Dangop Kang Jehova

“Kanimo, Oh Jehova, ako midangop.”​—SALMO 31:1.

 1. Giunsa pagpahayag sa Salmo 31 ang pagsalig sa katakos ni Jehova sa pagtaganag dangpanan?

USA ka mananoyng tingog gipatugbaw sa awit sa usa ka lalaki nga, bisan pag nahago sa hunahuna ug lawas, mitugyan sa iyang kaugalingon kang Jehova. Ang pagtuo mipatigbabaw, matud sa liriko sa maong sagradong awit. Sa nagpaabot nga mga bukton sa Makagagahom sa Tanan, ang maong lalaki nakakaplag ug dangpanan gikan sa migukod nga mga maglulutos. “Kanimo, Oh Jehova, ako midangop,” nagaingon ang iyang salmo. “Oh hinaot dili gayod ako pakaulawan. Ihatag kanako ang kaikyasan diha sa imong pagkamatarong.”​—Salmo 31:1.

 2. (a) Makabutang kita sa atong pagsalig kang Jehova ingong atong salipdanan nga gipasukad sa unsang duha ka haligi? (b) Unsang matang sa Diyos si Jehova?

² Ang salmista may usa ka dangpanan​—ang kinamaayohan! Pasagdi nga kaduhaduhaan ang ubang butang, apan magpabilin kining kamatuorana: Si Jehova ang iyang salipdanan, iyang kuta. Ang iyang pagsalig gisandig sa duha ka seguradong haligi. Una, ang iyang pagtuo, nga dili pakaulawan ni Jehova, ug ikaduha, ang pagkamatarong ni Jehova, nga nagpasabot nga Siya dili gayod mobiya sa dayon sa Iyang alagad. Si Jehova dili usa ka Diyos nga magpakaulaw sa matinumanon niyang mga alagad; dili siya tigpakyas ug saad. Sa kapulihay, siya usa ka Diyos sa kamatuoran ug tigganti niadtong sa kamasiboton mosalig kaniya. Sa kataposan, ang pagtuo pagagantihan! Ang kaikyasan moabot!​—Salmo 31:5, 6.

 3. Sa unsang paagi ang salmista midayeg kang Jehova?

³ Sa pagkomposo sa iyang honi nga may mananoyng tono nga mopatugbaw gikan sa mamingawong tono nga magpahayag sa kaguol ug kaalaotan ngadto sa tagning nga tono nga magpahayag ug pagsalig, ang salmista nakakaplag ug kalig-on sa kahiladman. Dayegon niya si Jehova tungod sa Iyang maunongong gugma. “Bulahan si Jehova,” miawit siya, “kay gipakita niya kanako ang katingalahan nga mahigugmaong-kalulot diha sa usa ka siyudad nga nalisdan.”​—Salmo 31:21.

Dako Kaayong Koro sa mga Magmamantala sa Gingharian

 4, 5. (a) Unsang kusog nga koro ang nagadayeg kang Jehova karong adlawa, ug giunsa nila kana pagbuhat sulod niining miaging tuig sa pag-alagad? (Tan-awa ang tsart sa mga panid 12-15.) (b) Sa unsang paagi ang tumatambong sa Memoryal nagpaila nga adunay mas daghang tawo nga buot moduyog sa koro sa mga magmamantala sa Gingharian? (Tan-awa ang tsart.) (c) Unsang grupo diha sa inyong kongregasyon ang tingali makaarang sa pagduyog sa koro?

⁴ Karong adlawa, ang mga pulong nianang salmoha nakabaton ug dugang kahulogan. Ang mga awit sa pagdayeg kang Jehova dili mapahilom ni bisan kinsa nga daotang magsusupak, sa bisan unsang katalagman sa kinaiyahan, o sa bisan unsang kalisod sa ekonomiya; sa tinuoray, ang mahigugmaong-kalulot ni Jehova nahimong katingalahan alang sa iyang katawhan. Sa tibuok kalibotan sa miaging tuig sa pag-alagad, ang dako kaayong koro, nga ang kinatas-ang ihap maoy 4,709,889 diha sa 231 ka nasod, miawit sa mensahe sa Gingharian sa Diyos. Ang langitnong kagamhanan ni Jehova pinaagi ni Kristo Jesus maoy dangpanan nga dili magpakyas kanila. Sa miaging tuig, kining mga magmamantalaa sa Gingharian gikan sa 73,070 ka kongregasyon migugol ug katibuk-ang gidaghanon nga 1,057,341,972 ka oras diha sa buluhatong pagwali. Kini misangpot sa 296,004 ka tawo nga nagpasimbolo sa ilang pagpahinungod sa Diyos pinaagi sa bawtismo sa tubig. Ug dako kaayong katingala ang nasinati sa tanang tumatambong sa Diyosnong Pagtulon-an Internasyonal nga Kombensiyon nga gihimo sa Kiev, Ukraine, sa miaging Agosto. Nakita nila ang labing importanteng hitabo sa kasaysayan sa mga Saksi ni Jehova, kay nasaksihan ang kinadak-ang nahitala nga bawtismo sa matuod nga mga Kristohanon sukad masukad! Sumala sa gitagna sa Isaias 54:2, 3, ang katawhan ni Jehova nagauswag sa way-ingon nga gidaghanon.

⁵ Bisan pa, ang dugang masinugtanong mga sakop sa Gingharian sa Diyos nagapaabot sa ilang turno nga moduyog sa koro. Sa miaging tuig, ang Memoryal sa kamatayon ni Jesus gitambongan ug talagsaong gidaghanon nga 11,865,765 ka tawo. Gilaoman, daghan kanila ang mahimong may-katakos nga moawit sa awit sa Gingharian gikan sa ganghaan ngadto sa ganghaan sulod niining tuiga sa pag-alagad. Mahupngan gayod sa pagdumot ang kaaway sa kamatuoran, si Satanas nga Yawa, tungod sa maong palaabuton!​—Pinadayag 12:12, 17.

 6, 7. Isaysay kon giunsa pagbuntog sa usa ka tawong interesado ang pagsamok sa demonyo sa tabang ni Jehova.

⁶ Si Satanas mosulay sa pagbabag sa uban sa pagdugang sa ilang mga tingog nianang kusog nga koro. Pananglitan, sa Thailand nasayran sa mga magmamantala nga ang nagkadaghang tawo gisamok sa demonyo. Hinuon, ang daghang sinserong tawo napahigawas tungod sa tabang ni Jehova. Human mobisita sa usa ka barangan tungod sa pagkamausisaon, ang usa ka lalaki nailalom sa gahom sa mga demonyo sulod sa napulo ka tuig. Siya naningkamot nga mahigawas sa ilang gahom sa tabang sa usa ka klerigo, apan siya wala makasinati ug dakong kahupayan. Gisugdan sa usa ka bug-os-panahong ministro sa mga Saksi ni Jehova ang usa ka pagtuon sa Bibliya uban sa maong tawo ug gitudloan siya gikan sa Bibliya sa bugtong paagi sa pagkagawas sa gahom sa demonyo​—ang pagkuhag tukmang kahibalo sa kamatuoran, pagbutang ug pagtuo kang Jehova nga Diyos, ug pagpangaliyupo kaniya diha sa pag-ampo.​—1 Corinto 2:5; Filipos 4:6, 7; 1 Timoteo 2:3, 4.

⁷ Sa pagkagabii human sa maong panaghisgot, ang tawo may usa ka damgo nga niana ang namatay na niyang amahan mihulga kaniya kon dili siya mobalik sa pagkahimong galamiton sa espiritista. Nagsugod pag-antos ang iyang pamilya. Kay dili gusto nga mahaylo, ang maong tawo nagpadayon sa iyang mga pagtuon sa Bibliya ug nagsugod pagtambong sa mga tigom. Panahon sa usa sa maong mga pagtuon, gisaysay sa payunir nga usahay ang mga butang nga gigamit sa mga rituwal nga espiritistikanhon makahatag ug giwang sa mga demonyo aron samokon ang mga tawo nga naningkamot sa paglingkawas gikan sa ilang gahom. Ang tawo nahinumdom nga may lana siya nga gigamit niya sa panglumay. Karon siya nakaamgo nga kinahanglan nga iya kanang ilabay. Sukad sa iyang paglabay niana, wala na siya samoka sa daotang mga espiritu. (Itandi ang Efeso 6:13; Santiago 4:7, 8.) Siya ug ang iyang asawa nag-uswag pag-ayo sa ilang pagtuon ug regular nga nagtambong sa mga tigom sa pagtulon-an sa Bibliya.

 8, 9. Unsang ubang kababagan ang nabuntog sa pila ka magmamantala sa Gingharian?

⁸ Ang ubang kababagan tingali magpukgo sa tingog sa maayong balita. Tungod sa lisod kaayong kahimtang sa ekonomiya sa Ghana, ang mga trabahante nangapapha sa trabaho. Ang prisyo sa mga palaliton sa pagkinabuhi nagmahal kaayo, nga nakapalisod kaayo sa pagbaton sa mga kinahanglanon sa kinabuhi. Sa unsang paagi nakasagubang ang katawhan ni Jehova? Pinaagi sa pagsalig, dili sa ilang kaugalingon, apan kang Jehova. Pananglitan, usa ka adlaw usa ka lalaki nagbilin ug selyadong sobre sa talad sa dumadawat sa sangang buhatan. Diha sa sulod sa sobre ang $200, o tulo ka bulan nga suweldo sa mamumuo. Ang sobre maoy gikan sa wala-magpailang tighatag ug gasa, apan sa putos may gisulat: “Nawad-an ako sa akong trabaho, apan si Jehova mitagana kanakog lain. Mapasalamaton ako kaniya ug sa iyang Anak, si Kristo Jesus. Aron sa pagtabang sa pagwali sa maayong balita sa Gingharian sa dili pa moabot ang kataposan, nagasukip ako ug gamay nga amot.”​—Itandi sa 2 Corinto 9:11.

⁹ Ang pagtambong sa tigom motabang pagbansay niadtong moduyog sa kusog nga koro sa pagdayeg kang Jehova. (Itandi sa Salmo 22:22.) Sa ingon, sa habagatang bahin sa Honduras, adunay usa ka kongregasyon nga gitawag ug El Jordán. Unsay nakapaespesyal kaayo niining gamayng grupo? Ang ilang matinumanong pagtambong sa tigom. Sa 19 ka magmamantala, 12 ang kinahanglang motabok sa usa ka halapad nga suba aron motambong sa mga tigom kada semana. Dili kini suliran sa ting-init, sanglit makatabok sila sa suba pinaagi sa paggamit sa mga bato ingong mga tungtongan. Ugaling, sa ting-ulan, ang kahimtang mausab. Ang diyutayng tubig sa nangagi mahimong baha nga magbanlas sa tanang butang nga maagian niana. Aron masulbad ang maong babag, ang mga igsoong lalaki ug babaye kinahanglan nga hawod nga mga manlalangoy. Sa dili pa motabok, isulod nila ang ilang sinina para sa tigom sa usa ka tina (metal nga sudlanan) ug dayon puston kanag plastik nga puyo. Ang kinakusgang manlalangoy magagamit sa tina ingong boya ug magapanguna sa grupo sa pagtabok. Sila, nga luwas na sa pikas tampi, manarapo sa ilang lawas, mag-ilis, ug mangabot sa Kingdom Hall nga ngaya ug nagmasilakon sa kahinlo!​—Salmo 40:9.

Usa ka Kuta Diin Mahimo Kitang Mopuyo

10. Nganong makadangop kita kang Jehova sa mga panahon sa kalisod?

¹⁰ Kon kaha giatake kag demonyo o gibating nabug-atan tungod sa ubang mga tinubdan, si Jehova mahimo nga imong salipdanan. Sangpita siya diha sa pag-ampo. Mamati siyag maayo bisan sa labing hinay nga inagulo sa iyang katawhan. Ang salmista nakakaplag nga matuod kana ug misulat: “Ikiling kanako ang imong igdulongog. Luwason mo ako sa madali. Bato nga salipdanan ikaw alang kanako, usa ka balay sa mga salipdanan sa pagluwas kanako. Kay ikaw mao ang akong bato ug akong salipdanan; ug tungod sa imong ngalan ikaw magatultol kanako ug magaagak kanako. Ikaw magpagawas kanako gikan sa pukot nga ilang gitagoan alang kanako, kay ikaw mao ang akong kuta.”​—Salmo 31:2-4.

11. Isaysay kon nganong ang kuta ni Jehova dili usa ka temporaryong dapit.

¹¹ Gitagana ni Jehova dili lamang ang temporaryong dangpanan apan ang dili-masulong nga kuta diin kita makapuyo nga may kasegurohan. Ang iyang pagtultol ug paggiya wala magpakyas sa iyang katawhan. Ang diyosnong gahom maghimong walay-kapuslanan sa tanang malinglahong mga buhat ni Satanas ug sa iyang mga kaliwat. (Efeso 6:10, 11) Samtang mosalig kita sa bug-os nga kasingkasing kang Jehova, birahon niya kita gikan sa mga lit-ag ni Satanas. (2 Pedro 2:9) Sulod sa miaging upat ka tuig, ang buluhatong pagwali sa mga Saksi ni Jehova nabuksan diha sa 35 ka nasod. Lain pa, sa mga bahin sa kalibotan diin ang sosyal, ekonomikanhon, o politikanhong mga kahimtang nagpugong sa pagwali sa maayong balita, ang pila ka samag-karnerong tawo namalhin ngadto sa dapit diin sila mas libreng maabot. Ang Hapon maoy usa sa maong dapit.

12. Sa unsang paagi ang usa ka payunir sa Hapon naghimo kang Jehova nga iyang salipdanan?

¹² Ang Hapon gihugopan ug langyawng mga trabahante gikan sa ubang mga nasod, ug natukod ang daghang kongregasyon nga langyawg pinulongan. Ang kasinatian sa usa ka igsoong lalaki diha sa usa ka Hapones nga kongregasyon naghulagway kon unsa ka mabungahon kining langyaw-ug-pinulongang nataran. Gusto siyang moalagad sa dapit diin dako ang panginahanglan. Ugaling, siya nagdumala nag napulo ka pagtuon sa Bibliya sa dapit nga iyang nahimutangan. Usa sa iyang mga higala nagpasiaw pagsulti kaniya: “Kon moadto ka sa dapit diin mas dako ang panginahanglan, kinahanglang dumalahon nimo ang 20 ka pagtuon sa Bibliya didto!” Nadawat niya ang usa ka asaynment ug miadto sa Hiroshima. Bisan pa, human sa upat ka bulan usa lang ka pagtuon sa Bibliya ang iyang nabatonan. Usa ka adlaw siya miduaw sa usa ka lalaking taga-Brazil nga Portuges lang ug pinulongan. Sanglit ang igsoong lalaki dili man makaarang sa pagpakigsulti sa maong tawo, siya mipalit ug librong-tun-anan sa Portuges. Human makakat-on ug pila ka yanong pulong sa pagpakig-estorya, giduaw niya pag-usab ang tawo. Sa dihang ang brader nangomosta kaniya diha sa Portuges nga pinulongan, ang tawo natingala ug, uban ang dakong pahiyom, gibuksan ug dako ang pultahan ug gipasulod siya. Nasugdan ang pagtuon sa Bibliya. Sa wala madugay ang brader nagdumala ug katibuk-ang 22 ka pagtuon, 14 sa Portuges, 6 sa Kinatsila, ug 2 sa Hapones!

Pagwali nga Masaligon

13. Nganong walay mausa ang angay magpakaulaw kanato aron sa pag-alagad kang Jehova?

¹³ Ang katawhan ni Jehova nagaawit nga masaligon sa awit sa Gingharian uban sa bug-os nga pagtuo nga si Jehova mao ang ilang dangpanan. (Salmo 31:14) Dili sila mapakaulawan​—sila dili pakaulawan ni Jehova, kay iyang pagatumanon ang iyang pulong. (Salmo 31:17) Ang Yawa ug ang iyang demonyong mga kaanib ang mangaulaw. Sanglit ang katawhan ni Jehova gisugo sa pagwali sa usa ka mensaheng dili ikaulaw, dili sila pakaulawan sa ubang tawo aron sa pagwali. Kana dili mao ang paagi ni Jehova, o sa iyang Anak, sa pagdasig sa katawhan sa pagsimba Kaniya. Sa dihang ang mga kasingkasing sa katawhan napunog pagtuo ug pagpabili sa pagkamaayo ug mahigugmaong-kalulot ni Jehova, ang maayong kahimtang sa ilang mga kasingkasing mao ang magatukmod sa ilang mga baba sa pagsulti. (Lucas 6:45) Sa ingon, bisan unsa ka daghang panahon ang atong gugolon sa pag-alagad kada bulan, ilabina kon kanang panahona naghawas sa atong labing dakong maarangan, maoy maayo, dili ikaulaw. Dili ba ang usa ka diyot nga salapi sa babayeng balo bug-os gipabilhan ni Jesus ug sa iyang Amahan?​—Lucas 21:1-4.

14. Unsang mga komento ang imong ikapahayag mahitungod sa payunir nga buluhaton? (Tan-awa usab ang tsart.)

¹⁴ Alang sa nag-usbawng gidaghanon sa mga magmamantala, ang pagkatibuok-kalag sa ilang pagsimba naglakip sa pag-alagad ingong mga payunir​—890,231 ang kinatas-ang ihap sa miaging tuig! Kon magpadayon ang pag-uswag sa miaging tuig, kining numeroha lagmit mokapin sa 1,000,000. Ang mosunod nga kasinatian nagpakita kon sa unsang paagi ang usa ka igsoong babaye sa Nigeria misulod sa pagkapayunir. Misulat siya: “Sa hapit na kong makatapos ug hayskul, ako mitabang sa pagpangluto alang sa mga nagtungha sa tunghaan sa payunir sa mga Saksi ni Jehova. Nailaila ko ang duha ka sister nga mas tigulang pa kay sa akong lola. Sa nasayran ko nga sila mga payunir nga nagtungha sa tunghaan, naghunahuna ako sa akong kaugalingon, ‘Kon kadtong duha makapayunir, unsay nakapugong kanako?’ Busa human makatapos sa pagtungha, ako usab nahimong regular payunir.”

15. Sa unsang paagi ang dili-pormal nga pagsangyaw nagpaposible nga ang uban modangop kang Jehova?

¹⁵ Dili ang tanan makapayunir, apan sila makasangyaw. Sa Belgium usa ka 82-anyos nga sister milakaw aron mopalit ug karne. Iyang namatikdan nga napikal ang asawa sa matansero bahin sa bag-ohay pang politikanhong kasamok. Busa ang sister nagsuksok sa tract nga Unsay Gituohan sa mga Saksi ni Jehova? uban sa mga papel de bangko sa dihang gibayran niya ang iyang pinalit. Sa dihang ang sister mibalik sa tindahan, ang asawa sa matansero, sa walay pag-ukon-ukon, nangutana kon unsay gisulti sa Bibliya bahin sa posible nga ikatulong gubat sa kalibotan. Siya gidalhan sa sister ug librong Matuod nga Kalinaw ug Kasegurohan​—Sa Unsang Paagi Makaplagan Nimo Kini? Pila ka adlaw sa ulahi, sa dihang ang tigulang nga sister misulod sa tindahan, ang asawa sa matansero daghag pangutana kaniya. Naluoy ang sister sa maong babaye; kinahanglan nga iyang tanyagan siyag pagtuon sa Bibliya, ug kadto gidawat. Karon, ang asawa sa matansero gusto nang magpabawtismo. Komosta ang matansero? Iyang gibasa ang tract ug pagkakaron nagatuon na usab sa Bibliya.

‘Usa ka Bahandi sa Pagkamaayo’

16. Sa unsang paagi si Jehova migahin ug bahandi sa pagkamaayo alang sa iyang katawhan?

¹⁶ Niining punog-kalisdanan nga kataposang mga adlaw, wala ba si Jehova “maghatag sa katingalahang mahigugmaong-kalulot” sa mga midangop kaniya? Samag usa ka mahigugmaon, mapanalipdanon nga amahan, si Jehova migahin ug bahandi sa pagkamaayo alang sa iyang yutan-ong mga anak. Gipaulanan niya sila ug kalipay atubangan sa tanang tumatan-aw, sumala sa giingon sa salmista: “Pagkadagaya sa imong pagkamaayo, nga imong gitagana alang sa mga nahadlok kanimo! Nga imong gihatag niadtong nagadangop kanimo, atubangan sa mga anak sa mga tawo.”​—Salmo 31:19, 21.

17-19. Sa Ghana, unsang kaayohan ang misangpot sa pagpalegal sa usa ka tigulang nga lalaki sa iyang kaminyoon?

¹⁷ Busa, ang kalibotanong mga tawo mahimong mga saksi sa kamatinud-anon niadtong nagasimba kang Jehova, ug sila nahibulong. Pananglitan, sa Ghana usa ka 96-anyos nga lalaki miadto sa opisina sa tigrehistro sa kasal ug mihangyo nga irehistro ang iyang pagpuyopuyo sulod na ug 70 ka tuig. Ang tigrehistro sa kasal nakurat ug nangutana: “Segurado ka bang kana ang gusto nimo? Sa imong edad?”

¹⁸ Ang tawo misaysay: “Buot ko nga mahimong usa ka Saksi ni Jehova ug moapil sa labing importanteng buluhaton sa dili pa matapos ang kalibotan​—ang buluhatong pagwali sa maayong balita sa Gingharian sa Diyos. Kining buluhatona mosangpot sa kinabuhing walay kataposan. Ang mga Saksi ni Jehova nagsugot sa balaod sa gobyerno, lakip ang balaod bahin sa pagparehistro sa kaminyoon. Busa palihog himoa ang pagrehistro alang kanako.” Ang tigrehistro sa kasal naamang. Siya nagrehistro niadto, ug ang tigulang lalaki malipayong milakaw nga sa maong panahon legal na ang iyang kaminyoon.​—Itandi ang Roma 12:2.

¹⁹ Human niadto, ang tigrehistro sa kasal namalandong bahin sa mga butang nga iyang nabatian. “Mga Saksi ni Jehova . . . ang labing importanteng buluhaton . . . ang kataposan sa kalibotan . . . Gingharian sa Diyos . . . kinabuhing walay kataposan.” Kay nalibog kon unsay ipasabot niadtong tanan diha sa kinabuhi sa 96-anyos nga lalaki, siya mihukom nga pangitaon ang mga Saksi aron masusi sa dugang ang butang. Siya midawat sa usa ka pagtuon sa Bibliya sa balay ug mihimog kusog nga pag-uswag. Karong adlawa, kining tigrehistro sa kasal maoy bawtismadong Saksi. Busa, kon pagasugton nato si Jehova bisan diha sa butang nga tingali pagaisipon sa uban nga ginagmayng mga butang, kini mahimong mosangpot sa dili-mabatbat nga kaayohan alang kanato ug alang niadtong makakita sa atong panggawi.​—Itandi sa 1 Pedro 2:12.

20. Sa Myanmar, sa unsang paagi ang pagkamatinud-anon sa usa ka batan-ong sister mitultol sa maayong pamatuod?

²⁰ Ang mga tigulang nga nagtugot nga umolon sila sa kamatuoran ngadto sa pagkahimong mga tawong matinud-anon naghatag ug maayong panig-ingnan alang sa mga batan-on niining dili-matinud-anong kalibotan. Sa Myanmar nagpuyo ang usa ka ingong batan-ong sister. Siya naggikan sa kabos ug timawang banay nga may napulo ka anak. Ang amahan, usa ka pensionado, maoy regular payunir. Usa ka adlaw sa tunghaan, ang sister nakakitag usa ka brilyanteng singsing, nga iyang gidala dayon ngadto sa iyang magtutudlo. Samtang nagtapok ang klase sa sunod adlaw, gisugilon sa magtutudlo sa klase nga may singsing nga nakit-an ug gitunol aron ikauli sa tag-iya. Dayon iyang gihangyo ang batan-ong sister nga motindog atubangan sa tibuok klase ug isaysay kon nganong gihimo niya kadto, kay nahibalo nga mahimong palabihon sa ubang mga bata ang pagtago niadto. Ang sister misaysay nga siya Saksi ni Jehova ug ang iyang Diyos dili gustog pangawat o bisan unsang matang sa pagkadili-matinud-anon. Nabatian kadto sa tibuok tunghaan, nga naghatag sa atong batan-ong sister ug dakong higayon sa pagsangyaw ngadto sa managsamang mga magtutudlo ug mga estudyante.

21. Samtang ang mga batan-on mosalig kang Jehova, sa unsang paagi ang ilang panggawi mobanaag diha kaniya?

²¹ Sa Belgium usa ka magtutudlo mihimog makaiikag nga komento sa klase bahin sa mga Saksi ni Jehova. Napanid-an niya ang panggawi sa usa sa iyang mga estudyante, nga batan-on usab nga sister, ug miingon: “Ako karon may laing hunahuna bahin sa mga Saksi ni Jehova. Ang pagkamapihigon nag-agak kanako sa paghunahuna nga sila ang labing dili matinugotong katawhan. Napamatud-an nga sila ang labing matinugoton, samtang dili mokompromiso sa ilang mga prinsipyo.” Kada tuig ang usa ka premyo ihatag sa mga magtutudlo ngadto sa ilang labing maayong mga estudyante. Apil sa uban pa mao ang usa ka premyo alang sa kurso sa pamatasan. Sa tulo ka nagsunod nga tuig, ang mga ganti alang sa tulo ka taas nga mga grado gihatag niining magtutudloa ngadto sa mga anak sa mga Saksi ni Jehova. Kana ang sagad mahitabo niadtong maunongong nagsalig kang Jehova.​—Salmo 31:23.

22. Unsa ang mahugyawong paniklop sa Salmo 31, ug sa unsang paagi kana motabang kanato sulod sa hinapos nga mga adlaw niining sistema sa mga butang?

²² Ang Salmo 31 milanog uban sa mahugyawong paniklop: “Magmaisogon kamo, ug magmalig-on ang inyong kasingkasing, kamong tanan nga nagapaabot kang Jehova.” (Salmo 31:24) Busa, samtang giatubang nato ang hinapos nga mga adlaw sa daotang sistema ni Satanas, halayo sa pagbiya kanato, si Jehova magpaduol kaayo kanato ug magbutang sa iyang gahom mismo nganhi kanato. Si Jehova matinumanon ug dili mapakyas. Siya mao ang atong dangpanan; siya mao ang atong torre.​—Proverbio 18:10.

Nahinumdom Ka Ba?

◻ Nganong sa kamasaligon makahimo kita kang Jehova nga dangpanan?

◻ Unsang ebidensiya ang anaa nga ang kusganong koro nagaawit sa Gingharianong pagdayeg nga may kaisog?

◻ Nganong makasalig kita nga ang pukot ni Satanas dili makalit-ag sa katawhan ni Jehova?

◻ Unsang bahandi ang gigahin ni Jehova alang niadtong nagadangop kaniya?

[Chart sa panid 12-15]

1993 TUIG SA PAG-ALAGAD NGA TAHO SA MGA SAKSI NI JEHOVA SA TIBUOK KALIBOTAN

(Tan-awa ang tomo)

[Mga hulagway sa panid 16, 17]

Kadtong modangop kang Jehova nahimong kusog nga koro sa mga magmamantala sa Gingharian​—4,709,889 ka tawo!

1. Senegal

2. Brazil

3. Chile

4. Bolivia