Si Jehova Dako sa Maunongong Gugma
“Si Jehova . . . dako sa mahigugmaong-kalulot.”—SALMO 145:8.
1. Unsa ka masangkaron ang gugma sa Diyos?
“ANG Diyos gugma.” (1 Juan 4:8) Kanang makapadasig nga pahayag nagpamatuod nga ang paagi ni Jehova sa pagmando gipasukad sa gugma. Aw, bisan ang mga tawo nga dili motuman kaniya makabenepisyo gikan sa adlaw ug ulan nga mahigugmaon niyang gitagana! (Mateo 5:44, 45) Tungod sa gugma sa Diyos alang sa kalibotan sa katawhan, bisan ang iyang mga kaaway mahimong maghinulsol, mobalik kaniya, ug makabaton ug kinabuhi. (Juan 3:16) Apan, sa dili madugay laglagon ni Jehova ang mga daotan nga dili na gayod matul-id aron ang mga tawo nga nahigugma kaniya makatagamtam ug kinabuhing walay kataposan sa matarong nga bag-ong kalibotan.—Salmo 37:9-11, 29; 2 Pedro 3:13.
2. Unsang linaing bahin sa gugma ang gipakita ni Jehova niadtong dedikado kaniya?
2 Si Jehova nagpakita ug gugma alang sa iyang matuod nga mga magsisimba sa bililhon, dumalayon nga paagi. Kanang gugmaha maoy gipasabot sa usa ka Hebreohanong pulong nga gihubad ug “mahigugmaong-kalulot,” o “maunongong gugma.” Si Haring David sa karaang Israel nagpabili pag-ayo sa mahigugmaong-kalulot sa Diyos. Tungod sa iyang personal nga kasinatian ug sa iyang pagpalandong sa mga pakiglabot sa Diyos sa uban, si David masaligong makaawit: “Si Jehova . . . dako sa mahigugmaong-kalulot [o, “maunongong gugma”].”—Salmo 145:8.
Pag-ila sa mga Maunongon sa Diyos
3, 4. (a) Sa unsang paagi ang Salmo 145 motabang kanato sa pag-ila sa mga maunongon kang Jehova? (b) Sa unsang paagi ang mga maunongon sa Diyos “magadayeg” kaniya?
3 Mahitungod kang Jehova nga Diyos, ang inahan ni manalagnang Samuel, nga si Ana, miingon: “Ang mga tiil sa iyang mga maunongon iyang ginabantayan.” (1 Samuel 2:9) Kinsa kanang maong “mga maunongon”? Gitubag kana ni Haring David. Human himayaa ang kahibulongang mga hiyas ni Jehova, siya miingon: “Ang mga maunongon kanimo magadayeg kanimo.” (Salmo 145:10) Maghunahuna ka tingali kon sa unsang paagi ang mga tawo makadayeg sa Diyos. Buhaton nila kana pinaagi sa pagdayeg kaniya o paghimaya kaniya.
4 Ang mga maunongon ni Jehova maila nga mao kadtong nagagamit sa ilang mga baba sa paghimaya kaniya. Diha sa mga salosalo ug sa Kristohanong mga tigom, unsa ang kasagarang ginahisgotan nila? Aw, ang Gingharian ni Jehova! Ang maunongong mga alagad sa Diyos susamag gibati ni David, kinsa miawit: “Sila magahisgot mahitungod sa himaya sa imong [kang Jehova] pagkahari, ug sila magasulti mahitungod sa imong pagkagamhanan.”—Salmo 145:11.
5. Sa unsang paagi nahibaloan nato nga mamati si Jehova sa dihang ang iyang mga maunongon maghimaya kaniya?
5 Mamati ba si Jehova sa dihang ang iyang mga maunongon magadayeg kaniya? Oo, siya mamati sa ilang isulti. Diha sa usa ka tagna nga may kalabotan sa matuod nga pagsimba sa atong adlaw, si Malaquias misulat: “Niadtong panahona kadtong mga nahadlok kang Jehova nagsultihanay sa usag usa, ang matag usa sa iyang isigkaingon, ug si Jehova nagpadayon sa pagtagad ug sa pagpamati. Ug usa ka basahon sa handomanan gisulat sa iyang atubangan alang kanila nga nahadlok kang Jehova ug kanila nga nagapalandong sa iyang ngalan.” (Malaquias 3:16) Makapahimuot kaayo kang Jehova sa dihang ang mga maunongon kaniya maghimaya kaniya, ug siya mahinumdom kanila.
6. Unsang kalihokan ang motabang kanato sa pag-ila sa mga maunongon sa Diyos?
6 Ang maunongong mga alagad ni Jehova maila usab pinaagi sa ilang kaisog ug inisyatibo sa pagpakigsulti sa mga tawo nga dili magsisimba sa matuod nga Diyos. Sa pagkatinuod, ang mga maunongon sa Diyos ‘nagpahibalo sa iyang gamhanang mga buhat ngadto sa mga anak sa mga tawo ug sa himaya sa kahalangdon sa iyang pagkahari.’ (Salmo 145:12) Ikaw ba nangita ug nagpahimulos sa mga kahigayonan sa pagpakigsulti sa mga dili-magtutuo bahin sa pagkahari ni Jehova? Dili sama sa tawhanong mga kagamhanan, nga mahanaw sa dili madugay, ang iyang pagkahari dumalayon. (1 Timoteo 1:17) Dinalian nga ang mga tawo makakat-on bahin sa walay-kataposang pagkahari ni Jehova ug mobarog ingong mga tigpaluyo niana. “Ang imong pagkahari maoy pagkahari hangtod sa tanang panahong walay tino,” miawit si David, “ug ang imong dominyo maoy sa tanang sunodsunod nga mga kaliwatan.”—Salmo 145:13.
7, 8. Unsay nahitabo sa 1914, ug unsay pamatuod nga ang Diyos naghari karon pinaagi sa Gingharian sa iyang Anak?
7 Sukad sa 1914, dihay dugang katarongan nga mosulti bahin sa pagkahari ni Jehova. Nianang tuiga, gitukod sa Diyos ang langitnon nga Mesiyanikong Gingharian uban kang Jesu-Kristo, ang Anak ni David, ingong Hari. Busa gituman ni Jehova ang iyang saad nga ang pagkahari ni David lig-ong matukod hangtod sa panahong walay tino.—2 Samuel 7:12, 13; Lucas 1:32, 33.
8 Ang pamatuod nga karon si Jehova naghari na pinaagi sa Gingharian sa iyang Anak, si Jesu-Kristo, makita diha sa padayong katumanan sa ilhanan sa presensiya ni Jesus. Ang labing talagsaong bahin sa maong ilhanan mao ang buluhaton nga gitagna ni Jesus nga buhaton sa tanang maunongon sa Diyos sa dihang siya miingon: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” (Mateo 24:3-14) Tungod kay ang mga maunongon sa Diyos masibotong nagatuman sa maong tagna, kapin sa unom ka milyong lalaki, mga babaye, ug mga bata ang nagapakig-ambit karon niining dako, talagsaon nga buluhaton. Sa dili madugay moabot ang kataposan sa tanang magsusupak sa Gingharian ni Jehova.—Pinadayag 11:15, 18.
Pagbenepisyo Gikan sa Pagkasoberano ni Jehova
9, 10. Unsay kalainan tali kang Jehova ug sa tawhanong mga magmamando?
9 Kon kita maoy dedikadong mga Kristohanon, ang atong relasyon uban sa Soberanong Ginoong Jehova maghatag kanato ug daghang benepisyo. (Salmo 71:5; 116:12) Pananglitan, tungod kay kita nahadlok sa Diyos ug nagbuhat ug pagkamatarong, kita nakatagamtam sa iyang pag-uyon ug suod kaniya sa espirituwal. (Buhat 10:34, 35; Santiago 4:8) Sa kasukwahi, ang tawhanong mga magmamando kasagarang makita nga kauban sa prominenteng mga tawo, sama sa mga lider sa militar, adunahang mga negosyante, o mga inila sa natad sa esport ug kalingawan. Sumala sa mantalaan sa Aprika nga Sowetan, ang usa ka prominenteng opisyal sa gobyerno miingon sa mosunod bahin sa kabos nga mga dapit sa iyang nasod: “Masabtan nako kon nganong ang kadaghanan kanamo dili gustong moadto sa maong mga dapit. Tungod kini kay gusto namong makalimtan nga naglungtad ang maong mga situwasyon. Kini makahasol sa among konsensiya ug kami maulaw tungod sa mahalong [mga awto] nga among gidrayb.”
10 Siyempre, ang ubang tawhanon nga mga magmamando nahingawa pag-ayo sa kaayohan sa ilang mga ginsakpan. Apan bisan ang labing hamili kanila wala makaila pag-ayo sa ilang mga ginsakpan. Sa pagkatinuod, kita makapangutana: Aduna bay magmamando nga may pagtagad sa tanan niyang mga ginsakpan sa gilapdon nga motabang dayon siya sa matag usa sa mga panahon sa problema? Oo, aduna. Si David misulat: “Si Jehova nagasapnay sa tanan nga napukan, ug nagabangon sa tanan nga naumod.”—Salmo 145:14.
11. Unsang mga pagsulay ang modangat sa mga maunongon sa Diyos, ug unsang tabang ang ilang nabatonan?
11 Daghang pagsulay ug mga kalamidad ang mahitabo sa mga maunongon kang Jehova nga Diyos tungod sa ilang kaugalingong pagkadili-hingpit ug tungod kay sila nagkinabuhi sa usa ka kalibotan nga nailalom sa gahom ni Satanas, “ang usa nga daotan.” (1 Juan 5:19; Salmo 34:19) Ang mga Kristohanon nakasinati ug paglutos. Ang uban nag-antos sa laygay nga sakit o nagbangotan. Usahay, tungod sa mga sayop sa mga maunongon kang Jehova sila ‘maumod’ tungod sa kahigawad. Apan, bisan unsa mang pagsulay ang modangat kanila, si Jehova kanunayng andam sa paghatag ug kahupayan ug espirituwal nga kalig-on ngadto sa matag usa kanila. Ang Haring Jesu-Kristo adunay susamang mahigugmaong interes sa iyang maunongong mga ginsakpan.—Salmo 72:12-14.
Makapatagbawng Pagkaon sa Gitakdang Panahon
12, 13. Unsa ka maayo nga si Jehova nagtagana sa mga panginahanglan sa “tanang buhing butang”?
12 Tungod sa iyang dakong mahigugmaong-kalulot, si Jehova nagtagana sa tanang panginahanglan sa iyang mga alagad. Naglakip kini sa pagtagbaw kanila sa sustansiyadong pagkaon. Si Haring David misulat: “Ang tanang mata nagalantaw nga malaomon kanimo [Jehova], ug ginahatag mo kanila ang ilang pagkaon sa gitakdang panahon niini. Imong ginabukhad ang imong kamot ug ginatagbaw ang tinguha sa tanang buhing butang.” (Salmo 145:15, 16) Bisan sa mga panahon sa kalamidad, mahimong maniobrahon ni Jehova ang mga kahimtang aron ang mga maunongon kaniya makabaton ug ‘tinapay alang nianang adlawa.’—Lucas 11:3; 12:29, 30.
13 Miingon si David nga ang “tanang buhing butang” matagbaw. Naglakip kana sa mga mananap. Kon dili pa tungod sa dagayang mga tanom sa yuta ug sa dagat, ang mga linalang sa katubigan, langgam ug mga mananap sa mamala walay mahanggab nga oksiheno o pagkaon nga makaon. (Salmo 104:14) Apan, gitino ni Jehova nga matagbaw ang tanan nilang mga panginahanglan.
14, 15. Sa unsang paagi gitagana karon ang espirituwal nga pagkaon?
14 Dili sama sa mga mananap, ang mga tawo adunay espirituwal nga panginahanglan. (Mateo 5:3) Si Jehova nagatagbaw sa kahibulongang paagi sa espirituwal nga mga panginahanglan sa mga maunongon kaniya! Sa hapit na siyang mamatay, si Jesus nagsaad nga “ang matinumanon ug maalamong ulipon” magtagana sa mga sumusunod ni Jesus ug espirituwal nga “pagkaon sa hustong panahon.” (Mateo 24:45) Ang nanghibilin sa 144,000 ka dinihogan naglangkob nianang maong ulipon nga matang karon. Pinaagi kanila, si Jehova nagatagana gayod ug dagayang espirituwal nga pagkaon.
15 Pananglitan, kadaghanan sa katawhan ni Jehova karon nakabenepisyo gikan sa bag-o ug tukma nga hubad sa Bibliya diha sa ilang kaugalingong pinulongan. Kahibulongan gayod nga panalangin ang Bag-ong Kalibotang Hubad sa Balaang Kasulatan! Dugang pa, milyonmilyong mga tabang sa pagtuon sa Bibliya ang padayong ginapatik diha sa kapin sa 300 ka pinulongan. Kining tanang espirituwal nga pagkaon maoy panalangin sa matuod nga mga magsisimba sa tibuok yuta. Kinsay takos dayegon tungod niining tanan? Si Jehova nga Diyos. Pinaagi sa iyang dakong mahigugmaong-kalulot, gipaposible niya nga ang ulipon nga matang magtagana ug “pagkaon sa gitakdang panahon.” Pinaagi sa maong mga tagana, “ang tinguha sa matag buhing butang” sa modernong-adlaw nga espirituwal nga paraiso matagbaw. Ug magmaya gayod ang mga alagad ni Jehova sa paglaom nga sa dili madugay makita ang yuta nga mahimong pisikal nga paraiso!—Lucas 23:42, 43.
16, 17. (a) Unsay mga pananglitan nga ang espirituwal nga pagkaon miabot sa hustong panahon? (b) Sa unsang paagi ang Salmo 145 nagpahayag sa pagbati sa mga maunongon sa Diyos maylabot sa pangunang isyu nga gipatungha ni Satanas?
16 Tagda ang usa ka talagsaong pananglitan sa espirituwal nga pagkaon nga nadawat sa hustong panahon. Sa 1939, ang Gubat sa Kalibotan II nagsugod sa Uropa. Niana gihapong tuiga, ang Nobyembre 1 nga gula sa Ang Bantayanang Torre naundan ug artikulo nga nag-ulohang “Neyutralidad.” Tungod sa klarong impormasyon nga gipresentar, ang mga Saksi ni Jehova sa tibuok kalibotan nakasabot sa panginahanglan nga magpabilin gayong neyutral sa mga kalihokan sa naggubatayng mga nasod. Tungod niini nasuko ang mga gobyerno sa duha ka kiliran nianang unom-ka-tuig nga gubat. Apan, bisan pag gidili ug gilutos, ang mga maunongon sa Diyos nagpadayon sa pagsangyaw sa maayong balita sa Gingharian. Sukad sa 1939 hangtod sa 1946, sila gipanalanginan ug katingalahang pag-uswag nga 157 porsiyento. Dugang pa, ang ilang talagsaong rekord sa integridad panahon sa maong gubat nagpadayon sa pagtabang sa mga tawo sa pag-ila sa matuod nga relihiyon.—Isaias 2:2-4.
17 Ang espirituwal nga pagkaon nga gitagana ni Jehova dili lamang tukma-sa-panahon kondili makapatagbaw usab kaayo. Samtang ang mga nasod dulot nga nalangkit sa paggubatay panahon sa Gubat sa Kalibotan II, ang katawhan ni Jehova gitabangan sa pagsentro sa pagtagad sa usa ka butang nga mas hinungdanon kay sa ilang kaugalingong kaluwasan. Gitabangan sila ni Jehova sa pagsabot nga ang pangunang isyu, nga naglangkit sa tibuok uniberso, adunay kalabotan sa takos nga pagkasoberano ni Jehova. Makapatagbaw gayod ang pagkahibalo nga pinaagi sa ilang pagkamaunongon, ang matag Saksi ni Jehova adunay gamayng bahin sa pagbindikar sa pagkasoberano ni Jehova ug sa pagpamatuod nga bakakon ang Yawa! (Proverbio 27:11) Dili sama kang Satanas, kinsa nagpasipala kang Jehova ug sa iyang paagi sa pagmando, ang mga maunongon kang Jehova nagpadayon sa pagpahayag nga dayag: “Si Jehova matarong sa tanan niyang mga paagi.”—Salmo 145:17.
18. Unsa ang di pa dugay nga pananglitan sa espirituwal nga pagkaon nga tukma-sa-panahon ug makapatagbaw kaayo?
18 Ang laing pananglitan sa tukma-sa-panahon, makapatagbaw nga espirituwal nga pagkaon mao ang librong Pakigsuod Kang Jehova, nga giluwatan diha sa gatosan ka “Masibotong mga Magmamantala sa Gingharian” nga Distritong mga Kombensiyon nga gihimo sa tibuok kalibotan sa 2002/03. Kining libroha, nga gigama sa “matinumanon ug maalamong ulipon” ug gipatik sa mga Saksi ni Jehova, nagsentro sa pagtagad diha sa kahibulongang mga hiyas ni Jehova nga Diyos, lakip na nianang gihisgotan diha sa Salmo 145. Kining maayo kaayo nga libro seguradong adunay hinungdanong bahin sa pagtabang sa mga maunongon sa Diyos nga mas masuod pa kaniya.
Panahon sa Pagpakigsuod pa Kang Jehova
19. Unsang hinungdanong panahon ang haduol na, ug sa unsang paagi masagubang nato kana?
19 Ang hinungdanong hugna sa paghusay sa isyu sa pagkasoberano ni Jehova nagkaduol na. Sumala sa gitagna sa Ezequiel 38, sa dili madugay bug-oson ni Satanas ang iyang papel ingong “Gog sa yuta sa Magog.” Maglakip kini ug tibuok-kalibotang pag-atake nganha sa katawhan ni Jehova. Kini mao unyay bug-os nga pagsulay ni Satanas sa pagbungkag sa integridad sa mga maunongon sa Diyos. Labi pang kinahanglanon nga ang mga magsisimba ni Jehova motawag kaniya nga kinasingkasing, nga motuaw pa gani alang sa tabang. Makawang kaha ang ilang matahaong kahadlok sa Diyos ug gugma alang kaniya? Dili gayod, kay ang Salmo 145 nag-ingon: “Si Jehova haduol kanilang tanan nga nagatawag kaniya, kanilang tanan nga nagatawag kaniya sa kamatinud-anon. Pagatumanon niya ang tinguha niadtong nahadlok kaniya, ug ang ilang pagtuaw alang sa tabang iyang pagadunggon, ug siya magaluwas kanila. Si Jehova nagabantay sa tanang nahigugma kaniya, apan iyang pagalaglagon ang tanang daotan.”—Salmo 145:18-20.
20. Sa unsang paagi ang mga pulong sa Salmo 145:18-20 mapamatud-ang matuod sa dili madugay?
20 Pagkakulbahinam nga masinati sa pagkaduol ni Jehova ug sa iyang nagaluwas nga gahom sa dihang iyang laglagon ang tanang daotan! Nianang hinungdanong panahon nga haduol na kaayo, si Jehova mamati lamang “kanilang tanan nga nagatawag kaniya sa kamatinud-anon.” Seguradong dili siya mamati sa mga salingkapaw. Ang Pulong sa Diyos klarong nagpakita nga ang bisan unsang kataposang-gutlo nga paggamit sa mga daotan sa iyang ngalan kanunayng napamatud-an nga walay kapuslanan.—Proverbio 1:28, 29; Miqueas 3:4; Lucas 13:24, 25.
21. Sa unsang paagi ang mga matinumanon kang Jehova nagpakita nga sila malipay sa paggamit sa ngalan sa Diyos?
21 Karon mas dinalian kay sukad masukad nga kadtong nahadlok kang Jehova ‘motawag kaniya sa kamatinud-anon.’ Ang mga maunongon kaniya malipay sa paggamit sa iyang ngalan diha sa ilang mga pag-ampo ug sa ilang mga komento diha sa ilang mga panagkatigom. Ilang gigamit ang ngalan sa Diyos diha sa ilang pribadong mga kabildohay. Ug sila maisogong nagapahayag sa ngalan ni Jehova diha sa ilang publikong ministeryo.—Roma 10:10, 13-15.
22. Nganong hinungdanon nga padayong makigbisog sa kalibotanong mga tinamdan ug mga tinguha?
22 Aron padayon nga makabenepisyo gikan sa atong suod nga relasyon uban kang Jehova nga Diyos, hinungdanon usab nga padayon kitang makigbisog batok sa mga butang nga makadaot sa espirituwalidad sama sa materyalismo, dili-maayong kalingawan, dili-mapinasayloong espiritu, o pagkadili-matinagdanon sa mga kabos. (1 Juan 2:15-17; 3:15-17) Kon dili matul-id, ang maong mga kalihokan ug mga taras mosangpot sa paghimog grabeng sala ug sa ngadtongadto sa pagkawala sa pag-uyon ni Jehova. (1 Juan 2:1, 2; 3:6) Maalamon nga hinumdoman nga si Jehova magpadayon lamang sa pagpakita ug mahigugmaong-kalulot, o maunongong gugma, nganhi kanato kon kita magpabiling matinumanon kaniya.—2 Samuel 22:26.
23. Unsang maanindot nga kaugmaon ang anaa sa unahan alang sa tanang maunongon sa Diyos?
23 Busa isentro nato ang atong mga hunahuna diha sa maanindot nga kaugmaon nga anaa sa unahan sa tanan nga maunongon kang Jehova. Sa pagbuhat niana, mabatonan nato ang maanindot nga palaaboton nga mahilakip niadtong magabayaw, magabulahan, ug magadayeg kang Jehova “sa tibuok adlaw” ug “bisan hangtod sa kahangtoran.” (Salmo 145:1, 2) Busa hinaot nga kita ‘magpabilin diha sa gugma sa Diyos nga nagapanglantaw sa kinabuhing walay kataposan.’ (Judas 20, 21) Samtang magpadayon kita sa pagbenepisyo gikan sa kahibulongang mga hiyas sa atong langitnong Amahan, lakip na sa dakong mahigugmaong-kalulot nga iyang gipasundayag niadtong nahigugma kaniya, hinaot nga bation nato ang sama sa gipahayag ni David sa kataposang mga pulong sa Salmo 145: “Ang akong baba magasulti sa pagdayeg kang Jehova; ug ipadayeg sa tanang unod ang iyang balaan nga ngalan hangtod sa panahong walay tino, bisan hangtod sa kahangtoran.”
Unsaon Nimo Pagtubag?
• Sa unsang paagi ang Salmo 145 motabang sa pagpaila sa mga maunongon sa Diyos?
• Sa unsang paagi si Jehova ‘nagatagbaw sa tinguha sa tanang buhing butang’?
• Nganong kita kinahanglang makigsuod pa kang Jehova?
[Hulagway sa panid 16]
Ang mga maunongon sa Diyos malipay sa paghisgot sa iyang gamhanang mga buhat
[Hulagway sa panid 17]
Ang mga alagad ni Jehova maisogong nagatabang sa mga dili-magtutuo sa pagkat-on bahin sa himaya sa iyang pagkahari
[Mga hulagway sa panid 18]
Si Jehova nagtagana ug pagkaon alang sa “tanang buhing butang”
[Credit Line]
Animals: Parque de la Naturaleza de Cabárceno
[Hulagway sa panid 19]
Si Jehova nagahatag ug kusog ug giya ngadto sa mga maunongon kaniya, kinsa mangayog tabang diha sa pag-ampo