Magpabiling Suod Kang Jehova

“Paglahutay diha sa pag-ampo.”—ROMA 12:12.

 1. Unsa ang kabubut-on ni Jehova labot sa pag-ampo, ug unsang pagdasig ang gihatag ni apostol Pablo mahitungod sa pag-ampo?

SI Jehova mao “ang Diyos nga nagahatag ug paglaom” sa tanan niyang matinumanong katawhan. Ingong “Tigpatalinghog sa pag-ampo,” siya mamati sa ilang mga pagpangayog tabang aron makab-ot ang malipayong paglaom nga iyang gibutang sa ilang atubangan. (Roma 15:13; Salmo 65:2) Ug pinaagi sa iyang Pulong, ang Bibliya, iyang gidasig ang tanan niyang mga alagad sa pagduol kaniya sa bisan unsang panahon nga gusto nila. Siya kanunay nga anaa, matinguhaong modawat sa ilang pangsulod nga mga kabalaka. Sa pagkatinuod, iyang gidasig sila sa “paglahutay diha sa pag-ampo” ug sa “pag-ampo kanunay.”a (Roma 12:12; 1 Tesalonica 5:17) Maoy kabubut-on ni Jehova nga ang tanang mga Kristohanon kanunay nga mosangpit kaniya diha sa pag-ampo, sa pagbubo sa ilang mga kasingkasing ngadto kaniya ug buhaton kini pinaagi sa ngalan sa iyang hinigugmang Anak, si Jesu-Kristo.​—Juan 14:6, 13, 14.

 2, 3. (a) Nganong gitambagan kita sa Diyos sa “paglahutay sa pag-ampo”? (b) Unsang pasalig ang atong nabatonan nga buot ang Diyos nga kita mag-ampo?

² Nganong gitambagan kita sa Diyos niini? Tungod kay ang mga kalisod sa kinabuhi ug mga responsabilidad nagahatag kanatog dakong kabug-at nga makalimot na hinoon kitang mag-ampo. O kaha madaog kita sa mga problema ug mohunong kita sa pagkalipay diha sa paglaom ug moundang sa pag-ampo. Tungod niining mga butanga, gikinahanglan nato ang mga pahinumdom nga modasig kanato sa pag-ampo ug magpabiling suod kaayo sa tuboran sa tabang ug paglipay, si Jehova nga atong Diyos.

³ Ang tinun-ang si Santiago misulat: “Magpaduol kamo sa Diyos, ug siya magpaduol kaninyo.” (Santiago 4:8) Oo, ang Diyos dili sobra ka hataas ni sobra ka halayo sa pagkadungog sa atong mga pagpahayag kaniya, bisan pa sa atong dili-hingpit nga tawhanong kahimtang. (Buhat 17:27) Dugang pa, siya dili kay dili-matinagdanon ug dili-mabalak-on. Nag-ingon ang salmista: “Ang mga mata ni Jehova anaa sa mga matarong, ug ang iyang mga igdulongog anaa sa ilang pagtuaw.”​—Salmo 34:15; 1 Pedro 3:12.

 4. Sa unsang paagi ikailustrar ang pagkamapatalinghogon ni Jehova sa pag-ampo?

⁴ Si Jehova nagaagda sa pag-ampo. Atong ikatandi kini sa usa ka tigom diin ang ubay-ubayng mga tawo nagsultihanay. Atua ka didto, namati sa uban nga nagsulti. Ug ikaw tigpaniid lamang. Apan may miatubang kanimo, gisangpit ang imong ngalan, ug nakigsulti kanimo. Nakakuha kini sa imong pagtagad sa usa ka linain nga paagi. Sa susama, ang Diyos sa tanang panahon mamati sa iyang katawhan, bisan ug hain man sila. (2 Cronicas 16:9; Proverbio 15:3) Busa siya makadungog sa atong mga pulong, mapanalipdanon ug maikagong naniid. Dihang atong sangpiton ang ngalan sa Diyos sa pag-ampo, hinunoa, ang iyang pagtagad makuha, ug siya karon nagasentro kanato sa usa ka tino nga paagi. Pinaagi sa iyang mga gahom, si Jehova makamatikod ug makasabot sa wala-mabungat nga hangyo sa tawo nga gitanyag diha sa natagong mga bahin sa iyang kasingkasing ug hunahuna. Ang Diyos nagapasalig kanato nga siya magpabiling suod sa tanang sinserong nagasangpit sa iyang ngalan ug naningkamot nga magpabiling suod kaniya.​—Salmo 145:18.

Tubag Sumala sa Katuyoan sa Diyos

 5. (a) Unsay gipadayag sa tambag “paglahutay sa pag-ampo” mahitungod sa atong mga pag-ampo? (b) Sa unsang paagi ang Diyos nagatubag ug mga pag-ampo?

⁵ Ang tambag nga paglahutay sa pag-ampo nagapaila nga may mga panahong si Jehova motugot kanato sa pagpadayon sa pag-ampo labot sa usa ka butang sa makadiyut sa dili pa madayag ang iyang tubag. Tingalig mokiling pa kita nga laayan sa pagpangayo sa Diyos ug pabor o mahigugmaong-kalulot nga daw gikinahanglan kaayo apan dugay nga gitagad. Busa, si Jehova nga Diyos nangaliyopo kanato nga dili magpadaog sa bisan unsang kiling apan magpadayon sa pag-ampo. Kita kinahanglang magpadayon sa paghangyo kaniya bahin sa atong mga suliran, masaligon nga iyang tahuron ang atong pag-ampo ug motagana sa atong tinuod nga panginahanglan, dili kay kon unsay atong gipangatarongan. Si Jehova nga Diyos sa walay duhaduha nagatimbang sa atong mga hangyo sumala sa iyang katuyoan. Pananglitan, ang uban tingali maapektohan sa atong hangyo. Mahimong atong ikaamgid kining butanga sa usa ka amahan kansang anak nga lalaki nangayo kaniya ug bisikleta. Ang amahan nahibalo nga kon siya mopalit ug bisikleta alang sa maong anak, ang iyang laing anak gusto usab ug bisikleta. Sanglit ang usa ka anak tingali bata pa kaayong magbaton ug bisikleta, ang amahan tingali modesider sa dili pagpalit ug bisikleta nianang panahona. Sa samang paagi, sumala sa kahayag sa iyang katuyoan ug panempo sa mga butang, ang atong langitnong Amahan nagahukom kon unsa ang labing maayo alang kanato ug sa uban.​—Salmo 84:8, 11; itandi ang Habaccuc 2:3.

 6. Unsang ilustrasyon ang gihatag ni Jesus labot sa pag-ampo, ug unsay gipakita diha sa paglahutay sa pag-ampo?

⁶ Talagdon mao ang ilustrasyon nga gihatag ni Jesus mahitungod sa panginahanglan sa iyang mga disipulo nga “magaampo kanunay ug dili molunga.” Ang usa ka babayeng balo, nga wala makadawat ug hustisya, mibalikbalik sa iyang hangyo sa usa ka tawhanong maghuhukom hangtod sa kataposan nakadawat siya ug hustisya. Si Jesus midugang: “Nan, dili ba hatagan sa Diyos ug hustisya ang iyang mga pinili?” (Lucas 18:1-7) Ang paglahutay sa pag-ampo nagapadayag sa atong pagtuo, sa atong pagsalig kang Jehova, sa atong kaandam nga magpabiling suod kaniya ug sa pagpahayag sa atong mga hangyo, isalig ang sangpotanan diha sa iyang mga kamot.​—Hebreohanon 11:6.

Mga Panig-ingnan sa Nagpabiling Suod Kang Jehova

 7. Sa unsang paagi atong masundog ang pagtuo ni Abel sa pagpabiling suod kang Jehova?

⁷ Daghan ang asoy sa Bibliya bahin sa mga pag-ampo nga gilitok sa mga alagad sa Diyos. Kini “gisulat aron sa pagtudlo kanato, aron nga pinaagi sa atong pailob ug pinaagi sa paglipay gikan sa Kasulatan makabaton kitag paglaom.” (Roma 15:4) Ang atong paglaom mapalig-on pinaagi sa atong pagpalandong sa pila ka panig-ingnan sa mga tawong nagpabiling suod kang Jehova. Si Abel mitanyag ug kahimut-anang halad sa Diyos, ug bisag walay pag-ampo ang gitaho, siya sa walay duhaduha mihangyo diha sa pag-ampo kang Jehova nga ang iyang halad dawaton. Ang Hebreohanon 11:4 nagaingon: “Tungod sa pagtuo si Abel mihalad sa Diyos ug mas maayong halad kay kang Cain, nga tungod sa pagtuo siya gipanghimatud-an nga siya matarong.” Si Abel nahibalo sa saad sa Diyos diha sa Genesis 3:15, apan kon itandi sa atong nahibaloan karon, siya gamay ra kaayong nahibaloan. Bisan pa, si Abel milihok sumala sa kahibalo nga iyang nabatonan. Busa karon, ang pipila niadtong bag-o nga interesado sa kamatuoran sa Diyos wala pa kaayoy kahibalo, apan sila nagaampo ug nagapahimulos sa kahibalo nga ilang nabatonan, sama kang Abel. Oo, sila nagalihok diha sa pagtuo.

 8. Nganong makatino kita nga si Abraham nagpabiling suod kang Jehova, ug unsang mga pangutana ang angay natong ibangon sa atong kaugalingon?

⁸ Laing matinumanong alagad sa Diyos mao si Abraham, “ang amahan sa tanan nga may pagtuo.” (Roma 4:11) Karong adlawa, sukad masukad, kita nagkinahanglag malig-ong pagtuo, ug kinahanglang mag-ampo kita diha sa pagtuo, sama sa gihimo ni Abraham. Ang Genesis 12:8 nagaingon nga siya nagtukod ug usa ka halaran “kang Jehova ug nagsugod sa pagsangpit sa ngalan ni Jehova.” Si Abraham nahibalo sa ngalan sa Diyos ug gigamit kini diha sa pag-ampo. Sa matag karon ug unya siya tim-os nga milabutay sa pag-ampo, gisangpit ang “ngalan ni Jehova nga Diyos nga walay kataposan.” (Genesis 13:4; 21:33) Si Abraham misangpit sa ngalan sa Diyos diha sa pagtuo nga niini siya naila. (Hebreohanon 11:17-19) Ang pag-ampo nakatabang kang Abraham sa pagpadayong mangayaon kaayo sa paglaom sa Gingharian. Kita ba nagasunod sa sulondan ni Abraham sa paglahutay sa pag-ampo?

 9. (a) Nganong ang mga pag-ampo ni David mapuslanon kaayo sa mga katawhan sa Diyos karon? (b) Unsay mosangpot sa atong pag-ampo sama sa gihimo ni David sa pagpabiling suod kang Jehova?

⁹ Si David nanguna bahin sa paglahutay sa pag-ampo, ug ang iyang mga salmo nagpakita kon unsa ang angay nga iunod sa pag-ampo. Pananglitan, ang mga alagad sa Diyos tukmang makaampo alang sa mga butang sama sa kaluwasan o kahilwasan gikan sa kadaot (3:7, 8; 60:5), sa pagtultol (25:4, 5), panalipod (17:8), kapasayloan sa mga sala (25:7, 11, 18), ug maputli nga kasingkasing (51:10). Dihang gisakit si David, siya miampo: “Lipaya ang kalag sa imong alagad.” (86:4) Kita samang makaampo alang sa kalipay sa kasingkasing, sa kasayoran nga maoy tinguha ni Jehova nga kita malipay diha sa atong paglaom. Si David nagpabiling suod kang Jehova ug miampo: “Ang akong kalag suod nga nagasunod kanimo; ang imong tuong kamot nagasapnay kanako.” (63:8) Magpabilin ba kitang suod kang Jehova, sama kang David? Kon mao, iya usab kitang ituboy.

10. Unsa ang sayop nga mga hunahuna ni Asap sa usa ka higayon, apan unsay iyang naamgohan?

¹⁰ Kon kita magpabiling suod kang Jehova, kinahanglang atong likayan ang pagkasina sa daotan tungod sa ilang masayon ug materyalistikong mga kinabuhi. Ang salmistang si Asap sa usa ka higayon mibati nga walay bili ang pag-alagad kang Jehova, kay ang daotan “anaa kanunay sa kasayon sa walay kataposan.” Sa gihapon, iyang nasabot nga ang iyang pangatarongan sayop ug nga ang daotan “anaa sa danlog nga mga dapit.” Siya nakaamgo nga walay butang nga mas maayo kay sa magpabiling suod kang Jehova, ug iyang gipahayag ang iyang kaugalingon ngadto sa Diyos niining paagiha: “Ako nakig-uban kanunay kanimo; gikuptan mo ang akong tuo nga kamot. Kay tan-awa! sila nga nanagpalayo gikan kanimo nangahanaw. . . . Apan alang kanako, ang pagpabiling suod sa Diyos maayo kanako. Gihimo ko nga dalangpanan ang Soberano Ginoong Jehova, isugilon ko ang tanan mong mga buhat.” (Salmo 73:12, 13, 18, 23, 27, 28) Inay masina sa masayon nga mga kinabuhi sa daotan, nga mga tawong walay paglaom, atong sundogon si Asap sa pagpabiling suod kang Jehova.

11. Nganong maayong sulondan si Daniel sa pagpabiling suod kang Jehova, ug sa unsang paagi atong masundog siya?

¹¹ Si Daniel hugot nga milahutay sa pag-ampo, bisan sa atubangan sa kapeligrohan sa pagkabanlod sa langob sa mga leyon tungod sa paglapas sa opisyal nga pagdili labot sa pag-ampo. Apan si Jehova “nagpadala sa iyang manulonda ug gitak-om ang baba sa mga leyon,” nga nagluwas kang Daniel. (Daniel 6:7-10, 22, 27) Si Daniel gipanalanginan ug dako tungod sa iyang paglahutay sa pag-ampo. Kita ba usab nagalahutay sa pag-ampo, ilabina kon magaatubang ug pagsupak sa atong pagwali sa Gingharian?

Si Jesu-Kristo, ang Atong Sulondan

12. (a) Sa sinugdanan sa iyang ministeryo, unsang sulondan ang gihatag ni Jesus labot sa pag-ampo, ug sa unsang paagi kini makahatag kaayohan sa mga Kristohanon? (b) Unsay gipadayag sa sulondang pag-ampo ni Jesus labot sa pag-ampo?

¹² Sukad pa sa sinugdanan sa iyang yutan-ong ministeryo, siya nag-ampo. Ang iyang mainampoon nga tinamdan samtang gibawtismohan naghatag ug maayong panig-ingnan alang niadtong nagapabawtismo sa modernong panahon. (Lucas 3:21, 22) Ang usa makaampo sa tabang sa Diyos aron matuman ang gisimbolohan sa bawtismo sa tubig. Gitabangan usab ni Jesus ang uban sa pagduol kang Jehova diha sa pag-ampo. Diha sa usa ka okasyon dihang si Jesus didto sa usa ka dapit nga nag-ampo, ang usa sa iyang mga tinun-an miingon kaniya tapos niadto: “Ginoo, tudloi kami sa pag-ampo.” Unya gisaysay ni Jesus kanang komung nailhan nga mao ang sulondang pag-ampo, nga niana ang pagkasunodsunod sa mga ulohan nagpakita sa ngalan ug katuyoan sa Diyos nga maoy hatagan ug unang importansiya. (Lucas 11:1-4) Busa, diha sa atong mga pag-ampo kinahanglan nga kita may paglantaw ug pagkatimbang, dili kalimtan ang “labi pang hinungdanong mga butang.” (Filipos 1:9, 10) Siyempre, may mga panahong motungha ang linaing panginahanglan o linaing mga suliran nga kinahanglang matagad. Sama kang Jesus, ang mga Kristohanon makadangop sa Diyos diha sa pag-ampo sa pagpangayog kusog nga makabuhat sa pipila ka tinudlong-buluhaton o aron makaantos sa partikular nga mga pagsulay o mga kapeligrohan. (Mateo 26:36-44) Sa pagkamatuod, ang personal nga mga pag-ampo mahimong nagaapil halos sa tanang bahin sa kinabuhi.

13. Sa unsang paagi gipakita ni Jesus ang pagkahinungdanon sa pag-ampo alang sa uban?

¹³ Pinaagi sa iyang maayong panig-ingnan, si Jesus nagpakita sa pagkahinungdanon sa pag-ampo alang sa uban. Siya nahibalo nga ang iyang mga disipulo pagadumtan ug pagalutoson, sama kaniya. (Juan 15:18-20; 1 Pedro 5:9) Busa, siya nangaliyopo sa Diyos nga “ilikay sila gikan sa usa nga daotan.” (Juan 17:9, 11, 15, 20) Ug nahibalo sa linain nga pagsulay nga anaa sa unahan ni Pedro, iyang gisultihan siya: “Nangamuyo ako alang kanimo nga unta dili makabsan ang imong pagtuo.” (Lucas 22:32) Pagkamapuslanon kon kita usab molahutay sa pag-ampo alang sa atong mga igsoon, hunahunaon ang uban ug dili lamang ang atong mga problema ug mga kaayohan!​—Filipos 2:4; Colosas 1:9, 10.

14. Sa unsang paagi nahibalo kita nga si Jesus nagpabiling suod kaayo kang Jehova sa iyang tibuok yutan-ong ministeryo, ug sa unsang paagi kita makasundog kaniya?

¹⁴ Sa tibuok niyang ministeryo, si Jesus milahutay sa pag-ampo, nagpabiling suod kaayo kang Jehova. (Hebreohanon 5:7-10) Si apostol Pedro, diha sa Buhat 2:25-28, mikutlo sa Salmo 16:8 ug gipadapat kini kang Ginoong Jesu-Kristo. “Si David nag-ingon mahitungod kaniya, ‘si Jehova gibutang ko kanunay sa atubangan ko; tungod kay ania siya sa akong tuong kamot, ako dili matarog.” Kita samang makahimo niana. Kita makaampo sa Diyos nga masuod kanato, ug atong ikapasundayag ang atong pagsalig kang Jehova pinaagi sa pagbutang kanunay kaniya diha sa atong hunahuna. (Itandi ang Salmo 110:5; Isaias 41:10, 13.) Unya atong malikayan ang tanang matang sa mga kasamok, kay si Jehova molig-on kanato, ug kita dili gayod matarog.

15. (a) May kalabotan sa unsa nga dili gayod kita angay mapakyas sa paglahutay sa pag-ampo? (b) Unsang pasidaan ang gihatag mahitungod sa atong pagkamapasalamaton?

¹⁵ Hinaot nga dili gayod kita mapakyas sa pagpahayag ug pasalamat kang Jehova tungod sa iyang kaayo kanato, oo, “sa hilabihang ka dako sa dili-takos nga kalulot sa Diyos,” nga nagaapil sa gasa sa iyang Anak ingong usa ka halad lukat sa atong mga sala. (2 Corinto 9:14, 15; Marcos 10:45; Juan 3:16; Roma 8:32; 1 Juan 4:9, 10) Sa pagkatinuod, sa ngalan ni Jesus, “kanunay nga magpasalamat kamo sa Diyos nga atong Amahan alang sa tanang mga butang.” (Efeso 5:19, 20; Colosas 4:2; 1 Tesalonica 5:18) Mag-amping gayod kita sa dili pagtugot nga ang atong pagkamapasalamaton sa atong nabatonan madaot tungod kay okupado kaayo kita sa mga butang nga wala nato mabatoni o sa atong personal nga mga problema.

Pagtugyan sa Atong mga Palas-anan Kang Jehova

16. Kon nabalaka kita sa pila ka palas-anon, unsa ang atong buhaton?

¹⁶ Ang paglahutay sa pag-ampo nagapakita sa kalalom sa atong debosyon. Dihang sangpiton nato ang Diyos, ang epekto diha kanato maayo bisan wala pay moabot nga tubag gikan kaniya. Kon nahasol ang atong hunahuna tungod sa pila ka suliran, kita makapabiling suod kang Jehova pinaagi sa pagsunod sa tambag: “Itugyan mo kang Jehova ang imong palas-anon, ug siya molig-on kanimo.” (Salmo 55:22) Pinaagi sa pagtugyan sa atong tanang mga palas-anon​—mga kabalaka, kaguol, kapakyasan, kahadlok, ug uban pa​—diha sa Diyos, uban ang bug-os nga pagtuo kaniya, kita makadawat ug kalinaw sa kasingkasing, “ang kalinaw sa Diyos nga lapaw sa tanang pagpanabot.”​—Filipos 4:4, 7; Salmo 68:19; Marcos 11:24; 1 Pedro 5:7.

17. Sa unsang paagi atong mabatonan ang kalinaw sa Diyos?

¹⁷ Kini ba nga kalinaw sa Diyos moabot dayon dihadiha? Bisan tuod kita tingali makabaton ug pila ka kahupayan dihadiha, ang gipamulong ni Jesus mahitungod sa pag-ampo alang sa balaang espiritu tinuod usab dinhi: “Padayon sa pagpangayo, ug kini igahatag kanimo; padayon sa pagpangita, ug ikaw makakaplag; padayon sa pagtuktok, ug ikaw pagabuksan.” (Lucas 11:9-13) Sanglit ang balaang espiritu mao man ang paagi nga mawala kanato ang kabalaka, kita kinahanglang molahutay sa pagpangayo sa kalinaw sa Diyos ug sa iyang tabang labot sa atong mga palas-anon. Kita makatino nga pinaagi sa paglahutay sa pag-ampo, atong madawat ang gitinguhang kahupayan ug kalinaw sa kasingkasing.

18. Unsay buhaton ni Jehova alang kanato kon dili kita mahibalo kon unsay iampo sa usa ka kahimtang?

¹⁸ Apan komusta kon dili kita mahibalo kon unsay iampo? Ang atong lalom nga mga pag-agulo sagad nagapibilin nga dili-mabungat tungod kay kita wala man gayod makasabot sa atong kahimtang, o kaha kita naglibog kon unsay ipadayag kang Jehova. Dinhi nga ang balaang espiritu mao ang mangaliya alang kanato. Si Pablo misulat: “Kita dili makamaong moampo, apan ang espiritu mao ang mangaliyopo alang kanato uban ang mga pag-agulo nga dili-malitok.” (Roma 8:26) Sa unsang paagi? Diha sa Pulong sa Diyos mao ang dinasig nga mga tagna ug mga pag-ampo nga nalangkit sa atong kahimtang. Iyang tugotan kini nga maoy mangaliya alang kanato, pagaingnon pa. Iyang dawaton kini ingon nga maoy angay natong iampo kon nahibalo lamang kita sa kahulogan niini sa atong bahin, ug sa nahiangay iyang itagana kini.

Pag-ampo ug Paglaom Magpadayon

19. Nganong ang pag-ampo ug paglaom magpadayon sa walay kataposan?

¹⁹ Ang pag-ampo ngadto sa atong langitnong Amahan magpadayon sa walay kataposan, ilabina kon mahitungod sa pagkamapasalamaton alang sa bag-ong kalibotan ug sa tanang mga panalangin niini. (Isaias 65:24; Pinadayag 21:5) Magpadayon usab kita nga magmangayaon diha sa paglaom, kay ang paglaom sa pila ka porma magpabilin sa walay kataposan. (Itandi ang 1 Corinto 13:13.) Kon unsang bag-ong mga butang ang ipadangat unya ni Jehova dihang dili na siya mailalom sa iyang gipahamtang-sa-kaugalingon nga Adlawng Igpapahulay ngadto sa yuta, dili gayod nato mahanduraw. (Genesis 2:2, 3) Sa walay kataposan, siya kanunay adunay mahigugmaong mga sorprisa alang sa iyang katawhan, ug ang umaabot adunay dagkong mga butang alang kanila sa paagi sa pagtuman sa iyang kabubut-on.

20. Unsa ang angay natong determinasyon, ug ngano?

²⁰ Uban niining kulba-hinam nga paglaom nga anaa sa atong unahan, hinaot nga kitang tanan magpabiling suod kang Jehova pinaagi sa paglahutay sa pag-ampo. Hinaot nga dili kita mohunong sa pagpasalamat sa atong langitnong Amahan alang sa tanan natong mga panalangin. Sa angay nga panahon ang atong mga ginalaoman malipayong matuman na unya, nga sobra pa sa atong mahanduraw o madahom, kay si Jehova “arang makahimo sa tanang butang sa sukod nga labaw pa gayod kadaghan kay sa atong mapangayo ug mahunahunaan.” (Efeso 3:20) Busa, tungod niini, dayegon natong tanan ug himayaon ug pasalamatan sa walay kataposan si Jehova nga atong Diyos, ang “Tigpatalinghog sa pag-ampo”!

[Footnote]

Unsaon Nimo Pagtubag?

◻ Nganong kinahanglang molahutay kita sa pag-ampo?

◻ Unsay atong nakat-onan gikan sa una-Kristohanong mga panig-ingnan sa pag-ampo?

◻ Unsay gitudlo kanato sa panig-ingnan ni Jesus labot sa pag-ampo?

◻ Sa unsang paagi atong ikatugyan ang atong mga palas-anon diha kang Jehova ug uban sa unsang sangpotanan?

[Hulagway sa panid 17]

Si Daniel milahutay sa pag-ampo bisan pa sa hulga nga mabalhog sa langob sa mga leyon