Nganong Magpakitag Apresasyon?

 1. Giunsa pagpakita sa Samarianhon ang apresasyon kang Jesus?

ANG 10 ka tawo desperado na. Sanlahon sila, ug morag wala nay paglaom. Pero usa ka adlaw niana, nakita nila sa layo si Jesus​—ang Bantogang Magtutudlo. Ilang nabalitaan nga naayo niya ang tanang klase sa sakit, ug kombinsido sila nga maayo sab niya sila. Maong sila naninggit: “Jesus, Magtutudlo, kaluy-i kami!” Ang 10 ka tawo naayo. Seguradong mapasalamaton silang tanan sa kabuotan ni Jesus. Pero ang usa nila wala lang mobating mapasalamaton​—gipakita niya ang iyang apresasyonb kang Jesus. Ang tawo nga naayo, kinsa usa ka Samarianhon, napalihok sa pagdayeg sa Diyos “uban sa makusog nga tingog.”​—Luc. 17:12-19.

2-3. (a) Ngano tingaling dili ta makapakitag apresasyon? (b) Unsay konsiderahon niining artikuloha?

² Parehas niadtong Samarianhon, gusto natong magpasalamat niadtong nagpakitag kaayo. Pero usahay, basig malimtan na nato ang pagsulti o pagpakita sa atong apresasyon.

³ Konsiderahon niining artikuloha ang kaimportante sa pagpakitag apresasyon pinaagi sa pulong ug buhat. Makakat-on ta gikan sa mga karakter sa Bibliya nga mapasalamaton ug dili. Dayon, atong hisgotan ang pipila ka praktikal nga paagi sa pagpakitag apresasyon.

4-5. Nganong angay tang magpakitag apresasyon?

⁴ Si Jehova ang atong ehemplo sa pagpakitag apresasyon. Ang usa ka paagi nga gihimo niya kini mao ang pagpanalangin niadtong nakapalipay niya. (2 Sam. 22:21; Sal. 13:6; Mat. 10:40, 41) Ug ang Bibliya nagdasig nato nga “mahimong mga tigsundog sa Diyos, ingon nga hinigugmang mga anak.” (Efe. 5:1) Busa, magpakita tag apresasyon kay gusto natong sundogon si Jehova.

⁵ Konsideraha ang laing rason kon nganong magpakita tag apresasyon sa uban. Ang apresasyon morag lami nga pagkaon​—mas ganahan ka kon may kasalo. Dihang mobati tang giapresyar, malipay ta. Dihang ipakita nato ang apresasyon, mapalipay nato ang uban. Ang atong gipasalamatan nahibalo nga ang iyang gihimo o gihatag nakatabang nato. Ingong resulta, masuod ta nianang tawhana.

 6. Sa unsang paagi ang pagpasalamat parehas sa mansanas nga bulawan?

⁶ Bililhon kaayo ang pagpasalamat. Ang Bibliya nag-ingon: “Ang usa ka pulong nga gisulti sa hustong panahon maoy sama sa mansanas nga bulawan diha sa linilok nga plata.” (Prov. 25:11) Hunahunaa kon unsa ka nindot ang mansanas nga bulawan diha sa plata nga butanganan! Ug hunahunaa kon unsa nâ ka bililhon! Unsay imong bation kon makadawat kag ingon ana nga regalo? Aw, ingon niana ka bililhon ang pagpasalamat ngadto sa uban. Ug konsideraha ni: Ang mansanas nga hinimo sa bulawan magpabilin sa taas nga panahon. Ingon ana pod ang pagpakitag apresasyon. Kini mahinumdoman ug pabilhan sa midawat niini sa tibuok niyang kinabuhi.

 7. Sumala sa Salmo 27:4, giunsa pagpakita ni David ug sa ubang magsusulat sa salmo ang ilang apresasyon?

⁷ Daghang alagad sa Diyos sa una ang nagmapasalamaton. Usa nila si David. (Basaha ang Salmo 27:4.) Giapresyar niya pag-ayo ang hinlo nga pagsimba ug makita ni sa iyang mga buhat. Dako kaayo siyag giamot para sa pagtukod sa templo. Ang mga kaliwat ni Asap nagpakita sa ilang apresasyon pinaagi sa pagsulat ug mga salmo, o mga awit sa pagdayeg. Sa usa ka kanta, sila nagpasalamat sa Diyos ug gisulti ang ilang pagdayeg sa “katingalahang mga buhat” ni Jehova. (Sal. 75:1) Klaro, gusto ni David ug sa mga kaliwat ni Asap nga ipakita ang ilang apresasyon kang Jehova tungod sa tanang panalangin nga ilang nadawat. Makahunahuna ba kag mga paagi sa pagsundog nila?

8-9. Giunsa pagpakita ni Pablo nga giapresyar niya ang mga igsoon, ug lagmit unsay resulta?

⁸ Giapresyar pag-ayo ni apostol Pablo ang mga igsoon ug makita ni sa iyang paagi sa paghisgot nila. Sa iyang pag-ampo, kanunay siyang magpasalamat sa Diyos tungod nila. Gisulti pod niya ang iyang apresasyon diha sa iyang mga sulat. Sa unang 15 ka bersikulo sa Roma 16, gihisgotan ni Pablo ang ngalan sa 27 ka Kristohanon. Espesipikong gisulti ni Pablo nga si Prisca ug Aquila “nagpameligro sa ilang mga liog” para niya, ug siya miingon nga si Febe “tigpanalipod sa daghan,” apil kang Pablo. Iyang gidayeg ang maong minahal ug kugihang mga igsoon.​—Roma 16:1-15.

⁹ Nahibalo si Pablo nga ang mga igsoon dili hingpit. Pero sa kataposang bahin sa iyang sulat sa mga taga-Roma, nagpokus siya sa ilang maayong mga hiyas. Walay duhaduha nga nadasig ang maong mga igsoon dihang gibasa sa kongregasyon ang giingon ni Pablo bahin nila! Ug lagmit mas nasuod sila kang Pablo. Gipakita ba nimo pirme ang imong apresasyon sa maayong nasulti o nahimo sa mga igsoon?

10. Unsay atong makat-onan sa paagi ni Jesus sa pagpakitag apresasyon sa iyang mga sumusunod?

¹⁰ Sa iyang mensahe sa pipila ka kongregasyon sa Asia Minor, gipakita ni Jesus ang iyang apresasyon sa nahimo sa iyang mga sumusunod. Pananglitan, gisugdan niya ang iyang mensahe sa kongregasyon sa Tiatira sa pag-ingon: “Nahibalo ako sa imong mga buhat, ug sa imong gugma ug pagtuo ug ministeryo ug paglahutay, ug nga ang imong ulahing mga buhat mas labaw pa kay sa mga nahauna.” (Pin. 2:19) Gihisgotan ni Jesus ang ilang pag-uswag. Gidayeg pod niya sila sa ilang maayong mga hiyas nga nagpalihok nila sa pagbuhat ug maayo. Bisag kinahanglan niyang tambagan ang pipila diha sa Tiatira, iya gihapong gisugdan ug gitapos ang iyang mensahe pinaagig pagdasig. (Pin. 2:25-28) Hunahunaa ang awtoridad ni Jesus ingong ulo sa kongregasyon. Dili siya kinahanglang magpasalamat sa atong nahimo para niya. Pero, gipakita gihapon niya ang iyang apresasyon. Maayo gyod siyang ehemplo para sa mga ansiyano!

11. Sumala sa Hebreohanon 12:16, unsay panglantaw ni Esau sa sagradong mga butang?

¹¹ Makapaguol, may mga karakter sa Bibliya nga wala magpakitag apresasyon. Pananglitan, bisag si Esau gipadako sa ginikanan nga nahigugma ug nagtahod kang Jehova, siya walay apresasyon sa sagradong mga butang. (Basaha ang Hebreohanon 12:16.) Sa unsang paagi nakita ang iyang kawalay apresasyon? Basta na lang gibaligya ni Esau ang iyang katungod sa pagkapanganay ngadto sa iyang manghod nga si Jacob puli sa usa ka panaksang linat-an. (Gen. 25:30-34) Sa ulahi, si Esau nagbasol pag-ayo sa iyang gihimo. Pero wala niya apresyaha ang iyang nabatonan, busa dili siya angayng moreklamo dihang wala niya madawat ang panalangin sa pagkapanganay.

12-13. Giunsa pagpakita sa mga Israelinhon ang kawalay apresasyon, ug unsay resulta?

¹² Ang mga Israelinhon daghag rason sa pagpakitag apresasyon. Sila gipagawas sa pagkaulipon human ipahinabo ni Jehova ang 10 ka Silot sa Ehipto. Dayon, giluwas sila pinaagi sa paglaglag sa tibuok kasundalohan sa Ehipto didto sa Pulang Dagat. Ang mga Israelinhon mapasalamaton kaayo maong nakakanta silag awit sa kadaogan sa pagdayeg kang Jehova. Pero nakapabilin ba silang mapasalamaton?

¹³ Dihang nakaatubang ang mga Israelinhon ug bag-ong problema, nalimtan dayon nila ang tanang maayong butang nga nahimo ni Jehova. Dayon ilang gipakita ang ilang kawalay apresasyon. (Sal. 106:7) Sa unsang paagi? “Ang tibuok katigoman sa mga anak sa Israel nagbagulbol batok kang Moises ug kang Aaron”​—nga maoy pagbagulbol kang Jehova mismo. (Ex. 16:2, 8) Nadismayar siya sa kawalay apresasyon sa iyang katawhan. Sa ulahi, iyang gitagna nga ang maong henerasyon sa mga Israelinhon mamatay sa kamingawan, gawas kang Josue ug Caleb. (Num. 14:22-24; 26:65) Atong tan-awon kon sa unsang paagi dili nato masundog ang daotang pananglitan ug masundog ang maayo.

14-15. (a) Unsaon pagpakita sa mga magtiayon nga giapresyar nila ang usag usa? (b) Unsaon pagtudlo sa mga ginikanan ang ilang mga anak sa pagpakitag apresasyon?

¹⁴ Diha sa pamilya. Ang tibuok pamilya makabenepisyo kon ang matag usa magpakitag apresasyon. Mas magkasuod ang magtiayon kon pirme silang magpasalamat sa usag usa. Mas sayon na pod ang pagpasaylo sa usag usa. Ang bana nga nakaapresyar sa iyang asawa makamatikod sa maayong nasulti ug nahimo niini ug siya “mobangon [ug] magdayeg kaniya.” (Prov. 31:10, 28) Ug sultian sa maalamong asawa ang iyang bana kon sa unsa siya mapasalamaton niini.

¹⁵ Mga ginikanan, unsaon ninyo pagtudlo ang inyong mga anak sa pagpakitag apresasyon? Hinumdomi, sundogon sa inyong mga anak ang inyong isulti ug buhaton. Busa, mahimong maayong ehemplo pinaagi sa pagpasalamat kon makahimo silag maayo para ninyo. Dugang pa, tudloi sila sa pagpasalamat kon ang uban nakahimog maayo para nila. Tabangi silang masabtan nga kinahanglang kinasingkasing ang pagpasalamat ug dakog epekto ang ilang isulti. Pananglitan, ang sister nga si Clary miingon: “Dihang nag-edad si Mama ug 32, siya na lay nag-atiman namong tulo ka magsoon. Pag-32 anyos nako, nakahunahuna ko nga lisod gyod to para niya. Maong giingnan nako siya nga giapresyar nako pag-ayo ang tanan niyang sakripisyo sa pagpadako nako ug sa akong duha ka igsoong lalaki. Di pa dugay, giingnan ko niya nga wala gihapon siya malimot sa akong gisulti, pirme ni niyang hunahunaon, ug kanunay ning makapalipay niya.”

16. Paghatag ug pananglitan kon unsa ka makapadasig ang pagpakitag apresasyon.

¹⁶ Diha sa kongregasyon. Kon magpakita tag apresasyon sa mga igsoon, madasig sila. Pananglitan, si Jorge, usa ka 28 anyos nga ansiyano, grabeng nasakit. Usa ka bulan siyang wala makatambong ug tigom. Bisan niadtong makatambong na siya, dili gihapon siya makahatag ug bahin. Si Jorge miangkon: “Mibati kong way pulos tungod sa akong mga limitasyon ug kay dili nako mahimo ang akong mga responsibilidad sa kongregasyon. Pero human sa usa ka tigom, dihay brader nga miingon nako: ‘Salamat kaayo kay maayo kang panig-ingnan sa akong pamilya. Ganahan kaayo mi sa imong mga pakigpulong sa milabayng mga tuig. Nakapalig-on to sa among pagtuo.’ Natandog kaayo ko ug nakahilak. Ang iyang gisulti mao gyoy akong gikinahanglan.”

17. Sumala sa Colosas 3:15, unsaon nato pagpakitag apresasyon sa pagkamahinatagon ni Jehova?

¹⁷ Ngadto sa atong mahinatagong Diyos. Si Jehova naghatag natog abundang espirituwal nga pagkaon. Pananglitan, makadawat tag mapuslanong instruksiyon pinaagi sa mga tigom, magasin, ug website. Duna bay pakigpulong, artikulo sa magasin, o programa sa broadcasting diin nakaingon ka, ‘Mao gyod nay akong gikinahanglan’? Unsaon nato pagpakitag apresasyon kang Jehova? (Basaha ang Colosas 3:15.) Ang usa ka paagi mao ang kanunayng pagpasalamat niya diha sa pag-ampo tungod nianang maayong mga regalo.​—Sant. 1:17.

18. Sa unsang mga paagi makapakita tag apresasyon sa atong Kingdom Hall?

¹⁸ Mapakita sab nato ang atong apresasyon kang Jehova pinaagi sa pagmentinar sa kahinlo ug kahapsay sa atong mga dapit sa pagsimba. Kanunay tang motabang sa paglimpiyo ug pagmentinar sa Kingdom Hall, ug kadtong mogamit sa sound ug video equipment mag-amping pag-ayo aron dili ni madaot. Kon maayong pagkamentinar ang Kingdom Hall, mapuslan ni sa taastaas nga panahon ug gamay rag ayohonon. Pinaagi niana, magamit ang ubang kuwarta sa pagtukod ug pag-renovate sa ubang Kingdom Hall sa tibuok kalibotan.

19. Unsay imong nakat-onan sa eksperyensiya sa usa ka tigdumala sa sirkito ug sa iyang asawa?

¹⁹ Ngadto sa nagkugi para nato. Kon magpakita tag apresasyon, ang atong isulti basin makapausab sa gibati niadtong nag-atubag kalisdanan. Konsideraha ang eksperyensiya sa usa ka tigdumala sa sirkito ug sa iyang asawa. Human sa tibuok adlawng ministeryo bisag nag-snow, nanguli sila sa ilang puy-anan nga gikapoy kaayo. Tugnaw kaayo maong nakatulog ang asawa nga nag-jacket gihapon. Pagkabuntag, giingnan niya ang bana nga morag dili na siya makapadayon sa sirkitong buluhaton. Niana pong buntaga, may miabot nga sulat gikan sa sangang buhatan para sa asawa. Ang sulat kinasingkasing nga naghatag ug komendasyon sa iyang ministeryo ug paglahutay. Naghisgot sab ni kon unsa ka lisod ang pagbalhinbalhin ug puy-anan kada semana. Ang iyang bana miingon: “Natandog kaayo siya niadto nga komendasyon maong wala na gyod siya maghisgot pa nga moundang sa sirkitong buluhaton. Gani, kadaghan ko niya gidasig sa pagpadayon sa buluhaton dihang gusto na kong moundang.” Nakapabilin sila sa ilang asaynment sa halos 40 ka tuig.

20. Unsay atong paningkamotan kada adlaw, ug ngano?

²⁰ Hinaot maningkamot ta kada adlaw sa pagpakitag apresasyon pinaagi sa atong isulti ug buhaton. Ang atong sinserong mga pulong o buhat basig maoy gikinahanglan sa laing tawo aron makalahutay niining kalibotan nga daghan ang dili mapasalamaton. Ug ang atong pagkamapasalamaton makapalig-on sa panaghigalaay nga mohangtod sa walay kataposan. Labaw sa tanan, gisundog nato ang atong Amahan, si Jehova​—kinsa mahinatagon ug nagapakitag apresasyon.