Ang Maayong Ngalan Mas Maayo Kay sa Daghang Bahandi

ANG maayong ngalan, o reputasyon, importante kaayo. Gani sa pipila ka nasod, giproteksiyonan kini sa balaod, diin ang usa makapasakag kasong libel (giimprenta o gisibya nga mga pulong nga makadaot sa dungog) ug slander (sulti nga makadaot sa dungog). Magpahinumdom ni nato sa karaang panultihon nga ang maayong ngalan mas maayo kay sa daghang bahandi ug ang pagkatinahod mas maayo kay sa plata ug bulawan. (Proverbio 22:1) Unsay atong himoon aron makabaton tag maayong ngalan ug tahoron ta sa uban? Ang Bibliya dunay maayong mga sugyot.

Pananglitan, tagda ang giingon sa Bibliya diha sa Salmo 15. Sa pagtubag sa pangutana nga, ‘Kinsa ang mahimong dinapit sa tolda [sa Diyos]?’ ang salmista miingon nga dapiton sa Diyos kadtong nagbuhat ug matarong, nagsulti sa tinuod, dili magbutangbutang, dili mohimog daotan sa iyang kauban, dili mangdaot ug dungog, dili makig-uban sa mga salawayon, motuman sa saad bisag dili kini pabor kaniya, ug dili mahiphipan. (Salmo 15:1-5) Seguradong tahoron nimo ang tawong ingon niana!

Ang pagpaubos usab makatabang aron tahoron ka sa uban. Ang Proverbio 15:33 nag-ingon nga mapasidunggan ang mapainubsanon. Tagda kini: Ang mapainubsanon makakita kon unsay angay nilang pauswagon ug magkugi sa pagpauswag niana. Sila andam mangayog pasaylo kon makapasakit sa uban. (Santiago 3:2) Pero ang mga mapahitas-on dili ingon niana. Dali ra silang masuko. Ang Proverbio 16:18 nag-ingon nga ang garbo moresultag kadaot, ug ang pagkamapahitas-on moresultag kapangdolan.

Apan komosta kon daoton sa uban ang imong maayong ngalan? Mobalos ka ba dayon, tingali tungod sa kasuko? Pangutan-a ang imong kaugalingon, ‘Kon depensahan nako ang akong ngalan, dili ba modaghan hinuon ang makahibalo sa mga gisulti nga bakak?’ Bisag makapasaka kag kaso, ang Bibliya naghatag niini nga tambag: ‘Ayaw pagdalidali sa pagpasaka ug kaso.’ Hinunoa, “husaya ninyo kini.” (Proverbio 25:8, 9; Maayong Balita Biblia)a Mas maayo kini nga solusyon kay dili ka makagasto sa pagpasakag kaso.

Ang Bibliya dili kay usa lang ka libro sa relihiyon. Kasaligan kini nga giya sa kinabuhi. Ang tanang mosunod sa maalamong tambag niini makabatog mga kinaiya nga makaanig pagtahod ug makahatag ug maayong ngalan.