sa Nilo.” (Ezequiel 29:3) Ang Leviatan mahimong naghawas sa kusgan nga mga tawo ni Paraon. (Salmo 74:14) Ang pagdugmok sa ilang mga ulo lagmit nagtumong sa bug-os nga kaparotan ni Paraon ug sa iyang kasundalohan sa dihang giluwas ni Jehova ang mga Israelinhon gikan sa pagkaulipon sa Ehipto.
75:4, 5, 10—Unsay gipasabot sa terminong “sungay”? Ang mga sungay sa usa ka hayop maoy puwersadong hinagiban. Busa ang terminong “sungay” maoy simbolo sa gahom o kusog. Ipataas ni Jehova ang mga sungay sa iyang katawhan, nga ipahinabo niya nga sila mabayaw, samtang iyang ‘putlon ang mga sungay sa mga daotan.’ Gipasidan-an kita batok sa ‘pagbayaw sa atong sungay’ sa pagkaagi nga dili kita angayng magpadayag sa garboso o hambogirong tinamdan. Sanglit si Jehova mao ang magabayaw, ang mga responsabilidad diha sa kongregasyon angayng isipon nga naggikan kaniya.—Salmo 75:7.
76:10—Sa unsang paagi ang “kaaligutgot sa tawo” makadayeg kang Jehova? Sa dihang itugot sa Diyos nga ang mga tawo magpahungaw sa ilang kaaligutgot batok kanato tungod kay kita iyang mga alagad, mahimong moresulta ang positibong butang. Ang kalisdanan nga atong masinati mahimong magdisiplina kanato sa usa ka paagi. Itugot ni Jehova ang pag-antos sa gidak-on lamang nga kini magbansay kanato sa maong paagi. (1 Pedro 5:10) ‘Igabakos sa Diyos ang nahibilin sa kaaligutgot sa tawo.’ Unsa na man kon magaantos kita hangtod sa kamatayon? Kini makadayeg usab kang Jehova tungod kay kadtong makakita kanato nga matinumanong nag-antos mahimong mosugod usab sa paghimaya sa Diyos.
78:24, 25; potnot sa New World Translation—With References—Nganong ang mana gitawag ug ‘ang lugas sa langit’ ug “ang tinapay sa mga manulonda”? Ang bisan hain nianang mga ekspresyona wala magpasabot nga ang mana maoy pagkaon sa mga manulonda. Kadto mao “ang lugas sa langit” sa pagkaagi nga naggikan kadto sa langit. (Salmo 105:40) Sanglit ang mga manulonda o “mga gamhanan” nagpuyo man sa langit, ang ekspresyong “ang tinapay sa mga manulonda” nagpasabot lamang nga kadto gihatag sa Diyos, kinsa nagpuyo sa langit. (Salmo 11:4) Mahimong gigamit usab ni Jehova ang mga manulonda sa pagtagana sa mana alang sa mga Israelinhon.
82:1, 6—Kinsa ang ginganlang “mga diyos” ug “mga anak sa Labing Hataas”? Kanang mga ekspresyona nagtumong sa tawhanong mga maghuhukom sa Israel. Haom kini, sanglit sila nag-alagad nga mga tigpamaba ug mga hawas sa Diyos.—Juan 10:33-36.
83:2—Unsay gipasabot sa ‘pagpatuyhakaw sa ulo sa usa ka tawo’? Kanang lihoka nagpasabot sa kaandam sa pagpasundayag sa gahom o sa paglihok, kasagaran aron makigbatok, makig-away, o manglupig.
Mga Pagtulon-an Alang Kanato:
73:2-5, 18-20, 25, 28. Kita dili angayng masina sa pagkabahandianon sa mga daotan ug sundon ang ilang dili-diyosnong mga dalan. Ang mga daotan anaa sa madanglog nga yuta. Sila seguradong ‘mapukan ngadto sa kalaglagan.’ Gawas pa, sanglit ang pagkadaotan dili mahanaw ubos sa dili-hingpit nga tawhanong pagmando, kawang lamang ang atong panlimbasog sa pagpapha kanila. Sama kang Asap, maalamon kita kon atong sagubangon ang pagkadaotan pinaagi sa “pagduol sa Diyos” ug pagkalipay sa pagbaton ug suod nga relasyon uban Niya.
73:3, 6, 8, 27. Kinahanglang magbantay kita batok sa pagpanghambog, pagkamapahitas-on, pagbiaybiay, ug pagpanglimbong. Matuod kini bisan pag ang pagbuhat sa maong mga kinaiya daw may benepisyo.
73:15-17. Kon kita adunay gikalibgan, angay natong likayan ang pagpahayag sa dayag sa atong mga gikalibgan. Ang pag-asoy niana makapaluya sa uban. Angay natong pamalandongon ang atong mga kabalaka sa malinawong paagi ug sulbaron kana pinaagi sa pagpakig-uban sa mga isigkamagtutuo.—Proverbio 18:1.
73:21-24. Ang pagkadili-matagbawon tungod sa daw maayong kahimtang sa mga daotan gipakasama sa pagsanong ingon nga walay-kabuot nga mga hayop. Ang maong pagsanong maoy mapahinaykon, nga gipasukad lamang sa mga pagbati. Hinunoa, angay kitang magpagiya sa tambag ni Jehova, nga bug-os magmasaligon nga siya ‘magkupot kanato sa iyang tuong kamot’ ug magsuportar kanato. Dugang pa, si Jehova ‘magdala kanato sa himaya,’ nga mao, sa suod nga relasyon uban niya.
77:6. Gikinahanglan ang panahon alang sa pagtuon ug pagpamalandong aron ipakita ang kinasingkasing nga pagkamahunahunaon sa espirituwal nga mga kamatuoran ug sa pagsusi pag-ayo niana. Pagkahinungdanon nga kita mogahin ug panahon sa pag-inusara diha sa atong mga kinabuhi!
79:9. Si Jehova magpatalinghog sa atong mga pag-ampo, ilabina kon kana maoy bahin sa pagbalaan sa iyang ngalan.
81:13, 16. Ang pagpamati sa tingog ni Jehova ug paglakaw subay sa iyang mga dalan mosangpot sa daghang panalangin.—Proverbio 10:22.
82:2, 5. Tungod sa mga inhustisya ‘ang mga patukoranan sa yuta’ matarog. Ang malupigong mga buhat makadaot sa kalig-on sa tawhanong katilingban.
84:1-4, 10-12. Ang pagmahal sa mga salmista sa dapit sa pagsimba kang Jehova ug ang ilang pagkamatagbawon sa ilang linaing mga kahigayonan sa pag-alagad maoy maayong mga panig-ingnan kanato.
86:5. Pagkamapasalamaton nato nga si Jehova “andam sa pagpasaylo”! Siya nagapangitag ebidensiya nga mohatag kaniyag pasikaranan sa pagpakitag kaluoy sa usa ka mahinulsolong mamumuhat ug daotan.
87:5, 6. Kadtong makadawat ug kinabuhi diha sa yutang Paraiso makaila ba sa mga ngalan sa mga gibanhaw ngadto sa kinabuhi sa langit? Kining mga bersikuloha nagpasabot nga posibleng sila makaila.
88:13, 14. Ang kalangan sa pagdawat ug tubag sa atong mga pag-ampo mahitungod sa usa ka suliran lagmit nagpasabot nga buot ni Jehova nga atong ipasundayag ang pagkatiunay sa atong pagkamahinalaron kaniya.
“PASALAMATI SIYA, DAYEGA ANG IYANG NGALAN”
Tagda ang nagkalainlaing mga rason sa pagdayeg kang Jehova nga gihisgotan diha sa ikaupat nga kahugpongan sa mga salmo. Sa Salmo 90, gitandi ni Moises ang pagkalahi sa kalungtaran sa “Hari nga walay kataposan” ug sa lumalabay nga kinabuhi sa tawo. (1 Timoteo 1:17) Sumala sa Salmo 91:2, gihisgotan ni Moises nga si Jehova maoy ‘iyang dalangpanan ug iyang salipdanan’—iyang Tuboran sa kasegurohan. Ang sunod nga pipila ka salmo naghisgot bahin sa matahom nga mga hiyas, labawng mga panghunahuna, ug katingalahang mga buhat sa Diyos. Tulo ka salmo ang nagsugod sa pamulong nga “si Jehova nahimong hari.” (Salmo 93:1; 97:1; 99:1) Sa paghisgot kang Jehova ingon nga atong Magbubuhat, ang salmista nagdapit kanato nga ‘pasalamatan siya, dayegon ang iyang ngalan.’—Salmo 100:4.
Sa unsang paagi angayng dumalahon sa usa ka magmamando nga nahadlok kang Jehova ang iyang mga kahikayan? Ang Salmo 101, nga gikomposo ni Haring David, nagtubag. Ang sunod nga salmo nagtug-an kanato nga si Jehova ‘mohatag gayod ug pagtagad sa pag-ampo niadtong gihukasan sa tanang butang, ug dili tamayon ang ilang pag-ampo.’ (Salmo 102:17) Ang ika-103 nga Salmo nagpadayag sa mahigugmaong-kalulot ug kaluoy ni Jehova. Sa paghisgot sa daghang binuhat sa Diyos sa yuta, ang salmista mipatugbaw: “Pagkadaghan sa imong mga buhat, Oh Jehova! Sa kaalam gibuhat mo silang tanan.” (Salmo 104:24) Ang kataposang duha ka awit sa Ikaupat nga Basahon nagdayeg kang Jehova tungod sa iyang katingalahang mga buhat.—Salmo 105:2, 5; 106:7, 22.
Tubag sa mga Pangutana Bahin sa Kasulatan:
91:1, 2—Unsa “ang natago nga dapit sa Labing Hataas,” ug sa unsang paagi kita ‘makapuyo’ didto? Kini maoy usa ka simbolikong dapit nga luwas ug may kasegurohan sa espirituwal—usa ka kahimtang diin ang usa gipanalipdan batok sa kadaot sa espirituwal. Ang maong dapit maoy tinago tungod kay kini wala hisayri niadtong walay pagsalig sa Diyos. Atong gihimo si Jehova nga atong pinuy-anan pinaagi sa pagsalig kaniya ingon nga atong dalangpanan ug salipdanan, pinaagi sa pagdayeg kaniya ingon nga Soberanong Magmamando sa uniberso, ug pinaagi sa pagwali sa maayong balita sa Gingharian. Mobati kitang may kasegurohan sa espirituwal tungod kay kita nahibalo nga si Jehova andam kanunay nga motabang kanato.—Salmo 90:1.
92:12—Sa unsang paagi ang matarong “molambo sama sa kahoyng palma”? Ang kahoyng palma ilado sa pagkamabungahon niini. Ang matarong nga tawo maoy samag-kahoyng palma sa pagkaagi nga siya matul-id sa panan-aw ni Jehova ug magpadayon sa pagbungag “maayong bunga,” nga naglakip sa maayong mga buhat.—Mateo 7:17-20.
Mga Pagtulon-an Alang Kanato:
90:7, 8, 13, 14. Ang atong buhat nga daotan magdaot kanunay sa atong relasyon uban sa matuod nga Diyos. Ug ang tinago nga mga sala dili malilong kaniya. Bisan pa niana, kon kita tinuod nga maghinulsol ug mobiya sa atong daotang buhat, kita mauyonan pag-usab ni Jehova, ‘nga tagbawon kita sa iyang mahigugmaong-kalulot.’
90:10, 12. Sanglit hamubo ang kinabuhi, angay natong ‘ihapon ang atong mga adlaw.’ Sa unsang paagi? Pinaagi sa pagbaton ug “kasingkasing nga manggialamon,” o pinaagi sa paggamit sa kaalam aron ang atong nahibiling mga adlaw dili mausik kondili magamit sa paagi nga makapahimuot kang Jehova. Kinahanglang unahon nato ang espirituwal nga mga butang ug gamiton ang atong panahon sa maalamong paagi.—Efeso 5:15, 16; Filipos 1:10.
90:17. Haom ang pag-ampo nga si Jehova ‘magalig-on . . . sa buhat sa atong mga kamot’ ug magapanalangin sa atong mga paningkamot diha sa ministeryo.
92:14, 15. Pinaagi sa makugihong pagtuon sa Pulong sa Diyos ug regular nga pagpakig-uban sa katawhan ni Jehova, ang mga tigulang magpadayon nga “tambok ug lunhaw”—lig-on sa espirituwal—ug mahimong bililhong mga membro sa kongregasyon.
94:19. Bisan kon unsay hinungdan sa atong “makapatugaw nga mga hunahuna,” ang pagbasa ug pagpamalandong sa “mga paghupay” nga anaa sa Bibliya maghupay kanato.
95:7, 8. Ang pagpatalinghog sa tambag sa Kasulatan, pagtagad niana, ug pagsunod dayon niana makapugong kanato sa pagpatig-a sa atong kasingkasing.—Hebreohanon 3:7, 8.
106:36, 37. Kining mga bersikuloha naglangkit sa pagsimbag mga idolo ngadto sa paghalad sa mga demonyo. Nagpasabot kini nga ang usa ka tawong nagagamit ug mga idolo mahimong mailalom sa impluwensiya sa mga demonyo. Ang Bibliya nag-awhag kanato: “Pagbantay kamo gikan sa mga idolo.”—1 Juan 5:21.
“Dayega Ninyo si Jah!”
Ang kataposang tulo ka awit sa Ikaupat nga Basahon sa Mga Salmo gitiklopan sa tambag: “Dayega ninyo si Jah!” Ang kataposang salmo gisugdan usab niana. (Salmo 104:35; 105:45; 106:1, 48) Sa pagkamatuod, ang pamulong “Dayega ninyo si Jah!” kanunayng makita diha sa Ikaupat nga Basahon sa mga salmo.
Duna gayod kitay daghang rason sa pagdayeg kang Jehova. Ang Salmo 73 hangtod sa 106 naghatag kanato ug daghang butang nga pamalandongon, nga mahupngan ang atong mga kasingkasing sa pagkamapasalamaton ngadto sa atong langitnong Amahan. Kon hunahunaon nato ang tanan nga iyang nahimo ug himoon sa umaabot alang kanato, dili ba kita madasig sa ‘pagdayeg kang Jah’ uban sa bug-os natong gahom?
[Hulagway sa panid 10]
Sama kang Asap, kita makasagubang sa pagkadaotan pinaagi sa “pagduol sa Diyos”
[Hulagway sa panid 11]
Naparot si Paraon didto sa Pulang Dagat
[Hulagway sa panid 11]
Nahibalo ka ba kon nganong gitawag ang mana nga “ang tinapay sa mga gamhanan”?
[Hulagway sa panid 13]
Unsay makatabang aron mawagtang ang atong “makapatugaw nga mga hunahuna”?