Ang Pulong ni Jehova Buhi
Mga Haylayt Gikan sa Ikaduhang Basahon sa mga Salmo
INGONG mga alagad ni Jehova, kita makadahom ug daghang pagsulay. “Ang tanan nga nagtinguha sa pagkinabuhi uban ang diyosnong pagkamahinalaron kalangkit ni Kristo Jesus pagalutoson usab,” misulat si apostol Pablo. (2 Timoteo 3:12) Unsay motabang kanato sa paglahutay sa mga pagsulay ug mga paglutos ug sa ingon magpamatuod sa atong integridad sa Diyos?
Ang ikaduha sa lima ka hugpong sa mga salmo naghatag kanato nianang maong tabang. Ang Salmo 42 hangtod sa 72 nagpakita kanato nga aron kita makalahutay gayod sa mga pagsulay, kita kinahanglang bug-os nga mosalig kang Jehova ug makakat-on sa paghulat kaniya alang sa kaluwasan. Pagkabililhong leksiyon kana alang kanato! Ang mensahe sa Ikaduhang Basahon sa mga Salmo, sama sa ubang bahin sa Pulong sa Diyos, “buhi ug gamhanan” gayod bisan karon.—Hebreohanon 4:12.
SI JEHOVA MAO ANG ATONG “DANGPANAN UG KUSOG”
Nadestiyero ang usa ka Levihanon. Kay nasubo nga dili siya makaadto sa sangtuwaryo ni Jehova aron mosimba, iyang gihupay ang iyang kaugalingon, nga nag-ingon: “Nganong nawad-an ka ug paglaom, Oh kalag ko, ug nganong gubot ka sa sulod nako? Paghulat sa Diyos.” (Salmo 42:5, 11; 43:5) Kining gisublisubli nga bersikulo nagsumpay sa tulo ka estansa sa Salmo 42 ug 43 nga naghimo niining usa ka balak. Ang Salmo 44 maoy usa ka pangaliyupo alang sa Juda—usa ka nasod nga nag-antos sa kalisdanan, tingali ilalom sa hulga sa pagsulong sa Asirya sa mga adlaw ni Haring Ezequias.
Ang Salmo 45, nga usa ka awit bahin sa harianong kaminyoon, maoy tagna bahin sa Mesiyanikong Hari. Ang mosunod nga tulo ka salmo naghulagway kang Jehova ingong “dalangpanan ug kusog,” “usa ka dakong Hari ibabaw sa tibuok nga yuta,” ug usa ka “luwas nga hataas nga dapit.” (Salmo 46:1; 47:2; 48:3) Pagkatahom ang pagkahubit diha sa Salmo 49 nga walay tawo nga ‘sa bisan unsang paagi makatubos bisan sa usa ka igsoon’! (Salmo 49:7) Ang unang walo ka salmo sa ikaduhang hugpong giingon nga iya sa mga anak ni Kore. Ang ikasiyam, ang Salmo 50, gikomposo ni Asap.
Tubag sa mga Pangutana Bahin sa Kasulatan:
44:19—Unsa ang “dapit sa mga irong ihalas”? Lagmit nga ang gitumong sa salmista mao ang panggubatan, diin kadtong nangamatay mahimong pagkaon sa mga irong ihalas.
45:13, 14a—Kinsa “ang anak nga babaye sa hari” nga “pagadad-on ngadto sa hari”? Siya mao ang anak nga babaye sa “Hari nga walay kataposan,” si Jehova nga Diyos. (Pinadayag 15:3) Siya naghawas sa hinimayang kongregasyon sa 144,000 ka Kristohanon, nga gisagop ni Jehova ingong iyang mga anak pinaagi sa pagdihog kanila sa iyang espiritu. (Roma 8:16) Kining “anak nga babaye” ni Jehova, nga “giandam ingong usa ka pangasaw-onon nga gidayandayanan alang sa iyang bana,” pagadad-on ngadto sa pamanhonon—ang Mesiyanikong Hari.—Pinadayag 21:2.
45:14b, 15—Kinsay gihawasan sa “mga ulay”? Sila mao ang “dakong panon” sa matuod nga mga magsisimba, nga miduyog ug nagpaluyo sa dinihogang nanghibilin. Tungod kay sila ‘makalabang sa dakong kasakitan,’ sila ania unya sa yuta sa dihang ang kaminyoon sa Mesiyanikong Hari ipahigayon didto sa langit. (Pinadayag 7:9, 13, 14) Nianang panahona, sila matugob sa “pagmaya ug pagkamalipayon.”
45:16—Sa unsang paagi nga puli sa mga katigulangan sa hari anaa unya ang mga anak? Sa dihang natawo si Jesus sa yuta, siya may yutan-ong mga katigulangan. Sila mahimong iyang mga anak sa dihang banhawon niya sila gikan sa mga patay sulod sa iyang Usa ka Libo ka Tuig nga Pagmando. Ang pipila kanila mahilakip niadtong itudlo ingong mga “prinsipe sa tibuok nga yuta.”
50:2—Nganong ang Jerusalem gitawag nga “pagkahingpit sa katahom”? Kini dili tungod sa dagway sa siyudad. Hinunoa, kini tungod kay si Jehova naggamit ug naghatag niini ug kahalangdon pinaagi sa paghimo niini nga lokasyon sa iyang templo ug kaulohan sa iyang dinihogang mga hari.
Mga Leksiyon Alang Kanato:
42:1-3. Sama sa bayeng osa, nga anaa sa mamalang dapit nga nangandoy ug tubig, ang Levihanon nangandoy kang Jehova. Tungod kay ang maong tawo wala makasimba kang Jehova diha sa Iyang sangtuwaryo, siya nasubo pag-ayo nga ‘ang iyang mga luha nahimo nga iyang pagkaon sa adlaw ug sa gabii’—nawad-an siyag ganang mokaon. Dili ba nato angayng ugmaron ang halalom nga apresasyon sa pagsimba kang Jehova kauban sa mga isigkamagtutuo?
42:4, 5, 11; 43:3-5. Kon tungod sa usa ka hinungdan nga dili nato kapugngan kita temporaryong mahimulag sa Kristohanong kongregasyon, ang paghandom sa kalipay sa maong pakig-uban kaniadto makapalig-on kanato. Bisan tuod sa sinugdan makapasamot kini sa kamingaw, kini magpahinumdom usab kanato nga ang Diyos mao ang atong dalangpanan ug kita kinahanglang maghulat kaniya alang sa kahupayan.
46:1-3. Bisan unsang kalamidad ang atong maagoman, kita kinahanglang magmasaligon gayod nga “ang Diyos mao ang atong dalangpanan ug kusog.”
50:16-19. Si bisan kinsa nga nagasultig limbong ug nagabuhat ug daotang mga butang walay katungod nga mohawas sa Diyos.
50:20. Imbes maghinamhinam sa pagbandilyo sa mga sayop sa uban, kinahanglang palabyon nato kana.—Colosas 3:13.
‘SA DIYOS MAGHULAT KA SA HILOM, OH KALAG KO’
Kini nga hugpong sa mga salmo nagsugod sa kinasingkasing nga pag-ampo ni David human siya makasala uban kang Batseba. Ang Salmo 52 hangtod sa 57 nagpakita nga pagaluwason ni Jehova kadtong nagtugyan sa ilang palas-anon kaniya ug naghulat kaniya alang sa kaluwasan. Ingon sa gipahayag diha sa Salmo 58-64, sa tanan niyang kasakit, gihimo ni David si Jehova nga iyang dalangpanan. Siya miawit: “Sa Diyos gayod maghulat ka sa hilom, Oh kalag ko, tungod kay ang akong paglaom nagagikan kaniya.”—Salmo 62:5.
Ang kasuod nato sa atong Manluluwas angayng magpalihok kanato sa ‘pag-awit ug mga pagdayeg sa kahimayaan sa iyang ngalan.’ (Salmo 66:2) Si Jehova gidayeg ingong manggihatagong magtatagana diha sa Salmo 65, ingong Diyos sa mga buhat sa pagluwas diha sa Salmo 67 ug 68, ug ingong Magtatagana ug kaikyasan diha sa mga Salmo 70 ug 71.
Tubag sa mga Pangutana Bahin sa Kasulatan:
51:12—Kang kinsang “masinugtanong espiritu” nga si David nangayog tabang? Kini wala magtumong sa pagkaandam sa Diyos sa pagtabang kang David ni sa balaang espiritu ni Jehova kondili sa kaugalingong espiritu ni David—sa iyang kiling sa panghunahuna. Iyang gihangyo ang Diyos nga ihatag kaniya ang tinguha sa pagbuhat kon unsay husto.
53:1—Ngano man nga ang tawo nga molimod sa paglungtad sa Diyos “walay salabotan”? Ang pagkawalay salabotan dinhi wala magpasabot ug kakulang sa intelihensiya. Atong masabtan ang kamatuoran nga kana nagtumong sa usa ka tawo nga walay salabotan sa moral pinaagi sa pagsusi sa misangpot nga moral nga kadaot nga gihubit diha sa Salmo 53:1-4.
58:3-5—Sa unsang paagi ang mga daotan nahisama sa halas? Ang mga bakak nga ilang gisulti bahin sa uban nahisama sa lala sa bitin. Ilang gidaot ang maayong dungog sa ilang mga biktima. “Sama sa kobra nga nagasampong sa iyang igdulungog,” ang mga daotan dili mamati sa pagtultol o pagtul-id.
58:7—Sa unsang paagi ang mga daotan ‘mangahilis samag nganha sa mga tubig nga nagaagos’? Lagmit naghunahuna si David sa katubigan diha sa pipila ka bul-oganang mga walog sa Yutang Saad. Bisan tuod ang kalit nga pagbaha makapadaghan sa tubig diha sa maong walog, kining mga tubiga moagos dayon ug mahanaw. Si David nag-ampo nga unta mahanaw dayon ang mga daotan.
68:13—Sa unsang paagi ‘ang mga pako sa salampati naputos sa plata ug ang mga dagang niini sa dalagong-berde nga bulawan’? Ang pipila ka salampati nga abohon ug kolor adunay mga balhibo nga mag-usab-usab ang kolor. Ang ilang balhibo morag metal tan-awon kon mahayagan sa adlaw. Lagmit nga gipakasama ni David ang madaogong Israelinhong mga manggugubat nga nangabot gikan sa panggubatan sa maong matang sa salampati—tulin nga manglupad ug naggilakgilak. Sumala pa sa pipila ka eskolar, ang kahubitan mahimong mapadapat usab sa usa ka buhat sa arte, usa ka tropeyo, nga gidala ingong inagaw. Bisan unsa pa man, ang gitumong ni David mao ang mga kadaogan nga gihatag ni Jehova sa iyang katawhan batok sa ilang mga kaaway.
68:18—Kinsa ang “mga gasa nga mga lalaki”? Kini maoy mga lalaki gikan sa taliwala niadtong nabihag panahon sa pagsakop sa Yutang Saad. Ang maong mga lalaki sa ulahi gitudlo nga motabang sa mga Levihanon sa ilang buluhaton.—Esdras 8:20.
68:30—Unsay kahulogan sa hangyo nga ‘badlongon ang ihalas nga mananap sa mga tangbo’? Naghulagway sa mga kaaway sa katawhan ni Jehova ingong mapintas nga mga mananap, gihangyo ni David ang Diyos nga badlongon sila, o pugngan sila sa pagbuhat ug kadaot.
69:23—Unsay kahulogan sa ‘pagpakurog sa mga balat-ang sa kaaway’? Ang mga kaunoran sa balat-ang kinahanglanon alang sa hago nga mga trabaho, sama sa pag-alsa ug pagpas-an ug bug-at nga mga lulan. Ang pagkurog sa mga balat-ang nagpasabot ug pagkawala sa kusog. Si David nag-ampo nga ang iyang mga kaaway mangaluya unta.
Mga Leksiyon Alang Kanato:
51:1-4, 17. Sa dihang kita makasala, kana wala magpasabot nga kita nahilayo na kang Jehova nga Diyos. Kon kita maghinulsol, kita makasalig nga iyang kaluy-an.
51:5, 7-10. Kon kita makasala, kita makapangayog pasaylo kang Jehova tungod sa atong napanunod nga pagkamakasasala. Kinahanglan usab kitang moampo kaniya nga hinloan kita, ipasig-uli kita, tabangan kita nga mawagtang sa atong kasingkasing ang makasasalang mga hilig, ug hatagan kita ug lig-ong espiritu.
51:18. Ang mga sala ni David nagpameligro sa kaayohan sa tibuok nasod. Busa miampo siya alang sa maayong kabubut-on sa Diyos ngadto sa Zion. Sa dihang kita makahimog grabeng sala, kini subsob nga makahatag ug pasipala sa ngalan ni Jehova ug sa kongregasyon. Kita kinahanglang mag-ampo sa Diyos sa pagtul-id sa kadaot nga ato tingaling gipahinabo.
52:8. Kita “mahisama sa malamboon nga kahoyng olibo sa balay sa Diyos”—duol kang Jehova ug mabungahon diha sa pag-alagad kaniya—pinaagi sa pagsunod kaniya ug pinaagi sa pagkaandam nga modawat sa iyang disiplina.—Hebreohanon 12:5, 6.
55:4, 5, 12-14, 16-18. Gisakitan pag-ayo si David tungod kay giluiban siya sa iyang anak nga si Absalom ug sa iyang sinaligang magtatambag nga si Ahitopel. Apan, wala kana makapamenos sa pagsalig ni David kang Jehova. Kinahanglang dili nato tugotan ang kasakit sa balatian nga makapahuyang sa atong pagsalig sa Diyos.
55:22. Sa unsang paagi nato itugyan ang atong palas-anon kang Jehova? Buhaton nato kini (1) pinaagi sa pag-ampo bahin niana, (2) pinaagi sa pagsalig sa iyang Pulong ug organisasyon alang sa giya ug tabang, ug (3) pinaagi sa pagbuhat kutob sa atong maarangan aron mogaan ang maong kahimtang.—Proverbio 3:5, 6; 11:14; 15:22; Filipos 4:6, 7.
56:8. Si Jehova nahibalo dili lamang sa atong situwasyon kondili sa emosyonal nga epekto niini kanato.
62:11. Ang Diyos wala magsalig sa bisan unsang panggawas nga tuboran sa enerhiya. Siya ang mismong tuboran sa gahom. ‘Iya ang kusog.’
63:3. Ang ‘mahigugmaong-kalulot sa Diyos mas maayo pa kay sa kinabuhi’ tungod kay kon wala kana, ang kinabuhi walay kapuslanan. Maalamon nga makighigala kita kang Jehova.
63:6. Ang kagabhion—hilom ug walay makatugaw—maoy maayo kaayong panahon sa pagpamalandong.
64:2-4. Ang dili maayong tabi makadaot sa maayong ngalan sa tawong inosente. Dili gayod kita mamati sa maong tabi ni magpakaylap niana.
69:4. Aron mahuptan nato ang kalinaw, maalamon usahay nga motubag pinaagi sa pagpangayog pasaylo, bisan pag dili kita kombinsido nga kita maoy nasayop.
70:1-5. Si Jehova mamati sa atong dinaliang hangyo alang sa tabang. (1 Tesalonica 5:17; Santiago 1:13; 2 Pedro 2:9) Mahimong tugotan sa Diyos nga magpadayon ang usa ka pagsulay, apan mohatag siya kanato ug kaalam sa pagsagubang sa maong situwasyon ug kusog aron sa paglahutay niana. Dili niya itugot nga kita tentalon nga labaw sa atong maantos.—1 Corinto 10:13; Hebreohanon 10:36; Santiago 1:5-8.
71:5, 17. Nabatonan ni David ang kaisog ug kusog pinaagi sa paghimo kang Jehova nga iyang pagsalig sukad sa iyang pagkabatan-on—bisan sa wala pa siya makigharong sa Filistehanong higante nga si Goliat. (1 Samuel 17:34-37) Ang mga batan-on kinahanglang mosalig kang Jehova sa tanan nilang buhaton.
“Pagapun-on Unta ang Tibuok nga Yuta sa Iyang Himaya”
Ang kataposang awit sa ikaduhang hugpong sa mga salmo, ang Salmo 72, maoy bahin sa pagmando ni Solomon, nga naglandong sa mga kahimtang nga maglungtad ilalom sa paghari sa Mesiyas. Pagkanindot nga mga panalangin ang gihubit dinhi—dagayang pakigdait, kataposan sa pagdaogdaog ug kapintasan, dagayang lugas sa ibabaw sa yuta! Mahilakip ba kita niadtong makatagamtam niini ug sa ubang mga panalangin sa Gingharian? Mahilakip kita kon, sama sa salmista, kita kontento nga maghulat kang Jehova, nga himoon siya nga atong dalangpanan ug kusog.
“Ang mga pag-ampo ni David . . . natapos” pinaagi sa mga pulong: “Dalayegon si Jehova nga Diyos, ang Diyos sa Israel, nga mao lamang ang nagabuhat ug katingalahang mga buhat. Ug dalayegon ang iyang mahimayaong ngalan hangtod sa panahong walay tino, ug pagapun-on unta ang tibuok nga yuta sa iyang himaya. Amen ug Amen.” (Salmo 72:18-20) Hinaot nga kinasingkasing usab natong dayegon si Jehova ug ang iyang mahimayaong ngalan.
[Hulagway sa panid 9]
Nahibalo ka ba kon kinsay gihulagwayan sa “anak nga babaye sa hari”?
[Hulagway sa panid 10, 11]
Ang Jerusalem gitawag nga “pagkahingpit sa katahom.” Nahibalo ka ba kon ngano?