Padayon sa Pagpangita sa Natagong mga Bahandi
PAGKAHAMILI sa mga mutya sa kaalam nga makita diha sa Pulong sa Diyos, ang Bibliya! Kining maong mga mutya nagbutyag sa balaang katuyoan ug naghatag kulbahinam nga mga palaabuton sa atubangan nato. Sila nagtaganag paglipay ug nagpakita kanato kon unsaon sa pagpahimuot sa Diyos. (Roma 15:4) Kining mga mutyaa nagtabang usab nato sa paglihok nga maalamon sa atong mga pakiglabot sa uban. Sa pagkatinuod, ang kaalam nga gikan sa Diyos makatabang kanato sa paglakaw diha sa “dalan sa kinabuhi” uban ang katagbawan ug kalipay.—Salmo 16:11; 119:105.
Sanglit daghan man ang mga kaayohan sa kaalam, atong hatagan kinig dakong bili. “Ang tanang mga pulong sa akong baba anaa sa pagkamatarong,” nagaingon ang kaalam nga gilarawan. “Walay bisan unsa nga baliko ni balit-ad diha kanila. Silang tanan matin-aw alang kaniya nga nakasabot, ug matarong alang kaniya nga nakakaplag sa kahibalo. Dawata ang akong pagpahamatngon ug dili ang salapi, ug ang kahibalo kay sa piniling bulawan. Kay ang kaalam labi pang maayo kay sa mga korales, ug ang tanang mga butang nga pagatinguhaon dili ikatanding niana.”—Proverbio 8:8-11.
Nganong Magpadayon sa Pagpangita?
Sagad, ang pagpangitag nalubong nga mga alahas, bulawan, o salapi walay kapuslanan. Kini dili tinuod maylabot sa pagpangitag diyosnong kaalam. Apan sa unsang paagi molampos kita sa pagpangita niini? Buweno, ang kalamposan nagadepende sa kamadasigon sa atong pagtinguha niining bahandia ug sa atong pagkugi aron kana makaplagan. Kon atong ilhon ang tinuod nga bili niini, atong mahalon kini labaw sa ubang mga manggad. Gawas pa, “pagkalabing maayong batonan ang kaalam kay sa bulawan! Ug ang pagbaton ug salabotan maayo pang pilion kay sa salapi.”—Proverbio 16:16.
Ang Proverbio 2:1-6 nag-awhag: “Anak ko, kon dawaton mo ang akong pulong ug tigomon mo ang akong mga sugo diha kanimo, aron nga ikiling mo ang imong igdulungog ngadto sa kaalam, ug bansayon mo ang imong kasingkasing sa pagsabot; oo, kon ikaw magasangpit sa salabaton, ug magapatugbaw sa imong tingog alang sa pagpakasabot, kon ikaw mangita niini ingon nga salapi, ug magapangita niini ingon sa tinipigan nga mga bahandi, unya ikaw makasabot sa pagkahadlok kang Jehova, ug hikaplagan mo ang kahibalo sa Diyos. Kay si Jehova mohatag ug kaalam; gikan sa iyang baba magagula ang kahibalo ug pagpakasabot.”
Sanglit ang nalubong mga bahandi natago, gikinahanglan ang pagpangita kanila. Samtang nangalot, gisakripisyo sa uban ang panahon sa lulinghayaw, pagkaon, ug katulog. Apan ang maong paningkamot mapuslan sa dihang makaplagan ang bahandi. Kita kinahanglan mohimog samang mga pagsakripisyo sa pagpangita sa kaalam sa Diyos. Sanglit ang pagpangitag natagong bahandi nagkinahanglag hagong pagpangalot, busa ang pagpangita sa kaalam nagkinahanglag pag-antos. Dili igo ang paghapaw sa Bibliya ug sa Kristohanong mga basahon. Ang panahon, pagdukiduki, ug pagpalandong gikinahanglan aron makaplagan ang espirituwal nga mga bahandi. Apan pagkadako sa kalipay sa dihang makabaton kitag salabotan sa Kasulatan!—Nehemias 8:13.
Malamposong Pagpangitag-Bahandi
Oo, ang kalipay mosangpot gikan sa pagtuki sa Pulong sa Diyos ug sa pagkaplag ug mga mutya sa kaalam. (Proverbio 3:13-18) Tungod niana, maalamon kita kon magbaton kitag maayo personal o pamilya nga librariya. Apan unsay angay nga aduna diha niini? Gawas pa sa maayong diksiyonaryo, nakita sa mga Saksi ni Jehova nga mapuslanon ang pagbaton ug nagkalainlaing mga hubad sa Kasulatan, apil sa mga publikasyong Kristohanon, ug tuig-tuig nga mga kopya sa Ang Bantayanang Torre ug sa kaubang basahon, nga Pagmata! Siyempre, kinahanglan gamiton ang librariya sa hustong paagi aron kini makatabang kanatong nagapangitag-bahandi.
Sa atong pagpangitag kaalam, kita makatan-aw sa ulohan ug mga bahin sa Kasulatan diha sa Watch Tower Publications Index o mga indese sa mga tomo sa libro o magasin. Kini maoy pangunang mga gamit sa pagpangita sa diyosnong kaalam. Sa pagkatinuod, sila sama sa mapa nga moagak nato diha sa “natagong mga bahandi” sa diyosnong kaalam. (Proverbio 2:4) Kon kita walay pipila ka mga publikasyon nga gikinahanglan sa pagdukiduki, tingali mabatonan kini diha sa lokal nga Kingdom Hall sa mga Saksi ni Jehova.
Karon, atong iilustrar ang malamposong pagpangitag-bahandi. Diha sa atong pagbasa sa Bibliya, tingali nahibulong kita kon sa unsang paagi namatay si Judas human gibudhian si Jesu-Kristo. Ang Mateo 27:5 nag-ingon nga si Judas “milakaw ug nagbitay sa iyang kaugalingon.” Apan ang Buhat 1:18 nag-ingon: “Sa pagkahulog niya nga nag-una ang ulo, mibuto ang iyang tiyan ug nahurot pagkayagyag ang iyang tinai.” Busa sa unsang paagi namatay si Judas? Ang tubag makita pinaagi sa pagsusi sa mga listahan alang niining mga tekstoha diha sa “Scripture Index” sa publikasyong Insight on the Scriptures. Kini nagsugid kanato: “Mopatim-aw nga gihisgotan ni Mateo ang paagi sa pagsulay sa paghikog, samtang ang Buhat nagbatbat sa resulta. Sa pagtapo sa duha ka asoy, mopatim-aw nga misulay si Judas sa paghikog diha sa usa ka pangpang, apan ang pisi o kahoy naputol busa nahulog siya ug mibuto ang tiyan diha sa mga bato sa ubos. Ang topograpiya libot sa Jerusalem naghimo sa maong hitabo nga katuohan.” (Tomo 2, panid 130) Mahitungod sa Insight on the Scriptures, palihog tan-awa ang panid 10 niining magasina.
Ang paggamit sa konkordansiya makahimo kanato sa pagkakita sa mga teksto. Siyempre, sa dihang maghisgot ug kasulatan, angay natong konsiderahon ang konteksto. Aron sa pag-ilustrar niini, atong tagdon ang Salmo 144:12-14. Kining mga bersikuloha naghawas sa pipila ka tawo nga nagaingon: ‘Ang among mga anak nga lalaki sama sa mga tanom, ang among mga anak nga babaye sama sa mga suok nga gikulit sunod sa estilo sa palasyo, ang among mga dapa puno, ang among mga hayop nanganak sa linibo, ang among kabakahan mosanay pag-ayo ug dili kakuhaan.’ Tingali maghunahuna kita nga kining mga pulonga aplikado diha sa katawhan sa Diyos, apan ang konteksto nagpakita nga kini dili. Diha sa bersikulo 11, ang salmistang David nangaliyopo nga luwason gikan sa mga tigsultig kabakakan. Ilang gipanghambog ang ilang mga anak nga lalaki, ug mga anak nga babaye, ang mga kahayopan, ug kabakahan. Sumala sa bersikulo 15, ang maong mga mamumuhat ug daotan nag-ingon: “Malipayon ang katawhan nga anaa sa maong kahimtang!” Apan, sa kaatbang, si David miingon: “Malipayon ang katawhan kansang Diyos mao si Jehova!”
Dagaya ang Espirituwal nga mga Mutya
Ang kalipay sa tino mosangpot gikan sa malamposong pagpangita sa kaalam. Ug apil sa espirituwal nga mga mutya nga makita pinaagi sa pagdukiduki mao ang makatagbawng mga tubag sa mga pangutana sa Bibliya. Pagkamaayong mga tubag ang atong makaplagan kon kita magpadayon sa pagpangita! Pananglitan, diin kuhaa ni Cain ang iyang asawa? Nagkanayon ang The Watchtower (Oktubre 1, 1981): “Ang Bibliya nagtug-an kanato nga si Adan ug Eva dunay daghang anak, dili lamang duha [Cain ug Abel]. ‘Ang mga adlaw ni Adan human siya manganak kang Seth [laing anak nga lalaki] walo ka gatos ka tuig. Ug nanganak siyag mga anak nga lalaki ug mga anak nga babaye.’ (Gen. 5:4) Uban niana nga impormasyon, unsay imong ikasulti kon diin kuhaa ni Cain ang iyang asawa? Oo, hayan giminyoan niya ang usa sa iyang mga igsoong babaye. Karong adlawa peligroso kadto alang sa tanang mga anak nga matawo sa mga ginikanang suod nga mga paryenti. Apan duol sa sinugdanan sa kasaysayan sa tawo, sa dihang duol pa sa kahingpitan ang katawhan, kadto dili problema.”
Ingnon ta atong gibasa ang basahon sa Bibliya nga Proverbio. Nakaalinggat sa gipamulong diha sa Proverbio 1:7, tingali kita nahibulong: ‘Unsa “ang pagkahadlok kang Jehova”’ Ang pagdukiduki motultol kanato sa Ang Bantayanang Torre sa Mayo 15, 1987, nga nagaingon: “Kini maoy kahadlok, dakong pagtahod, ug maayong kahadlok nga dili makapahimuot kaniya tungod kay atong gipabilhan ang iyang mahigugmaong-kalulot ug pagkamaayo. ‘Ang pagkahadlok kang Jehova’ nagpasabot sa pagdawat nga siya mao ang Labawng Maghuhukom ug ang Labing Makagagahom, nga may katungod ug gahom sa paghatag ug silot o kamatayon niadtong mosupak kaniya. Kini nagkahulogan usab sa pag-alagad sa Diyos nga matinumanon, bug-os nga nagasalig kaniya, ug nagadumot sa daotan diha sa iyang panan-aw.”
Padayon sa Pagpangita!
Ang Bantayanang Torre gipatik aron matabangan ang sinserong mga tigpangitag kaalam aron makaplagan ang hamiling espirituwal nga mga mutya. Kitang tanan nagkinahanglag kaalam ug pagsabot sa Pulong sa Diyos. Ang Proverbio 4:7, 8 nag-ingon: “Ang kaalam maoy labaw nga butang. Batoni ang kaalam; ug uban sa tanan mo nga batonan, batoni ang pagsabot. Ipahitaas kini, ug kini magapahitaas kanimo. Kini mohimaya kanimo tungod kay imong gigakos kini.”
Pinaagi sa pagkuhag salabaton sa Kasulatan ug sa paggamit sa hustong paagi sa kaalam kita makakaplag tinuod nga kalipay. Oo, ug pinaagi sa paggamit sa diyosnong kaalam atong mapahimut-an si Jehova nga Diyos. Busa ayaw tugoting may makapugong kanimo gikan sa pagpangitag kaalam sama sa natagong mga bahandi.
[Mga hulagway sa panid 4, 5]
Ang pagpangitag nalubong nga mga bahandi nagkinahanglag hagong pagkalot. Dili ba angay molahutay kita sa atong pagpangitag diyosnong kaalam?