Ang Pulong ni Jehova Buhi
Mga Haylayt Gikan sa Unang Basahon sa mga Salmo
UNSAY haom nga titulo sa usa ka basahon sa Bibliya nga adunay daghang pagdayeg sa atong Maglalalang, si Jehova nga Diyos? Walay mas haom nga ngalan kay sa mga Salmo o mga Pagdayeg. Anaa niining kinatas-ang basahon sa Bibliya ang maanindot pagkatagik nga mga awit nga nagbatbat sa talagsaon nga mga hiyas ug gamhanang mga buhat sa Diyos ug nagpahayag ug daghang tagna. Gipahayag sa daghang awit ang mga pagbati sa ilang mga magsusulat samtang nag-antos ug kalisdanan. Ang maong mga pahayag mikobre ug mga usa ka libo ka katuigan—sukad sa panahon sa manalagnang si Moises hangtod sa pagkahuman sa ilang pagkadestiyero. Ang mga magsusulat mao si Moises, Haring David ug uban pa. Ang saserdoteng si Esdras mao ang naghan-ay sa kataposang porma niining basahona.
Sukad sa karaang panahon, ang basahong mga Salmo gibahin sa lima ka hugpong sa mga awit o mga seksiyon: (1) Salmo 1-41, (2) Salmo 42-72, (3) Salmo 73-89, (4) Salmo 90-106, ug (5) Salmo 107-150. Gihisgotan niining artikuloha ang unang hugpong. Gawas lang sa tulo, ang tanang salmo niining seksiyona gisulat ni Haring David sa karaang Israel. Wala mailhi ang mga nagtagik sa Salmo 1, 10, ug 33.
“ANG AKONG DIYOS MAO ANG AKONG BATO”
Human sa pagpahayag diha sa unang salmo nga ang tawo nga may kalipay diha sa balaod ni Jehova maoy malipayon, ang ikaduha naghisgot sa tema sa Gingharian.a Ang mga pangamuyo sa Diyos maoy naglabi niining maong hugpong sa mga salmo. Pananglitan, ang mga Salmo 3-5, 7, 12, 13, ug 17 maoy mga paghangyo alang sa pagkaluwas gikan sa mga kaaway. Gipasiugda sa Salmo 8 ang pagkahalangdon ni Jehova kon itandi sa pagkaubos sa tawo.
Sa pagbatbat kang Jehova ingong Tigpanalipod sa iyang katawhan, si David miawit: “Ang akong Diyos mao ang akong bato. Modangop ako kaniya.” (Salmo 18:2) Si Jehova gidayeg ingong Maglalalang ug Maghahatag ug Balaod diha sa Salmo 19, ingon nga Manluluwas diha sa Salmo 20, ug ang Manluluwas sa iyang dinihogang Hari diha sa Salmo 21. Ang Salmo 23 naghulagway kaniya ingong Dakong Magbalantay, samtang ang ika-24 nga Salmo naghulagway kaniya ingong mahimayaong Hari.
Tubag sa mga Pangutana Bahin sa Kasulatan:
2:1, 2—Unsa ang “walay-pulos nga butang” nga giyagubyob sa mga nasod? Ang “walay-pulos nga butang” mao ang padayong pagkabalaka sa tawhanong mga kagamhanan nga patunhayon ang kaugalingon nilang awtoridad. Walay pulos kini tungod kay mapakyas gayod ang ilang katuyoan. Makalaom ba gayod ang mga nasod nga molampos sa dihang ‘mibarog man sila batok kang Jehova ug batok sa iyang dinihogan’?
2:7—Unsa “ang mando ni Jehova”? Ang maong mando mao ang pakigsaad alang sa usa ka Gingharian, nga gihimo ni Jehova uban sa iyang minahal nga Anak, si Jesu-Kristo.—Lucas 22:28, 29.
2:12—Sa unsang paagi ang mga magmamando sa mga nasod ‘mohalok sa anak’? Sa kapanahonan sa Bibliya, ang paghalok maoy pagpahayag sa panaghigala ug pagkamaunongon. Kadto maoy usa ka paagi sa pag-abiabi ug mga bisita. Ang mga hari sa yuta gisugo sa paghalok sa Anak—nga mao, pag-abiabi kaniya ingong Mesiyanikong Hari.
3:superskripsiyon—Unsay katuyoan sa ulohang gihatag sa pipila ka salmo? Ang ulohan magpaila usahay sa magsusulat ug/o mohatag ug impormasyon bahin sa mga kahimtang sa dihang gitagik ang maong salmo, sama sa kaso sa Salmo 3. Ang superskripsiyon mahimong magpatin-aw usab sa katuyoan o gamit sa linaing awit (Salmo 4 ug 5) ingon man mohatag ug mga instruksiyon bahin sa musika (Salmo 6).
3:2—Unsa ang “Selah”? Kining pulonga sagad gihunahuna nga nagpasabot ug kadiyot nga paghunong alang sa hilom nga pagpamalandong, mahimong diha lang sa pag-awit o sa pag-awit nga giduyogan ug honi sa tulonggon. Ang kadiyot nga paghunong gigamit aron mas mapasiugda ang ideya o emosyon nga bag-ong gipahayag. Dili na kinahanglan nga basahong kusog ang pulong panahon sa publikong pagbasa sa mga Salmo.
11:3—Unsang mga patukoranan ang lumpagon? Kini mao ang mismong mga patukoranan nga gisandigan sa tawhanong katilingban—balaod, kahikayan, ug hustisya. Kon dili kini hapsay, adunay kagubot sa katilingban ug walay hustisya. Ubos sa maong mga kahimtang, “si bisan kinsa nga matarong” kinahanglang bug-os mosalig sa Diyos.—Salmo 11:4-7.
21:3—Unsay makahuloganon bahin sa usa ka “purongpurong sa dinalisay nga bulawan”? Wala ipahayag kon ang purongpurong literal ba o nagsimbolo sa dugang nga himaya tungod sa daghang kadaogan ni David. Bisan pa niana, kining bersikuloha matagnaong nagpunting sa purongpurong sa pagkahari nga nadawat ni Jesus gikan ni Jehova niadtong 1914. Ang kamatuoran nga ang purongpurong maoy binuhat sa bulawan nagpaila nga kinamaayohang matang ang iyang pagmando.
22:1, 2—Ngano kaha nga gibati ni David nga siya gibiyaan ni Jehova? Gibati ni David ang grabeng pagpit-os gikan sa iyang mga kaaway nga ang iyang ‘kasingkasing nahimong sama sa talo ug natunaw sa kinahiladman sa kahiladman niyang mga bahin.’ (Salmo 22:14) Alang kaniya siya daw gibiyaan ni Jehova. Sa dihang gilansang, gibati usab ni Jesus ang sama. (Mateo 27:46) Ang mga pulong ni David nagpadayag sa natural nga reaksiyon ngadto sa iyang lisod nga kahimtang. Hinuon, gikan sa iyang pag-ampo nga natala sa Salmo 22:16-21, dayag nga wala kawad-ig pagtuo si David sa Diyos.
Mga Pagtulon-an Alang Kanato:
1:1. Kinahanglang likayan ang pagpakig-uban sa mga tawong wala mahigugma kang Jehova.—1 Corinto 15:33.
1:2. Dili gayod nato palabyon ang usa ka adlaw nga dili maghisgot ug espirituwal nga mga butang.—Mateo 4:4.
4:4. Sa dihang masuko o mapungot, maalamong pugngan nato ang atong dila aron dili makasultig butang nga basolan nato sa ulahi.—Efeso 4:26.
4:5. Ang atong espirituwal nga mga sakripisyo mahimo lamang nga “mga sakripisyo sa pagkamatarong” kon kita adunay matarong nga mga motibo ug ang atong panggawi nahiuyon sa mga kinahanglanon ni Jehova.
6:5. Duna bay mas maayong katarongan nga gusto nato nga magpadayong buhi?—Salmo 115:17.
9:12. Mangita si Jehova ug naula nga dugo aron silotan ang sad-an sa dugo, apan siya mahinumdom sa “pagtuaw sa mga sinakit.”
15:2, 3; 24:3-5. Ang matuod nga mga magsisimba kinahanglang mosulti sa tinuod ug molikay sa bakak nga mga panumpa ug pagbutangbutang.
15:4. Gawas kon naamgohan natong nakahimo kitag dili-kasulatanhong saad, kinahanglang himoon nato ang atong maarangan sa pagtuman sa atong pulong, bisan pag lisod kaayo ang pagtuman niana.
15:5. Ingong mga magsisimba ni Jehova, kinahanglan kitang magbantay batok sa dili-hustong paggamit sa salapi.
17:14, 15. Ang “mga tawo niini nga sistema sa mga butang” nagkugi sa pagbaton ug maayong panginabuhi, pagpatunghag pamilya, ug pagbilin ug panulondon. Ang pangunang gihunahuna ni David sa kinabuhi mao ang paghimog maayong ngalan uban sa Diyos aron ‘makatan-aw sa iyang nawong,’ o makasinati sa pag-uyon ni Jehova. Sa ‘pagkanahigmata’ bahin sa mga saad ug mga pasalig ni Jehova, si David ‘matagbaw nga makakita sa Iyang dagway,’ o magmaya nga si Jehova nag-uban kaniya. Sama kang David, dili ba angay natong ibutang ang atong kasingkasing diha sa espirituwal nga mga bahandi?
19:1-6. Kon ang kalalangan, nga dili makasulti o makapangatarongan, naghimaya kang Jehova, dili ba kitang makahunahuna, makasulti, ug makasimba labi pa gayong angay nga maghimaya kaniya?—Pinadayag 4:11.
19:7-11. Ang mga kinahanglanon ni Jehova—pagkamapuslanon niana alang kanato!
19:12, 13. Ang mga kasaypanan ug mapangahasong mga buhat maoy mga sala nga kinahanglan natong likayan.
19:14. Angay kitang magmahunahunaon dili lamang kon unsay atong ginabuhat kondili kon unsay atong ginasulti ug gihunahuna.
“TUNGOD SA AKONG INTEGRIDAD IKAW NAGASAPNAY KANAKO”
Kinasingkasing gayong tinguha ug lig-ong determinasyon sa paghupot sa iyang integridad ang gipahayag ni David diha sa unang duha ka salmo niining hugponga sa mga salmo! “Kon bahin kanako, ako magalakaw sa akong integridad,” siya miawit. (Salmo 26:11) Sa iyang pag-ampo alang sa kapasayloan sa mga sala, siya miangkon: “Sa dihang ako naghilom ang akong mga bukog nagabok tungod sa akong pag-agulo sa tibuok adlaw.” (Salmo 32:3) Sa maunongong mga alagad ni Jehova, si David nagpasalig: “Ang mga mata ni Jehova gipunting sa mga matarong, ug ang iyang mga igdulungog gikiling ngadto sa ilang pagtuaw alang sa tabang.”—Salmo 34:15.
Pagkabililhong tambag ang gihatag diha sa Salmo 37 alang sa mga Israelinhon ug alang kanato, sanglit kita nagkinabuhi sa “kataposang mga adlaw” niining sistema sa mga butang! (2 Timoteo 3:1-5) Sa paghisgot nga matagnaon bahin kang Jesu-Kristo, ang Salmo 40:7, 8 nag-ingon: “Ania, ako mianhi, sa linukot nga basahon nahisulat kini bahin kanako. Sa pagbuhat sa imong kabubut-on, Oh Diyos ko, ako nagakalipay, ug ang imong balaod ania sa akong kahiladman nga mga bahin.” Ang kataposang salmo sa maong hugpong maoy mahitungod sa hangyo ni David alang sa tabang ni Jehova panahon sa gubot nga katuigan human siya makasala uban kang Bat-seba. Siya miawit: “Kon bahin kanako, tungod sa akong integridad ikaw nagasapnay kanako.”—Salmo 41:12.
Tubag sa mga Pangutana Bahin sa Kasulatan:
26:6—Sa unsang paagi kita, sama kang David, masambingayong nagmartsa palibot sa halaran ni Jehova? Ang halaran naghawas sa kabubut-on ni Jehova sa pagkaagi nga iyang gidawat ang halad lukat ni Jesu-Kristo aron matubos ang katawhan. (Hebreohanon 8:5; 10:5-10) Nagmartsa kita sa palibot sa halaran ni Jehova pinaagi sa pagpasundayag ug pagtuo sa maong halad.
29:3-9—Unsay gihulagway sa pagtandi sa tingog ni Jehova ngadto sa dalugdog nga makapalisang samtang kini modahunog? Mao kini: Ang katingalahang gahom ni Jehova!
31:23—Sa unsang paagi balosan sa hilabihan ang usa ka tawong nagmapahitas-on? Ang balos dinhi mao ang silot. Ang usa nga matarong magdawat sa iyang balos tungod sa iyang dili-tinuyong kasaypanan pinaagi sa usa ka matang sa disiplina gikan ni Jehova. Sanglit ang usa ka tawong nagmapahitas-on dili motalikod sa iyang daotang dalan, siya balosan sa hilabihan pinaagi sa grabeng silot.—Proverbio 11:31; 1 Pedro 4:18.
33:6—Unsa ang “espiritu,” o “gininhawa,” sa baba ni Jehova? Ang maong espiritu mao ang aktibong puwersa sa Diyos, o balaang espiritu, nga iyang gigamit sa paglalang sa materyal nga mga langit. (Genesis 1:1, 2) Kini gitawag nga espiritu sa iyang baba tungod kay, samag gamhanang gininhawa, kini ikapadala aron mabuhat ang mga butang nga atua sa halayo.
35:19—Unsa ang kahulogan sa hangyo ni David nga kadtong nagdumot kaniya dili tugotang makapangidhat sa ilang mata? Ang pagkidhat sa usa ka mata magpasabot nga ang mga kaaway ni David magkalipay gumikan sa kalamposan sa ilang mapanimaslong mga plano batok kaniya. Mihangyo si David nga dili unta kini mahitabo.
Mga Pagtulon-an Alang Kanato:
26:4. Kita maalamon sa paglikay nga makig-uban niadtong nagtago sa ilang tinuod nga pagkatawo diha sa mga chat room sa Internet, sa mga kauban sa tunghaan o sa atong trabahoan nga magpakaaron-ingnong atong mga higala tungod sa malimbongong mga hinungdan, sa mga apostata nga magpakaaron-ingnong mga sinsero, ug ang mga tawo nga doble kara.
26:7, 12; 35:18; 40:9. Kinahanglan natong dayegon si Jehova sa dayag panahon sa Kristohanong mga tigom.
26:8; 27:4. Gikalipayan ba nato ang pagtambong sa Kristohanong mga tigom?
26:11. Bisan pag nagpahayag sa iyang determinasyon sa paghupot sa iyang integridad, si David mihangyo usab nga tubson. Oo, makapadayon kita sa paghupot sa atong integridad bisan pa sa atong pagkadili-hingpit.
29:10. Pinaagi sa paglingkod sa “lunop,” o sa “langitnong dagat,” si Jehova nagpasabot nga bug-os niyang kontrolado ang iyang gahom.
30:5. Ang naglabi nga hiyas ni Jehova mao ang gugma—dili ang kasuko.
32:9. Dili gusto ni Jehova nga kita mahisama sa usa ka mula o usa ka asno nga mosunod tungod sa usa ka busal o bunal. Hinunoa, gusto niya nga kita mopalabi sa pagsunod tungod kay kita nakasabot sa iyang kabubut-on.
33:17-19. Walay sistema nga binuhat sa tawo, bisan unsa ka gamhanan, ang makahatag ug kaluwasan. Kinahanglan natong ibutang ang atong pagsalig diha kang Jehova ug sa iyang kahikayan labot sa Gingharian.
34:10. Pagkatalagsaon kini nga pasalig alang niadtong nagbutang sa intereses sa Gingharian nga una sa ilang kinabuhi!
39:1, 2. Sa dihang ang mga daotan mangitag impormasyon aron sa pagdaot sa atong mga isigkamagtutuo, maalamon nga atong ‘taoran ug busal ingon nga bantay ang atong baba’ ug magpakahilom.
40:1, 2. Ang paglaom kang Jehova makatabang kanato sa pagsagubang sa depresyon ug mogula “gikan sa nagadaguok nga gahong, gikan sa lapok sa mga linugdang.”
40:5, 12. Walay mga katalagman ni personal nga mga kahuyangan, bisan unsa ka daghan, ang makapabug-at kanato kon dili nato hikalimtan ang kamatuoran nga ang atong mga panalangin ‘daghan pa kay sa atong ikabatbat.’
“Dalayegon si Jehova”
Pagkamakahupay ug makapadasig ang 41 ka salmo diha sa unang hugpong! Bisan pa kon kita nagaantos ug mga pagsulay o gitulisok sa daotang tanlag, makabaton kitag kalig-on ug pagdasig gikan niining bahina sa gamhanang Pulong sa Diyos. (Hebreohanon 4:12) Ang maong mga salmo adunay impormasyon nga mohatag ug kasaligang giya sa pagkinabuhi. Kita balikbalik nga gipasaligan nga bisan pa sa kalisdanan nga atong maagoman, si Jehova dili mobiya kanato.
Ang unang hugpong sa mga salmo gitapos niining mga pulonga: “Dalayegon si Jehova nga Diyos sa Israel sukad sa panahong walay tino hangtod sa panahong walay tino. Amen ug Amen.” (Salmo 41:13) Human sa paghisgot sa unang hugpong sa mga salmo, dili ba kita matukmod sa pagdayeg kang Jehova?
[Footnote]
[Blurb sa panid 19]
Kon ang mga linalang nga dili makasulti o makapangatarongan naghimaya kang Jehova, pagkalabi pa nga angay kitang maghimaya kaniya!
[Hulagway sa panid 17]
Si David maoy nagtagik sa kadaghanan sa unang 41 ka salmo
[Hulagway sa panid 18]
Nahibalo ka ba kon unsang salmoha ang naghulagway kang Jehova ingong ang Dakong Magbalantay?
[Hulagway sa panid 20]
Ayaw palabya ang usa ka adlaw nga dili maghisgot ug espirituwal nga mga butang
[Picture Credit Line sa panid 17]
Stars: Courtesy United States Naval Observatory
[Picture Credit Line sa panid 19]
Stars, pages 18 and 19: Courtesy United States Naval Observatory
[Picture Credit Line sa panid 20]
Stars: Courtesy United States Naval Observatory