Gihigugma Ka Pag-ayo ni Jehova

 1. Unsay imong ma-imagine bahin kang Jehova?

NAKASULAY na ba kag imagine bahin kang Jehova? Dihang mag-ampo ka niya, unsay imong mahunahunaan? Bisag dili nato makita si Jehova, gi-describe siya sa Bibliya sa lainlaing paagi. Si Jehova gitawag nga “adlaw ug taming” ug “nagalaglag nga kalayo.” (Sal. 84:11; Heb. 12:29) Ang iyang presensiya samag batong sapiro, naggilakgilak nga metal, ug hayag nga rainbow. (Ezeq. 1:​26-28) Tungod ani nga mga deskripsiyon, mahingangha tingali ta pag-ayo kang Jehova o mobati pa ganing ubos kaayo.

 2. Ngano kahang nalisdan ang uban nga makigsuod kang Jehova?

² Kay dili nato makita si Jehova, lisod tingaling tuohan nga gimahal ta niya. Para sa uban, morag imposible silang higugmaon ni Jehova tungod sa ilang naeksperyensiyahan. Tingali nagdako sila nga wala higugmaa sa ilang amahan. Nasabtan ni Jehova ang maong mga pagbati ug kon unsay epekto niini kanato. Aron makatuo ta nga gimahal ta niya, gipaila niya ang iyang nindot nga personalidad diha sa iyang Pulong.

 3. Nganong angay natong susihon pag-ayo ang gugma ni Jehova?

³ Ang usa ka pulong nga haom kaayong nag-describe kang Jehova maoy gugma. Ang Bibliya nag-ingon nga “ang Diyos gugma.” (1 Juan 4:8) Ang tanan niyang gihimo maoy tungod sa iyang gugma. Dako kaayo ang gugma sa Diyos kay iya ning gipakita bisan niadtong wala mahigugma niya. (Mat. 5:​44, 45) Niining artikuloha, ilhon nato pag-ayo si Jehova ug ang iyang gugma. Dihang mas mailhan nato ang atong Diyos, mas modako ang atong gugma kaniya.

GIMAHAL TA PAG-AYO NI JEHOVA

 4. Unsay imong gibati sa gugma nga gipakita ni Jehova? (Tan-awa sab ang hulagway.)

⁴ “Si Jehova mabination kaayo.” (Sant. 5:11) Sa Bibliya, gipakasama niya ang iyang kaugalingon sa mapinanggaong inahan. (Isa. 66:​12, 13) Imadyina ang usa ka inahan nga mahigugmaong nag-atiman sa iyang gamayng anak. Iya ning gihagwahagwa samtang nagluksolukso sa iyang paa, ug lumo kaayo iyang tingog samtang nakig-estorya sa bata. Dihang mohilak ni o masakitan, seguroon sa inahan nga mahatag niya ang gikinahanglan sa iyang anak. Dihang masakitan ta, makasalig pod ta sa gugma ni Jehova. Ang salmista misulat: “Dihang nalumsan ko sa mga kabalaka, ang imong paghupay nakapalipay kanako.”—Sal. 94:19.

 5. Unsay imong ikasulti bahin sa maunongong gugma ni Jehova?

⁵ Si Jehova maunongon. (Sal. 103:8) Dili ta niya biyaan dihang masayop ta. Ang nasod sa Israel balikbalik nga nakasala kang Jehova. Pero dihang naghinulsol sila, iya silang gipasaligan sa iyang maunongong gugma. Pananglitan, giingnan niya sila: “Nahimo kang bililhon sa akong mga mata, ikaw gipasidunggan, ug gimahal ka nako.” (Isa. 43:​4, 5) Ingon ana pod ang gugma sa Diyos kanato. Makasalig ta kanunay sa iyang gugma. Bisan pag makahimo tag seryosong sala, dili ta biyaan ni Jehova. Kon maghinulsol ta ug mobalik kang Jehova, makita nato nga gimahal gihapon ta niya. Siya nagsaad nga “siya madagayaong magpasaylo.” (Isa. 55:7) Ingong resulta, maeksperyensiyahan nato ang giingon sa Bibliya nga “mga panahon sa kahayahay [nga] gikan mismo kang Jehova.”—Buh. 3:19.

 6. Unsay gitudlo sa Zacarias 2:8 bahin kang Jehova?

⁶ Basaha ang Zacarias 2:8. Kay gimahal ta ni Jehova, makamatikod dayon siya sa atong gibati ug gusto kaayo ta niyang protektahan. Masakitan siya dihang masakitan ta. Tungod ana, puwede tang moampo niya: “Panalipdi ko sama sa tawotawo sa imong mata.” (Sal. 17:8) Ang mata sensitibo, ug importante ni nga bahin sa lawas. Busa sa dihang gipakasama ta ni Jehova sa tawotawo sa iyang mata, samag miingon siya, ‘Dihang pasakitan mo sa uban, ilang gipasakitan kon unsay bililhon para nako.’

 7. Nganong kinahanglan natong palig-onon ang atong pagsalig sa gugma ni Jehova?

⁷ Gusto ni Jehova nga kombinsido ta nga gimahal niya ang matag usa nato. Pero nahibalo siya nga tungod sa atong mga naeksperyensiyahan, maghunahuna tingali ta kon higugmaon ba gyod ta niya. O basin nag-atubang tag mga situwasyon karon nga nagsulay sa atong pagsalig sa gugma ni Jehova. Aron molig-on ang atong pagsalig sa gugma ni Jehova, atong tun-an kon giunsa pagpakita ni Jehova ang iyang gugma kang Jesus, sa mga dinihogan, ug kanatong tanan.

KON GIUNSA PAGPAKITA NI JEHOVA ANG IYANG GUGMA

 8. Nganong kombinsido si Jesus nga gimahal siya sa iyang Amahan?

⁸ Sa tibuok uniberso, si Jehova ug ang iyang Anak ang pinakadugay nga nag-uban. Sulod sa binilyong katuigan didto sa langit, nasuod sila pag-ayo ug naugmad nila ang lawom nga gugma sa usag usa. Sa Mateo 17:​5, klarong gisulti ni Jehova ang iyang gugma kang Jesus. Puwede ra man untang moingon si Jehova, ‘Kini mao ang akong Anak nga akong giuyonan.’ Pero gusto niyang mahibalo ta kon unsa niya ka mahal si Jesus, maong iya siyang gitawag nga “akong Anak, ang akong gihigugma.” Proud si Jehova kang Jesus, ilabina kay andam ihatag ni Jesus ang iyang kinabuhi. (Efe. 1:7) Ug wala gyod magduhaduha si Jesus nga gimahal siya sa iyang Amahan. Gibati gyod niya ang gugma ni Jehova kay balikbalik siyang miingon nga gihigugma siya sa iyang Amahan.—Juan 3:35; 10:17; 17:24.

 9. Unsa ka dako ang gugma ni Jehova sa mga dinihogan? Ipatin-aw. (Roma 5:5)

⁹ Gipakita sab ni Jehova nga gimahal niya ang mga dinihogan. (Basaha ang Roma 5:5.) Sa orihinal nga pinulongan, kini nga bersikulo naghatag ug ideya nga ang gugma ni Jehova sa mga dinihogan kusganon kaayo sama sa pag-agos sa suba. Pagkadako sa gugma ni Jehova kanila! Nahibalo ang mga dinihogan nga sila “gihigugma sa Diyos.” (Jud. 1) Gisulat ni apostol Juan ang ilang gibati: “Hunahunaa kon unsang matanga sa gugma ang gipakita sa Amahan kanato, kay gitugotan niya nga tawgon tang mga anak sa Diyos!” (1 Juan 3:1) Mga dinihogan lang ba ang gimahal ni Jehova? Dili. Gipamatud-an ni Jehova nga gimahal niya ang tanang tawo.

10. Unsa ang kinalabwang pamatuod nga gihigugma ka ni Jehova?

¹⁰ Unsa ang kinalabwang pamatuod sa gugma ni Jehova? Ang halad lukat. Kini ang kinalabwang ekspresyon sa gugma sa tibuok uniberso! (Juan 3:16; Roma 5:8) Gihatag ni Jehova ang iyang pinalanggang Anak ug gitugotan nga mamatay para natong tanan aron mapasaylo ang atong mga sala ug mahimo ta Niyang mga higala. (1 Juan 4:10) Kon kanunay natong pamalandongon ang gibayad ni Jehova ug Jesus, mas masabtan nato kon unsa ka dako ang ilang gugma para sa matag usa kanato. (Gal. 2:20) Ang lukat wala gibayad aron lang masunod ang sukdanan ni Jehova sa hustisya. Regalo ni nga gipasukad sa gugma. Gipamatud-an ni Jehova nga gimahal ta niya pinaagi sa paghatag sa kon unsay pinakabililhon kaniya—si Jesus. Gitugotan ni Jehova nga mag-antos ang iyang Anak ug mamatay para nato.

11. Unsay atong makat-onan sa Jeremias 31:3?

¹¹ Sa ato nang nahisgotan, si Jehova wala lang basta mahigugma nato. Gisulti pod niya kon unsa ta niya ka mahal. (Basaha ang Jeremias 31:3.) Gikabig ta ni Jehova kay gimahal ta niya. (Itandi ang Deuteronomio 7:​7, 8.) Walay makabulag kanato sa iyang gugma. (Roma 8:​38, 39) Unsay imong gibati tungod sa iyang gipakita nga gugma? Basaha ang Salmo 23, ug tan-awa kon unsay epekto sa gugma ug pag-atiman ni Jehova ngadto kang David ug kon unsay mahimong epekto niini kanato.

UNSAY IMONG GIBATI BAHIN SA GUGMA NI JEHOVA?

12. Unsaon nimo pagsumaryo ang Salmo 23?

¹² Basaha ang Salmo 23:​1-6. Ang Salmo 23 maoy usa ka awit ni David nga nagpakita sa iyang pagsalig sa gugma ug pag-atiman ni Jehova. Mabasa nato dinhi ang ilang suod kaayo nga relasyon. Gani, gitawag niya si Jehova nga iyang Magbalantay. Mibati si David nga luwas kay nagpagiya siya kang Jehova, ug bug-os gyod siyang nagsalig Kaniya. Nahibalo si David nga pakitaan siyag gugma ni Jehova sa tanang adlaw sa iyang kinabuhi. Nganong segurado kaayo si David ana?

13. Nganong segurado si David nga atimanon siya ni Jehova?

¹³ “Walay makulang kanako.” Gibati ni David nga giatiman siya pag-ayo ni Jehova kay kanunay siyang gitagan-an sa tanan niyang panginahanglan. Nahibalo sab si David nga siya higala ug giuyonan ni Jehova. Maong segurado siya nga bisag unsa pay mahitabo sa umaabot, si Jehova padayong mag-atiman sa tanan niyang panginahanglan. Kay dako kaayog pagsalig si David sa gugma ni Jehova, nakatabang ni niya nga dili sobrang mabalaka. Gani, siya mibatig dakong kalipay ug katagbawan.—Sal. 16:11.

14. Sa unsang paagi kaha ta atimanon ni Jehova?

¹⁴ Si Jehova moatiman nato, ilabina kon naay daotang mahitabo sa atong kinabuhi. Naeksperyensiyahan na ni Claire,a nga nag-alagad sa Bethel sa kapig 20 ka tuig. Dihang sunodsunod ang problema sa ilang pamilya, wala siya mahibalo kon unsaon niya sila pagtabang. Ang iyang papa na-stroke, na-disfellow ang iyang manghod nga babaye, ug nawala ang ilang gamayng negosyo ug balay. Giunsa sila pag-atiman ni Jehova? Si Claire miingon: “Giseguro ni Jehova nga matagan-an ang panginahanglan sa akong pamilya kada adlaw. Naay mga panahon nga sobrasobra pa gani ang gihatag ni Jehova! Pirme nakong hinumdoman kon giunsa mi pag-atiman ni Jehova, ug dili gyod nako ni malimtan. Nakatabang ni nako nga padayong moalagad kang Jehova bisag naay mga problema.”

15. Nganong nalagsik si David? (Tan-awa sab ang hulagway.)

¹⁵ “Gipalagsik ko niya.” Naay mga panahon nga naluya si David tungod sa tanang problema ug pagsulay nga iyang giatubang. (Sal. 18:​4-6) Pero tungod sa gugma ug pag-atiman ni Jehova, nalagsik siya. Gidala ni Jehova ang iyang naluya nga higala sa “lunhaw nga mga sibsibanan” ug “mga pahulayanan nga abundag tubig.” Tungod ana, nabalik ang kusog ni David ug padayon siyang nakaalagad kang Jehova nga malipayon.—Sal. 18:​28-32.

16. Sa unsang paagi napalagsik ka sa gugma ni Jehova?

¹⁶ Karon, nakaatubang pod tag mga pagsulay ug kalisdanan. Pero “tungod sa maunongong gugma ni Jehova,” kita nakalahutay. (Lam. 3:22; Col. 1:11) Konsideraha ang nahitabo kang Rachel. Panahon sa COVID-19 nga pandemic, naguol kaayo siya dihang ang iyang bana mibiya niya ug miundang sa pag-alagad kang Jehova. Unsay gihimo ni Jehova para niya? Siya miingon: “Gipabati gyod ni Jehova nga daghan ang nagmahal nako. Gitagan-an ko niyag mga higala nga mogahin ug panahon nako. Magdala silag pagkaon ug mag-send silag makapahupay nga mga message ug teksto. Mopahiyom pod sila nako ug pirme ko nilang pahinumdoman nga gimahal ko ni Jehova. Kanunay kong nagpasalamat kang Jehova kay gihatagan ko niyag dako ug mahigugmaon kaayong pamilya.”

17. Nganong miingon si David nga “dili ko mahadlok”?

¹⁷ “Dili ko mahadlok, kay ikaw nag-uban kanako.” Kadaghan nameligro ang kinabuhi ni David, ug daghan siyag gamhanang kaaway. Pero mibati siyang luwas tungod sa gugma ni Jehova. Nahibalo si David nga kauban niya kanunay si Jehova sa matag situwasyon, ug nakapalig-on na niya. Gani, siya miawit: “Giluwas ko [ni Jehova] gikan sa tanan nakong gikahadlokan.” (Sal. 34:4) Bisag naay mga panahon nga nahadlok pag-ayo si David, iya ning nadaog kay nahibalo siya nga gimahal siya ni Jehova.

18. Sa unsang paagi ang gugma ni Jehova magpalig-on nimo dihang mahadlok ka?

¹⁸ Sa unsang paagi ang gugma ni Jehova magpalig-on nato dihang mahadlok ta? Gisulti sa payunir nga si Susi kon unsay gibati nila sa iyang bana dihang naghikog ang ilang anak nga lalaki: “Dihang naay trahedya nga kalit lang mahitabo, maka-trauma ni ug bation nimo nga morag wala gyod kay mahimo. Pero ang gugma ni Jehova nakapabati namong luwas.” Si Rachel, nga gihisgotan ganina, miingon: “Dihay gabii nga guol kaayo ko. Nabalaka pod kaayo ko ug nahadlok, maong naghilak ko nga nag-ampo kang Jehova. Dihadiha, migaan ang akong pamati. Gipakalma ko ni Jehova, sama sa ginahimo sa inahan sa iyang anak. Dayon nakatulog ko. Dili gyod to nako malimtan.” Ang ansiyano nga si Tasos upat ka tuig nga napriso kay wala siya magsundalo. Sa unsang paagi niya naeksperyensiyahan ang gugma ug pag-atiman ni Jehova? Siya miingon: “Gitagana ni Jehova ang tanan nakong panginahanglan, ug sobra pa gani ang iyang gihatag. Nakapalig-on ni nako nga bug-os mosalig niya. Pinaagi pod sa iyang balaang espiritu, gitabangan ko ni Jehova nga magmalipayon bisag naa ko sa maka-depress nga lugar. Nakita nako nga kon mas mosalig ko kang Jehova, mas bation nako ang iyang gugma. Busa nagregular payunir ko samtang naa sa prisohan.”

PAKIGSUOD SA IMONG MAHIGUGMAONG DIYOS

19. (a) Kay nahibalo ta nga gihigugma ta sa Diyos, unsay epekto niini sa atong mga pag-ampo? (b) Unsa nga deskripsiyon sa gugma ni Jehova ang nakatandog nimo? (Tan-awa ang kahong “Mga Pulong nga Mopabati Nato sa Gugma ni Jehova.”)

¹⁹ Ang mga eksperyensiya nga atong nahisgotan nagpamatuod nga si Jehova, “ang Diyos sa gugma,” nagauban kanato! (2 Cor. 13:11) Interesado siya sa matag usa kanato. Kombinsido ta nga “gipalibotan [ta] sa Iyang maunongong gugma.” (Sal. 32:10) Kon pamalandongon nato pirme kon giunsa niya pagpakita ang iyang gugma kanato, mas bation nato nga gimahal gyod ta niya. Ug tungod ana, mas masuod ta kaniya. Makaampo ta niya bisag kanus-a ug puwede natong isulti nga kinahanglan kaayo nato ang iyang gugma. Masulti pod nato kaniya ang tanan natong gikabalak-an, kay nahibalo ta nga makasabot siya ug gusto kaayo niyang motabang nato.—Sal. 145:​18, 19.

20. Sa unsang paagi ang gugma ni Jehova mas makapasuod nato kaniya?

²⁰ Sama nga mangita tag kainit panahon sa tingtugnaw, mangita pod ta sa mainitong gugma ni Jehova. Bisag gamhanan ang gugma ni Jehova, kini sab mabination. Busa dawata ang gugma ni Jehova diha sa imong kinabuhi. Ug hinaot kitang tanan makaingon: “Gihigugma nako si Jehova”!—Sal. 116:1.