“Ikaw Makauban Nako sa Paraiso”

 1. Sa hapit nang mamatay si Jesus, unsay iyang gisulti sa kriminal nga tapad niya? (Lucas 23:39-43)

SI Jesus ug ang duha ka kriminal nga tapad niya nag-antos ug hapit nang mamatay. (Luc. 23:32, 33) Ang duha ka kriminal nagbugalbugal kang Jesus, busa klaro nga sila dili iyang mga tinun-an. (Mat. 27:44; Mar. 15:32) Pero ang usa nila nausab ug miingon: “Jesus, hinumdomi ko inig-abot nimo sa imong Gingharian.” Si Jesus mitubag: “Akong ipasalig kanimo karong adlawa, ikaw makauban nako sa Paraiso.” (Basaha ang Lucas 23:39-43.) Ang maong kriminal nakadungog tingali bahin sa “Gingharian sa langit” nga gisangyaw ni Jesus, pero wala siya mahimong tinun-an. Ug wala gyod moingon si Jesus nga ang maong tawo makasulod sa Gingharian. (Mat. 4:17) Ang gitumong ni Jesus mao ang umaabot nga Paraiso sa yuta. Nganong makaingon ta ana?

 2. Unsay nagpakita nga ang mahinulsolon nga kriminal usa ka Hudiyo?

² Dakog posibilidad nga ang mahinulsolong kriminal usa ka Hudiyo. Siya miingon sa kauban niyang kriminal: “Wala ba gyod ka mahadlok sa Diyos, karon nga nag-antos ka sa samang silot nga iyang nadawat?” (Luc. 23:40) Ang mga Hudiyo nagsimbag usa ka Diyos, pero ang mga tawo sa kanasoran nagtuo sa daghang diyos. (Ex. 20:2, 3; 1 Cor. 8:5, 6) Kon ang maong mga kriminal dili mga Hudiyo, ang gipangutana unta maoy, “Wala ba gyod ka mahadlok sa mga diyos?” Dugang pa, si Jesus gipadala dili ngadto sa mga tawo sa kanasoran, kondili sa “nawalang mga karnero sa nasod sa Israel.” (Mat. 15:24) Gipadayag sa Diyos ngadto sa mga Israelinhon nga iyang banhawon ang mga patay. Lagmit nahibalo niini ang mahinulsolon nga kriminal, ug ang iyang giingon nagpakita nga nagtuo siya nga banhawon ni Jehova si Jesus aron magmando sa Gingharian sa Diyos. Lagmit ang maong tawo naglaom nga banhawon sab siya sa Diyos.

 3. Unsay posibleng nahunahunaan sa mahinulsolong kriminal dihang naghisgot ug Paraiso si Jesus? Ipatin-aw. (Genesis 2:15)

³ Kay Hudiyo, ang mahinulsolon nga kriminal seguradong nahibalo bahin kang Adan ug Eva ug sa Paraiso nga gihimo ni Jehova para nila. Busa sa dihang naghisgot si Jesus ug Paraiso, posibleng ang nahunahunaan sa kriminal maoy nindot nga tanaman dinhi sa yuta.—Basaha ang Genesis 2:15.

 4. Ang giingon ni Jesus sa kriminal angayng magpalihok nato sa paghunahuna sa unsa?

⁴ Ang giingon ni Jesus sa kriminal angayng magpalihok nato sa paghunahuna kon unsa unyay kinabuhi sa Paraiso. Bahin niini, makakuha tag ideya sa malinawong pagmando ni Haring Solomon. Ug makadahom ta nga si Jesus, nga mas labaw kang Solomon, ug ang iyang kaubang mga magmamando magtinabangay aron himoong Paraiso ang yuta. (Mat. 12:42) Siyempre, ang “ubang mga karnero” angayng mahibalo kon unsay kinahanglan nilang himoon aron makapuyo sa Paraiso sa walay kataposan.​—Juan 10:16.

 5. Unsay imong ma-imagine nga kinabuhi sa Paraiso?

⁵ Unsay imong ma-imagine nga kinabuhi sa Paraiso? Tingali makahunahuna kag nindot nga parke nga sama sa tanaman sa Eden. (Gen. 2:7-9) Tingali mahinumdom ka sa tagna ni Miqueas nga ang katawhan sa Diyos manglingkod, “ang tagsatagsa ilalom sa iyang punoan sa ubas ug sa iyang kahoyng igos.” (Miq. 4:3, 4) Tingali mahunahunaan sab nimo ang giingon sa Bibliya nga naa unyay daghang pagkaon. (Sal. 72:16; Isa. 65:21, 22) Busa ma-imagine nimo nga naglingkod ka sa nindot nga garden nga may lamesa nga punog lamiang pagkaon. Humot ang palibot tungod sa mga tanom ug bulak. Ug tingali ang imong pamilya ug mga higala, apil ang mga binanhaw, malipayong nag-estoryahay. Kining tanan dili kay damgo lang. Segurado ta nga mahitabo ni sa yuta. Pero naa sab tay makapalipayng buluhaton sa Paraiso.

 6. Unsay himoon nato didto sa Paraiso? (Tan-awa ang hulagway.)

⁶ Katuyoan ni Jehova nga malipay ta sa atong buluhaton. (Eccl. 2:24) Daghan unya tag himoon panahon sa Usa ka Libo ka Tuig nga Pagmando sa Kristo. Kadtong makalabang sa dakong kasakitan ug ang minilyon nga banhawon magkinahanglag sinina, pagkaon, ug kapuy-an. Dako unya nga trabaho ang pagtagana niana nga panginahanglan, pero makapalipay nâ. Sama nga si Adan ug Eva gisugo nga tikaron ug atimanon ang yuta nga ilang gipuy-an, naa pod unya tay makapalipayng buluhaton nga himoong Paraiso ang yuta. Imadyina kon unsa ka makapalipay ang pagtudlo sa minilyong mabanhaw nga wala kaayoy nahibaloan bahin kang Jehova ug sa iyang katuyoan ug niadtong matinumanong mga alagad sa Diyos nga nabuhi una pa kang Jesus dinhi sa yuta.

 7. Sa unsa ta makasalig, ug ngano?

⁷ Makasalig ta nga sa Paraiso, malinawon ug hapsay na ang kahimtang ug mabatonan na nato ang tanan natong panginahanglan. Ngano? Kay gihatagan na ta ni Jehova ug ideya kon unsa unyay kinabuhi kon ang iyang Anak na ang magmando. Makita nato nâ sa pagmando ni Haring Solomon.

 8. Sa unsang paagi ang Salmo 37:10, 11, 29 natuman human kini isulat ni Haring David? (Tan-awa ang “Mga Pangutana Gikan sa mga Magbabasa” niini nga magasin.)

⁸ Si Haring David gigiyahan sa pagsulat kon unsa unyay kinabuhi kon magmando na ang usa ka maalamon ug matinumanong hari. (Basaha ang Salmo 37:10, 11, 29.) Pirme natong gamiton ang Salmo 37:11 dihang magsangyaw bahin sa umaabot nga Paraiso. Sakto nâ kay gigamit nâ ni Jesus sa iyang Wali sa Bukid, nga nagpakita nga duna ni katumanan sa umaabot. (Mat. 5:5) Pero ang giingon ni David nagpakita pod kon unsay kinabuhi dihang nagmando si Haring Solomon. Panahon sa pagmando ni Solomon sa Israel, ang katawhan sa Diyos nagtagamtam ug kalinaw ug kadagaya sa yuta nga “abunda sa gatas ug dugos.” Ang Diyos miingon: “Kon padayon ninyong sundon ang akong mga lagda . . . , akong ipahinabo ang kalinaw sa yuta, ug manghigda mo nga walay gikahadlokan.” (Lev. 20:24; 26:3, 6) Kini nga mga saad natuman panahon sa pagmando ni Solomon. (1 Cron. 22:9; 29:26-28) Nagsaad sab si Jehova nga ang mga daotan “mawala na.” (Sal. 37:10) Busa ang Salmo 37:10, 11, 29 natuman kaniadto, ug matuman pod ni sa umaabot.

 9. Unsay giingon sa rayna sa Sheba bahin sa pagmando ni Haring Solomon?

⁹ Ang rayna sa Sheba nakabalita bahin sa kalinaw ug kadagaya sa nasod sa Israel ubos sa pagmando ni Solomon. Bisag layo, miadto siya sa Jerusalem aron makita kon unsa ni ka tinuod. (1 Hari 10:1) Human makita ang gingharian ni Solomon, siya miingon: “Wala ra sa katunga ang gisulti kanako. . . . Malipayon ang imong mga tawo, ug malipayon ang imong mga alagad nga kanunay nimong kauban, nga nagapamati sa imong kaalam!” (1 Hari 10:6-8) Ang kahimtang ubos sa pagmando ni Solomon naghatag natog ideya kon unsay himoon ni Jehova para sa katawhan ubos sa pagmando sa Iyang Anak, si Jesus.

10. Nganong si Jesus labaw kaayo kang Solomon?

¹⁰ Si Jesus labaw kaayo kang Solomon. Si Solomon dili hingpit ug nakahimog grabeng mga sayop nga nakahatag ug kalisdanan sa katawhan sa Diyos. Pero si Jesus hingpit nga Magmamando ug dili masayop. (Luc. 1:32; Heb. 4:14, 15) Siya nagpabiling matinumanon sa Diyos bisan pa sa lisod kaayong mga pagsulay kaniya ni Satanas. Gipamatud-an sa Kristo nga dili gyod siya mohimog sala o bisan unsa nga makadaot sa iyang maunongong mga sakop. Dako gyod nga pribilehiyo nga siya ang atong Hari.

11. Kinsay motabang kang Jesus sa pagmando?

¹¹ Makauban ni Jesus sa pagmando ang 144,000 sa pag-atiman sa katawhan ug pagtuman sa katuyoan ni Jehova para sa yuta. (Pin. 14:1-3) Nakasinati silag daghang pagsulay ug pag-antos sa dinhi pa sila sa yuta, maong makasabot sila sa nasinatian sa mga tawo. Unsa unyay espesipikong himoon sa kaubang mga magmamando ni Jesus?

12. Unsa nga buluhaton ang ihatag ni Jehova sa 144,000?

¹² Si Jesus ug ang iyang kaubang mga magmamando mas daghag buluhaton kay kang Solomon. Minilyong tawo sa usa lang ka nasod ang giatiman ni Solomon, pero bilyonbilyong tawo sa tibuok kalibotan ang atimanon sa mga magmamando sa Gingharian sa Diyos. Pagkadakong pribilehiyo ang gihatag ni Jehova sa 144,000!

13. Unsay espesyal nga responsibilidad sa kaubang mga magmamando ni Jesus?

¹³ Sama kang Jesus, ang 144,000 mag-alagad ingong mga hari ug saserdote. (Pin. 5:10) Ubos sa Moisesnong Balaod, ang mga saserdote ang may pangunang responsibilidad nga tabangan ang katawhan nga magpabiling himsog sa pisikal ug espirituwal. Ang Balaod maoy ‘anino sa maayong mga butang nga moabot,’ busa makaingon ta nga ang kaubang mga magmamando ni Jesus dunay espesyal nga responsibilidad sa pag-atiman sa pisikal ug espirituwal nga panginahanglan sa katawhan sa Diyos. (Heb. 10:1) Wala ta mahibalo kon sa unsang paagi ang maong mga hari ug saserdote maghatag ug instruksiyon ug giya sa mga sakop sa Gingharian dinhi sa yuta. Bisag unsa may kahikayan ni Jehova sa Paraiso, makasalig ta nga kadtong magpuyo sa yuta makadawat sa giya nga ilang gikinahanglan.​—Pin. 21:3, 4.

14. Sa unsang paagi nagkahiusa ang “ubang mga karnero” ug ang mga igsoon sa Kristo?

¹⁴ Gitawag ni Jesus kadtong magmando uban niya ingong “gamayng panon.” (Luc. 12:32) Naghisgot sab siyag laing grupo nga iyang gitawag ug “ubang mga karnero.” Kining duha ka grupo nagkahiusa ingong usa ka panon. (Juan 10:16) Karon pa lang, nagtinabangay na kining duha ka grupo, ug magpadayon nâ sa Paraiso. Siyempre anang panahona, ang “gamayng panon” tua na sa langit, ug ang “ubang mga karnero” naay paglaom nga mabuhi hangtod sa hangtod sa yuta. Pero naay angayng himoon ang “ubang mga karnero” aron makapuyo sa Paraiso.

15. (a) Sa unsang paagi ang “ubang mga karnero” nagtabang sa mga igsoon sa Kristo? (b) Unsaon nato pagsundog ang brader diha sa botika? (Tan-awa ang hulagway.)

¹⁵ Ang mahinulsolong kriminal namatay nga wala makapakitag bug-os nga apresasyon sa Kristo. Pero kita nga bahin sa “ubang mga karnero” daghag kahigayonan karon nga mapakita kon unsa gyoy pagbati nato kang Jesus. Pananglitan, mapakita nato ang atong gugma kaniya pinaagi sa pagsuportar sa iyang dinihogang mga igsoon. Miingon si Jesus nga mao nay basehanan sa iyang paghukom kon kinsay mga karnero. (Mat. 25:31-40) Masuportahan nato ang mga igsoon sa Kristo pinaagi sa madasigong pagtabang nila sa buluhatong pagsangyaw ug paghimog tinun-an. (Mat. 28:18-20) Busa gusto natong pahimuslan ang mga publikasyon para sa pagtuon sa Bibliya, sama sa librong Mabuhi Ka Hangtod sa Hangtod! Kon wala pa kay gidumalahag pagtuon sa Bibliya, puwede nimong himoong tumong nga magtanyag ug pagtuon sa Bibliya sa mga tawo kutob sa mahimo.

16. Unsay atong himoon aron mahimo tang andam sa pagkinabuhi ingong sakop sa Gingharian sa Diyos?

¹⁶ Dili ta kinahanglang maghulat ug Paraiso una ta maningkamot nga mahimong matang sa tawo nga gusto ni Jehova nga papuy-on didto. Karon pa lang, maningkamot na ta nga magmatinud-anon sa atong sinultihan ug binuhatan ug magmabalanse sa atong pagkinabuhi. Ug magmaunongon ta kang Jehova, sa atong kapikas, ug sa mga igsoon. Kon maningkamot ta nga mosunod sa mga sukdanan sa Diyos samtang nagkinabuhi niining daotang kalibotan, mas sayon unya ang atong pagsunod niana sa Paraiso. Maayo pod nga mag-ugmad tag mga skill ug kinaiya nga nagpakita nga nangandam na ta sa pagpuyo didto. Tan-awa ang artikulong “Andam na ba Ka nga ‘Mapanunod ang Yuta’?” nga mabasa niini nga magasin.

17. Angay ba tang maguol pag-ayo sa atong mga sala kaniadto? Ipatin-aw.

¹⁷ Maningkamot sab ta nga dili na makonsensiya sa seryosong mga sala nga nahimo nato kaniadto. Siyempre, dili gyod nato himoong pasangil ang halad lukat aron “tinuyo tang magpakasala.” (Heb. 10:26-31) Pero makasalig ta nga kon tinuod tang naghinulsol, nangayog tabang kang Jehova ug sa mga ansiyano, ug nagbag-o, bug-os na ta niyang napasaylo. (Isa. 55:7; Buh. 3:19) Hinumdomi ang giingon ni Jesus sa mga Pariseo: “Mianhi ko sa pagdapit, dili sa mga tawong matarong, kondili sa mga makasasala.” (Mat. 9:13) Ang halad lukat makahimo gyod sa pagtabon sa tanan natong sala.

18. Unsay gusto nimong estoryahan ninyo sa kriminal nga namatay tapad ni Jesus?

¹⁸ Imadyina nga tua na ka sa Paraiso, ug nakig-estorya ka sa kriminal nga nakigsulti kang Jesus. Seguradong mag-estoryahanay mo sa inyong apresasyon sa halad ni Jesus. Tingali pangutan-on nimo siya kon unsa pay nahitabo sa kataposang mga oras ni Jesus sa yuta ug kon unsay iyang gibati dihang gitubag ni Jesus ang iyang hangyo. Tingali pangutan-on pod ka niya kon unsay kinabuhi panahon sa kataposang mga adlaw sa sistema ni Satanas. Makapalipay gyod nga tudloan ang mga tawo sama niya bahin sa Pulong sa Diyos!​—Efe. 4:22-24.

19. Nganong dili laay ang kinabuhi sa Paraiso? (Tan-awa ang hulagway sa atubangan sa magasin.)

¹⁹ Dili gyod laay ang kinabuhi sa Paraiso. Mailaila nato ang klaseklaseng mga tawo ug daghan tag makapalipayng buluhaton didto. Ang nakanindot pa gyod kay kada adlaw, mas mailhan nato ang atong langitnong Amahan ug ma-enjoy ta sa tanan niyang tagana. Di gyod ta mahutdag makat-onan bahin niya, ug daghan tag makat-onan bahin sa iyang kalalangan. Samtang magkadugay, magkalawom pod ang atong gugma sa Diyos. Mapasalamaton kaayo ta kang Jehova ug kang Jesus kay gisaaran ta nilag kinabuhing walay kataposan sa Paraiso!