Pagpabiling Lig-on nga Daw Nakakita sa Usa nga Dili Makita!
‘[Si Moises] nagpabiling lig-on nga daw nakakita sa Usa nga dili-makita.’—HEBREOHANON 11:27.
1. Unsang talagsaong pahayag bahin sa Diyos ang gisulti ni Jesus sa iyang Wali sa Bukid?
SI Jehova mao ang dili-makita nga Diyos. Sa dihang mihangyo si Moises nga motan-aw sa Iyang himaya, si Jehova mitubag: “Dili ka arang makakita sa akong nawong, tungod kay walay tawo nga makakita kanako ug mabuhi pa.” (Exodo 33:20) Ug si apostol Juan misulat: “Walay tawo nga nakakita sa Diyos sa bisan unsang panahon.” (Juan 1:18) Sa dihang tawo pa si Jesu-Kristo dinhi sa yuta, bisan siya dili makakita sa Diyos. Sa iyang Wali sa Bukid, hinunoa, si Jesus miingon: “Malipayon ang mga putli sa kasingkasing, sanglit sila makakita sa Diyos.” (Mateo 5:8) Unsay buot ipasabot ni Jesus?
2. Nganong dili kita makakita sa Diyos pinaagi sa atong pisikal nga mga mata?
2 Ang Kasulatan nagpaila kang Jehova ingong dili-makita nga Espiritu. (Juan 4:24; Colosas 1:15; 1 Timoteo 1:17) Busa, wala mag-ingon si Jesus nga kitang mga tawo aktuwal nga makakita kang Jehova pinaagi sa atong pisikal nga mga mata. Tinuod, ang dinihogang mga Kristohanon makakita kang Jehova nga Diyos sa langit human sila banhawon ingong espiritung mga linalang. Apan ang mga tawo nga “putli sa kasingkasing” ug adunay paglaom nga mabuhing walay kataposan sa yuta “makakita” usab sa Diyos. Sa unsang paagi posible kini?
3. Sa unsang paagi ang mga tawo makaila sa pipila sa mga hiyas sa Diyos?
3 Aduna kitay makat-onan bahin kang Jehova pinaagi sa maampingong pagpaniid sa mga butang nga iyang gilalang. Busa makadayeg tingali kita sa iyang gahom ug matukmod sa pag-ila kaniya ingong Diyos ang Maglalalang. (Hebreohanon 11:3; Pinadayag 4:11) Mahitungod niini, si apostol Pablo misulat: “Ang dili-makita nga mga hiyas [sa Diyos], nga mao ang iyang walay kataposang gahom ug pagka-Diyos, tin-awng makita sukad sa paglalang sa kalibotan padayon, tungod kay kini sila maila pinaagi sa mga butang nga gihimo.” (Roma 1:20) Busa ang mga pulong ni Jesus mahitungod sa pagkakita sa Diyos naglakip sa katakos sa pag-ila sa pipila sa mga hiyas ni Jehova. Ang maong pagkakita gipasukad sa tukmang kahibalo ug maila sa espirituwal nga paagi pinaagi sa ‘mga mata sa kasingkasing.’ (Efeso 1:18) Ang mga pulong ug mga buhat ni Jesus dako usab ug gipadayag bahin sa Diyos. Busa, si Jesus miingon: “Siya nga nakakita kanako nakakita usab sa Amahan.” (Juan 14:9) Hingpit nga gibanaag ni Jesus ang personalidad ni Jehova. Busa, ang pagkahibalo bahin sa kinabuhi ug mga pagtulon-an ni Jesus makatabang kanato sa pagkakita, o pag-ila, sa pipila sa mga hiyas sa Diyos.
Hinungdanon ang Espirituwalidad
4. Sa unsang paagi ang kakulang sa espirituwalidad gipadayag sa daghan karon?
4 Karong panahona, ang pagtuo ug ang tinuod nga espirituwalidad maoy talagsaon gayod. “Ang pagtuo wala mabatoni sa tanang tawo,” miingon si Pablo. (2 Tesalonica 3:2) Daghan ang bug-os nga nalinga sa ilang personal nga mga pangagpas ug walay pagtuo sa Diyos. Ang ilang makasasalang panggawi ug kakulang sa espirituwalidad nagpugong kanila sa pagkakita kaniya pinaagi sa mga mata sa pagsabot, kay si apostol Juan misulat: “Siya nga nagabuhat sa daotan wala makakita sa Diyos.” (3 Juan 11) Tungod kay ang maong mga tawo wala makakita sa Diyos pinaagi sa ilang pisikal nga mga mata, nagagawi sila nga daw wala siya makakita sa ilang ginabuhat. (Ezequiel 9:9) Ilang gitamay ang espirituwal nga mga butang, busa dili nila mabatonan ang “mismong kahibalo sa Diyos.” (Proverbio 2:5) Nan, haom nga si Pablo misulat: “Ang tawong pisikal dili magadawat sa mga butang nga iya sa espiritu sa Diyos, kay kini kabuangan man alang kaniya; ug siya dili arang makaila niini, tungod kay kini ginausisa man sa espirituwal nga paagi.”—1 Corinto 2:14.
5. Ang mga tawong mahunahunaon sa espirituwal magmatngon sa unsang kamatuoran?
5 Apan, kon kita mahunahunaon sa espirituwal nga mga butang, kanunay kitang magmatngon nga bisan tuod si Jehova dili usa ka Diyos nga tigpangitag sayop, nahibalo siya sa dihang molihok kita sumala sa daotang mga hunahuna ug mga tinguha. Sa pagkatinuod, “ang mga dalan sa usa ka tawo anaa sa atubangan sa mga mata ni Jehova, ug siya nagapamalandong sa tanan niyang mga alagianan.” (Proverbio 5:21) Kon masapnan kita sa sala, mapalihok kita sa paghinulsol ug pagpangayo sa kapasayloan ni Jehova tungod kay kita nahigugma kaniya ug dili nato buot nga pasakitan siya.—Salmo 78:41; 130:3.
Unsay Makapalig-on Kanato?
6. Unsay kahulogan sa pagkahimong lig-on?
6 Bisan tuod si Jehova dili makita sa atong mga mata, kanunay natong hinumdoman nga kita iyang makita. Ang pagkasayod sa iyang paglungtad ug ang pagkakombinsido nga siya haduol niadtong tanan nga nagatawag kaniya motabang sa paghimo kanatong lig-on—maayong pagkagamot ug dili matarog sa atong pagkamatinumanon kaniya. (Salmo 145:18) Mahimong sundogon nato si Moises, nga bahin kaniya si Pablo misulat: “Tungod sa pagtuo siya mibiya sa Ehipto, apan dili kay nahadlok sa kasuko sa hari, kay siya nagpabiling lig-on nga daw nakakita sa Usa nga dili-makita.”—Hebreohanon 11:27.
7, 8. Unsay hinungdan sa kaisog ni Moises atubangan kang Paraon?
7 Sa pagtuman sa iyang hinatag-Diyos nga sugo sa pagpanguna sa mga Israelinhon sa paggawas sa pagkaulipon sa Ehipto, si Moises subsob nga miatubang sa madaogdaogong Paraon diha sa harianong palasyo nga puno sa mga kadagkoan sa relihiyon ug sa militar. Lagmit, ang mga bungbong sa palasyo gilinyahan ug mga idolo. Apan si Jehova, bisan tuod dili makita, tinuod alang kang Moises, dili sama sa tanang idolo nga naghawas sa walay-kinabuhing mga diyos sa Ehipto. Dili ikatingala nga si Moises wala mahadlok kang Paraon!
8 Unsay naghatag kang Moises ug kaisog nga sublisubling moatubang kang Paraon? Giingnan kita sa Kasulatan nga “ang tawo nga si Moises mao ang labing maaghop sa tanang tawo sa ibabaw sa nawong sa yuta.” (Numeros 12:3) Klaro, ang iyang lig-ong espirituwalidad ug ang pagkakombinsido nga ang Diyos nag-uban kaniya maoy naghatag kang Moises ug kalig-on nga gikinahanglan sa paghawas ‘sa Usa nga dili makita’ atubangan sa walay kaluoy nga hari sa Ehipto. Unsa ang pipila ka paagi nga niana kadtong “nakakita” sa dili-makita nga Diyos nagpasundayag sa ilang pagtuo kaniya karon?
9. Unsa ang usa ka paagi nga kita makapabiling lig-on?
9 Ang usa ka paagi sa pagpasundayag ug pagtuo ug pagpabiling lig-on nga daw nakakita sa Usa nga dili makita maoy pinaagi sa pagsangyaw nga maisogon bisan pa sa paglutos. Gipasidan-an ni Jesus ang iyang mga tinun-an: “Kamo pagadumtan sa tanang katawhan tungod sa akong ngalan.” (Lucas 21:17) Giingnan usab niya sila: “Ang ulipon dili labaw kay sa iyang agalon. Kon sila naglutos kanako, sila magalutos usab kaninyo.” (Juan 15:20) Sumala sa gisulti ni Jesus, wala madugay human sa iyang pagkamatay, ang iyang mga sumusunod nakaagom ug paglutos sa matang sa mga pagpanghulga, pagpangdakop, ug pagpamunal. (Buhat 4:1-3, 18-21; 5:17, 18, 40) Bisan tuod dihay sunodsunod nga paglutos, ang mga apostoles ni Jesus ug ang ubang mga tinun-an nagpadayon sa pagsangyaw sa maayong balita uban ang kaisog.—Buhat 4:29-31.
10. Sa unsang paagi ang atong pagsalig sa mapanalipdanong pag-atiman ni Jehova motabang kanato diha sa ministeryo?
10 Sama kang Moises, ang unang mga sumusunod ni Jesus wala mahadlok sa ilang daghang mga kaaway nga makita. Ang mga tinun-an ni Jesus may pagtuo sa Diyos, ug ingong resulta, sila nakalahutay sa grabeng paglutos nga ilang naagoman. Oo, sila nagpabiling lig-on nga daw nakakita sa Usa nga dili makita. Karong panahona, ang pagkasayod kanunay sa mapanalipdanong pag-atiman ni Jehova magpalig-on kanato, maghatag kanatog kaisog diha sa atong buluhatong pagsangyaw sa Gingharian. Ang Pulong sa Diyos nag-ingon nga “ang pagpangurog tungod sa mga tawo nagadala ug usa ka lit-ag, apan siya nga nagasalig kang Jehova pagapanalipdan.” (Proverbio 29:25) Busa, dili kita mouk-ok sa kahadlok gumikan sa paglutos; ni ikaulaw nato ang atong ministeryo. Ang atong pagtuo mopalihok kanato sa pagpamatuod nga maisogon ngadto sa mga silingan, mga kauban sa trabaho, mga eskolmet, ug sa uban pa.—Roma 1:14-16.
Ang Usa nga Dili Makita Nagtultol sa Iyang Katawhan
11. Sumala kang Pedro ug Judas, sa unsang paagi ang pipila nga nakig-uban sa Kristohanong kongregasyon nagpasundayag ug kakulang sa espirituwalidad?
11 Ang pagtuo motabang kanato sa pagkasabot nga si Jehova mao ang usa nga nagtultol sa iyang yutan-ong organisasyon. Busa likayan nato ang pagkahimong hinawayon niadtong nag-abaga ug responsibilidad diha sa kongregasyon. Si apostol Pedro ug ang igsoon ni Jesus sa inahan nga si Judas nagpasidaan mahitungod sa pipila ka tawo nga nakulangan pag-ayo sa espirituwalidad nga sila nagsulti nga mapasipalahon sa mga lalaki nga nanguna taliwala sa mga Kristohanon. (2 Pedro 2:9-12; Judas 8) Ang maong mga tigpangitag-sayop makahimo kaha sa pagsulti sa ingon niana atubangan kang Jehova kon nakita pa nila siya sa pisikal? Dili gayod! Apan tungod kay dili man makita ang Diyos, kadtong unodnong mga lalaki napakyas sa paghunahuna nga sila may tulubagon kaniya.
12. Unsang tinamdan ang angay natong ipakita niadtong nanguna sa kongregasyon?
12 Tinuod, ang Kristohanong kongregasyon gilangkoban sa dili-hingpit nga mga tawo. Kadtong nag-alagad ingong mga ansiyano mangasayop nga usahay makaapektar kanato mismo. Bisan pa niana, gigamit ni Jehova ang maong mga tawo ingong mga magbalantay sa iyang panon. (1 Pedro 5:1, 2) Giila sa mga lalaki ug babaye nga mahunahunaon sa espirituwal nga mga butang nga mao kiniy usa ka paagi nga si Jehova nagtultol sa iyang katawhan. Busa, ingong mga Kristohanon, likayan nato ang hinawayon, reklamador nga espiritu ug ipakita nato ang pagtahod sa teokratikanhong mga kahikayan sa Diyos. Pinaagi sa pagsugot niadtong nagapanguna sa atong taliwala, atong gipasundayag nga atong nakita ang Usa nga dili makita.—Hebreohanon 13:17.
Pag-ila sa Diyos Ingong Atong Dakong Instruktor
13, 14. Unsay kahulogan alang kanimo sa pag-ila kang Jehova ingong Dakong Instruktor?
13 Adunay laing natad nga nagkinahanglan ug espirituwal nga pagsabot. Si Isaias mitagna: “Ang imong mga mata mahimo gayong mga mata nga makakita sa imong Dakong Instruktor.” (Isaias 30:20) Nagkinahanglag pagtuo ang pag-ila nga si Jehova mao ang usa nga nagatudlo kanato pinaagi sa iyang yutan-ong organisasyon. (Mateo 24:45-47) Ang pag-ila sa Diyos ingong atong Dakong Instruktor nagkahulogan ug labaw pa kay sa paghupot ug maayong mga batasan sa pagtuon sa Bibliya ug regular nga pagtambong sa Kristohanong mga tigom. Nagkahulogan kini ug bug-os nga pagpahimulos sa espirituwal nga mga tagana sa Diyos. Pananglitan, kinahanglang hatagan nato ug labaw pa kay sa kasagarang pagtagad ang giya nga gihatag ni Jehova pinaagi kang Jesus aron dili kita maanod sa espirituwal nga paagi.—Hebreohanon 2:1.
14 Usahay nagkinahanglag linaing paningkamot aron makakuha ug bug-os nga kaayohan gikan sa espirituwal nga pagkaon. Pananglitan, may kiling tingali kita sa pagdalidali ug basa sa pipila ka asoy sa Bibliya nga nakita natong lisod sabton. Sa dihang magbasa sa mga magasing Bantayanang Torre ug Pagmata!, tingali laktawan gani nato ang pipila ka artikulo tungod kay dili kita interesado sa maong ulohan. O tugotan tingali nato nga maglatagaw ang atong hunahuna panahon sa Kristohanong mga tigom. Hinunoa, makapabilin kitang alisto kon analisahon nato pag-ayo ang mga punto nga gihisgotan. Ang atong halalom nga pagpasalamat sa espirituwal nga instruksiyon nga atong nadawat nagpakita nga atong giila si Jehova ingong atong Dakong Instruktor.
Kinahanglang Manubag Kita
15. Sa unsang paagi ang uban milihok nga daw wala sila makita ni Jehova?
15 Tungod ilabina kay nagdagsang ang pagkadaotan niining “panahon sa kataposan,” hinungdanon ang pagtuo sa Usa nga dili makita. (Daniel 12:4) Ang pagkadili-matinud-anon ug seksuwal nga imoralidad kaylap kaayo. Siyempre, maalamong hinumdoman nga si Jehova naniid sa atong mga lihok bisan pag ang mga tawo dili makakita kanato. Ang uban wala na makaamgo niining kamatuorana. Kon ang uban wala makakita kanila, sila tingali mohimog dili-Kasulatanhong panggawi. Pananglitan, ang uban wala makigbisog sa tentasyon nga motan-aw ug makadaot nga kalingawan ug pornograpiya diha sa Internet, telebisyon, ug uban pang matang sa modernong teknolohiya. Tungod kay ang pagkalangkit sa maong mga butang mahimo mang himoon sa pribado, ang uban milihok nga daw ang ilang panggawi dili makita ni Jehova.
16. Unsay angayng motabang kanato sa pagsunod sa hataas nga mga sukdanan ni Jehova?
16 Maayong hinumdoman ang mga pulong ni apostol Pablo: “Ang matag usa kanato manubag alang sa iyang kaugalingon ngadto sa Diyos.” (Roma 14:12) Kinahanglang makaamgo kita nga sa matag higayon nga kita makasala, kita nakasala kang Jehova. Ang pagkahibalo niini angayng motabang kanato sa pagsunod sa iyang hataas nga mga sukdanan ug sa paglikay sa mahugaw nga panggawi. Ang Bibliya nagpahinumdom kanato: “Walay linalang nga dili dayag sa iyang panan-aw, apan ang tanang butang hubo ug binuksan sa mga mata niya nga kaniya manubag kita.” (Hebreohanon 4:13) Tinuod, kinahanglang manubag kita sa Diyos, apan tino nga ang atong halalom nga gugma kang Jehova mao gayod ang pangunang rason kon nganong tumanon nato ang iyang kabubut-on ug dawaton ug sundon ang iyang matarong nga mga sukdanan. Busa gamiton nato ang maayong panghukom sa maong mga butang sama sa atong pagpili ug kalingawan ug sa atong panggawi uban sa kaatbang nga sekso.
17. Uban sa unsang matang sa interes nga si Jehova naniid kanato?
17 Si Jehova interesado kaayo kanato, apan wala kana magpasabot nga siya naghulat nga kita mohimog mga sala aron iya kitang kasilotan. Hinunoa, siya naniid kanato uban ang mahigugmaong kabalaka, sama nianang sa usa ka amahan kinsa gustong moganti sa iyang masinugtanong mga anak. Pagkamakapahupay ang pagkahibalo nga ang atong langitnong Amahan nahimuot sa atong pagtuo ug “maoy tigganti sa mga matinuorong nagapangita kaniya.” (Hebreohanon 11:6) Hinaot magpasundayag kita ug bug-os nga pagtuo kang Jehova ug ‘mag-alagad kaniya uban ang bug-os nga kasingkasing.’—1 Cronicas 28:9.
18. Tungod kay si Jehova naniid kanato ug nakakita sa atong pagkamatinumanon, unsang pasalig ang atong madawat gikan sa Kasulatan?
18 Ang Proverbio 15:3 nag-ingon: “Ang mga mata ni Jehova anaa sa tanang dapit, nga nagpadayon pagbantay sa mga daotan ug sa mga maayo.” Oo, ang Diyos padayong nagabantay sa mga daotan ug nakiglabot kanila sumala sa ilang panggawi. Apan, kon nalakip kita sa “mga maayo,” makaseguro kita nga makita ni Jehova ang atong mga buhat sa pagkamatinumanon. Pagkamakapalig-on sa pagtuo ang pagkahibalo nga ang ‘atong paghago dili makawang may kalabotan sa Ginoo’ ug nga ang usa nga dili-makita dili ‘malimot sa atong buhat ug sa gugma nga atong gipakita alang sa iyang ngalan’!—1 Corinto 15:58; Hebreohanon 6:10.
Pagdapit Kang Jehova sa Pagsusi Kanato
19. Unsa ang pipila sa mga kaayohan nga moresulta tungod sa lig-ong pagtuo kang Jehova?
19 Ingong matinumanong mga alagad ni Jehova, bililhon kita kaniya. (Mateo 10:29-31) Bisan tuod dili siya makita, siya mahimong tinuod kanato, ug atong maugmad ang atong bililhong relasyon kaniya. Ang pagbaton nianang maong tinamdan ngadto sa atong langitnong Amahan maghatag kanato ug daghang kaayohan. Ang atong lig-on nga pagtuo motabang kanato sa paghupot ug hinlo nga kasingkasing ug maayong tanlag atubangan kang Jehova. Ang pagtuo nga walay pagkasalingkapaw mopugong usab kanato sa pagkinabuhi ug dobleng kinabuhi. (1 Timoteo 1:5, 18, 19) Ang atong dili-matarog nga pagtuo sa Diyos maghatag ug maayong panig-ingnan ug makapadasig niadtong anaa sa palibot nato. (1 Timoteo 4:12) Dugang pa, ang maong pagtuo mamunga ug diyosnong panggawi, nga makapalipay sa kasingkasing ni Jehova.—Proverbio 27:11.
20, 21. (a) Nganong tilinguhaon nga si Jehova magabantay kanato? (b) Sa unsang paagi ikapadapat nato ang Salmo 139:23, 24 sa atong kaugalingon?
20 Kon tinuod kitang maalamon, malipay kita nga bantayan kita ni Jehova. Dili lang kay gusto nato nga iya kitang makita kondili nagtinguha usab kita nga mohimo siya ug bug-os nga pagsusi sa atong mga hunahuna ug mga lihok. Sa pag-ampo, maayong dapiton nato si Jehova sa pagsusi kanato ug sa pag-ila kon duna ba kitay bisan unsang dili-hustong mga kiling. Makatabang gayod siya kanato sa pagsagubang sa atong mga problema ug sa paghimo sa bisan unsang gikinahanglang mga kausaban. Sa kahaom, ang salmistang si David miawit: “Oh Diyos, susiha ako, ug hibaloi ang akong kasingkasing. Susiha ako, ug hibaloi ang akong makapatugaw nga mga hunahuna, ug tan-awa kon aduna bay masakit nga dalan diha kanako, ug tultoli ako sa dalan nga hangtod sa panahong walay tino.”—Salmo 139:23, 24.
21 Si David mihangyo nga susihon siya ni Jehova aron tan-awon kon aduna bay “masakit nga dalan” diha kaniya. Sama sa salmista, dili ba mangandoy kita nga susihon sa Diyos ang atong kasingkasing ug tan-awon kon aduna ba kitay dili-hustong mga motibo? Nan, nga may pagtuo, hangyoon nato si Jehova sa pagsusi kanato. Apan komosta kon gihasol kita sa kabalaka tungod sa usa ka sayop o dunay butang makadaot sa sulod nato? Nan magpadayon kita sa pag-ampo nga tim-os sa atong mahigugmaong Diyos, si Jehova, ug mapainubsanong magpasakop sa pagtultol sa iyang balaang espiritu ug sa tambag sa iyang Pulong. Makasalig kita nga siya moabag kanato ug motabang kanato sa pagsubay sa dalan nga motultol sa walay-kataposang kinabuhi.—Salmo 40:11-13.
22. Unsay angay natong determinasyon maylabot sa Usa nga dili makita?
22 Oo, si Jehova magapanalangin kanato uban ang kinabuhing dayon kon atong kab-oton ang iyang mga kinahanglanon. Siyempre, kinahanglang ilhon nato ang iyang gahom ug awtoridad, sama sa gibuhat ni apostol Pablo sa dihang siya misulat: “Ngadto sa Hari nga walay kataposan, dili-madunoton, dili-makita, ang bugtong nga Diyos, kaniya ang dungog ug himaya hangtod sa kahangtoran. Amen.” (1 Timoteo 1:17) Hinaot kanunay natong ipasundayag ang ingon nianang kinasingkasing nga pagtahod kang Jehova. Ug bisan unsa pay mahitabo, hinaot nga dili gayod matarog ang atong determinasyon nga padayong magmalig-on nga daw nakakita sa Usa nga dili makita.
Unsaon Nimo Pagtubag?
• Sa unsang paagi posible nga ang mga tawo makakita sa Diyos?
• Kon si Jehova tinuod kanato, sa unsang paagi kita molihok kon kita ginalutos?
• Unsay kahulogan sa pag-ila kang Jehova ingong atong Dakong Instruktor?
• Nganong tinguhaon nato nga susihon kita ni Jehova?
[Hulagway sa panid 18]
Si Moises, kay wala mahadlok kang Paraon, milihok nga daw nakita niya si Jehova, ang dili-makitang Diyos
[Hulagway sa panid 21]
Dili gayod kita molihok nga daw si Jehova wala makakita sa atong ginabuhat
[Hulagway sa panid 23]
Tim-os natong gipangita ang kahibalo sa Diyos tungod kay giila nato siya ingong atong Dakong Instruktor