Maalamong Paggamit sa Dila

‘KON pwede lang untang bakwion ang akong gisulti!’ Nakaingon ka na ba niana sa imong kaugalingon? Oo, kitang tanan naningkamot sa pagkontrolar sa atong dila. Mapaaghop nato halos ang tanang mananap, nag-ingon ang Bibliya, “apan ang dila, walay usa ka tawo ang arang nga makapaaghop niini.” (Santiago 3:7, 8) Buot bang ipasabot nga wala na kitay mahimo? Dili sa ingon niana. Tagda ang pipila ka prinsipyo sa Bibliya nga makatabang kanato sa pagkontrolar niining gamay apan gamhanang sangkap sa lawas.

● “Sa daghang mga pulong tino nga adunay kalapasan, apan siya nga nagapugong sa iyang mga ngabil nagalihok nga maalamon.” (Proverbio 10:19) Kon mas daghan kitag isulti, mas dako ang posibilidad nga makasulti kitag sakit, o makadaot pa gani. Sa pagkatinuod, kon dili makontrolar ang dila, kini samag kalayo nga makapakuyanap dayon sa makadaot nga tabi ug pagbutangbutang. (Santiago 3:5, 6) Apan, kon atong ‘pugngan ang atong ngabil,’ o kita maghunahuna sa dili pa mosulti, atong mapamalandong ang mahimong epekto sa atong isulti. Nianang paagiha, mailhan kita nga maayog panghukom, ug atong maangkon ang pagtahod ug pagsalig sa uban.

● “Magmaabtik sa pagpaminaw, magmahinay sa pagsulti, magmahinay sa pagkapungot.” (Santiago 1:19) Gusto sa uban nga kita maminaw pag-ayo sa ilang isulti, kay kini magpakita nga kita dili lang interesado sa ilang isulti kondili nagtahod usab kanila. Apan komosta man kon dunay mosultig sakit o makapasuko kanato? Nan, angay nga kita “magmahinay sa pagkapungot” pinaagi sa dili pagbalos. Tingali duna lay nakapalagot sa maong tawo ug basin mangayo ra siyag pasaylo kanimo sa iyang gisulti nga di maayo. Nalisdan ka ba nga “magmahinay sa pagkapungot”? Nan, pag-ampo sa Diyos aron ikaw makapasundayag ug pagpugong sa kaugalingon. Dunggon gayod niya ang maong kinasingkasing nga mga hangyo.—Lucas 11:13.

● “Ang malumo nga dila makabali ug bukog.” (Proverbio 25:15) Sukwahi sa gituohan sa daghan, ang kalumo adunay gahom. Pananglitan, ang malumo nga tubag makabuntog sa mga pagsupak nga sama kagahi sa bukog, lagmit tungod sa kasuko o pagpihig. Tinuod, lisod magpakitag kalumo, ilabina kon ang usa anaa sa kapungot. Apan, matabangan ka kon imong hunahunaon ang mga benepisyo sa pagpadapat sa giingon sa Bibliya ug sa mahimong resulta kon kana dili ipadapat.

Sa pagkatinuod, ang mga prinsipyo sa Bibliya maoy “kaalam nga gikan sa itaas.” (Santiago 3:17) Kon atong ipadapat ang maong kaalam sa dihang kita mosulti, ang atong mga pulong mahimong matinahoron, mabination, ug makapadasig—samag “mansanas nga bulawan diha sa linilok nga plata,” nga gisulti sa hustong panahon.—Proverbio 25:11.