ASO

Ang makitang nagkasagol nga mga partikulo sa karbon ug mga gas nga nagpatunghag anuos gikan sa nasunog nga organikong mga materyal; nagtumong usab sa alisngaw o panganod nga kaamgid sa aso. Gawas sa paghisgot sa literal nga aso (Heb., ʽa·shanʹ; Gr., ka·pnosʹ) diha sa daghang teksto, adunay ubay-ubayng mahulagwayong mga paggamit niini nga pulong, ug adunay mahulagwayong kahulogan ang pagtungha sa aso mismo.

Presensiya ni Jehova, ug ang Iyang Kasuko. Si Jehova nagpadayag sa iyang presensiya pinaagi sa usa ka panganod sa “aso,” nga usahay inubanag kalayo. (Ex 19:18; 20:18; Isa 4:5) Iyang gihawasan ang iyang presensiya niining paagiha diha sa panan-awon sa mga templo nga nakita ni manalagnang Isaias ug ni apostol Juan.​—Isa 6:1-6; Pin 15:8; tan-awa ang PANGANOD.

Ang aso nalangkit usab sa nagasilaob nga kasuko ni Jehova. (Deu 29:20) Sa laing bahin, kadtong mga tawo sa Israel nga nahulog sa pagsimba sa bakak nga mga diyos gitawag nga “aso” sa mga buho sa ilong sa Diyos, nga nagpasabot nga sila nakahagit sa iyang dakong kasuko.​—Isa 65:5.

Usa ka Pasidaan o Tilimad-on. Ang mga aso ingong ilhanan gigamit sa panahon sa gubat aron sa paghatag ug mensahe tali sa mga siyudad o sa mga dibisyon sa kasundalohan. (Huk 20:38-40) Usa usab kini ka ebidensiya nga may gisunog sa kalayo, sama pananglitan, sa aso nga miutbo gikan sa halayong siyudad. (Gen 19:28; Jos 8:​20, 21) O sa mahulagwayong paagi kini mahimong magtumong sa usa ka kasundalohan nga misulong aron sa pagpahamtang sa kalaglagan, nga sagad naglakip sa pagsunog sa nailog nga mga siyudad.​—Isa 14:31.

Busa, ang usa ka utbo o panganod sa aso gigamit sa ulahi sa simbolikong paagi ingong usa ka timaan sa pasidaan, usa ka tilimad-on sa kaalaotan nga moabot o sa kalaglagan. (Pin 9:2-4; itandi ang Joe 2:​30, 31; Buh 2:​19, 20; Pin 9:​17, 18.) Ang salmista nag-ingon bahin sa mga daotan: “Mahanaw sila sama sa aso.” (Sal 37:20) Ang aso nagsimbolo usab sa ebidensiya sa kalaglagan. (Pin 18:​9, 18) Busa ang aso nga padayong nagautbo “hangtod sa panahong walay tino” dayag nga usa ka ekspresyon nga nagtumong sa bug-os ug walay-kataposang kalaglagan, sama sa tagna ni Isaias batok sa Edom: “hangtod sa panahong walay tino ang aso niini padayong mag-utbo.” (Isa 34:​5, 10) Ang Edom ingong usa ka nasod nahanaw ug nagpabiling biniyaan hangtod niining adlawa, ug ang ebidensiya niini natala diha sa asoy sa Bibliya ug diha sa mga rekord sa sekular nga kasaysayan. Sa susama, ang walay-kataposang kalaglagan sa Dakong Babilonya gitagna diha sa Pinadayag 18:​8, ug ang samang paghukom ipahamtang batok niadtong nagasimba sa “mapintas nga mananap” ug sa larawan niini, diha sa Pinadayag 14:9-11.

Ubang Masambingayong mga Paggamit. Ang aso kasagarang mapalid dayon ug mahanaw, busa kini usahay mahulagwayong gigamit sa pagtumong sa usa ka butang nga lumalabay lamang. Gigamit kini maylabot sa: mga kaaway sa Diyos (Sal 68:2), mga magsisimba sa idolo (Os 13:3), ug sa nakunhorang kinabuhi sa sinakit (Sal 102:3).

“Kon unsa ang suka alang sa ngipon ug ang aso alang sa mata, mao man usab ang tawong tapolan alang niadtong nagsugo kaniya,” matod pa sa proverbio. Maingon nga ang aso makapasakit ug makapahapdos sa mata, mao man usab kadtong nagpatrabaho sa usa ka tawong tapolan naghimo niana sa ikadaot sa iyang mga katuyoan.​—Pr 10:26.

Ang salmista, nga nagpaabot kang Jehova aron sa paghupay kaniya, miingon: “Ako nahisama sa botelya nga panit nga gipaasohan.” (Sal 119:83) Ang mga botelya nga panit, sama niadtong gigamit sa Tungang Sidlakan, nga isab-it sa bungbong kon dili gamiton, mouga ug mokuyos tungod sa aso sa balay. Ingon niana ang naagoman sa salmista ilalom sa mga kamot niadtong naglutos kaniya.

Si Jehova, sa paghubit sa iyang mga kalalangan ngadto kang Job, naghisgot sa Leviatan, nga nag-ingon: “Gikan sa mga buho sa iyang ilong magagula ang aso, ingon sa usa ka hudno nga gipasiga pinaagi sa mga tikog.” (Job 41:20) Daghang eskolar sa Bibliya ang nagtuo nga ang Diyos naghisgot dinhi sa buaya, nga sa dihang mohaw-as gikan sa tubig, mobuga ug baga, gabonon nga alisngaw uban ang pagdahunog.

Gipaaso nga Halad. Ang laing Hebreohanong pulong nga qa·tarʹ, nagtumong sa paghimog gipaaso nga halad, aso man sa insenso o aso sa laing halad sa ibabaw sa halaran. (1Cr 6:49; Jer 44:15) Ang maong gipaaso nga halad giisip nga usa ka humot nga alimyon nga miutbo ngadto sa Usa nga gihalaran niini.​—Gen 8:​20, 21; Lev 26:31; Efe 5:2.