“Mga Gasa nga mga Tawo” Aron sa Pag-atiman sa mga Karnero ni Jehova

“Sa dihang siya misaka sa itaas siya nagdala ug mga bihag; siya mihatag ug mga gasa nga mga tawo.”​—EFESO 4:8.

 1. Unsay gisulti sa usa ka Kristohanong sister bahin sa mga ansiyano sa iyang kongregasyon?

“SALAMAT sa inyong pagkamatinagdanon kaayo kanamo. Ang inyong mga pahiyom, ang inyong pagmahal, ug ang inyong kabalaka tiunay gayod. Anaa kamo kanunay sa pagpamati ug pagpaambit sa mga pulong gikan sa Bibliya nga nagpadasig sa among mga espiritu. Ako nanghinaot nga dili ko gayod kamo sayonsayonon lang.” Nagsulat ang usa ka Kristohanong sister ngadto sa mga ansiyano sa iyang kongregasyon. Tin-aw, ang gugma nga gipakita sa matinagdanong Kristohanong mga magbalantay nakatandog sa iyang kasingkasing.​—1 Pedro 5:2, 3.

2, 3. (a) Sumala sa Isaias 32:1, 2, sa unsang paagi ang mahangawaong mga ansiyano nagaatiman sa mga karnero ni Jehova? (b) Kanus-a ang usa ka ansiyano maisip nga usa ka gasa?

² Ang mga ansiyano maoy usa ka tagana gikan kang Jehova aron sa pag-atiman sa iyang mga karnero. (Lucas 12:32; Juan 10:16) Ang mga karnero ni Jehova mahal kaayo kaniya​—hilabihan ka mahal, sa pagkatinuod, nga iyang gipalit sila pinaagi sa bililhong dugo ni Jesus. Nan, dili ikahibulong nga si Jehova mahimuot sa dihang ang mga ansiyano magtagad sa iyang panon nga maluloton. (Buhat 20:28, 29) Matikdi ang matagnaong kahubitan niining mga ansiyano, o “mga prinsipe”: “Ang matag usa angayng mahimong tagoanan gikan sa hangin ug salipod gikan sa bagyo, sama sa mga sapa sa tubig sa usa ka dapit nga mamala, ingon sa landong sa usa ka dakong bato sa uga nga yuta.” (Isaias 32:1, 2) Oo, sila anaa sa pagpanalipod, pagpalagsik, ug paghupay sa iyang mga karnero. Ang mga ansiyano nga mahangawaong nagabantay sa panon sa ingon nagapaningkamot nga magkinabuhi sumala sa gidahom sa Diyos kanila.

³ Ang maong mga ansiyano gihisgotan sa Bibliya ingong “mga gasa nga mga tawo.” (Efeso 4:8) Kon maghunahuna ka ug gasa, ikaw naghunahuna ug usa ka butang nga gihatag aron katagan-an ang usa ka panginahanglan o sa paghatag ug kalipay niadtong usa nga nagadawat niini. Ang usa ka ansiyano maisip nga usa ka gasa kon iyang gamiton ang iyang mga katakos sa pagtagana sa gikinahanglang tabang ug sa pag-amot ug kalipay sa panon. Sa unsang paagi iyang mahimo kini? Ang tubag, nga makita diha sa mga pulong ni Pablo sa Efeso 4:7-16, nagpasiugda sa mahigugmaong kabalaka ni Jehova alang sa iyang mga karnero.

“Mga Gasa nga mga Tawo”​—Diin Gikan?

 4. Sa katumanan sa Salmo 68:18, sa unsang paagi si Jehova “misaka sa itaas,” ug kinsa ang “mga gasa sa porma nga mga tawo”?

⁴ Sa dihang gigamit ni Pablo ang ekspresyong “mga gasa nga mga tawo,” siya nagkutlo kang Haring David, kinsa miingon bahin kang Jehova: “Ikaw misaka sa itaas; ikaw nagdala ug mga bihag; ikaw mihatag ug mga gasa sa porma nga mga tawo.” (Salmo 68:18) Human nakasulod ang mga Israelinhon sa Yutang Saad sa pipila ka mga tuig, si Jehova sa mahulagwayon “misaka” sa Bukid sa Sion ug naghimo sa Jerusalem nga kaulohan sa gingharian sa Israel uban kang David ingong hari niini. Apan kinsa ang “mga gasa sa porma nga mga tawo”? Sila mao ang mga tawo nga nabihag sa panahon nga gidaog ang yuta. Ang uban niining mga bihag gitugyan ngadto sa mga Levihanon aron motabang sa buluhaton diha sa tabernakulo.​—Esdras 8:20.

 5. (a) Sa unsang paagi gipakita ni Pablo nga ang Salmo 68:18 natuman diha sa Kristohanong kongregasyon? (b) Sa unsang paagi si Jesus “misaka sa itaas”?

⁵ Diha sa iyang sulat ngadto sa mga taga-Efeso, si Pablo nagpakita nga ang mga pulong sa salmista adunay mas dakong katumanan diha sa Kristohanong kongregasyon. Nagbatbat sa Salmo 68:18 sa laing mga pulong, si Pablo nagsulat: “Karon ang dili-takos nga kalulot gihatag sa matag usa kanato sumala sa kon giunsa sa Kristo pagsukod ang libreng gasa. Tungod niini siya nagaingon: ‘Sa dihang siya misaka sa itaas siya nagdala ug mga bihag; siya mihatag ug mga gasa nga mga tawo.’” (Efeso 4:7, 8) Si Pablo dinhi nagpadapat niini nga salmo ngadto kang Jesus ingong hawas sa Diyos. “Gidaog [ni Jesus] ang kalibotan” pinaagi sa iyang matinumanong dalan. (Juan 16:33) Siya usab nakadaog batok sa kamatayon ug batok kang Satanas pinaagi sa pagbanhaw sa Diyos kaniya gikan sa mga patay. (Buhat 2:24; Hebreohanon 2:14) Sa 33 K.P., ang nabanhawng Jesus misaka “saylo pa kaayo sa tanang kalangitan”​—mas hataas kay sa tanang ubang langitnong mga linalang. (Efeso 4:9, 10; Filipos 2:9-11) Ingong usa ka mananaog, si Jesus nagdalag “mga bihag” gikan sa kaaway. Sa unsang paagi?

 6. Sugod sa Pentekostes 33 K.P., sa unsang paagi ang misaka nga Jesus nagsugod sa paglungkab sa panimalay ni Satanas, ug unsay iyang gihimo sa “mga bihag”?

⁶ Sa dinhi pa sa yuta, gipasundayag ni Jesus ang iyang gahom batok kang Satanas pinaagi sa paghatag ug kagawasan niadtong naulipon sa mga demonyo. Nahisama kini nga daw gisulong ni Jesus ang balay ni Satanas, gigapos siya, ug giagaw ang iyang mga kabtangan. (Mateo 12:22-29) Hunahunaa lang, sa dihang gibanhaw ug gihatagan sa ‘tanang awtoridad sa langit ug sa yuta,’ pagkadakong pagpanglungkab ang nahimo ni Jesus! (Mateo 28:18) Sugod sa Pentekostes 33 K.P., ang misaka nga Jesus, ingong hawas sa Diyos, nagsugod sa paglungkab sa balay ni Satanas pinaagi sa ‘pagdalag mga bihag’​—mga tawo nga dugay nang naulipon sa sala ug kamatayon ug ilalom sa paggahom ni Satanas. Kining maong “mga bihag” kinabubut-ong nangahimong ‘mga ulipon ni Kristo, nga nagabuhat sa kabubut-on sa Diyos nga tibuok-kalag.’ (Efeso 6:6) Sa ingon, sila gihatagag kagawasan ni Jesus gikan sa paggahom ni Satanas ug, alang kang Jehova, sila gihatag ngadto sa kongregasyon ingong “mga gasa nga mga tawo.” Handurawa ang walay-nahimong kasuko ni Satanas samtang sila gisakmit gikan sa iyang atubangan mismo!

 7. (a) Sa unsang mga kapasidad nga ang “mga gasa nga mga tawo” nag-alagad diha sa mga kongregasyon? (b) Unsang kahigayonan ang gihatag ni Jehova ngadto sa matag usa ka lalaki nga nag-alagad ingong ansiyano?

⁷ Kita ba adunay ingon niini nga “mga gasa nga mga tawo” diha sa kongregasyon karon? Sa pagkatinuod, kita aduna! Atong makita sila nga nag-alagad ingong mga ansiyano, nga kuging nag-alagad ingong ‘mga tig-ebanghelyo, mga magbalantay, ug mga magtutudlo,’ diha sa kapin sa 87,000 ka kongregasyon sa katawhan sa Diyos sa tibuok yuta. (Efeso 4:11) Si Satanas malipay kaayo nga dagmalan nila ang panon. Apan dili kana ang hinungdan kon nganong ang Diyos pinaagi kang Kristo naghatag kanila ngadto sa kongregasyon. Hinunoa, gitagana ni Jehova kining mga tawhana alang sa kaayohan sa kongregasyon, ug sila manubag ngadto kaniya alang sa mga karnero nga gisalig diha kanila. (Hebreohanon 13:17) Kon ikaw nag-alagad ingong usa ka ansiyano, si Jehova naghatag kanimo ug maayo kaayong kahigayonan sa pagpamatuod sa imong kaugalingon nga usa ka gasa, o panalangin, sa imong mga igsoon. Mahimo nimo kana pinaagi sa pagsunod sa upat ka hinungdanong mga responsibilidad.

Kon Adunay Panginahanglan sa “Pagpasibo ug Balik”

 8. Sa unsang mga paagi nga kitang tanan kinahanglang ipasibo ug balik usahay?

⁸ Una, ang “mga gasa nga mga tawo” gihatag “alang sa pagpasibo ug balik sa mga balaan,” nag-ingon si Pablo. (Efeso 4:12) Ang Gregong nombreng gihubad nga “pagpasibo ug balik” nagpasabot sa pagbutang sa usa ka butang “sa tukmang paghan-ay.” Ingong mga tawong dili-hingpit, kitang tanan kinahanglang ipasibo ug balik matag karon ug unya​—aron ang atong panghunahuna, tinamdan, o kagawian ‘tukmang mapahan-ay’ sa panghunahuna ug kabubut-on sa Diyos. Si Jehova mahigugmaong nagtagana ug “mga gasa nga mga tawo” sa pagtabang kanato nga mohimog gikinahanglang mga pagpasibo. Unsaon nila paghimo kini?

 9. Sa unsang paagi ang usa ka ansiyano makatabang sa pagpasibo ug balik sa usa ka karnero nga nakasala?

⁹ Usahay, ang usa ka ansiyano tingalig tawgon sa pagtabang sa usa ka karnero nga nakasala, kinsa tingali ‘nakahimo ug sayop nga lakang sa dili pa niya himatngonan kini.’ Sa unsang paagi ang usa ka ansiyano makatabang? ‘Paningkamot nga mapasibo ug balik ang maong tawo diha sa espiritu sa kalumo,’ nag-ingon ang Galacia 6:1. Busa, sa dihang mohatag ug tambag, ang usa ka ansiyano dili mangasaba sa usa nga nakasala, nga mogamit ug masakit nga mga pulong. Ang tambag angay nga magpadasig, dili ‘magpalisang,’ sa usa nga nagadawat niana. (2 Corinto 10:9; itandi ang Job 33:7.) Ang indibiduwal tingali mibati nag kaulaw, busa ang usa ka mahigugmaong magbalantay maglikay sa pagdugmok sa espiritu nianang usa. Sa dihang ang tambag, bisan ang seryoso nga pagbadlong, tataw nga tinukmod ug ihatag diha sa gugma, kini lagmit makatul-id sa panghunahuna o kagawian sa usa nga nakasala, sa ingon magpasibo ug balik kaniya.​—2 Timoteo 4:2.

10. Unsay nalangkit sa pagpasibo ug balik sa uban?

¹⁰ Sa pagtaganag “mga gasa nga mga tawo” sa pagpasibo ug balik kanato, anaa sa hunahuna ni Jehova nga ang mga ansiyano makapadasig sa espirituwal ug takos nga pagasundogon sa iyang katawhan. (1 Corinto 16:17, 18; Filipos 3:17) Ang pagpasibo ug balik sa uban naglangkit dili lamang sa pagtul-id niadtong nagsubay sa sayop nga dalan kondili pagtabang usab sa mga matinumanon sa pagpabilin sa hustong dalan.a Karon, uban sa daghan kaayong problema nga daw makapaluya, daghan ang nagkinahanglag pagdasig aron makalahutay. Ang uban tingali nagkinahanglan ug malulot nga tabang aron mapahan-ay ang ilang panghunahuna uban sa Diyos. Pananglitan, ang ubang matinumanong mga Kristohanon nakigbisog sa lalom nga mga pagbati sa pagkakulag-katakos o pagkadili-takos. Ang maong “magul-anong mga kalag” tingali mibati nga si Jehova dili gayod mahigugma kanila ug nga bisan ang ilang labing maayong mga paningkamot sa pag-alagad sa Diyos dili gayod dalawaton kaniya. (1 Tesalonica 5:14) Apan kining paagiha sa panghunahuna wala mahan-ay sa kon unsa gayoy tinuod nga gibati sa Diyos labot sa iyang mga magsisimba.

11. Unsay mahimo sa mga ansiyano sa pagtabang niadtong nakigbisog sa mga pagbating dili-takos?

¹¹ Mga ansiyano, unsay inyong mahimo sa pagtabang sa mga tawong sama kanila? Malulotong ipaambit kanila ang pamatuod sa Kasulatan nga si Jehova may kahangawa sa matag usa sa iyang mga alagad ug pasaligi sila nga kining mga tekstoha sa Bibliya aplikado ngadto mismo kanila. (Lucas 12:6, 7, 24) Tabangi sila sa pagkasabot nga si Jehova ‘nagkabig’ kanila sa pag-alagad kaniya, sa ingon tino nga siya nakakita nga bililhon sila. (Juan 6:44) Pasaligi sila nga sila wala mag-inusara—daghang matinumanong mga alagad ni Jehova adunay susamang mga pagbati. Ang manalagnang Elias kas-a naguol pag-ayo nga siya nangandoy nga mamatay. (1 Hari 19:1-4) Ang ubang dinihogang mga Kristohanon sa unang siglo mibati nga ‘gihusgahan’ sa ilang kaugalingong mga kasingkasing. (1 Juan 3:20) Makahupay ang pagkahibalo nga ang mga matinumanon sa panahon sa Bibliya may “mga pagbating sama sa atoa.” (Santiago 5:17) Kamo makarepaso usab sa makapadasig nga artikulo diha sa Ang Bantayanang Torre ug Pagmata! uban sa nagmasulub-on. Ang inyong mahigugmaong mga paningkamot nga mapasig-uli ang pagsalig sa mga tawong sama kanila mamatikdan gayod sa Diyos nga naghatag kaninyo ingong “mga gasa nga mga tawo.”—Hebreohanon 6:10.

“Pagpalig-on” sa Panon

12. Unsay gipaila sa ekspresyong “pagpalig-on sa lawas sa Kristo,” ug unsa ang yawi sa pagpalig-on sa panon?

¹² Ikaduha, ang “mga gasa nga mga tawo” gihatag alang sa katarongan sa “pagpalig-on sa lawas sa Kristo.” (Efeso 4:12) Si Pablo migamit dinhi ug pulong-pasumbingay. Ang “pagpalig-on” magpahinumdom sa pagpanukod, ug ang “lawas sa Kristo” nagpasabot sa mga tawo​—ang mga sakop sa dinihogang Kristohanong kongregasyon. (1 Corinto 12:27; Efeso 5:23, 29, 30) Angayng tabangan sa mga ansiyano ang ilang mga igsoon aron motubo nga malig-on sa espirituwal. Ang ilang tumong maoy ‘sa pagpalig-on ug dili sa paglumpag’ sa panon. (2 Corinto 10:8) Ang yawi sa pagpalig-on sa panon mao ang gugma, kay ang “gugma nagapalig-on.”​—1 Corinto 8:1.

13. Unsay kahulogan sa pagkahimong adunay empatiya, ug nganong hinungdanon nga magpakitag empatiya ang mga ansiyano?

¹³ Ang usa ka bahin sa gugma nga makatabang sa mga ansiyano sa paglig-on sa panon mao ang empatiya. Ang pagkaadunay empatiya nagkahulogan sa pagbati sa gibati sa uban​—mosimpatiya sa ilang mga hunahuna ug mga pagbati, mohatag ug konsiderasyon sa ilang mga limitasyon. (1 Pedro 3:8) Nganong hinungdanon nga ang mga ansiyano magbaton ug empatiya? Labaw sa tanan tungod kay si Jehova​—ang usa nga naghatag sa “mga gasa nga mga tawo”—​maoy usa ka Diyos nga may empatiya. Kon ang iyang mga alagad nag-antos o anaa sa kasakit, siya mobati alang kanila. (Exodo 3:7; Isaias 63:9) Siya mohatag ug konsiderasyon sa ilang mga limitasyon. (Salmo 103:14) Nan, sa unsang paagi ang mga ansiyano makapakitag empatiya?

14. Sa unsang mga paagi ang mga ansiyano makapakitag empatiya sa uban?

¹⁴ Sa dihang adunay moduol kanila nga nawad-ag kadasig, sila mamati, moila sa maong pagbati. Sila maningkamot sa pagsabot sa kagikan, personalidad, ug mga kahimtang sa ilang mga igsoon. Unya kon ang mga ansiyano mohatag ug makapadasig nga Kasulatanhong tabang, sayon kining dawaton sa mga karnero tungod kay kini nagagikan sa mga magbalantay nga tinuod gayod nga nakasabot ug nahingawa kanila. (Proverbio 16:23) Ang empatiya mopukaw usab sa mga ansiyano sa paghatag ug konsiderasyon sa mga limitasyon sa uban ug sa mga pagbati nga mosangpot gumikan niini. Pananglitan, ang ubang matanlagong mga Kristohanon tingali mobating sad-an tungod kay dili sila makahimog daghan diha sa pag-alagad sa Diyos, tingali tungod sa pagkatigulang o dili-maayong panglawas. Sa laing bahin, ang uban tingali nagkinahanglan ug pagdasig sa pagpauswag sa ilang pag-alagad. (Hebreohanon 5:12; 6:1) Ang empatiya mopukaw sa mga ansiyano sa pagpangitag “makapalipayng mga pulong” nga molig-on sa uban. (Ecclesiastes 12:10) Kon ang mga karnero ni Jehova mapalig-on ug mapukaw sa paglihok, ang ilang gugma sa Diyos mopalihok kanila sa paghimo kutob sa ilang maarangan sa pag-alagad kaniya!

Mga Tawo nga Nagpalambo sa Panaghiusa

15. Unsay gipasabot sa ekspresyong “pagkausa diha sa pagtuo”?

¹⁵ Ikatulo, ang “mga gasa nga mga tawo” gitagana aron “kitang tanan makadangat ngadto sa pagkausa diha sa pagtuo ug diha sa tukmang kahibalo sa Anak sa Diyos.” (Efeso 4:13) Ang mga pulong “pagkausa diha sa pagtuo” nagpasabot sa panaghiusa dili lamang sa mga pagtuo kondili sa mga magtutuo usab. Nan, kini maoy laing katarongan kon nganong ang Diyos naghatag kanato ug “mga gasa nga mga tawo”​—aron sa pagpalambo sa panaghiusa taliwala sa iyang katawhan. Sa unsang paagi ilang gihimo kini?

16. Nganong hinungdanong huptan sa mga ansiyano ang panaghiusa sa ilang taliwala?

¹⁶ Una, angayng huptan nila ang panaghiusa sa ilang taliwala. Kon magkabahinbahin ang mga magbalantay, ang mga karnero hayan mag-antos tungod sa pagpasagad. Ang bililhong panahon nga ikagugol unta sa pagbantay sa panon tingali sa walay-kapuslanan mahurot sa dugayng-matapos nga mga miting ug mga panaglalis bahin sa gagmayng mga butang. (1 Timoteo 2:8) Ang mga ansiyano tingali dili awtomatikong mouyon sa tanang butang nga ilang hisgotan, tungod kay sila maoy mga tawo nga may mga personalidad nga tingali lahi kaayo. Ang panaghiusa wala magdili nga sila magbaton ug lahi nga mga opinyon o bisan magpahayag niana sa timbang nga paagi sa panahon sa bukas-ug-hunahuna nga panaghisgot. Ipatunhay sa mga ansiyano ang ilang panaghiusa pinaagi sa pagpamating matinahuron sa usag usa nga dili maghukom daan. Ug basta walay prinsipyo sa Bibliya nga nalapas, ang matag usa angay mosunod ug mopaluyo sa kataposang desisyon sa lawas sa mga ansiyano. Ang manunotong espiritu nagpadayag nga sila gigiyahan sa “kaalam gikan sa itaas,” nga “makigdaiton, makatarunganon.”​—Santiago 3:17, 18.

17. Sa unsang paagi ang mga ansiyano makatabang sa pagpatunhay sa panaghiusa sa kongregasyon?

¹⁷ Ang mga ansiyano usab alisto sa pagpalambo sa panaghiusa sa kongregasyon. Kon ang makapabahing mga impluwensiya​—sama sa makadaot nga tabi, tendensiya sa pagpasangil ug sayop nga mga motibo, o palaaway nga espiritu—​maghulga sa kalinaw, sila andam mohatag ug makatabang nga tambag. (Filipos 2:2, 3) Pananglitan, ang mga ansiyano tingali nahibalo ug mga indibiduwal nga hinawayon kaayo o kiling sa pagpanghilabot sa mga buhat sa uban, nga sa ingon nahimong mga hilabtanon. (1 Timoteo 5:13; 1 Pedro 4:15) Ang mga ansiyano maningkamot sa pagtabang kanila sa pag-ila nga kining dalana sukwahi nianang gitudlo kanato sa Diyos ug nga ang matag usa angayng “magapas-an sa iyang kaugalingong luwan.” (Galacia 6:5, 7; 1 Tesalonica 4:9-12) Ginamit ang Kasulatan, ilang ipatin-aw nga si Jehova nagtugyan sa daghang butang diha sa atong tagsatagsang konsensiya, ug walay usa kanato ang angay maghukom sa uban labot nianang mga butanga. (Mateo 7:1, 2; Santiago 4:10-12) Aron dungang mag-alagad diha sa panaghiusa, kinahanglang magpatigbabaw ang pagsalig ug pagtahod diha sa kongregasyon. Pinaagi sa paghatag ug Kasulatanhong tambag kon gikinahanglan, ang “mga gasa nga mga tawo” motabang kanato nga mapatunhay ang atong pakigdait ug panaghiusa.​—Roma 14:19.

Pagpanalipod sa Panon

18, 19. (a) Ang “mga gasa nga mga tawo” magpanalipod kanato batok kang kinsa? (b) Gikan sa unsang kapeligrohan nga ang mga karnero kinahanglang mapanalipdan, ug sa unsang paagi ang mga ansiyano molihok sa pagpanalipod sa mga karnero?

¹⁸ Ikaupat, si Jehova nagtagana ug “mga gasa nga mga tawo” aron mapanalipdan kita nga maimpluwensiyahan sa “matag hangin sa pagtulon-an pinaagi sa bitik-bitik sa mga tawo, pinaagi sa kamalipatlipaton sa pagmugnag sayop.” (Efeso 4:14) Ang orihinal nga pulong alang sa “bitik-bitik” ginaingon nga nagkahulogang “paglimbong sa dice” o “kaabtik sa pagmaniobra sa dice.” Dili ba nagpahinumdom kana kanato kon unsa ka alisto naglihok ang mga apostata? Pinaagi sa paggamit ug inabtik nga mga pangatarongan, ilang maniobrahon ang mga Kasulatan sa pagsulay sa pagdani sa tinuod nga mga Kristohanon aron mapalayo sa ilang pagtuo. Ang mga ansiyano angayng magbantay sa maong “malupigong mga lobo”!​—Buhat 20:29, 30.

¹⁹ Ang mga karnero ni Jehova angayng mapanalipdan batok sa ubang mga kapeligrohan usab. Ang karaang magbalantay sa hayop nga si David maisogong nanalipod sa mga hayop sa iyang amahan batok sa mga manunukob. (1 Samuel 17:34-36) Karon, usab, tingali may mga okasyon sa dihang ang nabalakang Kristohanong mga magbalantay angayng magpakitag kaisog aron mapanalipdan ang panon batok sa kang bisan kinsa nga tingali managmal o manaogdaog sa mga karnero ni Jehova, ilabina ang mga mas mahuyang. Ang mga ansiyano abtik sa pagkuha gikan sa kongregasyon sa mga makasasala kinsa tinuyong mogamit ug panglingla, panglimbong, ug panglipat aron ipatunhay ang pagkadaotan.b​—1 Corinto 5:9-13; itandi ang Salmo 101:7.

20. Nganong kita mobati nga may kasegurohan ilalom sa pag-atiman sa “mga gasa nga mga tawo”?

²⁰ Pagkamapasalamaton nato alang sa “mga gasa nga mga tawo”! Sa ilang mahigugmaong pag-atiman, kita mobati nga may kasegurohan, tungod kay sila malulotong nagpasibo ug balik kanato, mahigugmaong naglig-on kanato, andam sa pagpatunhay sa atong panaghiusa, ug maisogong nagpanalipod kanato. Apan sa unsang paagi angay lantawon sa “mga gasa nga mga tawo” ang ilang papel diha sa kongregasyon? Ug sa unsang paagi atong ikapakita nga sila atong gipabilhan? Kining mga pangutanaha pagahisgotan sa sunod nga artikulo.

[Mga footnote]

Nahinumdom Ka Ba?

◻ Kinsa ang “mga gasa nga mga tawo,” ug nganong ang Diyos pinaagi kang Kristo naghatag kanila ngadto sa kongregasyon?

◻ Sa unsang paagi matuman sa mga ansiyano ang ilang responsibilidad sa pagpasibo ug balik sa panon?

◻ Unsay mahimo sa mga ansiyano sa paglig-on sa ilang isigkamagtutuo?

◻ Sa unsang paagi ang mga ansiyano makapatunhay sa panaghiusa sa kongregasyon?

[Hulagway sa panid 10]

Ang empatiya motabang sa mga ansiyano sa pagdasig niadtong nagmagul-anon

[Hulagway sa panid 10]

Ang panaghiusa taliwala sa mga ansiyano magpalambo sa panaghiusa sa kongregasyon