Ang Diyos ba Tinuod Alang Kanimo?

SA DIHANG makasinati ka ug makapaguol nga mga suliran, moduol ka ba dayon sa Diyos diha sa pag-ampo? Kon mao, imo bang gibati nga nakigsulti ka sa usa ka tinuod nga persona?

Nagtumong sa iyang langitnong Amahan, si Jesu-Kristo miingon: “Siya nga nagpadala kanako maoy tinuod.” (Juan 7:28) Oo, tinuod si Jehova nga Diyos, ug ang pag-ampo ngadto kaniya nahisamag pagduol ngadto sa suod kaayo nga tawhanong higala alang sa tabang o tambag. Siyempre, aron dunggon sa Diyos, ang atong mga pag-ampo kinahanglang makakab-ot sa Kasulatanhong mga kinahanglanon sa dalawatong pag-ampo. Pananglitan, kinahanglang moduol kita nga mapaubsanon sa “Tigpatalinghog sa pag-ampo” pinaagi sa iyang Anak, si Jesu-Kristo.​—Salmo 65:2; 138:6; Juan 14:6.

Ang uban mobati tingali nga tungod kay ang Diyos dili makita, siya dili persona. Alang kanila, ang Diyos maorag teoriya lamang. Bisan ang ubang mga Kristohanon, nga nakakat-on bahin sa kahibulongang mga hiyas sa Diyos, usahay malisdan sa pagsabot kon unsa siya ka tinuod. Ingon ba niini ang imong kasinatian? Kon mao, unsay makatabang aron si Jehova nga Diyos mahimong tinuod alang kanimo?

Tun-i ang Kasulatan

Nagtuon ka ba nga regular sa Balaang Kasulatan? Kon mas kanunay ug mas taas ang mga yugto sa imong pagtuon sa Bibliya, mas mahimo pang tinuod si Jehova nga Diyos alang kanimo. Sa ingon ang imong pagtuo mapalig-on, sa pagkatinuod makapaarang kanimo sa ‘pagkakita sa Usa nga dili makita.’ (Hebreohanon 11:6, 27) Sa laing bahin, ang panagsa o dili-regular nga pagtuon sa Bibliya dili gayod makapalig-on sa imong pagtuo.

Sa pag-ilustrar: Handurawa nga giingnan ka sa imong doktor nga manghaplas ug kaduha sa usa ka adlaw aron maayo ang dugay nang nukanuka. Mawala ba ang imong nukanuka kon manghaplas ka lang ug kausa o kaduha sa usa ka bulan? Dili gayod. Sa susama, ang salmista naghatag kanatog “reseta” alang sa espirituwal nga kahimsog. Basaha ang Pulong sa Diyos “sa hinay nga tingog adlaw ug gabii.” (Salmo 1:1, 2) Aron mapahimuslan ang magkadako nga kaayohan, kinahanglang atong sundon ang “reseta”​—ang adlaw-adlaw nga pagkonsiderar sa Pulong sa Diyos uban sa tabang sa Kristohanong mga publikasyon.​—Josue 1:8.

Buot ka bang himoon ang imong mga yugto sa pagtuon nga mas makapalig-on sa pagtuo? Aniay usa ka sugyot: Human mabasa ang usa ka kapitulo sa New World Translation of the Holy Scriptures o laing Bibliya nga adunay mga cross-reference, pilia ang makapaikag nga bersikulo ug tan-awa ang reperensiyang kasulatan nga gisitar. Magpauswag kini sa imong pagtuon, ug sa walay duhaduha makadayeg ka sa pangsulod nga panag-uyonay sa Bibliya. Sa baylo, kini makapahimo sa Awtor niini, si Jehova nga Diyos, nga mas tinuod alang kanimo.

Ang paggamit sa mga cross-reference makapasinati usab nimo sa mga tagna sa Bibliya ug sa mga katumanan niini. Tingali sinati ka sa dagkong mga tagna sa Bibliya, sama nianang naglangkit sa pagkalaglag sa Jerusalem pinaagi sa mga Babilonyanhon. Apan, ang Bibliya adunay kutay sa magkalangkit nga mga tagna ug mga katumanan niini. Ang uban niini dili kaayo ilado.

Pananglitan, basaha ang tagna bahin sa silot sa pagtukod-pag-usab sa Jerico ug dayon matikdi ang katumanan niini. Ang Josue 6:26 nag-ingon: “Niadtong panahona nanumpa si Josue, nga nag-ingon: ‘Tinunglo sa atubangan ni Jehova ang tawo nga magbangon ug magtukod niining siyudara, ang Jerico. Sa kapildihan sa iyang kamagulangan iyang ipahiluna ang patukoranan niini, ug sa kapildihan sa iyang kamanghoran iyang tukoron ang ganghaan niini.’” Natuman kini mga 500 ka tuig sa ulahi, kay atong mabasa sa 1 Hari 16:34: “Sa mga adlaw [ni Haring Ahab] si Hiel nga taga-Bethel nagtukod sa Jerico. Sa kapildihan ni Abiram nga iyang kamagulangan iyang gipahiluna ang patukoranan niini, ug sa kapildihan ni Segub nga iyang kamanghoran iyang gitukod ang mga ganghaan niini, sumala sa pulong ni Jehova nga iyang gipamulong pinaagi kang Josue ang anak nga lalaki ni Nun.”a Ang tinuod nga Diyos lamang ang makainspirar sa maong mga tagna ug makatino sa katumanan niini.

Samtang magbasa sa Bibliya, ikaw tingali mahinam bahin sa usa ka punto. Pananglitan, ikaw tingali mahibulong kon pila ka tuig ang miagi tali sa usa ka tagna ug sa katumanan niini. Imbes mangutana lang sa laing tawo, nganong dili maningkamot sa pagsusi niini mismo? Ginamit ang mga tsart ug mga tabang sa pagtuon sa Bibliya, kugihi pagpanukiduki ang mga tubag nga samag nagsusi ka ug mapa sa bahandi. (Proverbio 2:4, 5) Ang pagkakaplag sa mga tubag makapalig-on sa imong pagtuo ug maghimo kang Jehova nga Diyos nga mas tinuod alang kanimo.

Pag-ampo nga Makanunayon ug Mainiton

Ayawg kalimti ang kabililhon sa pag-ampo ug pagtuo. Ang mga tinun-an ni Jesus direktang mihangyo: ‘Hatagi kami ug dugang pagtuo.’ (Lucas 17:5) Kon maorag dili tinuod si Jehova alang kanimo, nganong dili mag-ampo kaniya nga nanginahanglan ka ug dugang pagtuo? Sa kamasaligon hangyoa ang tabang sa imong langitnong Amahan aron mahimo siyang tinuod alang kanimo.

Kon gihasol ka sa usa ka suliran, paggahin ug gikinahanglang panahon sa pagpakigsulti sa imong langitnong Higala sa kinasingkasing nga paagi. Sa hapit nang mamatay si Jesus, mainiton siyang nag-ampo. Bisag gisaway niya ang relihiyosong kagawian sa pag-ampog dugay nga gituyo aron ipasundayag sa publiko, gigugol niya ang tibuok gabii sa pag-ampo nga nag-inusara una pa pilia ang iyang 12 ka apostol. (Marcos 12:38-40; Lucas 6:12-16) Makakat-on usab kita kang Ana, nga nahimong inahan ni manalagnang Samuel. Nangandoy ug anak nga lalaki, “dugay siyang nag-ampo sa atubangan ni Jehova.”​—1 Samuel 1:12.

Unsay paninugdang leksiyon niining tanan? Kon naglaom kang dunggon ang imong mga pag-ampo, kinahanglang mag-ampo kang seryoso, mainiton, walay hunong​—ug, siyempre, uyon sa kabubut-on sa Diyos. (Lucas 22:44; Roma 12:12; 1 Tesalonica 5:17; 1 Juan 5:13-15) Ang pagbuhat niini makatabang nga ang Diyos mahimong tinuod alang kanimo.

Matikdi ang Kalalangan

Ang personalidad sa usa ka tigdibuho makita diha sa iyang mga dibuho. Sa susama, ang “dili makita nga mga hiyas” ni Jehova, ang Tigdisenyo ug Maglalalang sa uniberso, tin-awng makita diha sa kalalangan. (Roma 1:20) Kon atong matikdan pag-ayo ang buhat ni Jehova, mas masabtan nato ang iyang personalidad, ug siya mahimong mas tinuod alang kanato.

Kon imong matikdan pag-ayo ang mga butang nga gilalang sa Diyos, sa katim-os makadayeg ka sa pagkatinuod sa iyang mga hiyas. Pananglitan, ang impormasyon bahin sa mga abilidad sa mga langgam sa paglupad magpadako gayod sa imong pagpabili sa kinaadman ni Jehova. Sa pagbasa bahin sa uniberso, tingali imong makat-onan nga ang Milky Way, nga halos 100,000 ka light-year ang gisangkaron, maoy usa lamang sa gibanabanang bilyonbilyong galaksiya sa tibuok kawanangan. Di ba kana magpatuo kanimo sa katinuoran sa kinaadman sa Maglalalang?

Segurado, ang kinaadman ni Jehova tinuod! Apan unsay ipasabot niana alang kanimo? Buweno, di gayod siya malibog sa mga suliran nga iampo ngadto kaniya ni bisan kinsa kanato. Oo, bisan ang diyutayng kahibalo bahin sa kalalangan makapahimo kang Jehova nga mas tinuod alang kanimo.

Lakaw Uban Kang Jehova

Masinati mo ba sa personal kon unsa gayod ka tinuod si Jehova? Oo, kon ikaw sama sa matinumanong patriarka nga si Noe. Gisugot niya kanunay si Jehova, mao nga ikaingon: “Si Noe naglakaw uban sa tinuod nga Diyos.” (Genesis 6:9) Nagkinabuhi si Noe nga daw si Jehova diha mismo sa iyang tupad. Mahimong ingon niana ka tinuod ang Diyos alang kanimo.

Kon naglakaw ka uban sa Diyos, mosalig ka sa Kasulatanhong mga saad ug mobuhat uyon niana. Pananglitan, motuo ka sa mga pulong ni Jesus: “Padayong pangitaa nga una ang gingharian ug ang . . . pagkamatarong [sa Diyos], ug kining tanang ubang mga butang [materyal nga mga kinahanglanon] idugang kaninyo.” (Mateo 6:25-33) Tinuod, dili tingali kanunay itagana ni Jehova ang imong gikinahanglan sumala sa imong pagdahom. Apan, sa dihang mag-ampo ka ug dayon masinati ang tabang sa Diyos, siya mahimong tinuod kanimo sama ni bisan kinsa diha sa imong tupad.

Ang maong suod nga relasyon uban kang Jehova maugmad sa dihang ang usa magpadayon sa paglakaw uban sa Diyos. Tagda si Manuela, usa ka Saksi nga nagsultig Kinatsila, nga nakalahutay sa daghang pagsulay. Siya miingon: “Bisan kanus-a nga ako nahasol o nanginahanglan, gipadapat ko ang prinsipyo nga makaplagan sa Proverbio 18:10. Magpakitabang ko kang Jehova. Kanunay siyang ‘usa ka malig-ong torre’ alang kanako.” Nakasulti si Manuela niini human sa 36 ka tuig nga pagsalig kang Jehova ug pagsinati sa iyang pagpaluyo.

Ikaw ba nagsugod pa lamang sa pagsalig kang Jehova? Ayawg kaluya kon ang imong relasyon uban kaniya dili pa gayod sumala sa buot nimong mahitabo. Pagkinabuhi matag adlaw ingong usa ka tawo nga nagalakaw uban sa Diyos. Samtang imong tukoron ang matinumanong sumbanan sa kinabuhi, mapahimuslan nimo ang suod nga relasyon uban kang Jehova.​—Salmo 25:14; Proverbio 3:26, 32.

Ang laing paagi sa paglakaw uban sa Diyos mao ang pagkapuliki sa pag-alagad kaniya. Sa dihang makigbahin ka sa buluhaton sa pagsangyaw sa Gingharian, ikaw maoy isigkamagbubuhat uban kang Jehova. (1 Corinto 3:9) Ang pagkasayod niini motabang nga ang Diyos mahimong tinuod kaayo alang kanimo.

Ang salmista nag-awhag: “Itugyan kang Jehova ang imong dalan, ug salig kaniya, ug siya mismo molihok.” (Salmo 37:5) Ayaw gayod pakyasa ang pagtugyan ngadto sa Diyos sa bisan unsang mga kabug-at o mga kahangawa nga anaa kanimo. Pangayo kanunay kaniyag tabang ug giya. Kon mainampoon kang mosandig kang Jehova nga Diyos ug kanunayng mosalig kaniya sa bug-os, mobati kag kasegurohan tungod kay nasayod ka nga dili siya mapakyas sa paglihok alang kanimo. Masaligon ka ba sa dihang moduol kang Jehova uban sa imong personal nga mga kabalaka? Masaligon ka​—kon ang Diyos tinuod alang kanimo.

[Footnote]

[Hulagway sa panid 21]

Himoang makapalig-on sa pagtuo ang mga yugto sa imong pagtuon

[Hulagway sa panid 22]

Gahinig panahon ang regular, mainitong pag-ampo

[Mga hulagway sa panid 23]

Matikdi kon sa unsang paagi ang mga hiyas sa Diyos makita diha sa kalalangan

[Credit Lines]

Hummingbird: U.S. Fish and Wildlife Service, Washington, D.C./Dean Biggins; mga bituon: Letrato: Copyright IAC/RGO 1991, Dr. D. Malin et al, Isaac Newton Telescope, Roque de los Muchachos Observatory, La Palma, Canary Islands