Tibuok-Kalibotang Kasegurohan Ilalom sa “Prinsipe sa Pakigdait”
Kapitulo 3
Ang Pagmando sa “Prinsipe sa Pakigdait” sa Taliwala sa mga Kaaway
DIHANG hapit na siyang mikayab sa langit kapin sa 19 ka siglo kanhi, ang umaabot niadto nga “Prinsipe sa Pakigdait,” si Jesu-Kristo, mipahayag niining panamilit nga mga pulong ngadto sa usa ka pundok sa iyang matinumanong mga disipulo: “Busa panglakaw kamo ug himoa ninyong mga tinun-an ang katawhan sa mga kanasoran, sa pagbawtismo kanila sa ngalan sa Amahan ug sa Anak ug sa balaang espiritu . . . . Ug, tan-awa! Ako magauban kaninyo kanunay hangtod sa konklusyon sa sistema sa mga butang.”—Mateo 28:19, 20.
2 Kadto bang mga pulonga ni Jesus nagpakita nga kinahanglang makabig una ang kalibotan sa dili pa ang “konklusyon sa sistema sa mga butang” nga nagsugod sa 1914? Dili. Karon, sa hinapos niining ika-20ng siglo, ang kalibotan sa katawhan halayo kaayong makabig ngadto kang Jesu-Kristo ingong Manluluwas ug tukmang Hari niini. Apan, kini wala makalangan sa katumanan sa gitagna ni Jehova diha sa mga tagna sa Bibliya. Dili katuyoan sa Diyos nga ang tibuok kalibotan sa katawhan makabig sa dili pa magsugod si Jesu-Kristo sa pagmando ingong “Prinsipe sa Pakigdait.” Sa kasukwahi, siya gitagna nga magsugod sa pagmando sa taliwala sa iyang mga kaaway.
3 Bisan sa panahong dinhi pa siya sa yuta, nasayod si Jesu-Kristo niining kamatuorana. Dihang hapit na siyang mamatay ingong martir, nagkalalis siya uban sa iyang relihiyosong mga magsusupak ug mikutlo sa Salmo 110. Mabasa nato kining bahina diha sa Lucas 20:41-44: “Apan siya miingon kanila: ‘Unsaon ba nila sa pagpakaingon nga si Kristo anak ni David? Kay si David na gayod mao ang nagsulti diha sa basahon sa Salmo, “Si Jehova miingon sa akong Ginoo, Lumingkod ka sa akong tuo hangtod nga ang imong mga kaaway mahimo ko nga tumbanan sa akong mga tiil.” Bisan si David nagtawag kaniya nga “Ginoo”; busa unsaon man niya pagkahimong anak ni David?’”
4 Nan, sa matin-aw, si Jesu-Kristo, ingong Anak ni David, dili magsugod sa pagmando tapos nga makabig ang kalibotan. Hinunoa, siya nagsugod sa pagmando taliwala sa mga kaaway diin si Jehova nga Diyos pinaagi sa gubat sa ulahi mohimog tumbanan sa tiil sa iyang naentronong Anak. Busa ang Salmo 2, sa mosunod nga mga pulong, nagpakita sa sinugdanan sa iyang pagmando ingong “Prinsipe sa Pakigdait” sa taliwala sa iyang mga kaaway:
5 “Nganong nagalungotlungot ang mga nasod ug ang mga katawhan nagapalandong sa butang nga kawang? Ang mga hari sa yuta nanagpahamutang sa ilang kaugalingon ug ang mga punoan nanagsabotsabot sa tingob batok kang Jehova ug batok sa usa nga iyang dinihogan [iyang Kristo], nga nagaingon: ‘Bugtoon nato ang ilang mga talikala ug isalibay ta gikan kanato ang ilang mga igtatakgus!’ Ang Usa nga nagalingkod sa kalangitan magakatawa; si Jehova magahimo kanila nga yubitonon. Unya siya magasulti kanila diha sa iyang kaligutgut ug diha sa iyang kapungot siya magagubot kanila, nga nagaingon: ‘Ako, ako mismo, nagbutang sa akong hari diha sa Sion, ang akong bukid nga balaan.’
6 “Tugoti ako nga magakutlo sa sugo ni Jehova; siya miingon kanako [Kristo]: ‘Ikaw mao ang akong anak; ako, karon, nahimong imong amahan. [Ang Salmo 2:7 natuman dihang gibanhaw ni Jehova ang iyang Anak gikan sa patay, ug busa nahimong walay kataposang Amahan ni Jesus. (Roma 1:4)] Kanako mangayo ka, ug kanimo igahatag ko ang mga nasod nga imong panulondon ug mapanag-iya mo ang mga kinatumyang dapit sa yuta. Pagadugmokon mo sila sa sungkod nga puthaw, pagapulpogon mo sila ingon sa banga sa magkukulon.’ Busa karon, Oh mga hari, magmalaamon kamo; magpatudlo kamo, Oh mga maghuhukom sa yuta. Alagara si Jehova uban ang kahadlok ug managlipay kamo uban ang pagkurog. Humalok kamo sa anak, aron Siya dili masuko ug mangawala kamo diha sa dalan, kay daling mosilaob ang iyang kapungot. Malipayon kadtong modangop diha kaniya.”
7 Sumala sa Buhat 4:24-27, ang mga apostoles ni Jesu-Kristo mipunting niining ikaduhang salmo tapos sa adlaw sa Pentekostes, 33 K.P.: “Nagdungan sila sa pagpatugbaw sa ilang mga tingog ngadto sa Diyos ug miingon: ‘Soberanong Ginoo, ikaw mao ang Usa nga nagbuhat sa langit ug yuta ug sa dagat ug sa tanang butang nga anaa kanila, ug nga pinaagi sa balaang espiritu miingon pinaagi sa baba sa among ginikanan nga si David nga imong ulipon, “Nganong nanaggubot man ang mga kanasoran ug ang katawhan nanagpalandong sa mga butang nga kawang? Ang mga hari sa yuta nagkatigom batok kang Jehova ug batok sa iyang usa nga dinihogan.” Kay sa pagkatinuod, si Herodes ug si Poncio Pilato uban sa mga tawo sa kanasoran ug sa katawhan sa Israel nagkatigom niining siyudara batok sa imong balaang alagad si Jesus, nga imong gidihogan.’”
Dakong Katumanan sa Salmo 2
8 Nakakita ang tuig 33 sa unang siglo sa unang katumanan niadtong matagnaong mga pulong sa Salmo 2:1, 2. Maylabot kini sa tawo nga si Jesu-Kristo sa yuta. Siya gidihogan ni Jehova sa balaang espiritu sa panahong gibawtismohan siya ni Juan Bawtista. Apan ang dakong katumanan sa Salmo 2 nahitabo sukad sa kataposan sa Panahon sa mga Hentil sa tuig 1914. (Lucas 21:24) Napamatud-an nga ang “tinudlong mga panahon sa kanasoran,” nga nagsugod sa unang kalaglagan sa siyudad sa Jerusalem sa 607 W.K.P., natapos sa tuig 1914.a Dayon ang agoniyas milanog alang sa mga nasod niining kalibotana, lakip niadtong sa Kakristiyanohan.
9 Sa panahon sa unang kalaglagan sa Jerusalem, pinaagi sa mga Babilonyanhon, ang Gingharian ni Jehova nga Diyos diha sa nasod sa Israel, nga gihawasan sa harianong linya ni Haring David, natapos. Sukad niadto, ang lumad nga mga Hudiyo wala nay hari sa ibabaw kanila sa linya sa harianong banay ni David. Apan ang Gingharian sa Labing Hataas nga Diyos diha sa mga kamot sa kaliwat ni David, nga kaniya naghimo si Jehova ug pakigsaad alang sa usa ka dumalayong Gingharian diha sa iyang linya, dili magpabiling gun-ob sa yuta sa walay kataposan.
10 Ngadto sa hari sa karaang Israel, dihang hapit na ang iyang unang kalaglagan, gipalihok ni Jehova ang iyang propetang si Ezekiel sa pagpahayag niining mga pulonga: “Ug mahitungod kanimo, Oh nga nasamdag dako, daotang pangulo sa Israel, kansang adlaw ania na sa panahon sa kataposan sa kadaotan, mao kini ang giingon sa Soberano Ginoong Jehova, ‘Kuhaa ang mitra, ug kuhaa ang purongpurong. Kini dili na managsama. Bayawa ang anaa sa ubos, ug ipaubos ang anaa sa itaas. Ug himoon ko kining kalaglagan, kalaglagan, kalaglagan. Ug walay makapanag-iya niini hangtod moabot siya nga may katungod, ug akong ihatag kini kaniya.’”—Ezekiel 21:25-27.
11 Ang usa nga may “katungod” miabot sa persona ni Jesu-Kristo, ug ang iyang linya sa kaliwat gikan kang David natala sa Mateo 1:1-16 ug Lucas 3:23-31. Siya sagad gitawag nga “ang Anak ni David.” Sa adlaw sa iyang madaogong pagsulod ngadto sa Jerusalem, nga nagsakay sa usa ka asno sumala sa katumanan sa tagna, ang malipayong panon sa mga Hudiyo nga miuban kaniya ug ang iyang mga apostoles misinggit sa kalipay: “Luwasa, kami nagaampo, Anak ni David! Bulahan ang nagaanhi sa ngalan ni Jehova! Luwasa siya, kami nagaampo, sa kahitas-an!”—Mateo 21:9.
“Ang Anak ni David” Naentrono na sa Langit
12 Ang 2,520 ka tuig sa pagyatak sa mga mga Hentil sa Gingharian sa Diyos sa mga kamot sa banay ni David natapos sa 1914. Dayon miabot ang panahon alang kang Jesu-Kristo, “ang Anak ni David,” sa paglingkod sa trono, dili dinhi sa yutan-ong trono, kondili sa kinahitas-an sa kalangkitan sa tuong kamot ni Jehova nga Diyos!—Daniel 7:9, 10, 13, 14.
13 Kanang halandomong hitabo gipunting na sukad pa sa 1876 pinaagi niadtong nangahimong kauban sa Watch Tower Bible and Tract Society. Apan ang mga nasod sa yuta, bisan sa Kakristiyanohan, midumili sa pag-ila niana ingong panahon alang kanila sa pagtugyan sa ilang yutan-ong mga gingharian ngadto sa bag-ong naentronong “Anak ni David.” Wala sila moila nga siya ang naghawid sa hinatag sa Diyos nga katungod sa pagmando sa ibabaw sa tibuok yuta, nga tumbanan sa tiil ni Jehova. (Mateo 5:35) Ilang gipaila ang ilang bukas nga pagsalikway sa may katungod nga Hari pinaagi sa pakigbahin sa unang gubat sa kalibotan.
14 Taliwala sa tanang naggubatay nga mga nasod, ang dedikadong mga Kristohanon nga kauban sa Watch Tower Society nahiagom sa grabeng kapig-otan sa pagbulag sa ilang desisyon sa pagpahilayo sa pagkasad-an sa dugo. Wala nila bug-os masabti niadto ang kinahanglanon sa Kristohanong neyutralidad. Ang tagna sa “Anak ni David,” si Jesu-Kristo, ngadto sa iyang mga disipulo mahitungod sa “konklusyon sa sistema sa mga butang” nahimong tinuod: “Pagadumtan kamo sa tanang kanasoran tungod sa akong ngalan.” (Mateo 24:9) Nagpadayon kini nga pagdumot sukad pa sa kataposan sa Gubat sa Kalibotan I. Tungod niining makahuloganong mga kamatuoran sa modernong kasaysayan, unsay kahulogan sa kahimtang sa tibuok-yuta? Kini: Ang “Prinsipe sa Pakigdait” nagmando na sa taliwala sa mga kaaway dinhi mismo sa yuta!
15 Gipakatawo sa Labing Makagagahom nga Diyos ang gisaad nga Mesiyanikong Gingharian sa iyang tinudlong panahon bisan pag presente ang tanang mga kaaway sa langit ug sa yuta. Ang Pinadayag 12:1-9 nagpakita nga dihang gipanganak ang Gingharian sa ‘anak nga lalaki’ sa langit gikan sa tagoangkan sa samag-asawang organisasyon ni Jehova, pagaingon pa, kalit nga mibuto ang gubat sa langit. Ang balaang kalangitan dili na angay nga dapit sa simbolikong dragon, si Satanas nga Yawa, ug sa iyang demonyong mga manulonda. Niini nga gubat, nga wala-makita sa mga mata sa tawo, ang gihatagag gahom ingong hari nga “Anak ni David” madaogong nakiggubat ug gitambog si Satanas nga Yawa ug ang iyang mga panon sa demonyo gikan sa langit ug gibutang sila sa palibot sa atong yutan-ong globo. Kining pagkahulog sa satanasnong mga panon bug-os nga nahitabo sa 1918, ang tuig dihang natapos ang Gubat sa Kalibotan I.
Napaubos, Nakiggubat ang Yawa
16 Ang napaubos nga Satanas nga Yawa, ang simbolikong dragon, karon ilabinang nasuko sa samag-asawang organisasyon ni Jehova nga Diyos. (Pinadayag 12:17) Busa mapintasong nakiggubat siya sa inanak-sa-espiritu nga nanghibilin sa dedikadong mga Kristohanon nga may pamatuod nga siya mao ang ilang espirituwal nga inahan.—Galacia 4:26.
17 Nakiggubat usab si Satanas sa “ubang mga karnero,” nga masugtanong nakigduyog sa buluhaton uban sa nanghibiling dinihogan nga nagpamatuod sa pagkatawo sa Gingharian. (Juan 10:16) Dili lamang iyang gigamit ang iyang napaubos nga mga panon sa demonyo, nga karon ania na sa palibot sa yuta, kondili migamit usab sa makitang bahin sa iyang organisasyon sa pagpadayon sa pakiggubat batok sa nanghibilin ug sa “ubang mga karnero.”
18 Ang pagmando sa “Prinsipe sa Pakigdait” sa taliwala sa iyang mga kaaway dinhi sa yuta haduol nang matapos. Iyang gitagad pag-ayo ang kahimtang. Sa adlaw ug sa gabii ang iyang maunongong mga manulonda nagabantay, andam sa pagdawat sa harianong mga mando gikan kaniya ug sa pagtuman dayon niini. Sila nag-alagad ingong panon sa pagpanalipod alang sa dinihogang nanghibilin ug sa ilang mga kauban, ang “dakong panon” sa “ubang mga karnero,” samtang sila nagapadayon sa pag-alagad sa mga intereses sa Gingharian sa panahon niining tulin nga nagakatapos nga panahon dihang ang “Prinsipe sa Pakigdait” nagahari sa taliwala sa iyang mga kaaway.—Pinadayag 7:9.
[Mga footnote]
a Alang sa mga detalye, tan-awa ang librong Ikaw Mabuhing Walay Kataposan sa Paraiso sa Yuta, panid 138-41, gipatik sa Watchtower Bible and Tract Society of New York, Inc.
[Mga Pangutana nga Pagatun-an]
1, 2. (a) Unsang mga pulong sa panamilit ang gipahayag ni Kristo sa usa ka pundok sa iyang nga disipulo? (b) Kinahanglan bang makabig una ang kalibotan sa dili pa siya magmando ingong “Prinsipe sa Pakigdait”?
3. Sa unsang paagi gipakita ni Jesus dihang mikutlo siya sa Salmo 110 nga siya maghari sa taliwala sa iyang mga kaaway?
4-6. (a) Sa unsang paagi gipakita usab sa Salmo 2 nga dili na maghulat pa si Jesus nga makabig ang kalibotan sa dili pa magsugod ang iyang paghari ingong “Prinsipe sa Pakigdait”? (b) Sa unsa nga panahon natuman ang Salmo 2:7?
7. Unsay gipunting sa mga apostoles ni Jesu-Kristo diha sa Salmo 2 tapos sa adlaw sa Pentekostes?
8. (a) Kanus-a nahitabo ang unang katumanan sa Salmo 2:1, 2? (b) Sukad kanus-a nga nahitabo ang dakong katumanan sa Salmo 2?
9. Unsay nahitabo sa unang kalaglagan sa Jerusalem maylabot sa Gingharian sa Diyos nga gihawasan sa harianong linya ni David?
10, 11. (a) Unsay gipamulong sa Diyos pinaagi sa iyang propetang si Ezekiel mahitungod sa trono ni David? (b) Kinsa ang miabot nga may “katungod” sa trono ni David? (c) Unsay gipamulong sa panon sa mga Hudiyo dihang iyang gipadayag ang iyang kaugalingon ingong manununod?
12. Dihang natapos ang Panahon sa mga Hentil sa 1914, diin gientrono si Jesu-Kristo ingong walay kataposang manununod ni David?
13. (a) Sukad kanus-a pa nga gipunting na ang tuig 1914 ingong kataposan sa Panahon sa mga Hentil, ug pinaagi ni kinsa? (b) Unsa ang tinamdan sa kanasoran sa yuta diha sa bag-ong naentronong “Anak ni David”?
14. (a) Dihang mibuto ang Gubat sa Kalibotan I, unsang tinamdan ang gipakita sa mga nasod ngadto sa mga Kristohanon nga kauban sa Watch Tower Society? (b) Tungod niini, unsay kahulogan sa tibuok-kalibotan nga kahimtang?
15. Unsay nahitabo kang Satanas nga Yawa ug sa iyang mga panon sa demonyo dihang mibuto ang gubat sa langit, ug unsang tuiga nga bug-os nahitabo ang mga resulta?
16, 17. (a) Batok kang kinsa nga nakiggubat ang napaubos nga Satanas nga Yawa? (b) Kinsay iyang gigamit sa pagpadayon niining gubata?
18. (a) Bisag ang Yawa mapintasong nakiggubat batok sa dinihogang nanghibilin ug sa ilang mga kauban, unsang panon sa panalipod ang ilang nabatonan? (b) Unsang bahina sa pagmando sa “Prinsipe sa Pakigdait” ang hapit nang matapos?