Unsay Panglantaw sa Diyos Bahin sa Alkoholikong Ilimnon?

ANG atong Maglalalang, kinsa interesado sa atong kaayohan, wala magdili sa kasarangang pag-inom ug alkoholikong ilimnon.a Gani, iyang gihatagan ang tawo ug “bino aron siya magmalipayon, lana sa olibo aron siya magmangayaon, ug tinapay aron siya makabatog kusog.” (Salmo 104:15, Today’s English Version) Sa usa ka higayon, si Jesus nakatampo sa kasadya sa usa ka kasal pinaagi sa paghimo sa tubig nga “labing maayong bino.”—Juan 2:3-10, New Jerusalem Bible.

Ang Maglalalang nahibalo gayod kon sa unsang paagi ang alkoholikong ilimnon makaapektar sa pag-obra sa lawas ug sa utok. Pinaagi sa Bibliya, ang atong langitnong Amahan ‘nagtudlo kanato aron kita makabaton ug kaayohan,’ ug siya hugot nga nagpasidaan kanato nga dili abusohan ang isog nga mga ilimnon. (Isaias 48:17) Tagda kining pintok nga mga pasidaan:

“Ayaw kamo pagkahubog sa bino, nga niini adunay unodnong pagpatuyang.” (Efeso 5:18) “Ang mga palahubog . . . dili gayod makapanunod sa gingharian sa Diyos.” (1 Corinto 6:9-11, Jerusalem Bible) Gihukman sa Pulong sa Diyos ang ‘paghuboghubog, hudyaka-bahakhak, ug ang mga butang nga maingon-ingon niini.’—Galacia 5:19-21, Ang Biblia.

Hisgotan nato ang pipila ka kadaot nga ipahinabo sa sobrang pag-inom ug alkoholikong ilimnon.

Mga Kadaot nga Ipahinabo sa Sobrang Pag-inom

Bisan tuod makahatag ug pipila ka kaayohan ang alkoholikong ilimnon, kini adunay isog nga mga sangkap nga makaapektar sa pag-obra sa hunahuna ug sa lawas. Ang sobrang pag-inom moresulta sa bisan hain sa mosunod nga mga problema:

Ang sobrang pag-inom makaapektar sa paminsar sa usa, mao nga siya ‘dili na makahunahunag maayo.’ (Proverbio 23:33, TEV) Si Allen, ang palainom nga gihisgotan sa nag-unang artikulo, miingon: “Ang pagkapalainom dili lamang usa ka sakit sa lawas; kini usa ka sakit sa hunahuna ug tinamdan. Dili nimo mahunahuna ang kasakit nga ipahinabo niini ngadto sa ubang tawo.”

Ang sobrang pag-inom makawala sa pagpugong-sa-kaugalingon. Ang Bibliya nagpasidaan: “Ang bino ug ang tam-is nga bino mao ang magakuha sa maayong motibo.” (Oseas 4:11) Sa unsang paagi? Sa dihang sobra na ang mainom, ang panghunahuna ug mga tinguha nga sagad atong gilikayan daw dalawaton na—o madanihon pa gani. Mohuyang ang atong determinasyon sa pagbuhat kon unsay husto. Ang alkoholikong ilimnon makawala sa atong mga prinsipyo, nga makadaot sa atong relasyon sa Diyos.

Pananglitan, naglalis si John ug ang iyang asawa mao nga siya miadto sa usa ka bar. Siya miinom ug pipila ka tagay aron mokalma ug dayon siya giduol sa usa ka babaye. Human makainom ug pipila pa ka tagay, siya mikuyog sa babaye ug nakapanapaw. Human niadto, si John nagbasol pag-ayo kay siya nakabuhat ug usa ka butang nga dili gayod unta mosantop sa iyang hunahuna kon wala pa siya makainom, nga nakapawala sa iyang pagpugong-sa-kaugalingon.

Ang sobrang pag-inom magpahinabo nga ang usa mawad-ag pagpugong sa iyang sinultihan ug mga buhat. “Kinsa ang kanunayng may kasamok? Kinsa ang may panaglalis ug panag-away?” nangutana ang Bibliya. “Kadtong dugay matulog, kay gustong moinom ug usa pa.” (Proverbio 23:29, 30, Contemporary English Version) Tungod sa sobrang pag-inom, ikaw “mobati nga daw atua ka sa tunga sa dagat, nalipong, ug gitabyog-tabyog diha sa mga pisi sa palo sa sakayang nagtuya-tuya.” (Proverbio 23:34, TEV) Ang tawong sobrang nakainom makamata nga “punog mga samad, nga dili makahinumdom kon sa unsang paagi kini nahitabo.”—Proverbio 23:35, CEV.

Ang sobrang pag-inom makadaot sa lawas. “Ngadtongadto ang [alkoholikong ilimnon] mamaak samag usa ka bitin ug mobugag hilo sama sa usa ka halas.” (Proverbio 23:32, New International Version) Napamatud-an sa natad sa medisina nga husto ang maong karaang panultihon. Kon masobrahan, ang alkoholikong ilimnon mahimong hilo nga magpahinabog kanser, hepatitis, cirrhosis sa atay, pancreatitis, ubos nga blood sugar sa mga diabeteson, fetal alcohol syndrome (pagkadaot sa bata nga gisabak), estrok, o sakit sa kasingkasing—sa paghisgot lang ug pipila. Ug bisan ang kas-a lang nga pag-abuso sa alkoholikong ilimnon moresultag pagka-coma o kamatayon. Apan ang labing dakong kadaot nga ipahinabo niini wala hisgoti diha sa mga teksbok sa medisina.

Ang labing dakong kadaot. Bisan kon ang usa dili mahubog, ang sobrang pag-inom makadaot sa iyang relasyon sa Diyos. Ang Bibliya nag-ingon: “Alaot kadtong mobangon ug sayo sa buntag aron mangita lamang sila ug makahubog nga ilimnon, nga magpabilin hangtod sa lawom nga kagabhion mao nga ang bino magapainit kanila!” Ngano? Gisaysay ni Isaias ang espirituwal nga kadaot nga ipahinabo sa sobrang pag-inom: “Ang kalihokan ni Jehova wala nila tan-awa, ug ang mga buhat sa iyang mga kamot wala nila makita.”—Isaias 5:11, 12.

Ang Pulong sa Diyos nagtambag kanato nga dili ‘makig-uban sa mga labihan ka hinginom ug bino.’ (Proverbio 23:20) Ang tigulang nga mga babaye gipasidan-an nga dili ‘magpaulipon sa daghang bino.’ (Tito 2:3) Ngano man? Sa inanay—nga sagad dili mamatikdan—mag-anam ka daghan ang imnon sa usa ka tawo ug magkasagunson na kini. Ngadtongadto, ang hinginom tingali “mangutana samtang naghigda pa, ‘Kanus-a pa man mobuntag, aron makainom na pod ko?’” (Proverbio 23:35, CEV) Delikado na ang kahimtang kon ang usa ka hinginom mangandoy pang moinom pagkabuntag aron lang mahuwasan sa sobrang pagkahubog sa miaging gabii.

Ang Bibliya nagpasidaan nga kadtong ‘magpatuyang sa bino, hudyaka, palabwanay sa inom manubag ra unya ngadto sa usa nga andam sa paghukom sa mga buhi ug sa mga patay.’ (1 Pedro 4:3, 5) Ug maylabot sa malisod nga panahon nga atong gikinabuhian, si Jesus nagpasidaan: “Bantayi ang inyong kaugalingon nga ang inyong mga kasingkasing dili mabug-atan sa pagpalabig kaon ug sa pagpalabig inom ug sa mga kabalaka sa kinabuhi, ug sa kalit [ang adlaw ni Jehova] dihadiha modangat kaninyo ingon nga usa ka lit-ag.”—Lucas 21:34, 35.

Nan, sa unsang paagi ang mga palainom makalikay nga ‘mabug-atan sa pagpalabig inom’?

[Footnote]

[Mga hulagway sa panid 4, 5]

Ang sobrang pag-inom magpahinabog daghang problema