Tinguhaa ang Diyosnong Kalinaw sa Pamilyahanong Kinabuhi
“Ipasidungog ngadto kang Jehova, Oh kamong mga pamilya sa katawhan, ipasidungog ngadto kang Jehova ang himaya ug kusog.”—SALMO 96:7.
1.Unsang matanga sa pagsugod ang gihatag ni Jehova sa pamilyahanong kinabuhi?
GISUGDAN ni Jehova ang pamilyahanong kinabuhi nga malinawon ug malipayon sa dihang iyang gikasal ang unang lalaki ug unang babaye. Sa pagkamatuod, si Adan malipayon kaayo nga iyang gipahayag ang iyang kalipay diha sa labing unang narekord nga balak: “Kini mao karon ang bukog sa akong bukog ug unod sa akong unod. Siya paganganlan nga Babaye, tungod kay gikan sa lalaki siya gikuha.”—Genesis 2:23.
2. Unsay anaa sa hunahuna sa Diyos alang sa kaminyoon dugang pa sa paghatag sa iyang tawhanong mga anak ug kalipay?
2 Sa dihang gisugdan sa Diyos ang kaminyoon ug kahikayan sa pamilya, labaw pa ang anaa sa iyang hunahuna kay sa paghatag lamang ug kalipay ngadto sa iyang tawhanong mga anak. Buot niya nga ilang tumanon ang iyang kabubut-on. Gisultihan sa Diyos ang unang pares: “Sumanay ug dumaghan kamo ug pun-a ninyo ang yuta ug magagahom kamo niini, ug magbuot sa mga isda sa dagat ug sa nananglupad nga mga linalang sa kalangitan ug sa tanang buhing linalang nga nagalihok sa ibabaw sa yuta.” (Genesis 1:28) Usa ka makatagbaw gayod nga buluhaton. Pagkamalipayon unta ni Adan, Eva, ug sa ilang umaabot nga mga anak kon masinugtanon pang gituman sa unang magtiayon ang kabubut-on ni Jehova!
3. Unsay gikinahanglan sa mga pamilya aron magkinabuhi uban sa diyosnong debosyon?
3 Apan, bisan gani karon ang mga pamilya labing malipayon kon sila nagakahiusang nagatuman sa kabubut-on sa Diyos. Ug pagkatahom sa mga palaaboton ang mabatonan sa maong mga pamilya! Si apostol Pablo nagsulat: “Ang diyosnong pagkamahinalaron mapuslanon sa tanang butang, kay nagahupot kini ug saad sa kinabuhi karon ug nianang sa umaabot.” (1 Timoteo 4:8) Ang mga pamilya nga nagkinabuhi nga may matuod nga diyosnong debosyon mosunod sa mga prinsipyo sa Pulong ni Jehova ug motuman sa iyang kabubut-on. Ilang tinguhaon ang diyosnong kalinaw ug busa makakaplag ug kalipay diha “sa kinabuhi karon.”
Pamilyahanong Kinabuhi Nameligro
4, 5. Nganong ikaingon nga ang pamilyahanong kinabuhi karon nameligro sa tibuok-kalibotan?
4 Sa pagkamatuod, dili kita makakaplag ug kalinaw ug kalipay diha sa matag pamilya. Nagkutlo sa pagtuon nga gihimo sa institusyon sa demograpiya nga gitawag ug Population Council, ang The New York Times nag-ingon: “Diha sa mga nasod nga adunahan ug kabos, ang pundasyon sa pamilyahanong kinabuhi nagaagom ug dagkong mga kausaban.” Usa ka awtor niini nga pagtuon gikutlo nga nag-ingon: “Ang ideya nga ang pamilya malig-on ug nagkahiusa nga pundok diin ang amahan nagsilbing tigtagana sa panalapi ug ang inahan nagsilbing tig-atiman sa emosyon dili tinuod. Ang tinuod mao nga ang kiling sama sa pagkapinaangkan, pagtaas sa gidaghanon sa diborsiyo, [ug] mas gagmayng mga panimalay . . . nagakahitabo sa tibuok-kalibotan.” Tungod sa maong kiling, minilyong pamilya kulang ug kalig-on, kalinaw, ug kalipay, ug daghan ang nagakabungkag. Sa Espanya ang gidaghanon sa diborsiyo misaka gikan sa 1 sa 8 ka kaminyoon sa pagsugod sa kataposang dekada sa ika-20ng siglo—usa ka dakong pagtaas gikan sa 1 sa 100 sa miaging 25 lamang ka tuig. Ang Inglaterra nagtaho nga nakabaton sa labing taas nga gidaghanon sa diborsiyo sa Uropa—4 gikan sa 10 ka kaminyoon nangadaot. Kanang nasora nakasinati usab ug pagsulbong sa gidaghanon sa usay-ginikanan nga mga pamilya.
5 Morag ang ubang mga tawo halos dili makahulat sa pagkuhag diborsiyo. Daghan ang nanagpanon ngadto sa “Altar nga Nagabadbad sa Higot” duol sa Tokyo, Hapon. Kining templo sa Shinto modawat ug mga hangyo sa diborsiyo ug alang sa pagbungkag sa ubang wala-tinguhaang mga relasyon. Ang matag magsisimba magsulat sa iyang hangyo diha sa nipis nga tablatabla, ibitay kini sa lawaklawak duol sa altar, ug mag-ampo nga tubagon. Usa ka mantalaan sa Tokyo nag-ingon nga sa dihang gitukod ang altar sa mga usa ka siglo kanhi, “ang mga asawa sa sapiang lokal nga mga negosyante magsulat ug mga pag-ampo nga naghangyo nga biyaan sa ilang mga bana ang ilang mga baye ug balikan sila.” Apan, karon, ang kadaghanan sa mga hangyo maoy sa diborsiyo, dili aron magkauli. Walay duhaduha, ang pamilyahanong kinabuhi nameligro sa tibuok kalibotan. Angay bang ikahibulong kini sa mga Kristohanon? Dili, tungod kay ang Bibliya naghatag kanato ug pagsabot sa presenteng krisis sa pamilya.
Nganong Anaa sa Krisis ang Pamilya?
6. Sa unsang paagi nalangkit ang 1 Juan 5:19 sa krisis karon sa pamilya?
6 Usa ka katarongan sa krisis sa pamilya karon mao kini: “Ang tibuok kalibotan nahimutang diha sa gahom sa tuman-kadaotang usa.” (1 Juan 5:19) Unsay atong madahom sa usa nga daotan, si Satanas nga Yawa? Siya maoy usa ka daotan, imoral nga bakakon. (Juan 8:44) Dili ikahibulong nga ang iyang kalibotan naglunang sa panglimbong ug imoralidad, nga makadaot kaayo sa pamilyahanong kinabuhi! Sa gawas sa organisasyon sa Diyos, ang satanasnong impluwensiya naghulga sa paglaglag sa institusyon ni Jehova sa kaminyoon ug sa pagwala sa malinawong pamilyahanong kinabuhi.
7. Sa unsang paagi ang mga pamilya naapektohan sa mga kinaiya nga gipakita sa kadaghanang tawo karon niining kataposang mga adlaw?
7 Laing katarongan sa mga suliran sa pamilya nga karon naghampak sa katawhan gipakita diha sa 2 Timoteo 3:1-5. Ang matagnaong mga pulong ni Pablo nga narekord didto nagpakita nga kita nagkinabuhi na “sa kataposang mga adlaw.” Ang mga pamilya dili magmalinawon ug malipayon kon ang mga sakop niini maoy “mga mahigugmaon sa kaugalingon, mahigugmaon sa salapi, mapasiatabon-sa-kaugalingon, mapahitas-on, mga tigpasipala, dili-masinugtanon sa mga ginikanan, dili-mapasalamaton, dili-maunongon, walay kinaiyanhong pagbati, dili ikasabot sa bisan unsa, mga tigbutangbutang, walay pagpugong-sa-kaugalingon, mabangis, walay gugma sa pagkamaayo, mga mabudhion, gahig-ulo, managburot sa garbo, mga mahigugmaon sa kalipayan inay nga mga mahigugmaon sa Diyos, managbaton ug dagway sa diyosnong pagkamahinalaron apan nagapanghimakak sa gahom niini.” Ang pamilya dili gayod bug-os nga magmalipayon bisan kon ang usa sa mga sakop niini walay kinaiyanhong pagbati o dili-maunongon. Unsaon sa pagkahimong malipayon ang pamilyahanong kinabuhi kon adunay usa sa panimalay nga mabangis ug dili ikasabot sa bisan unsa? Mas grabe pa, sa unsang paagi adunay kalinaw ug kalipay kon ang mga sakop sa pamilya maoy mga mahigugmaon sa kalipayan inay nga mga mahigugmaon sa Diyos? Mao kini ang mga kinaiya sa mga tawo niining kalibotana nga gimandoan ni Satanas. Dili ikahibulong nga maikyason ang kalipay sa pamilya niining kataposang mga adlaw!
8, 9. Unsay mahimong epekto sa panggawi sa kabataan diha sa kalipay sa pamilya?
8 Lain pang katarongan kon nganong walay kalinaw ug kalipay ang mga pamilya mao ang daotang panggawi sa kabataan. Sa dihang gitagna ni Pablo ang mga kahimtang sa kataposang mga adlaw, siya nagtagna nga daghang anak mahimong dili-masinugtanon sa mga ginikanan. Kon ikaw batan-on, ang imo bang paggawi nagtabang sa paghimo sa imong pamilya nga malinawon ug malipayon?
9 Ang ubang kabataan dili maayog panig-ingnan sa panggawi. Pananglitan, usa ka batang lalaki nagsulat sa iyang amahan niining way batasan nga sulat: “Kon dili ko nimo paubanon sa Alexandria dili ko mosulat nimo, ni makigsulti nimo, o manamilit kanimo, ug kon moadto ka sa Alexandria dili na ako mokapot sa imong kamot o motingog kanimo pag-usab. Mao kini ang mahitabo kon dili mo ako paubanon . . . Apan padad-i ako ug [alpa], intawon. Kay kon dili, dili ko mokaon ug dili ko moinom. Da lagi!” Bag-o pa ba kanang pamation? Aw, kanang sulata nga gikan sa usa ka batang lalaki ngadto sa iyang amahan gisulat sa karaang Ehipto kapin na sa 2,000 ka tuig kanhi.
10. Sa unsang paagi ang mga batan-on makatabang sa ilang mga pamilya sa pagtinguha sa diyosnong kalinaw?
10 Kanang tinamdan sa batang Ehiptohanon wala magpasiugdag kalinaw sa pamilya. Sa pagkamatuod, mas grabe pang mga butang ang nagakahitabo sulod sa mga pamilya niining kataposang mga adlaw. Bisan pa, kamong mga batan-on mahimong makatabang sa inyong pamilya sa pagtinguha sa diyosnong kalinaw. Sa unsang paagi? Pinaagi sa pagsugot niining tambag sa Bibliya: “Kamong mga anak, magmasinugtanon sa inyong mga ginikanan sa tanang butang, kay kini makapahimuot pag-ayo diha sa Ginoo.”—Colosas 3:20.
11. Sa unsang paagi ang mga ginikanan makatabang sa ilang mga anak nga mangahimong matinumanong mga alagad ni Jehova?
11 Komosta kamong mga ginikanan? Mahigugmaong tabangi ang inyong mga anak nga mangahimong matinumanong mga alagad ni Jehova. “Bansaya ang batang lalaki diha sa dalan nga iyang pagalaktan,” nag-ingon ang Proverbio 22:6. “Kay bisan kon siya matigulang na siya dili mobiya gikan niana.” Pinaagi sa maayong Kasulatanhong pagtudlo ug maayong panig-ingnan sa mga ginikanan, daghang batan-ong mga lalaki ug mga babaye dili mobiya gikan sa hustong dalan sa dihang magkagulanggulang na. Apan depende kinig dako sa kalidad ug sukod sa pagbansay sa Bibliya ug sa kasingkasing sa bata.
12. Nganong angayng magmalinawon ang Kristohanong panimalay?
12 Kon ang tanang sakop sa atong pamilya maningkamot sa pagtuman sa kabubut-on ni Jehova, angay nga ginatagamtam na nato ang diyosnong kalinaw. Ang usa ka Kristohanong panimalay angay mapuno sa ‘mga higala sa kalinaw.’ Ang Lucas 10:1-6 nagpakita nga mao kanang matanga sa mga tawo ang anaa sa hunahuna ni Jesus sa dihang iyang gipadala ang 70 ka tinun-an ingong mga ministro ug gisultihan sila: “Bisan diin kamo mosulod ug balay umingon una, ‘Hinaot kining balaya adunay kalinaw.’ Ug kon adunay higala sa kalinaw, ang inyong kalinaw mahiluna diha kaniya.” Samtang malinawong nagapamalaybalay ang mga alagad ni Jehova “sa maayong balita sa pakigdait,” ilang ginapangita ang mga higala sa kalinaw. (Buhat 10:34-36; Efeso 2:13-18) Sa pagkamatuod, ang Kristohanong panimalay nga gilangkoban sa mga higala sa kalinaw angay nga makigdaiton.
13, 14. (a) Unsay gipangandoy ni Noemi alang kang Ruth ug Orpa? (b) Unsang matanga sa malinawong puloy-anan ang angay alang sa Kristohanong panimalay?
13 Ang balay angay nga mahimong usa ka dapit sa kalinaw ug pahulay. Ang edarang biyuda nga si Noemi naglaom nga hatagan sa Diyos ang iyang batan-on, biyudang mga umagad nga babaye, si Ruth ug Orpa, ug pahulay ug paglipay nga moresulta sa pagkabaton ug maayong bana ug panimalay. Si Noemi nag-ingon: “Hinaot hatagan kamo ug gasa ni Jehova, ug kamo makakaplag ug pahulay ang tagsatagsa kaninyo sa balay sa iyang bana.” (Ruth 1:9) Mahitungod sa pangandoy ni Noemi, usa ka eskolar nagsulat nga sa ingon niana nga mga panimalay si Ruth ug Orpa “makakita ug kagawasan gikan sa kasamok ug kabalaka. Sila makakaplag ug pahulay. Mahimo kining usa ka dapit diin sila mahimong magpuyo, ug diin ang ilang labing malumong mga pagbati ug labing dungganong mga tinguha makakaplag ug katagbawan ug kalinaw. Ang talagsaong diwa diha sa Hebreohanon . . . maayo kaayong pagkapasundayag pinaagi sa kinaiyahan sa nalangkit nga mga ekspresyon sa [Isaias 32:17, 18].”
14 Palihog matikdi kining paghisgot sa Isaias 32:17, 18. Didto atong mabasa: “Ang buhat sa matuod nga pagkamatarong mahimo nga pakigdait; ug ang pag-alagad sa matuod nga pagkamatarong, kahilom ug kasegurohan sa walay kataposan. Ug ang akong katawhan magpuyo sa usa ka malinawong puloy-anan ug sa mga pinuy-anan nga puno sa pagsalig ug sa pahulayanan nga walay kasamok.” Ang usa ka Kristohanong panimalay angay nga usa ka pahulayanan sa pagkamatarong, kahilom, kasegurohan, ug diyosnong kalinaw. Apan komosta kon ang mga pagsulay, mga kabingkilan, o ubang mga problema motungha? Nan kita kinahanglan gayod nga mahibalo sa sekreto sa pamilyahanong kalipay.
Upat ka Hinungdanong mga Prinsipyo
15. Sa unsang paagi imong ikabatbat ang sekreto sa kalipay sa pamilya?
15 Ang matag pamilya sa yuta nakautang sa ngalan niini gikan kang Jehova nga Diyos, ang Maglalalang sa mga pamilya. (Efeso 3:14, 15) Busa kadtong nagtinguha ug kalipay sa pamilya kinahanglang mangita sa iyang paggiya ug dayegon siya, sama sa gihimo sa salmista: “Ipasidungog ngadto kang Jehova, Oh kamong mga pamilya sa katawhan, ipasidungog ngadto kang Jehova ang himaya ug kusog.” (Salmo 96:7) Ang sekreto sa kalipay sa pamilya makita diha sa mga panid sa Pulong sa Diyos, ang Bibliya, ug sa pagpadapat sa mga prinsipyo niini. Ang pamilya nga nagpadapat niining mga prinsipyoha magmalipayon ug magatagamtam sa diyosnong kalinaw. Busa tan-awon nato ang upat niining hinungdanong mga prinsipyo.
16. Unsay bahin sa pagpugong-sa-kaugalingon diha sa pamilyahanong kinabuhi?
16 Ang usa niining mga prinsipyoha nahasentro niini: Ang pagpugong-sa-kaugalingon hinungdanon sa diyosnong kalinaw sa pamilyahanong kinabuhi. Si Haring Solomon nag-ingon: “Ang tawo nga walay pagpugong sa iyang espiritu nahisama sa usa ka siyudad nga nalungkab, nga walay kuta.” (Proverbio 25:28) Ang pagpugong sa atong espiritu—pagpasundayag sa pagpugong-sa-kaugalingon—hinungdanon kon buot nato nga makabaton ug kalinaw ug malipayong pamilya. Bisag kita dili-hingpit, kita kinahanglang magpasundayag ug pagpugong-sa-kaugalingon, nga maoy usa ka bunga sa balaang espiritu sa Diyos. (Roma 7:21, 22; Galacia 5:22, 23) Ang espiritu mopatunghag pagpugong-sa-kaugalingon diha kanato kon kita mag-ampo alang niining hiyasa, ipadapat ang tambag sa Bibliya bahin niana, ug makig-uban sa uban nga nagapasundayag niana. Kining dalana motabang kanato sa ‘pagkalagiw gikan sa pakighilawas.’ (1 Corinto 6:18) Ang pagpugong-sa-kaugalingon motabang usab kanato sa pagsalikway sa kapintasan, paglikay o pagbuntog sa alkoholismo, ug atubangon nga mas malinawon ang malisod nga mga kahimtang.
17, 18. (a) Sa unsang paagi ang 1 Corinto 11:3 ikapadapat sa Kristohanong pamilyahanong kinabuhi? (b) Sa unsang paagi ang pag-ila sa pagkaulo magpalambo sa diyosnong kalinaw sa pamilya?
17 Ang laing hinungdanong prinsipyo mahimong ikaingon niining paagiha: Ang pag-ila sa pagkaulo motabang kanato sa pagtinguha sa diyosnong kalinaw diha sa atong mga pamilya. Si Pablo nagsulat: “Buot kong mahibalo kamo nga ang ulo sa matag lalaki mao ang Kristo; sa baylo ang ulo sa usa ka babaye mao ang lalaki; sa baylo ang ulo sa Kristo mao ang Diyos.” (1 Corinto 11:3) Kini nagkahulogan nga ang lalaki maoy manguna sa pamilya, nga ang iyang asawa maoy maunongon sa pagpaluyo, ug nga ang kabataan masinugtanon. (Efeso 5:22-25, 28-33; 6:1-4) Ang maong paggawi mopalambo sa diyosnong kalinaw sa kinabuhi sa pamilya.
18 Kinahanglang hinumdoman sa Kristohanong bana nga ang Kasulatanhong pagkaulo dili pagharihari. Angay niyang sundogon si Jesus, ang iyang Ulo. Bisag siya mao ang “ulo ibabaw sa tanang butang,” si Jesus “mianhi, dili aron alagaran, kondili sa pag-alagad.” (Efeso 1:22; Mateo 20:28) Sa samang paagi, ang Kristohanong lalaki magpasundayag sa pagkaulo sa mahigugmaong paagi nga magpaarang kaniya sa pag-atiman ug maayo alang sa mga kaayohan sa iyang pamilya. Ug siyempre ang Kristohanong asawa buot nga mokooperar sa iyang bana. Ingong iyang “katabang” ug “usa ka komplemento,” siya ang mopuno sa mga hiyas nga kulang ang iyang bana ug busa naghatag kaniya sa gikinahanglang pagpaluyo. (Genesis 2:20; Proverbio 31:10-31) Ang hustong pagpasundayag sa pagkaulo motabang sa mga bana ug mga asawa sa pagtagad sa usag usa nga may pagtahod ug magpalihok sa kabataan nga magmasinugtanon. Oo, ang pag-ila sa pagkaulo nagapalambo sa diyosnong kalinaw sa pamilyahanong kinabuhi.
19. Nganong ang maayong komunikasyon hinungdanon alang sa kalinaw ug kalipay sa pamilya?
19 Ang ikatulong hinungdanong prinsipyo mahimong ikapadapat niining mga pulonga: Ang maayong komunikasyon hinungdanon sa kalinaw ug kalipay sa pamilya. Ang Santiago 1:19 nag-ingon kanato: “Ang matag usa kinahanglan nga magmaabtik sa pagpaminaw, magmahinay sa pagsulti, magmahinay sa kapungot.” Ang mga sakop sa pamilya kinahanglang maminaw ug makigsulti sa usag usa tungod kay ang komunikasyon sa pamilya nagkahulogang pagsulti ug pagpamati sa usag usa. Apan, bisan pa kon ang atong isulti tinuod, lagmit mohatag kinig kadaot kon kini isulti sa mapintas, mapahitas-on, o dili-mabinationg paagi. Ang atong sinultihan kinahanglang maayo, “tinimplahan ug asin.” (Colosas 4:6) Ang mga pamilya nga nagasunod sa mga prinsipyo sa Kasulatan ug maayong makigkomunikar nagatinguha sa diyosnong kalinaw.
20. Nganong imong ikaingon nga ang gugma hinungdanon sa kalinaw sa pamilya?
20 Ang ikaupat nga prinsipyo mao kini: Ang gugma hinungdanon sa kalinaw ug kalipay sa pamilya. Ang romantikong gugma adunay hinungdanong bahin diha sa kaminyoon, ug ang lalom nga pagbati mougmad taliwala sa mga sakop sa pamilya. Apan, labawng hinungdanon mao ang gugma nga maoy gipasabot sa Gregong pulong nga agaʹpe. Kini mao ang gugma nga atong ginaugmad alang kang Jehova, kang Jesus, ug sa atong silingan. (Mateo 22:37-39) Gipakita sa Diyos kining gugmaha alang sa katawhan pinaagi sa paghatag sa “iyang bugtong-gianak nga Anak, aron nga ang tanan nga magapasundayag ug pagtuo kaniya dili malaglag kondili makabaton ug kinabuhing walay-kataposan.” (Juan 3:16) Pagkakatingalahan nga kita makapasundayag sa samang matang sa gugma alang sa atong mga sakop sa pamilya! Kining natuboyng gugma maoy “usa ka hingpit nga bugkos sa panaghiusa.” (Colosas 3:14) Kini nagbugkos sa magtiayon diha sa panaghiusa ug nagapalihok kanila sa pagbuhat sa labing maayo alang sa usag usa ug alang sa ilang mga anak. Kon may motunghang mga problema, ang gugma motabang kanila sa pag-atiman sa mga butang diha sa panaghiusa. Makatino kita niini tungod kay ang “gugma . . . dili magapangita sa kaugalingon niining kaayohan . . . Ginaantos niini ang tanang butang, nagatuo sa tanang butang, nagalaom sa tanang butang, nagaagwanta sa tanang butang. Ang gugma dili gayod mapakyas.” (1 Corinto 13:4-8) Pagkamalipayon gayod sa mga pamilya diin ang gugma alang sa usag usa ginapalig-on pinaagi sa gugma alang kang Jehova!
Padayong Tinguhaa ang Diyosnong Kalinaw
21. Unsa malagmit ang makapalambo sa kalinaw ug kalipay sa imong pamilya?
21 Ang nag-unang mga prinsipyo ug ang uban nga gikuha gikan sa Bibliya gilaraw diha sa mga publikasyon nga malulotong gitagana ni Jehova pinaagi sa “kasaligan ug mabuot nga ulipon.” (Mateo 24:45) Pananglitan, ang maong impormasyon makita diha sa 192-panid nga librong Ang Sekreto sa Pamilyahanong Kalipay, nga giluwat diha sa “Mensahero sa Diyosnong Kalinaw” Distritong mga Kombensiyon sa mga Saksi ni Jehova nga gihimo sa tibuok kalibotan sa 1996/97. Ang personal ug pamilya nga pagtuon sa Kasulatan uban sa tabang sa maong publikasyon moresulta ug daghang kaayohan. (Isaias 48:17, 18) Oo, ang pagpadapat sa tambag sa Kasulatan malagmit mopalambo sa kalinaw ug kalipay sa imong pamilya.
22. Diha sa unsa isentro nato ang atong pamilyahanong kinabuhi?
22 Si Jehova adunay katingalahang mga butang nga gitagana alang sa mga pamilya nga nagatuman sa iyang kabubut-on, ug siya takos sa atong pagdayeg ug pag-alagad. (Pinadayag 21:1-4) Hinaot nga isentro sa imong pamilya ang kinabuhi niini sa pagsimba sa matuod nga Diyos. Ug hinaot ang atong mahigugmaong langitnong Amahan, si Jehova, magapanalangin kanimo ug kalipay samtang ginatinguha mo ang diyosnong kalinaw sa imong pamilyahanong kinabuhi!
Unsay Imong Tubag?
◻ Unsay gikinahanglan aron magkinabuhi ang mga pamilya nga may diyosnong debosyon?
◻ Nganong anaa sa krisis karon ang pamilya?
◻ Unsay sekreto sa pamilyahanong kinabuhi?
◻ Unsa ang pipila ka prinsipyo nga makatabang kanato sa pagpalambo sa kalinaw ug kalipay sa pamilyahanong kinabuhi?
[Kapsiyon sa panid 24]
Ang maayong komunikasyon motabang kanato sa pagtinguha sa diyosnong kalinaw sa pamilyahanong kinabuhi