LABAHA

Usa ka hait nga instrumento nga gamiton sa pagkiskis sa buhok o sa balhibo. Ang duha ka Hebreohanong mga pulong alang sa labaha naggikan sa lintunganayng pulong nga nagkahulogang “modangas” o modayag. (Isa 3:17) Ang pipila niini nga instrumento nga nakaplagan didto sa Ehipto maoy ginama sa bronse. Kini nga mga kaplag kaharmonya sa rekord sa Bibliya nga ang mga labaha gigamit didto sukad sa una pa kaayong kapanahonan.​—Gen 41:14.

Bisan tuod nga ang mga lalaki sa Israel may mga bungot ug may kasarangang gitas-on sa buhok, ang labaha dayag nga gigamit sa pagputol; gihisgotan usab ang “pag-alot” (KJ) o ‘pagpamubo’ (NW) sa buhok, diha sa Buhat 18:18. (Tan-awa usab ang 2Sa 19:24; Eze 44:20.) Ang mga Levihanon nagkiskis sa tibuok nilang lawas pinaagig labaha may kalabotan sa ilang pagpahiluna-sa-katungdanan sa pag-alagad diha sa tolda nga tagboanan didto sa kamingawan. (Num 8:7) Ang usa ka tawo nga ubos sa panaad sa pagka-Nazareo dili pagamiton ug labaha nganha sa iyang ulo hangtod nga matapos ang yugto sa iyang panaad. (Num 6:​5, 18; Huk 13:5; 16:17; Buh 21:​23, 24) Si Samuel, nga usa ka Levihanon, gideboto sa iyang inahan sa wala pa siya ipanganak aron sa pag-alagad sa tolda nga tagboanan. Dili gayod gamitan ug labaha ang buhok sa iyang ulo.​—1Sa 1:11.

Si Jehova nagpasidaan sa Juda nga ang mga Asiryanhon gamiton ingong usa ka “labaha” ni Jehova sa ‘pagkiskis sa ulo ug sa balhibo sa mga tiil’ ug sa ‘pag-ut-ot bisan sa mga bungot,’ nga dayag nga naglarawan sa kalaglagan sa kinadak-ang bahin sa yuta sa Juda ug sa pagdala sa binihag nga katawhan.​—Isa 7:20.

Ang mga espada mahimong himoon nga sama ka hait sa labaha ug kini gipakita diha sa sugo sa Diyos ngadto kang Ezequiel sa paggamit sa espada ingong labaha sa mag-aalot aron sa pagputol sa iyang buhok ug bungot, ug dayon sa pagtagodtagod sa ikatulong bahin sa buhok pinaagi sa espada, nga naglarawan sa kalaglagan pinaagig espada nga modangat sa usa ka bahin sa mga molupyo sa Jerusalem. (Eze 5:​1, 2, 12) Kini usab nagpakita nga ang pag-alot maoy trabaho na sa unang panahon.

Tungod sa samad nga ikapahinabo sa dila nga gigamit sa malimbongong paagi, kini gipakasama sa usa ka labaha.​—Sal 52:2.