Ang mga Kaayohan sa Usa ka Malinawong Kasingkasing

ANG modernong medikal nga siyensiya dugay na nga nahibalo nga ang di-mapugngan nga kasuko may makadaot nga epekto sa lawas sa tawo. Kapin sa usa ka gatos ka tuig kanhi, ang The Journal of the American Medical Association (JAMA) miingon: “Ang usa ka tawo mamatay diha sa usa ka nagaalintabong kapungot, ug gikaingon, tingali, nga siya may mahuyang nga kasingkasing, nga dili makasugakod sa kapit-os nga gipahinabo sa iyang kahimtang sa kaisipan. Maorag walay maghunahuna nga kini maoy kinutbanan sa dugayng mga serye nianang nagaalintabong kasuko, nga nagpahinabo mismo sa pagkahuyang sa kasingkasing.”

Ang mga pulong sa itaas dili kahibudngan sa mga estudyante sa Pulong sa Diyos, ang Bibliya. Mga 29 ka siglo sa wala pa maghisgot ang JAMA bahin sa mga kapeligrohan sa pagkasuko, si Haring Solomon gidasig sa pagsulat: “Ang usa ka malinawong kasingkasing maoy kinabuhi sa unodnong organismo.” (Proverbio 14:30) Kining mga pulonga tinuod gihapon karong adlawa.

Pinaagi sa paghupot ug malinawong kaisipan, malikayan nato ang daghang sakit nga sagad nalangkit sa tensiyon, sama sa pagtaas sa presyon sa dugo, labad sa ulo, ug mga suliran sa respiratoryo. Dugang pa sa napalambo nga panglawas, hinunoa, ang atong mga relasyon sa uban makabenepisyo kon kita maningkamot nga “likayan ang kasuko ug talikdan ang kapungot.” (Salmo 37:8) Ang mga tawo sa kinaiyanhon miduol kang Jesus tungod sa iyang kalumo ug kinasingkasing nga kabalaka kanila. (Marcos 6:31-​34) Sa ingon usab, kita mahimong tinubdan sa kahupayan sa uban kon atong maugmad ang usa ka malinawong kasingkasing.​—Mateo 11:28-​30.