“Sila nga Mangadto sa Dagat Diha sa mga Barko”

ANG usa ka estatwa nga gama sa tumbaga nagbarog atubangan sa pantalan sa Gloucester, Massachusetts, T.B.A. Kini naglarawan sa usa ka timonil nga nanglimbasog sa pagtimon sa iyang sakayan latas sa usa ka bagyo. Ang maong estatwa maoy monyumento sa libolibong mananagat sa Gloucester nga nahibaloang nangamatay sa dagat. Diha sa tiilan sa estatwa ug sa duol nga plake nasulat ang mga pulong sa Salmo 107:23, 24: “Sila nga mangadto sa dagat diha sa mga barko, nga magapatigayon diha sa dagkong katubigan; Sila nakakita sa mga buhat sa Ginoo, ug sa iyang katingalahang mga buhat sa mga kahiladman.”—King James Version.

Ang pagpanagat diha sa daghag-isdang mga bungtod ilalom sa dagat sa Atlantiko maoy peligroso. Latas sa katuigan, ang 5,368 ka lalaki nga taga-Gloucester, nga karon adunay populasyon nga mga 30,000, ang nahibaloang nangamatay samtang nanagat. Kini ang nasulat sa handomanang plake: “Ang pipila kalit lang naabtan ug naghaguros nga kusog nga hangin ug dagko kaayong mga balod tungod sa hanging amihan. Ang uban nag-inusarang namatay diha sa mga baroto nga naanod halayo sa linayagang mga barko nga nagdala kanila ngadto sa mga bungtod ilalom sa dagat. Ang pipila ka barko nagbanggaay tungod sa bagyo ug sa kaalaot nangalunod. Ang uban nadasmagan sa mga bapor diha sa mga agianag bapor.”

Ang monyumento maoy makapasubo nga pamatuod sa paghago ug kapeligrohan nga giatubang sa mga mananagat latas sa kasiglohan. Hunahunaa lang ang mitubod nga mga luha sa kaguol tungod sa namatay nga mga bana, amahan, igsoon, ug mga anak. Hinuon, dili hikalimtan ni Jehova nga Diyos ang mga balo, ilo, o kadtong nangamatay diha sa dagat. Si apostol Juan nagpunting niining umaabot nga hitabo: “Ang dagat mitugyan sa mga patay nga diha niini, ug ang kamatayon ug ang Hades mitugyan sa mga patay nga diha kanila.” (Pinadayag 20:13) Sa pagpamanhaw kanila, kadtong ‘nangadto sa dagat diha sa mga barko’ makakita gayod sa kahibulongang “mga buhat sa Ginoo.”