Kahadloki ang Diyos ug Padayon Kang Makabenepisyo

1-2. Sama kang Lot, unsang lisod nga situwasyon ang giatubang sa mga Kristohanon karon?

BAHIN sa ubos nga moralidad sa kalibotan karon, gibati sab nato ang gibati sa matarong nga si Lot. “Naguol [siya] pag-ayo tungod sa walay kaulaw nga paggawi sa masinupakong katawhan,” kay nahibalo siya nga gidumtan sa atong langitnong Amahan ang daotang binuhatan. (2 Ped. 2:7, 8) Ang iyang kahadlok ug gugma sa Diyos nagpalihok kang Lot nga dumtan ang imoral nga binuhatan sa mga tawo sa iyang palibot. Kita sab napalibotan ug mga tawo nga wala kaayoy pagtahod o nagsalikway gyod sa moral nga mga sukdanan ni Jehova. Bisan pa niana, makapabilin tang hinlo sa moral kon padayon natong higugmaon ang Diyos ug ugmaron ang hustong kahadlok kaniya.—Prov. 14:2.

² Aron ato nang mahimo, si Jehova mahigugmaong naghatag ug pagdasig pinaagi sa basahon sa Proverbio. Ang tanang Kristohanon, lalaki ug babaye, bata ug tigulang, makabenepisyo gyod sa maalamong mga tambag niini nga basahon.

 3. Sumala sa Proverbio 17:3, unsa ang usa ka rason nga panalipdan nato ang atong kasingkasing? (Tan-awa sab ang hulagway.)

³ Ang usa ka importanteng rason nga panalipdan nato ang atong simbolikong kasingkasing mao nga ginasusi kini ni Jehova. Nagpasabot ni nga makita ni Jehova dili lang kon unsay makita sa uban kanato, kondili kon kinsa gyod ta. (Basaha ang Proverbio 17:3.) Higugmaon ta niya kon pun-on nato ang atong hunahuna sa iyang kaalam, nga makahatag natog kinabuhing walay kataposan. (Juan 4:14) Kon ato nang himoon, dili makasulod sa atong hunahuna ang makahilong impluwensiya ni Satanas ug sa iyang kalibotan. (1 Juan 5:18, 19) Dihang mas masuod ta kang Jehova, mas molalom ang atong gugma ug pagtahod niya. Kay dili nato gustong pasakitan ang atong Amahan, dumtan gyod nato bisan ang paghunahuna pa lang nga mohimog sala. Dihang tentalon ta sa pagbuhat ug daotan, pangutan-on nato ang atong kaugalingon, ‘Makaako ba gyod ko nga pasakitan ang Diyos nga nagmahal pag-ayo nako?’—1 Juan 4:9, 10.

 4. Sa unsang paagi ang kahadlok kang Jehova nakatabang sa usa ka sister nga dili madaog sa tentasyon?

⁴ Si Marta, sister nga taga-Croatia, gitental sa paghimog imoralidad. Siya misulat: “Naglisod kog kontrol sa akong hunahuna. Lisod pod suklan ang tinguha nga i-enjoy ang temporaryong kalipay sa pagpakasala. Pero ang kahadlok kang Jehova nakapanalipod nako.”b Sa unsang paagi? Si Marta miingon nga iyang gipamalandong ang daotang mga resulta kon mohimo siyag sayop nga desisyon. Mahimo pod nato na. Ang pinakagrabeng resulta sa pagpakasala kay mapasakitan nato si Jehova ug dili ta maapil niadtong makaalagad niya hangtod sa hangtod.—Gen. 6:5, 6.

 5. Unsay imong nakat-onan sa eksperyensiya ni Leo?

⁵ Kon naa tay kahadlok kang Jehova, mag-amping ta nga dili makighigala niadtong naghimog daotang mga buhat. Mao nay nakat-onan ni Leo, nga nagpuyo sa Congo. Upat ka tuig human siya mabawtismohi, nasuod siya sa mga tawo nga nagahimog daotan. Naghunahuna siya nga basta dili lang niya himoon ang ginahimo sa iyang mga higala, wala siya makasala kang Jehova. Pero wala madugay, naimpluwensiyahan na siya sa iyang mga higala sa paghuboghubog ug paghimog imoralidad. Sa ulahi, gipamalandong niya ang gitudlo sa iyang Kristohanong mga ginikanan ug kon unsa siya ka malipayon kaniadto. Unsay resulta? Nakaamgo siya. Sa tabang sa mga ansiyano, nakabalik siya kang Jehova. Karon, malipayon siyang nag-alagad ingong ansiyano ug espesyal payunir.

 6. Unsang duha ka simbolikong babaye ang atong hisgotan?

⁶ Atong konsiderahon ang Proverbio kapitulo 9 nga naghisgot bahin sa kaalam ug kabuangan, nga gisimbolohan sa duha ka babaye. (Itandi ang Roma 5:14; Galacia 4:24.) Samtang ato ning hisgotan, hinumdomi nga ang kalibotan ni Satanas nagpatuyang sa seksuwal nga imoralidad ug pornograpiya. (Efe. 4:19) Maong importante kaayo nga padayon natong ugmaron ang kahadlok sa Diyos ug mopalayo sa daotan. (Prov. 16:6) Kitang tanan, lalaki man o babaye, makabenepisyo sa atong makat-onan niini nga kapitulo. Kining duha ka babaye parehong nangimbitar niadtong walay kasinatian—kadtong “dili maayog panghunahuna.” Ang kada usa nila samag miingon, ‘Anhi mo sa balay ug mangaon ta.’ (Prov. 9:1, 5, 6, 13, 16, 17) Pero lahi kaayo ang resulta sa matag imbitasyon.

 7. Sumala sa Proverbio 9:13-18, unsay resulta sa pagdawat sa imbitasyon sa babayeng buangbuang? (Tan-awa sab ang hulagway.)

⁷ Matikdi ang imbitasyon sa “babayeng buangbuang.” (Basaha ang Proverbio 9:13-18.) Siya walay kaulaw nga nanawag niadtong dili maayog panghunahuna, ‘Anhi mo ug kaon’ diri. Unsay resulta? “Ang iyang balay punog mga patay.” Mahinumdom tingali ka sa nag-unang mga kapitulo sa Proverbio nga naggamit ug susamang mga pulong. Gipasidan-an ta bahin sa “makasasala” ug “imoral nga babaye.” Kita giingnan: “Ang pag-adto sa iyang balay samag pagpaingon sa kamatayon.” (Prov. 2:11-19) Gipasidan-an pod ta sa Proverbio 5:3-10 bahin sa laing “makasasala nga babaye” nga ang “mga tiil nanaog ngadto sa kamatayon.”

 8. Unsang desisyon ang kinahanglan natong himoon?

⁸ Kadtong nakadungog sa “babayeng buangbuang” kinahanglang modesisyon: Dawaton ba nila ang iyang imbitasyon o dili? Makaatubang pod tingali tag ingon ana nga situwasyon. Kon naay tentasyon nga mohimog seksuwal nga imoralidad o motan-awg pornograpiya, sama sa makita diha sa mga salida ug sa Internet, unsay atong buhaton?

9-10. Unsay pipila ka rason kon nganong angay natong likayan ang seksuwal nga imoralidad?

⁹ Naay seryoso kaayong mga rason kon nganong angay natong likayan ang seksuwal nga imoralidad. Ang “babayeng buangbuang” nag-ingon: “Tam-is ang kinawat nga tubig.” Unsa ang “kinawat nga tubig”? Sa Bibliya, ang seksuwal nga relasyon sa magtiayon gipakasamag makarepresko nga tubig. (Prov. 5:15-18) Ang bana ug asawa malipay sa haom nga seksuwal nga mga buhat sulod sa ilang kaminyoon. Pero lahi kaayo ang “kinawat nga tubig.” Kini mahimong nagtumong sa gidili, imoral nga pakigsekso. Sagad ginahimo ni sa tago, sama sa kawatan nga sagad mangawat sa tago. Ang “kinawat nga tubig” daw tam-is para niadtong naghunahuna nga dili sila masakpan sa ilang sala. Pero giilad lang nila ang ilang kaugalingon! Nakita ni Jehova ang tanan. Wala nay mas pait pa kay sa mawad-an sa pag-uyon ni Jehova; dili gyod na “tam-is.” (1 Cor. 6:9, 10) Pero naa pay dili maayong mga resulta.

¹⁰ Ang seksuwal nga imoralidad mahimong moresultag kaulawan, pagbati nga way pulos, wala damhang pagbuntis, ug pagkabungkag sa pamilya. Busa maalamon gyod nga likayan ang “balay” sa babayeng buangbuang ug dili mokaon didto. Gawas nga mamatay sila sa espirituwal, daghang imoral nga mga tawo ang nakakuhag mga sakit nga moresultag literal nga kamatayon. (Prov. 7:23, 26) Ang bersikulo 18 sa kapitulo 9 nag-ingon: “Ang iyang mga bisita naa sa kinailadman sa Lubnganan.” Pero nganong daghan man gihapon ang modawat sa iyang imbitasyon nga moresulta man nig kamatayon?—Prov. 9:13-18.

11. Nganong makadaot kaayo ang pagtan-awg pornograpiya?

¹¹ Ang usa ka komon nga lit-ag mao ang pornograpiya. Para sa uban, ang pagtan-awg pornograpiya dili ra makadaot. Pero ang tinuod, ang pornograpiya makadaot, makawalag pagtahod sa kaugalingon, ug makaadik. Ang imoral nga mga hulagway dili daling malimtan ug lisod wad-on sa hunahuna. Gawas pa ana, ang pornograpiya dili makapatay sa sayop nga mga tinguha; makapasamot hinuon ni. (Col. 3:5; Sant. 1:14, 15) Oo, daghan niadtong nagtan-awg pornograpiya ang nakahimog imoral nga mga buhat.

12. Unsaon nato pagpakita nga atong ginalikayan ang mga hulagway nga makapukaw sa seksuwal nga mga tinguha?

¹² Ingong mga Kristohanon, unsay angay natong himoon kon kalit nga motungha ang pornograpikong mga hulagway sa atong gadyet? Kinahanglang isalikway dayon nato kini. Mahimo nato na kon atong hinumdoman kon unsa gyoy pinakaimportante para nato—ang atong relasyon kang Jehova. Ang tinuod, ang mga hulagway nga dili ra pornograpiko posibleng makapukaw gihapon sa seksuwal nga mga tinguha. Nganong angay nato ning likayan? Kay dili nato gustong mohimog bisan gamayng butang nga moresultag pagpanapaw diha sa atong kasingkasing. (Mat. 5:28, 29) Si David, ansiyano sa Thailand, miingon: “Pangutan-on nako ang akong kaugalingon: ‘Bisag dili ra tingali pornograpiko ang mga hulagway, malipay ba si Jehova kon padayon kong magtan-aw ani?’ Ang mga pangutana nga sama niini nakatabang nako nga mohimog maalamong desisyon.”

13. Unsay makatabang nato sa paghimog maalamong desisyon?

¹³ Aron makahimo tag maalamong desisyon, makatabang ang pag-ugmad ug hustong kahadlok nga mapasuko si Jehova. Ang pagkahadlok sa Diyos mao “ang sinugdan,” o pundasyon, “sa kaalam.” (Prov. 9:10) Nindot ang pagkailustrar niini sa unang mga bersikulo sa Proverbio kapitulo 9, diin atong mabasa ang laing simbolikong babaye nga nagtumong sa “matuod nga kaalam.”

14. Unsang lahi nga imbitasyon ang mabasa sa Proverbio 9:1-6?

¹⁴ Basaha ang Proverbio 9:1-6. Mabasa nato dinhi ang imbitasyon nga naggikan sa Tinubdan ug Pundasyon sa matuod nga kaalam, ang atong maalamon kaayong Maglalalang. (Prov. 2:6; Roma 16:27) Naghisgot nig dakong balay nga naay pito ka haligi. Kini nagpakita nga si Jehova mahinatagon ug iyang dawaton ang tanan nga gustong mopadapat sa iyang kaalam.

15. Unsay gusto sa Diyos nga atong himoon?

¹⁵ Si Jehova mahinatagon kaayo ug abundang motagana. Kini nga mga hiyas gipakita sa “matuod nga kaalam,” nga sa Hebreohanong pinulongan gihulagway ingong babaye sa Proverbio kapitulo 9. Ang bersikulo 2 naghisgot nga naandam na sa babaye ang iyang karne, nahuman na niyag sagol ang iyang bino, ug naandam na niya ang lamesa sa iyang balay. (Prov. 9:2) Dayon ang bersikulo 4 ug 5 nag-ingon: “Giingnan niya [sa matuod nga kaalam] kadtong dili maayog panghunahuna: ‘Dali, kaon mo sa akong tinapay.’” Nganong angay tang moadto sa balay sa matuod nga kaalam ug mokaon sa iyang giandam? Gusto ni Jehova nga ang iyang mga anak magmaalamon ug luwas. Dili niya gusto nga mag-antos ta ayha ta makakat-og leksiyon—pinaagig pait nga mga eksperyensiya ug mga pagmahay. Kanay rason nga “naa siyay tinigom nga praktikal nga kaalam para sa mga matul-id.” (Prov. 2:7) Kon naa tay kahadlok kang Jehova, gusto nato siyang lipayon. Maminaw ta sa iyang tambag ug malipay nga motuman niini.—Sant. 1:25.

16. Sa unsang paagi ang kahadlok sa Diyos nakatabang kang Alain sa paghimog maalamong desisyon, ug unsay resulta?

¹⁶ Matikdi kon sa unsang paagi ang kahadlok sa Diyos nakatabang kang Alain, usa ka ansiyano ug maestro, sa paghimog maalamong desisyon. Siya miingon: “Kadaghanan sa akong mga kauban sa eskuwelahan naghunahuna nga ang pornograpikong mga salida makatudlo bahin sa sekso.” Pero nahibalo si Alain nga sayop ang pagtan-aw niana. Siya miingon: “Tungod sa akong kahadlok sa Diyos, wala gyod ko motan-aw adto nga mga salida. Gi-explain pod nako sa akong mga katrabaho kon nganong dili ko motan-aw.” Gipadapat niya ang tambag sa “matuod nga kaalam” nga ‘subayon ang dalan sa pagsabot.’ (Prov. 9:6) Tungod sa lig-ong baroganan ni Alain, mibilib ang uban niyang mga katrabaho, ug karon nagtuon na sila sa Bibliya ug nagtambongan na sa mga tigom.

17-18. Unsang mga panalangin ang natagamtam niadtong midawat sa imbitasyon sa “matuod nga kaalam,” ug unsay ilang mabatonan sa umaabot? (Tan-awa sab ang hulagway.)

¹⁷ Gigamit ni Jehova ang duha ka simbolikong babaye aron ipakita kon sa unsang paagi ta makabatog kinabuhi nga punog kalipay ug mga panalangin. Kadtong midawat sa imbitasyon sa sabaan ug ‘buangbuang nga babaye’ nagpokus sa “tam-is,” tinagotago nga kalipay. Nagpatuyang sila sa kon unsay makapalipay nila karon, ug wala sila maghunahuna sa ilang kaugmaon. Sila mopadulong “sa kinailadman sa Lubnganan.”—Prov. 9:13, 17, 18.

¹⁸ Lahi ra gyod kaayo ang kahimtang niadtong midawat sa imbitasyon sa “matuod nga kaalam”! Ang iyang mga bisita nalipay kaayo sa abunda ug makapahimsog nga espirituwal nga pagkaon nga giandam para nila. (Isa. 65:13) Pinaagi kang propetang Isaias, si Jehova miingon: “Pamati pag-ayo kanako, ug kaon kon unsay maayo, ug makakaplag mog dakong kalipay sa kon unsa gyoy makapahimsog.” (Isa. 55:1, 2) Nakakat-on ta nga higugmaon kon unsay gihigugma ni Jehova ug dumtan ang iyang gidumtan. (Sal. 97:10) Ug nalipay ta nga dapiton ang uban aron makabenepisyo pod sila sa “matuod nga kaalam.” Sama bag kita ‘nanawag diha sa habog nga mga dapit sa siyudad: “Bisan kinsa nga walay kasinatian, paanhia siya.”’ Kita ug kadtong modawat niini nga imbitasyon makabatog mga panalangin dili lang karon kondili sa umaabot pod. Kita “mabuhi” hangtod sa hangtod samtang padayon tang ‘nagsubay sa dalan sa pagsabot.’—Prov. 9:3, 4, 6.

19. Base sa Ecclesiastes 12:13, 14, unsay determinado natong buhaton? (Tan-awa sab ang kahong “Ang Pagkahadlok sa Diyos Makahatag Natog Kaayohan.”)

¹⁹ Basaha ang Ecclesiastes 12:13, 14. Hinaot nga ang atong kahadlok sa Diyos padayong manalipod sa atong kasingkasing ug motabang nato nga magpabiling hinlo sa moral ug suod kang Jehova niining daotan ug kataposang mga adlaw. Ang atong kahadlok sa Diyos mopalihok nato nga padayong dapiton ang daghang tawo sa pagpangita sa “matuod nga kaalam” ug makabenepisyo niini.