Ayaw Pagpadaog sa Kabalaka
“AYAW gayod kabalaka bahin sa sunod nga adlaw, kay ang sunod nga adlaw adunay iyang kaugalingong mga kabalaka. Igo na sa matag adlaw ang kaugalingong pagkadaotan niini.” (Mateo 6:34) Ang maong tambag nga gihatag ni Jesu-Kristo tino nga praktikal alang kanatong tanan nga nagkinabuhi karon sa tulin-ug-lakat ug makapahigwaos nga katilingban.
Apan, sa realistikanhong paagi, posible kaha nga kita dili mabalaka mahitungod sa atong mga suliran, mga desisyon, mga obligasyon, ug mga responsabilidad? Minilyon ka tawo ang masulub-on, nalisdan, ug nabug-atan. Mao kana kon nganong ang mga tranquilizer ug mga pangpakalma maoy multimilyon-dolyar nga negosyo.
Kon Diin Ibutang ang Utlanan
Kita kinahanglang magplano ug mangandam alang sa atong mga obligasyon, mga asaynment, mga desisyon, ug mga suliran—dinalian man kini o dili. Ang Bibliya nagdasig kanato nga “molingkod ug kuwentahon ang gasto” una pa mosugod sa bisan unsang buluhaton. (Lucas 14:28-30) Naglakip kini sa pagtimbangtimbang sa mabatonan nga mga kapilian, pag-analisar sa posibleng mga epekto sa resulta, ug pagbanabana sa bili kon bahin sa panahon, kusog, ug salapi.
Bisan tuod ang usa angay nga maampingong maghatag ug pagtagad sa lagmit nga mahitabo, dili posible o makapadasig ang pagtinguha sa paghunahuna sa tanang posibleng mahitabo. Pananglitan, alang sa intereses sa kahilwas sa pamilya, tingali maghunahuna ka kon unsay himoon kon ugaling may sunog sa imong puy-anan. Ikaw tingali mopalit ug magbutang ug mga smoke detector ug mga igpapalong ug kalayo. Tingali ikaw magplano ug mag-ensayo ug mga ruta sa pag-ikyas gikan sa lainlaing mga bahin sa balay. Apan unsay kalainan tali sa makataronganon, praktikal nga pagplano ug sa nanghinobra, wala-kinahanglana nga kabalaka? Ang maong kabalaka magsugod sa dihang mosugod ka pagkaguol mahitungod sa daghan kaayong hinanduraw nga mga kahimtang, nga daghan niini mahimong bunga sa usa ka malamboong handurawan. Mabug-atan ka sa makapatugaw nga mga panghunahuna, nga nagkombinsir kanimo nga tingali aduna kay nalimtan o nga kulang ang imong nahimo sa pagpanalipod sa imong pamilya. Kining gipahinabo-sa-kaugalingon nga kaguol makapabug-at kaayo sa imong hunahuna nga tingali dili ka makatulog tungod niini.
Si Moises sa Atubangan ni Paraon
Gihatagan ni Jehova nga Diyos ang iyang propeta nga si Moises ug usa ka malisod nga asaynment. Una, si Moises kinahanglang moatubang sa mga Israelinhon ug magkombinsir kanila nga si Jehova nagtudlo kaniya sa pagpanguna kanila sa paggula sa Ehipto. Sunod, si Moises kinahanglang moatubang kang Paraon ug mohangyo nga iyang buhian ang mga Israelinhon. Sa kataposan, kinahanglang pangunahan ni Moises ang panon sa katawhan nga minilyon ang gidaghanon latas sa kamingawan ngadto sa usa ka yuta nga gipuy-an sa maisog nga mga tawo. (Exodo 3:1-10) Kining tanan mahimong makapahadlok kaayo, apan gitugotan ba ni Moises kini nga responsabilidad sa pagpuno sa iyang hunahuna sa hilabihang kabalaka?
Dayag, si Moises nabalaka mahitungod sa ubay-ubay nga isyu. Iyang gipangutana si Jehova: “Pananglit kon ako karon moadto sa mga anak ni Israel ug ako magaingon kanila, ‘Ang Diyos sa inyong mga amahan nagpadala kanako nganhi kaninyo,’ ug sila magaingon kanako, ‘Unsa ang iyang ngalan?’ Unsay akong igasulti kanila?” Si Jehova naghatag kaniya sa tubag. (Exodo 3:13, 14) Nabalaka usab si Moises mahitungod sa lagmit mahitabo kon si Paraon dili motuo kaniya. Gitubag pag-usab ni Jehova ang propeta. Usa ka kataposang problema—gidawat ni Moises nga siya “dili usa ka larinong mamumulong.” Sa unsang paagi kini masulbad? Gitagana ni Jehova si Aaron nga maoy mosulti alang kang Moises.—Exodo 4:1-5, 10-16.
Kay andam sa mga tubag sa iyang mga pangutana ug nagbaton ug pagtuo sa Diyos, gihimo ni Moises ang gisugo ni Jehova. Imbes sakiton ang kaugalingon sa makalilisang nga mga hunahuna sa lagmit nga mahitabo sa dihang moatubang siya kang Paraon, si Moises ‘nagbuhat sa ingon gayod.’ (Exodo 7:6) Kon nagpadaog siya sa mga kabalaka, kini makapaluya gayod sa pagtuo ug kaisog nga gikinahanglan sa pagtuman sa iyang asaynment.
Ang timbang nga paagi ni Moises sa pag-atubang sa iyang asaynment maoy usa ka panig-ingnan sa gitawag ni apostol Pablo nga “pagkamabuot sa hunahuna.” (2 Timoteo 1:7; Tito 2:2-6) Kon si Moises wala magpasundayag ug pagkamabuot sa hunahuna, mahimong dali ra siyang mabug-atan sa kadako kaayo sa iyang asaynment nga lagmit dili niya dawaton kini.
Pagkontrolar sa Imong mga Hunahuna
Unsay imong reaksiyon sa dihang sa imong adlaw-adlawng kinabuhi moatubang kag mga pagsulay sa imong pagtuo? Mokiling ka ba sa pagkatarantar nga naghunahuna lamang sa mga kababagan ug mga problema nga naghulat sa unahan? O imo ba kining gilantaw sa usa ka timbang nga paagi? Sama sa gisulti sa uban, ‘Ayawg tabok sa tulay sa dili ka pa makaabot niini.’ Mahimong wala diay kinahanglana ang pagtabok sa maong gihanduraw nga tulay! Busa nganong mag-antos sa kasakit tungod sa usa ka butang nga mahimong dili gayod mahitabo? Ang Bibliya nag-ingon: “Ang kabalaka diha sa kasingkasing sa usa ka tawo maoy makapatikuko kaniya.” (Proverbio 12:25) Ang sagad nga resulta mao nga ang usa maglangaylangay sa paghimog desisyon, nga ioktaba ang mga butang hangtod ulahi na kaayo ang tanan.
Labaw pa ka seryoso mao ang espirituwal nga kadaot nga ipahinabo sa hilabihang kabalaka. Gipakita ni Jesu-Kristo nga ang pagpabili “sa pulong sa gingharian” bug-os nga matuok sa malimbongong gahom sa bahandi ug ‘sa kabalaka niining sistemaha sa mga butang.’ (Mateo 13:19, 22) Ingon nga ang mga tunok makapugong sa mga luyong nga mogulang ug mamunga, busa ang dili-makontrolar nga kabalaka makapugong kanato sa paghimog espirituwal nga pag-uswag ug pagpamunga alang sa kadayganan sa Diyos. Ang gipahinabo-sa-kaugalingon, makadaot nga kaguol nagpugong pa gani sa pipila nga ipahinungod ang ilang kaugalingon ngadto kang Jehova. Sila nabalaka, ‘Unsa na man kon dili nako matuman ang akong pagpahinungod?’
Si apostol Pablo nagsulti kanato nga sa atong espirituwal nga pakiggubat, kita nanglimbasog sa pagdala sa “tanang hunahuna ngadto sa pagkabihag aron himoon kining masinugtanon sa Kristo.” (2 Corinto 10:5) Ang atong pangunang kaaway, si Satanas nga Yawa, mahimuot kaayo sa pagpahimulos sa atong mga kabalaka aron wad-on ang atong kadasig ug aron paluyahon kita sa pisikal, emosyonal, ug espirituwal nga paagi. Eksperto siya sa paggamit sa mga pagduhaduha aron sa paglit-ag sa dili-mabinantayon. Mao kanay hinungdan kon nganong nagpasidaan usab si Pablo sa mga Kristohanon nga dili “maghatag ug luna alang sa Yawa.” (Efeso 4:27) Ingong “diyos niini nga sistema sa mga butang,” si Satanas malamposong “nagbuta sa mga hunahuna sa mga dili-magtutuo.” (2 Corinto 4:4) Hinaot nga dili gayod nato siya tugotan sa pagkontrolar sa atong mga hunahuna!
Mabatonan ang Tabang
Sa dihang nag-atubang ug mga suliran ang usa ka bata makaduol sa usa ka mahigugmaong amahan ug makadawat ug direksiyon ug paghupay. Sa susama, kita makaduol sa atong langitnong Amahan, si Jehova, uban sa atong mga suliran. Sa pagkatinuod, si Jehova nagdapit kanato sa pagtugyan sa atong mga palas-anon ug mga kabalaka ngadto kaniya. (Salmo 55:22) Sama sa usa ka bata nga wala na mabalaka mahitungod sa iyang mga suliran human nga iyang madawat ang mga pasalig gikan sa iyang amahan, kita dili lamang angay nga magtugyan sa atong mga palas-anon ngadto kang Jehova kondili ibilin kini kaniya.—Santiago 1:6.
Sa unsang paagi nato itugyan ang atong mga kabalaka ngadto kang Jehova? Ang Filipos 4:6, 7 nagtubag: “Ayaw pagkabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya ngadto sa Diyos; ug ang kalinaw sa Diyos nga nagalabaw sa tanang panghunahuna magabantay sa inyong mga kasingkasing ug sa inyong mga gahom sa pangisip pinaagi kang Kristo Jesus.” Oo, ingong sanong sa atong mapinadayonon nga mga pag-ampo ug mga pangamuyo, si Jehova makahatag kanato ug kalinaw sa kahiladman nga manalipod sa atong mga hunahuna nga dili matugaw sa wala-kinahanglana nga mga kabalaka.—Jeremias 17:7, 8; Mateo 6:25-34.
Apan, sa paglihok nga kaharmonya sa atong mga pag-ampo, kita dili angay nga magpalain sa atong kaugalingon sa pisikal man o sa mental nga paagi. (Proverbio 18:1) Hinunoa, kita gidasig sa paghatag ug pagtagad sa mga prinsipyo ug mga direksiyon sa Bibliya nga may kalabotan sa atong suliran, sa ingon naglikay sa pagsalig diha sa atong kaugalingong pagsabot. (Proverbio 3:5, 6) Ang mga batan-on ug tigulang makasusi sa Bibliya ug sa mga publikasyon sa Watch Tower alang sa dagayang impormasyon mahitungod sa paghimog mga desisyon ug pag-atubang sa mga suliran. Dugang pa, diha sa Kristohanong kongregasyon, gipanalanginan kita ug eksperyensiyadong mga ansiyano ug ubang hamtong nga mga Kristohanon nga kanunayng andam nga makigsulti kanato. (Proverbio 11:14; 15:22) Kadtong wala malangkit sa atong mga problema sa emosyonal nga paagi ug nagbaton sa hunahuna sa Diyos bahin sa usa ka butang sagad nga makatabang kanato nga tan-awon ang atong mga suliran gikan sa lahi nga panglantaw. Ug bisan tuod dili sila ang mohimog mga desisyon alang kanato, sila usa ka dakong tinubdan sa pagdasig ug pagpaluyo.
“Maghulat sa Diyos”
Dili ikalimod nga dunay igong kapit-os sa pag-atubang sa atong tinuod nga mga suliran matag adlaw nga dili magdugang niini pinaagi sa pagkabalaka mahitungod sa gihanduraw nga mga suliran. Kon ang kabalaka maylabot sa lagmit nga mahitabo magpabati kanato ug kahingawa ug pagkadili-mahimutang, nan moduol kita kang Jehova pinaagi sa pag-ampo ug pangamuyo. Salig sa iyang Pulong ug organisasyon alang sa direksiyon, kaalam, ug pagkamabuot sa hunahuna. Atong makaplagan nga bisan unsang kahimtang nga motungha, adunay tabang nga mabatonan aron sa pag-atubang niini.
Tungod kay nabug-atan ang kasingkasing ug natugaw, ang salmista miawit: “Ngano nga nasubo ka, Oh kalag ko, ug nganong masamokon ka sa sulod nako? Maghulat sa Diyos, kay magadayeg pa ako kaniya ingon nga akong dakong kaluwasan ug ingon nga akong Diyos.” (Salmo 42:11) Hinaot pa nga ingon niana ang atong mga pagbati.
Oo, pagplano kon unsay makataronganong madahom, ug isalig ang wala-gidahom kang Jehova. ‘Itugyan kaniya ang tanan ninyong mga kabalaka, kay siya aduna may kahangawa kaninyo.’—1 Pedro 5:7.
[Hulagway sa panid 23]
Ikaw ba, sama ni David, nagtugyan sa imong mga palas-anon ug mga kabalaka ngadto kang Jehova?