Ipadayag ang Imong Pag-uswag
“Palandonga kining mga butanga; hatagi kinig bug-os nga pagtagad, aron ang imong pag-uswag madayag sa tanan nga mga tawo.”—1 TIMOTEO 4:15.
1. Unsaon nimo pagkahibalo kon ang prutas hinog na ug mahimo nang kaonon?
HANDURAWA sa imong hunahuna ang imong paboritong prutas—usa ka mansanas, peras, mangga, o lain pa. Makahibalo ka ba kon hinog na kini ug mahimo nang kaonon? Siyempre. Sa kahumot, kolor, ug kalumoy niini mahibaloan nimo nga hapit na nimong matilawan ang kalami niini. Inig-ingkib nimo sa prutas, tingali makaginhawa kag luag sa katagbaw. Pagkadugaon! Pagkatam-is! Mohatag kini kanimo ug dakong kalipay ug kahimuot.
2. Sa unsang paagi ang pagkahamtong mapadayag, ug unsay epekto niini diha sa personal nga mga relasyon?
2 Kining yano apan makapalipayng kasinatian adunay mga katumbas diha sa ubang mga bahin sa kinabuhi. Ingong pananglitan, sama sa kahinog sa prutas, ang espirituwal nga kahamtong sa usa ka tawo mapadayag usab diha sa nagkadaiyang mga paagi. Maila nato ang kahamtong sa usa ka tawo kon nagpakita siya ug katakos sa pag-ila, hait nga panabot, kaalam, ug uban pa. (Job 32:7-9) Makapalipay gayod ang pagpakig-uban ug pagpakigtambayayong sa mga tawo nga nagpasundayag sa maong mga hiyas diha sa ilang mga tinamdan ug mga lihok.—Proverbio 13:20.
3. Unsay gipadayag bahin sa pagkahamtong diha sa paghubit ni Jesus sa mga tawo sa iyang adlaw?
3 Sa laing bahin, ang usa ka tawo hingkod na tingali sa pisikal, apan ang iyang sinultihan ug panggawi magpadayag tingali nga siya dili-hamtong sa emosyon ug sa espirituwal. Pananglitan, naghisgot bahin sa malinapasong kaliwatan sa iyang adlaw, si Jesu-Kristo miingon: “Si Juan mianhi nga wala magkaon ni mag-inom, apan ang mga tawo nag-ingon, ‘Siya may demonyo’; ang Anak sa tawo mianhi nga nagkaon ug nag-inom, sa gihapon ang mga tawo nag-ingon, ‘Tan-awa! Usa ka tawong ulitan ug palainom ug bino.’” Bisan tuod kadtong mga tawhana maoy hamtong sa pisikal, si Jesus miingon nga sila milihok samag “mga bata”—sila dili hamtong. Busa, siya midugang: “Sa gihapon, ang kaalam mapamatud-ang matarong pinaagi sa mga buhat niini.”—Mateo 11:16-19.
4. Sa unsang mga paagi madayag ang pag-uswag ug pagkahamtong?
4 Sa mga pulong ni Jesus, masabtan nato nga mailhan kon kaha ang usa ka tawo nakabaton ug matuod nga kaalam—usa ka linaing ilhanan sa pagkahamtong—pinaagi sa iyang mga buhat ug sa mga bunga nga gipatungha. Maylabot niini, matikdi ang tambag ni apostol Pablo kang Timoteo. Human giusa-usa paghisgot ang mga butang nga angayng tinguhaon pagbuhat ni Timoteo, si Pablo miingon: “Palandonga kining mga butanga; hatagi kinig bug-os nga pagtagad, aron ang imong pag-uswag madayag sa tanan nga mga tawo.” (1 Timoteo 4:15) Oo, ang pag-uswag sa usa ka Kristohanon ngadto sa pagkahamtong “madayag,” o klarong maila. Ang Kristohanong pagkahamtong, sama sa nagasidlak nga kahayag, dili usa ka dili-makita o tinago nga hiyas. (Mateo 5:14-16) Busa, hisgotan nato ang duha ka pangunang mga paagi nga mahimong mapadayag ang pag-uswag ug pagkahamtong: (1) pag-uswag sa kahibalo, pagsabot, ug kaalam; (2) pagpadayag sa bunga sa espiritu.
Pagkausa sa Pagtuo ug Kahibalo
5. Sa unsang paagi mahimong hubiton ang pagkahamtong?
5 Kadaghanang diksiyonaryo naghubit sa pagkahamtong ingong kahimtang sa bug-os nga kaugmaran, sa pagkahingkod, ug pagkakab-ot sa kataposang kahimtang o gitinguhang sukdanan. Ang usa ka prutas, sama sa gihisgotan ganina, maoy gulang, o hinog na, kon nakompleto na niini ang kinaiyanhong siklo sa pagtubo niini ug ang dagway, kolor, kahumot, ug lami niini nakaabot na sa kon unsay giisip nga lamian. Busa, ang pagkahamtong samag kahulogan sa pagkalabing-maayo, pagkakompleto, pagkahingpit pa gani.—Isaias 18:5; Mateo 5:45-48; Santiago 1:4.
6, 7. (a) Unsay nagpakita nga si Jehova interesado gayod nga ang tanan niyang mga magsisimba mouswag ngadto sa espirituwal nga pagkahamtong? (b) Sa unsa suod nga nalambigit ang espirituwal nga pagkahamtong?
6 Si Jehova nga Diyos interesado gayod nga ang tanan niyang mga magsisimba mouswag ngadto sa espirituwal nga pagkahamtong. Aron makab-ot kana, naghatag siyag maayo kaayong mga gasa sulod sa Kristohanong kongregasyon. Sa mga Kristohanon sa Efeso, misulat si apostol Pablo: “Iyang gihatag ang pipila ingong mga apostoles, ang pipila ingong mga manalagna, ang pipila ingong mga tig-ebanghelyo, ang pipila ingong mga magbalantay ug mga magtutudlo, alang sa pagpasibo ug balik sa mga balaan, alang sa ministeryal nga buluhaton, alang sa pagpalig-on sa lawas ni Kristo, hangtod kitang tanan makadangat sa pagkausa sa pagtuo ug sa tukmang kahibalo sa Anak sa Diyos, sa pagkahingkod nga tawo, sa gidak-on nga iya sa kabug-osan ni Kristo; aron nga kita dili na magpabiling mga bata, nga samag gituyatuya sa mga balod ug gidala ngadto-nganhi sa matag hangin sa pagtulon-an pinaagi sa paglingla sa mga tawo, pinaagi sa kamalipatlipaton sa pagmugnag sayop.”—Efeso 4:11-14.
7 Niining mga bersikuloha, gipatin-aw ni Pablo nga lakip sa mga rason kon nganong gitagana sa Diyos kanang dagayang espirituwal nga mga gasa diha sa kongregasyon mao nga ang tanan kinahanglang “makadangat sa pagkausa sa pagtuo ug sa tukmang kahibalo,” mahimong ‘hingkod nga tawo,’ ug makabaton sa ‘gidak-on sa kabug-osan ni Kristo.’ Niana lamang paagiha nga kita dili tuyatuyaon samag espirituwal nga mga bata pinaagi sa bakak nga mga ideya ug mga pagtulon-an. Busa makita nato ang suod nga kalambigitan tali sa pag-uswag ngadto sa Kristohanong pagkahamtong ug sa pagkadangat sa “pagkausa sa pagtuo ug sa tukmang kahibalo sa Anak sa Diyos.” Dunay daghang punto diha sa tambag ni Pablo nga angay natong hatagag pagtagad.
8. Unsay gikinahanglan aron makab-ot ang “pagkausa” sa pagtuo ug tukmang kahibalo?
8 Una, tungod kay ang “pagkausa” angayng huptan, ang usa ka hamtong nga Kristohanon kinahanglang mahiusa ug bug-os nga kaharmonya sa mga isigkamagtutuo maylabot sa pagtuo ug kahibalo. Dili siya magpasiugda o moinsistir sa personal nga mga hunahuna o maghambin ug pribadong mga ideya maylabot sa pagsabot sa Bibliya. Hinunoa, siya adunay bug-os nga pagsalig sa kamatuoran sumala sa pagpadayag niini ni Jehova nga Diyos pinaagi sa iyang Anak, si Jesu-Kristo, ug sa “matinumanon ug maalamong ulipon.” Pinaagi sa regular nga pagkaon ug espirituwal nga pagkaon nga gitagana “sa hustong panahon”—pinaagi sa Kristohanong mga publikasyon, mga tigom, mga asembliya, ug mga kombensiyon—makaseguro kita nga mahuptan nato ang “pagkausa” uban sa mga isigka-Kristohanon diha sa pagtuo ug kahibalo.—Mateo 24:45.
9. Ipatin-aw ang pulong “pagtuo” sumala sa paggamit ni Pablo niana sa iyang sulat ngadto sa mga taga-Efeso.
9 Ikaduha, ang pulong “pagtuo” nagtumong, dili sa kombiksiyon nga nahuptan sa matag usa ka Kristohanon, kondili sa kabug-osan sa atong mga tinuohan, sa “gilapdon ug gitas-on ug gihabogon ug giladmon” niini. (Efeso 3:18; 4:5; Colosas 1:23; 2:7) Sa pagkatinuod, sa unsang paagi ang usa ka Kristohanon mahiusa sa mga isigkamagtutuo kon siya motuo o modawat lamang sa usa ka bahin sa “pagtuo”? Nagpasabot kini nga kinahanglang dili kita makontento sa pagkahibalo sa paninugdan lamang nga mga pagtulon-an sa Bibliya o sa pagbaton lamang ug hanap o diyutayng kahibalo sa kamatuoran. Hinunoa, kinahanglang interesado kita sa pagpahimulos sa tanang gasa ug mga kahikayan ni Jehova pinaagi sa iyang organisasyon sa pagsusi pag-ayo sa iyang Pulong. Kinahanglang maningkamot kita sa pagbaton ug tukma ug bug-os nga pagsabot sa kabubut-on ug katuyoan sa Diyos kutob sa mahimo. Naglakip kini sa paggahin ug panahon sa pagbasa ug pagtuon sa Bibliya ug sa mga publikasyon sa Bibliya, sa pag-ampo sa Diyos alang sa iyang tabang ug giya, sa pagtambong sa Kristohanong mga tigom nga regular, ug sa bug-os nga pagpakigbahin sa buluhatong pagsangyaw sa Gingharian ug paghimog mga tinun-an.—Proverbio 2:1-5.
10. Unsay kahulogan sa mga pulong “hangtod kitang tanan makadangat,” ingon sa paggamit niana diha sa Efeso 4:13?
10 Ikatulo, ingong pasiuna sa kahubitan sa tulo-ka-pilo nga tumong, gisulat ni Pablo ang mga pulong “hangtod kitang tanan makadangat.” Mahitungod sa ekspresyong “kitang tanan,” usa ka manuwal sa Bibliya naghatag sa kahulogan ingong “dili ang tanan, nga tinagsatagsa, bulag, kondili magkadungan ang tanan.” Sa laing pagkasulti, ang matag usa kanato kinahanglang mohimog makataronganong paningkamot sa pagkab-ot sa tumong sa Kristohanong pagkahamtong duyog sa tibuok kapunongan sa mga igsoon. Ang The Interpreter’s Bible nag-ingon: “Ang pagkabug-os sa espirituwal nga kalamposan dili makab-ot sa usa nga siyasiya ra, maingon nga ang usa ka bahin sa lawas dili makadangat sa pagkahingkod gawas kon ang tibuok lawas magpadayon sa himsog nga pagtubo niini.” Gipahinumdoman ni Pablo ang mga Kristohanon sa Efeso nga sila angayng maningkamot sa pagsabot sa bug-os nga gidak-on sa pagtuo “uban sa tanang balaan.”—Efeso 3:18a.
11. (a) Unsay wala ipasabot sa pag-uswag sa espirituwal? (b) Unsay kinahanglan natong buhaton aron mouswag?
11 Klaro gikan sa mga pulong ni Pablo nga ang pag-uswag sa espirituwal wala magkahulogan ug pagpuno lamang sa atong hunahuna sa kahibalo ug kinaadman. Ang hamtong nga Kristohanon dili magpasiatab sa uban sa kalantip sa iyang hunahuna. Hinunoa, ang Bibliya nag-ingon: “Ang dalan sa mga matarong ingon sa masanag nga kahayag nga nagaanam kadan-ag hangtod sa pagkahingpit sa adlaw.” (Proverbio 4:18) Oo, “ang dalan,” dili ang indibiduwal, ang “nagaanam kadan-ag.” Kon padayon kitang maningkamot sa pagnunot sa nagakasanag nga pagsabot sa Pulong sa Diyos nga gihatag ni Jehova sa iyang katawhan, mouswag kita sa espirituwal. Niining kahimtanga, ang pagnunot nagpasabot ug pag-abante, ug mao kanay butang nga mahimo natong tanan.—Salmo 97:11; 119:105.
Ipadayag “ang Bunga sa Espiritu”
12. Nganong ang pagpadayag sa bunga sa espiritu hinungdanon sa atong pagtinguha nga mouswag sa espirituwal?
12 Bisan tuod hinungdanon ang pagkab-ot “sa pagkausa sa pagtuo ug sa tukmang kahibalo,” hinungdanon usab nga ipadayag nato ang bunga sa espiritu sa Diyos diha sa tanang bahin sa atong kinabuhi. Ngano man? Tungod kini kay ang pagkahamtong, sumala sa ato nang nasabtan, dili kay dili-makita o tinago, kondili maila kini pinaagi sa makita dayon nga mga hiyas nga makabenepisyo ug makapalig-on sa uban. Siyempre, ang atong tinguha nga mouswag sa espirituwal dili lamang usa ka paningkamot aron morag maayog batasan tan-awon o aron magpakaaron-ingnon. Hinunoa, samtang mouswag kita sa espirituwal, nga nagsunod sa paggiya sa espiritu sa Diyos, adunay kahibulongang kausaban sa atong mga tinamdan ug mga lihok. “Magpadayon sa paglakaw pinaagi sa espiritu ug kamo dili gayod makahimo ug unodnong tinguha,” miingon si apostol Pablo.—Galacia 5:16.
13. Unsang kausaban ang klarong timailhan sa pag-uswag?
13 Gipadayon paglista ni Pablo “ang mga buhat sa unod,” nga daghan ug “dayag.” Sa wala pa masabti sa usa ka tawo ang kahinungdanon sa mga kinahanglanon sa Diyos, siya nagkinabuhi subay sa mga paagi sa pagkinabuhi sa kalibotan ug napuno tingali sa pipila sa mga butang nga gihisgotan ni Pablo: “pakighilawas, kahugawan, malaw-ayng panggawi, idolatriya, pagbuhat sa espiritismo, mga pagdumtanay, panag-away, pangabugho, mga pagsinta sa kasuko, mga pakigtigi, mga pagkabahinbahin, mga sekta, mga kasina, mga paghuboghubog, mga hudyaka, ug mga butang nga sama niini.” (Galacia 5:19-21) Apan samtang ang usa ka tawo mouswag sa espirituwal, inanayng mabuntog niya kining dili-tilinguhaong “mga buhat sa unod” ug pulihan kini sa “bunga sa espiritu.” Kining makita-sa-gawas nga kausaban maoy klarong timailhan nga ang maong tawo nag-uswag ngadto sa Kristohanong pagkahamtong.—Galacia 5:22.
14. Ipatin-aw ang duha ka ekspresyong “ang mga buhat sa unod” ug “ang bunga sa espiritu.”
14 Angay natong matikdan ang duha ka ekspresyong “ang mga buhat sa unod” ug “ang bunga sa espiritu.” Ang “mga buhat” mao ang resulta sa ginahimo sa usa, ang sangpotanan sa mga lihok sa usa. Sa laing pagkasulti, ang gilista ni Pablo ingong mga buhat sa unod maoy resulta sa tinuyong pagpili o kaha sa impluwensiya sa makasasalang unod sa usa. (Roma 1:24, 28; 7:21-25) Sa laing bahin, ang ekspresyong “ang bunga sa espiritu” nagpasabot nga ang mga hiyas nga gilista, dili maoy mga resulta sa mga paningkamot sa gitawag ug pag-ugmad sa maayong panggawi o pagpaarang-arang sa personalidad, kondili kini maoy mga resulta sa paglihok sa espiritu sa Diyos diha sa maong tawo. Maingon nga ang kahoy mamunga sa dihang atimanon kini sa hustong paagi, ang usa ka tawo magpadayag usab ug bunga sa espiritu kon ang balaang espiritu dagayang nagalihok diha sa iyang kinabuhi.—Salmo 1:1-3.
15. Nganong hinungdanon nga hatagag pagtagad ang tanang bahin sa “bunga sa espiritu”?
15 Ang laing punto nga konsiderahon mao ang paggamit ni Pablo sa pulong “bunga” nga naglakip sa tanang tilinguhaong mga hiyas nga iyang gihisgotan. Ang espiritu dili magpatunghag lainlaing mga bunga aron pilion na lang nato ang atong nagustoan. Ang tanang hiyas nga gilista ni Pablo—gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, ug pagpugong sa kaugalingon—pulos hinungdanon, ug kining tanan maoy mopatungha ug bag-ong Kristohanong personalidad. (Efeso 4:24; Colosas 3:10) Busa, bisan tuod makita tingali nato nga ang pipila niining mga hiyasa mas dayag diha sa atong kinabuhi tungod sa atong personalidad ug mga kiling, hinungdanon nga hatagan natog pagtagad ang tanang bunga nga gihisgotan ni Pablo. Sa pagbuhat niana, mas bug-os natong ikabanaag ang samag-Kristong personalidad diha sa atong kinabuhi.—1 Pedro 2:12, 21.
16. Unsay atong tumong sa atong pagtinguha sa Kristohanong pagkahamtong, ug sa unsang paagi kini makab-ot?
16 Ang hinungdanong leksiyon nga atong makat-onan gikan sa paghisgot ni Pablo mao nga sa pagtinguha sa Kristohanong pagkahamtong, ang atong tumong dili ang pagbaton ug dakong kahibalo ug kinaadman ni ang pag-ugmad ug maayong mga taras. Ang tumong mao ang pagbaton ug walay-hunong nga suplay sa espiritu sa Diyos diha sa atong kinabuhi. Sa gilapdon nga ang atong panghunahuna ug mga lihok mosanong sa paggiya sa espiritu sa Diyos, nianang maong gilapdon nga kita mahimong hamtong sa espirituwal. Sa unsang paagi makab-ot nato kining maong tumong? Kinahanglang buksan nato ang atong kasingkasing ug hunahuna sa impluwensiya sa espiritu sa Diyos. Naglangkit kini sa atong regular nga pagtambong ug pagpakig-ambit sa Kristohanong mga tigom. Kinahanglang regular usab kitang magtuon ug mamalandong sa Pulong sa Diyos, nga magtugot sa mga prinsipyo niini nga mogiya sa atong mga pakiglabot sa uban ug sa mga pagpili ug mga desisyon nga atong himoon. Nan, tino nga ang atong pag-uswag klarong madayag.
Pag-uswag Alang sa Kahimayaan sa Diyos
17. Sa unsang paagi ang pag-uswag nalangkit sa paghimaya sa atong langitnong Amahan?
17 Sa ngadtongadto, ang pagpadayag sa atong pag-uswag maghimaya ug magdayeg, dili kanato, kondili sa atong langitnong Amahan, si Jehova, kinsa nagpaposible nga kita mohamtong sa espirituwal. Sa gabii una patya si Jesus, giingnan niya ang iyang mga tinun-an: “Ang akong Amahan mahimaya niini, nga kamo magpadayon sa pagpamungag daghan ug magpamatuod nga akong mga tinun-an.” (Juan 15:8) Pinaagi sa bunga sa espiritu nga ilang gipadayag ug sa bunga sa Gingharian sa ilang ministeryo, gihimaya sa mga tinun-an si Jehova.—Buhat 11:4, 18; 13:48.
18. (a) Unsang malipayong pagpangani ang nagakahitabo karon? (b) Unsang hagit ang gihatag niining maong pag-ani?
18 Karong adlawa, gipanalanginan ni Jehova ang iyang katawhan samtang nakigbahin sila sa tibuok-yutang espirituwal nga pagpangani. Sulod sa daghang tuig na karon, mga 300,000 ka bag-ohan kada tuig ang nagpahinungod sa ilang kaugalingon kang Jehova ug nagpasimbolo sa ilang pahinungod pinaagi sa pagpabawtismo sa tubig. Kini nakapalipay kanato ug sa walay duhaduha nakapalipay usab sa kasingkasing ni Jehova. (Proverbio 27:11) Apan aron kini mahimong padayon nga tuboran sa kalipay ug pagdayeg kang Jehova, kanang tanang bag-ohan kinahanglang “magpadayon sa paglakaw nga nahiusa [kang Kristo], nga gipagamot ug ginatukod diha kaniya ug ginapalig-on diha sa pagtuo.” (Colosas 2:6, 7) Kini naghatag ug duha-ka-pilo nga hagit sa katawhan sa Diyos. Sa usa ka bahin, kon ikaw bag-o pang nabawtismohan, dawaton ba nimo ang hagit nga magkugi aron ang “imong pag-uswag madayag sa tanang tawo”? Sa laing bahin, kon taudtaod ka nang anaa sa kamatuoran, dawaton ba nimo ang hagit nga abagahon ang responsibilidad sa pag-atiman sa espirituwal nga kaayohan sa mga bag-ohan? Sa bisan hain nianang kahimtang, klaro ang panginahanglan nga mouswag sa pagkahamtong.—Filipos 3:16; Hebreohanon 6:1.
19. Unsang pribilehiyo ug mga panalangin ang maimoha kon ipadayag nimo ang imong pag-uswag?
19 Ang maayo kaayong mga panalangin nagpaabot sa tanan nga naghago sa pagpadayag sa ilang pag-uswag. Hinumdomi ang makapadasig nga mga pulong ni Pablo human niya awhaga si Timoteo nga mouswag: “Tagda kanunay ang imong kaugalingon ug ang imong pagpanudlo. Magpabilin niining mga butanga, kay sa pagbuhat niini pagaluwason mo ang imong kaugalingon ug kadtong mamati kanimo.” (1 Timoteo 4:16) Pinaagi sa makugihong pagpadayag sa imong pag-uswag, ikaw usab makapakig-ambit sa pribilehiyo sa paghimaya sa ngalan sa Diyos ug sa pagtagamtam sa iyang mga panalangin.
Nahinumdom Ka Ba?
• Sa unsang mga paagi ikapadayag ang espirituwal nga pagkahamtong?
• Unsang matanga sa kahibalo ug pagsabot ang nagbanaag ug pagkahamtong?
• Sa unsang paagi ang pagpadayag sa “bunga sa espiritu” nagpaila ug espirituwal nga pag-uswag?
• Unsang hagit ang angay natong dawaton samtang nag-uswag kita ngadto sa pagkahamtong?
[Hulagway sa panid 13]
Ang kahinog, o kagulang, klarong mailhan
[Hulagway sa panid 15]
Mouswag kita sa espirituwal pinaagi sa pagnunot sa gipadayag nga kamatuoran
[Hulagway sa panid 17]
Ang pag-ampo motabang kanato sa pagpadayag sa “bunga sa espiritu”