“Ako Molakaw Libot sa Imong Halaran, Oh Jehova”

“AKO manghunaw sa akong mga kamot sa pagkainosente, ug ako molakaw libot sa imong halaran, Oh Jehova.” (Salmo 26:6) Pinaagi niining mga pulonga si Haring David sa kakaraanan mipahayag sa iyang debosyon kang Jehova. Apan, nganong siya “molakaw libot” sa halaran ni Jehova, ug sa unsang diwa?

Alang kang David, ang sentro sa pagsimba kang Jehova mao ang tabernakulo lakip ang naputos-ug-tumbaga nga halaran niini, nga panahon sa iyang paghari nahimutang sa Gabaon, amihanan sa Jerusalem. (1 Hari 3:4) Ang halaran maoy mga 2.2 metro kuwadrado lamang, mas gamay kay sa maanindot nga halaran nga pagatukoron sa sawang sa templo ni Solomon.a Bisan pa niana, si David nalipay kaayo sa tabernakulo lakip sa halaran niini, nga mao ang sentro sa putli nga pagsimba sa Israel.—Salmo 26:8.

Ang mga halad-nga-sinunog, mga halad-sa-panag-ambit, ug mga halad-sa-sala gihimo diha sa maong halaran, ug ang mga halad alang sa nasod gihimo panahon sa tinuig nga Adlaw sa Pagtabon sa Sala. Ang halaran ug ang mga halad niini adunay kahulogan alang sa mga Kristohanon karon. Gipatin-aw ni apostol Pablo nga ang halaran naghawas sa kabubut-on sa Diyos, nga sumala niana Siya modawat ug nahiangayng halad alang sa pagtubos sa katawhan. Si Pablo miingon: “Sa gikaingong ‘kabubut-on’ kita nabalaan pinaagi sa pahinungod sa lawas ni Jesu-Kristo makausa alang sa tanang panahon.”—Hebreohanon 10:5-10.

Kon hapit nang moalagad sa halaran, ang mga saserdote sa naandan manghunaw sa tubig aron hinloan ang ilang kaugalingon. Nan sa kahaom, si Haring David nanghunaw “sa pagkainosente” una ‘molakaw libot sa halaran.’ Siya milihok “uban ang integridad sa kasingkasing ug uban ang katul-id.” (1 Hari 9:4) Kon wala siya manghunaw niining paagiha, ang iyang pagsimba—ang iyang ‘paglakaw libot sa halaran’—dili unta mahimong dalawaton. Tinuod, si David dili Levihanon ug walay pribilehiyo nga maghimog saserdotehanong pag-alagad sa halaran. Bisan pag hari, wala gani siya tugoting mosulod sa sawang sa tabernakulo. Bisan pa niana, ingong matinumanong Israelinhon, iyang gituman ang Moisesnong Balaod ug regular nga nagdala sa iyang mga halad aron ipresentar diha sa halaran. Siya naglakaw libot sa halaran sa diwa nga nagsentro sa iyang kinabuhi diha sa putli nga pagsimba.

Ato bang masundog karon ang panig-ingnan ni David? Oo. Kita usab makapanghunaw sa pagkainosente ug makalakaw libot sa halaran sa Diyos kon kita magpasundayag ug pagtuo sa halad ni Jesus ug, pinaagi sa ‘inosenteng mga kamot ug putling kasingkasing,’ bug-os-kasingkasing nga mag-alagad kang Jehova.—Salmo 24:4.

[Footnote]

[Hulagway sa panid 23]

Ang halaran naghulagway sa kabubut-on ni Jehova, nga pinaagi niana siya modawat ug nahiangayng halad alang sa pagtubos sa katawhan