Pauswaga ang Imong Pakigdait Pinaagi sa Tukmang Kahibalo

“Hinaot ang dili-takos nga kalulot ug pakigdait sa Diyos mouswag diha kaninyo pinaagi sa tukmang kahibalo sa Diyos ug kang Jesus nga atong Ginoo.”—2 PEDRO 1:2.

ANG makigdaitong relasyon nga gitukod uban kang Jehova nga Diyos sa panahon sa imong bawtismo, sa pipila ka bahin, maoy sama sa kaminyoon. Bisag makalilipay ang adlaw sa kasal, sinugdanan lamang kana sa usa ka bililhong relasyon. Uban sa paningkamot, panahon, ug eksperyensiya, ang relasyon sa kaminyoon labi pang molalom, mahimong dalangpanan sa panahon sa kalisdanan. Sa susama, pinaagi sa makugihon ug uban sa tabang ni Jehova, makapauswag ka sa imong pakigdait kaniya.

1, 2. (a) Nganong ang makigdaitong relasyon matandi sa kaminyoon? (b) Sa unsang paagi atong mapalig-on ang atong pakigdait sa Diyos?

² Gipatin-aw ni apostol Pedro kon sa unsang paagi kadtong “nakadawat sa pagtuo” makapalig-on sa ilang pakigdait sa Diyos. Siya misulat: “Hinaot ang dili-takos nga kalulot ug pakigdait mouswag diha kaninyo pinaagi sa tukmang kahibalo sa Diyos ug kang Jesus nga atong Ginoo.”​—1 Pedro 1:1, 2.

“Tukmang Kahibalo sa Diyos”

³ Ang Gregong pulong alang sa “tukmang kahibalo” (e·piʹgno·sis) nga gigamit niini nga konteksto nagkahulogan ug mas lalom, mas suod nga kahibalo. Ang berbong porma mahimong ipunting sa kahibalo nga mabatonan pinaagi sa personal nga kasinatian ug gihubad nga “nailhan ug maayo” diha sa Lucas 1:4. Gibatbat sa Gregong eskolar nga si Culverwel nga alang kaniya ang pulong nagpasabot sa pagkahimong “mas nasinati sa usa ka butang nga akong nahibaloan sa miagi; mas tukmang paglantaw sa usa ka butang nga akong nakita sa miagi gikan sa halayo.” Ang pagbaton sa “tukmang kahibalo” nalangkit sa pagkuhag mas suod nga kahibalo kang Jehova ug Jesus ingong mga persona, mas nasinati sa ilang mga hiyas.

4. Sa unsang paagi atong mapauswag ang atong kahibalo sa Diyos, ug nganong makapauswag kini sa atong pakigdait kaniya?

⁴ Ang duha ka paagi nga mabatonan kining kahibaloa mao ang maayong personal nga batasan sa pagtuon ug regular nga pagtambong sa mga tigom sa katawhan sa Diyos. Niining paagiha imong makat-onan sa labi pa katin-aw kon unsa ang paggawi sa Diyos ug kon unsay iyang hunahuna. Makaporma ka ug labi pa katin-awng panagway sa iyang personalidad diha sa hunahuna. Apan ang suod nga pagkahibalo sa Diyos nagkahulogan sa pagsundog ug sa pagpabanaag niining panagwaya. Pananglitan, gibatbat ni Jehova ang usa ka tawo nga nagpakitag samag-diyos nga pagkadili-mahakogon, ug unya Siya miingon: “Dili ba kini maoy pag-ila kanako?” (Jeremias 22:15, 16; Efeso 5:1) Ang suod nga pagsundog sa Diyos mopalambo sa imong pakigdait kaniya tungod kay miuswag ka sa pagsul-ob sa bag-ong personalidad, “nga pinaagi sa tukmang kahibalo gibag-o sumala sa dagway sa Usa nga nagbuhat niini.” Ikaw nahimong labi pang nahimut-an sa Diyos.​—Colosas 3:10.

5. (a) Sa unsang paagi ang tukmang kahibalo nakatabang sa usa ka Kristohanong babaye? (b) Sa unsang mga paagi nga labi pa natong masundog si Jehova?

⁵ Ang usa ka Kristohanong babayeng ginganlag Lynn naglisod sa pagpasaylo tungod sa panagbangi uban sa isigka-Kristohanon. Apan ang maayong personal nga pagtuon ni Lynn mipalihok kaniya sa pagsusi sa iyang tinamdan. “Akong gidumdom kon unsang matanga sa Diyos si Jehova, siya walay pagdumot,” siya miadmiter. “Gipalandong ko ang tanang gagmayng mga butang nga atong ginahimo kang Jehova matag adlaw, apan wala niya kini kuwentaha. Kining butanga bahin sa akong Kristohanong igsoon gamay ra kaayo kon itandi. Busa inigkakita nako niya, moingon ako sa akong kaugalingon, ‘Gimahal siya ni Jehova sama sa iyang pagmahal kanako.’ Kini ang nakatabang kanako sa pagsulbad sa suliran.” May nakita ka bang mga dapit diin ikaw nagkinahanglan usab ug mas suod pang pagsundog kang Jehova?​—Salmo 18:35; 103:8, 9; Lucas 6:36; Buhat 10:34, 35; 1 Pedro 1:15, 16.

Tukmang Kahibalo Bahin Kang Kristo

6. Sa unsang paagi gipakita ni Jesu-Kristo nga ang buluhatong pagsangyaw mao ang labing importante kaniya?

⁶ Ang pagbaton ug tukmang kahibalo bahin kang Jesus nagkinahanglan sa pagbaton sa “hunahuna ni Kristo” ug sundogon siya. (1 Corinto 2:16) Madasigong magwawali si Jesus sa kamatuoran. (Juan 18:37) Ang iyang mainit nga espiritu sa pag-ebanghelyo wala bugkosi sa pagpinig sa komunidad. Bisag gidumtan sa ubang mga Hudiyo ang mga taga Samaria, iyang giwalihan ang usa ka babayeng taga Samaria diha sa atabay. Gani, nakigsulti siya diha sa publiko sa tanang mga babayeng giayran!a Apan wala magpadala si Jesus sa mga pagbati sa komunidad sa pagpahunong kaniya sa iyang pagpamatuod. Ang buluhaton sa Diyos makapapresko. Siya miingon: “Ang akong kalan-on mao ang pagbuhat sa kabubut-on kaniya nga nagpadala kanako ug sa pagtapos sa iyang buluhaton.” Ang kalipay sa pagtan-aw sa pagsanong sa mga tawo, sama sa babayeng taga Samaria ug daghan pa sa katagilungsod, nakapabaskog kang Jesus sama sa kalan-on.​—Juan 4:4-42; 8:48.

7. (a) Ang kahibalo bahin kang Jesus mopalihok kanato sa pagbuhat ug unsa? (b) Nagpaabot ba ang Diyos nga ang tanan niyang mga alagad mohimog samang gidaghanon sa pagsangyaw? Ipatin-aw.

⁷ Gibati ba nimo ang sama nga pagbati ni Jesus? Tugotan ta, nga malisod kaayo alang sa kadaghanan ang pagsugod ug kolokabildo bahin sa Bibliya sa usa ka dili-kaila ug sa kasagaran ginayam-iran sa uban diha sa komunidad. Apan, ang pagbaton ug samang panghunahuna ni Jesus, dili kita makaikyas niining kamatuorana: Kinahanglang magpamatuod gayod kita. Siyempre, dili tanan makahimo sa samang gidaghanon sa pagsangyaw. Nagkalainlain kini sumala sa atong mga katakos ug mga sirkumstansiya. Busa ayaw batia nga dili gayod matagbaw ang Diyos sa imong balaang pag-alagad. Apan, ang atong kahibalo mahitungod kang Jesus, mopukaw kanato sa paghimo kutob sa atong labing maarangan. Gidayeg ni Jesus ang bug-os kalag nga pag-alagad.​—Mateo 13:18-23; 22:37.

Ang Panginahanglan sa Pagdumot sa Pagkadaotan

8, 9. Unsa ang pipila ka butang nga dulumtanan sa Diyos, ug sa unsang paagi atong ikapakita ang samang pagdumot?

⁸ Ang tukmang kahibalo makatabang usab kanato sa pagpabili sa mga butang nga gidumtan ni Jesus ug ni Jehova. (Hebreohanon 1:9; Isaias 61:8) “Adunay unom ka butang nga gidumtan ni Jehova; oo, pito nga maoy dulumtanan sa iyang kalag: mapahitas-ong mga mata, usa ka dila nga bakakon, ug mga kamot nga nag-ula sa dugo nga inosente, usa ka kasingkasing nga nagalalang sa daotang mga tinguha, nga tiil nga matulin nga modalagan ngadto sa kadaotan, usa ka bakakon nga saksi nga nagapamulong ug mga bakak, ug kadto nga nagapugas sa pagkalalis sa mga kaigsoonan.” (Proverbio 6:16-19) Kining mga tinamdana ug porma sa paggawi “dulumtanan sa iyang kalag.” Ang Hebreohanong pulong dinhi nga gihubad “dulumtanan” gikan sa pulong nga nagkahulogang “makaluod, makapasuka,” “kasilag, sa butang nga mangilngig sa tanang mga pagbati; pagdumot, kaligotgot.” Busa aron may pakigdait sa Diyos, kinahanglang ugmaron nato ang samang kasilag.

⁹ Pananglitan, isalikway ang “mapahitas-ong mga mata,” ug ang tanang pagpakitag garbo. Tapos sa bawtismo gibati sa pipila nga dili na sila magkinahanglan sa regular nga tabang niadtong nagtudlo kanila. Apan ang bag-ong mga Kristohanon kinahanglang mapaubsanong modawat ug tabang samtang magakalig-on sila sa kamatuoran. (Galacia 6:6) Dugang pa, likayi usab ang pagpanglibak, nga mopahinabog “panaglalis sa mga kaigsoonan.” Pinaagi sa pagpakaylap ug makadaot nga tabitabi, dili-makataronganong pagsaway, o kabakakan, tingali kita wala “makaulag inosenteng dugo,” apan sa tinuod atong madaot ang maayong dungog sa uban. Dili nato mabatonan ang pakigdait sa Diyos kon kita walay pakigdait sa atong mga igsoon. (Proverbio 17:9; Mateo 5:23, 24) Ang Diyos miingon usab diha sa iyang Pulong nga “iyang gidumtan ang pagbulagay.” (Malaquias 2:14, 16) Busa, ikaw ba, kon minyo, naningkamot nga mahimong lig-on ang imong kaminyoon? Ang pagbirigbirig ba ug ang pagtsansing-tsansing sa ubang kapikas dulumtanan kanimo? Ikaw ba, sama kang Jehova, nagadumot sa seksuwal nga imoralidad? (Deuteronomio 23:17, 18) Dili masayon ang pagdumot niining mga buhata, sanglit madanihon kini sa atong makasasalang unod, ug giuyonan sa kalibotan.

10. Sa unsang paagi atong maugmad ang pagdumot sa pagkadaotan?

¹⁰ Ingong tabang sa pag-ugmad sa pagdumot sa pagkadaotan, ayaw pagpalingaw sa mga pelikula, sa mga programa sa TV, sa basahon nga nagapasiugdag espiritismo, imoralidad, o kapintasan. (Deuteronomio 18:10-12; Salmo 11:5) Pinaagi sa pagdawat sa daotang buhat nga daw ‘dili ingon niana ka daotan’ o tingali makalingaw pa, ang maong kalingawan makadaot sa mga paningkamot sa pag-ugmad sa diyosnong pagdumot niana. Sa laing bahin, ang kinasingkasing nga pag-ampo makatabang, kay si Jesus miingon: “Pag-ampo kamo kanunay, aron dili kamo mahidalin-as ngadto sa panulay. Sa pagkatinuod, matinguhaon ang espiritu, apan maluya ang lawas.” (Mateo 26:41) Kon bation ang kusog nga pangibog sa unod, ang usa ka Kristohanon miingon: “Moampo ako. Usahay bation ko nga dili-takos nga moduol kang Jehova, apan pinaagi sa pagpugos ko sa akong kaugalingon sa pagbuhat niana, pinaagi sa pagpangamuyo kaniya, nadawat ko ang kusog nga akong gikinahanglan.” Labi pa nimong masabtan kon nganong gidumtan ni Jehova ang pagkadaotan kon imong palandongon ang masakit nga sangpotanan niini.​—2 Pedro 2:12, 13.

11. Unsang mga butanga ang makapabalaka usahay kanato?

¹¹ Bisag may pakigdait ka sa Diyos, usahay samokon ka sa adlaw-adlaw nga mga kalisdanan ug sa mga pagsulay ug sa imong kaugalingong mga kahuyangon usab. Hinumdomi, imong gihimo ang imong kaugalingon nga linain nga puntariya ni Satanas. Siya nakig-away batok niadtong nagasunod sa mga sugo sa Diyos ug nga mga Saksi ni Jehova! (Pinadayag 12:17) Nan, sa unsang paagi mahuptan nimo ang pakigdait sa imong kinasuloran?

Pagbuntog sa Makabalda sa Pakigdait nga mga Katalagman

12. (a) Unsay palibot sa Salmo 34? (b) Sa unsang paagi gibatbat sa Kasulatan ang mga pagbati ni David niining hitaboa?

¹² “Daghan ang mga katalagman sa matarong,” misulat si David diha sa Salmo 34:19. Sumala sa superscription niini nga salmo, gisulat kini ni David human sa hitabo nga hapit siyang mamatay. Mikalagiw gikan kang Haring Saul, midangop si David kang Achis, ang Pilistihanong Hari sa Gath. Nailhan sa sulogoon sa hari si David, ug, nakahinumdom sa iyang kadaogan sa gubat alang sa Israel, misumbong kang Achis. Sa nadunggan ni David ang pagsultihay, iyang “gitipigan kining mga pulonga sa iyang kasingkasing, ug nahadlok ug dako uyamot kang Achis nga hari sa Gath.” (1 Samuel 21:10-12) Gawas pa, kini mao ang lungsod ni Goliat, ug napatay ni David ang ilang bayani​—ug ang espada gani sa higante karon ang iyang gidala! Gamiton ba nila kining dakong espada sa pagpunggot sa iyang ulo? Unsay mahimo ni David?​—1 Samuel 17:4; 21:9.

13. Unsay gihimo ni David niining panahona sa katalagman, ug sa unsang paagi atong masundog ang iyang panig-ingnan?

¹³ Nangaliyopo si David sa Diyos uban ang mainit nga mga pagtuaw sa pagpangayog panabang. “Kining maong sinakit nanawag, ug nakadungog si Jehova. Ug gikan sa tanan niyang mga kalisdanan Iyang giluwas siya,” miingon si David. Siya usab miingon: “Ug giluwas Niya ako gikan sa tanan ko nga mga kahadlok.” (Salmo 34:4, 6, 15, 17) Ikaw ba nakakat-on usab sa pagpangaliyopo kang Jehova, nagabubo sa imong kasingkasing sa mga panahon sa kasubo? (Efeso 6:18; Salmo 62:8) Bisag ang imong suliran dili sama ka dramatiko kang David, sa gihapon imong makita nga motagana si Jehova kanimo ug panabang sa hustong panahon. (Hebreohanon 4:16) Apan labaw pa kay sa pag-ampo ang gihimo ni David.

14. Sa unsang paagi gigamit ni David ang “katakos sa paghunahuna,” ug unsay gitagana sa Diyos kanato aron matabangan kita sa pagbuhat sa ingon?

¹⁴ “Iyang [David] gitago ang iyang kabuot sa ilang atubangan ug milihok nga daw buang. . . . Sa kataposan miingon si Achis sa iyang mga sulogoon: ‘Ania karon nakita ninyo nga ang tawo nabuang. Busa ngano man nga inyong gidala siya dinhi kanako?’” (1 Samuel 21:13-15) Nagpalandong si David ug paagi aron siya makaikyas. Gipanalanginan ni Jehova ang iyang paningkamot. Sa susama, kon makaatubang kita ug malisod nga mga problema, naglaom si Jehova nga atong gamiton ang atong katakos sa hunahuna ug dili lamang maghulat kaniya nga maoy mosulbad niini alang kanato. Kita iyang gihatagan sa iyang dinasig nga Pulong, nga “makahatag sa walay mga kasinatian ug kaalam, . . . kahibalo ug katakos sa paghunahuna.” (Proverbio 1:4; 2 Timoteo 3:16, 17) Nagtagana usab ang Diyos ug mga ansiano sa kongregasyon, nga makatabang kanato sa paagi sa paghupot sa mga sukdanan sa Diyos. (1 Tesalonica 4:1, 2) Usahay, kining mga tawhana makatabang kanimo sa pagsusi sa mga publikasyon sa Watch Tower Society aron makahimog hustong desisyon o sa pagsagubang sa problema.

15. Nganong makapalipay ang Salmo 34:18?

¹⁵ Bisag mosakit usahay kanato ang atong kasingkasing tungod sa atong kaugalingong mga kahuyangon ug mga kapakyasan, kon kita may hustong tinamdan, atong mahuptan ang atong pakigdait sa Diyos. Si David misulat diha sa Salmo 34:18: “Si Jehova haduol sa nawad-ag kadasig; ug luwason niya ang nakabsan sa espiritu.” Kon mangayo kitag pasaylo ug mohimog gikinahanglang mga lakang sa pagtul-id sa mga butang (ilabina bahin sa seryosong kalapasan), si Jehova mopaduol kanato, molig-on kanato sa emosyonal nga paagi.​—Proverbio 28:13; Isaias 55:7; 2 Corinto 7:9-11.

Ang Personal nga Kahibalo Mohatag Pakigdait

16. (a) Unsa ang laing paagi nga atong mabatonan ang tukmang kahibalo sa Diyos? (b) Ipatin-aw ang pahayag ni David: “Tilawi ug tan-awa nga maayo si Jehova.”

¹⁶ Laing paagi nga atong mabatonan ang tukmang kahibalo sa Diyos, gawas pa sa pagkuhag espirituwal nga impormasyon, mao ang atong pagsinati sa kaugalingon sa iyang mahigugmaong tabang. (Salmo 41:10, 11) Ang pagkaluwas gikan sa kalisod dili kanunayng magkahulogan ug dihadiha o bug-os nga kataposan sa usa ka problema; tingali padayon nimong antuson kana. (1 Corinto 10:13) Bisag naluwas ang kinabuhi ni David didto sa Gath, nagpabilin siyang lagiw sa daghang mga tuig, nga nakaatubang ug nagkalainlaing mga kapeligrohan. Bisan pa niining tanan, nakamatikod si David sa pagtagad ug pagpaluyo ni Jehova. Siya nangita ug nakakaplag pakigdait sa Diyos, ug iyang nakat-onan nga kadtong mihimo sa ingon “dili makulangan ug butang maayo.” Nakakat-on pinaagi sa personal nga kasinatian sa paagi sa pagsuportar kaniya ni Jehova sa panahon sa katalagman, si David nakaingon: “Tilawi ug tan-awa ninyo nga maayo si Jehova; Oh kamo nga katawhan; malipayon ang tawo nga modangop kaniya.”​—Salmo 34:8-10, 14, 15.

17. Sa panahon sa katalagman, unsay epekto ang pagdangop kang Jehova diha sa usa ka pamilya?

¹⁷ Ang pagdangop kang Jehova sa panahon sa kalisod mopahimo usab kanimo sa “pagtilaw ug sa pagtan-aw nga maayo si Jehova.” Tungod sa usa ka aksidente, ang usa ka Kristohanon sa tunga sa kasadpan sa Tinipong Bansa nawad-an ug maayong suweldong trabaho nga iyang gikuptan sulod sa 14 ka tuig. Sanglit sila walay kinitaan, siya ug ang iyang pamilya nangaliyopo sa Diyos. Apan, sa samang panahon, ilang gipakubsan ang ilang mga gastos, nanghagdaw sa kanait nga mga uma, ug nangisda. Uban sa tabang sa uban diha sa kongregasyon ug sa partaym nga trabaho kon aduna, kining pamilya sa upat nakatigayon ra. Human sa usa ka tuig sukad sa aksidente, ang inahan miingon: “Gibinuangan nato ang atong kaugalingon sa paghunahuna nga kita nagasalig kang Jehova, apan sa tinuod nagasalig kita sa atong kaugalingong mga katakos, sa atong kapikas, sa atong trabaho. Apan, kami hinunoa, tinuod nakakat-on sa pagsalig lamang Kaniya. Mahimong mawala kining ubang mga butang, apan wala gayod kami pasagdi ni Jehova​—wala bisan usa lamang ka gutlo. Bisag igoigo lang ang among nabatonan, ang among relasyon kang Jehova ingong pamilya labi pang nahimong suod.”

18. Unsay makatabang kanimo sa pag-antos sa padayong mga problema?

¹⁸ Oo, tingali magpadayon ang kalisod sa panalapi. O tingali gihampak ang uban sa sugmatsugmat nga pisikal nga sakit; o sa kasungian sa uban; o may emosyonal nga sakit, sama sa depresyon; o usa sa daghan pang mga problema. Bisan pa niana, pinaagi sa tinuod nga pagkahibalo sa Diyos, makabaton ka ug pagtuo sa iyang pagpaluyo. (Isaias 43:10) Kining malig-ong pagsalig motabang kanimo sa pag-antos ug sa pagbaton ug “pakigdait sa Diyos nga nagalapaw sa tanang pagpanabot.”​—Filipos 4:7.

19. Sa unsang paagi nasayod kita nga gihatagag bili ni Jehova ang atong mga pag-antos?

¹⁹ Dihang mailalom sa makapabalang hitabo, ayaw kalimot nga nahibalo si Jehova nga ikaw nagaantos. Diha sa salmo nga gisulat dihang siya nagpalandong sa nahitabo kaniya sa Gath, si David mihangyo kang Jehova: “Ibutang mo ang akong mga luha sa imong panit nga botelya. Wala ba sila diha sa imong basahon?” (Salmo 56:8) Sa pagkatinuod, ang Diyos namati sa hangyo ni David. Unsa ka makahupay ang pagkasayod nga tigomon sa Diyos ang mga luha nga gipahinabo sa kasakit ug kabalaka ug ibutang kini sila, pagaingon pa, diha sa iyang panit nga botelya, sama sa pagbubo sa usa ka tawo diha niini ug bililhong bino o tubig ilimnon! Ang maong mga luha hinumdoman gayod kanunay, oo, nasulat diha sa basahon sa Diyos. Pagkamaluloton sa pagtagad ni Jehova!

20. Sa unsang paagi atong mapauswag ang atong pakigdait sa Diyos?

²⁰ Busa ang imong bawtismo maoy sinugdanan lamang sa makigdaitong relasyon sa Diyos. Pinaagi sa dugang nga pagsinati sa personal nga mga hiyas sa Diyos ug ni Jesus, ug sa pag-eksperyensiya sa kaugalingon sa pagpaluyo ni Jehova niining mga pagsulaya, imong mapauswag ang imong pakigdait sa Diyos. Dili lamang mabatonan mo ang relasyon ni Jehova nga mahimong dalangpanan sa kasegurohan karon kondili mabatonan usab nimo ang bililhong paglaom sa pagkinabuhi sa walay kataposan diha sa Paraiso, nga niini imong makita ang “tumang kalipay diha sa kadagaya sa pakigdait.”—Salmo 37:11, 29.

[Mga footnote]

Makahinumdom Ka Ba?

◻ Sa unsang mga paagi atong mabatonan ang tukmang kahibalo sa Diyos ug kang Jesus?

◻ Ang pagsundog sa Diyos ug kang Jesus mopahimo kanato sa pagbuhat ug unsa?

◻ Sa unsang paagi atong masundog ang Diyos sa pagdumot sa daotan?

◻ Sa unsang paagi atong mahuptan ang pakigdait bisan pa sa mga kalisod?

3. Unsay kahulogan sa pagbaton ug tukmang kahibalo bahin kang Jehova ug Kristo?

[Hulagway sa panid 17]

Wala magpadala si Jesus sa mga pagpinig sa komunidad nga mababagan ang iyang pagpamatuod. Gisundog mo ba ang iyang kadasig sa pagsangyaw?

[Mga Letrato sa panid 18]

Dihang giatubang ang mabug-at nga suliran, nangaliyopo si David kang Jehova. . . .  ug iyang gitago ang iyang kabuot aron makaplanog kaikyasan. Gitubag ni Jehova ang pag-ampo ni David