Usa ka Kahoy nga “ang Iyang mga Dahon Dili Malaya”

NAKAKITA kana bag lunhawng kakahoyan? Malipay ka seguro nga motan-aw niana. Kon makakita ka ug dagko, labong nga mga kahoy, maghunahuna ka ba nga dunay hulaw sa maong lugar? Dili gayod! Hinunoa, maghunahuna ka nga abunda ang tubig sa maong lugar mao nga labong ug himsog ang mga kahoy.

Ang Bibliya haom kaayo nga nagtandi sa mga tawo nga lig-og pagtuo ug maayog relasyon sa Diyos ngadto sa dagko, labong nga mga kahoy. Matikdi pananglitan kining makapadasig nga teksto gikan sa unang tulo ka bersikulo sa Salmo:

“Malipayon ang tawo nga wala magalakaw sa tambag sa mga daotan, ug wala magatindog sa dalan sa mga makasasala, ug wala magalingkod sa lingkoranan sa mga mabiaybiayon. Hinunoa ang iyang kalipay anaa sa balaod ni Jehova, ug sa iyang balaod siya nagabasa sa hinayng tingog sa adlaw ug gabii. Ug siya mahisama gayod sa usa ka kahoy nga natanom sa daplin sa kasapaan sa tubig, nga mobunga sa iyang panahon ug ang iyang mga dahon dili malaya, ug ang tanan nga ginabuhat niya magmalamposon.”

Sa susama, ang Jeremias 17:7, 8, nag-ingon: “Bulahan ang tawo nga lig-on ug lawas nga nagbutang sa iyang pagsalig kang Jehova, ug kansang pagsalig mao si Jehova. Ug siya mahimo gayod nga sama sa usa ka kahoy nga gitanom sa daplin sa mga tubig, nga nagpakuyanap sa iyang mga gamot sa daplin mismo sa sapa; ug dili siya makakita inig-abot sa kainit, hinunoa ang iyang mga dahon molambo gayod. Ug sa tuig sa hulaw siya dili mabalaka, ni siya mohunong sa pagpamunga.”

Niining mga tekstoha, ang mga kahoy gigamit ingong ilustrasyon aron ipakita ang mga kaayohan kon ang usa mobuhat ug maayo, magkalipay sa mga balaod sa Diyos, ug mosalig kaniya sa bug-os. Busa, makapangutana kita, Sa unsang paagi ang maong tawo mahisama sa usa ka labong nga kahoy? Atong susihon pag-ayo kining mga bersikuloha.

“Natanom sa Daplin sa Kasapaan sa Tubig”

Ang mga kahoy nga atong gihisgotan gihulagway nga natanom diha “sa daplin sa kasapaan sa tubig” o “sa daplin sa mga tubig,” dili lang sa usa ka suba o sapa. Ang samang masambingayong pulong mabasa sa Isaias 44:3, 4, diin si Jehova misulti kon sa unsang paagi iyang atimanon ang mahinulsolong mga Hudiyo nga mibalik gikan sa pagkabihag sa Babilonya. Pinaagi kang propetang Isaias, si Jehova miingon: “Buboan ko ug tubig ang giuhaw, ug nagdagayday nga mga sapa ang mala nga dapit. . . . Ug sila mosubol gayod samag taliwala sa lunhawng balili, samag mga alamo sa daplin sa mga kanal sa tubig.” Dinhi, ang “mga sapa” ug ang “mga kanal sa tubig” maoy nagpahinabo nga molambo ang mga alagad sa Diyos sama sa labong nga mga alamo.

Bisan diha sa mga uma karon, adunay mga kanal o mga sapa-sapa nga naggikan sa dakong tinubdan sa tubig, sama sa deep well, suba, linaw, o dam. Kasagaran, kini gigamit sa irigasyon sa mga uma ug asyenda o mga plantasyon. Usahay ang nga kanal sa tubig gigamit usab diha sa mga prutasan. Adunay mga kahimtang diin ang pikas tampi sa sapa maoy kakahoyan ug ang pikas tampi maoy kaumahan. Ang sapa magsuplayg tubig niana, ug lagmit magsilbi usab nga utlanan sa maong mga propiedad.

Unsa ka himsog ang mga kahoy nga natanom diha sa daplin sa kasapaan? Ang Salmo 1:3 naghisgot bahin sa usa ka kahoy nga “mobunga sa iyang panahon.” Sa mga kayutaan nga gihisgotan sa Bibliya, adunay mga kahoyng igos, granada, mansanas, palmang datiles, ug mga kahoyng olibo. Kining mga kahoya dili kaayo motaas, gawas sa kahoyng igos nga moabot ug nuybe metros nga mosanggaka ang mga sanga. Apan, kining mga kahoya molabong, mohimsog, ug mobungag daghan sa hustong panahon.

Sa karaang panahon, ang dagkong kahoyng alamo motubo diha sa tampi sa mga suba ug sapa sa Sirya ug Palestina. Kasagaran, kon hisgotan sa Bibliya ang alamo, kini nalangkit sa tubig o sa mga “bul-oganang walog.” (Levitico 23:40) Ang mga kahoyng willow, nga pamilya ra sa mga alamo, makita usab diha sa mga lugar nga abunda ug tubig. (Ezequiel 17:5) Kining dagko, labong nga mga kahoy naghulagway gayod sa ideya nga gustong ipaambit sa salmista ug ni Jeremias: Kadtong motuman sa balaod sa Diyos ug mosalig kaniya sa bug-os makabaton ug suod nga relasyon kaniya, ‘ug ang tanan nga ilang buhaton magmalamposon.’ Gusto usab natong molampos, dili ba?

Kalipayi ang Balaod ni Jehova

Naningkamot gayod ang mga tawo karon nga magmalamposon sa daghang paagi. Puliki kaayo sila sa pagpangagpas ug kadungganan ug daghang bahandi, nga sagad mosangpot lang sa kapakyasan. Nan, unsay makahatag ug tinuod nga katagbawan ug dumalayong kalipay? Ang mga pulong ni Jesus sa Wali sa Bukid nagtubag niana. Siya miingon: “Malipayon kadtong mahunahunaon sa ilang espirituwal nga panginahanglan, sanglit ila ang gingharian sa mga langit.” (Mateo 5:3) Busa, ang tinuod nga kalipay magagikan, dili sa pagbaton ug daghang materyal nga mga butang, kondili sa pagbaton ug maayong relasyon sa Diyos. Kon atong himoon kana, mahisama gayod kita sa labong nga mga kahoy nga nagapamunga sa hustong panahon. Apan, unsaon nato pagbaton ug maayong relasyon sa Diyos?

Sumala sa salmista, una kinahanglang atong likayan ang pipila ka mga butang. Naghisgot siya sa “tambag sa mga daotan,” “dalan sa mga makasasala,” ug “lingkoranan sa mga mabiaybiayon.” Aron magmalipayon, kinahanglang atong likayan kadtong mga mabiaybiayon o bisan kadtong nagsalikway sa balaod sa Diyos.

Ikaduha, kinahanglang atong kalipayan ang balaod ni Jehova. Kon atong gikalipayan ang usa ka butang o buluhaton, mangita gayod kitag paagi nga mahimo kana, dili ba? Busa ang pagkalipay sa balaod sa Diyos nagpasabot nga atong pabilhan pag-ayo ang Pulong sa Diyos, ug tinguhaon nga mokat-on aron mas masabtan pa kini.

Ikatulo, kinahanglang atong basahon kini “sa hinayng tingog sa adlaw ug gabii.” Kana nagpasabot sa regular nga pagbasa sa Bibliya ug sa pagpamalandong sa atong gibasa. Angay natong lantawon ang Pulong sa Diyos sama sa paglantaw niini sa salmista, sa dihang siya miingon: “Gihigugma ko gayod ang imong balaod! Kini ang akong gipalandong sa tibuok nga adlaw.”—Salmo 119:97.

Oo, kon magbaton kitag tukmang kahibalo bahin kang Jehova nga Diyos ug bug-os nga mosalig kaniya ug sa iyang mga saad, molig-on gayod ang atong relasyon kaniya. Nianang bahina, mahisama kita sa malipayong tawo nga gihulagway sa salmista—“ang tanan nga ginabuhat niya magmalamposon.”