Magkalipay sa Kinabuhi Diha sa Pagkahadlok Kang Jehova
“Kahadloki ninyo si Jehova, kamong mga balaan niya, kay sa mga nangahadlok kaniya walay makulang.”—SALMO 34:9.
1, 2. (a) Sa unsang lainlaing mga paagi nga gilantaw sa Kakristiyanohan ang pagkahadlok sa Diyos? (b) Unsang mga pangutana ang atong susihon karon?
ANG mga ministro sa Kakristiyanohan nga nagtudlo bahin sa pagkahadlok sa Diyos subsob nga nagtudlo niana pinasukad sa dili-Kasulatanhong pagtulon-an nga silotan sa Diyos sa dayon ang mga makasasala diha sa impiyerno. Ang maong doktrina sukwahi sa kon unsay gitudlo sa Bibliya bahin kang Jehova ingong Diyos sa gugma ug hustisya. (Genesis 3:19; Deuteronomio 32:4; Roma 6:23; 1 Juan 4:8) Ang ubang mga ministro sa Kakristiyanohan naggamit ug laing paagi. Dili gayod nila hisgotan nga angay kitang mahadlok sa Diyos. Hinunoa, nagtudlo sila nga ang Diyos matinugoton ug modawat halos ni bisan kinsa way sapayan sa iyang paagi sa pagkinabuhi. Wala usab kana itudlo sa Bibliya.—Galacia 5:19-21.
2 Sa pagkatinuod, ang Bibliya nagdasig kanato nga kahadlokan ang Diyos. (Pinadayag 14:7) Ang maong kamatuoran magpatunghag mga pangutana. Nganong buot man sa usa ka mahigugmaong Diyos nga mahadlok kita kaniya? Unsang matanga sa kahadlok ang gikinahanglan sa Diyos? Sa unsang paagi ang pagkahadlok sa Diyos makahatag kanatog kaayohan? Atong hisgotan kining mga pangutanaha samtang atong ipadayon ang atong paghisgot sa ika-34 nga Salmo.
Kon Nganong Mahadlok sa Diyos
3. (a) Unsay imong pagbati sa sugo nga kahadlokan ang Diyos? (b) Nganong malipayon kadtong may kahadlok kang Jehova?
3 Ingong Maglalalang ug Soberanong Magmamando sa uniberso, si Jehova takos nga kahadlokan. (1 Pedro 2:17) Apan, ang maong kahadlok dili sama sa hilabihang kalisang nga atong bation sa usa ka mabangis nga diyos. Kini maoy matahaong kahadlok tungod sa atong pagkahibalo kon kinsa si Jehova. Kini maoy kahadlok usab nga mapasuko siya. Ang diyosnong kahadlok hamili ug makapadasig, dili makapaguol o makapalisang. Si Jehova, ang “malipayong Diyos,” nagtinguha nga ang iyang tawhanong mga linalang magkalipay sa kinabuhi. (1 Timoteo 1:11) Apan, aron matagamtam kana kinahanglang magkinabuhi kita nga nahiuyon sa mga kinahanglanon sa Diyos. Alang sa daghan, nagpasabot kana ug kausaban sa estilo sa kinabuhi. Ang tanan nga mohimo sa gikinahanglang kausaban makasinati sa pagkatinuod sa mga pulong ni salmistang David: “Oh tilawi ug tan-awa ninyo nga si Jehova maayo; malipayon ang tawo nga lig-on ug lawas nga modangop kaniya. Kahadloki ninyo si Jehova, kamong mga balaan niya, kay sa mga nangahadlok kaniya walay makulang.” (Salmo 34:8, 9) Tungod kay sila adunay maayong relasyon sa Diyos, walay makulang nga bililhong butang sa tanan nga may kahadlok kang Jehova.
4. Unsang pasalig ang gihatag ni David ug Jesus?
4 Matikdi nga sa kapadapatan niana sa iyang adlaw, gipasidunggan ni David ang iyang mga tawo pinaagi sa pagtawag kanilang “mga balaan.” Sila maoy bahin sa balaang nasod sa Diyos. Gipameligro usab nila ang ilang kinabuhi sa pagsunod kang David. Bisan tuod kanunay silang gigukod ni Haring Saul, masaligon si David nga si Jehova magpadayon sa pagtagana sa ilang sukaranang mga panginahanglan. Misulat si David: “Ang may-lambungay nga mga nating leyon nakulangan ug gigutom; apan silang nagapangita kang Jehova, dili sila makulangan ug bisan unsang butang nga maayo.” (Salmo 34:10) Gipasaligan usab ni Jesus ang iyang mga sumusunod ug sama niana.—Mateo 6:33.
5. (a) Unsang matanga sa mga tawo ang kadaghanan sa mga sumusunod ni Jesus? (b) Unsang tambag ang gihatag ni Jesus mahitungod sa kahadlok?
5 Daghan niadtong namati kang Jesus naggikan sa mga hinikawan, kabos nga mga Hudiyo. Busa, si Jesus “naluoy kanila, tungod kay sila pinanitan ug nagkatibuagsa sama sa mga karnero nga walay magbalantay.” (Mateo 9:36) May kaisog kaha ang maong mga kabos sa pagsunod kang Jesus? Aron makasunod sila kang Jesus, kinahanglang ugmaron nila ang pagkahadlok kang Jehova, dili sa mga tawo. Si Jesus miingon: “Ayaw kahadlok niadtong mopatay sa lawas ug human niini dili na makahimo sa pagbuhat ug bisan unsa pa. Apan ipaila ko kaninyo kon kinsay kahadlokan: Kahadloki siya nga human sa pagpatay may awtoridad sa pagtambog ngadto sa Gehenna. Oo, sultihan ko kamo, kahadloki kini Siya. Ang lima ka goryon ginabaligya sa duha ka sensilyong gamayg bili, dili ba? Bisan pa niana walay usa kanila nga mahikalimtan atubangan sa Diyos. Apan bisan ang mga buhok sa inyong mga ulo naihap ang tanan. Ayaw kahadlok; kamo labaw pa ug bili kay sa daghang goryon.”—Lucas 12:4-7.
6. (a) Unsang mga pulong ni Jesus ang nagpalig-on sa mga Kristohanon? (b) Nganong si Jesus ang kinamaayohang panig-ingnan sa pagpasundayag ug diyosnong kahadlok?
6 Sa dihang kadtong may kahadlok kang Jehova pit-oson sa ilang mga kaaway nga mohunong sa pag-alagad sa Diyos, lagmit mahinumdoman nila ang tambag ni Jesus: “Ang matag usa nga mosugid nga nahiusa kanako atubangan sa mga tawo, ang Anak sa tawo magasugid usab nga nahiusa kaniya atubangan sa mga manulonda sa Diyos. Apan siya nga dili moangkon kanako atubangan sa mga tawo dili pagaangkonon atubangan sa mga manulonda sa Diyos.” (Lucas 12:8, 9) Kanang mga pulonga nagpalig-on sa mga Kristohanon, ilabina sa mga nasod diin gidili ang matuod nga pagsimba. Ang maong mga Kristohanon nagpadayon sa pagdayeg kang Jehova nga mainampingon diha sa Kristohanong mga tigom ug sa ilang publikong ministeryo. (Buhat 5:29) Nagpakita si Jesus sa kinamaayohang panig-ingnan sa pagpasundayag ug “diyosnong kahadlok.” (Hebreohanon 5:7) Naghisgot kaniya, ang matagnaong Pulong nag-ingon: “Ang espiritu ni Jehova mopahiluna kaniya, ang espiritu . . . sa pagkahadlok kang Jehova; ug siya magkalipay diha sa pagkahadlok kang Jehova.” (Isaias 11:2, 3) Busa, takos gayod si Jesus nga motudlo kanato sa mga kaayohan sa pagpakitag diyosnong kahadlok.
7. (a) Sa unsang paagi ang mga Kristohanon, sa pagkatinuod, misanong sa pagdapit nga susama nianang gitanyag ni David? (b) Sa unsang paagi masundog sa mga ginikanan ang maayong panig-ingnan ni David?
7 Ang tanan nga nagsunod sa panig-ingnan ni Jesus ug nagtuman sa iyang mga pagtulon-an, sa pagkatinuod, misanong sa pagdapit nga susama nianang gitanyag ni David: “Umari kamo, mga anak, pamati kanako; ang pagkahadlok kang Jehova maoy itudlo ko kaninyo.” (Salmo 34:11) Natural lang nga tawgon ni David ang iyang mga tawo ingong “mga anak” tungod kay sila nagtamod kaniya ingong ilang pangulo. Sa iyang bahin, si David naghatag ug espirituwal nga tabang ngadto sa iyang mga sumusunod aron sila mahiusa ug makabaton sa pag-uyon sa Diyos. Pagkamaayong panig-ingnan kana alang sa Kristohanong mga ginikanan! Si Jehova naghatag kanilag awtoridad mahitungod sa ilang mga anak nga lalaki ug babaye nga “magpadayon sa pagmatuto kanila sa disiplina ug sa pagdumala-sa-kaisipan ni Jehova.” (Efeso 6:4) Pinaagi sa adlaw-adlawng paghisgot sa espirituwal nga mga butang uban sa ilang mga anak ug pinaagi sa pagdumalag regular nga pagtuon sa Bibliya uban kanila, matabangan sa mga ginikanan ang ilang mga anak nga magkalipay sa kinabuhi diha sa pagkahadlok kang Jehova.—Deuteronomio 6:6, 7.
Kon Unsaon Pagpadapat ang Diyosnong Kahadlok
8, 9. (a) Nganong makapadani kaayo ang pagkinabuhi nga may kahadlok sa Diyos? (b) Unsay nalangkit sa pagbantay sa atong dila?
8 Sa nahisgotan na ganina, ang pagkahadlok kang Jehova wala maghikaw kanato sa kalipay. Si David misukna: “Kinsa ang tawo nga nahimuot sa kinabuhi, nga nahigugma sa igong gidaghanon sa mga adlaw aron makita ang maayo?” (Salmo 34:12) Tin-aw nga ang pagkahadlok kang Jehova hinungdanon aron matagamtam ang taas nga kinabuhi ug makita ang maayo. Apan, sayon rang moangkon, “Ako nahadlok sa Diyos.” Dili sayon ang pagpamatuod niana pinaagi sa atong panggawi. Busa, si David nagpadayon sa pagpatin-aw kon sa unsang paagi ikapadapat nato ang diyosnong kahadlok.
9 “Bantayi ang imong dila batok sa daotan, ug ang imong mga ngabil batok sa pagsulti ug panglimbong.” (Salmo 34:13) Giinspirar si apostol Pedro sa pagkutlo niining bahina sa Salmo 34 human niya tambagi ang mga Kristohanon nga magpakita ug inigsoong pagbati sa usag usa. (1 Pedro 3:8-12) Ang pagbantay sa atong dila batok sa daotan nagpasabot nga likayan nato ang pagpakaylap ug makadaot nga tabi. Hinunoa, maningkamot kita kanunay nga mahimong makapalig-on sa dihang makigsulti sa uban. Dugang pa, maningkamot kita nga magmaisogon ug mosulti sa kamatuoran.—Efeso 4:25, 29, 31; Santiago 5:16.
10. (a) Ipatin-aw kon unsay kahulogan sa pagpahilayo sa kon unsay daotan. (b) Unsay nalangkit sa pagbuhat kon unsay maayo?
10 “Pahilayo sa daotan, ug buhata ang maayo; pangitaa ang pakigdait, ug sunda kini.” (Salmo 34:14) Atong likayan ang mga butang nga gihukman sa Diyos, sama sa seksuwal nga imoralidad, pornograpiya, pagpangawat, espiritismo, kapintasan, paghuboghubog, ug pag-abuso sa droga. Isalikway usab nato ang kalingawan nga nagpasiugda nianang dulumtanang mga butang. (Efeso 5:10-12) Hinunoa, gamiton nato ang atong panahon sa pagbuhat kon unsay maayo. Ang kinamaayohan natong mahimo mao ang pagpakigbahin nga regular sa buluhatong pagsangyaw sa Gingharian ug paghimog mga tinun-an, nga nagtabang sa uban nga makabaton ug kaluwasan. (Mateo 24:14; 28:19, 20) Ang pagbuhat ug maayo naglakip usab sa pagpangandam ug pagtambong sa Kristohanong mga tigom, pag-amot ug salapi sa tibuok-kalibotang buluhaton, pag-atiman sa atong Kingdom Hall, ug pagkamahunahunaon sa mga panginahanglan sa kabos nga mga Kristohanon.
11. (a) Sa unsang paagi gibuhat ni David ang iyang gisulti bahin sa pakigdait? (b) Unsay imong mahimo sa pagpangita sa “pakigdait” diha sa kongregasyon?
11 Si David naghatag ug maayong panig-ingnan sa pagpangita sa pakigdait. Dihay duha ka higayon nga mahimo unta niyang patyon si Saul. Nianang mga higayona, gilikayan niya ang pagbuhat ug kapintasan ug sa ulahi nagsulti nga matinahoron ngadto sa hari, nga naglaom nga mapasig-uli ang pakigdait. (1 Samuel 24:8-11; 26:17-20) Unsay mahimo karon sa dihang ang usa ka situwasyon lagmit nga makatugaw sa kalinaw sa kongregasyon? Kinahanglang ‘pangitaon nato ang pakigdait, ug sundon kini.’ Busa kon mamatikdan nato nga dili na maayo ang atong relasyon sa atong isigkamagtutuo, atong sundon ang tambag ni Jesus: “Pakigdait una sa imong igsoon.” Ayha pa nato ipadayon ang ubang bahin sa matuod nga pagsimba.—Mateo 5:23, 24; Efeso 4:26.
Ang Pagkahadlok sa Diyos Adunay Daghang Kaayohan
12, 13. (a) Unsang mga kaayohan ang madawat karon niadtong nahadlok sa Diyos? (b) Unsang dakong ganti ang hapit nang tagamtamon sa matuod nga mga magsisimba?
12 “Ang mga mata ni Jehova gipunting sa mga matarong, ug ang iyang mga igdulungog gikiling sa ilang pagtuaw alang sa tabang.” (Salmo 34:15) Ang talaan sa mga pakiglabot sa Diyos kang David nagpamatuod nga tinuod kanang mga pulonga. Karon, natagamtam nato ang dulot nga kalipay ug pangsulod nga kalinaw tungod kay nahibalo kita nga si Jehova nagabantay kanato. Masaligon kita nga kanunay niyang ihatag ang atong mga panginahanglan, bisan pag nailalom kita sa hilabihang kapit-os. Nahibalo kita nga sa dili madugay, ang tanang matuod nga mga magsisimba mag-atubang sa gitagna nga pag-atake ni Gog sa Magog ug sa “makalilisang nga adlaw ni Jehova.” (Joel 2:11, 31; Ezequiel 38:14-18, 21-23) Bisan unsang kahimtang nga ato unyang atubangon nianang panahona, ang mga pulong ni David mapadapat usab unya kanato: “Sila mituaw, ug si Jehova nagpatalinghog, ug iyang giluwas sila gikan sa tanan nilang kasakit.”—Salmo 34:17.
13 Pagkamakalilipay unya nga makita nga bayawon ni Jehova ang iyang bantogang ngalan nianang panahona! Ang atong kasingkasing matugob gayod sa mas dakong kataha kay sukad masukad, ug ang tanang magsusupak mahiagom sa makauulawng kalaglagan. “Ang nawong ni Jehova maoy batok sa mga nagabuhat ug daotan, aron putlon ang paghisgot kanila gikan sa yuta.” (Salmo 34:16) Pagkadakong panalangin unya nga masinati kanang dakong kaluwasan ug makapuyo sa matarong nga bag-ong kalibotan sa Diyos!
Mga Saad nga Motabang Kanato sa Paglahutay
14. Unsay motabang kanato sa paglahutay bisan pa sa mga katalagman?
14 Sa kasamtangan, aron makapadayon kita sa pagsunod kang Jehova diha sa hiwi ug masinupakon nga kalibotan, gikinahanglan nato ang paglahutay. Ang diyosnong kahadlok maoy dakong tabang samtang ginaugmad nato ang pagkamasinugtanon. Tungod sa makuyaw nga mga panahon nga atong gikinabuhian, ang ubang mga alagad ni Jehova mahiagom sa hilabihang kalisod nga makapasubo pag-ayo ug makapahigawad kanila. Apan, makaseguro gayod sila nga kon mosalig sila kang Jehova, siya motabang kanila sa paglahutay. Ang mga pulong ni David naghatag ug tinuod nga kahupayan: “Si Jehova haduol niadtong mga dugmok ug kasingkasing; ug siya magaluwas niadtong mga nahugno sa espiritu.” (Salmo 34:18) Makapadasig ang padayong gisulti ni David: “Daghan ang mga katalagman sa matarong, apan si Jehova magaluwas kaniya gikan niining tanan.” (Salmo 34:19) Bisan unsa pa ka daghang katalagman ang modangat kanato, si Jehova makahimo sa pagluwas kanato.
15, 16. (a) Unsang katalagman ang nasayran ni David wala madugay human niya gikomposo ang Salmo 34? (b) Unsay motabang kanato sa paglahutay sa mga kalisdanan?
15 Wala madugay human gikomposo ang Salmo 34, nadungog ni David ang katalagman nga nahitabo sa mga molupyo sa Nob, sa dihang sila ug ang kadaghanan sa mga saserdote gipapatay ni Saul. Seguradong naguol gayod siya sa dihang iyang nahinumdoman nga ang iyang pag-adto sa Nob ang nagpukaw sa kaligutgot ni Saul! (1 Samuel 22:13, 18-21) Walay duhaduha nga si David nangayog tabang kang Jehova, ug seguradong nahupayan siya nga sa umaabot banhawon ang “mga matarong.”—Buhat 24:15.
16 Karon, gipalig-on usab kita sa paglaom sa pagkabanhaw. Nahibalo kita nga walay bisan unsa nga buhaton sa atong mga kaaway nga makapahinabo kanato ug permanenteng kadaot. (Mateo 10:28) Nagpahayag si David ug susamang kombiksiyon niining mga pulonga: ‘Siya nagabantay sa tanang bukog sa usa nga matarong; walay usa kanila nga nabali.’ (Salmo 34:20) Kanang bersikuloha literal nga natuman sa kahimtang ni Jesus. Bisan tuod si Jesus gipatay sa linuog nga paagi, walay bukog niya nga ‘nagupok.’ (Juan 19:36) Sa dugang kapadapatan, ang Salmo 34:20 nagpasalig kanato nga bisan unsang mga kalisdanan nga giatubang sa dinihogang mga Kristohanon ug sa ilang kauban nga “ubang mga karnero,” dili gayod sila mahiagom sa permanenteng kadaot. Ang ilang mga bukog dili gayod mabali, sa mahulagwayong pagkasulti.—Juan 10:16.
17. Unsang katalagman ang modangat unya sa dili-mahinulsolong mga tawo nga nagdumot sa katawhan ni Jehova?
17 Alang sa mga daotan, lahi ang kahimtang. Sa dili madugay sila magaani sa kadaot nga ilang gipugas. “Ang katalagman magapatay sa daotan; ug pagaisipong sad-an ang mga nagadumot sa matarong.” (Salmo 34:21) Ang tanang nagpadayon sa pagsupak sa katawhan sa Diyos mag-atubang sa kinagrabehang katalagman. Sa pagpadayag kang Jesu-Kristo, sila “makaagom sa hudisyal nga silot sa walay kataposang kalaglagan.”—2 Tesalonica 1:9.
18. Sa unsang diwa nga ang “dakong panon” natubos na, ug unsay ilang masinati sa umaabot?
18 Ang salmo ni David gitapos pinaagi niining makapadasig nga mga pulong: “Si Jehova nagatubos sa kalag sa iyang mga alagad; ug walay mausa sa mga modangop kaniya ang pagaisipong sad-an.” (Salmo 34:22) Sa naghinapos na ang iyang 40-ka-tuig nga pagmando, si Haring David miingon: “[Ang Diyos] mitubos sa akong kalag gikan sa tanang kasakit.” (1 Hari 1:29) Sama kang David, kadtong may kahadlok kang Jehova sa dili madugay makahandom ug magmaya nga sila gitubos gikan sa bisan unsang pagbatig pagkasad-an ug giluwas gikan sa tanan nilang mga kalisdanan. Sa pagkakaron, kadaghanan sa dinihogang mga Kristohanon nakadawat na sa ilang langitnong ganti. “Usa ka dakong panon” gikan sa tanang kanasoran ang miduyog karon sa mga nanghibilin sa mga igsoon ni Jesus sa pag-alagad sa Diyos ug ingong resulta, sila nagbaton ug hinlong baroganan atubangan ni Jehova. Tungod kini kay sila nagpasundayag ug pagtuo sa nagatubos nga gahom sa giula nga dugo ni Jesus. Sa umaabot nga Usa ka Libo ka Tuig nga Pagmando ni Kristo, ang tanang benepisyo sa halad lukat ipadapat kanila, nga motabang kanila nga makab-ot ang tawhanong kahingpitan.—Pinadayag 7:9, 14, 17; 21:3-5.
19. Unsay determinadong buhaton sa mga membro sa “dakong panon”?
19 Nganong kining tanang panalangin modangat man sa “dakong panon” sa mga magsisimba sa Diyos? Tungod kay determinado sila nga magpadayon sa pagkahadlok kang Jehova, nga mag-alagad kaniya uban ang kahingangha ug matahaong pagkamasinugtanon. Sa pagkatinuod, ang pagkahadlok kang Jehova makapahimo sa kinabuhi nga makalilipay karon ug motabang kanato sa ‘pagpangupot pag-ayo sa tinuod nga kinabuhi’—walay kataposang kinabuhi sa bag-ong kalibotan sa Diyos.—1 Timoteo 6:12, 18, 19; Pinadayag 15:3, 4.
Nahinumdom Ka Ba?
• Nganong angay kitang mahadlok sa Diyos, ug unsay kahulogan sa pagkahadlok kaniya?
• Unsay angayng epekto sa diyosnong kahadlok diha sa atong panggawi?
• Unsang mga kaayohan ang madawat gumikan sa pagkahadlok sa Diyos?
• Unsang mga saad ang motabang kanato sa paglahutay?
[Hulagway sa panid 26]
Kadtong may kahadlok kang Jehova nag-amping sa dihang mailalom sa pagdili
[Hulagway sa panid 28]
Ang kinamaayohan natong mahimo para sa atong mga silingan mao ang pagpaambit kanila sa maayong balita sa Gingharian