Ang Diyos ba Nakaila Gayod Kanimo?

“Oh Jehova, . . . ikaw nakahibalo sa tanan kong mga dalan.”​—SALMO 139:1, 3.

1. Unsa ka kaylap ang pagbati nga ‘ang uban wala makasabot’ sa mga kabalaka, mga suliran, ug mga pagpit-os nga atong ginaatubang?

MAY usa ba nga nakasabot gayod sa mga kabalaka, mga pagpit-os, ug mga suliran nga imong giatubang? Sa tibuok kalibotan adunay minilyong tawo, batan-on ug tigulang, nga walay pamilya o mga paryente nga nahangawa kon unsay mahitabo kanila. Bisan sulod sa pamilya, daghang asawa​—oo, ug mga bana usab—​ang mibati nga ang ilang kapikas wala gayod makasabot sa mga pagpit-os nga nagpabug-at kanila. Usahay, sa kawalay-paglaom, sila moreklamo: “Apan wala ka makasabot!” Ug daghang batan-on ang nakahinapos nga walay makasabot kanila. Apan, taliwala niadtong nangandoy sa dugang pagsabot gikan sa uban maoy pipila kang kansang mga kinabuhi sa ulahi makahuloganon gayod. Sa unsang paagi kini nahimo?

2. Unsay makapaarang sa mga magsisimba ni Jehova nga makabaton ug matagbawon gayod nga mga kinabuhi?

² Tungod kini kay, walay sapayan kon ang isigkatawo nakasabot sa bug-os sa ilang mga pagbati o wala, sila masaligon nga ang Diyos nakasabot kon unsay ilang nasinati ug nga, ingong iyang mga alagad, dili kinahanglan nga mag-inusara sila sa pag-atubang sa ilang mga suliran. (Salmo 46:1) Dugang pa, ang Pulong sa Diyos uban sa tabang sa may-salabotang Kristohanong mga ansiano nakapaarang kanila sa pagkakita ug saylo pa sa ilang personal nga mga suliran. Ang Kasulatan nagtabang kanila sa pag-apresyar nga ang ilang matinumanong pag-alagad maoy bililhon sa mga mata sa Diyos ug nga adunay lig-ong ugma-damlag alang niadtong nagbutang sa ilang paglaom kaniya ug sa mga tagana nga iyang gihimo pinaagi ni Jesu-Kristo.​—Proverbio 27:11; 2 Corinto 4:17, 18.

3, 4. (a) Sa unsang paagi ang apresasyon sa kamatuoran nga si “Jehova mao ang Diyos” ug nga siya ang “nagbuhat kanato” makatabang kanato sa pagkalipay diha sa pag-alagad kaniya? (b) Nganong sa bug-os makasalig kita sa mahigugmaong pag-atiman ni Jehova?

³ Tingali sinati ka sa Salmo 100:2, nga nagaingon: “Alagara si Jehova uban ang kasadya. Dumuol sa iyang atubangan uban ang pag-awit.” Unsa ka daghan ang tinuod nga nagsimba kang Jehova sa maong paagi? Ang maayong mga katarongan sa paghimo niana gihatag sa bersikulo 3, nga nagpahinumdom kanato: “Hibaloi nga si Jehova mao ang Diyos. Siya mao ang nagbuhat kanato, ug dili kita sa atong kaugalingon. Kita mao ang iyang katawhan ug ang mga karnero sa iyang sibsibanan.” Sa Hebreohanong teksto, gihisgotan siya didto ingong ’Elo·himʹ, sa ingon nagpaila sa iyang pagkadako diha sa pagkahalangdon, dignidad, ug pagkalabaw. Siya mao lamang ang matuod nga Diyos. (Deuteronomio 4:39; 7:9; Juan 17:3) Ang iyang mga alagad nasayod sa iyang pagka-Diyos, dili lamang ingong usa ka kamatuoran nga gitudlo kanila kondili ingong usa ka butang nga ilang nasinati ug nga niana ilang gipamatud-an pinaagi sa pagsugot, pagsalig, ug debosyon.​—1 Cronicas 28:9; Roma 1:20.

⁴ Tungod kay si Jehova mao ang buhi nga Diyos, nga makakita bisan sa atong kasingkasing, walay nalilong gikan sa iyang panan-aw. Siya bug-os nga nasayod kon unsay nagakahitabo sa atong mga kinabuhi. Nasabtan niya kon unsay hinungdan sa mga suliran nga atong giatubang ingon man ang mental ug emosyonal nga kasamok nga mahimong mosangpot gikan niini. Ingong Maglalalang, labi pa siyang nakaila kanato kay sa atong pagkaila sa atong kaugalingon. Nahibalo usab siya kon sa unsang paagi kita matabangan aron makasagubang sa atong kahimtang ug kon sa unsang paagi motagana sa dumalayong kahupayan. Sa mahigugmaong paagi siya motabang kanato​—sama sa usa ka magbalantay nga mokugos sa usa ka kordero sa iyang sabakan—​samtang kita mosalig kaniya sa tibuok natong kasingkasing. (Proverbio 3:5, 6; Isaias 40:10, 11) Ang pagtuon sa Salmo 139 makatabang ug dako sa pagpalig-on nianang maong pagsalig.

Ang Usa nga Nakakita sa Tanan Natong Dalan

5. Unsay buot ipasabot nga si Jehova ‘nagasusi sa bug-os’ kanato, ug nganong kana tilinguhaon?

⁵ Uban sa dulot nga apresasyon, ang salmistang si David misulat: “Oh Jehova, ikaw nagsusi kanako, ug ikaw nakaila kanako.” (Salmo 139:1) Si David masaligon nga ang kahibalo ni Jehova mahitungod kaniya dili kay sa panggawas lamang. Ang Diyos wala motan-aw kang David ingon sa pagtan-aw sa mga tawo, nga motagad lamang sa iyang pisikal nga pamarog, iyang katakos sa pagpanulti, o iyang kahanas sa pagkaskas sa alpa. (1 Samuel 16:7, 18) Si Jehova “misusi sa bug-os” sa kinasulorang pagkatawo ni David ug naghimo niana tungod sa mahigugmaong kabalaka sa iyang espirituwal nga kaayohan. Kon ikaw usa sa debotadong mga alagad ni Jehova, siya nakaila pag-ayo kanimo ingon sa iyang pagkaila kang David. Wala ba kana mag-aghat kanimo nga mobati ug pagkamapasalamaton ug kahingangha?

6. Sa unsang paagi gipakita sa Salmo 139:2, 3 nga si Jehova nahibalo sa tanang butang nga atong ginahimo, bisan sa atong mga hunahuna?

⁶ Ang tanang kalihokan ni David naladlad sa panan-aw ni Jehova, ug si David nasayod niana. “Ikaw mismo nahibalo sa akong paglingkod ug sa akong pagtindog,” misulat ang salmista. “Ikaw nagtagad sa akong hunahuna bisan sa halayo. Ikaw nagsukod sa akong mga panaw ug sa akong paghigda, ug ikaw sinati sa tanan kong mga dalan.” (Salmo 139:2, 3) Ang kamatuoran nga si Jehova atua sa mga langit, nga halayo gikan sa yuta, wala makapugong kaniya sa pagkahibalo kon unsay gihimo ni David o kon unsay iyang gihunahuna. Iyang “gisukod,” o gisusi pag-ayo, ang mga kalihokan ni David, sa adlaw ug sa gabii, aron mahibaloan ang ilang matang.

7. (a) Pinasikad sa mga panghitabo sa kinabuhi ni David, komentohi ang pila ka butang sa atong mga kinabuhi nga nasayran sa Diyos. (b) Sa unsang paagi ang pagkaamgo niini makaapektar kanato?

⁷ Sa dihang ang gugma alang sa Diyos ug pagsalig sa Iyang gahom sa pagluwas nakapalihok kang David ingong usa ka batan-on sa pagboluntaryo sa pagpakig-away sa higanteng Filistehanon nga si Goliath, si Jehova nahibalo niana. (1 Samuel 17:32-37, 45-47) Sa ulahi, sa dihang ang kasuko sa mga tawo nakapasakit sa hilabihan sa kasingkasing ni David, sa dihang ang pagpit-os hilabihan kaayo nga naghilak siya sa tibuok gabii, siya nahupay sa pagkahibalo nga si Jehova nakadungog sa iyang pangaliyupo. (Salmo 6:6, 9; 55:2-5, 22) Sa susama, sa dihang ang kasingkasing nga puno sa pagpasalamat nagtukmod kang David sa pagpamalandong mahitungod kang Jehova sa panahon nga dili makatulog sa gabii, si Jehova nasayod pag-ayo niana. (Salmo 63:6; itandi ang Filipos 4:8, 9.) Usa ka gabii sa dihang si David nagtan-aw sa naligo nga asawa sa usa ka silingan, si Jehova nahibalo usab niana, ug iyang nakita kon unsay nahitabo sa dihang si David, bisan sa mubong panahon, mitugot sa makasasalang kailibgon sa pagpalagpot sa Diyos gikan sa iyang mga hunahuna. (2 Samuel 11:2-4) Sa ulahi, sa dihang ang manalagna nga si Nathan gipadala aron sukmatan si David sa gidak-on sa iyang sala, si Jehova wala lang makadungog sa mga pulong mga migula gikan sa baba ni David apan nakasabot usab sa mahinulsolong kasingkasing nga maoy tinubdan niana. (2 Samuel 12:1-14; Salmo 51:1, 17) Dili ba kana angayng magpahunahuna kanato nga ugdang kon asa kita moadto, unsay atong buhaton, ug kon unsay anaa sa atong kasingkasing?

8. (a) Sa unsang paagi ang ‘mga pulong sa atong dila’ nagaimpluwenisya sa atong baroganan sa atubangan sa Diyos? (b) Sa unsang paagi mabuntog ang mga kahuyangan sa paggamit sa dila? (Mateo 15:18; Lucas 6:45)

⁸ Sanglit ang Diyos nahibalo man sa tanang butang nga atong ginahimo, dili kita matingala nga siya nahibalo kon sa unsang paagi nato gigamit ang usa ka bahin sa atong lawas bisan sama ka gamay sa dila. Si Haring David nakaamgo niini, ug siya misulat: “Kay walay mausa ka pulong sa akong dila, apan, tan-awa! Oh Jehova, ang tanan nahibaloan mo na.” (Salmo 139:4) Si David nasayod gayod nga kadtong pagaabiabihon ingong mga bisita sa tolda ni Jehova maoy mga tawo nga wala magpasipala sa uban ug kadtong midumili sa paggamit sa ilang dila sa pagpalakaw sa maundanong mga tipik sa tsismis nga makapakaulaw sa usa ka suod nga higala. Kadtong giuyonan ni Jehova mao ang mga tawo nga nagsultig kamatuoran bisan diha sa ilang mga kasingkasing. (Salmo 15:1-3; Proverbio 6:16-19) Walay mausa kanato ang makaarang sa pagpugong sa hingpit sa atong dila, apan si David sa pagkamaluyahon wala mohinapos nga wala na siyay mahimo sa pagpauswag sa iyang kahimtang. Siya migugol ug daghang panahon sa pagkomposo ug pag-awit ug mga salmo sa pagdayeg kang Jehova. Usab prangka niyang giila ang iyang panginahanglan sa tabang ug miampo alang niana ngadto sa Diyos. (Salmo 19:12-14) Ang ato bang paggamit sa dila nagkinahanglan usab ug mainampoong pagtagad?

9. (a) Unsay gipaila sa kahubitan sa Salmo 139:5 kon bahin sa kabug-os sa pagkasayod sa Diyos sa atong kahimtang? (b) Bahin sa unsa nga kini nagahimo kanato nga masaligon?

⁹ Si Jehova wala magtan-aw kanato o sa atong kahimtang gikan lamang sa usa ka limitadong kiliran. Siya may bug-os nga hulagway, gikan sa tanang kiliran. Nga migamit sa usa ka gilikosang siyudad ingong pananglitan, si David misulat: “Sa luyo ug sa atubangan, gilikosan mo ako.” Sa kaso ni David, ang Diyos dili usa ka nagalikos nga kaaway; hinunoa, siya usa ka mabinantayong tigpanalipod. “Kanako gitapion mo ang imong kamot,” dugang ni David, sa ingon nagpaila sa pagkontrolar ug pagpanalipod nga gihimo sa Diyos alang sa walay-kataposang kaayohan niadtong nahigugma kaniya. “Alang kanako katingalahan kining kinaadmana. Kini hataas kaayo nga dili nako kana makab-ot,” miangkon si David. (Salmo 139:5, 6) Pagkahingpit, pagkabug-os, sa kahibalo sa Diyos mahitungod sa iyang mga alagad, nga kita dili makasabot niana sa bug-os. Apan igo ang atong kahibalo aron makasalig nga si Jehova sa pagkatinuod nakasabot kanato ug nga ang tabang nga iyang ginahatag mao ang labing maayo.​—Isaias 48:17, 18.

Bisan Asa Kita, ang Diyos Makatabang Kanato

10. Unsang makapadasig nga kamatuoran ang gipahayag sa tataw nga kahubitan sa Salmo 139:7-12?

¹⁰ Sa paglantaw sa mahigugmaong pag-amoma ni Jehova gikan sa laing baroganan, ang salmista nagpadayon: “Asa ba ako paingon gikan sa imong espiritu, ug asa ba ako mokalagiw gikan sa imong atubangan?” Wala siya maninguha sa pagsulay nga mokalagiw gikan kang Jehova; hinunoa, siya nasayod nga bisan asa siya, si Jehova masayod ug, pinaagi sa balaang espiritu, makatabang kaniya. “Kon mosaka ako ngadto sa langit,” padayon niya, “didto atua ikaw; ug kon bukharon ko ang akong higdaanan sa Sheol, tan-awa! didto atua ikaw. Kong itaod ko ang mga pako sa kaadlawon, aron ako makapuyo sa labing kinatumyang dapit sa dagat, didto, usab, ang imong kamot magaagak kanako ug ang imong tuong kamot magagunit kanako. Ug kon moingon ako: ‘Sa pagkamatuod, ang kangitngit mosikop gilayon kanako!’ ug ang kangitngit mahimong kahayag nga nagalibot kanako. Bisan ang kangitngit dili ngitngit alang kanimo, kondili ang kagabhion mohayag ingon sa adlaw; kanimo ang kangitngit ug ang kahayag managsama lamang.” (Salmo 139:7-12) Wala kitay maadtoan, walay kahimtang nga atong masugamakan, nga magpahilayo nato sa panan-aw ni Jehova o dili maabot sa iyang espiritu sa pagtabang kanato.

11, 12. (a) Bisan tuod si Jonas nahikalimot niana sa usa ka higayon, sa unsang paagi ang katakos ni Jehova sa pagkakita ug pagtabang gipasundayag sa kaso ni Jonas? (b) Sa unsang paagi ang kasinatian ni Jonas makahatag ug kaayohan kanato?

¹¹ Sa usa ka higayon ang manalagnang si Jonas nahikalimot niana. Si Jehova nagsugo kaniya sa pagwali ngadto sa katawhan sa Nineve. Tungod sa usa ka katarongan mibati siya nga dili niya matuman kanang sugoa. Tingali tungod sa mabangis nga kinaiya sa mga Asiryanhon, ang paghunahuna nga moalagad sa Nineve nakapakulba kang Jonas. Busa misulay siya sa pagtago. Sa dunggoanan sa Jope, misakay siyag usa ka barko padulong sa Tarsis (gilangkit sa kadaghanan sa Espanya, nga kapin sa 3,500 kilometros sa kasadpan sa Nineve). Bisan pa niana, si Jehova nakakita kaniya nga misakay sa barko ug natulog sa luwang sa barko. Ang Diyos nahibalo usab kon diin si Jonas sa dihang gitambog siya sa ulahi sa dagat, ug si Jehova nakadungog kang Jonas didto sa tiyan sa dakong isda sa dihang misaad siya nga iyang tumanon ang iyang mga panaad. Kay gihatod ngadto sa mamala nga yuta, si Jonas sa makausa pa gihatagan ug kahigayonan sa pagtuman sa iyang asaynment.​—Jonas 1:3, 17; 2:1​–3:4.

¹² Pagkamaayo unta kon sukad sa sinugdan si Jonas misalig sa espiritu ni Jehova nga motabang kaniya sa pagtuman sa iyang asaynment! Hinuon, sa ulahi mapainubsanong gitala ni Jonas ang iyang kasinatian, ug kanang maong talaan nakatabang sa daghan sukad niadto sa pagpasundayag sa pagsalig kang Jehova nga daw lisod mabatonan ni Jonas.​—Roma 15:4.

13. (a) Unsang mga asaynment ang matinumanong gituman ni Elias una pa siya mokalagiw gikan kang Reyna Jezabel? (b) Sa unsang paagi gitabangan ni Jehova si Elias bisan sa dihang siya naningkamot sa pagtago sa gawas sa teritoryo sa Israel?

¹³ Ang kasinatian ni Elias maoy nalahi. Matinumanon niyang gipahayag ang hukom ni Jehova nga ang Israel magaantos ug hulaw ingong silot sa ilang mga sala. (1 Hari 16:30-33; 17:1) Maisogon niyang gituboy ang matuod nga pagsimba panahon sa panag-indig tali kang Jehova ug kang Baal sa Bukid Carmel. Ug iya kining gitiwas pinaagi sa pagpatay sa 450 ka manalagna ni Baal sa sapa sa Cison. Apan sa dihang si Reyna Jezabel sa kasuko nanumpa nga patyon si Elias, si Elias mikalagiw gikan sa nasod. (1 Hari 18:18-40; 19:1-4) Didto ba si Jehova sa pagtabang kaniya sa maong lisod nga panahon? Oo, sa pagkatinuod. Kon si Elias mitungas pa sa habog nga bukid, nga daw ngadto sa langit; kon siya nagtago pa sa usa ka langob sa ilalom sa yuta, nga daw diha sa Sheol; kon mikalagiw pa siya ngadto sa usa ka hilit nga isla nga daw sama ka tulin sa banagbanag sa kabuntagon nga mitaklap sa yuta​—ang kamot ni Jehova atua didto aron sa pagpalig-on ug pag-agak kaniya. (Itandi ang Roma 8:38, 39.) Ug si Jehova sa pagkatinuod naglig-on kang Elias dili lamang pinaagi sa pagkaon alang sa iyang panaw apan usab pinaagi sa gamhanang mga pagpasundayag sa Iyang aktibong gahom. Busa kay nalig-on, si Elias mipadayon sa iyang sunod nga asaynment sa pagpanagna.​—1 Hari 19:5-18.

14. (a) Nganong sayop ang maghinapos nga ang Diyos anaa sa tanang dapit? (b) Ubos sa unsang mga kahimtang nga si Jehova sa kamahigugmaon nagpaluyo sa iyang mga alagad sa modernong mga panahon? (c) Sa unsang paagi nga bisan pa kon atua kita sa Sheol, ang Diyos atua usab didto?

¹⁴ Ang matagnaong mga pulong sa Salmo 139:7-12 wala magkahulogan nga ang Diyos anaa bisan diin, nga siya sa personal presente sa tanang dapit sa tanang panahon. Ang Kasulatan tin-aw nga nagpakita nga dili ingon niana. (Deuteronomio 26:15; Hebreohanon 9:24) Apan, ang iyang mga alagad dili gayod halayo nga dili niya maabot. Kana maoy tinuod mahitungod niadtong kansang teokratikanhong mga asaynment nagdala kanila ngadto sa halayong mga dapit. Kini maoy tinuod sa maunongong mga Saksi sa mga kampo konsentrasyon sa Nazi sa panahon sa Gubat sa Kalibotan II, ug kini tinuod sa mga misyonaryo nga gibilanggo nga nag-inusara sa Tsina sulod sa ulahing bahin sa katuigang 1950 ug sa sayong bahin sa katuigang 1960. Kini maoy tinuod niadtong atong igsoong mga lalaki ug mga babaye sa usa ka nasod sa Sentral Aprika nga sa makadaghan kinahanglang mokalagiw gikan sa ilang mga balangay, gani gikan sa nasod. Kon gikinahanglan, si Jehova makaabot didto mismo sa Sheol, ang komon nga lubnganan, ug pinaagi sa pagpamanhaw buhion pag-usab ang mga matinumanon.​—Job 14:13-15; Lucas 20:37, 38.

Ang Usa nga Nakasabot Gayod Kanato

15. (a) Unsa ka sayo nga si Jehova nakaobserbar sa atong pagtubo? (b) Sa unsang paagi ang gidak-on sa kahibalo sa Diyos bahin kanato gipaila sa paghisgot sa salmista sa mga amimislon?

¹⁵ Ubos sa pagdasig, ang salmista nagdala sa pagtagad ngadto sa kamatuoran nga ang Diyos nahibalo na kanato sa wala pa kita mahimugso, nga nagaingon: “Kay ikaw ang nag-umol sa akong mga amimislon; sa tagoangkan sa akong inahan gitabonan mo ako. Dayegon ko ikaw tungod kay makalilisang ug kahibulongan uyamot ang pagbuhat kanako. Kahibulongan ang imong mga buhat, kini nahibaloan kaayo sa akong kalag.” (Salmo 139:13, 14) Ang paghiusa sa mga gene sa atong amahan ug atong inahan sa panahon sa pagsamkon nagapatungha sa sumbanan nga sa dakong sukod nagaimpluwensiya sa atong pisikal ug mental nga katakos. Ang Diyos nakasabot nianang maong katakos. Niining salmoha ang linaing paghisgot sa mga amimislon gihimo, nga sagad gigamit diha sa Kasulatan sa paghawas sa kinahiladmang bahin sa personalidad.a (Salmo 7:9; Jeremias 17:10) Nasayran ni Jehova kining maong mga detalye mahitungod kanato sukad pa sa wala kita matawo. Siya usab ang usa kinsa tungod sa mahigugmaong kahangawa nagdesinyo sa tawhanong lawas aron nga ang pertilisadong selula sa sulod sa tagoangkan sa inahan makapatungha ug nagasalipod nga tagoanan sa ‘pagsalipod’ sa nagatubong binhi ug sa pagpanalipod niana samtang kana nagatubo.

16. (a) Sa unsang paagi gipasiugda sa Salmo 139:15, 16 ang malagbasong gahom sa panan-aw sa Diyos? (b) Nganong angay kining magdasig kanato?

¹⁶ Unya, sa pagpasiugda sa malagbasong gahom sa panan-aw sa Diyos, ang salmista midugang: “Ang akong mga bukog wala hisalipdi gikan kanimo sa diha nga sa tago gibuhat ako, sa dihang gibuhat ako didto sa mga dapit nga labing ubos sa yuta [lagmit balaknong pagtumong sa tagoangkan sa iyang inahan apan uban ang pagpasabot sa pagkalalang ni Adan gikan sa abog]. Ang imong mga mata nakakita sa binhi pa ako nga nagtubo, ug diha sa imong basahon nahasulat na ang tanang bahin niini, bahin sa mga adlaw sa dihang sila [mga bahin sa lawas] giporma ug wala pay usa [klaro nga bahin sa lawas] kanila.” (Salmo 139:15, 16) Walay duhaduha mahitungod niini​—kaha kon ang isigkatawo nakasabot kanato o wala, si Jehova nakasabot. Sa unsang paagi kini moapektar kanato?

17. Sa dihang atong tan-awon ang mga gibuhat sa Diyos ingong kahibulongan, gitukmod kita niini sa paghimo sa unsa?

¹⁷ Ang magsusulat sa Salmo 139 miila nga ang mga gihimo sa Diyos nga iyang gihisgotan sa iyang mga sinulat maoy kahibulongan. Ikaw ba mibati usab nianang paagiha? Ang usa ka butang nga kahibulongan makapahinabo sa usa ka tawo sa paghunahuna ug halalom o sa pagpasundayag sa bug-os nga pagtagad. Malagmit misanong ka nianang paagiha sa mga buhat ni Jehova sa pisikal nga kalalangan. (Itandi ang Salmo 8:3, 4, 9.) Ikaw ba nagahatag usab nianang matanga sa panghunahuna bahin sa iyang nahimo sa pagtukod sa Mesiyanikong Gingharian, bahin sa iyang gihimo nga ipahinabo ang pagwali sa maayong balita sa tibuok yuta, ug sa paagi nga ang iyang Pulong nagausab sa mga personalidad sa mga tawo?​—Itandi ang 1 Pedro 1:10-12.

18. Kon atong makaplagan nga ang buhat sa Diyos maoy makalilisang, sa unsang paagi kini moapektar kanato?

¹⁸ Nasinati ka ba usab nga ang pagpamalandong sa buhat sa Diyos maoy makalilisang, nga kini nakapukaw diha kanimo sa usa ka maayong kahadlok, usa nga kusganong makapalihok, usa nga may dakong epekto sa imong personalidad ug sa paagi nga imong gigamit ang imong kinabuhi? (Itandi ang Salmo 66:5.) Kon mao, ang imong kasingkasing magtukmod kanimo sa pagpasidungog kang Jehova, sa pagdayeg kaniya, sa pagpangitag mga kahigayonan aron suginlan ang uban mahitungod sa iyang katuyoan ug sa kahibulongang mga butang nga iyang gitagana alang niadtong nahigugma kaniya.​—Salmo 145:1-3.

[Footnote]

Unsay Imong Ikakomento?

◻ Sa unsang paagi ang atong pagkahibalo nga si “Jehova mao ang Diyos” makatabang kanato sa pag-alagad kaniya nga malipayon?

◻ Sa unsang paagi ang atong mga kinabuhi maimpluwensiyahan sa kahimtang nga ang Diyos nahibalo sa tanang butang nga atong ginahimo?

◻ Nganong ang kamatuoran nga kita dili gayod mahilayo sa panan-aw sa Diyos makapadasig?

◻ Nganong ang Diyos makasabot kanato sa mga paagi nga walay tawo ang makahimo niana?

◻ Nganong ang usa ka pagtuon sama niini nagatukmod kanato sa pagpasidungog kang Jehova?