“Si Jehova Mao ang Akong Magbalantay”

“Si Jehova mao ang akong Magbalantay. Walay makulang kanako.”—SALMO 23:1.

1, 2. Unsa ang pipila sa mga nahimo ni David, ug pila ka salmo ang iyang gibalay?

HANDURAWA kini nga esena: Ang mga sundalong Pilistihanon nagaatubang sa kasundalohan sa Israel. Si Goliat, ang higanteng Pilistihanon, mahagiton. Usa ka batan-ong lalaki, nga armado lamang lambayog ug mga bato, nagdagan aron sugaton siya. Ang bato nga maayong pagkapuntiriya nakadulot sa bagulbagol sa higante ug nakapatay kaniya. Kinsa ba kadtong batan-ong lalaki? Si David, usa ka magbalantay nga nakaangkon niadtong talagsaong kadaogan sa tabang ni Jehova nga Diyos.​—1 Samuel, kapitulo 17.

² Sa nahaigong panahon, kadtong batan-ong lalaki nahimong hari sa Israel, nga miharig 40 anyos. Siya hanas nga motugtog sa alpa ug nakabalay ug daghang balak sa pag-inspirar sa Diyos. Gisulat usab ni David ang kapin sa 70 ka anindot nga salmo nga tuboran sa dakong pagdasig ug giya alang sa katawhan ni Jehova karong adlawa. Ang labing ilado niana mao ang Salmo 23. Nganong dili buksan ang imong Bibliya ug mosunod samtang himoon nato ang bersikulo-por-bersikulo nga pagtuon sa maong salmo?

Si Jehova, Usa ka Mahigugmaong Magbalantay

 3. (a) Sa unsang mga okasyon gipameligro ni David ang iyang kinabuhi aron sa pagpanalipod sa iyang mga karnero? (b) Sa unsang diwa si Jehova mao ang atong Magbalantay?

³ “Si Jehova mao ang akong Magbalantay.” (Salmo 23:1) Ingong eksperyensiadong magbalantay, nasayod si David kon unsaon pagtultol, pagpasibsib, ug pagpanalipod sa mga karnero. Pananglitan, maisogon niyang gipanalipdan ang iyang mga karnero gikan sa usa ka leyon sa usa ka higayon ug gikan sa usa ka oso sa laing higayon. (1 Samuel 17:34-36) Ang mga karnero ni David bug-os nagsalig sa ilang magbalantay. Apan maylabot kang Jehova, siya mismo usa ka karnero. Sanglit gibati ni David ang kasegurohan diha sa mahigugmaong pag-atiman sa Diyos, siya nakaingon: “Si Jehova mao ang akong Magbalantay.” Gipahimuslan ba nimo kining pagbatia sa kasegurohan ubos sa Dakong Magbalantay, si Jehova nga Diyos? Siya tinong nagaagak, nagapakaon, ug nagapanalipod sa iyang samag-karnerong mga magsisimba karong adlawa. Dugang pa, ingong tinudlong mga ansiano diha sa mga kongregasyon sa mga Saksi ni Jehova, ang matinumanon, mahigugmaong mga ubos-magbalantay madasigong nagaatiman sa mga karnero.​—1 Pedro 5:1-4.

 4. Sa unsang paagi ang atong kahimtang karong adlawa susama sa iya sa mga Israelinhon sa kamingawan?

⁴ “Walay makulang kanako.” Hunahunaag maayo kining mga pulonga. Tungod sa mahigugmaong pag-atiman ni Jehova, wala ba nimo batia ang kakalmado ug kompiyansa? Nahinumdom ka ba kon unsay nahitabo sa mga Israelinhon sa dihang sila naglaaglaag sa kamingawan sulod sa 40 anyos? Aw, ang Diyos nagtagana sa tanan nilang pangunang kinahanglanon! Kini susama karong adlawa. Walay makulang sa matinumanong mga alagad ni Jehova karong adlawa. Daghan ang makapahayag niining inspiradong mga pulong ni David: “Ako kaniadto usa ka batan-on, ako natigulang na, ug bisan pa niana ako wala makakita sa usa nga matarong nga bug-os gipasagdan, ni ang iyang mga anak nangitag tinapay.” (Salmo 37:25) Karong adlawa, ang dagayang espirituwal nga pagkaon gitagana pinaagi sa “matinumanon ug maalamong ulipon.” (Mateo 4:4; 24:45-47) Dugang sa daghang tigom sa usa ka semana, nabatonan nato ang Bibliya, ang mga magasing Ang Bantayanang Torre ug Pagmata!, ug daghan pang ubang basahon. Bisan sa kanasoran diin gidili ang buluhatong pagwali sa mga Saksi ni Jehova, ang mga suplay sa espirituwal nga pagkaon madawat nga regular. Walay makulang sa mga karnero ni Jehova!

 5. Nganong ang mga karnero ni Jehova karong adlawa malinawon ug relaks, ug uban ang unsang resulta?

⁵ “Siya nagapahigda kanako sa sibsibanan nga malunhaw.” (Salmo 23:2) May haluag nga mga sibsibanan palibot sa daghang siyudad sa karaang Israel. Maingong ang usa ka mahigugmaong magbalantay niadto nagdala sa iyang mga karnero ngadto sa maayo, luwas nga mga sibsibanan, si Jehova nagaatiman usab sa iyang mga karnero karong adlawa. Nagaingon ang salmista: “Kita mao ang katawhan sa iyang sibsibanan.” (Salmo 79:13; 95:7) Ang literal nga mga karnero maayog kahimtang kon sila kontento ug makapahulay gikan sa kainit sa adlaw. Ang mga karnero ni Jehova karong adlawa malinawon ug relaks tungod kay sila nagasalig sa hamtong nga mga magbalantay—nabansayng mga magtatan-aw sa mga kongregasyon ug mga sirkito. Ingong resulta, nagadaghan ang espirituwal nga mga panon. Ang daghang tawo nga sa nangagi gimaltratar sa mini nga mga magbalantay sa Dakong Babilonya karon malipayon kaayo ug kontento ingong mga karnero ni Jehova.

 6. Sa unsang paagi si Jehova ‘nagatultol kanato pinaagi sa mga pahulayang dapit nga maayong pagkatubig?’

⁶ “Siya nagatultol kanako sa mga pahulayang dapit nga maayong pagkatubig.” Sa Israel ang tubig lisod hikaplagan sa ting-init. Karong adlawa, si Jehova nagatultol kanato sa mga pahulayang dapit nga maayong pagkatubig’ pinaagi sa pagtaganang dagaya kaayo sa mga tubig sa kamatuoran. (Itandi sa Ezekiel 34:13, 14.) Ug ang manalagnang si Isaias nagahatag niining makadasig nga imbitasyon: “Hoy kamo dinha, kamong tanang giuhaw! Umari kamo sa tubig.” (Isaias 55:1) Pinaagi sa pag-inom niining espirituwal nga tubig, ang mga karnero makabatog panalipod gikan sa kalayonhong mga paghukom nga modangat niadtong “wala makaila sa Diyos ug niadtong wala magsugot sa maayong balita.”​—2 Tesalonica 1:8; Pinadayag 7:16, 17.

 7. Kanus-a mapuslanon ang espirituwal nga kahupayan gikan kang Jehova, ug ilalom sa unsang mga kahimtang nga mapuslanon kaayo ang gisag-ulong mga teksto sa Bibliya?

⁷ “Gipalig-on niya ang akong kalag.” (Salmo 23:3) Kon kita gikapoy, may suliran, naluya, o nagaatubang ug seryosong pagsupak, si Jehova nagapalig-on kanato pinaagi sa iyang Pulong. Busa, maayong batasanon sa mga Kristohanon ang pagbasag usa ka bahin sa Bibliya sa kada adlaw. Ginabuhat ba nimo kini? Nadiskobrehan sa uban nga makatabang ang pagsag-ulog mga teksto, sama sa Exodo 34:6, 7 o Proverbio 3:5, 6. Nganong makatabang man kini? Aw, kon mahitabo ang usa ka krisis ug wala kay Bibliya nga magamit, ang makapalipayng mga hunahuna sa Kasulatan dihadiha makapalig-on kanimo. Daghang igsoon nga gibalhog sa mga prisohan o sa mga kampong prisohan tungod sa pagbarog nga malig-on dapig sa matarong nga mga prinsipyo nahupayan kaayo ug napalig-on pinaagi sa paghinumdom sa nasag-ulong mga kasulatan. Oo, ang Pulong sa Diyos “makapalipay sa kasingkasing” ug “makapasidlak sa mga mata”!—Salmo 19:7-10.

 8. Sayon ba ang pagsubay sa “mga dalan sa pagkamatarong,” apan ang pagbuhat sa ingon motultol sa unsa?

⁸ “Siya nagatultol kanako sa mga dalan sa pagkamatarong.” Ang mga dalan sa pagkamatarong lisod subayon, apan kana mosangko sa kinabuhi. Sumala sa giingon ni Jesus: “Hiktin ug sigpit ang dalan padulong sa kinabuhi.” (Mateo 7:14) Gipahayag ni apostol Pablo ang puluparehong ideya pinaagi sa pagsulti ngadto sa mga tinun-an sa Listra, Iconio, ug Antioquia: “Kinahanglang mosulod kita sa gingharian sa Diyos latas sa daghang kasakitan.” Ug tinong nasayod si Pablo kon unsay iyang gisulti. Dili pa dugay una niadto, siya gibato sa Listra ug gibiyaan kay abig patay na!—Buhat 14:19-22.

 9. (a) Sa unsang paagi ang Diyos ‘nagatultol kanato diha sa mga dalan sa pagkamatarong’? (b) Sa unsang paagi makatabang ang Salmo 19:14? (c) Unsang mga kasulatan ang makatabang nato sa paglikay sa mga lit-ag sa mahilayong sekso?

⁹ Si Jehova ‘nagatultol kanato sa mga dalan sa pagkamatarong’ pinaagi sa paggiya ug pagtudlo kanato pinaagi sa iyang Pulong ug organisasyon. Apan ang kadaghanang tawo nagasubay sa lapad ug luag nga dalan “padulong sa kalaglagan.” (Mateo 7:13) Ang kaylap seksuwal nga kahugawan ug kusog-nagakaylap nga hampak sa AIDS nagapasiugda sa panginahanglan nga likayan sa mga Kristohanon ang daotang mga kauban. (1 Corinto 15:33) Kinahanglang kita magbantay usab sa pagpugong sa atong mga hunahuna gikan sa pagkahisalaag ngadto sa mahugawng mga dalan. (Salmo 19:14) Sa maong katuyoan, atong ipadapat kanunay ang maayong tambag nga ginahatag sa Pulong sa Diyos mahitungod sa sekso ug kon unsaon paglikay sa daghang lit-ag sa imoralidad.—1 Corinto 7:2-5; Efeso 5:5; 1 Tesalonica 4:3-8.

10. (a) Unsa ang responsabilidad sa mga Saksi ni Jehova bahin sa balaang ngalan? (b) Nganong ang mga tawong kalibotanon kadaghanan nagasaway kanato? (c) Sa unsang mga kahimtang nga si Jehova motabang kanato?

¹⁰ “Tungod sa iyang ngalan.” Ang mga Saksi ni Jehova may bug-at nga responsabilidad sa paghimaya sa ngalan sa Diyos ug dili paghatag ug kaulawan niana. (Mateo 6:9; Exodo 6:3; Ezekiel 38:23) Daghang kalibotanong tawo daling moakusar sa katawhan ni Jehova. Kon kini himoon tungod sa atong pagbarog sa mga prinsipyo sa Bibliya sama sa neyutralidad o pagkabalaan sa dugo, hinlo ang atong konsensiya. Apan kon kini mahitabo tungod sa atong pagbuhat ug daotan, kita makapakaulaw kang Jehova. (Isaias 2:4; Buhat 15:28, 29; 1 Pedro 4:15, 16) Busa hinaot dumtan nato kon unsay daotan. (Salmo 97:10) Kon maagoman nato ang paglutos, si Jehova kanunayng motabang kanato ug manalipod kanato tungod sa iyang ngalan.

Si Jehova Nagapanalipod sa Iyang mga Karnero

11. Unsay gipasabot sa “ang walog sa bagang landong,” ug kini makapahinumdom kanato sa unsa mahitungod kang Jesus?

¹¹ “Bisan magalakaw ako sa walog sa baga nga landong, ako walay kahadlok sa bisan unsa nga daotan.” (Salmo 23:4) Ang hubad ni Isaac Leeser mabasa: “Oo, bisan pag magalakaw ako latas sa walog sa landong sa kamatayon, ako walay kahadlok sa daotan.” Kini basin makapahinumdom sa lalom nga mga pangpang, o mga walog, nga nagalatas gikan sa kabukiran sa Judea sa kasadpang kiliran sa Patay nga Dagat. Ang usa ka walog, o lugot, diin nagahupo ang mga mananap nga manunukob diha sa mga landong maoy peligrong dapit alang sa mga karnero. Giagian ni David ang daghang peligrong mga walog sa iyang kinabuhi, uban sa kamatayon nga nagtutok kaniya sa nawong. Apan sanglit gigiyahan man siya sa Diyos, siya masaligon ug wala magpadaog sa wala-kapugnging kahadlok. Angay nga batonan nato ang susamang pagsalig kang Jehova. Kining pagtumong sa “baga nga landong” makapahinumdom usab kanato sa tagna ni Isaias: “Sa nagapuyo sa yuta sa baga nga landong, ang kahayag mismo nagasidlak ibabaw kanila.” Si Mateo naghisgot niining tagnaa ug nagpadapat niini kang Jesu-Kristo, nga nag-ingon: “Ang katawhang naglingkod sa kangitngit nakakita sa dakong kahayag, ug alang niadtong nagalingkod sa usa ka dapit sa landong sa kamatayon, ang kahayag misidlak ibabaw kanila.” Sa unsang paagi? Pinaagi sa dakong kampanya sa pagwali nga gihimo ni Jesus.—Isaias 9:2; Mateo 4:13-16.

12. (a) Sa unsang paagi ang mga alagad ni Jehova nakapasibo sa paglutos diha sa daghang nasod, ug uban ang unsang resulta? (b) Giunsa ni Pedro pagdasig ang gilutos nga unang mga Kristohanon?

¹² Si David ‘walay kahadlok sa daotan.’ Kana matuod usab sa mga alagad ni Jehova karong adlawa, bisan pag sila dili popular niining daotang kalibotan nga gimandoan ni Satanas. (1 Juan 5:19) Daghang tawo aktuwal nagadumot kanila, ug sila grabeng gilutos diha sa pipila ka nasod. Apan niining mga yutaa sila nagapadayon sa pagwali sa maayong balita sa Gingharian, bisan pag dili dayag sama sa kasagarang ilang ginabuhat. Si Jehova nahibalo nga si Jehova nagauban kanila ug manalipod kanila. (Salmo 27:1) Ang maayong pag-uswag ginahimo diha sa daghang nasod diin ang buluhaton sa Gingharian ginabuhat sa tago. Nianang mga nasora, ang mga Saksi ni Jehova nagapahayag sa mga pulong sa salmo: “Si Jehova ania sa akong kiliran; ako dili mahadlok. Unsay mahimo kanako sa yutan-ong tawo?” (Salmo 118:6) Ang maong mga Saksi anaa sa kahimtang susama sa iya sa unang mga Kristohanon nga gisulatan ni apostol Pedro niining makapadasig nga mga pulong: “Bisan pag kamo magaantos tungod sa pagkamatarong, malipayon kamo. Bisan pa niana, ang ilang gikahadlokan ayaw ninyo pagkahadloki, ni mabalaka kamo.”—1 Pedro 3:14.

13. (a) Unsang makaikag nga kausaban ang nahitabo sa Salmo 23:4, ug ngano? (b) Sa unsang paagi ang mga Kristohanon makabuntog sa ilang mga kahadlok?

¹³ “Kay ikaw nagauban kanako.” Palihog matikdi ang makaiikag kaayong butang niining mga pulonga. Ang inspiradong salmista mibalhin gikan sa ikatulong persona ngadto sa ikaduha. Inay sa paghisgot kang Jehova ingon nga “siya” o “he,” si David sa maong panahon migamit sa pronombreng “ikaw,” o “you.” Ngano? Kay kini mas masanduroton. Ang kapeligrohan mas makapasuod kanato sa atong mahigugmaong Amahan, si Jehova. Unya kita magpahimulos ug mas masandurotong relasyon uban kaniya. Pinaagi sa pag-ampo ug pangamuyo, kita makasangpit kaniya alang sa panalipod, ug niana makabuntog sa atong mga kahadlok.—Itandi ang Sofonias 3:12.

14. (a) Unsang mga galamiton ang nabatonan sa mga magbalantay sa karnero sa panahon ni David, ug giunsa nila paggamit kadto? (b) Sa unang paagi ang Kristohanong mga magbalantay nagapanalipod sa panon karong adlawa?

¹⁴ “Ang imong barras ug imong sungkod mao ang mga butang nagalipay kanako.” Ang Hebreohanong pulong nga she’vet, nga gihubad “barras,” mahimong magkahulogan sa usa ka baston sa magbalantay sa karnero. Ang barras ug ang sungkod magamit sa depensa ug paghawas o pagpaila sa awtoridad. Tino, kining mga galamitona mapuslanon kaayo sa pag-abog sa mga manunukob sama sa mga lobo ug mga halas. Ang baston sa magbalantay sa karnero magamit usab sa pagtulod nga hinay sa mga karnero sa hustong direksiyon o bisan sa pagpabalik sa karnerong mahisalaag nga duol kaayo sa usa ka dapit diin kini basin mahulog ug masamad. Karong adlawa, si Jehova nagataganag matinumanong mga magbalantay, mga ansiano sa mga kongregasyon, kinsa nagapanalipod sa panon gikan nianang espirituwal nga mga manunukob sama sa mga apostata. O ang mga ansiano tingali kinahanglang magtambag niadtong dili kaayo tigtambong sa tigom o masipyat sa Kristohanong kagawian.

Usa ka Dagayang Kombira Taliwala sa mga Kaaway

15. (a) Unsang makahuloganong kausaban sa ilustrasyon ang nahitabo sa Salmo 23:5? (b) Unsang mga kamatuoran ang nagapakitang ang katawhan ni Jehova gipakaon ug maayo sa espirituwal nga paagi, nga kasukwahi kang kinsa?

¹⁵ “Ikaw nagahikay sa akong atubangan sa usa ka lamesa atubangan niadtong nagapakitag pagbatok kanako.” (Salmo 23:5) Dinhi aduna kitay makahuloganong kausaban sa ilustrasyon, gikan sa usa ka magbalantay sa karnero ngadto sa usa ka tagbalay. Ingong mahinatagon kaayong tagbalay, si Jehova nagataganag dagayang espirituwal nga pagkaon pinaagi sa dinihogang “ulipon” nga matang. (Mateo 24:45) Bisan pag kita nagapuyo sa mabatokong kalibotan, kita gipakaon ug maayo. Ang Bantayanang Torre gipatik sa kapin ug usa ka gatos ka pinulongan aron ang mga tawong nagapuyo sa nagkadaiyang mga dapit sama sa South Africa, Greenland, Solomon Islands, ug India mapakaon sa espirituwal. Gawas pa, ang mga 55,000 ka kongregasyon sa tibuok kalibotan dunay bansay-kaayong mga mamumulong sa publiko ug mga magtutudlo ug maayong mga tigomanan, apil ang ginatos ka bag-ong mga Kingdom Hall. Kapin sa 3,000,000 ka pagtuon sa Bibliya ang ginadumala sa pagtabang sa mga karnerohon. Sa kasukwahi, kadtong anaa sa Dakong Babilonya, ang imperyo sa kalibotan sa bakak nga relihiyon gigutom.—Isaias 65:13.

16. (a) Kasukwahi sa usa ka babayeng makasasala, unsay wala mabuhat sa usa ka Pariseo alang kang Jesus? (b) Unsang matang sa lana ang gitagana ni Jehova alang sa iyang maunongong mga alagad karong adlawa?

¹⁶ “Gidihogan mo sa lana ang akong ulo.” Sa karaang Israel, ang usa ka maabiabihong tagbalay nagtaganag lana sa pagdihog sa mga ulo sa iyang mga bisita. Makaiikag, sa usa ka okasyon si Jesus mao ang bisita sa usa ka Pariseo nga wala magdihog sa ulo ni Jesus sa lana o motaganag tubig sa paghugas sa iyang mga tiil. Niadtong panahona, ang usa ka babayeng makasasala naghugas sa iyang mga tiil pinaagi sa iyang mga luha ug nagdihog niana sa espesyal humot nga lana. (Lucas 7:36-38, 44-46) Apan si Jehova maabiabihon kaayong tagbalay! Alang sa iyang maunongong mga alagad, siya nagatagana sa espirituwal nga “lana sa kalipay.” (Isaias 61:1-3) Oo, ang katawhan ni Jehova tinong nagakalipay karong adlawa.

17. (a) Ang usa ka ‘puno kaayong kopa’ nagapasabot sa unsa? (b) Sa unsang paagi si Jehova nagataganag ‘puno kaayong kopa’ alang sa iyang mga alagad karong adlawa?

¹⁷ “Ang akong kopa puno kaayo.” Ang laing hubad mao: “Ang akong kopa nagaawas.” (Moffatt) Kini nagpasabot sa espirituwal nga kadagaya. Bisan tuod wala ipasabot ang hinobrang pag-inom, kining mga pulonga nagasugyot sa usa ka kopa sa lamiang bino. Kining ilimnona makaayo sa lawas, sumala sa gipakita sa tambag ni Pablo kang Timoteo: “Ayaw na pag-inom ug tubig, apan inom ug diyutayng bino alang sa imong kutokuto ug sa imong kanunay nga pagkasakit.” (1 Timoteo 5:23) Sa espirituwal nga diwa, ang bino nagapasadya usab sa atong mga kasingkasing. (Salmo 104:15) Ang atong mahigugmaong Amahan, si Jehova, madagayaong nagataganag espirituwal nga kombira sa maayong mga butang alang sa iyang maunongong mga alagad, apil ang ‘puno kaayong kopa’ sa kalipay.

18. (a) Ang pagkamaayo ug mahigugmaong-kalulot ni Jehova gipahimuslan ni kinsa, ug sa unsang paagi ang Salmo 103:17, 18 nagapakita niini? (b) Unsang mahimayaong kalaoman ang anaa sa unahan alang niadtong matinumanon kang Jehova?

¹⁸ “Sa pagkamatuod ang pagkamaayo ug mahigugmaong-kalulot magasunod kanako sa tanang adlaw sa akong kinabuhi.” (Salmo 23:6) Ang pagkamaayo maoy bahin sa mga bunga sa balaang espiritu ni Jehova. (Galacia 5:22, 23) Ang pagkamaayo ug mahigugmaong-kalulot sa Diyos gipahimuslan niadtong nagalakaw sa iyang dalan. (Salmo 103:17, 18) Uban ang lig-ong pagtuo kang Jehova, ang iyang katawhan makaatubang sa bisan unsang pagsulay nga ilang mahibalag. Sila sa kanunay mao ang mga tumong sa iyang pagpanalangin ug mahigugmaong pag-atiman. Ug ang pagkamatinumanon hangtod sa kataposan magkahulogan sa kinabuhing walay kataposan magkahulogan sa kinabuhing walay kataposan sa bag-ong kalibotan. Talagsaon kaayong kalaoman!

19. (a) Unsay kahulogan sa “pagpuyo sa balay ni Jehova”? (b) Unsay gitukod sa organisasyon ni Jehova sa pagpasiugda sa matuod nga pagsimba karong adlawa, ug nganong libolibong dedikadong katawhan nagaisip nga pribilehiyo ang pag-alagad didto? (c) Kinsa pa ang determinado sa pag-alagad sa Diyos sa walay kataposan?

¹⁹ “Ug ako magapuyo sa balay ni Jehova sa gidugayon sa mga adlaw.” Sa adlaw ni David ang sangtuwaryo sa Diyos mao ang tabernakulo, kay ang templo wala pa niadto matukod. Sanglit diha sa hunahuna sa salmista ang maayohong tagbalay, ang ‘pagpuyo sa balay ni Jehova’ nagkahulogan sa pagbatog maayong relasyon uban sa Diyos ingong Iyang bisita. (Salmo 15:1-5) Karong adlawa, kanang balaya mao ang balaang templo ni Jehova, ang iyang kahikayan alang sa maputling pagsimba. Si Haring Solomon nakapribilehiyo sa pagtukod sa unang materyal nga templo, nga tugob giadornohan sa bulawan ug gitukod sa pagpasidungog kang Jehova. Pagkadakong pribilehiyo ang pag-alagad niadto didto! Bisan tuod ang maong templo wala na maglungtad, ang Diyos dunay balaang organisasyon sa pagpasidungog kaniya ug pagpasiugda sa maputling pagsimba. Ingong usa ka paagi sa pagbuhat niini, ang organisasyon ni Jehova nagtukod ug mga Balayng Bethel diha sa kawhakawhaang nasod. Ang “Bethel” nagkahulogang “Balay sa Diyos,” ug libolibong dedikadong tawo ang nagaalagad sa maong teokratikanhong mga sentro. Ang pipila sa maong mga lalaki ug mga babaye nagaalagad niining paagiha “sa gidugayon sa mga adlaw,” kay nagagugol sa kinadak-an nilang kinabuhi sa pag-alagad sa Bethel. Milyonmilyong uban, nga dili mga membro sa pamilyang Bethel, susamang determinado sa pag-alagad kang Jehova sa walay kataposan.

20. (a) Nganong ang Salmo 23 usa ka talagsaong bahin sa Kasulatan, ug kita gitabangan niini sa pag-ugmad sa unsa? (b) unsang mga pribilehiyo ang nagahulat sa matinumanong mga alagad ni Jehova?

²⁰ Ang ika-23ng Salmo nahisama sa usa ka mahal nga bato nga daghag kiliran nga mokidlap kon mahayagan. Kini nagabayaw sa mahimayaong ngalan sa atong mahigugmaong langitnong Amahan, si Jehova, ug nagapadayag kon sa unsang paagi siya nagagiya, nagapanalipod, ug nagatagana alang sa iyang mga karnero. Ingong resulta, ang iyang katawhan malipayon, gipakaon-ug-maayo sa espirituwal nga paagi, ug kusog nagauswag sa gidaghanon, bisan diha sa kanasoran diin adunay mapait nga paglutos. Ang Salmo 23 nagatabang usab kanato sa pag-ugmad sa mainitong pakigsandurot sa atong Maglalalang. Ug iniglantaw nato sa daghag-bituon nga kalangitan, sama sa gibuhat ni David samtang nagbantay sa iyang panon, kita mapasalamatong ang Maglalalang niining dako kaayong uniberso nagaatiman kanato samag mahigugmaong Magbalantay. Sa kamahigugmaon, siya nagatanyag kanato sa kinabuhing dayon sa bag-ong kalibotan kon huptan nato ang atong integridad ngadto kaniya. Pagkatalagsaon unya nga makahimamat sa maong matinumanong binanhawng mga alagad sa Diyos sama kang David! Ug talagsaon gayong pribilehiyo ang pag-alagad kang Jehova, ang Dakong Magbalantay, hangtod sa hangtod!

Unsay Imong Tubag?

◻ Sa unsang paagi si Jehova nagapamatuod nga atong mahigugmaong Magbalantay?

◻ Pinaagi sa unsa nga ang Diyos ‘nagatultol kanato sa mga dalan sa pagkamatarong?’

◻ Sa unsang paagi si Jehova nagapanalipod sa iyang mga karnero?

◻ Sa unsang bahin ang Diyos nagahikay sa usa ka lamesa alang kanato taliwala sa atong mga kaaway?