KORALES

Ang mga deposito sa anapog nga gimugna sa pipila ka organismo sa dagat nga gitawag ug mga polyp. Nagpuyo sa mga kolonya, gigamit niining gagmitoy nga mga linalang sa init-init nga tubig ang mga asin nga calcium gikan sa dagat ug gigama pinaagi niini ang maanindot, nagsangasangang gambalay nga sama kagahi sa bato. Paglabay sa panahon ang pipila ka matang sa napormang korales mahimong dagkong mga katakotan ug mga pundasyon sa mga pulo nga korales. Nagkalainlain ang mga kolor sa korales, adunay puti, itom, ug pula, nga ang naulahi mao ang kinamahalan ug ang gitinguha pag-ayong korales sa karaang kapanahonan. (Itandi ang Lam 4:7.) Sa usa ka panahon, ang Tiro nailado sa pagnegosyo ug mga korales, nga gikuha gikan sa Mediteranyo, Pulang Dagat, ug sa Dagat Indian. (Eze 27:16) Gikan sa batong korales, ang mga artesano makagamag maanindot, nagkalainlaing mga pahiyas nga mahal kaayo.

Tungod sa pagkabililhon sa korales, ang Bibliya naghisgot ug ubay-ubayng makaiikag nga mga pagtandi. Ang kahibalo ug kaalam labaw kaayog bili kay sa korales. (Job 28:18; Pr 3:15; 8:11; 20:15) Tinuod usab kini labot sa usa ka takos nga asawa; “ang iyang bili labaw pa kaayo kay sa mga korales.”​—Pr 31:10.