Pasidunggi si Jehova Pinaagi sa Pagpasundayag ug Dignidad

“Ang buhat [ni Jehova] maoy dignidad ug kahalangdon.”​—SAL. 111:3.

1, 2. (a) Unsay kahulogan sa “dignidad”? (b) Unsang mga pangutana ang hisgotan niining artikuloha?

ANG Bibliya naghisgot nga ang Diyos ‘gibestihan ug dignidad.’ (Sal. 104:1) Ang pagpasundayag ug dignidad mahimong ilangkit usahay sa mga tawo sa maayong pagpamesti. Pananglitan, gitinguha ni apostol Pablo nga ang Kristohanong mga babaye “magdayandayan sa ilang kaugalingon sa mahapsay nga sinina, uban ang pagkamakasaranganon ug maayong panghunahuna, dili pinaagi sa mga estilo sa pagsalapid sa buhok ug sa bulawan o sa mga perlas o sa mahalon kaayong sapot.” (1 Tim. 2:9) Apan dili lang kana ang nalangkit sa dalayegong panggawi nga magtuboy sa “dignidad ug kahalangdon” ni Jehova.​—Sal. 111:3.

² Sa Bibliya, ang Hebreohanong pulong alang sa “dignidad” mahimong hubaron usab nga “kahalangdon,” “kahimayaan,” ug “kadungganan.” Sumala sa usa ka diksiyonaryo, ang “dignidad” mao “ang hiyas o kahimtang sa pagkamay-katakos, pagkadungganon, o pagkatinamod.” Ug walay laing takos sa labaw nga kadungganan ug pagtamod kay kang Jehova. Busa isip iyang nagpahinungod nga mga alagad, kinahanglang ligdong ang atong sinultihan ug panggawi. Apan, nganong mahimong ikapasundayag sa mga tawo ang dignidad? Sa unsang paagi si Jehova nagpadayag sa dignidad ug pagkahalangdon? Unsay epekto sa dignidad sa Diyos diha kanato? Unsay ikatudlo ni Jesu-Kristo kanato bahin sa pagpasundayag niining hiyasa? Ug sa unsang paagi ikapasundayag nato ang diyosnong dignidad?

Kon Nganong Makapasundayag Kita ug Dignidad

3, 4. (a) Sa unsang paagi balosan nato ang dignidad nga gihatag kanato? (b) Kinsay matagnaong gipunting sa Salmo 8:5-9? (Tan-awa ang nota sa ubos.) (c) Kinsay gihatagan ni Jehova ug dignidad sa karaang panahon?

³ Kay gibuhat man ang mga tawo sumala sa larawan sa Diyos, makapasundayag sila ug dignidad. Gipasidunggan ni Jehova ang unang tawo pinaagi sa pagtudlo kaniyang tig-atiman sa yuta. (Gen. 1:26, 27) Bisan sa pagkapukan sa tawo gikan sa kahingpitan, gipahayag pag-usab ni Jehova ang responsabilidad sa tawo maylabot sa yuta. Busa, ang tawo “gipurongpurongan” gihapon sa Diyos ug dignidad. (Basaha ang Salmo 8:5-9)a Tungod sa gihatag kanato nga dignidad, isip balos niana, kinahanglang dayegon nato ang halangdong ngalan ni Jehova nga may pagtahod ug dignidad.

⁴ Si Jehova ilabinang naghatag ug dignidad niadtong nag-alagad kaniya. Gipasidunggan sa Diyos si Abel pinaagi sa pagdawat sa iyang halad, apan iyang gisalikway ang halad ni Cain. (Gen. 4:4, 5) Gisugo si Moises nga ‘hatagan ug bahin sa iyang dignidad’ si Josue, ang mipuli kaniyang pangulo sa mga Israelinhon. (Num. 27:20) Ang Bibliya nag-ingon bahin sa anak ni David nga si Solomon: “Si Jehova nagpadayon sa pagpadako kang Solomon sa hilabihan gayod atubangan sa mga mata sa tibuok Israel ug sa paghatag kaniya sa maong harianong dignidad nga wala mahupti ni bisan kinsa nga hari una kaniya sa Israel.” (1 Cron. 29:25) Mohatag ang Diyos ug talagsaong dignidad sa binanhaw nga dinihogang mga Kristohanon, nga matinumanong nagpahayag sa “himaya sa kahalangdon sa iyang pagkahari.” (Sal. 145:11-13) Tungod sa pagbayaw kang Jehova sa ingon nga paagi, ang nagkadaghang “ubang mga karnero” ni Jesus adunay bulahan ug dungganong papel usab.​—Juan 10:16.

Gipadayag ang Dignidad ug Kahalangdon ni Jehova

 5. Unsa ka madungganon si Jehova?

⁵ Sa usa ka awit diin gitandi ang pagkadako sa Diyos ug ang pagkagamay sa tawo, ang salmistang si David miawit: “Oh Jehova nga among Ginoo, pagkahalangdon sa imong ngalan sa tibuok nga yuta, ikaw kansang dignidad ginasaysay sa ibabaw sa kalangitan!” (Sal. 8:1) Sukad sa panahon nga wala pa malalang “ang mga langit ug ang yuta” hangtod saylo pa sa pagkatuman sa katuyoan sa Diyos nga maparaiso ang yuta ug mahimong hingpit ang tawhanong pamilya​—gikan sa walay-kahangtoran hangtod sa walay-kahangtoran—​si Jehova nga Diyos mao ang labing halangdon ug madungganong Persona sa uniberso.​—Gen. 1:1; 1 Cor. 15:24-28; Pin. 21:1-5.

 6. Nganong ang salmista nag-ingon nga si Jehova gibukotan ug dignidad?

⁶ Natandog gayod ang mahadlokon-sa-Diyos nga salmista samtang nagsud-ong sa matahom nga kalangitan, nga napuno ug samag-diamante nga mga bituon! Kay nahingangha kon giunsa ‘pagbuklad [sa Diyos] ang kalangitan sama sa usa ka tabil sa tolda,’ gihulagway sa salmista si Jehova ingong gibukotan ug dignidad tungod sa Iyang katingalahang katakos sa paglalang. (Basaha ang Salmo 104:1, 2.) Dayag diha sa iyang makita nga kalalangan ang dignidad ug kahalangdon sa di-makita, labing-gamhanang Maglalalang.

7, 8. Unsay ebidensiya bahin sa dignidad ug kahalangdon ni Jehova ang atong makita diha sa kalangitan?

⁷ Pananglitan, tagda ang Milky Way nga galaksiya. Niining dakong lawod sa mga bituon, planeta, ug solar nga sistema, ang planetang Yuta daw way bili, nga sama rag usa ka lugas nga balas diha sa baybayon. Sa pagkatinuod, kining galaksiyaha lamang may kapig 100 ka bilyong bituon! Kon makaihap kag usa ka bituon kada segundo nga way-hunong sulod sa 24 ka oras sa usa ka adlaw, dangtan kag kapin sa 3,000 ka tuig aron maihap ang 100 ka bilyon.

⁸ Kon kining Milky Way nga galaksiya lamang may 100 ka bilyong bituon, komosta man ang ubang bahin sa uniberso? Gibanabana sa mga astronomo nga ang Milky Way maoy usa ra sa tingali 50 ngadto sa 125 ka bilyong galaksiya. Pilay bituon sa tibuok uniberso? Ang tubag makapakutaw gayod sa atong utok. Apan si Jehova “nagaihap sa gidaghanon sa mga bituon; silang tanan gitawag niya sa ilang ngalan.” (Sal. 147:4) Kay imo nang nasabtan nga si Jehova gibestihan sa dakong dignidad ug kahalangdon, dili ka ba matukmod sa pagbayaw sa iyang dakong ngalan?

9, 10. Sa unsang paagi ang paglutog tinapay nagpadako sa kaalam sa atong Maglalalang?

⁹ Atong biyaan ang halangdong kalangitan ug hisgotan karon ang ordinaryong tinapay. Si Jehova dili lang “ang Magbubuhat sa langit ug yuta” kondili siya usab “ang Usa nga nagahatag ug tinapay sa mga gigutom.” (Sal. 146:6, 7) Ang “dignidad ug kahalangdon” sa Diyos dayag diha sa dagko niyang mga kalalangan, lakip ang mga tanom nga gikan niana maluto ang tinapay. (Basaha ang Salmo 111:1-5.) Gitudloan ni Jesus ang iyang mga sumusunod sa pag-ampo: “Ihatag kanamo karong adlawa ang among tinapay alang niining adlawa.” (Mat. 6:11) Ang tinapay maoy kasagarang pagkaon sa daghang katawhan sa kakaraanan, apil ang mga Israelinhon. Bisag giisip ang tinapay nga usa ka yanong pagkaon, dili gayod yano ang kemikal nga proseso nga maghimo sa pipila ka sangkap nga lamiang tinapay.

¹⁰ Sa panahong gisulat ang Bibliya, ang mga Israelinhon migamit ug harina sa trigo o sebada ug tubig sa paglutog tinapay. Ang lebadura o yeast gigamit usahay sa paglutog tinapay. Kining yano nga mga substansiya magsagol aron maporma ang daghan kaayong kemikal nga nalangkit sa usag usa. Wala pa bug-os hisabti ang eksaktong relasyon sa maong mga kemikal. Dugang pa, ang pagkatunaw sa tinapay diha sa lawas maoy lain pang katingalahan ug komplikadong proseso. Di katingad-an nga ang salmista miawit: “Pagkadaghan sa imong mga buhat, Oh Jehova! Sa kaalam gibuhat mo silang tanan”! (Sal. 104:24) Ikaw ba susamang natukmod sa pagdayeg kang Jehova?

Unsay Epekto sa Dignidad ug Kahalangdon sa Diyos Diha Kanimo?

11, 12. Unsay epekto sa pagpalandong sa mga buhat sa Diyos diha kanato?

¹¹ Dili kinahanglang mag-astronomo ta aron mahingangha sa kalangitan sa magabii o magkemiko aron makakaon ug lami nga tinapay. Apan aron masabtan gayod ang kahalangdon sa atong Maglalalang, angay natong palandongon ang iyang mga buhat. Unsay epekto sa maong pagpamalandong kanato? Ang epekto niana maoy sama ra sa dihang atong palandongon ang lain pang matang sa mga buhat ni Jehova.

¹² Bahin sa katingalahang mga buhat nga gihimo ni Jehova alang sa Iyang katawhan, si David miawit: “Ang mahimayaong kahalangdon sa imong dignidad ug ang mga butang bahin sa imong katingalahang mga buhat akong palandongon.” (Sal. 145:5) Ipakita nato ang atong interes sa maong mga buhat pinaagi sa pagtuon sa Bibliya ug pagpalandong sa atong nabasa. Unsay epekto niini? Molalom ang atong pagsabot sa dignidad ug kahalangdon sa Diyos. Nan, madasig gayod kitang moduyog kang David sa pagpasidungog kang Jehova ug pag-ingon: “Ang imong pagkadako, kini akong igapahayag.” (Sal. 145:6) Ang pagpalandong sa katingalahang mga buhat ni Jehova makapalig-on sa atong relasyon kaniya ug makadasig kanato sa pagsulti sa uban bahin kaniya nga may kasibot ug determinasyon. Masiboton ka bang nagsangyaw sa maayong balita ug nagtabang sa mga tawo aron ilang masabtan gayod ang dignidad ug kahalangdon ni Jehova nga Diyos?

Si Jesus Hingpit nga Nagpasundayag sa Dignidad sa Diyos

13. (a) Sumala sa Daniel 7:13, 14, unsay gihatag ni Jehova sa iyang Anak? (b) Ingong Hari, giunsa pagtagad ni Jesus ang iyang mga ginsakpan?

¹³ Ang Anak sa Diyos, si Jesu-Kristo, masibotong nagmantala sa maayong balita ug nagpasidungog sa iyang halangdon nga langitnong Amahan. Gihatagan ni Jehova ang iyang bugtong nga Anak ug linaing kadungganan pinaagi sa paghatag kaniyag ‘pagmando ug gingharian.’ (Basaha ang Daniel 7:13, 14.) Bisan pa niana, si Jesus dili mapahitas-on o tigpalain. Sa kasukwahi, siya maoy mabinationg Magmamando nga nakasabot sa mga kahuyangan sa iyang mga ginsakpan ug nagtagad kanila nga may konsiderasyon ug pagtahod. Tagda ang usa ka panig-ingnan kon giunsa pagtagad sa Tinudlong-Hari nga si Jesus ang mga tawo nga iyang nahibalag, ilabina ang mga tawong morag inayran ug tinamay.

14. Giunsa pag-isip ang mga sanlahon sa karaang Israel?

¹⁴ Kasagarang maagoman sa mga sanlahon sa karaang panahon ang masakit ug inanay nga kamatayon. Ang mga parte sa ilang lawas anam-anam nga mapudpod tungod sa sakit. Ang pagtambal sa usa ka sanlahon halos imposible sama sa pagbanhaw ug patay. (Num. 12:12; 2 Hari 5:7, 14) Ang mga sanlahon gipahayag nga mahugaw ug sila inayran ug hininginlan sa katilingban. Kon mopaduol sila sa mga tawo, kinahanglang mosinggit sila agig pasidaan: “Mahugaw, mahugaw!” (Lev. 13:43-46) Ang usa ka sanlahon giisip nga samag patay. Sumala sa rekord sa mga rabbi, mga dos metros lang ang gitugot nga distansiya tali sa usa ka sanlahon ug ni bisan kinsa. Gikataho pa nga sa dihang nakakitag sanlahon ang usa ka relihiyosong pangulo, bisag didto pa sa layo, iyang gibato siya aron dili makaduol.

15. Giunsa pagtagad ni Jesus ang usa ka sanlahon?

¹⁵ Apan, takos matikdan ang reaksiyon ni Jesus dihang miduol ang usa ka sanlahon ug nagpakiluoy nga ayohon siya. (Basaha ang Marcos 1:40-42.) Imbes abogon ang sanlahon, si Jesus nagpakitag kaluoy ug pagtahod sa tawong inayran. Ang nakita ni Jesus mao ang usa ka makaluluoyng tawo nga nagkinahanglag kahupayan. Tungod sa iyang kahingawa, milihok dayon si Jesus. Iyang gituy-od ang iyang kamot ug gihikap ang sanlahon ug giayo siya.

16. Unsang leksiyon ang imong nakat-onan sa paagi sa pagtagad ni Jesus sa uban?

¹⁶ Ingong mga sumusunod ni Jesus, unsaon nato pagsundog ang iyang paagi sa pagpasundayag sa dignidad sa iyang Amahan? Usa ka paagi mao ang pag-ila nga ang tanang tawo, bisag unsay kahimtang diha sa katilingban, panglawas, o edad, takos pasidunggan ug tahoron. (1 Ped. 2:17) Ilabina kadtong anaa sa mga katungdanan ingong magtatan-aw o magdudumala, sama sa mga bana, ginikanan, ug mga ansiyano sa kongregasyon, kinahanglang magpakitag konsiderasyon ug pasidungog niadtong ilalom sa ilang pagdumala ug tabangan sila sa paghupot sa ilang pagtahod-sa-kaugalingon. Ang Bibliya nagpasiugda nga kini usa ka kinahanglanon sa tanang Kristohanon: “Sa inigsoong gugma batoni ang malumong pagmahal alang sa usag usa. Manguna sa pagpakitag pasidungog sa usag usa.”​—Roma 12:10.

Pagpasundayag ug Dignidad Diha sa Pagsimba

17. Unsay makat-onan nato gikan sa Kasulatan bahin sa pagpasundayag ug dignidad samtang nagsimba kang Jehova?

¹⁷ Angayng hatagag linaing pagtagad ang pagpasundayag ug dignidad sa dihang nagsimba kita kang Jehova. “Bantayi ang imong mga tiil kon ikaw moadto sa balay sa matuod nga Diyos,” nag-ingon ang Ecclesiastes 5:1. Si Moises ug Josue gisugo sa paghubo sa ilang sandalyas kon anaa sa usa ka balaang dapit. (Ex. 3:5; Jos. 5:15) Kinahanglang himoon nila kadto ingong pagpakitag pagtahod. Ang Israelinhong mga saserdote gibaoran sa pagsul-ob ug purol nga lino “aron itabon sa hubo nga unod.” (Ex. 28:42, 43) Nalikayan ang kalaw-ayan samtang sila nag-alagad sa halaran. Ang matag membro sa pamilya sa usa ka saserdote angayng mosunod sa diyosnong sukdanan bahin sa dignidad.

18. Sa unsang paagi ang dignidad ipasundayag diha sa atong pagsimba kang Jehova?

¹⁸ Busa, ang pasidungog ug pagtahod nalangkit sa pagpasundayag ug dignidad diha sa pagsimba. Aron kita takos sa pasidungog ug pagtahod, kinahanglan kitang magmatinahoron. Ang dignidad nga atong ipasundayag kinahanglang dili lang pagpakaaron-ingnon o usa lamang ka panggawas nga ilhanan. Kini dili lamang aron makita sa mga tawo kondili aron makita sa Diyos. (1 Sam. 16:7; Prov. 21:2) Ang dignidad angay nga mahimong bahin kanato ug makaapektar sa atong panggawi, tinamdan, relasyon sa uban, bisan sa atong pagtan-aw o pagbati sa uban. Sa pagkatinuod, ang dignidad angayng dayag sa tanang panahon ug sa tanan natong isulti ug buhaton. Kon bahin sa atong panggawi, pamatasan, ug besti ug pamostura, isipon natong seryoso ang mga pulong ni apostol Pablo: “Wala gayod kami maghatag ug bisan unsa nga hinungdan sa pagkapandol, aron nga ang among ministeryo dili kakitaan ug sayop; apan sa tanang paagi among ginarekomendar ang among kaugalingon nga mga ministro sa Diyos.” (2 Cor. 6:3, 4) Kita ‘magdayandayan sa pagtulon-an sa atong Manluluwas, ang Diyos, sa tanang butang.’​—Tito 2:10.

Padayong Ipasundayag ang Diyosnong Dignidad

19, 20. (a) Unsay usa ka maayong paagi sa pagpasundayag ug dignidad sa uban? (b) Unsay atong determinasyon bahin sa pagpasundayag ug dignidad?

¹⁹ Nagpasundayag ug dignidad ang dinihogang mga Kristohanon, nga maoy “mga embahador kapuli ni Kristo.” (2 Cor. 5:20) Ang “ubang mga karnero,” nga maunongong nagpaluyo kanila, maoy may dignidad nga mga hawas sa Mesiyanikong Gingharian. Ang usa ka embahador o hawas mosulti nga may kaisog ug dignidad dapig sa iyang kagamhanan. Busa, angay kitang mosulti nga may kaisog ug dignidad sa pagpaluyo sa Gingharian sa Diyos. (Efe. 6:19, 20) Ug sa dihang kita mosangyaw sa uban sa “maayong balita sa butang nga mas maayo,” wala ba kita magpakita kanilag pasidungog ug pagtahod?​—Isa. 52:7.

²⁰ Angay nga determinado kita nga himayaon ang Diyos pinaagi sa paggawi uyon sa iyang dignidad. (1 Ped. 2:12) Atong ipakita kanunay ang halalom nga pagtahod kaniya, sa iyang pagsimba, ug sa atong isigkamagsisimba. Ug hinaot si Jehova, kinsa nagbesti sa iyang kaugalingon sa dignidad ug kahalangdon, mahimuot sa atong pagpasundayag ug dignidad sa atong pagsimba kaniya.

[Footnote]

Unsay Imong Tubag?

• Unsay epekto diha kanato kon atong giila ang kahalangdon sa dignidad ni Jehova?

• Unsay atong makat-onan bahin sa dignidad gikan sa paagi sa pagtagad ni Jesus sa usa ka sanlahon?

• Sa unsang mga paagi kita makapasundayag ug dignidad aron makapasidungog kang Jehova?

[Hulagway sa panid 12]

Sa unsang paagi gipasidunggan ni Jehova si Abel?

[Hulagway sa panid 14]

Ang katingalahang mga buhat ni Jehova dayag bisan sa paglutog tinapay

[Hulagway sa panid 15]

Unsay imong nakat-onan bahin sa dignidad gikan sa paagi sa pagtagad ni Jesus sa usa ka sanlahon?

[Hulagway sa panid 16]

Ang pagpasundayag ug dignidad diha sa pagsimba makapasidungog kang Jehova