Si Jehova Mao ang Atong Magtatabang
“Ang akong tabang nagagikan kang Jehova, ang Magbubuhat sa langit ug sa yuta.”—SALMO 121:2.
1, 2. (a) Nganong ikaingon nga kitang tanan nagkinahanglag tabang usahay? (b) Unsang matanga sa Magtatabang si Jehova?
KINSA kanato ang wala gayod magkinahanglan ug tabang? Ang tinuod mao nga kitang tanan nagkinahanglag tabang usahay—sa pagsagubang sa usa ka bug-at nga problema, pag-antos sa kaguol nga bation sa dihang mamatyan ug minahal, sa paglahutay sa malisod nga pagsulay. Sa dihang manginahanglan ug tabang, ang mga tawo sagad modangop sa usa ka mahingawaong higala. Mogaan ang imong problema sa dihang isugilon nimo kana sa maong higala. Apan limitado lamang ang ikatabang sa atong isigkatawo. Gawas pa, ang uban dili kanunayng makatabang kanimo sa dihang ikaw nanginahanglag tabang.
2 Apan, dunay usa ka Magtatabang nga adunay walay-kinutobang gahom ug tabang. Dugang pa, siya nagpasalig kanato nga dili gayod siya mobiya kanato. Siya ang Usa nga gipaila sa salmista kinsa masaligon kaayong mipahayag: “Ang akong tabang nagagikan kang Jehova.” (Salmo 121:2) Nganong kombinsido man kaayo kini nga salmista nga si Jehova motabang kaniya? Aron matubag kanang pangutanaha, atong susihon ang Salmo 121. Pinaagi niini atong mahibaloan kon nganong kita usab masaligong makadangop kang Jehova ingong atong Magtatabang.
Makanunayong Tuboran sa Tabang
3. Sa unsang mga bukira lagmit giyahat sa salmista ang iyang mga mata, ug ngano?
3 Ang salmista misugod pinaagi sa pagpunting sa pagkamaglalalang ni Jehova ingong basehanan sa pagsalig: “Iyahat ko ang akong mga mata ngadto sa kabukiran. Asa ba magagikan ang akong tabang? Ang akong tabang nagagikan kang Jehova, ang Magbubuhat sa langit ug sa yuta.” (Salmo 121:1, 2) Wala lamang iyahat sa salmista ang iyang mga mata sa bisan unsang bukid. Sa dihang gisulat kining mga pulonga, ang templo ni Jehova nahimutang sa Jerusalem. Kanang siyudara, nga nahiluna sa ibabaw sa kabukiran sa Juda, mao ang mahulagwayong dapit nga puloy-anan ni Jehova. (Salmo 135:21) Lagmit nga giyahat sa salmista ang iyang mga mata ngadto sa mga bukid sa Jerusalem diin gitukod ang templo ni Jehova, nga masaligong nangayo ug tabang kang Jehova. Nganong masaligon man kaayo ang salmista nga si Jehova makatabang kaniya? Tungod kay Siya mao “ang Magbubuhat sa langit ug sa yuta.” Sa pagkatinuod, ang salmista nag-ingon, ‘Dayag nga walay bisan unsa nga makapugong sa labing-gamhanan nga Maglalalang sa pagtabang kanako!’—Isaias 40:26.
4. Giunsa pagpakita sa salmista nga si Jehova alisto gayod sa mga panginahanglan sa iyang katawhan, ug nganong makapahupay kana nga hunahuna?
4 Sunod, gipatin-aw sa salmista nga si Jehova kanunayng alisto sa mga panginahanglan sa iyang mga alagad: “Dili niya mahimong itugot nga ang imong tiil matarog. Ang Usa nga nagabantay kanimo dili mahimong magduka. Tan-awa! Siya dili magduka ni matulog, siya nga nagabantay sa Israel.” (Salmo 121:3, 4) Dili gayod tugotan sa Diyos nga kadtong nagasalig kaniya “matarog” o matumba nga dili na sila makabangon pa. (Proverbio 24:16) Nganong dili? Tungod kay si Jehova sama sa usa ka alisto kaayo nga magbalantay nga nagbantay sa iyang mga karnero. Dili ba makapahupay kana nga hunahuna? Dili gayod niya ipiyong ang iyang mga mata sa mga panginahanglan sa iyang katawhan, bisag kadiyot lang. Siya kanunayng magbantay kanila adlaw ug gabii.
5. Nganong si Jehova giingon nga anaa sa “tuong kamot”?
5 Masaligon nga si Jehova mao ang maunongong Tigpanalipod sa iyang katawhan, ang salmista misulat: “Si Jehova nagabantay kanimo. Si Jehova mao ang imong salimbong sa imong tuong kamot. Ang adlaw dili modaot kanimo panahon sa adlaw, ni ang bulan sa kagabhion.” (Salmo 121:5, 6) Para sa usa ka magpapanaw nga nagbaktas sa Tungang Silangan, ang usa ka landong nga dapit makahatag sa gikinahanglang proteksiyon batok sa naglagiting nga kainit sa adlaw. Si Jehova sama sa usa ka landong alang sa iyang katawhan, nga manalipod kanila batok sa kalamidad nga nahisamag makapagba nga kainit. Matikdi nga si Jehova giingon nga anaa sa “tuong kamot.” Sa karaang pagpakiggubat, ang tuong kamot sa usa ka sundalo dili kaayo mapanalipdan sa taming, nga gikuptan sa wala nga kamot. Ang usa ka maunongong higala makahatag tingali ug proteksiyon pinaagi sa pagbarog ug pagpakig-away diha sa tuong kiliran sa sundalo. Sama sa maong higala, si Jehova maunongong nagbarog tupad sa iyang mga magsisimba, nga kanunayng andam nga motabang kanila.
6, 7. (a) Sa unsang paagi gipasaligan kita sa salmista nga si Jehova dili gayod mohunong sa pagtabang sa iyang katawhan? (b) Nganong makasalig kita sama sa salmista?
6 Mohunong kaha si Jehova sa pagtabang sa iyang katawhan? Dili gayod kana mahitabo. Ang salmista mihinapos: “Si Jehova magabantay kanimo batok sa tanang katalagman. Pagabantayan niya ang imong kalag. Si Jehova magabantay sa imong paggula ug sa imong pagsulod sukad karon ug hangtod sa panahong walay tino.” (Salmo 121:7, 8) Sa bersikulo 5, ang salmista nag-ingon: “Si Jehova nagabantay kanimo,” sa ato pa, sa presenteng panahon. Apan, niining mga bersikuloha, ang salmista misulat: “Si Jehova magabantay kanimo,” sa ato pa, sa umaabot. Busa, gipasaligan ang matuod nga mga magsisimba nga si Jehova motabang bisan hangtod sa umaabot. Bisan asa sila moadto, bisan unsang kalamidad ang ilang maagoman, sila kanunay gayod niyang tabangan.—Proverbio 12:21.
7 Sa pagkatinuod, ang magsusulat sa Salmo 121 masaligon nga ang labing-gamhanan nga Maglalalang malulotong nagabantay sa iyang mga alagad sama sa usa ka mahingawaong magbalantay ug kanunayng nagatukaw sama sa usa ka alisto nga guwardiya. Kita aduna gayoy katarongan nga mosalig sama sa salmista, tungod kay si Jehova dili mausab. (Malaquias 3:6) Nagkahulogan ba kini nga kita makadawat kanunay ug pisikal nga proteksiyon? Dili, apan basta kita padayong modangop kaniya ingong atong Magtatabang, iya kitang panalipdan batok sa tanang butang nga makadaot kanato sa espirituwal. Apan natural lang nga mangutana, ‘Sa unsang paagi kita tabangan ni Jehova?’ Atong susihon ang upat ka paagi diin iyang himoon kana. Niining artikuloha, atong hisgotan kon sa unsang paagi iyang gitabangan ang iyang mga alagad sa kapanahonan sa Bibliya. Sa sunod nga artikulo, atong hisgotan kon sa unsang paagi siya nagatabang sa iyang katawhan karon.
Tabang Gikan sa mga Manulonda
8. Nganong dili ikatingala nga ang mga manulonda interesado kaayo sa kaayohan sa yutan-ong mga alagad sa Diyos?
8 Si Jehova adunay milyonmilyong manulonda nga iyang magamit. (Daniel 7:9, 10) Kining maong espiritung mga anak matinumanong nagtuman sa iyang kabubut-on. (Salmo 103:20) Sila nahibalo gayod nga gihigugma pag-ayo ni Jehova ang iyang tawhanong mga magsisimba ug buot niyang tabangan sila. Dili ikatingala nga ang mga manulonda interesado kaayo sa kaayohan sa yutan-ong mga alagad sa Diyos. (Lucas 15:10) Nan, seguradong malipay ang mga manulonda nga gamiton ni Jehova sa pag-abag sa mga tawo. Sa unsang mga paagi gigamit ni Jehova ang mga manulonda sa pagtabang sa iyang tawhanong mga alagad sa karaang mga panahon?
9. Paghatag ug pananglitan kon sa unsang paagi ang mga manulonda gihatagan sa Diyos ug gahom sa pagpanalipod sa matinumanong mga tawo.
9 Ang mga manulonda gihatagag gahom sa Diyos sa pagpanalipod ug pagluwas sa matinumanong mga tawo. Duha ka manulonda ang mitabang kang Lot ug sa iyang mga anak nga babaye sa pag-ikyas sa kalaglagan sa Sodoma ug Gomora. (Genesis 19:1, 15-17) Gipatay sa usa ka manulonda ang 185,000 ka sundalong Asiryanhon nga nanghulga sa Jerusalem. (2 Hari 19:35) Sa dihang gitambog si Daniel sa gahong sa mga leyon, ‘gipadala ni Jehova ang iyang manulonda ug gitak-om ang baba sa mga leyon.’ (Daniel 6:21, 22) Gipagawas sa usa ka manulonda si apostol Pedro gikan sa bilanggoan. (Buhat 12:6-11) Ang Bibliya naghisgot ug daghang uban pang mga pananglitan sa panalipod nga gihatag sa mga manulonda, nga nagpamatuod sa giingon sa Salmo 34:7: “Ang manulonda ni Jehova nagkampo libot niadtong nangahadlok kaniya, ug siya nagluwas kanila.”
10. Sa unsang paagi gigamit ni Jehova ang usa ka manulonda sa pagdasig sa manalagna nga si Daniel?
10 Usahay, gamiton ni Jehova ang mga manulonda sa pagdasig ug pagpalig-on sa matinumanong mga tawo. Ang usa ka makapatandog nga pananglitan makaplagan diha sa Daniel kapitulo 10. Niadtong panahona, si Daniel lagmit hapit nang mo-100 ka tuig ang edad. Nahigawad pag-ayo ang manalagna, lagmit tungod sa awaaw nga kahimtang sa Jerusalem ug sa kalangan sa pagtukod pag-usab sa templo. Natugaw usab siya human makakita ug makahahadlok nga panan-awon. (Daniel 10:2, 3, 8) Ang Diyos mahigugmaong nagpadala ug usa ka manulonda aron sa pagdasig kaniya. Sa makadaghan, gipahinumdoman sa manulonda si Daniel nga siya “tilinguhaon kaayo” sa mga mata sa Diyos. Unsay resulta? Giingnan sa tigulang nga manalagna ang manulonda: “Gilig-on mo ako.”—Daniel 10:11, 19.
11. Unsa ang usa ka pananglitan kon sa unsang paagi gigamit ang mga manulonda sa pagdumala sa buluhatong pagsangyaw sa maayong balita?
11 Gigamit usab ni Jehova ang mga manulonda sa pagdumala sa buluhatong pagsangyaw sa maayong balita. Gitultolan sa usa ka manulonda si Felipe sa pagsangyaw bahin kang Kristo ngadto sa usa ka Etiopianhong eunuko, nga nagpabawtismo human niana. (Buhat 8:26, 27, 36, 38) Wala madugay sa ulahi, kabubut-on sa Diyos nga ang maayong balita igawali ngadto sa dili-tinuli nga mga Hentil. Diha sa usa ka panan-awon, nagpakita ang usa ka manulonda kang Cornelio, nga usa ka mahinadlokon-sa-Diyos nga Hentil, ug gisugo siya sa pagpatawag kang apostol Pedro. Sa dihang nakaplagan sa mga mensahero ni Cornelio si Pedro, sila miingon: “Si Cornelio . . . gihatagan sa Diyos ug mga instruksiyon pinaagi sa usa ka balaang manulonda sa pagpasugo kanimo nga moadto sa iyang balay ug aron sa pagpaminaw sa mga butang nga imong isulti.” Misanong si Pedro, ug busa ang unang dili-tinuli nga mga Hentil nahimong bahin sa Kristohanong kongregasyon. (Buhat 10:22, 44-48) Hunahunaa lang kon unsay imong bation sa dihang imong mahibaloan nga usa ka manulonda mitabang kanimo aron makontak ang usa ka tawo nga nakiling sa pagkamatarong!
Tabang Pinaagi sa Balaang Espiritu
12, 13. (a) Nganong ang mga apostoles ni Jesus adunay maayong katarongan nga motuo nga ang balaang espiritu makatabang kanila? (b) Sa unsang paagi ang balaang espiritu naghatag ug gahom sa unang-siglong mga Kristohanon?
12 Sa hapit na siyang mamatay, gipasaligan ni Jesus ang iyang mga apostoles nga sila dili gayod pasagdan. Hatagan sila sa Amahan ug usa ka “magtatabang, ang balaang espiritu.” (Juan 14:26) Ang mga apostoles adunay maayong katarongan nga motuo nga ang balaang espiritu makatabang kanila. Kon buot hunahunaon, ang inspiradong Kasulatan adunay daghang pananglitan kon giunsa paggamit ni Jehova ang balaang espiritu, ang labing kusganon nga puwersa, sa pagtabang sa iyang katawhan.
13 Sa daghang okasyon, ang balaang espiritu gigamit sa paghatag ug gahom sa mga tawo sa pagbuhat sa kabubut-on ni Jehova. Ang balaang espiritu naghatag ug gahom sa mga Maghuhukom aron sa pagluwas sa Israel. (Maghuhukom 3:9, 10; 6:34) Ang mao gihapong espiritu naghatag ug gahom sa unang-siglong mga Kristohanon aron makapadayon sa pagwali nga maisogon bisan pa sa tanang matang sa pagsupak. (Buhat 1:8; 4:31) Ang ilang kalamposan sa pagtuman sa ilang ministeryo naghatag ug makapakombinsir nga pamatuod sa paglihok sa balaang espiritu. Aduna pa bay laing nakatabang sa “dili-edukado ug ordinaryo” nga mga tawo sa pagpakaylap sa mensahe sa Gingharian sa tibuok nailhang kalibotan niadtong panahona?—Buhat 4:13; Colosas 1:23.
14. Sa unsang paagi gigamit ni Jehova ang iyang balaang espiritu sa paglamdag sa iyang katawhan?
14 Gigamit usab ni Jehova ang iyang balaang espiritu sa paglamdag sa iyang katawhan. Tungod sa tabang sa espiritu sa Diyos, si Jose nakabadbad sa matagnaong mga damgo ni Paraon. (Genesis 41:16, 38, 39) Pinaagi sa iyang espiritu, si Jehova nagbutyag sa iyang mga katuyoan ngadto sa mga mapainubsanon apan nagtago niini gikan sa mga mapahitas-on. (Mateo 11:25) Busa, maylabot sa mga butang nga gitagana ni Jehova “alang kanilang nahigugma kaniya,” si apostol Pablo nag-ingon: “Kini gipadayag sa Diyos kanato pinaagi sa iyang espiritu.” (1 Corinto 2:7-10) Pinaagi lamang sa tabang sa balaang espiritu nga ang usa ka tawo makasabot gayod sa kabubut-on sa Diyos.
Tabang Gikan sa Pulong sa Diyos
15, 16. Unsay gisugo kang Josue nga himoon aron molihok nga maalamon?
15 Ang inspiradong Pulong ni Jehova “mapuslanon sa pagpanudlo,” ug kini nagpaarang sa mga alagad sa Diyos nga mahimong “takos gayod, bug-os nga masinangkapan alang sa tanang maayong buhat.” (2 Timoteo 3:16, 17) Ang Bibliya naundan ug daghang pananglitan kon sa unsang paagi ang katawhan sa Diyos sa karaang mga panahon natabangan sa mga bahin sa iyang Pulong nga nasulat na.
16 Ang Kasulatan nakatabang sa paghatag ug maayong giya para sa mga magsisimba sa Diyos. Sa dihang gihatagan si Josue ug responsabilidad sa pagpanguna sa Israel, siya giingnan: “Kining basahon sa balaod [nga girekord ni Moises] kinahanglang dili mahilayo sa imong baba, ug sa hinayng tingog kinahanglang magbasa ka niini adlaw ug gabii, aron ikaw mag-amping sa pagbuhat sumala sa tanang nahisulat niini; kay sa ingon magmalamposon ka sa imong dalan ug sa ingon molihok ka nga maalamon.” Matikdi nga ang Diyos wala mosaad kang Josue nga iyang ihatag ang kaalam sa milagrosong paagi. Hinunoa, kon basahon ug pamalandongon ni Josue ang “basahon sa balaod,” siya molihok nga maalamon.—Josue 1:8; Salmo 1:1-3.
17. Sa unsang paagi si Daniel ug Haring Josias natabangan sa mga bahin sa Kasulatan nga ilang nabatonan?
17 Ang sinulat nga Pulong sa Diyos nakatabang usab sa pagbutyag sa iyang kabubut-on ug katuyoan. Pananglitan, nahibaloan ni Daniel gikan sa mga sinulat ni Jeremias kon unsa ka dugay nga magpabiling awaaw ang Jerusalem. (Jeremias 25:11; Daniel 9:2) Matikdi usab kon unsay nahitabo panahon sa pagmando ni Haring Josias sa Juda. Nianang panahona, ang nasod nahilayo na kang Jehova, ug ang mga hari dayag nga wala na magsulat ug personal nga kopya sa Balaod ug wala magpadapat niana. (Deuteronomio 17:18-20) Apan samtang giayo ang templo, nakaplagan “ang basahon sa balaod,” lagmit ang gisulat mismo ni Moises. Tingali mao kadto ang orihinal nga sinulat, nga nakompleto mga 800 ka tuig nga sayosayo pa. Human madungog ang kaundan niini nga gibasa, naamgohan ni Josias nga grabe nang gisupak sa nasod ang kabubut-on ni Jehova, ug ang hari mihimog kusganong mga lakang sa pagbuhat kon unsay nahisulat sa basahon. (2 Hari 22:8; 23:1-7) Dili ba tin-awng natabangan ang katawhan sa Diyos sa karaang mga panahon pinaagi sa mga bahin sa Balaang Kasulatan nga ilang nabatonan?
Tabang Pinaagi sa mga Isigkamagtutuo
18. Nganong makaingon kita nga si Jehova mao ang tuboran sa tabang sa dihang ang usa ka matuod nga magsisimba motabang sa iyang isigkamagsisimba?
18 Ang tabang nga itagana ni Jehova sagad naggikan sa mga isigkamagtutuo. Sa pagkatinuod, ang Diyos mao ang tuboran sa tabang sa dihang ang usa ka matuod nga magsisimba motabang sa iyang isigkamagsisimba. Nganong makaingon kita niana? Tungod sa duha sa rason. Una, nalangkit ang balaang espiritu sa Diyos. Ang maong espiritu magpatunghag mga bunga, nga naglakip sa gugma ug pagkamaayo, diha sa mga tawong magpaimpluwensiya niini. (Galacia 5:22, 23) Busa, sa dihang ang usa ka alagad sa Diyos matukmod sa pagtabang sa usag usa, kini maoy pamatuod nga naglihok ang espiritu ni Jehova. Ikaduha, kita gibuhat sumala sa larawan sa Diyos. (Genesis 1:26) Kini nagkahulogan nga kita adunay katakos sa pagbanaag sa iyang mga hiyas, lakip na sa iyang pagkamaluloton ug pagkamabination. Busa sa dihang tabangan sa usa ka alagad ni Jehova ang iyang isigkaalagad, ang tinuod nga Tuboran sa maong tabang mao ang usa kansang mga hiyas atong gibanaag.
19. Sumala sa rekord sa Bibliya, sa unsang paagi gihatag ni Jehova ang tabang pinaagi sa mga isigkamagtutuo?
19 Sa kapanahonan sa Bibliya, sa unsang paagi gihatag ni Jehova ang tabang pinaagi sa mga isigkamagtutuo? Si Jehova sagad magpalihok sa usa sa iyang mga alagad sa paghatag ug tambag ngadto sa uban, sama sa nagaluwas-ug-kinabuhing tambag ni Jeremias ngadto kang Baruk. (Jeremias 45:1-5) Matag karon ug unya, ang matuod nga mga magsisimba matukmod sa paghatag ug materyal nga tabang ngadto sa mga isigkamagtutuo, sama sa gipakitang kaikag sa mga Kristohanon sa Macedonia ug Acaya sa pagtabang sa ilang nanginahanglang mga igsoon sa Jerusalem. Si apostol Pablo nag-ingon nga ang maong pagkamanggihatagon nagpatungha gayod ug “mga pasalamat sa Diyos.”—2 Corinto 9:11.
20, 21. Ilalom sa unsang mga kahimtang nga si apostol Pablo napalig-on sa mga igsoong gikan sa Roma?
20 Ilabinang makapatandog ang mga asoy kon sa unsang paagi ang mga alagad ni Jehova naningkamot sa pagpalig-on ug pagdasig sa usag usa. Tagda ang pananglitan nga naglangkit kang apostol Pablo. Samtang nagpaingon sa Roma ingong usa ka binilanggo, si Pablo miagi sa Romanhong haywey nga nailhan ingong Dalan sa Apio. Ang kataposang hugna sa maong panaw dili gayod makapahimuot, tungod kay ang mga magpapanaw kinahanglang moagi sa lamakan.a Ang mga igsoon sa kongregasyon sa Roma nahibalo nga taliabot si Pablo. Unsay ilang buhaton? Magpaabot ba lamang sila sa ilang balay hangtod moabot si Pablo ug unya abiabihon siya?
21 Ang magsusulat sa Bibliya nga si Lucas, kinsa miuban kang Pablo sa maong panaw, nagtug-an kanato kon unsay nahitabo: “Gikan didto [sa Roma] ang mga igsoon, sa dihang ilang nadungog ang balita bahin kanamo, miadto aron sa pagsugat kanamo hangtod sa Tiyanggihan sa Apio ug sa Tulo ka Abotanan.” Mahanduraw ba nimo ang nahitabo? Kay nahibalo nga taliabot si Pablo, usa ka grupo sa mga igsoon ang mipanaw gikan sa Roma aron sa pagtagbo kaniya. Ang uban sa maong grupo nagpaabot didto sa Tiyanggihan sa Apio, ang nailhang pahulayanan sa mga magpapanaw nga duolag 74 kilometros gikan sa Roma. Ang ubang mga igsoon nagpaabot didto sa Tulo ka Abotanan, usa ka pahulayanan nga duolag 58 kilometros sa gawas sa siyudad. Unsay reaksiyon ni Pablo? Si Lucas nagtaho: “Sa iyang pagkakita kanila, si Pablo nagpasalamat sa Diyos ug nakabatog kaisog.” (Buhat 28:15) Tiaw mo kana—ang pagkakita lang sa mga igsoon nga naningkamot sa pagpanaw ug layo maoy tuboran sa kalig-on ug paghupay kang Pablo! Ug kinsay gipasalamatan ni Pablo tungod sa maong mapuslanong pagpaluyo? Iyang gipasalamatan ang tuboran sa tabang, si Jehova nga Diyos.
22. Unsay atong tinuig nga teksto para sa 2005, ug unsay pagahisgotan sa sunod nga artikulo?
22 Dayag nga ang inspiradong rekord sa mga pakiglabot sa Diyos nagpakita nga si Jehova usa gayod ka Magtatabang. Siya maoy usa ka Magtatabang nga walay kasama. Sa katukma, gihimo sa mga Saksi ni Jehova nga tinuig nga teksto para sa 2005 ang mga pulong sa Salmo 121:2: “Ang akong tabang nagagikan kang Jehova.” Apan sa unsang paagi si Jehova nagatabang kanato karon? Kini pagahisgotan sa sunod nga artikulo.
[Footnote]
a Ang Romanong magbabalak nga si Horace (65-8 W.K.P.), kinsa nakaagi sa samang agianan, nagkomento bahin sa mga kalisdanan sa maong hugna sa panaw. Gihubit ni Horace ang Tiyanggihan sa Apio ingong “puno sa mga bangkero ug hakog nga mga tigbantay sa abotanan.” Mireklamo siya bahin sa “makapungot nga mga tagnok ug mga baki” ug sa “hugaw” nga tubig.
Nahinumdom Ka Ba?
Sa unsang mga paagi si Jehova naghatag ug tabang—
• pinaagi sa mga manulonda?
• pinaagi sa iyang balaang espiritu?
• pinaagi sa iyang inspiradong Pulong?
• pinaagi sa mga isigkamagtutuo?
[Blurb sa panid 15]
Ang tinuig nga teksto para sa 2005 mao: “Ang akong tabang nagagikan kang Jehova.”—Salmo 121:2.
[Hulagway sa panid 16]
Gipasalamatan ni Pablo ang Diyos tungod sa tabang nga iyang nadawat gikan sa mga igsoon sa Roma