Kaalam nga Mogiya sa Atong Kinabuhi

 1. Nganong kitang tanan nagkinahanglan ug kaalam gikan sa Diyos? (Proverbio 4:7)

KON kinahanglan kang mohimog importanteng desisyon, seguradong moampo ka para sa kaalam—ug sakto nâ. (Sant. 1:5) Si Haring Solomon misulat: “Ang kaalam ang labing importanteng butang.” (Basaha ang Proverbio 4:7.) Siyempre, dili ordinaryo lang nga kaalam ang gipasabot ni Solomon, kondili ang kaalam nga gikan kang Jehova nga Diyos. (Prov. 2:6) Pero ang kaalam ba nga gikan sa Diyos makatabang nato sa atong mga problema karon? Oo, ug mao nay atong hisgotan aning artikuloha.

 2. Unsa ang usa ka paagi nga mahimo tang tinuod nga maalamon?

² Ang usa ka paagi nga mahimo tang tinuod nga maalamon mao ang pagtuon ug pagpadapat sa gitudlo sa duha ka tawo nga maalamon kaayo. Una, atong hisgotan si Solomon. Ang Bibliya nag-ingon nga “ang Diyos naghatag kang Solomon ug dako kaayong kaalam ug katakos sa pag-ila.” (1 Hari 4:29) Ikaduha, atong hisgotan si Jesus, ang pinakamaalamong tawo nga nabuhi sukad. (Mat. 12:42) Bahin kang Jesus, mao ni ang gitagna: “Maanaa kaniya ang espiritu ni Jehova, ang espiritu sa kaalam ug sa pagsabot.”​—Isa. 11:2.

 3. Unsay atong hisgotan niining artikuloha?

³ Tungod sa kaalam nga gihatag sa Diyos, si Solomon ug Jesus nakahatag ug praktikal nga tambag bahin sa mga butang nga importante para natong tanan. Niining artikuloha, atong hisgotan ang tulo niini: ang balanseng panghunahuna bahin sa kuwarta, trabaho, ug atong kaugalingon.

 4. Unsay kalainan sa kahimtang ni Solomon ug Jesus?

⁴ Si Solomon puwerteng datoa ug hayahay kaayog kinabuhi. (1 Hari 10:7, 14, 15) Pero si Jesus wala kaayoy mga butang ug walay kaugalingong balay. (Mat. 8:20) Pero silang duha balanseg panghunahuna sa materyal nga mga butang kay usa ra ang gigikanan sa ilang kaalam—si Jehova nga Diyos.

 5. Unsay balanseng panghunahuna ni Solomon bahin sa kuwarta?

⁵ Si Solomon miingon nga ang kuwarta “panalipod.” (Eccl. 7:12) Tungod sa kuwarta, mapalit nato ang atong mga gikinahanglan ug ang uban natong gusto. Pero bisag dato kaayo si Solomon, nasabtan niya nga naa pay mas importante kay sa kuwarta. Pananglitan, siya misulat: “Ang maayong ngalan [o, “maayong reputasyon,” footnote] mao ang pilion imbes ang daghang bahandi.” (Prov. 22:1) Naobserbahan pod ni Solomon nga ang mga tawo nga kuwarta ray gihunahuna dili tinuod nga malipayon bisan pa sa ilang nabatonan. (Eccl. 5:10, 12) Ug nagpasidaan siya nga dili nato ibutang ang tanan natong pagsalig sa kuwarta, kay ang kuwarta dali rang mawala bisan unsa pa ni ka daghan.​—Prov. 23:4, 5.

 6. Unsay balanseng panghunahuna ni Jesus sa materyal nga mga butang? (Mateo 6:31-33)

⁶ Si Jesus balanseg panghunahuna sa materyal nga mga butang. Ganahan siyang mokaon ug moinom. (Luc. 19:2, 6, 7) Kas-a, naghimo siyag maayo kaayong klase nga bino​—ang una niyang milagro. (Juan 2:10, 11) Ug sa adlaw nga namatay siya, mahalon nga sinina ang iyang gisul-ob. (Juan 19:23, 24) Pero si Jesus wala magpokus sa materyal nga mga butang. Giingnan niya ang iyang mga sumusunod: “Walay ulipon nga makaalagad sa duha ka agalon . . . Dili mahimo nga magpaulipon mo sa Diyos ug sa Bahandi.” (Mat. 6:24) Si Jesus miingon nga kon unahon nato pagpangita ang Gingharian, paneguroon ni Jehova nga mabatonan nato ang atong gikinahanglan.​—Basaha ang Mateo 6:31-33.

 7. Unsang mga benepisyo ang nadawat sa usa ka brader tungod sa iyang balanseng panghunahuna bahin sa kuwarta?

⁷ Daghang igsoon ang nakabenepisyo sa pagpadapat sa kaalam nga gikan sa Diyos kon bahin sa kuwarta. Konsideraha ang eksperyensiya ni Daniel, nga usa ka ulitawo. Siya miingon: “Tin-edyer pa lang ko, midesisyon na ko nga magpokus sa espirituwal nga mga buluhaton.” Kay simple ang kinabuhi ni Daniel, nagamit niya ang iyang panahon ug skill sa daghang proyekto sa organisasyon. Siya midugang: “Makaingon gyod ko nga wala ko magmahay sa akong desisyon. Tinuod, daghan unta kog kuwarta kon nagpokus pa ko sa materyal nga mga butang. Pero kon mao nay akong gihimo, dili unta nako mailaila ang akong suod nga mga higala karon. Dili pod ko mahimong parehas ani ka malipayon kon wala nako unaha ang Gingharian. Di gyod kabayran ug kuwarta ang mga panalangin ni Jehova.” Klaro nga makabenepisyo ta kon magpokus ta, dili sa kuwarta, kondili sa espirituwal nga mga butang.

 8. Nganong nahibalo ta nga si Solomon balanseg panghunahuna bahin sa trabaho? (Ecclesiastes 5:18, 19)

⁸ Ang kalipay nga atong bation tungod sa atong trabaho gitawag ni Solomon nga “gasa sa Diyos.” (Basaha ang Ecclesiastes 5:18, 19.) Siya misulat: “Ang tanang paghago naay kaayohan.” (Prov. 14:23) Nahibalo si Solomon nga tinuod gyod nâ kay ganahan siyang motrabaho. Nagtukod siyag mga balay, nagtanom ug mga ubasan, ug naghimog garden ug mga linaw sa tubig. Nagtukod pod siyag mga siyudad. (1 Hari 9:19; Eccl. 2:4-6) Nagkugi siya sa iyang trabaho, ug nakahatag to niyag kalipay. Pero naa pa siyay laing gihimo aron tinuod siyang magmalipayon. Nagkugi pod siya sa espirituwal nga mga buluhaton. Pananglitan, siyay nagdumala sa pagtukod sa nindot kaayong templo para sa pagsimba kang Jehova​—nga gidangtag pito ka tuig! (1 Hari 6:38; 9:1) Human sa tanan niyang nahimo, nakita ni Solomon nga ang pinakaimportante mao ang espirituwal nga mga buluhaton. Siya misulat: “Human masulti ang tanan, kini ang konklusyon: Kahadloki ang matuod nga Diyos ug tumana ang iyang mga sugo.”​—Eccl. 12:13.

 9. Giunsa pagpakita ni Jesus nga balanse siya kon bahin sa trabaho?

⁹ Si Jesus kugihan. Sa batabata pa siya, nagtrabaho siya ingong panday. (Mar. 6:3) Seguradong naapresyar sa iyang mga ginikanan ang iyang tabang samtang naningkamot sila nga matagan-an ang panginahanglan sa ilang dakong pamilya. Ug ingong panday, seguradong daghan ang gustong magpatrabaho niya kay perpekto god siya! Na-enjoy gyod tingali ni Jesus ang iyang trabaho. Pero bisag nagkugi siya sa iyang trabaho, naggahin siyag panahon para sa espirituwal nga mga buluhaton. (Juan 7:15) Sa ulahi, dihang full-time na siya sa pagsangyaw, iyang gitambagan ang mga tawo: “Hagoi ninyo, dili ang pagkaon nga madaot, kondili ang pagkaon nga dili madaot nga motultol sa kinabuhing walay kataposan.” (Juan 6:27) Ug sa iyang Wali sa Bukid, siya miingon: “Pagtigom mog mga bahandi sa langit.”​—Mat. 6:20.

10. Sa unsa tingali malisdan ang uban kon bahin sa trabaho?

¹⁰ Ang kaalam gikan sa Diyos motabang nga mahimo tang balanse sa atong trabaho. Ingong mga Kristohanon, gitudloan ta nga “maghago . . . , nga magtrabaho sa matarong nga paagi.” (Efe. 4:28) Sagad, mamatikdan sa atong amo nga matinud-anon ta ug kugihan, ug tingali sultihan ta niya nga ganahan siya ana. Tungod ana, basin magsige na tag overtime aron ang atong amo mas mobilib pa gyod sa mga Saksi ni Jehova. Pero basin ato nang mapasagdan ang atong responsibilidad sa pamilya ug ang espirituwal nga mga buluhaton. Kinahanglang mohimo tag kausaban aron makahatag tag dugang panahon sa pinakaimportanteng mga butang.

11. Unsay nakat-onan sa usa ka brader bahin sa pagkahimong balanse sa trabaho?

¹¹ Ang batan-on nga si William nakaobserbar nga importante gyod nga mahimo tang balanse sa trabaho. Bahin sa ansiyano nga amo niya sa una, si William miingon: “[Kini nga brader] maayong ehemplo sa pagkabalanse sa trabaho. Siya kugihan, ug maayog relasyon sa iyang mga kliyente kay maayo siyang motrabaho. Apan pagkahuman sa iyang trabaho sa tibuok adlaw, biyaan na niya kini ug magpokus na sa iyang pamilya ug sa pagsimba. Ug abi nimo, usa siya sa malipayon kaayong tawo nga akong nailhan!”b

12. Giunsa pagpakita ni Solomon nga balanse siyag panghunahuna sa iyang kaugalingon, pero nganong sa ulahi dili na siya balanseg panghunahuna?

¹² Dihang si Solomon matinumanon pang magsisimba ni Jehova, balanse siyag panghunahuna sa iyang kaugalingon. Dihang batan-on pa siya, mapainubsanon niyang giila ang iyang limitasyon ug nagpagiya siya kang Jehova. (1 Hari 3:7-9) Sa bag-o pang naghari si Solomon, nahibalo siya nga dili maayog resulta ang pagkagarboso. Siya misulat: “Ang garbo moresultag kadaot, ug ang pagkamapahitas-on moresultag pagkapukan.” (Prov. 16:18) Makapaguol kay sa ulahi wala niya ipadapat ang iyang tambag. Nahimo siyang garboso ug iyang gisupak ang mga balaod sa Diyos. Pananglitan, ang usa sa mga balaod nag-ingon nga ang Israelinhong hari ‘dili mangasawag daghan aron ang iyang kasingkasing dili motipas.’ (Deut. 17:17) Pero wala tumana ni Solomon ang maong balaod kay naa siyay 700 ka asawa ug 300 ka puyopuyo, ug daghan nila dili magsisimba ni Jehova! (1 Hari 11:1-3) Tingali kompiyansa ra kaayo si Solomon nga wala ra ni epekto niya. Pero sa ulahi, giani niya ang resulta sa pagsupak kang Jehova.​—1 Hari 11:9-13.

13. Unsay atong makat-onan kon pamalandongon nato ang pagkamapainubsanon ni Jesus?

¹³ Si Jesus nagpabiling mapainubsanon ug balanseg panghunahuna sa kaugalingon. Sa wala pa siya moanhi sa yuta, dili bastabasta ang iyang nahimo sa pag-alagad kang Jehova. Pinaagi kang Jesus, “gihimo ang tanang ubang butang sa langit ug sa yuta.” (Col. 1:16) Dihang gibawtismohan siya, posibleng nahinumdoman niya ang tanan niyang nahimo dihang kauban niya ang iyang Amahan. (Mat. 3:16; Juan 17:5) Pero wala nâ makapahimo niyang garboso. Wala gyod niya ipabati sa uban nga mas labaw siya kay kanila. Giingnan niya ang iyang mga tinun-an nga mianhi siya sa yuta “dili aron alagaran, kondili aron sa pag-alagad ug sa paghatag sa iyang kinabuhi ingong lukat baylo sa daghan.” (Mat. 20:28) Mapainubsanon pod siyang miingon nga dili siya makabuhat ug bisan unsa sa iyang kaugalingong pagbuot. (Juan 5:19) Mapainubsanon gyod kaayo si Jesus! Maayo kaayo siyang ehemplo para nato.

14. Kon bahin sa saktong panghunahuna sa kaugalingon, unsay atong makat-onan sa giingon ni Jesus?

¹⁴ Gitudloan ni Jesus ang iyang mga sumusunod nga kinahanglang sakto ang ilang panghunahuna sa ilang kaugalingon. Kas-a, gipasaligan sila ni Jesus: “Nahibalo [ang Diyos] sa gidaghanon sa buhok sa inyong ulo.” (Mat. 10:30) Makahupay gyod kaayo nâ, ilabina kon usahay negatibo tag panghunahuna sa atong kaugalingon. Oo, ang atong langitnong Amahan interesado kaayo nato​—sa ato pa, importante ta niya. Busa ayaw gyod paghunahuna nga dili ka angayang mosimba kang Jehova ug mabuhi sa Paraiso. Ayawg hunahunaa nga nasayop si Jehova sa pagpili nimo.

15. (a) Sumala sa Bantayanang Torre, unsang balanseng panghunahuna bahin sa kaugalingon ang angay natong ugmaron? (b) Base sa hulagway sa panid 24, unsang mga panalangin ang dili nato mapahimuslan kon magpokus ta pag-ayo sa atong kaugalingon?

¹⁵ Mga 15 ka tuig na ang milabay, ang Bantayanang Torre naghisgot nga angay natong ugmaron kini nga balanseng panghunahuna bahin sa kaugalingon: “Siyempre, dili nato gustong lantawon ang atong kaugalingon nga taas kaayo nga kita mahimo na hinuong garboso; ni gusto natong lantawon ang atong kaugalingon nga ubos kaayo nga bation natong kita walay pulos. Hinunoa, ang atong tumong mao ang pagbaton ug kasarangang panglantaw sa atong kaugalingon, nga nahibalo sa atong maayong mga hiyas maingon man sa atong mga limitasyon. Mao kiniy giingon sa usa ka Kristohanong babaye bahin niini: ‘Dili ako daotan nga tawo; ni sobra ako ka buotan. Aduna akoy tilinguhaon ug dili-tilinguhaon nga mga hiyas, ug ingon man usab niana ang uban.’”c Nakita ba nimo kon unsa ka importante nga balanse tag panghunahuna sa kaugalingon?

16. Nganong gihatagan ta ni Jehova ug maalamong giya?

¹⁶ Si Jehova naghatag natog maalamong giya pinaagi sa iyang Pulong. Gimahal ta niya ug gusto niya nga magmalipayon ta. (Isa. 48:17, 18) Ang pinakamaayong desisyon nga atong mahimo—kanang makahatag gyod natog tinuod nga kalipay—mao ang pag-una sa kabubut-on ni Jehova. Kon ato nang himoon, malikayan nato ang daghang problema nga naeksperyensiyahan niadtong nagpokus pag-ayo sa kuwarta, trabaho, o sa ilang kaugalingon. Hinaot ang kada usa nato determinado nga mahimong maalamon ug lipayon ang kasingkasing ni Jehova!​—Prov. 23:15.