Kapitulo 11
Ang Yutan-ong Jerusalem Ingon nga Lahi sa Langitnong Jerusalem
KARONG adlawa kadtong mga Hudiyo sumala sa unod determinado nga ang Jerusalem sa Tungang Sidlakan magalungtad sa walay kataposan. Bisan ang mga katawhan sa Kakristiyanohan dako gihapog pagtamod sa maong siyudad diin gitapos ni Jesus ang iyang ministeryo. Apan kini bang tanan nagagarantiya sa mapinadayonong paglungtad nianang siyudara? Kini nakaagom ug kalaglagan sa nangagi, sa 607 W.K.P. pinaagi sa mga Babilonyanhon ug sa 70 K.P. pinaagi sa mga Romano. Magkahulogan ba unya sa katalagman sa tanang tawo kon makaagom na usab kinig kalaglagan? Dili, ang siyudad dili kinahanglanon aron ang mga panalangin sa Abrahamikong pakigtugon moagos alang sa katawhan. Bisan mahitungod kang Abraham kini nahisulat: “Siya nagpaabot sa siyudad nga may tinuod nga mga patukoranan, nga ang magtutukod ug magbubuhat sa maong siyudad mao ang Diyos.”—Hebreohanon 11:10.
2 Si apostol Pablo misulat: “Apan ang Jerusalem sa itaas may kagawasan, ug siya mao ang atong inahan.” (Galacia 4:26) Dinha siya nagpakita nga ang langitnong Jerusalem mitumbas kang Sara ug mao ang samag-asawa nga organisasyon sa Labaw nga Abraham, si Jehova nga Diyos. Busa, ang mga anak sa “ang Jerusalem sa itaas” mao ang inanak-sa-espiritung mga Kristohanon, sama kang Pablo.
Ang “Jerusalem sa Itaas” Nahimong Harianong Siyudad
3 Ang “Jerusalem sa itaas” nakabatog harianong kinaiya sukad sa pagkatapos sa “tinudlong mga panahon sa mga nasod” sa 1914. (Lucas 21:24) Sukad niadto, ang Salmo 97:1 mapadapat: “Si Jehova mismo nahimong hari! Papagmayaa ang yuta.” Sa susama ang Salmo 99:1, 2 mapadapat: “Si Jehova nahimong hari. . . . Si Jehova dako sa Sion, ug siya hataas kay sa tanang mga katawhan.” Sa 1914 ang panahon miabot na aron pahunongon niya ang pagyatak sa Gingharian sa harianong banay ni David, ingong gihawasan sa kaniadto harianong siyudad sa Jerusalem. Busa, iyang gipalingkod sa trono ang iyang Anak, si Jesu-Kristo, ingong Hari sa Iyang tuong kamot sa “ang Jerusalem sa itaas,” ang langitnong Jerusalem, nga sa ingon naghimo niana nga harianong siyudad. Ang kaugalingong pagkahari ni Jehova gilig-on o gipadako sa pagkaentrono ni Jesu-Kristo ingon nga Hari.
4 Wala madugay tapos matawo ang langitnong Gingharian sa 1914 ug mapalagpot si Satanas ug ang iyang mga demonyo gikan sa langit, tukma ang pagpahibalo: “Karon miabot na ang kaluwasan ug ang gahom ug ang gingharian sa atong Diyos ug ang pagbulot-an sa iyang Kristo, tungod kay ang magsusumbong sa atong mga igsoon gikatambog na, kinsa nagasumbong kanila sa adlaw ug sa gabii sa atubangan sa atong Diyos!” (Pinadayag 12:1-10) “Ang pagbulot-an sa iyang Kristo” maoy aron kining Usa magmando nga Hari sa “Jerusalem sa itaas.” Sa pagkamatuod, kini nahimong harianong siyudad niadtong masaarong tuig 1914.
Ang Anak nga Babaye sa “Jerusalem sa Itaas”
5 Kapin sa ikaupat nga bahin sa siglo tapos sa paglaglag sa Romanhong kasundalohan sa Jerusalem sa 70 K.P., si apostol Juan gihatagag kahibulongang mga panan-awon diha sa basahon sa Pinadayag. Sa Pinadayag 21:1, 2, si Juan nagahisgot sa usa ka “Bag-ong Jerusalem.” Kadtong nagalangkob niining “Bag-ong Jerusalem” mao kadtong masadyaong nagaabiabi sa bag-ong gipalingkod nga Hari nga nagaabot sa ngalan ni Jehova, ingon nga maoy giawhag nga ilang buhaton sa Zacarias 9:9, 10, niining mga pulonga:
6 “Maglipay, Oh anak nga babaye sa Sion. Singgit sa kadaogan, Oh anak nga babaye sa Jerusalem. Tan-awa! Ang imong hari mismo nagaanha kanimo. Siya matarong, oo, giluwas; mapaubsanon, ug nagasakay sa usa ka asno . . . Ug sa pagkatinuod akong pagagub-on ang karro sa gubat gikan sa Epraim ug pagapatyon ang kabayo gikan sa Jerusalem. Ug ang busogan sa gubat pagabunggoon. Ug siya magasulti ug pakigdait ngadto sa mga nasod; ug ang iyang pagmando maoy gikan sa dagat ngadto sa dagat ug gikan sa Suba ngadto sa mga kinatumyan sa yuta.”
7 Kining tagnaa sa bahin natuman sa madaogong pagsakay ni Jesu-Kristo sa pagsulod sa Jerusalem sa 33 K.P. Sukad sa 1919 kini may pangataposang katumanan diha sa nahibilin sa espirituwal nga Israel. Walay pagkabahin sa mga sakop nianang dinihogang nahibilin, sama sa nahitabo tali sa mga tribo sa karaang Epraim ug Jerusalem, ang kaulohan sa duhag-tribong gingharian sa Juda. Pinaagi sa pag-alagad nga may paghiusa sa intereses sa Mesiyanikong Gingharian sa tuyo sa pagtuman sa tagna ni Jesus sa Mateo 24:14 ug sa Marcos 13:10, sila nagapadayon sa pagdayeg sa madaogong Hari, si Jesu-Kristo. Sa dili-mabugtong panaghiusa sila maunongong nagapasakop sa iyang harianong pagmando niining “konklusyon sa sistema sa mga butang.”—Mateo 24:3.
8 Sa ilang kaulawan, uban sa Jerusalem sa Republika sa Israel, ang gidungog Kristohanong mga nasod nga nagalangkob sa Kakristiyanohan wala mag-abiabi sa madaogong Hari nga nagaabot sa ngalan ni Jehova. Sa gihapon, anaa kadtong mga saksi sa Usa nga sa iyang ngalan siya nagaabot, nga masadyaong nagaalagad Kaniya diha sa Iyang templo. (Isaias 43:10-12) Ang ilang espirituwal nga mga mata nabuksan nga nakakita nga ang Republika sa Israel ug ang tanang ubang nasod sulod ug gawas sa HK karon halayo na sa martsa ngadto sa “dapit nga gitawag sa Hebreohanon nga Har–Magedon.” (Pinadayag 16:16) Ang gubat sa Diyos nga Makagagahom sa Tanan haduol na!
9 Ang palaaboton sa yutan-ong Jerusalem makapasubo, apan ang iya sa Bag-ong Jerusalem masanagon. Sa nahaigong panahon, “ang napulo ka sungay” sa politikanhong “mapintas nga mananap” mismo, mosumbalik sa pagdumot sa bigaon nga sistema, ang Dakong Babilonya, ang imperyo sa kalibotan sa bakak nga relihiyon. Ilang ipahayag ang ilang mapintas nga pagdumot batok sa gitahod sa relihiyosong paagi nga yutan-ong Jerusalem ug laglagon kini nga samag pinaagi sa sunog. (Pinadayag 17:16) Apan sa bug-os sila dili makatandog sa langitnong Bag-ong Jerusalem.
10 Ang nahibilin sa inanak-sa-espiritung mga Kristohanon nga nagalaom nga mahimong bahin sa langitnong Bag-ong Jerusalem nagapadayon sa pagdayeg sa Pamanhonong Hari, si Jesu-Kristo, duyog sa “dakong panon” sa ubang saksi ni Jehova. Sa maong maunongong panggawi, sila nailhang lahi kaayo sa daang Jerusalem. Sukad gayod sa pagkatukod sa Republika sa Israel, ang karong naglabi Hudiyonhong siyudad sa Jerusalem nagasunod sa dalan sa mga pumuluyo sa unang-siglong Jerusalem. Ilalom sa makapabuta nga relihiyosong impluwensiya, siya nagapadayon sa pagsalikway kang Jesu-Kristo, ang Usa nga may katungod ug gahom sa pagmando sa langitnong Gingharian.
11 Matuod, sukad sa pagkatapos sa Hentil nga mga Panahon sa 1914, ang “Prinsipe sa Pakigdait” nagamando na sa mga langit, nga dili makita sa mga mata sa tawo. Bisan pa niana, sukad gayod sa pagbihag sa mga Britaniko sa Jerusalem sa Gubat sa Kalibotan I ug ang gahom sa pagmando niana gihatag sa Liga sa Kanasoran ngadto sa Britanya, ang maayong balita sa langitnong Gingharian diha sa mga kamot sa Mesiyanikong Anak ni Haring David “gikawali na sa tibuok gipuy-ang yuta ingong usa ka pamatuod sa tanang nasod,” sumala sa gitagna mismo ni Jesu-Kristo.—Mateo 24:14.
12 Kining iladong katumanan sa tagna gituman sa mga Saksi ni Jehova ilalom sa pagdumala sa Watch Tower Bible and Tract Society. Ang maong Sosyedad duna ganiy usa ka sangang buhatan sa Tel Aviv, nga gikan niana gidumala ang mga kalihokan sa mga Saksi ni Jehova sa tibuok teritoryo sa Israel. Adunay mga kongregasyon usab sa aktibong mga saksi ni Jehova nga karon nagamantala sa ebanghelyo sa Gingharian nianang yutaa.
13 Gitagna ni Jesu-Kristo nga tapos matuman sa bug-os ang pagsangyaw “niining maayong balita sa gingharian,” “ang kataposan” moabot niining sistema sa mga butang sa kalibotan. (Mateo 24:14) Busa ang kataposan sa yutan-ong Jerusalem karon makita na. Sa pagkakaron, maorag dili na kinahanglang tukoron ang laing Jerusalem sa daang lugar, bisan aron sa pagdawat sa kaniadto hari sa Jerusalem, si David, pinaagi sa pagkabanhaw gikan sa mga patay ilalom sa Milenyong Gingharian sa iyang harianong kaliwat, si Jesu-Kristo. (Juan 5:28, 29) Bisan pa niana, si David lagmit ibalik sa dapit diin siya kaniadto nag-alagad kang Jehova nga Diyos.
Panahon sa Pagsadya
14 Ang Bag-ong Jerusalem nalangkit sa mahimayaong bag-ong sistema sa mga butang. Matud ni apostol Juan: “Nakita ko ang usa ka bag-ong langit ug ang usa ka bag-ong yuta; kay ang unang langit ug ang unang yuta miagi na, ug ang dagat wala na. Nakita ko usab ang balaang siyudad, ang Bag-ong Jerusalem, nga nanaog gikan sa langit gikan sa Diyos ug naandam ingon nga usa ka pangasaw-onon alang sa iyang bana. Niana akong nadungog ang usa ka makusog nga tingog gikan sa langit nga nagaingon: ‘Tan-awa! Ang balongbalong sa Diyos nagauban sa katawhan, ug siya magapuyo uban kanila, ug sila mahimong iyang mga katawhan. Ug ang Diyos mismo magauban kanila.’” (Pinadayag 21:1-3) Busa, ang Bag-ong Jerusalem maoy usa ka panalangin sa tibuok nga katawhan.
15 Kini nagahimo sa atong panahon nga panahon sa pagsadya. Sa pagdugang niining tanang pagsadya, ang okasyong gikaikagan sa uniberso ug pagakalipayan sa uniberso nagasingabot. Kini ang kaminyoon sa pangasaw-onong matang nga kompleto na sa gidaghanon, ang Bag-ong Jerusalem, ngadto kang Jesu-Kristo ang Hari. Ingong nahisulat kini sa Pinadayag 19:6-9: “Ug nadungog ko [si apostol Juan] ang usa ka tingog nga iya sa usa ka dakong panon ug ingon sa tingog sa daghang katubigan ug ingon sa tingog sa makusog nga dalugdog. Sila nag-ingon: ‘Dayega si Jah, kamong katawhan, tungod kay si Jehova nga atong Diyos, ang Makagagahom sa Tanan, nagsugod na sa pagmando nga hari. Magsadya kita ug magmaya sa hingapin, ug atong ihatag kaniya ang himaya, tungod kay ang kaminyoon sa Kordero [Jesu-Kristo] miabot na ug ang iyang asawa nakaandam na sa iyang kaugalingon. Oo, gitugot nga siya madayandayanan sa madan-ag, mahinlo, pino nga lino, kay ang pino nga lino nagabarog alang sa matarong nga mga buhat sa mga balaan.’ Ug siya nag-ingon kanako: ‘Isulat mo: Malipayon kadtong gidapit ngadto sa kombira sa kaminyoon sa Kordero.’”
16 Ang maong paghiusa sa Korderong si Jesu-Kristo diha sa kaminyoon magkahulogan sa dili-ikabatbat nga kalipay alang sa masambingayong Bag-ong Jerusalem sa langit. Pinaagi niana siya mahimong “malipayong inahan sa mga anak.” (Salmo 113:9) Oo, siya mahimong ang langitnong inahan sa tanang tawo, buhi ug patay, si kinsa gilukat sa iyang mahigugmaong bana pinaagi sa iyang hingpit tawhanong halad 19 ka siglo kanhi. Nga bug-os nahiuyon sa Abrahamikong pakigtugon ni Jehova sa kaliboan ka tuig nga miagi, ang Bag-ong Jerusalem mahimong usa ka panalangin sa tanang banay sa yuta.
[Mga Pangutana nga Pagatun-an]
1. (a) Ang paglaglag ba sa Jerusalem bag-o nga butang? (b) Nganong dili man katalagman sa tibuok katawhan kon makaagom na usab ang Jerusalem ug kalaglagan?
2. (a) Sa unsang paagi gipakita ni apostol Pablo nga adunay mas hataas nga Jerusalem? (b) Kinsa ang Tag-iya nga samag Bana nianang maong Jerusalem, ug kinsa ang iyang mga anak pinaagi kaniya?
3. (a) Kanus-a si Jehova nga Diyos mismo magsugod sa paghari? (b) Diin ba naentrono si Jesu-Kristo, ug unsay epekto niadto diha sa kaugalingong pagkahari ni Jehova?
4. Pinaagi sa unsang mga hitabo ang “Jerusalem sa itaas” nahimong harianong siyudad sukad 1914?
5, 6. (a) Sa Pinadayag 21:1, 2, nakita ni Juan ang unsang bag-ong simbolikong siyudad? (b) Si kinsa ang mohatag ug harianong pag-abiabi sumala sa gipadayag sa Zacarias 9:9, 10, ug sa unsang mga pulong?
7. Si kinsa ang nagatuman nianang tagnaa niining “konklusyon sa sistema sa mga butang,” ug sa unsang paagi?
8. (a) Kinsay napakyas sa pag-abiabi sa madaogong Hari? (b) Asa paingon ug kinsa ba ang nagamartsa?
9. Sa unsang paagi ang umaabot sa yutan-ong Jerusalem lahi kaayo sa iya sa Bag-ong Jerusalem?
10. Sa unsang paagi ang yutan-ong Jerusalem nagagawi nga lahi sa iya sa inanak-sa-espiritung mga Kristohanon ug sa “dakong panon,” ang ilang mga kauban?
11, 12. (a) Ang iladong pagkatuman sa tagna ni Jesus sa Mateo 24:14 sa tino ginatuman ni kinsa? (b) Unsay nabatonan sa Sosyedad nga uban niana sila nagabuhat diha sa Republika sa Israel karong adlawa?
13. (a) Unsay moabot tapos bug-os matuman ang pagsangyaw sa maayong balita sa Gingharian sa Diyos? (b) May panginahanglan pa ba unya sa laing yutan-ong Jerusalem, bisan aron sa pagdawat kang David sa pagkabanhaw?
14, 15. (a) Sa unsang paagi ginabatbat ni apostol Juan ang mahimayaong Bag-ong Jerusalem ug ang pagkanaog niini gikan sa langit aron sa pagpanalangin sa katawhan? (b) Nganong ang atong panahon maoy panahon sa pagsadya, ug unsang okasyon nga makapalipay sa uniberso ang nagasingabot?
16. (a) Pinaagi sa iyang langitnong kaminyoon ngadto sa Kordero, ang Bag-ong Jerusalem mahimong inahan ni kinsa? (b) Ang Bag-ong Jerusalem mapamatud-ang usa ka panalangin nga bug-os nahiuyon sa unsa?