Ang Hagit sa Pagsunod sa Iyang mga Lakang
“Kay si Kristo nag-antos alang kaninyo ug nagbilin kaninyog sulundan, aron kamo makasunod sa iyang mga lakang.”—1 PEDRO 2:21, Phillips.
1, 2. (a) Unsay mahimong usa ka dakong hagit, ug nganong makaikag kini sa mga Kristohanon? (b) Unsang mga pangutana ang gibangon dinhi?
NAKALAKAW ba ka sukad ubay sa balasong baybayon o agi sa kapatagang may niyebe ug nalingaw sa disenyo sa mga tunob nga nabilin sa nakauna nimo sa paglakaw didto? Dili ba nga tingali nagpili kag pila ka tunob ug nagsulay sa pagsunod niana, nga gipareho nimo ang imong mga lakang niana kanila sa eksakto kutob sa mahimo? Kon mao, nadiskobrehan nimong dili kana sayon. Ngani, ang pagsunod gayod sa mga lakang sa lain—sa literal o masambingayon—maoy usa ka dakong hagit. Ug ngani, sa pagtawag sa atong kaugalingon nga mga Kristohanon, atong gipaila ang atong tinguha nga buhaton gayod kana, ang pagsunod sa mga lakang ni Kristo.
2 Andam ka bang mohimo sa panlimbasog nga gikinahanglan sa pag-atubang nga malamposon niining hagita? Labaw pa niana, determinado ka bang mohimo niana, bisan pag unsay mahitabo? Kon mao, ang bug-os nga pagsabot sa mga kalisdanan sa pagsunod sa literal nga mga lakang mohimo kanimong mas malamposon sa pagsunod sa masambingayong mga lakang ni Kristo.
Pagtuon sa Pagpahiuyon
3. Nganong ang pagsunod sa mga lakang sa usa daw dili kinaiyanhon sa sinugdan?
3 Ang tanan dunay linaing paagi sa linaktan. Ang gitas-on sa tikang, pananglitan, nagkalainlain gikan sa tawo ngadto sa tawo, maingon man ang anggulo sa pagpahimutang sa usa ka tawo sa iyang mga tiil. Ang iyang mga tudlo sa tiil tingali mapunting nga deretso sa unahan, o tingali patakilid pasulod o pagawas nga anggulo, usa ka anggulo nga tingali mas ilado sa usa ka tiil kay sa lain. Nailhan ba nimo ang hagit? Sa pagsunod gayod sa mga lakang sa lain, kinahanglang ipahiuyon nimo ang imong gitas-on sa tikang ug posisyon sa tiil sa iyaha. Sa sinugdan kini tingali daw dili kinaiyanhon, apan kinahanglang buhaton kini. Walay laing paagi.
4. Nganong ang pagsunod sa mga lakang ni Jesus usa ka linaing hagit?
4 Ang paagi sa paglakaw ni Kristo, sa masambingayong pagkasulti, maoy linain, kay taliwala sa iyang mga katalirongan, siya lamang ang tawong hingpit, “usa nga wala makaila sa sala.” (2 Corinto 5:21) Sanglit ang mga tawo sa kinaiyanhon maoy dili-hingpit nga mga makasasala, ang pagsubay sa mga lakan ni Jesus dili mao ang normal nilang paagi sa paglakaw. Si Pablo nagpahinumdom sa mga Kristohanon sa Corinto bahin niini, nga nag-ingon: “Kay kamo mga unodnon pa. Kay samtang adunay kasina ug panag-away sa inyong taliwala, dili ba kamo mga unodnon ug wala ba kamo magagawi sama sa mga tawo?” Ang mga kiling padulong sa kasina ug panag-away, “mga buhat sa unod,” maoy normal alang sa mga tawong dili hingpit, apan si Jesus nagsubay sa dalan sa gugma, ug “ang gugma dili sinahan, . . . dili mahagit sa kasuko.” Busa ang pagsunod sa mga lakang ni Kristo maoy usa ka hagit nga dako pa kay sa dihang hangyoon lamang kita pagsunod sa mga lakang sa tawong dili hingpit.—1 Corinto 3:3; 13:4, 5; Galacia 5:19, 20; tan-awa usab ang Efeso 5:2, 8.
5, 6. (a) Nganong daghang tawo napakyas sa pagsunod sa mga lakang ni Kristo, nga mitultol kang Pablo sa paghatag sa unsang tambag? (b) Sa unsang paagi ang mga tawo ginadasig sa pagsubay sa mga lakang ni Kristo karong adlawa, uban ang unsang sangpotanan alang kanila?
5 Gawas sa pagkadili-hingpit, ang kawalay-kabangkaagan sa kabubut-on sa Diyos makapugong usab sa usa ka tawo sa pagsunod sa mga lakang ni Kristo. Sa ingon si Pablo nagtambag sa mga Kristohanon sa Efeso nga dili “magapadayon sa paglakaw sumala sa paglakaw sa kanasoran usab diha sa pagkawalay-kapuslanan sa ilang mga hunahuna, samtang sila anaa sa kangitngitan sa panghunahuna, ug nahibulag sa kinabuhi nga iya sa Diyos, tungod sa kawalay-kabangkaagan nga anaa kanila, tungod sa pagkadili-mobati sa ilang mga kasingkasing.”—Efeso 4:17, 18.
6 Pinaagi sa buluhatong pagwali sa Gingharian, ang mga tawo karong adlawa giawhag sa pghunong sa paglakaw diha sa normal nilang paagi, diha sa kawalay-kabangkaagan sa mga katuyoan sa Diyos, sa kangitngitan sa panghunahuna, nga gitukmod sa mga kasingkasing nga dili mobati nga nagapangitag walay-kapuslanang mga tumong. Sila ginadasig sa pagpahiuyon ngadto sa hingpit nga sulundan ni Kristo, “nga nagalakaw nga nahiusa kaniya,” sa ingon “nagadala sa tanang hunahuna sa pagkabinihag aron magmasinugtanon kini kang Kristo.” (Colosas 2:6, 7; 2 Corinto 10:5) Ang mga tawong andam moatubang niining hagita gilig-on sa ilang pagtuo. Samtang sila maanad sa pagsunod sa paagi sa paglakaw ni Kristo, kini sa inanay mahimong mas sayon alang kanila.
7. Unsang pasalig ang atong nabatonan nga, bisan pag subsob kini usa ka hagit, posible ang pagsunod sa mga lakang ni Jesus?
7 Hinuon, kasagaran kini usa ka hagit. Ang kalainan tali sa hingpit nga linalang ug sa dili hingpit maoy dako. Busa ang dili-hingpit nga mga linalang kinahanglang mohimog dagkong kausaban aron sa pagsulay sa pagsunod sa hingpit nga panig-ingnan. Ang pila ka tawo, tungod tingali sa panulondon o silinganan, mas lisdan sa pagpahiuyon ngadto sa Kristohanong dalan sa kinabuhi kay sa uban. Apan si Jehova nagapasalig kanato nga si bisan kinsa nga andam gayod manlimbasog makahimo niana. “Alang sa tanang butang ako may kusog tungod kaniya nga nagahatag kanakog gahom,” matud ni apostol Pablo. (Filip. 4:13; tan-awa usab ang 2 Corinto 4:7; 12:9.) Kana matuod usab sa tanang Kristohanon.
Hatagig Pagtagad
8, 9. (a) Nganong ang wala-mabahing pagtagad ug bug-os nga pagtagad gikinahanglan sa dihang magasunod sa mga lakang sa lain? (b) Ang pagsunod sa unsang Biblikanhong tambag mopugong kanato nga mahisalaag gikan sa mga lakang ni Jesus?
8 Dili kita makasunod sa literal nga mga lakang kon dili nato hatagag dakong pagtagad ang dapit nga atong ginatumban. Kon maglirawliraw ang atong mga mata—nga itutok sa mga butang nagakahitabo alirong kanato o sa ubang butang—lagmit kita masayop sa pagtikang sa madugay o sa madali. Gawas kon mohatag kitag wala-mabahig pagtagad, kita mahitipas gikan sa mga lakang nga angay natong sundon. Busa, kinahanglan ang makanunayong pagbantay, ilabina sa dihang ang kalit nga mga kalangas o ubang wala-dahomang mga kabaldahan basin magwahing sa atong hunahuna gikan sa buluhatong anaa.—Itandi ang Job 18:10, 11.
9 Sa masambingayong paagi, kini matuod usab niadtong nagasunod sa mga lakang ni Jesus. Gipasidan-an ni Jesus ang iyang mga sumusunod sa pagtagad pag-ayo sa ilang kaugalingon, basin hinuon ang ilang mga kasingkasing “mabug-atan sa hinobrang pagkaon ug sa kusog nga pag-inom ug sa mga kabalaka sa kinabuhi.” (Lucas 21:34) Gigamit ni Satanas kining matag-adlawng mga kabaldahan aron ang atong mga mata mawahing gikan sa mga lakang ni Jesus. Siya daling makasakop kanatong wala makabantay pinaagi sa pagpahimuolos sa wala-dahomang mga kahimtang, sama sa pagsupak, sakit, o kalisod sa salapi. Sa pagtino “nga kita dili gayod maanod,” kinahanglang atong “hatagan ug labaw sa kasagarang pagatagad ang mga butang nadungog,” sa laing mga pulong, itutok sa labaw pa ang atong mga mata sa mga lakang ni Kristo kay sukad masukad.—Hebreohanon 2:1; tan-awa usab ang 1 Juan 2:15-17.
Ayaw Pagtipas
10. (a) Unsang kapeligrohan ang nagalungtad kon ang lainlaing mga hugpong sa mga tunob magakurus? (b) Sa espirituwal nga diwa, nganong seryoso ang sangpotanan sa pagsunod sa sayop nga mga tunob?
10 Sa usa ka baybayon nga daghag tawo, basin dunay daghang hugpong sa mga tunob sa basang balas, ug ang pila ka agi sa tunob tingali mokurus sa atong ginasubay. Daghang mga pundok sa tunob tingali, labing menos sa pangibabaw, ang saag hitsura. Pagkabililhon nga atong tinoong nagasunod kita sa hustong mga tunob! Kay kon dili basin kita mahisalaag ngadto sa pagsubay sa sayop nga direksiyon. Sa espirituwal nga diwa, kini mahimong may seryosong mga sangpotanan. Ang kapeligrohan sa pagsunod sa mga lakang nga tingali hustong tan-awon apan sa pagkamatuod dili gipakita sa sanglitanan nga nagpasidaan: “Adunay usa ka dalan nga daw matul-id alang sa usa ka tawo apan ang kataposan niana mao ang mga dalan sa kamatayon.”—Proverbio 16:25.
11. Unsang pasidaan ang gihatag ni Pablo sa unang mga Kristohanon, nga naghatag ug sulundan alang kang kinsa karong adlawa?
11 Tungod niining tinuod gayong kapeligrohan, gibati ni Pablo nga napugos sa pagpasidaan sa iyang mga igsoon sa sayong Kristohanong kongregasyon: “Nahibulong ako nga kamo kalit kaayong mitalikod gikan sa Usa nga nagtawag kaninyo sa dili-takos nga kalulot ni Kristo ug nangadto sa laing matang sa maayong balita. . . . Adunay nagapagubot kaninyo ug buot magatuis sa maayong balita mahitungod kang Kristo. . . . Si bisan kinsa ang nagapahayag kaninyo ingong maayong balita nga lapas sa inyo nang gidawat, ipatunglo siya.” (Galacia 1:6-9) Nahiuyon sa panig-ingnan ni Pablo, ang Nagamandong Lawas sa mga Saksi ni Jehova karong adlawa nagapasidaan kanato sa mga apostata ug sa mini mga mga igsoon nga nagapahimutang, ingnon ta, sa mini nga mga tunob. Ang matuod nga mga Kristohanon dili buot motipas gikan sa dalan nga gibutang ni Kristo sa ilang atubangan nga tinultolan sa Diyos.—Salmo 44:18.
12. (a) Sa unsang paagi ang 2 Timoteo 1:13 makatabang kanato sa paglikay nga mahisalaag ngadto sa pagsunod sa mini nga mga lakang? (b) Unsay nagatimaan sa ubang matang sa maayong balita?
12 Pinaagi sa pagtagad pag-ayo sa mga ilhanan sa mga tunob ni Kristo, kita makalikay nga mahisalaag. Ang tukmang kahibalo bahin kang Jesus, sa iyang mga pagtulon-an, ug sa paglihok sa Kristohanong kongregasyon motabang nato sa pag-ila sa “sumbanan sa makapahimsog nga mga pulong” nga manalipod kanato batok niadtong “nagatuis sa maayong balita bahin kang Kristo.” (2 Timoteo 1:13) Ang ubang matang sa giingong maayong balita—sa pagkamatuod, mini nga mga tunob—dili mohaom nianang sumbanan sa pagtuo. Sila magtuis niana, nga ang hulagway maghiwi. Inay ipatin-aw ang paninugdang mga kamatuoran ug mga prinsipyo sa Bibliya, sila mosupak niana. Inay dasigon kita sa dugang buluhaton sa pag-alagad kang Jehova, sila mangatarongan pabor sa paghinayhinay. Ang ilang mensahe dili positibo ug dili maghimaya sa ngalan ug organisasyon ni Jehova; kini negatibo, mangitag sayop ug hinawayon. Labing tino, kana sila dili mao ang mga lakang nga buot natong sundon.
Hupti ang Tukmang Paso
13. Sa unsang paagi ang paso nalangkit kon kita nagasunod sa mga lakang sa lain?
13 Kon kita magalakaw, ang gitas-on sa atong tikang pagahukman sa bahin sa katulinon sa atong paglakaw. Sa malangkobon, kon mas kusog ang atong paglakaw, mas tag-as ang atong tikang; kon mas hinay ang atong paglakaw, mas mubo. Busa, mas sayon nga atong masunod ang literal nga mga lakang sa usa kon atong ipasibo ang atong paso nga mahiuyon sa iya. Sa samang paagi, aron makalakaw nga malamposon sa masambingayong mga lakang sa atong Pangulo, si Jesu-Kristo, atong sundon ang iyang paso.
14. (a) Sa unsang mga paagi kita mahimong dili makanunot sa paso ni Jesus? (b) Nganong binuang ang pagsulay sa paglakaw nga mas kusog kay sa “matinumanon ug maalamong ulipon”?
14 Ang dili pagnunot sa paso ni Kristo mahimong magpasabot sa usa sa duha ka butang. Mahimo kita nagasulay sa paglakaw nga mas kusog, nga nagauna sa “matinumanon ug maalamong ulipon” nga gigamit ni Jesus sa pagtuman sa katuyoan ni Jehova, o kita nagapaulahi sa pagsunod sa pagtultol sa maong ‘ulipon’. (Mateo 24:45-47) Ingong panig-ingnan sa nahauna, sa nangaging panahon ang pila ka Kristohanon wala makapailob bahin sa doktrinal o organisasyonal nga mga kausaban o mga kauswagan nga ilang gibating kinahanglanon ug nalangan na. Kay nagmulo tungod kay mibating ang mga butang wala maglihok sa madali, sila mibulag sa katawhan ni Jehova. Pagkabinuang ug pagkamubo sa panglantaw. Masubsob nga ang butang mismo nga nakapalagot kanila giusab sa ulahi—sa nahaigong panahon ni Jehova.—Proverbio 19:2; Ecclesiastes 7:8, 9.
15. Sa unsang paagi si Haring David ug si Jesus maayong mga panig-ingnan sa paghupot sa tukmang paso?
15 Ang dalang maalamon mao ang paghulat nga molihok si Jehova inay mosulay sa pagdiktar sa paso nga angay mahitabo ang mga butang. Ang karaang Haring David naghatag sa tukmang panig-ingnan. Midumili siya sa paglaraw ug daotan batok kang haring Saul sa tinguhang makaangkon sa pagkahari una pa kadto nahaigong panahon ni Jehova sa paghatag niana kaniya. (1 Samuel 24:1-15) Sa susama, “ang Anak ni David,” si Jesus, nakaamgo nga kinahanglang maghulat siya aron bug-os makasulod sa iyang langitnong pagkahari. Nasayod siya sa matagnaong pamulong nga napadapat kaniya: “Lumingkod ka sa akong tuong kamot hangtod ibutang ko ang imong mga kaaway nga tumbanan sa imong mga tiil.” Busa dihang ang usa ka grupo sa mga Hudiyo buot “mosakmit kaniya sa paghimo kaniyang hari,” si Jesus daling mipahilayo. (Mateo 21:9; Salmo 110:1; Juan 6:15) Mga 30 ka tuig sa ulahi, sumala sa Hebreohanon 10:12, 13, si Jesus nagpaabot pa sa iyang pagkahari. Ngani, siya nagpaabot ug halos 19 ka siglo una palingkora ingong may-katungod nga Hari sa Gingharian sa Diyos sa pagkatukod niana sa 1914.
16. (a) Iilustrar sa unsang paagi kita makalakaw nga mas hinay kay sa angay natong himoon. (b) Unsa ang katuyoan sa pailob ni Jehova, ug sa unsang paagi angay kitang molikay sa pag-abusar sa maong pailob?
16 Hinuon, ang pagkapakyas sa paghupot sa tukmang paso mahimong magpasabot usab sa paghinay, pagkaulahi. Busa, dihang ang Pulong sa Diyos nagapaila nga ang kausaban kinahanglang himoon sa atong mga kinabuhi, nagalihok ba kita sa walay langan? O mangatarongan ba kita nga sanglit ang Diyos mapailobon, kita makapaoktaba sa paghimo nianang mga kausabana, nga nagalaom nga tingalig kana mas sayon na unya? Matuod, si Jehova mapailobon. Apan dili aron nga kita makahinayhinay sa paghimo sa gikinahanglang mga kausaban. Hinunoa, “siya mapailobon kaninyo tungod kay dili niya buot nga may malaglag kondili buot nga ang tanan mahidangat sa paghinulsol.” (2 Pedro 3:9, 15) Nan, labi pang maayo ang pagsundog sa salmista nga miingon: “Ako nagadali, ug ako wala maglangan sa pagbantay sa imong mga sugo.”—Salmo 119:60.
17. Unsay labot sa paghupot sa tukmang paso uban sa pagwali sa Gingharian, nga motultol kanato sa pagsukna sa unsang pangutana sa atong kaugalingon?
17 Ang pagpaulahi mahimong may kalabotan usab sa pagwali sa Gingharian. Sumala sa Mateo 25, si Jesus sa pagkakaron nagahukom sa katawhan, nga nagabahinbahin sa “mga karnero” gikan sa “mga kanding.” Sa kinadak-ang bahin kini ginahimo pinaagi sa pagwali “niining maayong balita sa gingharian.” (Mateo 24:14; 25:31-33; Pinadayag 14:6, 7) Ang panahong gitugot sa paghimo niining buluhaton sa pagbahinbahin maoy limitado. (Matthew 24:34) Samtang nagakahinapos ang panahong gitugot, makadahom kitang padalion ni Jesus ang buluhaton. Sa pagbuhat niana, siya nagasilbing usa ka instrumento sa Diyos, kinsa, sa paghisgot sa buluhaton sa pagtigom, nagasaad: “Ako mismo, si Jehova, magapadali niini sa iyang panahon.” (Isaias 60:22) Ingong mga kaubang magbubuhat sa Diyos, sa pagsunod pag-ayo sa mga lakang sa iyang Anak, kita ba nagapadali sa atong paso sa pagwali sa Gingharian sa gidak-ong gitugot sa atong pisikal nga kahimtang ug Kasulatanhong mga responsabilidad? Ang mga taho sa pagsangyaw sa kanataran nagapailang milyonmilyon sa mga Saksi ni Jehova nagabuhat niana!
Likayi ang Sobrang Pagsalig, Buntoga ang Pagkaluya
18. Nganong ang usa ka tawo mahimong sobra ka masaligon, ug sa unsang paagi ang Bibliya nagapasidaan niining kapeligrohana?
18 Kon mas taas ang atong paglahutay sa pagsunod sa mga lakang sa usa ka tawo, mas maanad na kita sa iyang paagi sa paglakaw. Kon, ugaling, kita mahimong dili matinagdanon, sa madugay o sa madali kita masayop sa pagtikang. Busa, kon magasunod sa masambingayong mga lakang ni Jesus, kinahanglang atong ilhon ang kapeligrohan sa pagkahimong sobra ka masaligon, nga sa dinanghag magsalig sa atong kaugalingong kusog ug mga katakos, kay mobating ato nang nahanas ang iyang hingpit nga paagi sa paglakaw. Ang kasinatian ni Pedro nga nahitala sa Lucas 22:54-62 nagapasiugda usab sa kamatuoran sa 1 Corinto 10:12, nga nagaingon: “Siya nga nagahunahuna nga nagabarog magbantay nga siya dili mapukan.”
19. (a) Unsay mahitabo sa matag Kristohanon matag karon ug unya? (Santiago 3:2) (b) Unsay angay natong pag-isip sa mga pulong ni Pablo sa Roma 7:19, 24?
19 Tungod sa pagkadili-hingpit, ang matag Kristohanon matag karon ug unya masayop sa pagtikang. Ang pagkatipas tingali gamay ra, nga dili himatikdan sa uban. O mahimong kini dayag nga pagkasipyat sa tumong nga kini makita sa tanan. Sa bisan haing kaso, pagkamakalipay ang paghinumdom sa matinud-anong pag-angkon ni Pablo: “Kay ang maayo nga buot ko wala ko pagbuhata, apan ang daotan nga dili ko buot mao ang akong ginabuhat. Pagkamakaluluoy ko nga tawo!” (Roma 7:19, 24) Hinuon, kining mga pulonga dili pagaisipong usa ka pasangil sa pagbuhat ug daotan. Hinunoa, kana pagdasig sa debotadong mga Kristohanon nga nakigbisog sa mga pagkadili-hingpit, nga nagatabang kanila sa paglahutay sa ilang paningkamot nga atubangon ang hagit sa pagsubay sa hingpit nga mga lakang ni Jesus.
20. (a) Sa unsang paagi ang Proverbio 4:16 nagatabang kanato sa atong lumba sa kinabuhi? (b) Kita magmadeterminado sa pagbuhat sa unsa?
20 “Ang matarong tingali mapukan bisan sa makapito, ug siya mobangon,” matud sa Proverbio 24:16. Sa atong lumba sa kinabuhi, walay mausa ang angay mapugos sa pagluwat. Kining lumba nahisamag marathon, usa ka lumba sa pag-agwanta, dili lumba sa usa ka gatos yardas. Tungod sa labing gamayng sayop nga tikang ang dumadagan sa mubong distansiya o sprinter lagmit gayong mapilidi. Apan ang maglulumba sa marathon, bisan pag siya mapandol, may panahon sa pagbangon ug sa pagtapos sa lumba. Busa kon ang personal sayop nga tikang makapahinabo kanimo sa pagtuwaw, “pagkamakaluluoy ko nga tawo!” hinumdoming ikaw may panahon sa pagbangon. May higayon ka pang mapasig-uli aron makasagnunot sa imong Pangulo, si Jesu Kristo. Walay katarongan nga madesperado! Walay katarongan n ga mohunong! Magmadeterminado, uban sa tabang sa Diyos, sa pag-atubang nga malamposon sa hagit sa ‘pagsunod pag-ayo sa mga lakang ni Jesus.’—1 Pedro 2:21.
Nganong ang mga Kristohanon kinahanglang
◻ makatuon sa pagpahiuyon?
◻ mohatag ug wala-mabahing pagtagad?
◻ magbutang sa hunahuna sa sumbanan sa kamatuoran?
◻ maghupot sa tukmang paso?
◻ maglikay sa sobrang pagsalig?
◻ magbugno sa pagkaluya?
[Hulagway sa panid 15]
Pinaagi sa pagbutang sa iyang mata sa iyang tumong, ang usang matarong mobangon gayod